| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၂. သင္ဃာဒိသေသကဏ္ဍံ
2. Saṅghādisesakaṇḍaṃ
၇. ယံ တေန ဘဂဝတာ ဇာနတာ ပသ္သတာ အရဟတာ သမ္မာသမ္ဗုဒ္ဓေန ဥပက္ကမိတ္ဝာ အသုစိံ မောစေန္တသ္သ သင္ဃာဒိသေသော ကတ္ထ ပညတ္တော? ကံ အာရဗ္ဘ? ကိသ္မိံ ဝတ္ထုသ္မိံ? အတ္ထိ တတ္ထ ပညတ္တိ, အနုပညတ္တိ , အနုပ္ပန္နပညတ္တိ? သဗ္ဗတ္ထပညတ္တိ, ပဒေသပညတ္တိ? သာဓာရဏပညတ္တိ, အသာဓာရဏပညတ္တိ? ဧကတောပညတ္တိ, ဥဘတောပညတ္တိ? ပဉ္စန္နံ ပာတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ? ကတမေန ဥဒ္ဒေသေန ဥဒ္ဒေသံ အာဂစ္ဆတိ? စတုန္နံ ဝိပတ္တီနံ ကတမာ ဝိပတ္တိ? သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓော? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? ကော တတ္ထ ဝိနယော, ကော တတ္ထ အဘိဝိနယော? ကိံ တတ္ထ ပာတိမောက္ခံ, ကိံ တတ္ထ အဓိပာတိမောက္ခံ ? ကာ ဝိပတ္တိ, ကာ သမ္ပတ္တိ, ကာ ပဋိပတ္တိ? ကတိ အတ္ထဝသေ ပဋိစ္စ ဘဂဝတာ ဥပက္ကမိတ္ဝာ အသုစိံ မောစေန္တသ္သ သင္ဃာဒိသေသော ပညတ္တော? ကေ သိက္ခန္တိ, ကေ သိက္ခိတသိက္ခာ? ကတ္ထ ဌိတံ? ကေ ဓာရေန္တိ? ကသ္သ ဝစနံ? ကေနာဘတန္တိ?
7. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññatto? Kaṃ ārabbha? Kismiṃ vatthusmiṃ? Atthi tattha paññatti, anupaññatti , anuppannapaññatti? Sabbatthapaññatti, padesapaññatti? Sādhāraṇapaññatti, asādhāraṇapaññatti? Ekatopaññatti, ubhatopaññatti? Pañcannaṃ pātimokkhuddesānaṃ katthogadhaṃ kattha pariyāpannaṃ? Katamena uddesena uddesaṃ āgacchati? Catunnaṃ vipattīnaṃ katamā vipatti? Sattannaṃ āpattikkhandhānaṃ katamo āpattikkhandho? Channaṃ āpattisamuṭṭhānānaṃ katihi samuṭṭhānehi samuṭṭhāti? Catunnaṃ adhikaraṇānaṃ katamaṃ adhikaraṇaṃ? Sattannaṃ samathānaṃ katihi samathehi sammati? Ko tattha vinayo, ko tattha abhivinayo? Kiṃ tattha pātimokkhaṃ, kiṃ tattha adhipātimokkhaṃ ? Kā vipatti, kā sampatti, kā paṭipatti? Kati atthavase paṭicca bhagavatā upakkamitvā asuciṃ mocentassa saṅghādiseso paññatto? Ke sikkhanti, ke sikkhitasikkhā? Kattha ṭhitaṃ? Ke dhārenti? Kassa vacanaṃ? Kenābhatanti?
၈. ယံ တေန ဘဂဝတာ ဇာနတာ ပသ္သတာ အရဟတာ သမ္မာသမ္ဗုဒ္ဓေန ဥပက္ကမိတ္ဝာ အသုစိံ မောစေန္တသ္သ သင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ သေယ္ယသကံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ သေယ္ယသကော ဟတ္ထေန ဥပက္ကမိတ္ဝာ အသုစိံ မောစေသိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဧကာ အနုပညတ္တိ။ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထ ပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓာရဏပညတ္တိ, အသာဓာရဏပညတ္တီတိ ? အသာဓာရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ ပဉ္စန္နံ ပာတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒာနောဂဓံ နိဒာနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? တတိယေ ဥဒ္ဒေသေန ဥဒ္ဒေသံ အာဂစ္ဆတိ ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သင္ဃာဒိသေသော အာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝာစတော။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ။ သတ္တန္နံ သမထာနံ ကတိဟိ သမထေဟိ သမ္မတီတိ? ဒ္ဝီဟိ သမထေဟိ သမ္မတိ – သမ္မုခာဝိနယေန စ ပဋိညာတကရဏေန စ။ ကော တတ္ထ ဝိနယော, ကော တတ္ထ အဘိဝိနယောတိ? ပညတ္တိ ဝိနယော, ဝိဘတ္တိ အဘိဝိနယော။ ကိံ တတ္ထ ပာတိမောက္ခံ, ကိံ တတ္ထ အဓိပာတိမောက္ခန္တိ? ပညတ္တိ ပာတိမောက္ခံ, ဝိဘတ္တိ အဓိပာတိမောက္ခံ။ ကာ ဝိပတ္တီတိ? အသံဝရော ဝိပတ္တိ။ ကာ သမ္ပတ္တီတိ? သံဝရော သမ္ပတ္တိ။ ကာ ပဋိပတ္တီတိ? န ဧဝရူပံ ကရိသ္သာမီတိ ယာဝဇီဝံ အာပာဏကောဋိကံ သမာဒာယ သိက္ခတိ သိက္ခာပဒေသု။ 1 ကတိ အတ္ထဝသေ ပဋိစ္စ ဘဂဝတာ ဥပက္ကမိတ္ဝာ အသုစိံ မောစေန္တသ္သ သင္ဃာဒိသေသော ပညတ္တောတိ? ဒသ အတ္ထဝသေ ပဋိစ္စ ဘဂဝတာ ဥပက္ကမိတ္ဝာ အသုစိံ မောစေန္တသ္သ သင္ဃာဒိသေသော ပညတ္တော – သင္ဃသုဋ္ဌုတာယ, သင္ဃဖာသုတာယ, ဒုမ္မင္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝာနံ သံဝရာယ, သမ္ပရာယိကာနံ အာသဝာနံ ပဋိဃာတာယ, အပ္ပသန္နာနံ ပသာဒာယ, ပသန္နာနံ ဘိယ္ယောဘာဝာယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ကေ သိက္ခန္တီတိ? သေက္ခာ စ ပုထုဇ္ဇနကလ္ယာဏကာ စ သိက္ခန္တိ။ ကေ သိက္ခိတသိက္ခာတိ? အရဟန္တော သိက္ခိတသိက္ခာ။ ကတ္ထ ဌိတန္တိ? သိက္ခာကာမေသု ဌိတံ။ ကေ ဓာရေန္တီတိ? ယေသံ ဝတ္တတိ , တေ ဓာရေန္တိ။ ကသ္သ ဝစနန္တိ? ဘဂဝတော ဝစနံ အရဟတော သမ္မာသမ္ဗုဒ္ဓသ္သ။ ကေနာဘတန္တိ? ပရမ္ပရာဘတံ –
8. Yaṃ tena bhagavatā jānatā passatā arahatā sammāsambuddhena upakkamitvā asuciṃ mocentassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ seyyasakaṃ ārabbha. Kismiṃ vatthusminti? Āyasmā seyyasako hatthena upakkamitvā asuciṃ mocesi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Sabbattha paññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti ? Asādhāraṇapaññatti. Ekatopaññatti, ubhatopaññattīti? Ekatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ nidānapariyāpannaṃ. Katamena uddesena uddesaṃ āgacchatīti? Tatiye uddesena uddesaṃ āgacchati . Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Saṅghādiseso āpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato. Catunnaṃ adhikaraṇānaṃ katamaṃ adhikaraṇanti? Āpattādhikaraṇaṃ. Sattannaṃ samathānaṃ katihi samathehi sammatīti? Dvīhi samathehi sammati – sammukhāvinayena ca paṭiññātakaraṇena ca. Ko tattha vinayo, ko tattha abhivinayoti? Paññatti vinayo, vibhatti abhivinayo. Kiṃ tattha pātimokkhaṃ, kiṃ tattha adhipātimokkhanti? Paññatti pātimokkhaṃ, vibhatti adhipātimokkhaṃ. Kā vipattīti? Asaṃvaro vipatti. Kā sampattīti? Saṃvaro sampatti. Kā paṭipattīti? Na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu. 2 Kati atthavase paṭicca bhagavatā upakkamitvā asuciṃ mocentassa saṅghādiseso paññattoti? Dasa atthavase paṭicca bhagavatā upakkamitvā asuciṃ mocentassa saṅghādiseso paññatto – saṅghasuṭṭhutāya, saṅghaphāsutāya, dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā, vinayānuggahāya. Ke sikkhantīti? Sekkhā ca puthujjanakalyāṇakā ca sikkhanti. Ke sikkhitasikkhāti? Arahanto sikkhitasikkhā. Kattha ṭhitanti? Sikkhākāmesu ṭhitaṃ. Ke dhārentīti? Yesaṃ vattati , te dhārenti. Kassa vacananti? Bhagavato vacanaṃ arahato sammāsambuddhassa. Kenābhatanti? Paramparābhataṃ –
ဥပာလိ ဒာသကော စေဝ၊ သောဏကော သိဂ္ဂဝော တထာ။
Upāli dāsako ceva, soṇako siggavo tathā;
မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။
Moggaliputtena pañcamā, ete jambusirivhaye.
တတော မဟိန္ဒော ဣဋ္ဋိယော၊ ဥတ္တိယော သမ္ဗလော တထာ။
Tato mahindo iṭṭiyo, uttiyo sambalo tathā;
ဘဒ္ဒနာမော စ ပဏ္ဍိတော။
Bhaddanāmo ca paṇḍito.
ဧတေ နာဂာ မဟာပညာ၊ ဇမ္ဗုဒီပာ ဣဓာဂတာ။
Ete nāgā mahāpaññā, jambudīpā idhāgatā;
ဝိနယံ တေ ဝာစယိံသု၊ ပိဋကံ တမ္ဗပဏ္ဏိယာ။
Vinayaṃ te vācayiṃsu, piṭakaṃ tambapaṇṇiyā.
နိကာယေ ပဉ္စ ဝာစေသုံ၊ သတ္တ စေဝ ပကရဏေ။
Nikāye pañca vācesuṃ, satta ceva pakaraṇe;
တတော အရိဋ္ဌော မေဓာဝီ၊ တိသ္သဒတ္တော စ ပဏ္ဍိတော။
Tato ariṭṭho medhāvī, tissadatto ca paṇḍito.
ဝိသာရဒော ကာဠသုမနော၊ ထေရော စ ဒီဃနာမကော။
Visārado kāḷasumano, thero ca dīghanāmako;
ဒီဃသုမနော စ ပဏ္ဍိတော။
Dīghasumano ca paṇḍito.
ပုနဒေဝ ကာဠသုမနော၊ နာဂတ္ထေရော စ ဗုဒ္ဓရက္ခိတော။
Punadeva kāḷasumano, nāgatthero ca buddharakkhito;
တိသ္သတ္ထေရော စ မေဓာဝီ၊ ဒေဝတ္ထေရော စ ပဏ္ဍိတော။
Tissatthero ca medhāvī, devatthero ca paṇḍito.
ပုနဒေဝ သုမနော မေဓာဝီ၊ ဝိနယေ စ ဝိသာရဒော။
Punadeva sumano medhāvī, vinaye ca visārado;
ဗဟုသ္သုတော စူဠနာဂော၊ ဂဇောဝ ဒုပ္ပဓံသိယော။
Bahussuto cūḷanāgo, gajova duppadhaṃsiyo.
ဓမ္မပာလိတနာမော စ၊ ရောဟဏေ သာဓုပူဇိတော။
Dhammapālitanāmo ca, rohaṇe sādhupūjito;
တသ္သ သိသ္သော မဟာပညော၊ ခေမနာမော တိပေဋကော။
Tassa sisso mahāpañño, khemanāmo tipeṭako.
ဒီပေ တာရကရာဇာဝ၊ ပညာယ အတိရောစထ။
Dīpe tārakarājāva, paññāya atirocatha;
ဥပတိသ္သော စ မေဓာဝီ၊ ဖုသ္သဒေဝော မဟာကထီ။
Upatisso ca medhāvī, phussadevo mahākathī.
ပုနဒေဝ သုမနော မေဓာဝီ၊ ပုပ္ဖနာမော ဗဟုသ္သုတော။
Punadeva sumano medhāvī, pupphanāmo bahussuto;
မဟာကထီ မဟာသိဝော၊ ပိဋကေ သဗ္ဗတ္ထ ကောဝိဒော။
Mahākathī mahāsivo, piṭake sabbattha kovido.
ပုနဒေဝ ဥပာလိ မေဓာဝီ၊ ဝိနယေ စ ဝိသာရဒော။
Punadeva upāli medhāvī, vinaye ca visārado;
မဟာနာဂော မဟာပညော၊ သဒ္ဓမ္မဝံသကောဝိဒော။
Mahānāgo mahāpañño, saddhammavaṃsakovido.
ပုနဒေဝ အဘယော မေဓာဝီ၊ ပိဋကေ သဗ္ဗတ္ထ ကောဝိဒော။
Punadeva abhayo medhāvī, piṭake sabbattha kovido;
တိသ္သတ္ထေရော စ မေဓာဝီ၊ ဝိနယေ စ ဝိသာရဒော။
Tissatthero ca medhāvī, vinaye ca visārado.
တသ္သ သိသ္သော မဟာပညော၊ ပုပ္ဖနာမော ဗဟုသ္သုတော။
Tassa sisso mahāpañño, pupphanāmo bahussuto;
သာသနံ အနုရက္ခန္တော၊ ဇမ္ဗုဒီပေ ပတိဋ္ဌိတော။
Sāsanaṃ anurakkhanto, jambudīpe patiṭṭhito.
စူဠာဘယော စ မေဓာဝီ၊ ဝိနယေ စ ဝိသာရဒော။
Cūḷābhayo ca medhāvī, vinaye ca visārado;
တိသ္သတ္ထေရော စ မေဓာဝီ၊ သဒ္ဓမ္မဝံသကောဝိဒော။
Tissatthero ca medhāvī, saddhammavaṃsakovido.
စူဠဒေဝော စ မေဓာဝီ၊ ဝိနယေ စ ဝိသာရဒော။
Cūḷadevo ca medhāvī, vinaye ca visārado;
သိဝတ္ထေရော စ မေဓာဝီ၊ ဝိနယေ သဗ္ဗတ္ထ ကောဝိဒော။
Sivatthero ca medhāvī, vinaye sabbattha kovido.
ဧတေ နာဂာ မဟာပညာ၊ ဝိနယညူ မဂ္ဂကောဝိဒော။
Ete nāgā mahāpaññā, vinayaññū maggakovido;
ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။
Vinayaṃ dīpe pakāsesuṃ, piṭakaṃ tambapaṇṇiyāti.
၉. ယံ တေန ဘဂဝတာ ဇာနတာ ပသ္သတာ အရဟတာ သမ္မာသမ္ဗုဒ္ဓေန မာတုဂာမေန သဒ္ဓိံ ကာယသံသဂ္ဂံ သမာပဇ္ဇန္တသ္သ သံင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒာယိံ အာရဗ္ဘ ။ ကိသ္မိံ ဝတ္ထုသ္မိန္တိ? အာယသ္မာ ဥဒာယီ မာတုဂာမေန သဒ္ဓိံ ကာယသံသဂ္ဂံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝာစတော။ပေ.။။
9. Yaṃ tena bhagavatā jānatā passatā arahatā sammāsambuddhena mātugāmena saddhiṃ kāyasaṃsaggaṃ samāpajjantassa saṃṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha . Kismiṃ vatthusminti? Āyasmā udāyī mātugāmena saddhiṃ kāyasaṃsaggaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
၁၀. မာတုဂာမံ ဒုဋ္ဌုလ္လာဟိ ဝာစာဟိ ဩဘာသန္တသ္သ သင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒာယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒာယီ မာတုဂာမံ ဒုဋ္ဌုလ္လာဟိ ဝာစာဟိ ဩဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝာစတော; သိယာ ဝာစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
10. Mātugāmaṃ duṭṭhullāhi vācāhi obhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmaṃ duṭṭhullāhi vācāhi obhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
၁၁. မာတုဂာမသ္သ သန္တိကေ အတ္တကာမပာရိစရိယာယ ဝဏ္ဏံ ဘာသန္တသ္သ သင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒာယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒာယီ မာတုဂာမသ္သ သန္တိကေ အတ္တကာမပာရိစရိယာယ ဝဏ္ဏံ အဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝာစတော; သိယာ ဝာစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
11. Mātugāmassa santike attakāmapāricariyāya vaṇṇaṃ bhāsantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī mātugāmassa santike attakāmapāricariyāya vaṇṇaṃ abhāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
၁၂. သဉ္စရိတ္တံ သမာပဇ္ဇန္တသ္သ သင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒာယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒာယီ သဉ္စရိတ္တံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝာစတော န စိတ္တတော; သိယာ ဝာစတော သမုဋ္ဌာတိ, န ကာယတော န စိတ္တတော; သိယာ ကာယတော စ ဝာစတော စ သမုဋ္ဌာတိ, န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝာစတော ; သိယာ ဝာစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
12. Sañcarittaṃ samāpajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī sañcarittaṃ samāpajji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato ; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
၁၃. သညာစိကာ ကုဋိံ ကာရာပေန္တသ္သ သင္ဃာဒိသေသော ကတ္ထ ပညတ္တောတိ? အာဠဝိယံ ပညတ္တော။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အာဠဝကာ ဘိက္ခူ သညာစိကာယ ကုဋိယော ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။
13. Saññācikā kuṭiṃ kārāpentassa saṅghādiseso kattha paññattoti? Āḷaviyaṃ paññatto. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū saññācikāya kuṭiyo kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
၁၄. မဟလ္လကံ ဝိဟာရံ ကာရာပေန္တသ္သ သင္ဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။
14. Mahallakaṃ vihāraṃ kārāpentassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo vihāravatthuṃ sodhento aññataraṃ cetiyarukkhaṃ chedāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
၁၅. ဘိက္ခုံ အမူလကေန ပာရာဇိကေန ဓမ္မေန အနုဒ္ဓံသေန္တသ္သ သင္ဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပာရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။
15. Bhikkhuṃ amūlakena pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
၁၆. ဘိက္ခုံ အညဘာဂိယသ္သ အဓိကရဏသ္သ ကိဉ္စိ ဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေန္တသ္သ သင္ဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယသ္သ အဓိကရဏသ္သ ကိဉ္စိ ဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။
16. Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsentassa saṅghādiseso kattha paññattoti? Rājagahe paññatto. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
၁၇. သင္ဃဘေဒကသ္သ ဘိက္ခုနော ယာဝတတိယံ သမနုဘာသနာယ န ပဋိနိသ္သဇ္ဇန္တသ္သ သင္ဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? ဒေဝဒတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဒေဝဒတ္တော သမဂ္ဂသ္သ သင္ဃသ္သ ဘေဒာယ ပရက္ကမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
17. Saṅghabhedakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Rājagahe paññatto. Kaṃ ārabbhāti? Devadattaṃ ārabbha. Kismiṃ vatthusminti? Devadatto samaggassa saṅghassa bhedāya parakkami, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
၁၈. ဘေဒာနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိသ္သဇ္ဇန္တာနံ သင္ဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဒေဝဒတ္တသ္သ သင္ဃဘေဒာယ ပရက္ကမန္တသ္သ အနုဝတ္တကာ အဟေသုံ ဝဂ္ဂဝာဒကာ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
18. Bhedānuvattakānaṃ bhikkhūnaṃ yāvatatiyaṃ samanubhāsanāya na paṭinissajjantānaṃ saṅghādiseso kattha paññattoti? Rājagahe paññatto. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū devadattassa saṅghabhedāya parakkamantassa anuvattakā ahesuṃ vaggavādakā, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
၁၉. ဒုဗ္ဗစသ္သ ဘိက္ခုနော ယာဝတတိယံ သမနုဘာသနာ န ပဋိနိသ္သဇ္ဇန္တသ္သ သင္ဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
19. Dubbacassa bhikkhuno yāvatatiyaṃ samanubhāsanā na paṭinissajjantassa saṅghādiseso kattha paññattoti? Kosambiyaṃ paññatto. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo bhikkhūhi sahadhammikaṃ vuccamāno attānaṃ avacanīyaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
၂၀. ကုလဒူသကသ္သ ဘိက္ခုနော ယာဝတတိယံ သမနုဘာသနာယ န ပဋိနိသ္သဇ္ဇန္တသ္သ သင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အသ္သဇိပုနဗ္ဗသုကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အသ္သဇိပုနဗ္ဗသုကာ ဘိက္ခူ သင္ဃေန ပဗ္ဗာဇနီယကမ္မကတာ ဘိက္ခူ ဆန္ဒဂာမိတာ ဒောသဂာမိတာ မောဟဂာမိတာ ဘယဂာမိတာ ပာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
20. Kuladūsakassa bhikkhuno yāvatatiyaṃ samanubhāsanāya na paṭinissajjantassa saṅghādiseso kattha paññattoti? Sāvatthiyaṃ paññatto. Kaṃ ārabbhāti? Assajipunabbasuke bhikkhū ārabbha. Kismiṃ vatthusminti? Assajipunabbasukā bhikkhū saṅghena pabbājanīyakammakatā bhikkhū chandagāmitā dosagāmitā mohagāmitā bhayagāmitā pāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti…pe….
တေရသ သင္ဃာဒိသေသာ နိဋ္ဌိတာ။
Terasa saṅghādisesā niṭṭhitā.
တသ္သုဒ္ဒာနံ –
Tassuddānaṃ –
ဝိသ္သဋ္ဌိ ကာယသံသဂ္ဂံ၊ ဒုဋ္ဌုလ္လံ အတ္တကာမဉ္စ။
Vissaṭṭhi kāyasaṃsaggaṃ, duṭṭhullaṃ attakāmañca;
သဉ္စရိတ္တံ ကုဋီ စေဝ၊ ဝိဟာရော စ အမူလကံ။
Sañcarittaṃ kuṭī ceva, vihāro ca amūlakaṃ.
ဒုဗ္ဗစံ ကုလဒူသဉ္စ၊ သင္ဃာဒိသေသာ တေရသာတိ။
Dubbacaṃ kuladūsañca, saṅghādisesā terasāti.
Footnotes:
