| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. সঙ্ঘাদিসেসকণ্ডং
2. Saṅghādisesakaṇḍaṃ
২২৯. উস্সযৰাদিকা ভিক্খুনী অড্ডং করোন্তী তিস্সো আপত্তিযো আপজ্জতি। একস্স আরোচেতি, আপত্তি দুক্কটস্স; দুতিযস্স আরোচেতি, আপত্তি থুল্লচ্চযস্স; অড্ডপরিযোসানে আপত্তি সঙ্ঘাদিসেসস্স।
229. Ussayavādikā bhikkhunī aḍḍaṃ karontī tisso āpattiyo āpajjati. Ekassa āroceti, āpatti dukkaṭassa; dutiyassa āroceti, āpatti thullaccayassa; aḍḍapariyosāne āpatti saṅghādisesassa.
চোরিং ৰুট্ঠাপেন্তী তিস্সো আপত্তিযো আপজ্জতি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স।
Coriṃ vuṭṭhāpentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
একা গামন্তরং গচ্ছন্তী তিস্সো আপত্তিযো আপজ্জতি। গচ্ছতি, আপত্তি দুক্কটস্স; পঠমং পাদং পরিক্খেপং অতিক্কামেতি, আপত্তি থুল্লচ্চযস্স; দুতিযং পাদং অতিক্কামেতি, আপত্তি সঙ্ঘাদিসেসস্স ।
Ekā gāmantaraṃ gacchantī tisso āpattiyo āpajjati. Gacchati, āpatti dukkaṭassa; paṭhamaṃ pādaṃ parikkhepaṃ atikkāmeti, āpatti thullaccayassa; dutiyaṃ pādaṃ atikkāmeti, āpatti saṅghādisesassa .
সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেন্তী তিস্সো আপত্তিযো আপজ্জতি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স।
Samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osārentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
অৰস্সুতা ভিক্খুনী অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তী তিস্সো আপত্তিযো আপজ্জতি। ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স; অজ্ঝোহারে অজ্ঝোহারে আপত্তি সঙ্ঘাদিসেসস্স; উদকদন্তপোনং পটিগ্গণ্হাতি, আপত্তি দুক্কটস্স।
Avassutā bhikkhunī avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā bhuñjantī tisso āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti thullaccayassa; ajjhohāre ajjhohāre āpatti saṅghādisesassa; udakadantaponaṃ paṭiggaṇhāti, āpatti dukkaṭassa.
‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেন্তী তিস্সো আপত্তিযো আপজ্জতি। তস্সা ৰচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি থুল্লচ্চযস্স; ভোজনপরিযোসানে আপত্তি সঙ্ঘাদিসেসস্স।
‘‘Kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā! Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti uyyojentī tisso āpattiyo āpajjati. Tassā vacanena khādissāmi bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti thullaccayassa; bhojanapariyosāne āpatti saṅghādisesassa.
কুপিতা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা ; কম্মৰাচাপরিযোসানে আপত্তি সঙ্ঘাদিসেসস্স।
Kupitā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā ; kammavācāpariyosāne āpatti saṅghādisesassa.
কিস্মিঞ্চিদেৰ অধিকরণে পচ্চাকতা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স।
Kismiñcideva adhikaraṇe paccākatā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
সংসট্ঠা ভিক্খুনিযো যাৰততিযং সমনুভাসনায ন পটিনিস্সজ্জন্তিযো তিস্সো আপত্তিযো আপজ্জন্তি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স।
Saṃsaṭṭhā bhikkhuniyo yāvatatiyaṃ samanubhāsanāya na paṭinissajjantiyo tisso āpattiyo āpajjanti. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
‘‘সংসট্ঠাৰ, অয্যে, তুম্হে ৰিহরথ। মা তুম্হে নানা ৰিহরিত্থা’’তি উয্যোজেন্তী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি। ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স।
‘‘Saṃsaṭṭhāva, ayye, tumhe viharatha. Mā tumhe nānā viharitthā’’ti uyyojentī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
সঙ্ঘাদিসেসা নিট্ঠিতা।
Saṅghādisesā niṭṭhitā.
