| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. සඞ්‌ඝාදිසෙසකණ්‌ඩාදි
2. Saṅghādisesakaṇḍādi
194. උපක්‌කමිත්‌වා අසුචිං මොචනපච්‌චයා කති ආපත්‌තියො ආපජ්‌ජති? උපක්‌කමිත්‌වා අසුචිමොචනපච්‌චයා තිස්‌සො ආපත්‌තියො ආපජ්‌ජති – චෙතෙති උපක්‌කමති මුච්‌චති, ආපත්‌ති සඞ්‌ඝාදිසෙසස්‌ස; චෙතෙති උපක්‌කමති න මුච්‌චති, ආපත්‌ති ථුල්‌ලච්‌චයස්‌ස; පයොගෙ දුක්‌කටං – උපක්‌කමිත්‌වා අසුචිමොචනපච්‌චයා ඉමා තිස්‌සො ආපත්‌තියො ආපජ්‌ජති.
194. Upakkamitvā asuciṃ mocanapaccayā kati āpattiyo āpajjati? Upakkamitvā asucimocanapaccayā tisso āpattiyo āpajjati – ceteti upakkamati muccati, āpatti saṅghādisesassa; ceteti upakkamati na muccati, āpatti thullaccayassa; payoge dukkaṭaṃ – upakkamitvā asucimocanapaccayā imā tisso āpattiyo āpajjati.
කායසංසග්‌ගං සමාපජ්‌ජනපච්‌චයා කති ආපත්‌තියො ආපජ්‌ජති? කායසංසග්‌ගං සමාපජ්‌ජනපච්‌චයා පඤ්‌ච ආපත්‌තියො ආපජ්‌ජති – අවස්‌සුතා භික්‌ඛුනී අවස්‌සුතස්‌ස පුරිසපුග්‌ගලස්‌ස අධක්‌ඛකං උබ්‌භජාණුමණ්‌ඩලං ගහණං සාදියති, ආපත්‌ති පාරාජිකස්‌ස; භික්‌ඛු කායෙන කායං ආමසති, ආපත්‌ති සඞ්‌ඝාදිසෙසස්‌ස; කායෙන කායපටිබද්‌ධං ආමසති, ආපත්‌ති ථුල්‌ලච්‌චයස්‌ස; කායපටිබද්‌ධෙන කායපටිබද්‌ධං ආමසති, ආපත්‌ති දුක්‌කටස්‌ස; අඞ්‌ගුලිපතොදකෙ පාචිත්‌තියං – කායසංසග්‌ගං සමාපජ්‌ජනපච්‌චයා ඉමා පඤ්‌ච ආපත්‌තියො ආපජ්‌ජති.
Kāyasaṃsaggaṃ samāpajjanapaccayā kati āpattiyo āpajjati? Kāyasaṃsaggaṃ samāpajjanapaccayā pañca āpattiyo āpajjati – avassutā bhikkhunī avassutassa purisapuggalassa adhakkhakaṃ ubbhajāṇumaṇḍalaṃ gahaṇaṃ sādiyati, āpatti pārājikassa; bhikkhu kāyena kāyaṃ āmasati, āpatti saṅghādisesassa; kāyena kāyapaṭibaddhaṃ āmasati, āpatti thullaccayassa; kāyapaṭibaddhena kāyapaṭibaddhaṃ āmasati, āpatti dukkaṭassa; aṅgulipatodake pācittiyaṃ – kāyasaṃsaggaṃ samāpajjanapaccayā imā pañca āpattiyo āpajjati.
මාතුගාමං දුට්‌ඨුල්‌ලාහි වාචාහි ඔභාසනපච්‌චයා තිස්‌සො ආපත්‌තියො ආපජ්‌ජති – වච්‌චමග්‌ගං පස්‌සාවමග්‌ගං ආදිස්‌ස වණ්‌ණම්‌පි භණති අවණ්‌ණම්‌පි භණති, ආපත්‌ති සඞ්‌ඝාදිසෙසස්‌ස; වච්‌චමග්‌ගං පස්‌සාවමග්‌ගං ඨපෙත්‌වා අධක්‌ඛකං උබ්‌භජාණුමණ්‌ඩලං ආදිස්‌ස වණ්‌ණම්‌පි භණති අවණ්‌ණම්‌පි භණති, ආපත්‌ති ථුල්‌ලච්‌චයස්‌ස; කායපටිබද්‌ධං ආදිස්‌ස වණ්‌ණම්‌පි භණති අවණ්‌ණම්‌පි භණති, ආපත්‌ති දුක්‌කටස්‌ස.
Mātugāmaṃ duṭṭhullāhi vācāhi obhāsanapaccayā tisso āpattiyo āpajjati – vaccamaggaṃ passāvamaggaṃ ādissa vaṇṇampi bhaṇati avaṇṇampi bhaṇati, āpatti saṅghādisesassa; vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati avaṇṇampi bhaṇati, āpatti thullaccayassa; kāyapaṭibaddhaṃ ādissa vaṇṇampi bhaṇati avaṇṇampi bhaṇati, āpatti dukkaṭassa.
අත්‌තකාමපාරිචරියාය වණ්‌ණං භාසනපච්‌චයා තිස්‌සො ආපත්‌තියො ආපජ්‌ජති – මාතුගාමස්‌ස සන්‌තිකෙ අත්‌තකාමපාරිචරියාය වණ්‌ණං භාසති, ආපත්‌ති සඞ්‌ඝාදිසෙසස්‌ස; පණ්‌ඩකස්‌ස සන්‌තිකෙ අත්‌තකාමපාරිචරියාය වණ්‌ණං භාසති, ආපත්‌ති ථුල්‌ලච්‌චයස්‌ස; තිරච්‌ඡානගතස්‌ස සන්‌තිකෙ අත්‌තකාමපාරිචරියාය වණ්‌ණං භාසති, ආපත්‌ති දුක්‌කටස්‌ස.
Attakāmapāricariyāya vaṇṇaṃ bhāsanapaccayā tisso āpattiyo āpajjati – mātugāmassa santike attakāmapāricariyāya vaṇṇaṃ bhāsati, āpatti saṅghādisesassa; paṇḍakassa santike attakāmapāricariyāya vaṇṇaṃ bhāsati, āpatti thullaccayassa; tiracchānagatassa santike attakāmapāricariyāya vaṇṇaṃ bhāsati, āpatti dukkaṭassa.
සඤ්‌චරිත්‌තං සමාපජ්‌ජනපච්‌චයා තිස්‌සො ආපත්‌තියො ආපජ්‌ජති – පටිග්‌ගණ්‌හාති වීමංසති පච්‌චාහරති, ආපත්‌ති සඞ්‌ඝාදිසෙසස්‌ස; පටිග්‌ගණ්‌හාති වීමංසති න පච්‌චාහරති, ආපත්‌ති ථුල්‌ලච්‌චයස්‌ස; පටිග්‌ගණ්‌හාති න වීමංසති න පච්‌චාහරති, ආපත්‌ති දුක්‌කටස්‌ස.
Sañcarittaṃ samāpajjanapaccayā tisso āpattiyo āpajjati – paṭiggaṇhāti vīmaṃsati paccāharati, āpatti saṅghādisesassa; paṭiggaṇhāti vīmaṃsati na paccāharati, āpatti thullaccayassa; paṭiggaṇhāti na vīmaṃsati na paccāharati, āpatti dukkaṭassa.
සඤ්‌ඤාචිකාය කුටිං කාරාපනපච්‌චයා තිස්‌සො ආපත්‌තියො ආපජ්‌ජති – කාරාපෙති, පයොගෙ දුක්‌කටං; එකං පිණ්‌ඩං 1 අනාගතෙ ආපත්‌ති ථුල්‌ලච්‌චයස්‌ස; තස්‌මිං පිණ්‌ඩෙ ආගතෙ ආපත්‌ති සඞ්‌ඝාදිසෙසස්‌ස.
Saññācikāya kuṭiṃ kārāpanapaccayā tisso āpattiyo āpajjati – kārāpeti, payoge dukkaṭaṃ; ekaṃ piṇḍaṃ 2 anāgate āpatti thullaccayassa; tasmiṃ piṇḍe āgate āpatti saṅghādisesassa.
