| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. ஸங்கா⁴தி³ஸேஸகண்ட³ங்
2. Saṅghādisesakaṇḍaṃ
7. யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன உபக்கமித்வா அஸுசிங் மோசெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோ? கங் ஆரப்³ப⁴? கிஸ்மிங் வத்து²ஸ்மிங்? அத்தி² தத்த² பஞ்ஞத்தி, அனுபஞ்ஞத்தி , அனுப்பன்னபஞ்ஞத்தி? ஸப்³ப³த்த²பஞ்ஞத்தி, பதே³ஸபஞ்ஞத்தி? ஸாதா⁴ரணபஞ்ஞத்தி, அஸாதா⁴ரணபஞ்ஞத்தி? ஏகதோபஞ்ஞத்தி, உப⁴தோபஞ்ஞத்தி? பஞ்சன்னங் பாதிமொக்கு²த்³தே³ஸானங் கத்தோ²க³த⁴ங் கத்த² பரியாபன்னங்? கதமேன உத்³தே³ஸேன உத்³தே³ஸங் ஆக³ச்ச²தி? சதுன்னங் விபத்தீனங் கதமா விபத்தி? ஸத்தன்னங் ஆபத்திக்க²ந்தா⁴னங் கதமோ ஆபத்திக்க²ந்தோ⁴? ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்டா²தி? சதுன்னங் அதி⁴கரணானங் கதமங் அதி⁴கரணங்? ஸத்தன்னங் ஸமதா²னங் கதிஹி ஸமதே²ஹி ஸம்மதி? கோ தத்த² வினயோ, கோ தத்த² அபி⁴வினயோ? கிங் தத்த² பாதிமொக்க²ங், கிங் தத்த² அதி⁴பாதிமொக்க²ங் ? கா விபத்தி, கா ஸம்பத்தி, கா படிபத்தி? கதி அத்த²வஸே படிச்ச ப⁴க³வதா உபக்கமித்வா அஸுசிங் மோசெந்தஸ்ஸ ஸங்கா⁴தி³ஸேஸோ பஞ்ஞத்தோ? கே ஸிக்க²ந்தி, கே ஸிக்கி²தஸிக்கா²? கத்த² டி²தங்? கே தா⁴ரெந்தி? கஸ்ஸ வசனங்? கேனாப⁴தந்தி?
7. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññatto? Kaṃ ārabbha? Kismiṃ vatthusmiṃ? Atthi tattha paññatti, anupaññatti , anuppannapaññatti? Sabbatthapaññatti, padesapaññatti? Sādhāraṇapaññatti, asādhāraṇapaññatti? Ekatopaññatti, ubhatopaññatti? Pañcannaṃ pātimokkhuddesānaṃ katthogadhaṃ kattha pariyāpannaṃ? Katamena uddesena uddesaṃ āgacchati? Catunnaṃ vipattīnaṃ katamā vipatti? Sattannaṃ āpattikkhandhānaṃ katamo āpattikkhandho? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Ko tattha vinayo, ko tattha abhivinayo? Kiṃ tattha pātimokkhaṃ, kiṃ tattha adhipātimokkhaṃ ? Kā vipatti, kā sampatti, kā paṭipatti? Kati atthavase paṭicca bhagavatā upakkamitvā asuciṃ mocentassa saṅghādiseso paññatto? Ke sikkhanti, ke sikkhitasikkhā? Kattha ṭhitaṃ? Ke dhārenti? Kassa vacanaṃ? Kenābhatanti?
8. யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன உபக்கமித்வா அஸுசிங் மோசெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? ஆயஸ்மந்தங் ஸெய்யஸகங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா ஸெய்யஸகோ ஹத்தே²ன உபக்கமித்வா அஸுசிங் மோசேஸி, தஸ்மிங் வத்து²ஸ்மிங். அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தீதி? ஏகா பஞ்ஞத்தி, ஏகா அனுபஞ்ஞத்தி. அனுப்பன்னபஞ்ஞத்தி தஸ்மிங் நத்தி². ஸப்³ப³த்த² பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி, அஸாதா⁴ரணபஞ்ஞத்தீதி ? அஸாதா⁴ரணபஞ்ஞத்தி. ஏகதோபஞ்ஞத்தி, உப⁴தோபஞ்ஞத்தீதி? ஏகதோபஞ்ஞத்தி. பஞ்சன்னங் பாதிமொக்கு²த்³தே³ஸானங் கத்தோ²க³த⁴ங் கத்த² பரியாபன்னந்தி? நிதா³னோக³த⁴ங் நிதா³னபரியாபன்னங். கதமேன உத்³தே³ஸேன உத்³தே³ஸங் ஆக³ச்ச²தீதி? ததியே உத்³தே³ஸேன உத்³தே³ஸங் ஆக³ச்ச²தி . சதுன்னங் விபத்தீனங் கதமா விபத்தீதி? ஸீலவிபத்தி. ஸத்தன்னங் ஆபத்திக்க²ந்தா⁴னங் கதமோ ஆபத்திக்க²ந்தோ⁴தி? ஸங்கா⁴தி³ஸேஸோ ஆபத்திக்க²ந்தோ⁴. ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்டா²தீதி? ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னங் அதி⁴கரணானங் கதமங் அதி⁴கரணந்தி? ஆபத்தாதி⁴கரணங். ஸத்தன்னங் ஸமதா²னங் கதிஹி ஸமதே²ஹி ஸம்மதீதி? த்³வீஹி ஸமதே²ஹி ஸம்மதி – ஸம்முகா²வினயேன ச படிஞ்ஞாதகரணேன ச. கோ தத்த² வினயோ, கோ தத்த² அபி⁴வினயோதி? பஞ்ஞத்தி வினயோ, விப⁴த்தி அபி⁴வினயோ. கிங் தத்த² பாதிமொக்க²ங், கிங் தத்த² அதி⁴பாதிமொக்க²ந்தி? பஞ்ஞத்தி பாதிமொக்க²ங், விப⁴த்தி அதி⁴பாதிமொக்க²ங். கா விபத்தீதி? அஸங்வரோ விபத்தி. கா ஸம்பத்தீதி? ஸங்வரோ ஸம்பத்தி. கா படிபத்தீதி? ந ஏவரூபங் கரிஸ்ஸாமீதி யாவஜீவங் ஆபாணகோடிகங் ஸமாதா³ய ஸிக்க²தி ஸிக்கா²பதே³ஸு. 1 கதி அத்த²வஸே படிச்ச ப⁴க³வதா உபக்கமித்வா அஸுசிங் மோசெந்தஸ்ஸ ஸங்கா⁴தி³ஸேஸோ பஞ்ஞத்தோதி? த³ஸ அத்த²வஸே படிச்ச ப⁴க³வதா உபக்கமித்வா அஸுசிங் மோசெந்தஸ்ஸ ஸங்கா⁴தி³ஸேஸோ பஞ்ஞத்தோ – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனங் புக்³க³லானங் நிக்³க³ஹாய, பேஸலானங் பி⁴க்கூ²னங் பா²ஸுவிஹாராய, தி³ட்ட²த⁴ம்மிகானங் ஆஸவானங் ஸங்வராய, ஸம்பராயிகானங் ஆஸவானங் படிகா⁴தாய, அப்பஸன்னானங் பஸாதா³ய, பஸன்னானங் பி⁴ய்யோபா⁴வாய, ஸத்³த⁴ம்மட்டி²தியா, வினயானுக்³க³ஹாய. கே ஸிக்க²ந்தீதி? ஸெக்கா² ச புது²ஜ்ஜனகல்யாணகா ச ஸிக்க²ந்தி. கே ஸிக்கி²தஸிக்கா²தி? அரஹந்தோ ஸிக்கி²தஸிக்கா². கத்த² டி²தந்தி? ஸிக்கா²காமேஸு டி²தங். கே தா⁴ரெந்தீதி? யேஸங் வத்ததி , தே தா⁴ரெந்தி. கஸ்ஸ வசனந்தி? ப⁴க³வதோ வசனங் அரஹதோ ஸம்மாஸம்பு³த்³த⁴ஸ்ஸ. கேனாப⁴தந்தி? பரம்பராப⁴தங் –
8. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ seyyasakaṃ ārabbha. Kismiṃ vatthusminti? Āyasmā seyyasako hatthena upakkamitvā asuciṃ mocesi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Sabbattha paññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti ? Asādhāraṇapaññatti. Ekatopaññatti, ubhatopaññattīti? Ekatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ nidānapariyāpannaṃ. Katamena uddesena uddesaṃ āgacchatīti? Tatiye uddesena uddesaṃ āgacchati . Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Saṅghādiseso āpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ katamaṃ adhikaraṇanti? Āpattādhikaraṇaṃ. Sattannaṃ samathānaṃ katihi samathehi sammatīti? Dvīhi samathehi sammati – sammukhāvinayena ca paṭiññātakaraṇena ca. Ko tattha vinayo, ko tattha abhivinayoti? Paññatti vinayo, vibhatti abhivinayo. Kiṃ tattha pātimokkhaṃ, kiṃ tattha adhipātimokkhanti? Paññatti pātimokkhaṃ, vibhatti adhipātimokkhaṃ. Kā vipattīti? Asaṃvaro vipatti. Kā sampattīti? Saṃvaro sampatti. Kā paṭipattīti? Na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu. 2 Kati atthavase paṭicca bhagavatā upakkamitvā asuciṃ mocentassa saṅghādiseso paññattoti? Dasa atthavase paṭicca bhagavatā upakkamitvā asuciṃ mocentassa saṅghādiseso paññatto – saṅghasuṭṭhutāya, saṅghaphāsutāya, dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā, vinayānuggahāya. Ke sikkhantīti? Sekkhā ca puthujjanakalyāṇakā ca sikkhanti. Ke sikkhitasikkhāti? Arahanto sikkhitasikkhā. Kattha ṭhitanti? Sikkhākāmesu ṭhitaṃ. Ke dhārentīti? Yesaṃ vattati , te dhārenti. Kassa vacananti? Bhagavato vacanaṃ arahato sammāsambuddhassa. Kenābhatanti? Paramparābhataṃ –
உபாலி தா³ஸகோ சேவ, ஸோணகோ ஸிக்³க³வோ ததா²;
Upāli dāsako ceva, soṇako siggavo tathā;
மொக்³க³லிபுத்தேன பஞ்சமா, ஏதே ஜம்பு³ஸிரிவ்ஹயே.
Moggaliputtena pañcamā, ete jambusirivhaye.
ததோ மஹிந்தோ³ இட்டியோ, உத்தியோ ஸம்ப³லோ ததா²;
Tato mahindo iṭṭiyo, uttiyo sambalo tathā;
ப⁴த்³த³னாமோ ச பண்டி³தோ.
Bhaddanāmo ca paṇḍito.
ஏதே நாகா³ மஹாபஞ்ஞா, ஜம்பு³தீ³பா இதா⁴க³தா;
Ete nāgā mahāpaññā, jambudīpā idhāgatā;
வினயங் தே வாசயிங்ஸு, பிடகங் தம்ப³பண்ணியா.
Vinayaṃ te vācayiṃsu, piṭakaṃ tambapaṇṇiyā.
நிகாயே பஞ்ச வாசேஸுங், ஸத்த சேவ பகரணே;
Nikāye pañca vācesuṃ, satta ceva pakaraṇe;
ததோ அரிட்டோ² மேதா⁴வீ, திஸ்ஸத³த்தோ ச பண்டி³தோ.
Tato ariṭṭho medhāvī, tissadatto ca paṇḍito.
விஸாரதோ³ காளஸுமனோ, தே²ரோ ச தீ³க⁴னாமகோ;
Visārado kāḷasumano, thero ca dīghanāmako;
தீ³க⁴ஸுமனோ ச பண்டி³தோ.
Dīghasumano ca paṇḍito.
புனதே³வ காளஸுமனோ, நாக³த்தே²ரோ ச பு³த்³த⁴ரக்கி²தோ;
Punadeva kāḷasumano, nāgatthero ca buddharakkhito;
திஸ்ஸத்தே²ரோ ச மேதா⁴வீ, தே³வத்தே²ரோ ச பண்டி³தோ.
Tissatthero ca medhāvī, devatthero ca paṇḍito.
புனதே³வ ஸுமனோ மேதா⁴வீ, வினயே ச விஸாரதோ³;
Punadeva sumano medhāvī, vinaye ca visārado;
ப³ஹுஸ்ஸுதோ சூளனாகோ³, க³ஜோவ து³ப்பத⁴ங்ஸியோ.
Bahussuto cūḷanāgo, gajova duppadhaṃsiyo.
த⁴ம்மபாலிதனாமோ ச, ரோஹணே ஸாது⁴பூஜிதோ;
Dhammapālitanāmo ca, rohaṇe sādhupūjito;
தஸ்ஸ ஸிஸ்ஸோ மஹாபஞ்ஞோ, கே²மனாமோ திபேடகோ.
Tassa sisso mahāpañño, khemanāmo tipeṭako.
தீ³பே தாரகராஜாவ, பஞ்ஞாய அதிரோசத²;
Dīpe tārakarājāva, paññāya atirocatha;
உபதிஸ்ஸோ ச மேதா⁴வீ, பு²ஸ்ஸதே³வோ மஹாகதீ².
Upatisso ca medhāvī, phussadevo mahākathī.
புனதே³வ ஸுமனோ மேதா⁴வீ, புப்ப²னாமோ ப³ஹுஸ்ஸுதோ;
Punadeva sumano medhāvī, pupphanāmo bahussuto;
மஹாகதீ² மஹாஸிவோ, பிடகே ஸப்³ப³த்த² கோவிதோ³.
Mahākathī mahāsivo, piṭake sabbattha kovido.
புனதே³வ உபாலி மேதா⁴வீ, வினயே ச விஸாரதோ³;
Punadeva upāli medhāvī, vinaye ca visārado;
மஹானாகோ³ மஹாபஞ்ஞோ, ஸத்³த⁴ம்மவங்ஸகோவிதோ³.
Mahānāgo mahāpañño, saddhammavaṃsakovido.
புனதே³வ அப⁴யோ மேதா⁴வீ, பிடகே ஸப்³ப³த்த² கோவிதோ³;
Punadeva abhayo medhāvī, piṭake sabbattha kovido;
திஸ்ஸத்தே²ரோ ச மேதா⁴வீ, வினயே ச விஸாரதோ³.
Tissatthero ca medhāvī, vinaye ca visārado.
தஸ்ஸ ஸிஸ்ஸோ மஹாபஞ்ஞோ, புப்ப²னாமோ ப³ஹுஸ்ஸுதோ;
Tassa sisso mahāpañño, pupphanāmo bahussuto;
ஸாஸனங் அனுரக்க²ந்தோ, ஜம்பு³தீ³பே பதிட்டி²தோ.
Sāsanaṃ anurakkhanto, jambudīpe patiṭṭhito.
சூளாப⁴யோ ச மேதா⁴வீ, வினயே ச விஸாரதோ³;
Cūḷābhayo ca medhāvī, vinaye ca visārado;
திஸ்ஸத்தே²ரோ ச மேதா⁴வீ, ஸத்³த⁴ம்மவங்ஸகோவிதோ³.
Tissatthero ca medhāvī, saddhammavaṃsakovido.
சூளதே³வோ ச மேதா⁴வீ, வினயே ச விஸாரதோ³;
Cūḷadevo ca medhāvī, vinaye ca visārado;
ஸிவத்தே²ரோ ச மேதா⁴வீ, வினயே ஸப்³ப³த்த² கோவிதோ³.
Sivatthero ca medhāvī, vinaye sabbattha kovido.
ஏதே நாகா³ மஹாபஞ்ஞா, வினயஞ்ஞூ மக்³க³கோவிதோ³;
Ete nāgā mahāpaññā, vinayaññū maggakovido;
வினயங் தீ³பே பகாஸேஸுங், பிடகங் தம்ப³பண்ணியாதி.
Vinayaṃ dīpe pakāsesuṃ, piṭakaṃ tambapaṇṇiyāti.
9. யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தஸ்ஸ ஸங்ங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? ஆயஸ்மந்தங் உதா³யிங் ஆரப்³ப⁴ . கிஸ்மிங் வத்து²ஸ்மிந்தி? ஆயஸ்மா உதா³யீ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே॰….
9. Yaṃ tena bhagavatā jānatā passatā arahatā sammāsambuddhena mātugāmena saddhiṃ kāyasaṃsaggaṃ samāpajjantassa saṃṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha . Kismiṃ vatthusminti? Āyasmā udāyī mātugāmena saddhiṃ kāyasaṃsaggaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
10. மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? ஆயஸ்மந்தங் உதா³யிங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா உதா³யீ மாதுகா³மங் து³ட்டு²ல்லாஹி வாசாஹி ஓபா⁴ஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
10. Mātugāmaṃ duṭṭhullāhi vācāhi obhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmaṃ duṭṭhullāhi vācāhi obhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
11. மாதுகா³மஸ்ஸ ஸந்திகே அத்தகாமபாரிசரியாய வண்ணங் பா⁴ஸந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? ஆயஸ்மந்தங் உதா³யிங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா உதா³யீ மாதுகா³மஸ்ஸ ஸந்திகே அத்தகாமபாரிசரியாய வண்ணங் அபா⁴ஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
11. Mātugāmassa santike attakāmapāricariyāya vaṇṇaṃ bhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmassa santike attakāmapāricariyāya vaṇṇaṃ abhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
12. ஸஞ்சரித்தங் ஸமாபஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? ஆயஸ்மந்தங் உதா³யிங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா உதா³யீ ஸஞ்சரித்தங் ஸமாபஜ்ஜி, தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா வாசதோ ஸமுட்டா²தி, ந காயதோ ந சித்ததோ; ஸியா காயதோ ச வாசதோ ச ஸமுட்டா²தி, ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
12. Sañcarittaṃ samāpajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī sañcarittaṃ samāpajji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato ; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
13. ஸஞ்ஞாசிகா குடிங் காராபெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஆளவியங் பஞ்ஞத்தோ. கங் ஆரப்³பா⁴தி? ஆளவகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஆளவகா பி⁴க்கூ² ஸஞ்ஞாசிகாய குடியோ காராபேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
13. Saññācikā kuṭiṃ kārāpentassa saṅghādiseso kattha paññattoti? Āḷaviyaṃ paññatto. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū saññācikāya kuṭiyo kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
14. மஹல்லகங் விஹாரங் காராபெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? கோஸம்பி³யங் பஞ்ஞத்தோ. கங் ஆரப்³பா⁴தி? ஆயஸ்மந்தங் ச²ன்னங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா ச²ன்னோ விஹாரவத்து²ங் ஸோதெ⁴ந்தோ அஞ்ஞதரங் சேதியருக்க²ங் சே²தா³பேஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
14. Mahallakaṃ vihāraṃ kārāpentassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo vihāravatthuṃ sodhento aññataraṃ cetiyarukkhaṃ chedāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
15. பி⁴க்கு²ங் அமூலகேன பாராஜிகேன த⁴ம்மேன அனுத்³த⁴ங்ஸெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கங் ஆரப்³பா⁴தி? மெத்தியபூ⁴மஜகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? மெத்தியபூ⁴மஜகா பி⁴க்கூ² ஆயஸ்மந்தங் த³ப்³ப³ங் மல்லபுத்தங் அமூலகேன பாராஜிகேன த⁴ம்மேன அனுத்³த⁴ங்ஸேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
15. Bhikkhuṃ amūlakena pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
16. பி⁴க்கு²ங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸெந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கங் ஆரப்³பா⁴தி? மெத்தியபூ⁴மஜகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? மெத்தியபூ⁴மஜகா பி⁴க்கூ² ஆயஸ்மந்தங் த³ப்³ப³ங் மல்லபுத்தங் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸங் லேஸமத்தங் உபாதா³ய பாராஜிகேன த⁴ம்மேன அனுத்³த⁴ங்ஸேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
16. Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
17. ஸங்க⁴பே⁴த³கஸ்ஸ பி⁴க்கு²னோ யாவததியங் ஸமனுபா⁴ஸனாய ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கங் ஆரப்³பா⁴தி? தே³வத³த்தங் ஆரப்³ப⁴. கிஸ்மிங் வத்து²ஸ்மிந்தி? தே³வத³த்தோ ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே॰….
17. Saṅghabhedakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Rājagahe paññatto. Kaṃ ārabbhāti? Devadattaṃ ārabbha. Kismiṃ vatthusminti? Devadatto samaggassa saṅghassa bhedāya parakkami, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
18. பே⁴தா³னுவத்தகானங் பி⁴க்கூ²னங் யாவததியங் ஸமனுபா⁴ஸனாய ந படினிஸ்ஸஜ்ஜந்தானங் ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கங் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஸம்ப³ஹுலா பி⁴க்கூ² தே³வத³த்தஸ்ஸ ஸங்க⁴பே⁴தா³ய பரக்கமந்தஸ்ஸ அனுவத்தகா அஹேஸுங் வக்³க³வாத³கா, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே॰….
18. Bhedānuvattakānaṃ bhikkhūnaṃ yāvatatiyaṃ samanubhāsanāya na paṭinissajjantānaṃ saṅghādiseso kattha paññattoti? Rājagahe paññatto. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū devadattassa saṅghabhedāya parakkamantassa anuvattakā ahesuṃ vaggavādakā, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
19. து³ப்³ப³சஸ்ஸ பி⁴க்கு²னோ யாவததியங் ஸமனுபா⁴ஸனா ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? கோஸம்பி³யங் பஞ்ஞத்தோ. கங் ஆரப்³பா⁴தி? ஆயஸ்மந்தங் ச²ன்னங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா ச²ன்னோ பி⁴க்கூ²ஹி ஸஹத⁴ம்மிகங் வுச்சமானோ அத்தானங் அவசனீயங் அகாஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே॰….
19. Dubbacassa bhikkhuno yāvatatiyaṃ samanubhāsanā na paṭinissajjantassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo bhikkhūhi sahadhammikaṃ vuccamāno attānaṃ avacanīyaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
20. குலதூ³ஸகஸ்ஸ பி⁴க்கு²னோ யாவததியங் ஸமனுபா⁴ஸனாய ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யங் பஞ்ஞத்தோ. கங் ஆரப்³பா⁴தி? அஸ்ஸஜிபுனப்³ப³ஸுகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே॰….
20. Kuladūsakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Assajipunabbasuke bhikkhū ārabbha. Kismiṃ vatthusminti? Assajipunabbasukā bhikkhū saṅghena pabbājanīyakammakatā bhikkhū chandagāmitā dosagāmitā mohagāmitā bhayagāmitā pāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
தேரஸ ஸங்கா⁴தி³ஸேஸா நிட்டி²தா.
Terasa saṅghādisesā niṭṭhitā.
தஸ்ஸுத்³தா³னங் –
Tassuddānaṃ –
விஸ்ஸட்டி² காயஸங்ஸக்³க³ங், து³ட்டு²ல்லங் அத்தகாமஞ்ச;
Vissaṭṭhi kāyasaṃsaggaṃ, duṭṭhullaṃ attakāmañca;
ஸஞ்சரித்தங் குடீ சேவ, விஹாரோ ச அமூலகங்.
Sañcarittaṃ kuṭī ceva, vihāro ca amūlakaṃ.
து³ப்³ப³சங் குலதூ³ஸஞ்ச, ஸங்கா⁴தி³ஸேஸா தேரஸாதி.
Dubbacaṃ kuladūsañca, saṅghādisesā terasāti.
Footnotes:
