| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. සඞ්‌ඝාදිසෙසකණ්‌ඩාදි
2. Saṅghādisesakaṇḍādi
250. උස්‌සයවාදිකා භික්‌ඛුනී අඩ්‌ඩං කරණපච්‌චයා තිස්‌සො ආපත්‌තියො ආපජ්‌ජති. එකස්‌ස ආරොචෙති, ආපත්‌ති දුක්‌කටස්‌ස; දුතියස්‌ස ආරොචෙති, ආපත්‌ති ථුල්‌ලච්‌චයස්‌ස; අඩ්‌ඩපරියොසානෙ ආපත්‌ති සඞ්‌ඝාදිසෙසස්‌ස.
250. Ussayavādikā bhikkhunī aḍḍaṃ karaṇapaccayā tisso āpattiyo āpajjati. Ekassa āroceti, āpatti dukkaṭassa; dutiyassa āroceti, āpatti thullaccayassa; aḍḍapariyosāne āpatti saṅghādisesassa.
චොරිං වුට්‌ඨාපනපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Coriṃ vuṭṭhāpanapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
එකා ගාමන්‌තරං ගමනපච්‌චයා තිස්‌සො ආපත්‌තියො ආපජ්‌ජති. ගච්‌ඡති, ආපත්‌ති දුක්‌කටස්‌ස; පඨමං පාදං පරික්‌ඛෙපං අතික්‌කාමෙති, ආපත්‌ති ථුල්‌ලච්‌චයස්‌ස; දුතියං පාදං අතික්‌කාමෙති, ආපත්‌ති සඞ්‌ඝාදිසෙසස්‌ස.
Ekā gāmantaraṃ gamanapaccayā tisso āpattiyo āpajjati. Gacchati, āpatti dukkaṭassa; paṭhamaṃ pādaṃ parikkhepaṃ atikkāmeti, āpatti thullaccayassa; dutiyaṃ pādaṃ atikkāmeti, āpatti saṅghādisesassa.
සමග්‌ගෙන සඞ්‌ඝෙන උක්‌ඛිත්‌තං භික්‌ඛුනිං ධම්‌මෙන විනයෙන සත්‌ථුසාසනෙන අනපලොකෙත්‌වා කාරකසඞ්‌ඝං අනඤ්‌ඤාය ගණස්‌ස ඡන්‌දං ඔසාරණපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osāraṇapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
අවස්‌සුතා භික්‌ඛුනී අවස්‌සුතස්‌ස පුරිසපුග්‌ගලස්‌ස හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා භුඤ්‌ජනපච්‌චයා තිස්‌සො ආපත්‌තියො ආපජ්‌ජති. ‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති ථුල්‌ලච්‌චයස්‌ස; අජ්‌ඣොහාරෙ අජ්‌ඣොහාරෙ ආපත්‌ති සඞ්‌ඝාදිසෙසස්‌ස; උදකදන්‌තපොනං පටිග්‌ගණ්‌හාති, ආපත්‌ති දුක්‌කටස්‌ස.
Avassutā bhikkhunī avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā bhuñjanapaccayā tisso āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti thullaccayassa; ajjhohāre ajjhohāre āpatti saṅghādisesassa; udakadantaponaṃ paṭiggaṇhāti, āpatti dukkaṭassa.
‘‘කිං තෙ, අය්‍යෙ, එසො පුරිසපුග්‌ගලො කරිස්‌සති අවස්‌සුතො වා අනවස්‌සුතො වා, යතො ත්‌වං අනවස්‌සුතා! ඉඞ්‌ඝ, අය්‍යෙ, යං තෙ එසො පුරිසපුග්‌ගලො දෙති ඛාදනීයං වා භොජනීයං වා තං ත්‌වං සහත්‌ථා පටිග්‌ගහෙත්‌වා ඛාද වා භුඤ්‌ජ වා’’ති, උය්‍යොජනපච්‌චයා තිස්‌සො ආපත්‌තියො ආපජ්‌ජති. තස්‌සා වචනෙන ඛාදිස්‌සාමි භුඤ්‌ජිස්‌සාමීති පටිග්‌ගණ්‌හාති, ආපත්‌ති දුක්‌කටස්‌ස; අජ්‌ඣොහාරෙ අජ්‌ඣොහාරෙ ආපත්‌ති ථුල්‌ලච්‌චයස්‌ස; භොජනපරියොසානෙ ආපත්‌ති සඞ්‌ඝාදිසෙසස්‌ස.
‘‘Kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā! Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’’ti, uyyojanapaccayā tisso āpattiyo āpajjati. Tassā vacanena khādissāmi bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti thullaccayassa; bhojanapariyosāne āpatti saṅghādisesassa.
කුපිතා භික්‌ඛුනී යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Kupitā bhikkhunī yāvatatiyaṃ samanubhāsanāya na paṭinissajjanapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
කිස්‌මිඤ්‌චිදෙව අධිකරණෙ පච්‌චාකතා භික්‌ඛුනී යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Kismiñcideva adhikaraṇe paccākatā bhikkhunī yāvatatiyaṃ samanubhāsanāya na paṭinissajjanapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
සංසට්‌ඨා භික්‌ඛුනී යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
Saṃsaṭṭhā bhikkhunī yāvatatiyaṃ samanubhāsanāya na paṭinissajjanapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
‘‘සංසට්‌ඨාව, අය්‍යෙ, තුම්‌හෙ විහරථ, මා තුම්‌හෙ නානා විහරිත්‌ථා’’ති උය්‍යොජෙන්‌තී යාවතතියං සමනුභාසනාය න පටිනිස්‌සජ්‌ජනපච්‌චයා තිස්‌සො ආපත්‌තියො ආපජ්‌ජති. ඤත්‌තියා දුක්‌කටං; ද්‌වීහි කම්‌මවාචාහි ථුල්‌ලච්‌චයා; කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස.
‘‘Saṃsaṭṭhāva, ayye, tumhe viharatha, mā tumhe nānā viharitthā’’ti uyyojentī yāvatatiyaṃ samanubhāsanāya na paṭinissajjanapaccayā tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
දස සඞ්‌ඝාදිසෙසා නිට්‌ඨිතා…පෙ.….
Dasa saṅghādisesā niṭṭhitā…pe….
(යථා හෙට්‌ඨා තථා විත්‌ථාරෙතබ්‌බා පච්‌චයමෙව නානාකරණං)
(Yathā heṭṭhā tathā vitthāretabbā paccayameva nānākaraṇaṃ)
දධිං විඤ්‌ඤාපෙත්‌වා භුඤ්‌ජනපච්‌චයා කති ආපත්‌තියො ආපජ්‌ජති? දධිං විඤ්‌ඤාපෙත්‌වා භුඤ්‌ජනපච්‌චයා ද්‌වෙ ආපත්‌තියො ආපජ්‌ජති. භුඤ්‌ජිස්‌සාමීති පටිග්‌ගණ්‌හාති, ආපත්‌ති දුක්‌කටස්‌ස; අජ්‌ඣොහාරෙ අජ්‌ඣොහාරෙ ආපත්‌ති පාටිදෙසනීයස්‌ස – දධිං විඤ්‌ඤාපෙත්‌වා භුඤ්‌ජනපච්‌චයා ඉමා ද්‌වෙ ආපත්‌තියො ආපජ්‌ජති.
Dadhiṃ viññāpetvā bhuñjanapaccayā kati āpattiyo āpajjati? Dadhiṃ viññāpetvā bhuñjanapaccayā dve āpattiyo āpajjati. Bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa – dadhiṃ viññāpetvā bhuñjanapaccayā imā dve āpattiyo āpajjati.
කතාපත්‌තිවාරො නිට්‌ඨිතො දුතියො.
Katāpattivāro niṭṭhito dutiyo.
