| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
সঙ্ঘাদিসেসকণ্ডো
Saṅghādisesakaṇḍo
১. উস্সযৰাদিকাসিক্খাপদৰণ্ণনা
1. Ussayavādikāsikkhāpadavaṇṇanā
সঙ্ঘাদিসেসেসু পঠমে উস্সযৰাদিকাতি মানুস্সযৰসেন কোধুস্সযৰসেন অড্ডকরণত্থায ৰিনিচ্ছযমহামত্তানং সন্তিকে ৰিৰদমানা। গহপতিনা ৰাতিআদীহি ঠপেত্ৰা পঞ্চ সহধম্মিকে অৰসেসা গহট্ঠপব্বজিতা সঙ্গহিতা। অযং ভিক্খুনী পঠমাপত্তিকন্তি আদিম্হি পঠমং আপত্তি এতস্সাতি পঠমাপত্তিকো, ৰীতিক্কমক্খণেযেৰ আপজ্জিতব্বোতি অত্থো, তং পঠমাপত্তিকং। আপন্নাতি অড্ডপরিযোসানে আপন্না। ভিক্খুনিং সঙ্ঘতো নিস্সারেতীতি নিস্সারণীযো, তং নিস্সারণীযং। সঙ্ঘাদিসেসন্তি এৰংনামকং।
Saṅghādisesesu paṭhame ussayavādikāti mānussayavasena kodhussayavasena aḍḍakaraṇatthāya vinicchayamahāmattānaṃ santike vivadamānā. Gahapatinā vātiādīhi ṭhapetvā pañca sahadhammike avasesā gahaṭṭhapabbajitā saṅgahitā. Ayaṃ bhikkhunī paṭhamāpattikanti ādimhi paṭhamaṃ āpatti etassāti paṭhamāpattiko, vītikkamakkhaṇeyeva āpajjitabboti attho, taṃ paṭhamāpattikaṃ. Āpannāti aḍḍapariyosāne āpannā. Bhikkhuniṃ saṅghato nissāretīti nissāraṇīyo, taṃ nissāraṇīyaṃ. Saṅghādisesanti evaṃnāmakaṃ.
সাৰত্থিযং থুল্লনন্দং আরব্ভ উস্সযৰাদিকৰত্থুস্মিং পঞ্ঞত্তং, সাণত্তিকং, ‘‘অড্ডং করিস্সামী’’তি যংকিঞ্চি দুতিযিকং ৰা সক্খিং ৰা সহাযং ৰা পরিযেসন্তিযা পরিযেসনে দুক্কটং, যত্থ ঠিতায ‘‘অড্ডং কাতুং গচ্ছামী’’তি চিত্তং উপ্পজ্জতি, ততো পট্ঠায গচ্ছন্তিযা পদে পদে দুক্কটং, যত্থকত্থচি অন্তমসো ভিক্খুনুপস্সযং আগতেপি ৰোহারিকে দিস্ৰা অত্তনো কথং আরোচেন্তিযা দুক্কটং। ইতরেন অত্তনো কথায আরোচিতায ভিক্খুনিযা থুল্লচ্চযং, পঠমং ইতরেন পচ্ছা ভিক্খুনিযা আরোচনেপি এসেৰ নযো। সচে পন ভিক্খুনী তং ৰদতি ‘‘মম চ তৰ চ কথং ত্ৰংযেৰ আরোচেহী’’তি, সো অত্তনো ৰা কথং পঠমং আরোচেতু, তস্সা ৰা, পঠমারোচনে ভিক্খুনিযা দুক্কটং, দুতিযে থুল্লচ্চযং, তেন এৰং ৰুত্তায ভিক্খুনিযা আরোচনেপি এসেৰ নযো। সচে পন ভিক্খুনী অঞ্ঞেন কথাপেতি, তত্রাপি এসেৰ নযো। যথা ৰা তথা ৰা হি আরোচিযমানে পঠমারোচনে ভিক্খুনিযা দুক্কটং, দুতিযে থুল্লচ্চযং। উভিন্নং পন কথং সুত্ৰা ৰোহারিকেহি ৰিনিচ্ছযে কতে অড্ডপরিযোসানং নাম হোতি, তস্মিং অড্ডপরিযোসানে ভিক্খুনিযা জযেপি পরাজযেপি সঙ্ঘাদিসেসো।
Sāvatthiyaṃ thullanandaṃ ārabbha ussayavādikavatthusmiṃ paññattaṃ, sāṇattikaṃ, ‘‘aḍḍaṃ karissāmī’’ti yaṃkiñci dutiyikaṃ vā sakkhiṃ vā sahāyaṃ vā pariyesantiyā pariyesane dukkaṭaṃ, yattha ṭhitāya ‘‘aḍḍaṃ kātuṃ gacchāmī’’ti cittaṃ uppajjati, tato paṭṭhāya gacchantiyā pade pade dukkaṭaṃ, yatthakatthaci antamaso bhikkhunupassayaṃ āgatepi vohārike disvā attano kathaṃ ārocentiyā dukkaṭaṃ. Itarena attano kathāya ārocitāya bhikkhuniyā thullaccayaṃ, paṭhamaṃ itarena pacchā bhikkhuniyā ārocanepi eseva nayo. Sace pana bhikkhunī taṃ vadati ‘‘mama ca tava ca kathaṃ tvaṃyeva ārocehī’’ti, so attano vā kathaṃ paṭhamaṃ ārocetu, tassā vā, paṭhamārocane bhikkhuniyā dukkaṭaṃ, dutiye thullaccayaṃ, tena evaṃ vuttāya bhikkhuniyā ārocanepi eseva nayo. Sace pana bhikkhunī aññena kathāpeti, tatrāpi eseva nayo. Yathā vā tathā vā hi ārociyamāne paṭhamārocane bhikkhuniyā dukkaṭaṃ, dutiye thullaccayaṃ. Ubhinnaṃ pana kathaṃ sutvā vohārikehi vinicchaye kate aḍḍapariyosānaṃ nāma hoti, tasmiṃ aḍḍapariyosāne bhikkhuniyā jayepi parājayepi saṅghādiseso.
যা পন পচ্চত্থিকমনুস্সেহি দূতং ৰা পহিণিত্ৰা, সযং ৰা আগন্ত্ৰা ‘‘এহি, অয্যে’’তি আকড্ঢিযমানা গচ্ছতি, যা ৰা উপস্সযে অঞ্ঞেহি কতং অনাচারং অনোদিস্স আচিক্খন্তী রক্খং যাচতি, যায চ কিঞ্চি অৰুত্তা ৰোহারিকা অঞ্ঞতো সুত্ৰা সযমেৰ অড্ডং পরিযোসাপেন্তি, তস্সা, উম্মত্তিকাদীনঞ্চ অনাপত্তি। অঞ্ঞেহি অনাকড্ঢিতায অড্ডকরণং, অড্ডপরিযোসানন্তি ইমানেত্থ দ্ৰে অঙ্গানি। সমুট্ঠানাদীনি পঠমকথিনসদিসানি, ইদং পন কিরিযমেৰাতি।
Yā pana paccatthikamanussehi dūtaṃ vā pahiṇitvā, sayaṃ vā āgantvā ‘‘ehi, ayye’’ti ākaḍḍhiyamānā gacchati, yā vā upassaye aññehi kataṃ anācāraṃ anodissa ācikkhantī rakkhaṃ yācati, yāya ca kiñci avuttā vohārikā aññato sutvā sayameva aḍḍaṃ pariyosāpenti, tassā, ummattikādīnañca anāpatti. Aññehi anākaḍḍhitāya aḍḍakaraṇaṃ, aḍḍapariyosānanti imānettha dve aṅgāni. Samuṭṭhānādīni paṭhamakathinasadisāni, idaṃ pana kiriyamevāti.
উস্সযৰাদিকাসিক্খাপদৰণ্ণনা নিট্ঠিতা।
Ussayavādikāsikkhāpadavaṇṇanā niṭṭhitā.
২. চোরিৰুট্ঠাপিকাসিক্খাপদৰণ্ণনা
2. Corivuṭṭhāpikāsikkhāpadavaṇṇanā
দুতিযে যায পঞ্চমাসগ্ঘনকতো পট্ঠায যংকিঞ্চি পরসন্তকং অৰহরিতং, অযং চোরী নাম, তং চোরিং। ৰজ্ঝং ৰিদিতন্তি তেন কম্মেন ‘‘ৰধারহা অয’’ন্তি এৰং ৰিদিতং। অনপলোকেত্ৰাতি অনাপুচ্ছা। গণন্তি মল্লগণভটিপুত্তগণাদিকং। পূগন্তি ধম্মগণং। সেণিন্তি গন্ধিকসেণিদুস্সিকসেণিআদিকং। যত্থ যত্থ হি রাজানো গণাদীনং গামনিগমে নিয্যাতেন্তি ‘‘তুম্হেৰ এত্থ অনুসাসথা’’তি, তত্থ তত্থ তেযেৰ ইস্সরা হোন্তি, তস্মা তে সন্ধায ইদং ৰুত্তং। এত্থ চ রাজানং ৰা গণাদিকে ৰা অপলোকেত্ৰাপি ভিক্খুনিসঙ্ঘো অপলোকেতব্বোৰ। অঞ্ঞত্র কপ্পাতি তিত্থিযেসু ৰা অঞ্ঞভিক্খুনীসু ৰা পব্বজিতপুব্বা কপ্পা নাম, তং ঠপেত্ৰা অঞ্ঞং উপসম্পাদেন্তিযা গণআচরিনী পত্তচীৰরপরিযেসনেসু সীমাসম্মুতিযা ঞত্তিযা চ দুক্কটং, দ্ৰীহি কম্মৰাচাহি থুল্লচ্চযং, কম্মৰাচাপরিযোসানে সঙ্ঘাদিসেসো।
Dutiye yāya pañcamāsagghanakato paṭṭhāya yaṃkiñci parasantakaṃ avaharitaṃ, ayaṃ corī nāma, taṃ coriṃ. Vajjhaṃ viditanti tena kammena ‘‘vadhārahā aya’’nti evaṃ viditaṃ. Anapaloketvāti anāpucchā. Gaṇanti mallagaṇabhaṭiputtagaṇādikaṃ. Pūganti dhammagaṇaṃ. Seṇinti gandhikaseṇidussikaseṇiādikaṃ. Yattha yattha hi rājāno gaṇādīnaṃ gāmanigame niyyātenti ‘‘tumheva ettha anusāsathā’’ti, tattha tattha teyeva issarā honti, tasmā te sandhāya idaṃ vuttaṃ. Ettha ca rājānaṃ vā gaṇādike vā apaloketvāpi bhikkhunisaṅgho apaloketabbova. Aññatra kappāti titthiyesu vā aññabhikkhunīsu vā pabbajitapubbā kappā nāma, taṃ ṭhapetvā aññaṃ upasampādentiyā gaṇaācarinī pattacīvarapariyesanesu sīmāsammutiyā ñattiyā ca dukkaṭaṃ, dvīhi kammavācāhi thullaccayaṃ, kammavācāpariyosāne saṅghādiseso.
সাৰত্থিযং থুল্লনন্দং আরব্ভ চোরিং ৰুট্ঠাপনৰত্থুস্মিং পঞ্ঞত্তং, চোরিযা ৰেমতিকায দুক্কটং, তথা অচোরিযা চোরিসঞ্ঞায চেৰ ৰেমতিকায চ। অচোরিসঞ্ঞায, অজানন্তিযা, অপলোকেত্ৰা ৰুট্ঠাপেন্তিযা, কপ্পং ৰুট্ঠাপেন্তিযা, উম্মত্তিকাদীনঞ্চ অনাপত্তি। চোরিতা, চোরিসঞ্ঞিতা, অঞ্ঞত্র অনুঞ্ঞাতকারণা ৰুট্ঠাপনন্তি, ইমানেত্থ তীণি অঙ্গানি। চোরিৰুট্ঠাপনসমুট্ঠানং, কিরিযাকিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Sāvatthiyaṃ thullanandaṃ ārabbha coriṃ vuṭṭhāpanavatthusmiṃ paññattaṃ, coriyā vematikāya dukkaṭaṃ, tathā acoriyā corisaññāya ceva vematikāya ca. Acorisaññāya, ajānantiyā, apaloketvā vuṭṭhāpentiyā, kappaṃ vuṭṭhāpentiyā, ummattikādīnañca anāpatti. Coritā, corisaññitā, aññatra anuññātakāraṇā vuṭṭhāpananti, imānettha tīṇi aṅgāni. Corivuṭṭhāpanasamuṭṭhānaṃ, kiriyākiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
চোরিৰুট্ঠাপিকাসিক্খাপদৰণ্ণনা নিট্ঠিতা।
Corivuṭṭhāpikāsikkhāpadavaṇṇanā niṭṭhitā.
৩. একগামন্তরগমনসিক্খাপদৰণ্ণনা
3. Ekagāmantaragamanasikkhāpadavaṇṇanā
ততিযে গামন্তরন্তিআদীসু সকগামতো তাৰ নিক্খমন্তিযা অনাপত্তি, নিক্খমিত্ৰা পন অঞ্ঞং গামং গচ্ছন্তিযা পদে পদে দুক্কটং, একেন পাদেন ইতরস্স গামস্স পরিক্খেপে ৰা উপচারে ৰা অতিক্কন্তে থুল্লচ্চযং, দুতিযেন অতিক্কন্তমত্তে সঙ্ঘাদিসেসো, ততো নিক্খমিত্ৰা পুন সকগামং পৰিসন্তিযাপি এসেৰ নযো। সচে পন খণ্ডপাকারেন ৰা ৰতিচ্ছিদ্দেন ৰা ভিক্খুনিৰিহারভূমিংযেৰ সক্কা হোতি পৰিসিতুং, এৰং পৰিসমানায কপ্পিযভূমিযা পৰিট্ঠা নাম হোতি, তস্মা ৰট্টতি। বহিগামে ঠত্ৰা যংকিঞ্চি সকগামং ৰা পরগামং ৰা অকপ্পিযভূমিং পদসা পৰিসন্তিযা আপত্তীতি অযমেত্থ সঙ্খেপো।
Tatiye gāmantarantiādīsu sakagāmato tāva nikkhamantiyā anāpatti, nikkhamitvā pana aññaṃ gāmaṃ gacchantiyā pade pade dukkaṭaṃ, ekena pādena itarassa gāmassa parikkhepe vā upacāre vā atikkante thullaccayaṃ, dutiyena atikkantamatte saṅghādiseso, tato nikkhamitvā puna sakagāmaṃ pavisantiyāpi eseva nayo. Sace pana khaṇḍapākārena vā vaticchiddena vā bhikkhunivihārabhūmiṃyeva sakkā hoti pavisituṃ, evaṃ pavisamānāya kappiyabhūmiyā paviṭṭhā nāma hoti, tasmā vaṭṭati. Bahigāme ṭhatvā yaṃkiñci sakagāmaṃ vā paragāmaṃ vā akappiyabhūmiṃ padasā pavisantiyā āpattīti ayamettha saṅkhepo.
নদিপারগমনে ৰুত্তলক্খণায নদিযা দুতিযিকং ৰিনা পরতীরং গচ্ছন্তিযা ৰা অন্তরানদিযং দুতিযিকায সদ্ধিং ভণ্ডিত্ৰা পুন ওরিমতীরমেৰ পচ্চুত্তরন্তিযা ৰা পঠমপাদং উদ্ধরিত্ৰা তীরে ঠপিতক্খণে থুল্লচ্চযং, দুতিযপাদুদ্ধারে সঙ্ঘাদিসেসো। ইদ্ধিসেতুযাননাৰাহি পন পরতীরং ওতরিতুং, নহানাদিকারণেন চ ওতিণ্ণায ওরিমতীরং পদসাপি পচ্চুত্তরিতুং ৰট্টতি।
Nadipāragamane vuttalakkhaṇāya nadiyā dutiyikaṃ vinā paratīraṃ gacchantiyā vā antarānadiyaṃ dutiyikāya saddhiṃ bhaṇḍitvā puna orimatīrameva paccuttarantiyā vā paṭhamapādaṃ uddharitvā tīre ṭhapitakkhaṇe thullaccayaṃ, dutiyapāduddhāre saṅghādiseso. Iddhisetuyānanāvāhi pana paratīraṃ otarituṃ, nahānādikāraṇena ca otiṇṇāya orimatīraṃ padasāpi paccuttarituṃ vaṭṭati.
রত্তিৰিপ্পৰাসে ‘‘পুরেঅরুণেযেৰ দুতিযিকায হত্থপাসং ওক্কমিস্সামী’’তি আভোগং ৰিনা একগব্ভেপি দুতিযিকায হত্থপাসাতিক্কমে ঠত্ৰা অরুণং উট্ঠাপেন্তিযা আপত্তি।
Rattivippavāse ‘‘purearuṇeyeva dutiyikāya hatthapāsaṃ okkamissāmī’’ti ābhogaṃ vinā ekagabbhepi dutiyikāya hatthapāsātikkame ṭhatvā aruṇaṃ uṭṭhāpentiyā āpatti.
একা ৰা গণম্হাতি এত্থ পন একা ভিক্খুনীপি গণোযেৰ। ওহীযেয্যাতি অৰহীযেয্য, দস্সনূপচারং ৰা সৰনূপচারং ৰা ৰিজহেয্যাতি অত্থো। তস্মা ইন্দখীলাতিক্কমতো পট্ঠায বহিগামে রুক্খথম্ভসাণিপাকারাদিঅন্তরিতভাৰেনাপি দুতিযিকায দস্সনূপচারে ৰিজহিতে সচেপি সৰনূপচারো অত্থি, আপত্তিযেৰ। অজ্ঝোকাসে পন দূরেপি দস্সনূপচারো হোতি, তত্থ মগ্গমূল়্হসদ্দেন ৰিয ধম্মস্সৰনারোচনসদ্দেন ৰিয চ ‘অয্যে’তি সদ্দাযন্তিযা সদ্দস্সৰনাতিক্কমে আপত্তিযেৰ। সচে পন মগ্গং গচ্ছন্তী ওহীযিত্ৰা ‘‘ইদানি পাপুণিস্সামী’’তি সউস্সাহা অনুবন্ধতি, ৰট্টতি।
Ekā vā gaṇamhāti ettha pana ekā bhikkhunīpi gaṇoyeva. Ohīyeyyāti avahīyeyya, dassanūpacāraṃ vā savanūpacāraṃ vā vijaheyyāti attho. Tasmā indakhīlātikkamato paṭṭhāya bahigāme rukkhathambhasāṇipākārādiantaritabhāvenāpi dutiyikāya dassanūpacāre vijahite sacepi savanūpacāro atthi, āpattiyeva. Ajjhokāse pana dūrepi dassanūpacāro hoti, tattha maggamūḷhasaddena viya dhammassavanārocanasaddena viya ca ‘ayye’ti saddāyantiyā saddassavanātikkame āpattiyeva. Sace pana maggaṃ gacchantī ohīyitvā ‘‘idāni pāpuṇissāmī’’ti saussāhā anubandhati, vaṭṭati.
সাৰত্থিযং অঞ্ঞতরং ভিক্খুনিং আরব্ভ গামন্তরগমনৰত্থুস্মিং পঞ্ঞত্তং, ‘‘একা ৰা নদিপার’’ন্তিআদিকা এত্থ তিৰিধা অনুপঞ্ঞত্তি, পুরে অরুণে সকগামতো নিক্খমিত্ৰা অরুণুগ্গমনকালে গামন্তরপরিযাপন্নং নদিপারং ওক্কমনন্তিযা পন চতস্সোপি আপত্তিযো একক্খণেযেৰ হোন্তি। ৰুত্তম্পি চেতং –
Sāvatthiyaṃ aññataraṃ bhikkhuniṃ ārabbha gāmantaragamanavatthusmiṃ paññattaṃ, ‘‘ekā vā nadipāra’’ntiādikā ettha tividhā anupaññatti, pure aruṇe sakagāmato nikkhamitvā aruṇuggamanakāle gāmantarapariyāpannaṃ nadipāraṃ okkamanantiyā pana catassopi āpattiyo ekakkhaṇeyeva honti. Vuttampi cetaṃ –
‘‘সিক্খাপদা বুদ্ধৰরেন ৰণ্ণিতা।
‘‘Sikkhāpadā buddhavarena vaṇṇitā;
সঙ্ঘাদিসেসা চতুরো ভৰেয্যুং।
Saṅghādisesā caturo bhaveyyuṃ;
আপজ্জেয্য একপযোগেন সব্বা।
Āpajjeyya ekapayogena sabbā;
পঞ্হা মেসা কুসলেহি চিন্তিতা’’তি॥ (পরি॰ ৪৭৯)।
Pañhā mesā kusalehi cintitā’’ti. (pari. 479);
এতেনুপাযেন তিণ্ণং, দ্ৰিন্নঞ্চ একতোভাৰো ৰেদিতব্বো। দুতিযিকায পন পক্কন্তায ৰা ৰিব্ভন্তায ৰা কালঙ্কতায ৰা পক্খসঙ্কন্তায ৰা আপদাসু ৰা গামন্তরগমনাদীনি করোন্তিযা উম্মত্তিকাদীনঞ্চ অনাপত্তি। অন্তরাযেন একতোভাৰো, গামন্তরগমনাদীসু অঞ্ঞতরতাপজ্জনং, আপদায অভাৰোতি ইমানেত্থ তীণি অঙ্গানি। সমুট্ঠানাদীনি পঠমপারাজিকসদিসানি, ইদং পন পণ্ণত্তিৰজ্জং, তিচিত্তং, তিৰেদনন্তি।
Etenupāyena tiṇṇaṃ, dvinnañca ekatobhāvo veditabbo. Dutiyikāya pana pakkantāya vā vibbhantāya vā kālaṅkatāya vā pakkhasaṅkantāya vā āpadāsu vā gāmantaragamanādīni karontiyā ummattikādīnañca anāpatti. Antarāyena ekatobhāvo, gāmantaragamanādīsu aññataratāpajjanaṃ, āpadāya abhāvoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana paṇṇattivajjaṃ, ticittaṃ, tivedananti.
একগামন্তরগমনসিক্খাপদৰণ্ণনা নিট্ঠিতা।
Ekagāmantaragamanasikkhāpadavaṇṇanā niṭṭhitā.
৪. উক্খিত্তকওসারণসিক্খাপদৰণ্ণনা
4. Ukkhittakaosāraṇasikkhāpadavaṇṇanā
চতুত্থে উক্খিত্তন্তি আপত্তিযা অদস্সনাদীসু উক্খিত্তং। অনঞ্ঞায গণস্স ছন্দন্তি তস্সেৰ কারকসঙ্ঘস্স ছন্দং অজানিত্ৰা। ওসারেয্যাতি ওসারণকম্মং করেয্য। তস্সা এৰং করোন্তিযা, গণপরিযেসনে সীমাসম্মুতিযা ঞত্তিযা চ দুক্কটং, দ্ৰীহি কম্মৰাচাহি থুল্লচ্চযং, কম্মৰাচাপরিযোসানে সঙ্ঘাদিসেসো।
Catutthe ukkhittanti āpattiyā adassanādīsu ukkhittaṃ. Anaññāya gaṇassachandanti tasseva kārakasaṅghassa chandaṃ ajānitvā. Osāreyyāti osāraṇakammaṃ kareyya. Tassā evaṃ karontiyā, gaṇapariyesane sīmāsammutiyā ñattiyā ca dukkaṭaṃ, dvīhi kammavācāhi thullaccayaṃ, kammavācāpariyosāne saṅghādiseso.
সাৰত্থিযং থুল্লনন্দং আরব্ভ এৰং ওসারণৰত্থুস্মিং পঞ্ঞত্তং, তিকসঙ্ঘাদিসেসং, অধম্মকম্মে তিকদুক্কটং, কারকসঙ্ঘং ৰা আপুচ্ছিত্ৰা, গণস্স ৰা ছন্দং জানিত্ৰা, ৰত্তে ৰা ৰত্তন্তিং, অসন্তে কারকসঙ্ঘে ওসারেন্তিযা, উম্মত্তিকাদীনঞ্চ অনাপত্তি। ধম্মকম্মেন উক্খিত্ততা, অঞ্ঞত্র অনুঞ্ঞাতকারণা ওসারণন্তি ইমানেত্থ দ্ৰে অঙ্গানি। সমুট্ঠানাদীনি সঙ্ঘভেদসিক্খাপদে ৰুত্তনযানেৰ, ইদং পন কিরিযাকিরিযন্তি।
Sāvatthiyaṃ thullanandaṃ ārabbha evaṃ osāraṇavatthusmiṃ paññattaṃ, tikasaṅghādisesaṃ, adhammakamme tikadukkaṭaṃ, kārakasaṅghaṃ vā āpucchitvā, gaṇassa vā chandaṃ jānitvā, vatte vā vattantiṃ, asante kārakasaṅghe osārentiyā, ummattikādīnañca anāpatti. Dhammakammena ukkhittatā, aññatra anuññātakāraṇā osāraṇanti imānettha dve aṅgāni. Samuṭṭhānādīni saṅghabhedasikkhāpade vuttanayāneva, idaṃ pana kiriyākiriyanti.
উক্খিত্তকওসারণসিক্খাপদৰণ্ণনা নিট্ঠিতা।
Ukkhittakaosāraṇasikkhāpadavaṇṇanā niṭṭhitā.
৫. ভোজনপ্পটিগ্গহণপঠমসিক্খাপদৰণ্ণনা
5. Bhojanappaṭiggahaṇapaṭhamasikkhāpadavaṇṇanā
পঞ্চমে অৰস্সুতাতি ছন্দরাগেন তিন্তা। অৰস্সুতস্সাতি তাদিসস্সেৰ। খাদেয্য ৰা ভুঞ্জেয্য ৰাতি এত্থ পটিগ্গহণে থুল্লচ্চযং, অজ্ঝোহারে অজ্ঝোহারে সঙ্ঘাদিসেসো।
Pañcame avassutāti chandarāgena tintā. Avassutassāti tādisasseva. Khādeyya vā bhuñjeyya vāti ettha paṭiggahaṇe thullaccayaṃ, ajjhohāre ajjhohāre saṅghādiseso.
সাৰত্থিযং সুন্দরীনন্দং আরব্ভ অৰস্সুতায অৰস্সুতস্স হত্থতো আমিসপ্পটিগ্গহণৰত্থুস্মিং পঞ্ঞত্তং, একতোঅৰস্সুতে পটিগ্গহণে দুক্কটং, অজ্ঝোহারে অজ্ঝোহারে থুল্লচ্চযং, যক্খপেতপণ্ডকতিরচ্ছানগতমনুস্সৰিগ্গহানং হত্থতো উভতোঅৰস্সুতেপি সতি এসেৰ নযো। তত্থ পন একতোঅৰস্সুতে সতি দুক্কটং, সব্বত্থ উদকদন্তপোনগ্গহণেপি পরিভোগেপি দুক্কটমেৰ। উভোসু অনৰস্সুতেসু, ‘‘অনৰস্সুতো’’তি ৰা ঞত্ৰা গণ্হন্তিযা, উম্মত্তিকাদীনঞ্চ অনাপত্তি। উদকদন্তপোনতো অঞ্ঞং অজ্ঝোহরণীযং, উভতোঅৰস্সুততা, সহত্থা গহণং, অজ্ঝোহরণন্তি ইমানেত্থ চত্তারি অঙ্গানি। সমুট্ঠানাদীনি পঠমপারাজিকসদিসানীতি।
Sāvatthiyaṃ sundarīnandaṃ ārabbha avassutāya avassutassa hatthato āmisappaṭiggahaṇavatthusmiṃ paññattaṃ, ekatoavassute paṭiggahaṇe dukkaṭaṃ, ajjhohāre ajjhohāre thullaccayaṃ, yakkhapetapaṇḍakatiracchānagatamanussaviggahānaṃ hatthato ubhatoavassutepi sati eseva nayo. Tattha pana ekatoavassute sati dukkaṭaṃ, sabbattha udakadantaponaggahaṇepi paribhogepi dukkaṭameva. Ubhosu anavassutesu, ‘‘anavassuto’’ti vā ñatvā gaṇhantiyā, ummattikādīnañca anāpatti. Udakadantaponato aññaṃ ajjhoharaṇīyaṃ, ubhatoavassutatā, sahatthā gahaṇaṃ, ajjhoharaṇanti imānettha cattāri aṅgāni. Samuṭṭhānādīni paṭhamapārājikasadisānīti.
ভোজনপ্পটিগ্গহণপঠমসিক্খাপদৰণ্ণনা নিট্ঠিতা।
Bhojanappaṭiggahaṇapaṭhamasikkhāpadavaṇṇanā niṭṭhitā.
৬. ভোজনপ্পটিগ্গহণদুতিযসিক্খাপদৰণ্ণনা
6. Bhojanappaṭiggahaṇadutiyasikkhāpadavaṇṇanā
ছট্ঠে যতো ত্ৰন্তি যস্মা ত্ৰং। ইঙ্ঘাতি উয্যোজনত্থে নিপাতো। অযম্পীতি যা এৰং উয্যোজেতি, সা এৰং উয্যোজনেন চ তেন ৰচনেন ইতরিস্সা পটিগ্গহণেন চ দুক্কটানি, অজ্ঝোহারগণনায থুল্লচ্চযানি চ আপজ্জিত্ৰা ভোজনপরিযোসানে সঙ্ঘাদিসেসং আপজ্জতি।
Chaṭṭhe yato tvanti yasmā tvaṃ. Iṅghāti uyyojanatthe nipāto. Ayampīti yā evaṃ uyyojeti, sā evaṃ uyyojanena ca tena vacanena itarissā paṭiggahaṇena ca dukkaṭāni, ajjhohāragaṇanāya thullaccayāni ca āpajjitvā bhojanapariyosāne saṅghādisesaṃ āpajjati.
সাৰত্থিযং অঞ্ঞতরং ভিক্খুনিং আরব্ভ এৰং উয্যোজনৰত্থুস্মিং পঞ্ঞত্তং, সাণত্তিকমেৰ, পুরিসস্স ৰা যক্খাদীনং ৰা হত্থতো উদকদন্তপোনপ্পটিগ্গহণুয্যোজনে চ তেসং পরিভোগে চ দুক্কটং, এস নযো যক্খাদীনং হত্থতো অৰসেসগ্গহণত্থং উয্যোজনে, তেসং গহণে, অজ্ঝোহারে চ। ভোজনপরিযোসানে পন থুল্লচ্চযং। ‘‘অনৰস্সুতো’’তি ঞত্ৰা ৰা, ‘‘কুপিতা ন পটিগ্গণ্হতী’’তি ৰা, ‘‘কুলানুদ্দযতায ন পটিগ্গণ্হতী’’তি ৰা উয্যোজেন্তিযা, উম্মত্তিকাদীনঞ্চ অনাপত্তি। মনুস্সপুরিসতা, অঞ্ঞত্র অনুঞ্ঞাতকারণা, ‘‘খাদনীযং ভোজনীযং গহেত্ৰা ভুঞ্জা’’তি উয্যোজনা, তেন ৰচনেন গহেত্ৰা ইতরিস্সা ভোজনপরিযোসানন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানীতি।
Sāvatthiyaṃ aññataraṃ bhikkhuniṃ ārabbha evaṃ uyyojanavatthusmiṃ paññattaṃ, sāṇattikameva, purisassa vā yakkhādīnaṃ vā hatthato udakadantaponappaṭiggahaṇuyyojane ca tesaṃ paribhoge ca dukkaṭaṃ, esa nayo yakkhādīnaṃ hatthato avasesaggahaṇatthaṃ uyyojane, tesaṃ gahaṇe, ajjhohāre ca. Bhojanapariyosāne pana thullaccayaṃ. ‘‘Anavassuto’’ti ñatvā vā, ‘‘kupitā na paṭiggaṇhatī’’ti vā, ‘‘kulānuddayatāya na paṭiggaṇhatī’’ti vā uyyojentiyā, ummattikādīnañca anāpatti. Manussapurisatā, aññatra anuññātakāraṇā, ‘‘khādanīyaṃ bhojanīyaṃ gahetvā bhuñjā’’ti uyyojanā, tena vacanena gahetvā itarissā bhojanapariyosānanti imānettha tīṇi aṅgāni. Samuṭṭhānādīni adinnādānasadisānīti.
ভোজনপ্পটিগ্গহণদুতিযসিক্খাপদৰণ্ণনা নিট্ঠিতা।
Bhojanappaṭiggahaṇadutiyasikkhāpadavaṇṇanā niṭṭhitā.
৭-৮-৯. সঞ্চরিত্তাদিসিক্খাপদৰণ্ণনা
7-8-9. Sañcarittādisikkhāpadavaṇṇanā
সত্তমঅট্ঠমনৰমসিক্খাপদানং সঞ্চরিত্তাদিত্তযে ৰুত্তনযেনেৰ ৰিনিচ্ছযো ৰেদিতব্বো।
Sattamaaṭṭhamanavamasikkhāpadānaṃ sañcarittādittaye vuttanayeneva vinicchayo veditabbo.
সঞ্চরিত্তাদিসিক্খাপদৰণ্ণনা নিট্ঠিতা।
Sañcarittādisikkhāpadavaṇṇanā niṭṭhitā.
১০. সিক্খংপচ্চাচিক্খণসিক্খাপদৰণ্ণনা
10. Sikkhaṃpaccācikkhaṇasikkhāpadavaṇṇanā
দসমে কিংনুমাৰ সমণিযোতি কিংনু ইমা এৰ সমণিযো। তাসাহন্তি তাসং অহং। যাৰততিযকপদত্থো ভিক্খুপাতিমোক্খৰণ্ণনাযং (কঙ্খা॰ অট্ঠ॰ নিগমনৰণ্ণনা), অৰসেসৰিনিচ্ছযো চ তত্থেৰ সঙ্ঘভেদসিক্খাপদৰণ্ণনাযং ৰুত্তনযেনেৰ ৰেদিতব্বো, ইদং পন সাৰত্থিযং চণ্ডকাল়িভিক্খুনিং (পাচি॰ ৭০৯) আরব্ভ ‘‘বুদ্ধং পচ্চাচিক্খামী’’তিআদিৰচনৰত্থুস্মিং পঞ্ঞত্তং, এৰং ৰচনমেৰ চেত্থ চতূসু অঙ্গেসু পঠমং অঙ্গন্তি অযং ৰিসেসো, সেসং তাদিসমেৰাতি।
Dasame kiṃnumāva samaṇiyoti kiṃnu imā eva samaṇiyo. Tāsāhanti tāsaṃ ahaṃ. Yāvatatiyakapadattho bhikkhupātimokkhavaṇṇanāyaṃ (kaṅkhā. aṭṭha. nigamanavaṇṇanā), avasesavinicchayo ca tattheva saṅghabhedasikkhāpadavaṇṇanāyaṃ vuttanayeneva veditabbo, idaṃ pana sāvatthiyaṃ caṇḍakāḷibhikkhuniṃ (pāci. 709) ārabbha ‘‘buddhaṃ paccācikkhāmī’’tiādivacanavatthusmiṃ paññattaṃ, evaṃ vacanameva cettha catūsu aṅgesu paṭhamaṃ aṅganti ayaṃ viseso, sesaṃ tādisamevāti.
সিক্খংপচ্চাচিক্খণসিক্খাপদৰণ্ণনা নিট্ঠিতা।
Sikkhaṃpaccācikkhaṇasikkhāpadavaṇṇanā niṭṭhitā.
১১. অধিকরণকুপিতসিক্খাপদৰণ্ণনা
11. Adhikaraṇakupitasikkhāpadavaṇṇanā
একাদসমে কিস্মিঞ্চিদেৰ অধিকরণেতি চতুন্নং অঞ্ঞতরস্মিং। পচ্চাকতাতি পরাজিতা। ইদম্পি সাৰত্থিযং চণ্ডকাল়িং আরব্ভ ‘‘ছন্দগামিনিযো চ ভিক্খুনিযো’’তিআদিৰচনৰত্থুস্মিং পঞ্ঞত্তং, সেসং দসমে ৰুত্তনযেনেৰ ৰেদিতব্বন্তি।
Ekādasame kismiñcideva adhikaraṇeti catunnaṃ aññatarasmiṃ. Paccākatāti parājitā. Idampi sāvatthiyaṃ caṇḍakāḷiṃ ārabbha ‘‘chandagāminiyo ca bhikkhuniyo’’tiādivacanavatthusmiṃ paññattaṃ, sesaṃ dasame vuttanayeneva veditabbanti.
অধিকরণকুপিতসিক্খাপদৰণ্ণনা নিট্ঠিতা।
Adhikaraṇakupitasikkhāpadavaṇṇanā niṭṭhitā.
১২. পাপসমাচারপঠমসিক্খাপদৰণ্ণনা
12. Pāpasamācārapaṭhamasikkhāpadavaṇṇanā
দ্ৰাদসমে সংসট্ঠাতি পব্বজিতানং অননুলোমেন গিহীনং কোট্টনপচনসাসনহরণাদিনা কাযিকৰাচসিকেন মিস্সীভূতা। পাপো কাযিকৰাচসিকো আচারো এতাসন্তি পাপাচারা। পাপো কিত্তিসদ্দো এতাসন্তি পাপসদ্দা। পাপো আজীৰসঙ্খাতো সিলোকো এতাসন্তি পাপসিলোকা । ভিক্খুনিসঙ্ঘস্স ৰিহেসিকাতি অঞ্ঞমঞ্ঞিস্সা কম্মে করিযমানে পটিক্কোসনেন ৰিহেসিকা। ৰজ্জপ্পটিচ্ছাদিকাতি খুদ্দানুখুদ্দকস্স ৰজ্জস্স পটিচ্ছাদিকা।
Dvādasame saṃsaṭṭhāti pabbajitānaṃ ananulomena gihīnaṃ koṭṭanapacanasāsanaharaṇādinā kāyikavācasikena missībhūtā. Pāpo kāyikavācasiko ācāro etāsanti pāpācārā. Pāpo kittisaddo etāsanti pāpasaddā. Pāpo ājīvasaṅkhāto siloko etāsanti pāpasilokā. Bhikkhunisaṅghassa vihesikāti aññamaññissā kamme kariyamāne paṭikkosanena vihesikā. Vajjappaṭicchādikāti khuddānukhuddakassa vajjassa paṭicchādikā.
সাৰত্থিযং সম্বহুলা ভিক্খুনিযো আরব্ভ সংসট্ঠৰিহারৰত্থুস্মিং পঞ্ঞত্তং, সেসমেত্থাপি দসমে ৰুত্তনযেনেৰ ৰেদিতব্বং, সমনুভাসনকম্মকালে পন দ্ৰেতিস্সো একতো সমনুভাসিতব্বাতি।
Sāvatthiyaṃ sambahulā bhikkhuniyo ārabbha saṃsaṭṭhavihāravatthusmiṃ paññattaṃ, sesametthāpi dasame vuttanayeneva veditabbaṃ, samanubhāsanakammakāle pana dvetisso ekato samanubhāsitabbāti.
পাপসমাচারপঠমসিক্খাপদৰণ্ণনা নিট্ঠিতা।
Pāpasamācārapaṭhamasikkhāpadavaṇṇanā niṭṭhitā.
১৩. পাপসমাচারদুতিযসিক্খাপদৰণ্ণনা
13. Pāpasamācāradutiyasikkhāpadavaṇṇanā
তেরসমে এৰং ৰদেয্যাতি তা সমনুভট্ঠা ভিক্খুনিযো এৰং ৰদেয্য। এৰাচারাতি এৰংআচারা, যাদিসো তুম্হাকং আচারো, তাদিসো আচারোতি অত্থো, এস নযো সব্বত্থ। উঞ্ঞাযাতি অৰঞ্ঞায নীচং কত্ৰা জাননায। পরিভৰেনাতি ‘‘কিং ইমা করিস্সন্তী’’তি এৰং পরিভৰিত্ৰা জাননেন। অক্খন্তিযাতি অসহনতায, কোধেনাতি অত্থো। ৰেভস্সিযাতি বলৰন্তস্স ভাৰেন, অত্তনো বলপ্পকাসনেন সমুত্রাসেনাতি অত্থো। দুব্বল্যাতি তুম্হাকং দুব্বলভাৰেন, সব্বত্থ উঞ্ঞায চ পরিভৰেন চাতি এৰং সমুচ্চযত্থো দট্ঠব্বো। ৰিৰিচ্চথাতি নানা হোথ, অননুলোমিকং কাযিকৰাচসিকসংসগ্গং পজহথাতি অত্থো।
Terasame evaṃ vadeyyāti tā samanubhaṭṭhā bhikkhuniyo evaṃ vadeyya. Evācārāti evaṃācārā, yādiso tumhākaṃ ācāro, tādiso ācāroti attho, esa nayo sabbattha. Uññāyāti avaññāya nīcaṃ katvā jānanāya. Paribhavenāti ‘‘kiṃ imā karissantī’’ti evaṃ paribhavitvā jānanena. Akkhantiyāti asahanatāya, kodhenāti attho. Vebhassiyāti balavantassa bhāvena, attano balappakāsanena samutrāsenāti attho. Dubbalyāti tumhākaṃ dubbalabhāvena, sabbattha uññāya ca paribhavena cāti evaṃ samuccayattho daṭṭhabbo. Viviccathāti nānā hotha, ananulomikaṃ kāyikavācasikasaṃsaggaṃ pajahathāti attho.
সাৰত্থিযং থুল্লনন্দং আরব্ভ ‘‘সংসট্ঠাৰ, অয্যে, তুম্হে ৰিহরথ, মা তুম্হে নানা ৰিহরিত্থা’’তি উয্যোজনৰত্থুস্মিং পঞ্ঞত্তং, সেসমেত্থাপি দসমে ৰুত্তনযেনেৰ ৰেদিতব্বন্তি।
Sāvatthiyaṃ thullanandaṃ ārabbha ‘‘saṃsaṭṭhāva, ayye, tumhe viharatha, mā tumhe nānā viharitthā’’ti uyyojanavatthusmiṃ paññattaṃ, sesametthāpi dasame vuttanayeneva veditabbanti.
পাপসমাচারদুতিযসিক্খাপদৰণ্ণনা নিট্ঠিতা।
Pāpasamācāradutiyasikkhāpadavaṇṇanā niṭṭhitā.
১৪. সঙ্ঘভেদকাদিসিক্খাপদৰণ্ণনা
14. Saṅghabhedakādisikkhāpadavaṇṇanā
সঙ্ঘভেদাদীসু চতূসু ৰুত্তনযেনেৰ ৰিনিচ্ছযো ৰেদিতব্বো। কেৰলঞ্হি ভিক্খুনী সঙ্ঘং ন ভিন্দতি, ভেদায পন পরক্কমতি চেৰ অনুৰত্ততি চ। উদ্দিট্ঠা খো অয্যাযো সত্তরস সঙ্ঘাদিসেসা ধম্মাতি ভিক্খূ আরব্ভ পঞ্ঞত্তা সাধারণা সত্ত, অসাধারণা দসাতি এৰং সত্তরস। উভতোসঙ্ঘে পক্খমানত্তং চরিতব্বন্তি ভিক্খুনিযা হি আপত্তিং ছাদেন্তিযাপি পরিৰাসো নাম নত্থি, ছাদনপচ্চযাপি ন দুক্কটং আপজ্জতি, তস্মা ছাদেত্ৰাপি অছাদেত্ৰাপি একং পক্খমানত্তমেৰ চরিতব্বং। তং ভিক্খুনীহি অত্তনো সীমং সোধেত্ৰা ৰিহারসীমায ৰা, সোধেতুং অসক্কোন্তীহি খণ্ডসীমায ৰা সব্বন্তিমেন পরিচ্ছেদেন চতুৰগ্গং গণং সন্নিপাতাপেত্ৰা দাতব্বং। সচে একা আপত্তি হোতি, একিস্সা ৰসেন, সচে দ্ৰে ৰা তিস্সো ৰা সম্বহুলা ৰা একৰত্থুকা ৰা নানাৰত্থুকা ৰা, তাসং তাসং ৰসেন ভিক্খুপাতিমোক্খৰণ্ণনাযং ৰুত্তৰত্থুগোত্তনামআপত্তিভেদেসু যং যং ইচ্ছতি, তং তং আদায যোজনা কাতব্বা।
Saṅghabhedādīsu catūsu vuttanayeneva vinicchayo veditabbo. Kevalañhi bhikkhunī saṅghaṃ na bhindati, bhedāya pana parakkamati ceva anuvattati ca. Uddiṭṭhā kho ayyāyo sattarasa saṅghādisesā dhammāti bhikkhū ārabbha paññattā sādhāraṇā satta, asādhāraṇā dasāti evaṃ sattarasa. Ubhatosaṅghe pakkhamānattaṃ caritabbanti bhikkhuniyā hi āpattiṃ chādentiyāpi parivāso nāma natthi, chādanapaccayāpi na dukkaṭaṃ āpajjati, tasmā chādetvāpi achādetvāpi ekaṃ pakkhamānattameva caritabbaṃ. Taṃ bhikkhunīhi attano sīmaṃ sodhetvā vihārasīmāya vā, sodhetuṃ asakkontīhi khaṇḍasīmāya vā sabbantimena paricchedena catuvaggaṃ gaṇaṃ sannipātāpetvā dātabbaṃ. Sace ekā āpatti hoti, ekissā vasena, sace dve vā tisso vā sambahulā vā ekavatthukā vā nānāvatthukā vā, tāsaṃ tāsaṃ vasena bhikkhupātimokkhavaṇṇanāyaṃ vuttavatthugottanāmaāpattibhedesu yaṃ yaṃ icchati, taṃ taṃ ādāya yojanā kātabbā.
তত্রিদং পঠমাপত্তিৰসেন মুখমত্তনিদস্সনং – তায আপন্নায ভিক্খুনিযা ভিক্খুনিসঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্সৰচনীযো ‘‘অহং, অয্যে, একং আপত্তিং আপজ্জিং উস্সযৰাদং, সাহং, অয্যে, সঙ্ঘং একিস্সা আপত্তিযা উস্সযৰাদায পক্খমানত্তং যাচামী’’তি, এৰং তিক্খত্তুং যাচাপেত্ৰা ব্যত্তায ভিক্খুনিযা পটিবলায সঙ্ঘো ঞাপেতব্বো –
Tatridaṃ paṭhamāpattivasena mukhamattanidassanaṃ – tāya āpannāya bhikkhuniyā bhikkhunisaṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassavacanīyo ‘‘ahaṃ, ayye, ekaṃ āpattiṃ āpajjiṃ ussayavādaṃ, sāhaṃ, ayye, saṅghaṃ ekissā āpattiyā ussayavādāya pakkhamānattaṃ yācāmī’’ti, evaṃ tikkhattuṃ yācāpetvā byattāya bhikkhuniyā paṭibalāya saṅgho ñāpetabbo –
‘‘সুণাতু মে, অয্যে, সঙ্ঘো, অযং ইত্থন্নামা ভিক্খুনী একং আপত্তিং আপজ্জিং উস্সযৰাদং, সা সঙ্ঘং একিস্সা আপত্তিযা উস্সযৰাদায পক্খমানত্তং যাচতি, যদি সঙ্ঘস্স পত্তকল্লং, সঙ্ঘো ইত্থন্নামায ভিক্খুনিযা একিস্সা আপত্তিযা উস্সযৰাদায পক্খমানত্তং দদেয্য, এসা ঞত্তি।
‘‘Suṇātu me, ayye, saṅgho, ayaṃ itthannāmā bhikkhunī ekaṃ āpattiṃ āpajjiṃ ussayavādaṃ, sā saṅghaṃ ekissā āpattiyā ussayavādāya pakkhamānattaṃ yācati, yadi saṅghassa pattakallaṃ, saṅgho itthannāmāya bhikkhuniyā ekissā āpattiyā ussayavādāya pakkhamānattaṃ dadeyya, esā ñatti.
‘‘সুণাতু মে, অয্যে, সঙ্ঘো, অযং ইত্থন্নামা ভিক্খুনী…পে॰… দুতিযম্পি…পে॰… ততিযম্পি এতমত্থং ৰদামি, সুণাতু মে, অয্যে, সঙ্ঘো…পে॰… সা ভাসেয্য। দিন্নং সঙ্ঘেন ইত্থন্নামায ভিক্খুনিযা একিস্সা আপত্তিযা উস্সযৰাদায পক্খমানত্তং। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Suṇātu me, ayye, saṅgho, ayaṃ itthannāmā bhikkhunī…pe… dutiyampi…pe… tatiyampi etamatthaṃ vadāmi, suṇātu me, ayye, saṅgho…pe… sā bhāseyya. Dinnaṃ saṅghena itthannāmāya bhikkhuniyā ekissā āpattiyā ussayavādāya pakkhamānattaṃ. Khamati saṅghassa, tasmā tuṇhī, evametaṃ dhārayāmī’’ti.
কম্মৰাচাপরিযোসানে ‘‘ৰত্তং সমাদিযামি, মানত্তং সমাদিযামী’’তি সমাদিযিত্ৰা সঙ্ঘস্স আরোচেত্ৰা নিক্খিত্তৰত্তেন তাৰ ৰসিতুকামায তত্থেৰ সঙ্ঘমজ্ঝে ৰা পক্কন্তাসু ভিক্খুনীসু একভিক্খুনিযা ৰা দুতিযিকায ৰা সন্তিকে ‘‘ৰত্তং নিক্খিপামি, মানত্তং নিক্খিপামী’’তি নিক্খিপিতব্বং। অঞ্ঞিস্সা পন আগন্তুকায সন্তিকে আরোচেত্ৰা নিক্খিপিতব্বং, নিক্খিত্তকালতো পট্ঠায পকতত্তট্ঠানে তিট্ঠতি, ততো পুরেঅরুণেযেৰ চতূহি ভিক্খুনীহি তং ভিক্খুনিং গহেত্ৰা গামূপচারতো চ ভিক্খূনং ৰিহারূপচারতো চ দ্ৰে লেড্ডুপাতে অতিক্কমিত্ৰা মহামগ্গা ওক্কম্ম গুম্বৰতিআদীহি পটিচ্ছন্নে ওকাসে নিসীদিতব্বং। চতূহি ভিক্খূহিপি তত্থ গন্তব্বং, গন্ত্ৰা ভিক্খুনীনং অৰিদূরে ৰিসুং নিসীদিতব্বং। অথ তায ভিক্খুনিযা ৰুত্তনযেনেৰ ৰত্তং সমাদিযিত্ৰা ভিক্খুনিসঙ্ঘস্স তাৰ এৰং আরোচেতব্বং –
Kammavācāpariyosāne ‘‘vattaṃ samādiyāmi, mānattaṃ samādiyāmī’’ti samādiyitvā saṅghassa ārocetvā nikkhittavattena tāva vasitukāmāya tattheva saṅghamajjhe vā pakkantāsu bhikkhunīsu ekabhikkhuniyā vā dutiyikāya vā santike ‘‘vattaṃ nikkhipāmi, mānattaṃ nikkhipāmī’’ti nikkhipitabbaṃ. Aññissā pana āgantukāya santike ārocetvā nikkhipitabbaṃ, nikkhittakālato paṭṭhāya pakatattaṭṭhāne tiṭṭhati, tato purearuṇeyeva catūhi bhikkhunīhi taṃ bhikkhuniṃ gahetvā gāmūpacārato ca bhikkhūnaṃ vihārūpacārato ca dve leḍḍupāte atikkamitvā mahāmaggā okkamma gumbavatiādīhi paṭicchanne okāse nisīditabbaṃ. Catūhi bhikkhūhipi tattha gantabbaṃ, gantvā bhikkhunīnaṃ avidūre visuṃ nisīditabbaṃ. Atha tāya bhikkhuniyā vuttanayeneva vattaṃ samādiyitvā bhikkhunisaṅghassa tāva evaṃ ārocetabbaṃ –
‘‘অহং, অয্যে, একং আপত্তিং আপজ্জিং উস্সযৰাদং, সাহং সঙ্ঘং একিস্সা আপত্তিযা উস্সযৰাদায পক্খমানত্তং যাচিং, তস্সা মে সঙ্ঘো একিস্সা আপত্তিযা উস্সযৰাদায পক্খমানত্তং অদাসি, সাহং মানত্তং চরামি, ৰেদযামহং, অয্যে, ‘ৰেদযতী’তি মং সঙ্ঘো ধারেতূ’’তি।
‘‘Ahaṃ, ayye, ekaṃ āpattiṃ āpajjiṃ ussayavādaṃ, sāhaṃ saṅghaṃ ekissā āpattiyā ussayavādāya pakkhamānattaṃ yāciṃ, tassā me saṅgho ekissā āpattiyā ussayavādāya pakkhamānattaṃ adāsi, sāhaṃ mānattaṃ carāmi, vedayāmahaṃ, ayye, ‘vedayatī’ti maṃ saṅgho dhāretū’’ti.
ততো ভিক্খুসঙ্ঘস্স সন্তিকং গন্ত্ৰা এৰং আরোচেতব্বং ‘‘অহং, অয্যা, একং আপত্তিং আপজ্জিং…পে॰… ৰেদযামহং, অয্যা, ‘ৰেদযতী’তি মং সঙ্ঘো ধারেতূ’’তি। আরোচেত্ৰা ভিক্খুনিসঙ্ঘস্সেৰ সন্তিকে নিসীদিতব্বং, ততো পট্ঠায ভিক্খূসু ৰা, দুতিযিকং ঠপেত্ৰা ভিক্খুনীসু ৰা পক্কন্তাসুপি উভতোসঙ্ঘে মানত্তং চিণ্ণমেৰ হোতি। যাৰ অরুণং ন উট্ঠহতি, তাৰ যং পঠমং পস্সতি ভিক্খুং ৰা ভিক্খুনিং ৰা, তস্সা আরোচেতব্বং। উট্ঠিতে অরুণে ৰত্তং নিক্খিপিত্ৰা উপস্সযং গন্তব্বং, এৰং পঞ্চদস অরুণা গহেতব্বা।
Tato bhikkhusaṅghassa santikaṃ gantvā evaṃ ārocetabbaṃ ‘‘ahaṃ, ayyā, ekaṃ āpattiṃ āpajjiṃ…pe… vedayāmahaṃ, ayyā, ‘vedayatī’ti maṃ saṅgho dhāretū’’ti. Ārocetvā bhikkhunisaṅghasseva santike nisīditabbaṃ, tato paṭṭhāya bhikkhūsu vā, dutiyikaṃ ṭhapetvā bhikkhunīsu vā pakkantāsupi ubhatosaṅghe mānattaṃ ciṇṇameva hoti. Yāva aruṇaṃ na uṭṭhahati, tāva yaṃ paṭhamaṃ passati bhikkhuṃ vā bhikkhuniṃ vā, tassā ārocetabbaṃ. Uṭṭhite aruṇe vattaṃ nikkhipitvā upassayaṃ gantabbaṃ, evaṃ pañcadasa aruṇā gahetabbā.
অনিক্খিত্তৰত্তায পন আগন্তুকেসু অসতি চতুন্নং ভিক্খূনঞ্চ ভিক্খুনীনঞ্চ দেৰসিকং আরোচেত্ৰা, আগন্তুকেসু সতি সব্বেসম্পি আগন্তুকানং আরোচেন্তিযা পঞ্চদস দিৰসানি পারিৰাসিকক্খন্ধকে (চূল়ৰ॰ ৭৫ আদযো) ৰুত্তনযেনেৰ সম্মা ৰত্তিতব্বন্তি অযমেত্থ সঙ্খেপো, ৰিত্থারো পন সমন্তপাসাদিকাযং (চূল়ৰ॰ অট্ঠ॰ ৭৫ আদযো) ৰুত্তো, চিণ্ণমানত্তায ভিক্খুনিযাতি যদা এৰং চিণ্ণমানত্তা ভিক্খুনী হোতি, অথস্সা যত্থ সিযা ৰীসতিগণো ভিক্খুনিসঙ্ঘোতি ৰুত্তনযেনেৰ অব্ভানকম্মং কাতব্বং, সেসং উত্তানমেৰাতি।
Anikkhittavattāya pana āgantukesu asati catunnaṃ bhikkhūnañca bhikkhunīnañca devasikaṃ ārocetvā, āgantukesu sati sabbesampi āgantukānaṃ ārocentiyā pañcadasa divasāni pārivāsikakkhandhake (cūḷava. 75 ādayo) vuttanayeneva sammā vattitabbanti ayamettha saṅkhepo, vitthāro pana samantapāsādikāyaṃ (cūḷava. aṭṭha. 75 ādayo) vutto, ciṇṇamānattāya bhikkhuniyāti yadā evaṃ ciṇṇamānattā bhikkhunī hoti, athassā yattha siyā vīsatigaṇo bhikkhunisaṅghoti vuttanayeneva abbhānakammaṃ kātabbaṃ, sesaṃ uttānamevāti.
কঙ্খাৰিতরণিযা পাতিমোক্খৰণ্ণনায
Kaṅkhāvitaraṇiyā pātimokkhavaṇṇanāya
ভিক্খুনিপাতিমোক্খে
Bhikkhunipātimokkhe
সঙ্ঘাদিসেসৰণ্ণনা নিট্ঠিতা।
Saṅghādisesavaṇṇanā niṭṭhitā.
