| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၂. သင္ဃာဒိသေသကဏ္ဍံ
2. Saṅghādisesakaṇḍaṃ
၂၂၉. ဥသ္သယဝာဒိကာ ဘိက္ခုနီ အဍ္ဍံ ကရောန္တီ တိသ္သော အာပတ္တိယော အာပဇ္ဇတိ။ ဧကသ္သ အာရောစေတိ, အာပတ္တိ ဒုက္ကဋသ္သ; ဒုတိယသ္သ အာရောစေတိ, အာပတ္တိ ထုလ္လစ္စယသ္သ; အဍ္ဍပရိယောသာနေ အာပတ္တိ သင္ဃာဒိသေသသ္သ။
229. Ussayavādikā bhikkhunī aḍḍaṃ karontī tisso āpattiyo āpajjati. Ekassa āroceti, āpatti dukkaṭassa; dutiyassa āroceti, āpatti thullaccayassa; aḍḍapariyosāne āpatti saṅghādisesassa.
စောရိံ ဝုဋ္ဌာပေန္တီ တိသ္သော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
Coriṃ vuṭṭhāpentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
ဧကာ ဂာမန္တရံ ဂစ္ဆန္တီ တိသ္သော အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋသ္သ; ပဌမံ ပာဒံ ပရိက္ခေပံ အတိက္ကာမေတိ, အာပတ္တိ ထုလ္လစ္စယသ္သ; ဒုတိယံ ပာဒံ အတိက္ကာမေတိ, အာပတ္တိ သင္ဃာဒိသေသသ္သ ။
Ekā gāmantaraṃ gacchantī tisso āpattiyo āpajjati. Gacchati, āpatti dukkaṭassa; paṭhamaṃ pādaṃ parikkhepaṃ atikkāmeti, āpatti thullaccayassa; dutiyaṃ pādaṃ atikkāmeti, āpatti saṅghādisesassa .
သမဂ္ဂေန သင္ဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတ္ဝာ ကာရကသင္ဃံ အနညာယ ဂဏသ္သ ဆန္ဒံ ဩသာရေန္တီ တိသ္သော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
Samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osārentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
အဝသ္သုတာ ဘိက္ခုနီ အဝသ္သုတသ္သ ပုရိသပုဂ္ဂလသ္သ ဟတ္ထတော ခာဒနီယံ ဝာ ဘောဇနီယံ ဝာ သဟတ္ထာ ပဋိဂ္ဂဟေတ္ဝာ ဘုဉ္ဇန္တီ တိသ္သော အာပတ္တိယော အာပဇ္ဇတိ။ ‘‘ခာဒိသ္သာမိ ဘုဉ္ဇိသ္သာမီ’’တိ ပဋိဂ္ဂဏ္ဟာတိ, အာပတ္တိ ထုလ္လစ္စယသ္သ; အဇ္ဈောဟာရေ အဇ္ဈောဟာရေ အာပတ္တိ သင္ဃာဒိသေသသ္သ; ဥဒကဒန္တပောနံ ပဋိဂ္ဂဏ္ဟာတိ, အာပတ္တိ ဒုက္ကဋသ္သ။
Avassutā bhikkhunī avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā bhuñjantī tisso āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti thullaccayassa; ajjhohāre ajjhohāre āpatti saṅghādisesassa; udakadantaponaṃ paṭiggaṇhāti, āpatti dukkaṭassa.
‘‘ကိံ တေ, အယ္ယေ, ဧသော ပုရိသပုဂ္ဂလော ကရိသ္သတိ အဝသ္သုတော ဝာ အနဝသ္သုတော ဝာ, ယတော တ္ဝံ အနဝသ္သုတာ! ဣင္ဃ, အယ္ယေ, ယံ တေ ဧသော ပုရိသပုဂ္ဂလော ဒေတိ ခာဒနီယံ ဝာ ဘောဇနီယံ ဝာ, တံ တ္ဝံ သဟတ္ထာ ပဋိဂ္ဂဟေတ္ဝာ ခာဒ ဝာ ဘုဉ္ဇ ဝာ’’တိ ဥယ္ယောဇေန္တီ တိသ္သော အာပတ္တိယော အာပဇ္ဇတိ။ တသ္သာ ဝစနေန ခာဒိသ္သာမိ ဘုဉ္ဇိသ္သာမီတိ ပဋိဂ္ဂဏ္ဟာတိ, အာပတ္တိ ဒုက္ကဋသ္သ; အဇ္ဈောဟာရေ အဇ္ဈောဟာရေ အာပတ္တိ ထုလ္လစ္စယသ္သ; ဘောဇနပရိယောသာနေ အာပတ္တိ သင္ဃာဒိသေသသ္သ။
‘‘Kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā! Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti uyyojentī tisso āpattiyo āpajjati. Tassā vacanena khādissāmi bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti thullaccayassa; bhojanapariyosāne āpatti saṅghādisesassa.
ကုပိတာ ဘိက္ခုနီ ယာဝတတိယံ သမနုဘာသနာယ န ပဋိနိသ္သဇ္ဇန္တီ တိသ္သော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
Kupitā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā ; kammavācāpariyosāne āpatti saṅghādisesassa.
ကိသ္မိဉ္စိဒေဝ အဓိကရဏေ ပစ္စာကတာ ဘိက္ခုနီ ယာဝတတိယံ သမနုဘာသနာယ န ပဋိနိသ္သဇ္ဇန္တီ တိသ္သော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
Kismiñcideva adhikaraṇe paccākatā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
သံသဋ္ဌာ ဘိက္ခုနိယော ယာဝတတိယံ သမနုဘာသနာယ န ပဋိနိသ္သဇ္ဇန္တိယော တိသ္သော အာပတ္တိယော အာပဇ္ဇန္တိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
Saṃsaṭṭhā bhikkhuniyo yāvatatiyaṃ samanubhāsanāya na paṭinissajjantiyo tisso āpattiyo āpajjanti. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
‘‘သံသဋ္ဌာဝ, အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထာ’’တိ ဥယ္ယောဇေန္တီ ယာဝတတိယံ သမနုဘာသနာယ န ပဋိနိသ္သဇ္ဇန္တီ တိသ္သော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒ္ဝီဟိ ကမ္မဝာစာဟိ ထုလ္လစ္စယာ; ကမ္မဝာစာပရိယောသာနေ အာပတ္တိ သင္ဃာဒိသေသသ္သ။
‘‘Saṃsaṭṭhāva, ayye, tumhe viharatha. Mā tumhe nānā viharitthā’’ti uyyojentī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
သင္ဃာဒိသေသာ နိဋ္ဌိတာ။
Saṅghādisesā niṭṭhitā.
