| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. সঙ্ঘাদিসেসকণ্ডং
2. Saṅghādisesakaṇḍaṃ
৭. যং তেন ভগৰতা জানতা পস্সতা অরহতা সম্মাসম্বুদ্ধেন উপক্কমিত্ৰা অসুচিং মোচেন্তস্স সঙ্ঘাদিসেসো কত্থ পঞ্ঞত্তো? কং আরব্ভ? কিস্মিং ৰত্থুস্মিং? অত্থি তত্থ পঞ্ঞত্তি, অনুপঞ্ঞত্তি , অনুপ্পন্নপঞ্ঞত্তি? সব্বত্থপঞ্ঞত্তি, পদেসপঞ্ঞত্তি? সাধারণপঞ্ঞত্তি, অসাধারণপঞ্ঞত্তি? একতোপঞ্ঞত্তি, উভতোপঞ্ঞত্তি? পঞ্চন্নং পাতিমোক্খুদ্দেসানং কত্থোগধং কত্থ পরিযাপন্নং? কতমেন উদ্দেসেন উদ্দেসং আগচ্ছতি? চতুন্নং ৰিপত্তীনং কতমা ৰিপত্তি? সত্তন্নং আপত্তিক্খন্ধানং কতমো আপত্তিক্খন্ধো? ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মতি? কো তত্থ ৰিনযো, কো তত্থ অভিৰিনযো? কিং তত্থ পাতিমোক্খং, কিং তত্থ অধিপাতিমোক্খং ? কা ৰিপত্তি, কা সম্পত্তি, কা পটিপত্তি? কতি অত্থৰসে পটিচ্চ ভগৰতা উপক্কমিত্ৰা অসুচিং মোচেন্তস্স সঙ্ঘাদিসেসো পঞ্ঞত্তো? কে সিক্খন্তি, কে সিক্খিতসিক্খা? কত্থ ঠিতং? কে ধারেন্তি? কস্স ৰচনং? কেনাভতন্তি?
7. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññatto? Kaṃ ārabbha? Kismiṃ vatthusmiṃ? Atthi tattha paññatti, anupaññatti , anuppannapaññatti? Sabbatthapaññatti, padesapaññatti? Sādhāraṇapaññatti, asādhāraṇapaññatti? Ekatopaññatti, ubhatopaññatti? Pañcannaṃ pātimokkhuddesānaṃ katthogadhaṃ kattha pariyāpannaṃ? Katamena uddesena uddesaṃ āgacchati? Catunnaṃ vipattīnaṃ katamā vipatti? Sattannaṃ āpattikkhandhānaṃ katamo āpattikkhandho? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Ko tattha vinayo, ko tattha abhivinayo? Kiṃ tattha pātimokkhaṃ, kiṃ tattha adhipātimokkhaṃ ? Kā vipatti, kā sampatti, kā paṭipatti? Kati atthavase paṭicca bhagavatā upakkamitvā asuciṃ mocentassa saṅghādiseso paññatto? Ke sikkhanti, ke sikkhitasikkhā? Kattha ṭhitaṃ? Ke dhārenti? Kassa vacanaṃ? Kenābhatanti?
৮. যং তেন ভগৰতা জানতা পস্সতা অরহতা সম্মাসম্বুদ্ধেন উপক্কমিত্ৰা অসুচিং মোচেন্তস্স সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং সেয্যসকং আরব্ভ। কিস্মিং ৰত্থুস্মিন্তি? আযস্মা সেয্যসকো হত্থেন উপক্কমিত্ৰা অসুচিং মোচেসি, তস্মিং ৰত্থুস্মিং। অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি, একা অনুপঞ্ঞত্তি। অনুপ্পন্নপঞ্ঞত্তি তস্মিং নত্থি। সব্বত্থ পঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি। সাধারণপঞ্ঞত্তি, অসাধারণপঞ্ঞত্তীতি ? অসাধারণপঞ্ঞত্তি। একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি। পঞ্চন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং নিদানপরিযাপন্নং। কতমেন উদ্দেসেন উদ্দেসং আগচ্ছতীতি? ততিযে উদ্দেসেন উদ্দেসং আগচ্ছতি । চতুন্নং ৰিপত্তীনং কতমা ৰিপত্তীতি? সীলৰিপত্তি। সত্তন্নং আপত্তিক্খন্ধানং কতমো আপত্তিক্খন্ধোতি? সঙ্ঘাদিসেসো আপত্তিক্খন্ধো। ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো। চতুন্নং অধিকরণানং কতমং অধিকরণন্তি? আপত্তাধিকরণং। সত্তন্নং সমথানং কতিহি সমথেহি সম্মতীতি? দ্ৰীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ। কো তত্থ ৰিনযো, কো তত্থ অভিৰিনযোতি? পঞ্ঞত্তি ৰিনযো, ৰিভত্তি অভিৰিনযো। কিং তত্থ পাতিমোক্খং, কিং তত্থ অধিপাতিমোক্খন্তি? পঞ্ঞত্তি পাতিমোক্খং, ৰিভত্তি অধিপাতিমোক্খং। কা ৰিপত্তীতি? অসংৰরো ৰিপত্তি। কা সম্পত্তীতি? সংৰরো সম্পত্তি। কা পটিপত্তীতি? ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু। 1 কতি অত্থৰসে পটিচ্চ ভগৰতা উপক্কমিত্ৰা অসুচিং মোচেন্তস্স সঙ্ঘাদিসেসো পঞ্ঞত্তোতি? দস অত্থৰসে পটিচ্চ ভগৰতা উপক্কমিত্ৰা অসুচিং মোচেন্তস্স সঙ্ঘাদিসেসো পঞ্ঞত্তো – সঙ্ঘসুট্ঠুতায, সঙ্ঘফাসুতায, দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা, ৰিনযানুগ্গহায। কে সিক্খন্তীতি? সেক্খা চ পুথুজ্জনকল্যাণকা চ সিক্খন্তি। কে সিক্খিতসিক্খাতি? অরহন্তো সিক্খিতসিক্খা। কত্থ ঠিতন্তি? সিক্খাকামেসু ঠিতং। কে ধারেন্তীতি? যেসং ৰত্ততি , তে ধারেন্তি। কস্স ৰচনন্তি? ভগৰতো ৰচনং অরহতো সম্মাসম্বুদ্ধস্স। কেনাভতন্তি? পরম্পরাভতং –
8. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ seyyasakaṃ ārabbha. Kismiṃ vatthusminti? Āyasmā seyyasako hatthena upakkamitvā asuciṃ mocesi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Sabbattha paññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti ? Asādhāraṇapaññatti. Ekatopaññatti, ubhatopaññattīti? Ekatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ nidānapariyāpannaṃ. Katamena uddesena uddesaṃ āgacchatīti? Tatiye uddesena uddesaṃ āgacchati . Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Saṅghādiseso āpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ katamaṃ adhikaraṇanti? Āpattādhikaraṇaṃ. Sattannaṃ samathānaṃ katihi samathehi sammatīti? Dvīhi samathehi sammati – sammukhāvinayena ca paṭiññātakaraṇena ca. Ko tattha vinayo, ko tattha abhivinayoti? Paññatti vinayo, vibhatti abhivinayo. Kiṃ tattha pātimokkhaṃ, kiṃ tattha adhipātimokkhanti? Paññatti pātimokkhaṃ, vibhatti adhipātimokkhaṃ. Kā vipattīti? Asaṃvaro vipatti. Kā sampattīti? Saṃvaro sampatti. Kā paṭipattīti? Na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu. 2 Kati atthavase paṭicca bhagavatā upakkamitvā asuciṃ mocentassa saṅghādiseso paññattoti? Dasa atthavase paṭicca bhagavatā upakkamitvā asuciṃ mocentassa saṅghādiseso paññatto – saṅghasuṭṭhutāya, saṅghaphāsutāya, dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā, vinayānuggahāya. Ke sikkhantīti? Sekkhā ca puthujjanakalyāṇakā ca sikkhanti. Ke sikkhitasikkhāti? Arahanto sikkhitasikkhā. Kattha ṭhitanti? Sikkhākāmesu ṭhitaṃ. Ke dhārentīti? Yesaṃ vattati , te dhārenti. Kassa vacananti? Bhagavato vacanaṃ arahato sammāsambuddhassa. Kenābhatanti? Paramparābhataṃ –
উপালি দাসকো চেৰ, সোণকো সিগ্গৰো তথা।
Upāli dāsako ceva, soṇako siggavo tathā;
মোগ্গলিপুত্তেন পঞ্চমা, এতে জম্বুসিরিৰ্হযে॥
Moggaliputtena pañcamā, ete jambusirivhaye.
ততো মহিন্দো ইট্টিযো, উত্তিযো সম্বলো তথা।
Tato mahindo iṭṭiyo, uttiyo sambalo tathā;
ভদ্দনামো চ পণ্ডিতো॥
Bhaddanāmo ca paṇḍito.
এতে নাগা মহাপঞ্ঞা, জম্বুদীপা ইধাগতা।
Ete nāgā mahāpaññā, jambudīpā idhāgatā;
ৰিনযং তে ৰাচযিংসু, পিটকং তম্বপণ্ণিযা॥
Vinayaṃ te vācayiṃsu, piṭakaṃ tambapaṇṇiyā.
নিকাযে পঞ্চ ৰাচেসুং, সত্ত চেৰ পকরণে।
Nikāye pañca vācesuṃ, satta ceva pakaraṇe;
ততো অরিট্ঠো মেধাৰী, তিস্সদত্তো চ পণ্ডিতো॥
Tato ariṭṭho medhāvī, tissadatto ca paṇḍito.
ৰিসারদো কাল়সুমনো, থেরো চ দীঘনামকো।
Visārado kāḷasumano, thero ca dīghanāmako;
দীঘসুমনো চ পণ্ডিতো॥
Dīghasumano ca paṇḍito.
পুনদেৰ কাল়সুমনো, নাগত্থেরো চ বুদ্ধরক্খিতো।
Punadeva kāḷasumano, nāgatthero ca buddharakkhito;
তিস্সত্থেরো চ মেধাৰী, দেৰত্থেরো চ পণ্ডিতো॥
Tissatthero ca medhāvī, devatthero ca paṇḍito.
পুনদেৰ সুমনো মেধাৰী, ৰিনযে চ ৰিসারদো।
Punadeva sumano medhāvī, vinaye ca visārado;
বহুস্সুতো চূল়নাগো, গজোৰ দুপ্পধংসিযো॥
Bahussuto cūḷanāgo, gajova duppadhaṃsiyo.
ধম্মপালিতনামো চ, রোহণে সাধুপূজিতো।
Dhammapālitanāmo ca, rohaṇe sādhupūjito;
তস্স সিস্সো মহাপঞ্ঞো, খেমনামো তিপেটকো॥
Tassa sisso mahāpañño, khemanāmo tipeṭako.
দীপে তারকরাজাৰ, পঞ্ঞায অতিরোচথ।
Dīpe tārakarājāva, paññāya atirocatha;
উপতিস্সো চ মেধাৰী, ফুস্সদেৰো মহাকথী॥
Upatisso ca medhāvī, phussadevo mahākathī.
পুনদেৰ সুমনো মেধাৰী, পুপ্ফনামো বহুস্সুতো।
Punadeva sumano medhāvī, pupphanāmo bahussuto;
মহাকথী মহাসিৰো, পিটকে সব্বত্থ কোৰিদো॥
Mahākathī mahāsivo, piṭake sabbattha kovido.
পুনদেৰ উপালি মেধাৰী, ৰিনযে চ ৰিসারদো।
Punadeva upāli medhāvī, vinaye ca visārado;
মহানাগো মহাপঞ্ঞো, সদ্ধম্মৰংসকোৰিদো॥
Mahānāgo mahāpañño, saddhammavaṃsakovido.
পুনদেৰ অভযো মেধাৰী, পিটকে সব্বত্থ কোৰিদো।
Punadeva abhayo medhāvī, piṭake sabbattha kovido;
তিস্সত্থেরো চ মেধাৰী, ৰিনযে চ ৰিসারদো॥
Tissatthero ca medhāvī, vinaye ca visārado.
তস্স সিস্সো মহাপঞ্ঞো, পুপ্ফনামো বহুস্সুতো।
Tassa sisso mahāpañño, pupphanāmo bahussuto;
সাসনং অনুরক্খন্তো, জম্বুদীপে পতিট্ঠিতো॥
Sāsanaṃ anurakkhanto, jambudīpe patiṭṭhito.
চূল়াভযো চ মেধাৰী, ৰিনযে চ ৰিসারদো।
Cūḷābhayo ca medhāvī, vinaye ca visārado;
তিস্সত্থেরো চ মেধাৰী, সদ্ধম্মৰংসকোৰিদো॥
Tissatthero ca medhāvī, saddhammavaṃsakovido.
চূল়দেৰো চ মেধাৰী, ৰিনযে চ ৰিসারদো।
Cūḷadevo ca medhāvī, vinaye ca visārado;
সিৰত্থেরো চ মেধাৰী, ৰিনযে সব্বত্থ কোৰিদো॥
Sivatthero ca medhāvī, vinaye sabbattha kovido.
এতে নাগা মহাপঞ্ঞা, ৰিনযঞ্ঞূ মগ্গকোৰিদো।
Ete nāgā mahāpaññā, vinayaññū maggakovido;
ৰিনযং দীপে পকাসেসুং, পিটকং তম্বপণ্ণিযাতি॥
Vinayaṃ dīpe pakāsesuṃ, piṭakaṃ tambapaṇṇiyāti.
৯. যং তেন ভগৰতা জানতা পস্সতা অরহতা সম্মাসম্বুদ্ধেন মাতুগামেন সদ্ধিং কাযসংসগ্গং সমাপজ্জন্তস্স সংঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ । কিস্মিং ৰত্থুস্মিন্তি? আযস্মা উদাযী মাতুগামেন সদ্ধিং কাযসংসগ্গং সমাপজ্জি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
9. Yaṃ tena bhagavatā jānatā passatā arahatā sammāsambuddhena mātugāmena saddhiṃ kāyasaṃsaggaṃ samāpajjantassa saṃṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha . Kismiṃ vatthusminti? Āyasmā udāyī mātugāmena saddhiṃ kāyasaṃsaggaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
১০. মাতুগামং দুট্ঠুল্লাহি ৰাচাহি ওভাসন্তস্স সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামং দুট্ঠুল্লাহি ৰাচাহি ওভাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
10. Mātugāmaṃ duṭṭhullāhi vācāhi obhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmaṃ duṭṭhullāhi vācāhi obhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
১১. মাতুগামস্স সন্তিকে অত্তকামপারিচরিযায ৰণ্ণং ভাসন্তস্স সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী মাতুগামস্স সন্তিকে অত্তকামপারিচরিযায ৰণ্ণং অভাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
11. Mātugāmassa santike attakāmapāricariyāya vaṇṇaṃ bhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmassa santike attakāmapāricariyāya vaṇṇaṃ abhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
১২. সঞ্চরিত্তং সমাপজ্জন্তস্স সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? আযস্মন্তং উদাযিং আরব্ভ। কিস্মিং ৰত্থুস্মিন্তি? আযস্মা উদাযী সঞ্চরিত্তং সমাপজ্জি, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা ৰাচতো সমুট্ঠাতি, ন কাযতো ন চিত্ততো; সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো ; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে॰…।
12. Sañcarittaṃ samāpajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī sañcarittaṃ samāpajji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato ; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
১৩. সঞ্ঞাচিকা কুটিং কারাপেন্তস্স সঙ্ঘাদিসেসো কত্থ পঞ্ঞত্তোতি? আল়ৰিযং পঞ্ঞত্তো। কং আরব্ভাতি? আল়ৰকে ভিক্খূ আরব্ভ। কিস্মিং ৰত্থুস্মিন্তি? আল়ৰকা ভিক্খূ সঞ্ঞাচিকায কুটিযো কারাপেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে॰…।
13. Saññācikā kuṭiṃ kārāpentassa saṅghādiseso kattha paññattoti? Āḷaviyaṃ paññatto. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū saññācikāya kuṭiyo kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
১৪. মহল্লকং ৰিহারং কারাপেন্তস্স সঙ্ঘাদিসেসো কত্থ পঞ্ঞত্তোতি? কোসম্বিযং পঞ্ঞত্তো। কং আরব্ভাতি? আযস্মন্তং ছন্নং আরব্ভ। কিস্মিং ৰত্থুস্মিন্তি? আযস্মা ছন্নো ৰিহারৰত্থুং সোধেন্তো অঞ্ঞতরং চেতিযরুক্খং ছেদাপেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে॰…।
14. Mahallakaṃ vihāraṃ kārāpentassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo vihāravatthuṃ sodhento aññataraṃ cetiyarukkhaṃ chedāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
১৫. ভিক্খুং অমূলকেন পারাজিকেন ধম্মেন অনুদ্ধংসেন্তস্স সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? মেত্তিযভূমজকে ভিক্খূ আরব্ভ। কিস্মিং ৰত্থুস্মিন্তি? মেত্তিযভূমজকা ভিক্খূ আযস্মন্তং দব্বং মল্লপুত্তং অমূলকেন পারাজিকেন ধম্মেন অনুদ্ধংসেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
15. Bhikkhuṃ amūlakena pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
১৬. ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেন্তস্স সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? মেত্তিযভূমজকে ভিক্খূ আরব্ভ। কিস্মিং ৰত্থুস্মিন্তি? মেত্তিযভূমজকা ভিক্খূ আযস্মন্তং দব্বং মল্লপুত্তং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
16. Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
১৭. সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? দেৰদত্তং আরব্ভ। কিস্মিং ৰত্থুস্মিন্তি? দেৰদত্তো সমগ্গস্স সঙ্ঘস্স ভেদায পরক্কমি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
17. Saṅghabhedakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Rājagahe paññatto. Kaṃ ārabbhāti? Devadattaṃ ārabbha. Kismiṃ vatthusminti? Devadatto samaggassa saṅghassa bhedāya parakkami, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
১৮. ভেদানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জন্তানং সঙ্ঘাদিসেসো কত্থ পঞ্ঞত্তোতি? রাজগহে পঞ্ঞত্তো। কং আরব্ভাতি? সম্বহুলে ভিক্খূ আরব্ভ। কিস্মিং ৰত্থুস্মিন্তি? সম্বহুলা ভিক্খূ দেৰদত্তস্স সঙ্ঘভেদায পরক্কমন্তস্স অনুৰত্তকা অহেসুং ৰগ্গৰাদকা, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
18. Bhedānuvattakānaṃ bhikkhūnaṃ yāvatatiyaṃ samanubhāsanāya na paṭinissajjantānaṃ saṅghādiseso kattha paññattoti? Rājagahe paññatto. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū devadattassa saṅghabhedāya parakkamantassa anuvattakā ahesuṃ vaggavādakā, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
১৯. দুব্বচস্স ভিক্খুনো যাৰততিযং সমনুভাসনা ন পটিনিস্সজ্জন্তস্স সঙ্ঘাদিসেসো কত্থ পঞ্ঞত্তোতি? কোসম্বিযং পঞ্ঞত্তো। কং আরব্ভাতি? আযস্মন্তং ছন্নং আরব্ভ। কিস্মিং ৰত্থুস্মিন্তি? আযস্মা ছন্নো ভিক্খূহি সহধম্মিকং ৰুচ্চমানো অত্তানং অৰচনীযং অকাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
19. Dubbacassa bhikkhuno yāvatatiyaṃ samanubhāsanā na paṭinissajjantassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo bhikkhūhi sahadhammikaṃ vuccamāno attānaṃ avacanīyaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
২০. কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো। কং আরব্ভাতি? অস্সজিপুনব্বসুকে ভিক্খূ আরব্ভ। কিস্মিং ৰত্থুস্মিন্তি? অস্সজিপুনব্বসুকা ভিক্খূ সঙ্ঘেন পব্বাজনীযকম্মকতা ভিক্খূ ছন্দগামিতা দোসগামিতা মোহগামিতা ভযগামিতা পাপেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে॰…।
20. Kuladūsakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Assajipunabbasuke bhikkhū ārabbha. Kismiṃ vatthusminti? Assajipunabbasukā bhikkhū saṅghena pabbājanīyakammakatā bhikkhū chandagāmitā dosagāmitā mohagāmitā bhayagāmitā pāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
তেরস সঙ্ঘাদিসেসা নিট্ঠিতা।
Terasa saṅghādisesā niṭṭhitā.
তস্সুদ্দানং –
Tassuddānaṃ –
ৰিস্সট্ঠি কাযসংসগ্গং, দুট্ঠুল্লং অত্তকামঞ্চ।
Vissaṭṭhi kāyasaṃsaggaṃ, duṭṭhullaṃ attakāmañca;
সঞ্চরিত্তং কুটী চেৰ, ৰিহারো চ অমূলকং॥
Sañcarittaṃ kuṭī ceva, vihāro ca amūlakaṃ.
দুব্বচং কুলদূসঞ্চ, সঙ্ঘাদিসেসা তেরসাতি॥
Dubbacaṃ kuladūsañca, saṅghādisesā terasāti.
Footnotes:
