| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
ಸಙ್ಘಾದಿಸೇಸಕಣ್ಡೋ
Saṅghādisesakaṇḍo
೧. ಉಸ್ಸಯವಾದಿಕಾಸಿಕ್ಖಾಪದವಣ್ಣನಾ
1. Ussayavādikāsikkhāpadavaṇṇanā
ಸಙ್ಘಾದಿಸೇಸೇಸು ಪಠಮೇ ಉಸ್ಸಯವಾದಿಕಾತಿ ಮಾನುಸ್ಸಯವಸೇನ ಕೋಧುಸ್ಸಯವಸೇನ ಅಡ್ಡಕರಣತ್ಥಾಯ ವಿನಿಚ್ಛಯಮಹಾಮತ್ತಾನಂ ಸನ್ತಿಕೇ ವಿವದಮಾನಾ। ಗಹಪತಿನಾ ವಾತಿಆದೀಹಿ ಠಪೇತ್ವಾ ಪಞ್ಚ ಸಹಧಮ್ಮಿಕೇ ಅವಸೇಸಾ ಗಹಟ್ಠಪಬ್ಬಜಿತಾ ಸಙ್ಗಹಿತಾ। ಅಯಂ ಭಿಕ್ಖುನೀ ಪಠಮಾಪತ್ತಿಕನ್ತಿ ಆದಿಮ್ಹಿ ಪಠಮಂ ಆಪತ್ತಿ ಏತಸ್ಸಾತಿ ಪಠಮಾಪತ್ತಿಕೋ, ವೀತಿಕ್ಕಮಕ್ಖಣೇಯೇವ ಆಪಜ್ಜಿತಬ್ಬೋತಿ ಅತ್ಥೋ, ತಂ ಪಠಮಾಪತ್ತಿಕಂ। ಆಪನ್ನಾತಿ ಅಡ್ಡಪರಿಯೋಸಾನೇ ಆಪನ್ನಾ। ಭಿಕ್ಖುನಿಂ ಸಙ್ಘತೋ ನಿಸ್ಸಾರೇತೀತಿ ನಿಸ್ಸಾರಣೀಯೋ, ತಂ ನಿಸ್ಸಾರಣೀಯಂ। ಸಙ್ಘಾದಿಸೇಸನ್ತಿ ಏವಂನಾಮಕಂ।
Saṅghādisesesu paṭhame ussayavādikāti mānussayavasena kodhussayavasena aḍḍakaraṇatthāya vinicchayamahāmattānaṃ santike vivadamānā. Gahapatinā vātiādīhi ṭhapetvā pañca sahadhammike avasesā gahaṭṭhapabbajitā saṅgahitā. Ayaṃ bhikkhunī paṭhamāpattikanti ādimhi paṭhamaṃ āpatti etassāti paṭhamāpattiko, vītikkamakkhaṇeyeva āpajjitabboti attho, taṃ paṭhamāpattikaṃ. Āpannāti aḍḍapariyosāne āpannā. Bhikkhuniṃ saṅghato nissāretīti nissāraṇīyo, taṃ nissāraṇīyaṃ. Saṅghādisesanti evaṃnāmakaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಉಸ್ಸಯವಾದಿಕವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ‘‘ಅಡ್ಡಂ ಕರಿಸ್ಸಾಮೀ’’ತಿ ಯಂಕಿಞ್ಚಿ ದುತಿಯಿಕಂ ವಾ ಸಕ್ಖಿಂ ವಾ ಸಹಾಯಂ ವಾ ಪರಿಯೇಸನ್ತಿಯಾ ಪರಿಯೇಸನೇ ದುಕ್ಕಟಂ, ಯತ್ಥ ಠಿತಾಯ ‘‘ಅಡ್ಡಂ ಕಾತುಂ ಗಚ್ಛಾಮೀ’’ತಿ ಚಿತ್ತಂ ಉಪ್ಪಜ್ಜತಿ, ತತೋ ಪಟ್ಠಾಯ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಯತ್ಥಕತ್ಥಚಿ ಅನ್ತಮಸೋ ಭಿಕ್ಖುನುಪಸ್ಸಯಂ ಆಗತೇಪಿ ವೋಹಾರಿಕೇ ದಿಸ್ವಾ ಅತ್ತನೋ ಕಥಂ ಆರೋಚೇನ್ತಿಯಾ ದುಕ್ಕಟಂ। ಇತರೇನ ಅತ್ತನೋ ಕಥಾಯ ಆರೋಚಿತಾಯ ಭಿಕ್ಖುನಿಯಾ ಥುಲ್ಲಚ್ಚಯಂ, ಪಠಮಂ ಇತರೇನ ಪಚ್ಛಾ ಭಿಕ್ಖುನಿಯಾ ಆರೋಚನೇಪಿ ಏಸೇವ ನಯೋ। ಸಚೇ ಪನ ಭಿಕ್ಖುನೀ ತಂ ವದತಿ ‘‘ಮಮ ಚ ತವ ಚ ಕಥಂ ತ್ವಂಯೇವ ಆರೋಚೇಹೀ’’ತಿ, ಸೋ ಅತ್ತನೋ ವಾ ಕಥಂ ಪಠಮಂ ಆರೋಚೇತು, ತಸ್ಸಾ ವಾ, ಪಠಮಾರೋಚನೇ ಭಿಕ್ಖುನಿಯಾ ದುಕ್ಕಟಂ, ದುತಿಯೇ ಥುಲ್ಲಚ್ಚಯಂ, ತೇನ ಏವಂ ವುತ್ತಾಯ ಭಿಕ್ಖುನಿಯಾ ಆರೋಚನೇಪಿ ಏಸೇವ ನಯೋ। ಸಚೇ ಪನ ಭಿಕ್ಖುನೀ ಅಞ್ಞೇನ ಕಥಾಪೇತಿ, ತತ್ರಾಪಿ ಏಸೇವ ನಯೋ। ಯಥಾ ವಾ ತಥಾ ವಾ ಹಿ ಆರೋಚಿಯಮಾನೇ ಪಠಮಾರೋಚನೇ ಭಿಕ್ಖುನಿಯಾ ದುಕ್ಕಟಂ, ದುತಿಯೇ ಥುಲ್ಲಚ್ಚಯಂ। ಉಭಿನ್ನಂ ಪನ ಕಥಂ ಸುತ್ವಾ ವೋಹಾರಿಕೇಹಿ ವಿನಿಚ್ಛಯೇ ಕತೇ ಅಡ್ಡಪರಿಯೋಸಾನಂ ನಾಮ ಹೋತಿ, ತಸ್ಮಿಂ ಅಡ್ಡಪರಿಯೋಸಾನೇ ಭಿಕ್ಖುನಿಯಾ ಜಯೇಪಿ ಪರಾಜಯೇಪಿ ಸಙ್ಘಾದಿಸೇಸೋ।
Sāvatthiyaṃ thullanandaṃ ārabbha ussayavādikavatthusmiṃ paññattaṃ, sāṇattikaṃ, ‘‘aḍḍaṃ karissāmī’’ti yaṃkiñci dutiyikaṃ vā sakkhiṃ vā sahāyaṃ vā pariyesantiyā pariyesane dukkaṭaṃ, yattha ṭhitāya ‘‘aḍḍaṃ kātuṃ gacchāmī’’ti cittaṃ uppajjati, tato paṭṭhāya gacchantiyā pade pade dukkaṭaṃ, yatthakatthaci antamaso bhikkhunupassayaṃ āgatepi vohārike disvā attano kathaṃ ārocentiyā dukkaṭaṃ. Itarena attano kathāya ārocitāya bhikkhuniyā thullaccayaṃ, paṭhamaṃ itarena pacchā bhikkhuniyā ārocanepi eseva nayo. Sace pana bhikkhunī taṃ vadati ‘‘mama ca tava ca kathaṃ tvaṃyeva ārocehī’’ti, so attano vā kathaṃ paṭhamaṃ ārocetu, tassā vā, paṭhamārocane bhikkhuniyā dukkaṭaṃ, dutiye thullaccayaṃ, tena evaṃ vuttāya bhikkhuniyā ārocanepi eseva nayo. Sace pana bhikkhunī aññena kathāpeti, tatrāpi eseva nayo. Yathā vā tathā vā hi ārociyamāne paṭhamārocane bhikkhuniyā dukkaṭaṃ, dutiye thullaccayaṃ. Ubhinnaṃ pana kathaṃ sutvā vohārikehi vinicchaye kate aḍḍapariyosānaṃ nāma hoti, tasmiṃ aḍḍapariyosāne bhikkhuniyā jayepi parājayepi saṅghādiseso.
ಯಾ ಪನ ಪಚ್ಚತ್ಥಿಕಮನುಸ್ಸೇಹಿ ದೂತಂ ವಾ ಪಹಿಣಿತ್ವಾ, ಸಯಂ ವಾ ಆಗನ್ತ್ವಾ ‘‘ಏಹಿ, ಅಯ್ಯೇ’’ತಿ ಆಕಡ್ಢಿಯಮಾನಾ ಗಚ್ಛತಿ, ಯಾ ವಾ ಉಪಸ್ಸಯೇ ಅಞ್ಞೇಹಿ ಕತಂ ಅನಾಚಾರಂ ಅನೋದಿಸ್ಸ ಆಚಿಕ್ಖನ್ತೀ ರಕ್ಖಂ ಯಾಚತಿ, ಯಾಯ ಚ ಕಿಞ್ಚಿ ಅವುತ್ತಾ ವೋಹಾರಿಕಾ ಅಞ್ಞತೋ ಸುತ್ವಾ ಸಯಮೇವ ಅಡ್ಡಂ ಪರಿಯೋಸಾಪೇನ್ತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅಞ್ಞೇಹಿ ಅನಾಕಡ್ಢಿತಾಯ ಅಡ್ಡಕರಣಂ, ಅಡ್ಡಪರಿಯೋಸಾನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಕಥಿನಸದಿಸಾನಿ, ಇದಂ ಪನ ಕಿರಿಯಮೇವಾತಿ।
Yā pana paccatthikamanussehi dūtaṃ vā pahiṇitvā, sayaṃ vā āgantvā ‘‘ehi, ayye’’ti ākaḍḍhiyamānā gacchati, yā vā upassaye aññehi kataṃ anācāraṃ anodissa ācikkhantī rakkhaṃ yācati, yāya ca kiñci avuttā vohārikā aññato sutvā sayameva aḍḍaṃ pariyosāpenti, tassā, ummattikādīnañca anāpatti. Aññehi anākaḍḍhitāya aḍḍakaraṇaṃ, aḍḍapariyosānanti imānettha dve aṅgāni. Samuṭṭhānādīni paṭhamakathinasadisāni, idaṃ pana kiriyamevāti.
ಉಸ್ಸಯವಾದಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ।
Ussayavādikāsikkhāpadavaṇṇanā niṭṭhitā.
೨. ಚೋರಿವುಟ್ಠಾಪಿಕಾಸಿಕ್ಖಾಪದವಣ್ಣನಾ
2. Corivuṭṭhāpikāsikkhāpadavaṇṇanā
ದುತಿಯೇ ಯಾಯ ಪಞ್ಚಮಾಸಗ್ಘನಕತೋ ಪಟ್ಠಾಯ ಯಂಕಿಞ್ಚಿ ಪರಸನ್ತಕಂ ಅವಹರಿತಂ, ಅಯಂ ಚೋರೀ ನಾಮ, ತಂ ಚೋರಿಂ। ವಜ್ಝಂ ವಿದಿತನ್ತಿ ತೇನ ಕಮ್ಮೇನ ‘‘ವಧಾರಹಾ ಅಯ’’ನ್ತಿ ಏವಂ ವಿದಿತಂ। ಅನಪಲೋಕೇತ್ವಾತಿ ಅನಾಪುಚ್ಛಾ। ಗಣನ್ತಿ ಮಲ್ಲಗಣಭಟಿಪುತ್ತಗಣಾದಿಕಂ। ಪೂಗನ್ತಿ ಧಮ್ಮಗಣಂ। ಸೇಣಿನ್ತಿ ಗನ್ಧಿಕಸೇಣಿದುಸ್ಸಿಕಸೇಣಿಆದಿಕಂ। ಯತ್ಥ ಯತ್ಥ ಹಿ ರಾಜಾನೋ ಗಣಾದೀನಂ ಗಾಮನಿಗಮೇ ನಿಯ್ಯಾತೇನ್ತಿ ‘‘ತುಮ್ಹೇವ ಏತ್ಥ ಅನುಸಾಸಥಾ’’ತಿ, ತತ್ಥ ತತ್ಥ ತೇಯೇವ ಇಸ್ಸರಾ ಹೋನ್ತಿ, ತಸ್ಮಾ ತೇ ಸನ್ಧಾಯ ಇದಂ ವುತ್ತಂ। ಏತ್ಥ ಚ ರಾಜಾನಂ ವಾ ಗಣಾದಿಕೇ ವಾ ಅಪಲೋಕೇತ್ವಾಪಿ ಭಿಕ್ಖುನಿಸಙ್ಘೋ ಅಪಲೋಕೇತಬ್ಬೋವ। ಅಞ್ಞತ್ರ ಕಪ್ಪಾತಿ ತಿತ್ಥಿಯೇಸು ವಾ ಅಞ್ಞಭಿಕ್ಖುನೀಸು ವಾ ಪಬ್ಬಜಿತಪುಬ್ಬಾ ಕಪ್ಪಾ ನಾಮ, ತಂ ಠಪೇತ್ವಾ ಅಞ್ಞಂ ಉಪಸಮ್ಪಾದೇನ್ತಿಯಾ ಗಣಆಚರಿನೀ ಪತ್ತಚೀವರಪರಿಯೇಸನೇಸು ಸೀಮಾಸಮ್ಮುತಿಯಾ ಞತ್ತಿಯಾ ಚ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಂ, ಕಮ್ಮವಾಚಾಪರಿಯೋಸಾನೇ ಸಙ್ಘಾದಿಸೇಸೋ।
Dutiye yāya pañcamāsagghanakato paṭṭhāya yaṃkiñci parasantakaṃ avaharitaṃ, ayaṃ corī nāma, taṃ coriṃ. Vajjhaṃ viditanti tena kammena ‘‘vadhārahā aya’’nti evaṃ viditaṃ. Anapaloketvāti anāpucchā. Gaṇanti mallagaṇabhaṭiputtagaṇādikaṃ. Pūganti dhammagaṇaṃ. Seṇinti gandhikaseṇidussikaseṇiādikaṃ. Yattha yattha hi rājāno gaṇādīnaṃ gāmanigame niyyātenti ‘‘tumheva ettha anusāsathā’’ti, tattha tattha teyeva issarā honti, tasmā te sandhāya idaṃ vuttaṃ. Ettha ca rājānaṃ vā gaṇādike vā apaloketvāpi bhikkhunisaṅgho apaloketabbova. Aññatra kappāti titthiyesu vā aññabhikkhunīsu vā pabbajitapubbā kappā nāma, taṃ ṭhapetvā aññaṃ upasampādentiyā gaṇaācarinī pattacīvarapariyesanesu sīmāsammutiyā ñattiyā ca dukkaṭaṃ, dvīhi kammavācāhi thullaccayaṃ, kammavācāpariyosāne saṅghādiseso.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಚೋರಿಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ, ಚೋರಿಯಾ ವೇಮತಿಕಾಯ ದುಕ್ಕಟಂ, ತಥಾ ಅಚೋರಿಯಾ ಚೋರಿಸಞ್ಞಾಯ ಚೇವ ವೇಮತಿಕಾಯ ಚ। ಅಚೋರಿಸಞ್ಞಾಯ, ಅಜಾನನ್ತಿಯಾ, ಅಪಲೋಕೇತ್ವಾ ವುಟ್ಠಾಪೇನ್ತಿಯಾ, ಕಪ್ಪಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಚೋರಿತಾ, ಚೋರಿಸಞ್ಞಿತಾ, ಅಞ್ಞತ್ರ ಅನುಞ್ಞಾತಕಾರಣಾ ವುಟ್ಠಾಪನನ್ತಿ, ಇಮಾನೇತ್ಥ ತೀಣಿ ಅಙ್ಗಾನಿ। ಚೋರಿವುಟ್ಠಾಪನಸಮುಟ್ಠಾನಂ, ಕಿರಿಯಾಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ।
Sāvatthiyaṃ thullanandaṃ ārabbha coriṃ vuṭṭhāpanavatthusmiṃ paññattaṃ, coriyā vematikāya dukkaṭaṃ, tathā acoriyā corisaññāya ceva vematikāya ca. Acorisaññāya, ajānantiyā, apaloketvā vuṭṭhāpentiyā, kappaṃ vuṭṭhāpentiyā, ummattikādīnañca anāpatti. Coritā, corisaññitā, aññatra anuññātakāraṇā vuṭṭhāpananti, imānettha tīṇi aṅgāni. Corivuṭṭhāpanasamuṭṭhānaṃ, kiriyākiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ಚೋರಿವುಟ್ಠಾಪಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ।
Corivuṭṭhāpikāsikkhāpadavaṇṇanā niṭṭhitā.
೩. ಏಕಗಾಮನ್ತರಗಮನಸಿಕ್ಖಾಪದವಣ್ಣನಾ
3. Ekagāmantaragamanasikkhāpadavaṇṇanā
ತತಿಯೇ ಗಾಮನ್ತರನ್ತಿಆದೀಸು ಸಕಗಾಮತೋ ತಾವ ನಿಕ್ಖಮನ್ತಿಯಾ ಅನಾಪತ್ತಿ, ನಿಕ್ಖಮಿತ್ವಾ ಪನ ಅಞ್ಞಂ ಗಾಮಂ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಏಕೇನ ಪಾದೇನ ಇತರಸ್ಸ ಗಾಮಸ್ಸ ಪರಿಕ್ಖೇಪೇ ವಾ ಉಪಚಾರೇ ವಾ ಅತಿಕ್ಕನ್ತೇ ಥುಲ್ಲಚ್ಚಯಂ, ದುತಿಯೇನ ಅತಿಕ್ಕನ್ತಮತ್ತೇ ಸಙ್ಘಾದಿಸೇಸೋ, ತತೋ ನಿಕ್ಖಮಿತ್ವಾ ಪುನ ಸಕಗಾಮಂ ಪವಿಸನ್ತಿಯಾಪಿ ಏಸೇವ ನಯೋ। ಸಚೇ ಪನ ಖಣ್ಡಪಾಕಾರೇನ ವಾ ವತಿಚ್ಛಿದ್ದೇನ ವಾ ಭಿಕ್ಖುನಿವಿಹಾರಭೂಮಿಂಯೇವ ಸಕ್ಕಾ ಹೋತಿ ಪವಿಸಿತುಂ, ಏವಂ ಪವಿಸಮಾನಾಯ ಕಪ್ಪಿಯಭೂಮಿಯಾ ಪವಿಟ್ಠಾ ನಾಮ ಹೋತಿ, ತಸ್ಮಾ ವಟ್ಟತಿ। ಬಹಿಗಾಮೇ ಠತ್ವಾ ಯಂಕಿಞ್ಚಿ ಸಕಗಾಮಂ ವಾ ಪರಗಾಮಂ ವಾ ಅಕಪ್ಪಿಯಭೂಮಿಂ ಪದಸಾ ಪವಿಸನ್ತಿಯಾ ಆಪತ್ತೀತಿ ಅಯಮೇತ್ಥ ಸಙ್ಖೇಪೋ।
Tatiye gāmantarantiādīsu sakagāmato tāva nikkhamantiyā anāpatti, nikkhamitvā pana aññaṃ gāmaṃ gacchantiyā pade pade dukkaṭaṃ, ekena pādena itarassa gāmassa parikkhepe vā upacāre vā atikkante thullaccayaṃ, dutiyena atikkantamatte saṅghādiseso, tato nikkhamitvā puna sakagāmaṃ pavisantiyāpi eseva nayo. Sace pana khaṇḍapākārena vā vaticchiddena vā bhikkhunivihārabhūmiṃyeva sakkā hoti pavisituṃ, evaṃ pavisamānāya kappiyabhūmiyā paviṭṭhā nāma hoti, tasmā vaṭṭati. Bahigāme ṭhatvā yaṃkiñci sakagāmaṃ vā paragāmaṃ vā akappiyabhūmiṃ padasā pavisantiyā āpattīti ayamettha saṅkhepo.
ನದಿಪಾರಗಮನೇ ವುತ್ತಲಕ್ಖಣಾಯ ನದಿಯಾ ದುತಿಯಿಕಂ ವಿನಾ ಪರತೀರಂ ಗಚ್ಛನ್ತಿಯಾ ವಾ ಅನ್ತರಾನದಿಯಂ ದುತಿಯಿಕಾಯ ಸದ್ಧಿಂ ಭಣ್ಡಿತ್ವಾ ಪುನ ಓರಿಮತೀರಮೇವ ಪಚ್ಚುತ್ತರನ್ತಿಯಾ ವಾ ಪಠಮಪಾದಂ ಉದ್ಧರಿತ್ವಾ ತೀರೇ ಠಪಿತಕ್ಖಣೇ ಥುಲ್ಲಚ್ಚಯಂ, ದುತಿಯಪಾದುದ್ಧಾರೇ ಸಙ್ಘಾದಿಸೇಸೋ। ಇದ್ಧಿಸೇತುಯಾನನಾವಾಹಿ ಪನ ಪರತೀರಂ ಓತರಿತುಂ, ನಹಾನಾದಿಕಾರಣೇನ ಚ ಓತಿಣ್ಣಾಯ ಓರಿಮತೀರಂ ಪದಸಾಪಿ ಪಚ್ಚುತ್ತರಿತುಂ ವಟ್ಟತಿ।
Nadipāragamane vuttalakkhaṇāya nadiyā dutiyikaṃ vinā paratīraṃ gacchantiyā vā antarānadiyaṃ dutiyikāya saddhiṃ bhaṇḍitvā puna orimatīrameva paccuttarantiyā vā paṭhamapādaṃ uddharitvā tīre ṭhapitakkhaṇe thullaccayaṃ, dutiyapāduddhāre saṅghādiseso. Iddhisetuyānanāvāhi pana paratīraṃ otarituṃ, nahānādikāraṇena ca otiṇṇāya orimatīraṃ padasāpi paccuttarituṃ vaṭṭati.
ರತ್ತಿವಿಪ್ಪವಾಸೇ ‘‘ಪುರೇಅರುಣೇಯೇವ ದುತಿಯಿಕಾಯ ಹತ್ಥಪಾಸಂ ಓಕ್ಕಮಿಸ್ಸಾಮೀ’’ತಿ ಆಭೋಗಂ ವಿನಾ ಏಕಗಬ್ಭೇಪಿ ದುತಿಯಿಕಾಯ ಹತ್ಥಪಾಸಾತಿಕ್ಕಮೇ ಠತ್ವಾ ಅರುಣಂ ಉಟ್ಠಾಪೇನ್ತಿಯಾ ಆಪತ್ತಿ।
Rattivippavāse ‘‘purearuṇeyeva dutiyikāya hatthapāsaṃ okkamissāmī’’ti ābhogaṃ vinā ekagabbhepi dutiyikāya hatthapāsātikkame ṭhatvā aruṇaṃ uṭṭhāpentiyā āpatti.
ಏಕಾ ವಾ ಗಣಮ್ಹಾತಿ ಏತ್ಥ ಪನ ಏಕಾ ಭಿಕ್ಖುನೀಪಿ ಗಣೋಯೇವ। ಓಹೀಯೇಯ್ಯಾತಿ ಅವಹೀಯೇಯ್ಯ, ದಸ್ಸನೂಪಚಾರಂ ವಾ ಸವನೂಪಚಾರಂ ವಾ ವಿಜಹೇಯ್ಯಾತಿ ಅತ್ಥೋ। ತಸ್ಮಾ ಇನ್ದಖೀಲಾತಿಕ್ಕಮತೋ ಪಟ್ಠಾಯ ಬಹಿಗಾಮೇ ರುಕ್ಖಥಮ್ಭಸಾಣಿಪಾಕಾರಾದಿಅನ್ತರಿತಭಾವೇನಾಪಿ ದುತಿಯಿಕಾಯ ದಸ್ಸನೂಪಚಾರೇ ವಿಜಹಿತೇ ಸಚೇಪಿ ಸವನೂಪಚಾರೋ ಅತ್ಥಿ, ಆಪತ್ತಿಯೇವ। ಅಜ್ಝೋಕಾಸೇ ಪನ ದೂರೇಪಿ ದಸ್ಸನೂಪಚಾರೋ ಹೋತಿ, ತತ್ಥ ಮಗ್ಗಮೂಳ್ಹಸದ್ದೇನ ವಿಯ ಧಮ್ಮಸ್ಸವನಾರೋಚನಸದ್ದೇನ ವಿಯ ಚ ‘ಅಯ್ಯೇ’ತಿ ಸದ್ದಾಯನ್ತಿಯಾ ಸದ್ದಸ್ಸವನಾತಿಕ್ಕಮೇ ಆಪತ್ತಿಯೇವ। ಸಚೇ ಪನ ಮಗ್ಗಂ ಗಚ್ಛನ್ತೀ ಓಹೀಯಿತ್ವಾ ‘‘ಇದಾನಿ ಪಾಪುಣಿಸ್ಸಾಮೀ’’ತಿ ಸಉಸ್ಸಾಹಾ ಅನುಬನ್ಧತಿ, ವಟ್ಟತಿ।
Ekā vā gaṇamhāti ettha pana ekā bhikkhunīpi gaṇoyeva. Ohīyeyyāti avahīyeyya, dassanūpacāraṃ vā savanūpacāraṃ vā vijaheyyāti attho. Tasmā indakhīlātikkamato paṭṭhāya bahigāme rukkhathambhasāṇipākārādiantaritabhāvenāpi dutiyikāya dassanūpacāre vijahite sacepi savanūpacāro atthi, āpattiyeva. Ajjhokāse pana dūrepi dassanūpacāro hoti, tattha maggamūḷhasaddena viya dhammassavanārocanasaddena viya ca ‘ayye’ti saddāyantiyā saddassavanātikkame āpattiyeva. Sace pana maggaṃ gacchantī ohīyitvā ‘‘idāni pāpuṇissāmī’’ti saussāhā anubandhati, vaṭṭati.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಗಾಮನ್ತರಗಮನವತ್ಥುಸ್ಮಿಂ ಪಞ್ಞತ್ತಂ, ‘‘ಏಕಾ ವಾ ನದಿಪಾರ’’ನ್ತಿಆದಿಕಾ ಏತ್ಥ ತಿವಿಧಾ ಅನುಪಞ್ಞತ್ತಿ, ಪುರೇ ಅರುಣೇ ಸಕಗಾಮತೋ ನಿಕ್ಖಮಿತ್ವಾ ಅರುಣುಗ್ಗಮನಕಾಲೇ ಗಾಮನ್ತರಪರಿಯಾಪನ್ನಂ ನದಿಪಾರಂ ಓಕ್ಕಮನನ್ತಿಯಾ ಪನ ಚತಸ್ಸೋಪಿ ಆಪತ್ತಿಯೋ ಏಕಕ್ಖಣೇಯೇವ ಹೋನ್ತಿ। ವುತ್ತಮ್ಪಿ ಚೇತಂ –
Sāvatthiyaṃ aññataraṃ bhikkhuniṃ ārabbha gāmantaragamanavatthusmiṃ paññattaṃ, ‘‘ekā vā nadipāra’’ntiādikā ettha tividhā anupaññatti, pure aruṇe sakagāmato nikkhamitvā aruṇuggamanakāle gāmantarapariyāpannaṃ nadipāraṃ okkamanantiyā pana catassopi āpattiyo ekakkhaṇeyeva honti. Vuttampi cetaṃ –
‘‘ಸಿಕ್ಖಾಪದಾ ಬುದ್ಧವರೇನ ವಣ್ಣಿತಾ।
‘‘Sikkhāpadā buddhavarena vaṇṇitā;
ಸಙ್ಘಾದಿಸೇಸಾ ಚತುರೋ ಭವೇಯ್ಯುಂ।
Saṅghādisesā caturo bhaveyyuṃ;
ಆಪಜ್ಜೇಯ್ಯ ಏಕಪಯೋಗೇನ ಸಬ್ಬಾ।
Āpajjeyya ekapayogena sabbā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ’’ತಿ॥ (ಪರಿ॰ ೪೭೯)।
Pañhā mesā kusalehi cintitā’’ti. (pari. 479);
ಏತೇನುಪಾಯೇನ ತಿಣ್ಣಂ, ದ್ವಿನ್ನಞ್ಚ ಏಕತೋಭಾವೋ ವೇದಿತಬ್ಬೋ। ದುತಿಯಿಕಾಯ ಪನ ಪಕ್ಕನ್ತಾಯ ವಾ ವಿಬ್ಭನ್ತಾಯ ವಾ ಕಾಲಙ್ಕತಾಯ ವಾ ಪಕ್ಖಸಙ್ಕನ್ತಾಯ ವಾ ಆಪದಾಸು ವಾ ಗಾಮನ್ತರಗಮನಾದೀನಿ ಕರೋನ್ತಿಯಾ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅನ್ತರಾಯೇನ ಏಕತೋಭಾವೋ, ಗಾಮನ್ತರಗಮನಾದೀಸು ಅಞ್ಞತರತಾಪಜ್ಜನಂ, ಆಪದಾಯ ಅಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಪಣ್ಣತ್ತಿವಜ್ಜಂ, ತಿಚಿತ್ತಂ, ತಿವೇದನನ್ತಿ।
Etenupāyena tiṇṇaṃ, dvinnañca ekatobhāvo veditabbo. Dutiyikāya pana pakkantāya vā vibbhantāya vā kālaṅkatāya vā pakkhasaṅkantāya vā āpadāsu vā gāmantaragamanādīni karontiyā ummattikādīnañca anāpatti. Antarāyena ekatobhāvo, gāmantaragamanādīsu aññataratāpajjanaṃ, āpadāya abhāvoti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana paṇṇattivajjaṃ, ticittaṃ, tivedananti.
ಏಕಗಾಮನ್ತರಗಮನಸಿಕ್ಖಾಪದವಣ್ಣನಾ ನಿಟ್ಠಿತಾ।
Ekagāmantaragamanasikkhāpadavaṇṇanā niṭṭhitā.
೪. ಉಕ್ಖಿತ್ತಕಓಸಾರಣಸಿಕ್ಖಾಪದವಣ್ಣನಾ
4. Ukkhittakaosāraṇasikkhāpadavaṇṇanā
ಚತುತ್ಥೇ ಉಕ್ಖಿತ್ತನ್ತಿ ಆಪತ್ತಿಯಾ ಅದಸ್ಸನಾದೀಸು ಉಕ್ಖಿತ್ತಂ। ಅನಞ್ಞಾಯ ಗಣಸ್ಸ ಛನ್ದನ್ತಿ ತಸ್ಸೇವ ಕಾರಕಸಙ್ಘಸ್ಸ ಛನ್ದಂ ಅಜಾನಿತ್ವಾ। ಓಸಾರೇಯ್ಯಾತಿ ಓಸಾರಣಕಮ್ಮಂ ಕರೇಯ್ಯ। ತಸ್ಸಾ ಏವಂ ಕರೋನ್ತಿಯಾ, ಗಣಪರಿಯೇಸನೇ ಸೀಮಾಸಮ್ಮುತಿಯಾ ಞತ್ತಿಯಾ ಚ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಂ, ಕಮ್ಮವಾಚಾಪರಿಯೋಸಾನೇ ಸಙ್ಘಾದಿಸೇಸೋ।
Catutthe ukkhittanti āpattiyā adassanādīsu ukkhittaṃ. Anaññāya gaṇassachandanti tasseva kārakasaṅghassa chandaṃ ajānitvā. Osāreyyāti osāraṇakammaṃ kareyya. Tassā evaṃ karontiyā, gaṇapariyesane sīmāsammutiyā ñattiyā ca dukkaṭaṃ, dvīhi kammavācāhi thullaccayaṃ, kammavācāpariyosāne saṅghādiseso.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏವಂ ಓಸಾರಣವತ್ಥುಸ್ಮಿಂ ಪಞ್ಞತ್ತಂ, ತಿಕಸಙ್ಘಾದಿಸೇಸಂ, ಅಧಮ್ಮಕಮ್ಮೇ ತಿಕದುಕ್ಕಟಂ, ಕಾರಕಸಙ್ಘಂ ವಾ ಆಪುಚ್ಛಿತ್ವಾ, ಗಣಸ್ಸ ವಾ ಛನ್ದಂ ಜಾನಿತ್ವಾ, ವತ್ತೇ ವಾ ವತ್ತನ್ತಿಂ, ಅಸನ್ತೇ ಕಾರಕಸಙ್ಘೇ ಓಸಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಧಮ್ಮಕಮ್ಮೇನ ಉಕ್ಖಿತ್ತತಾ, ಅಞ್ಞತ್ರ ಅನುಞ್ಞಾತಕಾರಣಾ ಓಸಾರಣನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಸಙ್ಘಭೇದಸಿಕ್ಖಾಪದೇ ವುತ್ತನಯಾನೇವ, ಇದಂ ಪನ ಕಿರಿಯಾಕಿರಿಯನ್ತಿ।
Sāvatthiyaṃ thullanandaṃ ārabbha evaṃ osāraṇavatthusmiṃ paññattaṃ, tikasaṅghādisesaṃ, adhammakamme tikadukkaṭaṃ, kārakasaṅghaṃ vā āpucchitvā, gaṇassa vā chandaṃ jānitvā, vatte vā vattantiṃ, asante kārakasaṅghe osārentiyā, ummattikādīnañca anāpatti. Dhammakammena ukkhittatā, aññatra anuññātakāraṇā osāraṇanti imānettha dve aṅgāni. Samuṭṭhānādīni saṅghabhedasikkhāpade vuttanayāneva, idaṃ pana kiriyākiriyanti.
ಉಕ್ಖಿತ್ತಕಓಸಾರಣಸಿಕ್ಖಾಪದವಣ್ಣನಾ ನಿಟ್ಠಿತಾ।
Ukkhittakaosāraṇasikkhāpadavaṇṇanā niṭṭhitā.
೫. ಭೋಜನಪ್ಪಟಿಗ್ಗಹಣಪಠಮಸಿಕ್ಖಾಪದವಣ್ಣನಾ
5. Bhojanappaṭiggahaṇapaṭhamasikkhāpadavaṇṇanā
ಪಞ್ಚಮೇ ಅವಸ್ಸುತಾತಿ ಛನ್ದರಾಗೇನ ತಿನ್ತಾ। ಅವಸ್ಸುತಸ್ಸಾತಿ ತಾದಿಸಸ್ಸೇವ। ಖಾದೇಯ್ಯ ವಾ ಭುಞ್ಜೇಯ್ಯ ವಾತಿ ಏತ್ಥ ಪಟಿಗ್ಗಹಣೇ ಥುಲ್ಲಚ್ಚಯಂ, ಅಜ್ಝೋಹಾರೇ ಅಜ್ಝೋಹಾರೇ ಸಙ್ಘಾದಿಸೇಸೋ।
Pañcame avassutāti chandarāgena tintā. Avassutassāti tādisasseva. Khādeyya vā bhuñjeyya vāti ettha paṭiggahaṇe thullaccayaṃ, ajjhohāre ajjhohāre saṅghādiseso.
ಸಾವತ್ಥಿಯಂ ಸುನ್ದರೀನನ್ದಂ ಆರಬ್ಭ ಅವಸ್ಸುತಾಯ ಅವಸ್ಸುತಸ್ಸ ಹತ್ಥತೋ ಆಮಿಸಪ್ಪಟಿಗ್ಗಹಣವತ್ಥುಸ್ಮಿಂ ಪಞ್ಞತ್ತಂ, ಏಕತೋಅವಸ್ಸುತೇ ಪಟಿಗ್ಗಹಣೇ ದುಕ್ಕಟಂ, ಅಜ್ಝೋಹಾರೇ ಅಜ್ಝೋಹಾರೇ ಥುಲ್ಲಚ್ಚಯಂ, ಯಕ್ಖಪೇತಪಣ್ಡಕತಿರಚ್ಛಾನಗತಮನುಸ್ಸವಿಗ್ಗಹಾನಂ ಹತ್ಥತೋ ಉಭತೋಅವಸ್ಸುತೇಪಿ ಸತಿ ಏಸೇವ ನಯೋ। ತತ್ಥ ಪನ ಏಕತೋಅವಸ್ಸುತೇ ಸತಿ ದುಕ್ಕಟಂ, ಸಬ್ಬತ್ಥ ಉದಕದನ್ತಪೋನಗ್ಗಹಣೇಪಿ ಪರಿಭೋಗೇಪಿ ದುಕ್ಕಟಮೇವ। ಉಭೋಸು ಅನವಸ್ಸುತೇಸು, ‘‘ಅನವಸ್ಸುತೋ’’ತಿ ವಾ ಞತ್ವಾ ಗಣ್ಹನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉದಕದನ್ತಪೋನತೋ ಅಞ್ಞಂ ಅಜ್ಝೋಹರಣೀಯಂ, ಉಭತೋಅವಸ್ಸುತತಾ, ಸಹತ್ಥಾ ಗಹಣಂ, ಅಜ್ಝೋಹರಣನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನೀತಿ।
Sāvatthiyaṃ sundarīnandaṃ ārabbha avassutāya avassutassa hatthato āmisappaṭiggahaṇavatthusmiṃ paññattaṃ, ekatoavassute paṭiggahaṇe dukkaṭaṃ, ajjhohāre ajjhohāre thullaccayaṃ, yakkhapetapaṇḍakatiracchānagatamanussaviggahānaṃ hatthato ubhatoavassutepi sati eseva nayo. Tattha pana ekatoavassute sati dukkaṭaṃ, sabbattha udakadantaponaggahaṇepi paribhogepi dukkaṭameva. Ubhosu anavassutesu, ‘‘anavassuto’’ti vā ñatvā gaṇhantiyā, ummattikādīnañca anāpatti. Udakadantaponato aññaṃ ajjhoharaṇīyaṃ, ubhatoavassutatā, sahatthā gahaṇaṃ, ajjhoharaṇanti imānettha cattāri aṅgāni. Samuṭṭhānādīni paṭhamapārājikasadisānīti.
ಭೋಜನಪ್ಪಟಿಗ್ಗಹಣಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ।
Bhojanappaṭiggahaṇapaṭhamasikkhāpadavaṇṇanā niṭṭhitā.
೬. ಭೋಜನಪ್ಪಟಿಗ್ಗಹಣದುತಿಯಸಿಕ್ಖಾಪದವಣ್ಣನಾ
6. Bhojanappaṭiggahaṇadutiyasikkhāpadavaṇṇanā
ಛಟ್ಠೇ ಯತೋ ತ್ವನ್ತಿ ಯಸ್ಮಾ ತ್ವಂ। ಇಙ್ಘಾತಿ ಉಯ್ಯೋಜನತ್ಥೇ ನಿಪಾತೋ। ಅಯಮ್ಪೀತಿ ಯಾ ಏವಂ ಉಯ್ಯೋಜೇತಿ, ಸಾ ಏವಂ ಉಯ್ಯೋಜನೇನ ಚ ತೇನ ವಚನೇನ ಇತರಿಸ್ಸಾ ಪಟಿಗ್ಗಹಣೇನ ಚ ದುಕ್ಕಟಾನಿ, ಅಜ್ಝೋಹಾರಗಣನಾಯ ಥುಲ್ಲಚ್ಚಯಾನಿ ಚ ಆಪಜ್ಜಿತ್ವಾ ಭೋಜನಪರಿಯೋಸಾನೇ ಸಙ್ಘಾದಿಸೇಸಂ ಆಪಜ್ಜತಿ।
Chaṭṭhe yato tvanti yasmā tvaṃ. Iṅghāti uyyojanatthe nipāto. Ayampīti yā evaṃ uyyojeti, sā evaṃ uyyojanena ca tena vacanena itarissā paṭiggahaṇena ca dukkaṭāni, ajjhohāragaṇanāya thullaccayāni ca āpajjitvā bhojanapariyosāne saṅghādisesaṃ āpajjati.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಏವಂ ಉಯ್ಯೋಜನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಮೇವ, ಪುರಿಸಸ್ಸ ವಾ ಯಕ್ಖಾದೀನಂ ವಾ ಹತ್ಥತೋ ಉದಕದನ್ತಪೋನಪ್ಪಟಿಗ್ಗಹಣುಯ್ಯೋಜನೇ ಚ ತೇಸಂ ಪರಿಭೋಗೇ ಚ ದುಕ್ಕಟಂ, ಏಸ ನಯೋ ಯಕ್ಖಾದೀನಂ ಹತ್ಥತೋ ಅವಸೇಸಗ್ಗಹಣತ್ಥಂ ಉಯ್ಯೋಜನೇ, ತೇಸಂ ಗಹಣೇ, ಅಜ್ಝೋಹಾರೇ ಚ। ಭೋಜನಪರಿಯೋಸಾನೇ ಪನ ಥುಲ್ಲಚ್ಚಯಂ। ‘‘ಅನವಸ್ಸುತೋ’’ತಿ ಞತ್ವಾ ವಾ, ‘‘ಕುಪಿತಾ ನ ಪಟಿಗ್ಗಣ್ಹತೀ’’ತಿ ವಾ, ‘‘ಕುಲಾನುದ್ದಯತಾಯ ನ ಪಟಿಗ್ಗಣ್ಹತೀ’’ತಿ ವಾ ಉಯ್ಯೋಜೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಮನುಸ್ಸಪುರಿಸತಾ, ಅಞ್ಞತ್ರ ಅನುಞ್ಞಾತಕಾರಣಾ, ‘‘ಖಾದನೀಯಂ ಭೋಜನೀಯಂ ಗಹೇತ್ವಾ ಭುಞ್ಜಾ’’ತಿ ಉಯ್ಯೋಜನಾ, ತೇನ ವಚನೇನ ಗಹೇತ್ವಾ ಇತರಿಸ್ಸಾ ಭೋಜನಪರಿಯೋಸಾನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೀತಿ।
Sāvatthiyaṃ aññataraṃ bhikkhuniṃ ārabbha evaṃ uyyojanavatthusmiṃ paññattaṃ, sāṇattikameva, purisassa vā yakkhādīnaṃ vā hatthato udakadantaponappaṭiggahaṇuyyojane ca tesaṃ paribhoge ca dukkaṭaṃ, esa nayo yakkhādīnaṃ hatthato avasesaggahaṇatthaṃ uyyojane, tesaṃ gahaṇe, ajjhohāre ca. Bhojanapariyosāne pana thullaccayaṃ. ‘‘Anavassuto’’ti ñatvā vā, ‘‘kupitā na paṭiggaṇhatī’’ti vā, ‘‘kulānuddayatāya na paṭiggaṇhatī’’ti vā uyyojentiyā, ummattikādīnañca anāpatti. Manussapurisatā, aññatra anuññātakāraṇā, ‘‘khādanīyaṃ bhojanīyaṃ gahetvā bhuñjā’’ti uyyojanā, tena vacanena gahetvā itarissā bhojanapariyosānanti imānettha tīṇi aṅgāni. Samuṭṭhānādīni adinnādānasadisānīti.
ಭೋಜನಪ್ಪಟಿಗ್ಗಹಣದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ।
Bhojanappaṭiggahaṇadutiyasikkhāpadavaṇṇanā niṭṭhitā.
೭-೮-೯. ಸಞ್ಚರಿತ್ತಾದಿಸಿಕ್ಖಾಪದವಣ್ಣನಾ
7-8-9. Sañcarittādisikkhāpadavaṇṇanā
ಸತ್ತಮಅಟ್ಠಮನವಮಸಿಕ್ಖಾಪದಾನಂ ಸಞ್ಚರಿತ್ತಾದಿತ್ತಯೇ ವುತ್ತನಯೇನೇವ ವಿನಿಚ್ಛಯೋ ವೇದಿತಬ್ಬೋ।
Sattamaaṭṭhamanavamasikkhāpadānaṃ sañcarittādittaye vuttanayeneva vinicchayo veditabbo.
ಸಞ್ಚರಿತ್ತಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Sañcarittādisikkhāpadavaṇṇanā niṭṭhitā.
೧೦. ಸಿಕ್ಖಂಪಚ್ಚಾಚಿಕ್ಖಣಸಿಕ್ಖಾಪದವಣ್ಣನಾ
10. Sikkhaṃpaccācikkhaṇasikkhāpadavaṇṇanā
ದಸಮೇ ಕಿಂನುಮಾವ ಸಮಣಿಯೋತಿ ಕಿಂನು ಇಮಾ ಏವ ಸಮಣಿಯೋ। ತಾಸಾಹನ್ತಿ ತಾಸಂ ಅಹಂ। ಯಾವತತಿಯಕಪದತ್ಥೋ ಭಿಕ್ಖುಪಾತಿಮೋಕ್ಖವಣ್ಣನಾಯಂ (ಕಙ್ಖಾ॰ ಅಟ್ಠ॰ ನಿಗಮನವಣ್ಣನಾ), ಅವಸೇಸವಿನಿಚ್ಛಯೋ ಚ ತತ್ಥೇವ ಸಙ್ಘಭೇದಸಿಕ್ಖಾಪದವಣ್ಣನಾಯಂ ವುತ್ತನಯೇನೇವ ವೇದಿತಬ್ಬೋ, ಇದಂ ಪನ ಸಾವತ್ಥಿಯಂ ಚಣ್ಡಕಾಳಿಭಿಕ್ಖುನಿಂ (ಪಾಚಿ॰ ೭೦೯) ಆರಬ್ಭ ‘‘ಬುದ್ಧಂ ಪಚ್ಚಾಚಿಕ್ಖಾಮೀ’’ತಿಆದಿವಚನವತ್ಥುಸ್ಮಿಂ ಪಞ್ಞತ್ತಂ, ಏವಂ ವಚನಮೇವ ಚೇತ್ಥ ಚತೂಸು ಅಙ್ಗೇಸು ಪಠಮಂ ಅಙ್ಗನ್ತಿ ಅಯಂ ವಿಸೇಸೋ, ಸೇಸಂ ತಾದಿಸಮೇವಾತಿ।
Dasame kiṃnumāva samaṇiyoti kiṃnu imā eva samaṇiyo. Tāsāhanti tāsaṃ ahaṃ. Yāvatatiyakapadattho bhikkhupātimokkhavaṇṇanāyaṃ (kaṅkhā. aṭṭha. nigamanavaṇṇanā), avasesavinicchayo ca tattheva saṅghabhedasikkhāpadavaṇṇanāyaṃ vuttanayeneva veditabbo, idaṃ pana sāvatthiyaṃ caṇḍakāḷibhikkhuniṃ (pāci. 709) ārabbha ‘‘buddhaṃ paccācikkhāmī’’tiādivacanavatthusmiṃ paññattaṃ, evaṃ vacanameva cettha catūsu aṅgesu paṭhamaṃ aṅganti ayaṃ viseso, sesaṃ tādisamevāti.
ಸಿಕ್ಖಂಪಚ್ಚಾಚಿಕ್ಖಣಸಿಕ್ಖಾಪದವಣ್ಣನಾ ನಿಟ್ಠಿತಾ।
Sikkhaṃpaccācikkhaṇasikkhāpadavaṇṇanā niṭṭhitā.
೧೧. ಅಧಿಕರಣಕುಪಿತಸಿಕ್ಖಾಪದವಣ್ಣನಾ
11. Adhikaraṇakupitasikkhāpadavaṇṇanā
ಏಕಾದಸಮೇ ಕಿಸ್ಮಿಞ್ಚಿದೇವ ಅಧಿಕರಣೇತಿ ಚತುನ್ನಂ ಅಞ್ಞತರಸ್ಮಿಂ। ಪಚ್ಚಾಕತಾತಿ ಪರಾಜಿತಾ। ಇದಮ್ಪಿ ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ’’ತಿಆದಿವಚನವತ್ಥುಸ್ಮಿಂ ಪಞ್ಞತ್ತಂ, ಸೇಸಂ ದಸಮೇ ವುತ್ತನಯೇನೇವ ವೇದಿತಬ್ಬನ್ತಿ।
Ekādasame kismiñcideva adhikaraṇeti catunnaṃ aññatarasmiṃ. Paccākatāti parājitā. Idampi sāvatthiyaṃ caṇḍakāḷiṃ ārabbha ‘‘chandagāminiyo ca bhikkhuniyo’’tiādivacanavatthusmiṃ paññattaṃ, sesaṃ dasame vuttanayeneva veditabbanti.
ಅಧಿಕರಣಕುಪಿತಸಿಕ್ಖಾಪದವಣ್ಣನಾ ನಿಟ್ಠಿತಾ।
Adhikaraṇakupitasikkhāpadavaṇṇanā niṭṭhitā.
೧೨. ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ
12. Pāpasamācārapaṭhamasikkhāpadavaṇṇanā
ದ್ವಾದಸಮೇ ಸಂಸಟ್ಠಾತಿ ಪಬ್ಬಜಿತಾನಂ ಅನನುಲೋಮೇನ ಗಿಹೀನಂ ಕೋಟ್ಟನಪಚನಸಾಸನಹರಣಾದಿನಾ ಕಾಯಿಕವಾಚಸಿಕೇನ ಮಿಸ್ಸೀಭೂತಾ। ಪಾಪೋ ಕಾಯಿಕವಾಚಸಿಕೋ ಆಚಾರೋ ಏತಾಸನ್ತಿ ಪಾಪಾಚಾರಾ। ಪಾಪೋ ಕಿತ್ತಿಸದ್ದೋ ಏತಾಸನ್ತಿ ಪಾಪಸದ್ದಾ। ಪಾಪೋ ಆಜೀವಸಙ್ಖಾತೋ ಸಿಲೋಕೋ ಏತಾಸನ್ತಿ ಪಾಪಸಿಲೋಕಾ । ಭಿಕ್ಖುನಿಸಙ್ಘಸ್ಸ ವಿಹೇಸಿಕಾತಿ ಅಞ್ಞಮಞ್ಞಿಸ್ಸಾ ಕಮ್ಮೇ ಕರಿಯಮಾನೇ ಪಟಿಕ್ಕೋಸನೇನ ವಿಹೇಸಿಕಾ। ವಜ್ಜಪ್ಪಟಿಚ್ಛಾದಿಕಾತಿ ಖುದ್ದಾನುಖುದ್ದಕಸ್ಸ ವಜ್ಜಸ್ಸ ಪಟಿಚ್ಛಾದಿಕಾ।
Dvādasame saṃsaṭṭhāti pabbajitānaṃ ananulomena gihīnaṃ koṭṭanapacanasāsanaharaṇādinā kāyikavācasikena missībhūtā. Pāpo kāyikavācasiko ācāro etāsanti pāpācārā. Pāpo kittisaddo etāsanti pāpasaddā. Pāpo ājīvasaṅkhāto siloko etāsanti pāpasilokā. Bhikkhunisaṅghassa vihesikāti aññamaññissā kamme kariyamāne paṭikkosanena vihesikā. Vajjappaṭicchādikāti khuddānukhuddakassa vajjassa paṭicchādikā.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಸಂಸಟ್ಠವಿಹಾರವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥಾಪಿ ದಸಮೇ ವುತ್ತನಯೇನೇವ ವೇದಿತಬ್ಬಂ, ಸಮನುಭಾಸನಕಮ್ಮಕಾಲೇ ಪನ ದ್ವೇತಿಸ್ಸೋ ಏಕತೋ ಸಮನುಭಾಸಿತಬ್ಬಾತಿ।
Sāvatthiyaṃ sambahulā bhikkhuniyo ārabbha saṃsaṭṭhavihāravatthusmiṃ paññattaṃ, sesametthāpi dasame vuttanayeneva veditabbaṃ, samanubhāsanakammakāle pana dvetisso ekato samanubhāsitabbāti.
ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ।
Pāpasamācārapaṭhamasikkhāpadavaṇṇanā niṭṭhitā.
೧೩. ಪಾಪಸಮಾಚಾರದುತಿಯಸಿಕ್ಖಾಪದವಣ್ಣನಾ
13. Pāpasamācāradutiyasikkhāpadavaṇṇanā
ತೇರಸಮೇ ಏವಂ ವದೇಯ್ಯಾತಿ ತಾ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇಯ್ಯ। ಏವಾಚಾರಾತಿ ಏವಂಆಚಾರಾ, ಯಾದಿಸೋ ತುಮ್ಹಾಕಂ ಆಚಾರೋ, ತಾದಿಸೋ ಆಚಾರೋತಿ ಅತ್ಥೋ, ಏಸ ನಯೋ ಸಬ್ಬತ್ಥ। ಉಞ್ಞಾಯಾತಿ ಅವಞ್ಞಾಯ ನೀಚಂ ಕತ್ವಾ ಜಾನನಾಯ। ಪರಿಭವೇನಾತಿ ‘‘ಕಿಂ ಇಮಾ ಕರಿಸ್ಸನ್ತೀ’’ತಿ ಏವಂ ಪರಿಭವಿತ್ವಾ ಜಾನನೇನ। ಅಕ್ಖನ್ತಿಯಾತಿ ಅಸಹನತಾಯ, ಕೋಧೇನಾತಿ ಅತ್ಥೋ। ವೇಭಸ್ಸಿಯಾತಿ ಬಲವನ್ತಸ್ಸ ಭಾವೇನ, ಅತ್ತನೋ ಬಲಪ್ಪಕಾಸನೇನ ಸಮುತ್ರಾಸೇನಾತಿ ಅತ್ಥೋ। ದುಬ್ಬಲ್ಯಾತಿ ತುಮ್ಹಾಕಂ ದುಬ್ಬಲಭಾವೇನ, ಸಬ್ಬತ್ಥ ಉಞ್ಞಾಯ ಚ ಪರಿಭವೇನ ಚಾತಿ ಏವಂ ಸಮುಚ್ಚಯತ್ಥೋ ದಟ್ಠಬ್ಬೋ। ವಿವಿಚ್ಚಥಾತಿ ನಾನಾ ಹೋಥ, ಅನನುಲೋಮಿಕಂ ಕಾಯಿಕವಾಚಸಿಕಸಂಸಗ್ಗಂ ಪಜಹಥಾತಿ ಅತ್ಥೋ।
Terasame evaṃ vadeyyāti tā samanubhaṭṭhā bhikkhuniyo evaṃ vadeyya. Evācārāti evaṃācārā, yādiso tumhākaṃ ācāro, tādiso ācāroti attho, esa nayo sabbattha. Uññāyāti avaññāya nīcaṃ katvā jānanāya. Paribhavenāti ‘‘kiṃ imā karissantī’’ti evaṃ paribhavitvā jānanena. Akkhantiyāti asahanatāya, kodhenāti attho. Vebhassiyāti balavantassa bhāvena, attano balappakāsanena samutrāsenāti attho. Dubbalyāti tumhākaṃ dubbalabhāvena, sabbattha uññāya ca paribhavena cāti evaṃ samuccayattho daṭṭhabbo. Viviccathāti nānā hotha, ananulomikaṃ kāyikavācasikasaṃsaggaṃ pajahathāti attho.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ‘‘ಸಂಸಟ್ಠಾವ, ಅಯ್ಯೇ, ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥಾ’’ತಿ ಉಯ್ಯೋಜನವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥಾಪಿ ದಸಮೇ ವುತ್ತನಯೇನೇವ ವೇದಿತಬ್ಬನ್ತಿ।
Sāvatthiyaṃ thullanandaṃ ārabbha ‘‘saṃsaṭṭhāva, ayye, tumhe viharatha, mā tumhe nānā viharitthā’’ti uyyojanavatthusmiṃ paññattaṃ, sesametthāpi dasame vuttanayeneva veditabbanti.
ಪಾಪಸಮಾಚಾರದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ।
Pāpasamācāradutiyasikkhāpadavaṇṇanā niṭṭhitā.
೧೪. ಸಙ್ಘಭೇದಕಾದಿಸಿಕ್ಖಾಪದವಣ್ಣನಾ
14. Saṅghabhedakādisikkhāpadavaṇṇanā
ಸಙ್ಘಭೇದಾದೀಸು ಚತೂಸು ವುತ್ತನಯೇನೇವ ವಿನಿಚ್ಛಯೋ ವೇದಿತಬ್ಬೋ। ಕೇವಲಞ್ಹಿ ಭಿಕ್ಖುನೀ ಸಙ್ಘಂ ನ ಭಿನ್ದತಿ, ಭೇದಾಯ ಪನ ಪರಕ್ಕಮತಿ ಚೇವ ಅನುವತ್ತತಿ ಚ। ಉದ್ದಿಟ್ಠಾ ಖೋ ಅಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ ಧಮ್ಮಾತಿ ಭಿಕ್ಖೂ ಆರಬ್ಭ ಪಞ್ಞತ್ತಾ ಸಾಧಾರಣಾ ಸತ್ತ, ಅಸಾಧಾರಣಾ ದಸಾತಿ ಏವಂ ಸತ್ತರಸ। ಉಭತೋಸಙ್ಘೇ ಪಕ್ಖಮಾನತ್ತಂ ಚರಿತಬ್ಬನ್ತಿ ಭಿಕ್ಖುನಿಯಾ ಹಿ ಆಪತ್ತಿಂ ಛಾದೇನ್ತಿಯಾಪಿ ಪರಿವಾಸೋ ನಾಮ ನತ್ಥಿ, ಛಾದನಪಚ್ಚಯಾಪಿ ನ ದುಕ್ಕಟಂ ಆಪಜ್ಜತಿ, ತಸ್ಮಾ ಛಾದೇತ್ವಾಪಿ ಅಛಾದೇತ್ವಾಪಿ ಏಕಂ ಪಕ್ಖಮಾನತ್ತಮೇವ ಚರಿತಬ್ಬಂ। ತಂ ಭಿಕ್ಖುನೀಹಿ ಅತ್ತನೋ ಸೀಮಂ ಸೋಧೇತ್ವಾ ವಿಹಾರಸೀಮಾಯ ವಾ, ಸೋಧೇತುಂ ಅಸಕ್ಕೋನ್ತೀಹಿ ಖಣ್ಡಸೀಮಾಯ ವಾ ಸಬ್ಬನ್ತಿಮೇನ ಪರಿಚ್ಛೇದೇನ ಚತುವಗ್ಗಂ ಗಣಂ ಸನ್ನಿಪಾತಾಪೇತ್ವಾ ದಾತಬ್ಬಂ। ಸಚೇ ಏಕಾ ಆಪತ್ತಿ ಹೋತಿ, ಏಕಿಸ್ಸಾ ವಸೇನ, ಸಚೇ ದ್ವೇ ವಾ ತಿಸ್ಸೋ ವಾ ಸಮ್ಬಹುಲಾ ವಾ ಏಕವತ್ಥುಕಾ ವಾ ನಾನಾವತ್ಥುಕಾ ವಾ, ತಾಸಂ ತಾಸಂ ವಸೇನ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತವತ್ಥುಗೋತ್ತನಾಮಆಪತ್ತಿಭೇದೇಸು ಯಂ ಯಂ ಇಚ್ಛತಿ, ತಂ ತಂ ಆದಾಯ ಯೋಜನಾ ಕಾತಬ್ಬಾ।
Saṅghabhedādīsu catūsu vuttanayeneva vinicchayo veditabbo. Kevalañhi bhikkhunī saṅghaṃ na bhindati, bhedāya pana parakkamati ceva anuvattati ca. Uddiṭṭhā kho ayyāyo sattarasa saṅghādisesā dhammāti bhikkhū ārabbha paññattā sādhāraṇā satta, asādhāraṇā dasāti evaṃ sattarasa. Ubhatosaṅghe pakkhamānattaṃ caritabbanti bhikkhuniyā hi āpattiṃ chādentiyāpi parivāso nāma natthi, chādanapaccayāpi na dukkaṭaṃ āpajjati, tasmā chādetvāpi achādetvāpi ekaṃ pakkhamānattameva caritabbaṃ. Taṃ bhikkhunīhi attano sīmaṃ sodhetvā vihārasīmāya vā, sodhetuṃ asakkontīhi khaṇḍasīmāya vā sabbantimena paricchedena catuvaggaṃ gaṇaṃ sannipātāpetvā dātabbaṃ. Sace ekā āpatti hoti, ekissā vasena, sace dve vā tisso vā sambahulā vā ekavatthukā vā nānāvatthukā vā, tāsaṃ tāsaṃ vasena bhikkhupātimokkhavaṇṇanāyaṃ vuttavatthugottanāmaāpattibhedesu yaṃ yaṃ icchati, taṃ taṃ ādāya yojanā kātabbā.
ತತ್ರಿದಂ ಪಠಮಾಪತ್ತಿವಸೇನ ಮುಖಮತ್ತನಿದಸ್ಸನಂ – ತಾಯ ಆಪನ್ನಾಯ ಭಿಕ್ಖುನಿಯಾ ಭಿಕ್ಖುನಿಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖುನೀನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸವಚನೀಯೋ ‘‘ಅಹಂ, ಅಯ್ಯೇ, ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾಹಂ, ಅಯ್ಯೇ, ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚಾಮೀ’’ತಿ, ಏವಂ ತಿಕ್ಖತ್ತುಂ ಯಾಚಾಪೇತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
Tatridaṃ paṭhamāpattivasena mukhamattanidassanaṃ – tāya āpannāya bhikkhuniyā bhikkhunisaṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassavacanīyo ‘‘ahaṃ, ayye, ekaṃ āpattiṃ āpajjiṃ ussayavādaṃ, sāhaṃ, ayye, saṅghaṃ ekissā āpattiyā ussayavādāya pakkhamānattaṃ yācāmī’’ti, evaṃ tikkhattuṃ yācāpetvā byattāya bhikkhuniyā paṭibalāya saṅgho ñāpetabbo –
‘‘ಸುಣಾತು ಮೇ, ಅಯ್ಯೇ, ಸಙ್ಘೋ, ಅಯಂ ಇತ್ಥನ್ನಾಮಾ ಭಿಕ್ಖುನೀ ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾ ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚತಿ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಾಯ ಭಿಕ್ಖುನಿಯಾ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ದದೇಯ್ಯ, ಏಸಾ ಞತ್ತಿ।
‘‘Suṇātu me, ayye, saṅgho, ayaṃ itthannāmā bhikkhunī ekaṃ āpattiṃ āpajjiṃ ussayavādaṃ, sā saṅghaṃ ekissā āpattiyā ussayavādāya pakkhamānattaṃ yācati, yadi saṅghassa pattakallaṃ, saṅgho itthannāmāya bhikkhuniyā ekissā āpattiyā ussayavādāya pakkhamānattaṃ dadeyya, esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ, ಅಯಂ ಇತ್ಥನ್ನಾಮಾ ಭಿಕ್ಖುನೀ…ಪೇ॰… ದುತಿಯಮ್ಪಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ, ಸುಣಾತು ಮೇ, ಅಯ್ಯೇ, ಸಙ್ಘೋ…ಪೇ॰… ಸಾ ಭಾಸೇಯ್ಯ। ದಿನ್ನಂ ಸಙ್ಘೇನ ಇತ್ಥನ್ನಾಮಾಯ ಭಿಕ್ಖುನಿಯಾ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।
‘‘Suṇātu me, ayye, saṅgho, ayaṃ itthannāmā bhikkhunī…pe… dutiyampi…pe… tatiyampi etamatthaṃ vadāmi, suṇātu me, ayye, saṅgho…pe… sā bhāseyya. Dinnaṃ saṅghena itthannāmāya bhikkhuniyā ekissā āpattiyā ussayavādāya pakkhamānattaṃ. Khamati saṅghassa, tasmā tuṇhī, evametaṃ dhārayāmī’’ti.
ಕಮ್ಮವಾಚಾಪರಿಯೋಸಾನೇ ‘‘ವತ್ತಂ ಸಮಾದಿಯಾಮಿ, ಮಾನತ್ತಂ ಸಮಾದಿಯಾಮೀ’’ತಿ ಸಮಾದಿಯಿತ್ವಾ ಸಙ್ಘಸ್ಸ ಆರೋಚೇತ್ವಾ ನಿಕ್ಖಿತ್ತವತ್ತೇನ ತಾವ ವಸಿತುಕಾಮಾಯ ತತ್ಥೇವ ಸಙ್ಘಮಜ್ಝೇ ವಾ ಪಕ್ಕನ್ತಾಸು ಭಿಕ್ಖುನೀಸು ಏಕಭಿಕ್ಖುನಿಯಾ ವಾ ದುತಿಯಿಕಾಯ ವಾ ಸನ್ತಿಕೇ ‘‘ವತ್ತಂ ನಿಕ್ಖಿಪಾಮಿ, ಮಾನತ್ತಂ ನಿಕ್ಖಿಪಾಮೀ’’ತಿ ನಿಕ್ಖಿಪಿತಬ್ಬಂ। ಅಞ್ಞಿಸ್ಸಾ ಪನ ಆಗನ್ತುಕಾಯ ಸನ್ತಿಕೇ ಆರೋಚೇತ್ವಾ ನಿಕ್ಖಿಪಿತಬ್ಬಂ, ನಿಕ್ಖಿತ್ತಕಾಲತೋ ಪಟ್ಠಾಯ ಪಕತತ್ತಟ್ಠಾನೇ ತಿಟ್ಠತಿ, ತತೋ ಪುರೇಅರುಣೇಯೇವ ಚತೂಹಿ ಭಿಕ್ಖುನೀಹಿ ತಂ ಭಿಕ್ಖುನಿಂ ಗಹೇತ್ವಾ ಗಾಮೂಪಚಾರತೋ ಚ ಭಿಕ್ಖೂನಂ ವಿಹಾರೂಪಚಾರತೋ ಚ ದ್ವೇ ಲೇಡ್ಡುಪಾತೇ ಅತಿಕ್ಕಮಿತ್ವಾ ಮಹಾಮಗ್ಗಾ ಓಕ್ಕಮ್ಮ ಗುಮ್ಬವತಿಆದೀಹಿ ಪಟಿಚ್ಛನ್ನೇ ಓಕಾಸೇ ನಿಸೀದಿತಬ್ಬಂ। ಚತೂಹಿ ಭಿಕ್ಖೂಹಿಪಿ ತತ್ಥ ಗನ್ತಬ್ಬಂ, ಗನ್ತ್ವಾ ಭಿಕ್ಖುನೀನಂ ಅವಿದೂರೇ ವಿಸುಂ ನಿಸೀದಿತಬ್ಬಂ। ಅಥ ತಾಯ ಭಿಕ್ಖುನಿಯಾ ವುತ್ತನಯೇನೇವ ವತ್ತಂ ಸಮಾದಿಯಿತ್ವಾ ಭಿಕ್ಖುನಿಸಙ್ಘಸ್ಸ ತಾವ ಏವಂ ಆರೋಚೇತಬ್ಬಂ –
Kammavācāpariyosāne ‘‘vattaṃ samādiyāmi, mānattaṃ samādiyāmī’’ti samādiyitvā saṅghassa ārocetvā nikkhittavattena tāva vasitukāmāya tattheva saṅghamajjhe vā pakkantāsu bhikkhunīsu ekabhikkhuniyā vā dutiyikāya vā santike ‘‘vattaṃ nikkhipāmi, mānattaṃ nikkhipāmī’’ti nikkhipitabbaṃ. Aññissā pana āgantukāya santike ārocetvā nikkhipitabbaṃ, nikkhittakālato paṭṭhāya pakatattaṭṭhāne tiṭṭhati, tato purearuṇeyeva catūhi bhikkhunīhi taṃ bhikkhuniṃ gahetvā gāmūpacārato ca bhikkhūnaṃ vihārūpacārato ca dve leḍḍupāte atikkamitvā mahāmaggā okkamma gumbavatiādīhi paṭicchanne okāse nisīditabbaṃ. Catūhi bhikkhūhipi tattha gantabbaṃ, gantvā bhikkhunīnaṃ avidūre visuṃ nisīditabbaṃ. Atha tāya bhikkhuniyā vuttanayeneva vattaṃ samādiyitvā bhikkhunisaṅghassa tāva evaṃ ārocetabbaṃ –
‘‘ಅಹಂ, ಅಯ್ಯೇ, ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾಹಂ ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚಿಂ, ತಸ್ಸಾ ಮೇ ಸಙ್ಘೋ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಅದಾಸಿ, ಸಾಹಂ ಮಾನತ್ತಂ ಚರಾಮಿ, ವೇದಯಾಮಹಂ, ಅಯ್ಯೇ, ‘ವೇದಯತೀ’ತಿ ಮಂ ಸಙ್ಘೋ ಧಾರೇತೂ’’ತಿ।
‘‘Ahaṃ, ayye, ekaṃ āpattiṃ āpajjiṃ ussayavādaṃ, sāhaṃ saṅghaṃ ekissā āpattiyā ussayavādāya pakkhamānattaṃ yāciṃ, tassā me saṅgho ekissā āpattiyā ussayavādāya pakkhamānattaṃ adāsi, sāhaṃ mānattaṃ carāmi, vedayāmahaṃ, ayye, ‘vedayatī’ti maṃ saṅgho dhāretū’’ti.
ತತೋ ಭಿಕ್ಖುಸಙ್ಘಸ್ಸ ಸನ್ತಿಕಂ ಗನ್ತ್ವಾ ಏವಂ ಆರೋಚೇತಬ್ಬಂ ‘‘ಅಹಂ, ಅಯ್ಯಾ, ಏಕಂ ಆಪತ್ತಿಂ ಆಪಜ್ಜಿಂ…ಪೇ॰… ವೇದಯಾಮಹಂ, ಅಯ್ಯಾ, ‘ವೇದಯತೀ’ತಿ ಮಂ ಸಙ್ಘೋ ಧಾರೇತೂ’’ತಿ। ಆರೋಚೇತ್ವಾ ಭಿಕ್ಖುನಿಸಙ್ಘಸ್ಸೇವ ಸನ್ತಿಕೇ ನಿಸೀದಿತಬ್ಬಂ, ತತೋ ಪಟ್ಠಾಯ ಭಿಕ್ಖೂಸು ವಾ, ದುತಿಯಿಕಂ ಠಪೇತ್ವಾ ಭಿಕ್ಖುನೀಸು ವಾ ಪಕ್ಕನ್ತಾಸುಪಿ ಉಭತೋಸಙ್ಘೇ ಮಾನತ್ತಂ ಚಿಣ್ಣಮೇವ ಹೋತಿ। ಯಾವ ಅರುಣಂ ನ ಉಟ್ಠಹತಿ, ತಾವ ಯಂ ಪಠಮಂ ಪಸ್ಸತಿ ಭಿಕ್ಖುಂ ವಾ ಭಿಕ್ಖುನಿಂ ವಾ, ತಸ್ಸಾ ಆರೋಚೇತಬ್ಬಂ। ಉಟ್ಠಿತೇ ಅರುಣೇ ವತ್ತಂ ನಿಕ್ಖಿಪಿತ್ವಾ ಉಪಸ್ಸಯಂ ಗನ್ತಬ್ಬಂ, ಏವಂ ಪಞ್ಚದಸ ಅರುಣಾ ಗಹೇತಬ್ಬಾ।
Tato bhikkhusaṅghassa santikaṃ gantvā evaṃ ārocetabbaṃ ‘‘ahaṃ, ayyā, ekaṃ āpattiṃ āpajjiṃ…pe… vedayāmahaṃ, ayyā, ‘vedayatī’ti maṃ saṅgho dhāretū’’ti. Ārocetvā bhikkhunisaṅghasseva santike nisīditabbaṃ, tato paṭṭhāya bhikkhūsu vā, dutiyikaṃ ṭhapetvā bhikkhunīsu vā pakkantāsupi ubhatosaṅghe mānattaṃ ciṇṇameva hoti. Yāva aruṇaṃ na uṭṭhahati, tāva yaṃ paṭhamaṃ passati bhikkhuṃ vā bhikkhuniṃ vā, tassā ārocetabbaṃ. Uṭṭhite aruṇe vattaṃ nikkhipitvā upassayaṃ gantabbaṃ, evaṃ pañcadasa aruṇā gahetabbā.
ಅನಿಕ್ಖಿತ್ತವತ್ತಾಯ ಪನ ಆಗನ್ತುಕೇಸು ಅಸತಿ ಚತುನ್ನಂ ಭಿಕ್ಖೂನಞ್ಚ ಭಿಕ್ಖುನೀನಞ್ಚ ದೇವಸಿಕಂ ಆರೋಚೇತ್ವಾ, ಆಗನ್ತುಕೇಸು ಸತಿ ಸಬ್ಬೇಸಮ್ಪಿ ಆಗನ್ತುಕಾನಂ ಆರೋಚೇನ್ತಿಯಾ ಪಞ್ಚದಸ ದಿವಸಾನಿ ಪಾರಿವಾಸಿಕಕ್ಖನ್ಧಕೇ (ಚೂಳವ॰ ೭೫ ಆದಯೋ) ವುತ್ತನಯೇನೇವ ಸಮ್ಮಾ ವತ್ತಿತಬ್ಬನ್ತಿ ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಸಮನ್ತಪಾಸಾದಿಕಾಯಂ (ಚೂಳವ॰ ಅಟ್ಠ॰ ೭೫ ಆದಯೋ) ವುತ್ತೋ, ಚಿಣ್ಣಮಾನತ್ತಾಯ ಭಿಕ್ಖುನಿಯಾತಿ ಯದಾ ಏವಂ ಚಿಣ್ಣಮಾನತ್ತಾ ಭಿಕ್ಖುನೀ ಹೋತಿ, ಅಥಸ್ಸಾ ಯತ್ಥ ಸಿಯಾ ವೀಸತಿಗಣೋ ಭಿಕ್ಖುನಿಸಙ್ಘೋತಿ ವುತ್ತನಯೇನೇವ ಅಬ್ಭಾನಕಮ್ಮಂ ಕಾತಬ್ಬಂ, ಸೇಸಂ ಉತ್ತಾನಮೇವಾತಿ।
Anikkhittavattāya pana āgantukesu asati catunnaṃ bhikkhūnañca bhikkhunīnañca devasikaṃ ārocetvā, āgantukesu sati sabbesampi āgantukānaṃ ārocentiyā pañcadasa divasāni pārivāsikakkhandhake (cūḷava. 75 ādayo) vuttanayeneva sammā vattitabbanti ayamettha saṅkhepo, vitthāro pana samantapāsādikāyaṃ (cūḷava. aṭṭha. 75 ādayo) vutto, ciṇṇamānattāya bhikkhuniyāti yadā evaṃ ciṇṇamānattā bhikkhunī hoti, athassā yattha siyā vīsatigaṇo bhikkhunisaṅghoti vuttanayeneva abbhānakammaṃ kātabbaṃ, sesaṃ uttānamevāti.
ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ
Kaṅkhāvitaraṇiyā pātimokkhavaṇṇanāya
ಭಿಕ್ಖುನಿಪಾತಿಮೋಕ್ಖೇ
Bhikkhunipātimokkhe
ಸಙ್ಘಾದಿಸೇಸವಣ್ಣನಾ ನಿಟ್ಠಿತಾ।
Saṅghādisesavaṇṇanā niṭṭhitā.