මහල්‌ලකං විහාරං කාරාපනපච්‌චයා තිස්‌සො ආපත්‌තියො ආපජ්‌ජති – කාරාපෙති, පයොගෙ දුක්‌කටං; එකං පිණ්‌ඩං අනාගතෙ, ආපත්‌ති ථුල්‌ලච්‌චයස්‌ස; තස්‌මිං පිණ්‌ඩෙ ආගතෙ ආපත්‌ති සඞ්‌ඝාදිසෙසස්‌ස.
Mahallakaṃ vihāraṃ kārāpanapaccayā tisso āpattiyo āpajjati – kārāpeti, payoge dukkaṭaṃ; ekaṃ piṇḍaṃ anāgate, āpatti thullaccayassa; tasmiṃ piṇḍe āgate āpatti saṅghādisesassa.
භික්‌ඛුං අමූලකෙන පාරාජිකෙන ධම්‌මෙන අනුද්‌ධංසනපච්‌චයා තිස්‌සො ආපත්‌තියො ආපජ්‌ජති – අනොකාසං කාරාපෙත්‌වා චාවනාධිප්‌පායො වදෙති, ආපත්‌ති සඞ්‌ඝාදිසෙසෙන දුක්‌කටස්‌ස; ඔකාසං කාරාපෙත්‌වා අක්‌කොසාධිප්‌පායො වදෙති, ආපත්‌ති ඔමසවාදස්‌ස.
Bhikkhuṃ amūlakena pārājikena dhammena anuddhaṃsanapaccayā tisso āpattiyo āpajjati – anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa; okāsaṃ kārāpetvā akkosādhippāyo vadeti, āpatti omasavādassa.
භික්‌ඛුං අඤ්‌ඤභාගියස්‌ස අධිකරණස්‌ස කිඤ්‌චි දෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසනපච්‌චයා තිස්‌සො ආපත්‌තියො ආපජ්‌ජති – අනොකාසං කාරාපෙත්‌වා චාවනාධිප්‌පායො වදෙති, ආපත්‌ති සඞ්‌ඝාදිසෙසෙන දුක්‌කටස්‌ස; ඔකාසං කාරාපෙත්‌වා අක්‌කොසාධිප්‌පායො වදෙති, ආපත්‌ති ඔමසවාදස්‌ස.
Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsanapaccayā tisso āpattiyo āpajjati – anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa; okāsaṃ kārāpetvā akkosādhippāyo vadeti, āpatti omasavādassa.
සඞ්‌ඝභෙදකො භික්‌ඛු යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති – ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Saṅghabhedako bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
භෙදකානුවත්‌තකා භික්‌ඛූ යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති – ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Bhedakānuvattakā bhikkhū yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
දුබ්‌බචො භික්‌ඛු යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති – ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Dubbaco bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
කුලදූසකො භික්‌ඛු යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති – ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස…පෙ.….
Kuladūsako bhikkhu yāvatatiyaṃ samanubhāsanāya na paṭinissajjanapaccayā tisso āpattiyo āpajjati – ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa…pe….
අනාදරියං පටිච්‌ච උදකෙ උච්‌චාරං වා පස්‌සාවං වා ඛෙළං වා කරණපච්‌චයා කති ආපත්‌තියො ආපජ්‌ජති? අනාදරියං පටිච්‌ච උදකෙ උච්‌චාරං වා පස්‌සාවං වා ඛෙළං වා කරණපච්‌චයා එකං ආපත්‌තිං ආපජ්‌ජති. දුක්‌කටං – අනාදරියං පටිච්‌ච උදකෙ උච්‌චාරං වා පස්‌සාවං වා ඛෙළං වා කරණපච්‌චයා ඉමං එකං ආපත්‌තිං ආපජ්‌ජති.
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā kati āpattiyo āpajjati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā ekaṃ āpattiṃ āpajjati. Dukkaṭaṃ – anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā imaṃ ekaṃ āpattiṃ āpajjati.
කතාපත්‌තිවාරො නිට්‌ඨිතො දුතියො.
Katāpattivāro niṭṭhito dutiyo.
Footnotes:
