| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༢. སངྒྷཱདིསེསཀཎྜཾ
2. Saṅghādisesakaṇḍaṃ
༢༢༩. ཨུསྶཡཝཱདིཀཱ བྷིཀྑུནཱི ཨཌྜཾ ཀརོནྟཱི ཏིསྶོ ཨཱཔཏྟིཡོ ཨཱཔཛྫཏི། ཨེཀསྶ ཨཱརོཙེཏི, ཨཱཔཏྟི དུཀྐཊསྶ; དུཏིཡསྶ ཨཱརོཙེཏི, ཨཱཔཏྟི ཐུལླཙྩཡསྶ; ཨཌྜཔརིཡོསཱནེ ཨཱཔཏྟི སངྒྷཱདིསེསསྶ།
229. Ussayavādikā bhikkhunī aḍḍaṃ karontī tisso āpattiyo āpajjati. Ekassa āroceti, āpatti dukkaṭassa; dutiyassa āroceti, āpatti thullaccayassa; aḍḍapariyosāne āpatti saṅghādisesassa.
ཙོརིཾ ཝུཊྛཱཔེནྟཱི ཏིསྶོ ཨཱཔཏྟིཡོ ཨཱཔཛྫཏི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
Coriṃ vuṭṭhāpentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
ཨེཀཱ གཱམནྟརཾ གཙྪནྟཱི ཏིསྶོ ཨཱཔཏྟིཡོ ཨཱཔཛྫཏི། གཙྪཏི, ཨཱཔཏྟི དུཀྐཊསྶ; པཋམཾ པཱདཾ པརིཀྑེཔཾ ཨཏིཀྐཱམེཏི, ཨཱཔཏྟི ཐུལླཙྩཡསྶ; དུཏིཡཾ པཱདཾ ཨཏིཀྐཱམེཏི, ཨཱཔཏྟི སངྒྷཱདིསེསསྶ །
Ekā gāmantaraṃ gacchantī tisso āpattiyo āpajjati. Gacchati, āpatti dukkaṭassa; paṭhamaṃ pādaṃ parikkhepaṃ atikkāmeti, āpatti thullaccayassa; dutiyaṃ pādaṃ atikkāmeti, āpatti saṅghādisesassa .
སམགྒེན སངྒྷེན ཨུཀྑིཏྟཾ བྷིཀྑུནིཾ དྷམྨེན ཝིནཡེན སཏྠུསཱསནེན ཨནཔལོཀེཏྭཱ ཀཱརཀསངྒྷཾ ཨནཉྙཱཡ གཎསྶ ཚནྡཾ ཨོསཱརེནྟཱི ཏིསྶོ ཨཱཔཏྟིཡོ ཨཱཔཛྫཏི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
Samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osārentī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
ཨཝསྶུཏཱ བྷིཀྑུནཱི ཨཝསྶུཏསྶ པུརིསཔུགྒལསྶ ཧཏྠཏོ ཁཱདནཱིཡཾ ཝཱ བྷོཛནཱིཡཾ ཝཱ སཧཏྠཱ པཊིགྒཧེཏྭཱ བྷུཉྫནྟཱི ཏིསྶོ ཨཱཔཏྟིཡོ ཨཱཔཛྫཏི། ‘‘ཁཱདིསྶཱམི བྷུཉྫིསྶཱམཱི’’ཏི པཊིགྒཎྷཱཏི, ཨཱཔཏྟི ཐུལླཙྩཡསྶ; ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི སངྒྷཱདིསེསསྶ; ཨུདཀདནྟཔོནཾ པཊིགྒཎྷཱཏི, ཨཱཔཏྟི དུཀྐཊསྶ།
Avassutā bhikkhunī avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā bhuñjantī tisso āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti thullaccayassa; ajjhohāre ajjhohāre āpatti saṅghādisesassa; udakadantaponaṃ paṭiggaṇhāti, āpatti dukkaṭassa.
‘‘ཀིཾ ཏེ, ཨཡྻེ, ཨེསོ པུརིསཔུགྒལོ ཀརིསྶཏི ཨཝསྶུཏོ ཝཱ ཨནཝསྶུཏོ ཝཱ, ཡཏོ ཏྭཾ ཨནཝསྶུཏཱ! ཨིངྒྷ, ཨཡྻེ, ཡཾ ཏེ ཨེསོ པུརིསཔུགྒལོ དེཏི ཁཱདནཱིཡཾ ཝཱ བྷོཛནཱིཡཾ ཝཱ, ཏཾ ཏྭཾ སཧཏྠཱ པཊིགྒཧེཏྭཱ ཁཱད ཝཱ བྷུཉྫ ཝཱ’’ཏི ཨུཡྻོཛེནྟཱི ཏིསྶོ ཨཱཔཏྟིཡོ ཨཱཔཛྫཏི། ཏསྶཱ ཝཙནེན ཁཱདིསྶཱམི བྷུཉྫིསྶཱམཱིཏི པཊིགྒཎྷཱཏི, ཨཱཔཏྟི དུཀྐཊསྶ; ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི ཐུལླཙྩཡསྶ; བྷོཛནཔརིཡོསཱནེ ཨཱཔཏྟི སངྒྷཱདིསེསསྶ།
‘‘Kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā! Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti uyyojentī tisso āpattiyo āpajjati. Tassā vacanena khādissāmi bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti thullaccayassa; bhojanapariyosāne āpatti saṅghādisesassa.
ཀུཔིཏཱ བྷིཀྑུནཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟཱི ཏིསྶོ ཨཱཔཏྟིཡོ ཨཱཔཛྫཏི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
Kupitā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā ; kammavācāpariyosāne āpatti saṅghādisesassa.
ཀིསྨིཉྩིདེཝ ཨདྷིཀརཎེ པཙྩཱཀཏཱ བྷིཀྑུནཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟཱི ཏིསྶོ ཨཱཔཏྟིཡོ ཨཱཔཛྫཏི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
Kismiñcideva adhikaraṇe paccākatā bhikkhunī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
སཾསཊྛཱ བྷིཀྑུནིཡོ ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟིཡོ ཏིསྶོ ཨཱཔཏྟིཡོ ཨཱཔཛྫནྟི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
Saṃsaṭṭhā bhikkhuniyo yāvatatiyaṃ samanubhāsanāya na paṭinissajjantiyo tisso āpattiyo āpajjanti. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
‘‘སཾསཊྛཱཝ, ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠཱ’’ཏི ཨུཡྻོཛེནྟཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟཱི ཏིསྶོ ཨཱཔཏྟིཡོ ཨཱཔཛྫཏི། ཉཏྟིཡཱ དུཀྐཊཾ; དྭཱིཧི ཀམྨཝཱཙཱཧི ཐུལླཙྩཡཱ; ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ།
‘‘Saṃsaṭṭhāva, ayye, tumhe viharatha. Mā tumhe nānā viharitthā’’ti uyyojentī yāvatatiyaṃ samanubhāsanāya na paṭinissajjantī tisso āpattiyo āpajjati. Ñattiyā dukkaṭaṃ; dvīhi kammavācāhi thullaccayā; kammavācāpariyosāne āpatti saṅghādisesassa.
སངྒྷཱདིསེསཱ ནིཊྛིཏཱ།
Saṅghādisesā niṭṭhitā.
