| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
সঙ্ঘাদিসেসকথাৰণ্ণনা
Saṅghādisesakathāvaṇṇanā
২০১১. এৰং ভিক্খুনিৰিভঙ্গে আগতং পারাজিকৰিনিচ্ছযং ৰত্ৰা ইদানি তদনন্তরুদ্দিট্ঠং সঙ্ঘাদিসেসৰিনিচ্ছযং দস্সেতুমাহ ‘‘যা পন ভিক্খুনী’’তিআদি। উস্সযৰাদাতি কোধুস্সযমানুস্সযৰসেন ৰিৰদমানা। ততোযেৰ অট্টং করোতি সীলেনাতি অট্টকারী। এত্থ চ ‘‘অট্টো’’তি ৰোহারিকৰিনিচ্ছযো ৰুচ্চতি, যং পব্বজিতা ‘‘অধিকরণ’’ন্তিপি ৰদন্তি। সব্বত্থ ৰত্তব্বে মুখমস্সা অত্থীতি মুখরী, বহুভাণীতি অত্থো। যেন কেনচি নরেন সদ্ধিন্তি ‘‘গহপতিনা ৰা গহপতিপুত্তেন ৰা’’তিআদিনা (পাচি॰ ৬৭৯) দস্সিতেন যেন কেনচি মনুস্সেন সদ্ধিং। ইধাতি ইমস্মিং সাসনে। কিরাতি পদপূরণে, অনুস্সৰনে ৰা।
2011. Evaṃ bhikkhunivibhaṅge āgataṃ pārājikavinicchayaṃ vatvā idāni tadanantaruddiṭṭhaṃ saṅghādisesavinicchayaṃ dassetumāha ‘‘yā pana bhikkhunī’’tiādi. Ussayavādāti kodhussayamānussayavasena vivadamānā. Tatoyeva aṭṭaṃ karoti sīlenāti aṭṭakārī. Ettha ca ‘‘aṭṭo’’ti vohārikavinicchayo vuccati, yaṃ pabbajitā ‘‘adhikaraṇa’’ntipi vadanti. Sabbattha vattabbe mukhamassā atthīti mukharī, bahubhāṇīti attho. Yena kenaci narena saddhinti ‘‘gahapatinā vā gahapatiputtena vā’’tiādinā (pāci. 679) dassitena yena kenaci manussena saddhiṃ. Idhāti imasmiṃ sāsane. Kirāti padapūraṇe, anussavane vā.
২০১২. সক্খিং ৰাতি পচ্চক্খতো জাননকং ৰা। অট্টং কাতুং গচ্ছন্তিযা পদে পদে তথা দুক্কটন্তি যোজনা।
2012.Sakkhiṃvāti paccakkhato jānanakaṃ vā. Aṭṭaṃ kātuṃ gacchantiyā pade pade tathā dukkaṭanti yojanā.
২০১৩. ৰোহারিকেতি ৰিনিচ্ছযামচ্চে।
2013.Vohāriketi vinicchayāmacce.
২০১৪. অনন্তরন্তি তস্স ৰচনানন্তরং।
2014.Anantaranti tassa vacanānantaraṃ.
২০১৫. ইতরোতি অট্টকারকো। পুব্বসদিসোৰ ৰিনিচ্ছযোতি পঠমারোচনে দুক্কটং, দুতিযারোচনে থুল্লচ্চযন্তি ৰুত্তং হোতি।
2015.Itaroti aṭṭakārako. Pubbasadisova vinicchayoti paṭhamārocane dukkaṭaṃ, dutiyārocane thullaccayanti vuttaṃ hoti.
২০১৬. ‘‘তৰ, মমাপি চ কথং তুৰমেৰ আরোচেহী’’তি ইতরেন ৰুত্তা ভিক্খুনীতি যোজনা। যথাকামন্তি তস্সা চ অত্তনো চ ৰচনে যং পঠমং ৰত্তুমিচ্ছতি, তং ইচ্ছানুরূপং আরোচেতু।
2016. ‘‘Tava, mamāpi ca kathaṃ tuvameva ārocehī’’ti itarena vuttā bhikkhunīti yojanā. Yathākāmanti tassā ca attano ca vacane yaṃ paṭhamaṃ vattumicchati, taṃ icchānurūpaṃ ārocetu.
২০১৮-৯. উভিন্নম্পি যথা তথা আরোচিতকথং সুত্ৰাতি যোজনা। যথা তথাতি পুব্বে ৰুত্তনযেন কেনচি পকারেন। তেহীতি ৰোহারিকেহি। অট্টে পন চ নিট্ঠিতেতি অট্টকারকেসু একস্মিং পক্খে পরাজিতে। যথাহ ‘‘পরাজিতে অট্টকারকে অট্টপরিযোসানং নাম হোতী’’তি। অট্টস্স পরিযোসানেতি এত্থ ‘‘তস্সা’’তি সেসো। তস্স অট্টস্স পরিযোসানেতি যোজনা।
2018-9. Ubhinnampi yathā tathā ārocitakathaṃ sutvāti yojanā. Yathā tathāti pubbe vuttanayena kenaci pakārena. Tehīti vohārikehi. Aṭṭe pana ca niṭṭhiteti aṭṭakārakesu ekasmiṃ pakkhe parājite. Yathāha ‘‘parājite aṭṭakārake aṭṭapariyosānaṃ nāma hotī’’ti. Aṭṭassa pariyosāneti ettha ‘‘tassā’’ti seso. Tassa aṭṭassa pariyosāneti yojanā.
২০২০-২৩. অনাপত্তিৰিসযং দস্সেতুমাহ ‘‘দূতং ৰাপী’’তিআদি। পচ্চত্থিকমনুস্সেহি দূতং ৰাপি পহিণিত্ৰা সযম্পি ৰা আগন্ত্ৰা যা পন আকড্ঢীযতীতি যোজনা। অঞ্ঞেহীতি গামদারকাদীহি অঞ্ঞেহি। কিঞ্চি পরং অনোদিস্সাতি যোজনা। ইমিস্সা ওদিস্স ৰুত্তে তেহি গহিতদণ্ডে তস্সা চ গীৰাতি সূচিতং হোতি। যা রক্খং যাচতি , তত্থ তস্মিং রক্খাযাচনে তস্সা অনাপত্তি পকাসিতাতি যোজনা। অঞ্ঞতো সুত্ৰাতি যোজনা। উম্মত্তিকাদীনন্তি এত্থ আদি-সদ্দেন আদিকম্মিকা গহিতা।
2020-23. Anāpattivisayaṃ dassetumāha ‘‘dūtaṃ vāpī’’tiādi. Paccatthikamanussehi dūtaṃ vāpi pahiṇitvā sayampi vā āgantvā yā pana ākaḍḍhīyatīti yojanā. Aññehīti gāmadārakādīhi aññehi. Kiñci paraṃ anodissāti yojanā. Imissā odissa vutte tehi gahitadaṇḍe tassā ca gīvāti sūcitaṃ hoti. Yā rakkhaṃ yācati , tattha tasmiṃ rakkhāyācane tassā anāpatti pakāsitāti yojanā. Aññato sutvāti yojanā. Ummattikādīnanti ettha ādi-saddena ādikammikā gahitā.
সমুট্ঠানং কথিনেন তুল্যন্তি যোজনা। সেসং দস্সেতুমাহ ‘‘সকিরিযং ইদ’’ন্তি। ইদং সিক্খাপদং। কিরিযায সহ ৰত্ততীতি সকিরিযং অট্টকরণেন আপজ্জনতো। ‘‘সমুট্ঠান’’ন্তি ইমিনা চ সমুট্ঠানাদিৰিনিচ্ছযো উপলক্খিতোতি দট্ঠব্বো।
Samuṭṭhānaṃ kathinena tulyanti yojanā. Sesaṃ dassetumāha ‘‘sakiriyaṃ ida’’nti. Idaṃ sikkhāpadaṃ. Kiriyāya saha vattatīti sakiriyaṃ aṭṭakaraṇena āpajjanato. ‘‘Samuṭṭhāna’’nti iminā ca samuṭṭhānādivinicchayo upalakkhitoti daṭṭhabbo.
অট্টকারিকাকথাৰণ্ণনা।
Aṭṭakārikākathāvaṇṇanā.
২০২৪-৫. জানন্তীতি ‘‘সামং ৰা জানাতি, অঞ্ঞে ৰা তস্সা আরোচেন্তী’’তি (পাচি॰ ৬৮৪) ৰুত্তনযেন জানন্তী। চোরিন্তি যায পঞ্চমাসগ্ঘনকতো পট্ঠায যং কিঞ্চি পরসন্তকং অৰহরিতং, অযং চোরী নাম। ৰজ্ঝং ৰিদিতন্তি ‘‘তেন কম্মেন ৰধারহা অয’’ন্তি এৰং ৰিদিতং। সঙ্ঘন্তি ভিক্খুনিসঙ্ঘং। অনপলোকেত্ৰাতি অনাপুচ্ছা। রাজানং ৰাতি রঞ্ঞা অনুসাসিতব্বট্ঠানে তং রাজানং ৰা। যথাহ ‘‘রাজা নাম যত্থ রাজা অনুসাসতি, রাজা অপলোকেতব্বো’’তি। গণমেৰ ৰাতি ‘‘তুম্হেৰ তত্থ অনুসাসথা’’তি রাজূহি দিন্নং গামনিগমমল্লগণাদিকং গণং ৰা। মল্লগণং নাম পানীযট্ঠপনপোক্খরণিখণনাদিপুঞ্ঞকম্মনিযুত্তো জনসমূহো। এতেনেৰ এৰমেৰ দিন্নগামৰরা পূগা চ সেনিযো চ সঙ্গহিতা। ৰুট্ঠাপেয্যাতি উপসম্পাদেয্য। কপ্পন্তি চ ৰক্খমানলক্খণং কপ্পং। সা চোরিৰুট্ঠাপনন্তি সম্বন্ধো। উপজ্ঝাযা হুত্ৰা যা চোরিং উপসম্পাদেতি, সা ভিক্খুনীতি অত্থো। উপজ্ঝাযস্স ভিক্খুস্স দুক্কটং।
2024-5.Jānantīti ‘‘sāmaṃ vā jānāti, aññe vā tassā ārocentī’’ti (pāci. 684) vuttanayena jānantī. Corinti yāya pañcamāsagghanakato paṭṭhāya yaṃ kiñci parasantakaṃ avaharitaṃ, ayaṃ corī nāma. Vajjhaṃ viditanti ‘‘tena kammena vadhārahā aya’’nti evaṃ viditaṃ. Saṅghanti bhikkhunisaṅghaṃ. Anapaloketvāti anāpucchā. Rājānaṃ vāti raññā anusāsitabbaṭṭhāne taṃ rājānaṃ vā. Yathāha ‘‘rājā nāma yattha rājā anusāsati, rājā apaloketabbo’’ti. Gaṇameva vāti ‘‘tumheva tattha anusāsathā’’ti rājūhi dinnaṃ gāmanigamamallagaṇādikaṃ gaṇaṃ vā. Mallagaṇaṃ nāma pānīyaṭṭhapanapokkharaṇikhaṇanādipuññakammaniyutto janasamūho. Eteneva evameva dinnagāmavarā pūgā ca seniyo ca saṅgahitā. Vuṭṭhāpeyyāti upasampādeyya. Kappanti ca vakkhamānalakkhaṇaṃ kappaṃ. Sā corivuṭṭhāpananti sambandho. Upajjhāyā hutvā yā coriṃ upasampādeti, sā bhikkhunīti attho. Upajjhāyassa bhikkhussa dukkaṭaṃ.
২০২৬. পঞ্চমাসগ্ঘনন্তি এত্থ পঞ্চমাসঞ্চ পঞ্চমাসগ্ঘনকঞ্চ পঞ্চমাসগ্ঘনন্তি একদেসসরূপেকসেসনযেন পঞ্চমাসস্সাপি গহণং। অতিরেকগ্ঘনং ৰাপীতি এত্থাপি এসেৰ নযো।
2026.Pañcamāsagghananti ettha pañcamāsañca pañcamāsagghanakañca pañcamāsagghananti ekadesasarūpekasesanayena pañcamāsassāpi gahaṇaṃ. Atirekagghanaṃ vāpīti etthāpi eseva nayo.
২০২৭. পব্বজিতং পুব্বং যায সা পব্বজিতপুব্বা। ৰুত্তপ্পকারং চোরকম্মং কত্ৰাপি তিত্থাযতনাদীসু যা পঠমং পব্বজিতাতি অত্থো।
2027. Pabbajitaṃ pubbaṃ yāya sā pabbajitapubbā. Vuttappakāraṃ corakammaṃ katvāpi titthāyatanādīsu yā paṭhamaṃ pabbajitāti attho.
২০২৮-৩০. ইদানি পুব্বপযোগদুক্কটাদিআপত্তিৰিভাগং দস্সেতুমাহ ‘‘ৰুট্ঠাপেতি চ যা চোরি’’ন্তিআদি। ইধ ‘‘উপজ্ঝাযা হুত্ৰা’’তি সেসো। ইদং কপ্পং ঠপেত্ৰাতি যোজনা। সীমং সম্মন্নতি চাতি অভিনৰং সীমং সম্মন্নতি, বন্ধতীতি ৰুত্তং হোতি। অস্সাতি ভৰেয্য। ‘‘দুক্কট’’ন্তি ইমিনা চ ‘‘থুল্লচ্চযং দ্ৰয’’ন্তি ইমিনা চ যোজেতব্বং।
2028-30. Idāni pubbapayogadukkaṭādiāpattivibhāgaṃ dassetumāha ‘‘vuṭṭhāpeti ca yā cori’’ntiādi. Idha ‘‘upajjhāyā hutvā’’ti seso. Idaṃ kappaṃ ṭhapetvāti yojanā. Sīmaṃ sammannati cāti abhinavaṃ sīmaṃ sammannati, bandhatīti vuttaṃ hoti. Assāti bhaveyya. ‘‘Dukkaṭa’’nti iminā ca ‘‘thullaccayaṃ dvaya’’nti iminā ca yojetabbaṃ.
কম্মন্তেতি উপসম্পদকম্মস্স পরিযোসানে, ততিযায কম্মৰাচায য্যকারপ্পত্তাযাতি ৰুত্তং হোতি।
Kammanteti upasampadakammassa pariyosāne, tatiyāya kammavācāya yyakārappattāyāti vuttaṃ hoti.
২০৩১. অজানন্তীতি চোরিং অজানন্তী। (ইদং সিক্খাপদং।)
2031.Ajānantīti coriṃ ajānantī. (Idaṃ sikkhāpadaṃ.)
২০৩২. চোরিৰুট্ঠাপনং নামাতি ইদং সিক্খাপদং চোরিৰুট্ঠাপনসমুট্ঠানং নাম। ৰাচচিত্ততোতি খণ্ডসীমং অগন্ত্ৰা করোন্তিযা ৰাচাচিত্তেহি। কাযৰাচাদিতো চেৰাতি গন্ত্ৰা করোন্তিযা কাযৰাচাচিত্ততো চ সমুট্ঠাতি। যথাহ ‘‘কেনচিদেৰ করণীযেন পক্কন্তাসু ভিক্খুনীসু অগন্ত্ৰা খণ্ডসীমং ৰা নদিং ৰা যথানিসিন্নট্ঠানেযেৰ অত্তনো নিস্সিতকপরিসায সদ্ধিং ৰুট্ঠাপেন্তিযা ৰাচাচিত্ততো সমুট্ঠাতি, খণ্ডসীমং ৰা নদিং ৰা গন্ত্ৰা ৰুট্ঠাপেন্তিযা কাযৰাচাচিত্ততো সমুট্ঠাতী’’তি (পাচি॰ অট্ঠ॰ ৬৮৩)। ক্রিযাক্রিযন্তি অনাপুচ্ছাৰুট্ঠাপনৰসেন কিরিযাকিরিযং।
2032.Corivuṭṭhāpanaṃ nāmāti idaṃ sikkhāpadaṃ corivuṭṭhāpanasamuṭṭhānaṃ nāma. Vācacittatoti khaṇḍasīmaṃ agantvā karontiyā vācācittehi. Kāyavācādito cevāti gantvā karontiyā kāyavācācittato ca samuṭṭhāti. Yathāha ‘‘kenacideva karaṇīyena pakkantāsu bhikkhunīsu agantvā khaṇḍasīmaṃ vā nadiṃ vā yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti, khaṇḍasīmaṃ vā nadiṃ vā gantvā vuṭṭhāpentiyā kāyavācācittato samuṭṭhātī’’ti (pāci. aṭṭha. 683). Kriyākriyanti anāpucchāvuṭṭhāpanavasena kiriyākiriyaṃ.
চোরিৰুট্ঠাপনকথাৰণ্ণনা।
Corivuṭṭhāpanakathāvaṇṇanā.
২০৩৩-৪. গামন্তরন্তি অঞ্ঞং গামং। যা একা সচে গচ্ছেয্যাতি সম্বন্ধো। নদীপারন্তি এত্থাপি এসেৰ নযো। নদিযা পারং নদীপারং। ‘‘একা ৰা’’তি উপরিপি যোজেতব্বং। ওহীযেয্যাতি ৰিনা ভৰেয্য। ইধ ‘‘অরঞ্ঞে’’তি সেসো। অরঞ্ঞলক্খণং ‘‘ইন্দখীল’’ইচ্চাদিনা ৰক্খতি। ‘‘একা ৰা রত্তিং ৰিপ্পৰসেয্য, একা ৰা গণম্হা ওহীযেয্যা’’তি সিক্খাপদক্কমো, এৰং সন্তেপি গাথাবন্ধৰসেন ‘‘রত্তিং ৰিপ্পৰসেয্যা’’তি অন্তে ৰুত্তং । তেনেৰ ৰিভাগৰিনিচ্ছযে দেসনারুল়্হক্কমেনেৰ ‘‘পুরেরুণোদযাযেৰা’’তিআদিং ৰক্খতি। সা পঠমাপত্তিকং গরুকং ধম্মং আপন্না সিযাতি যোজনা। পঠমং আপত্তি এতস্সাতি পঠমাপত্তিকো, ৰীতিক্কমক্খণেযেৰ আপজ্জিতব্বোতি অত্থো। ‘‘গরুকং ধম্ম’’ন্তি ইমিনা সম্বন্ধো। সকগামা নিক্খমন্তিযাতি ভিক্খুনিযা অত্তনো ৰসনগামতো নিক্খমন্তিযা।
2033-4.Gāmantaranti aññaṃ gāmaṃ. Yā ekā sace gaccheyyāti sambandho. Nadīpāranti etthāpi eseva nayo. Nadiyā pāraṃ nadīpāraṃ. ‘‘Ekā vā’’ti uparipi yojetabbaṃ. Ohīyeyyāti vinā bhaveyya. Idha ‘‘araññe’’ti seso. Araññalakkhaṇaṃ ‘‘indakhīla’’iccādinā vakkhati. ‘‘Ekā vā rattiṃ vippavaseyya, ekā vā gaṇamhā ohīyeyyā’’ti sikkhāpadakkamo, evaṃ santepi gāthābandhavasena ‘‘rattiṃ vippavaseyyā’’ti ante vuttaṃ . Teneva vibhāgavinicchaye desanāruḷhakkameneva ‘‘pureruṇodayāyevā’’tiādiṃ vakkhati. Sā paṭhamāpattikaṃ garukaṃ dhammaṃ āpannā siyāti yojanā. Paṭhamaṃ āpatti etassāti paṭhamāpattiko, vītikkamakkhaṇeyeva āpajjitabboti attho. ‘‘Garukaṃ dhamma’’nti iminā sambandho. Sakagāmā nikkhamantiyāti bhikkhuniyā attano vasanagāmato nikkhamantiyā.
২০৩৫. ততো সকগামতো।
2035.Tato sakagāmato.
২০৩৬-৭. একেন পদৰারেন ইতরস্স গামস্স পরিক্খেপে অতিক্কন্তে, উপচারোক্কমে ৰা থুল্লচ্চযন্তি যোজনা। অতিক্কন্তে ওক্কন্তেতি এত্থ ‘‘পরিক্খেপে উপচারে’’তি অধিকারতো লব্ভতি।
2036-7. Ekena padavārena itarassa gāmassa parikkhepe atikkante, upacārokkame vā thullaccayanti yojanā. Atikkante okkanteti ettha ‘‘parikkhepe upacāre’’ti adhikārato labbhati.
২০৩৮-৯. নিক্খমিত্ৰাতি অত্তনো পৰিট্ঠগামতো নিক্খমিত্ৰা। অযমেৰ নযোতি ‘‘একেন পদৰারেন থুল্লচ্চযং, দুতিযেন গরুকাপত্তী’’তি অযং নযো।
2038-9.Nikkhamitvāti attano paviṭṭhagāmato nikkhamitvā. Ayameva nayoti ‘‘ekena padavārena thullaccayaṃ, dutiyena garukāpattī’’ti ayaṃ nayo.
ৰতিচ্ছিদ্দেন ৰা খণ্ডপাকারেন ৰাতি যোজনা। ‘‘তথা’’তি ইমিনা ‘‘পাকারেনা’’তি এত্থাপি ৰা-সদ্দস্স সম্বন্ধনীযতং দস্সেতি। ‘‘ভিক্খুৰিহারস্স ভূমি তাসমকপ্পিযা’’তি ৰক্খমানত্তা ৰিহারস্স ভূমিন্তি ভিক্খুনিৰিহারভূমি গহিতা। ‘‘কপ্পিযন্তি পৰিট্ঠত্তা’’তি ইমিনা ৰক্খমানস্স কারণং দস্সেতি। কোচি দোসোতি থুল্লচ্চযসঙ্ঘাদিসেসো ৰুচ্চমানো যো কোচি দোসো।
Vaticchiddena vā khaṇḍapākārena vāti yojanā. ‘‘Tathā’’ti iminā ‘‘pākārenā’’ti etthāpi vā-saddassa sambandhanīyataṃ dasseti. ‘‘Bhikkhuvihārassa bhūmi tāsamakappiyā’’ti vakkhamānattā vihārassa bhūminti bhikkhunivihārabhūmi gahitā. ‘‘Kappiyanti paviṭṭhattā’’ti iminā vakkhamānassa kāraṇaṃ dasseti. Koci dosoti thullaccayasaṅghādiseso vuccamāno yo koci doso.
২০৪০. তাসন্তি ভিক্খুনীনং। ‘‘অকপ্পিযা’’তি ইমিনা তত্থাপি পৰিট্ঠায গামন্তরপচ্চযা আপত্তিসম্ভৰমাহ।
2040.Tāsanti bhikkhunīnaṃ. ‘‘Akappiyā’’ti iminā tatthāpi paviṭṭhāya gāmantarapaccayā āpattisambhavamāha.
২০৪১. ‘‘পঠমং পাদং অতিক্কামেন্তিযা’’তি (পাচি॰ ৬৯২) ৰুত্তত্তা ‘‘হত্থি…পে॰… অনাপত্তি সিযাপত্তি, পদসা গমনে পনা’’তি ৰুত্তং।
2041. ‘‘Paṭhamaṃ pādaṃ atikkāmentiyā’’ti (pāci. 692) vuttattā ‘‘hatthi…pe… anāpatti siyāpatti, padasā gamane panā’’ti vuttaṃ.
২০৪২. ‘‘যং কিঞ্চি…পে॰… আপত্তি পৰিসন্তিযা’’তি ৰুত্তস্সেৰত্থস্স উপসংহারত্তা ন পুনরুত্তিদোসো।
2042.‘‘Yaṃ kiñci…pe… āpatti pavisantiyā’’ti vuttassevatthassa upasaṃhārattā na punaruttidoso.
২০৪৩-৪. লক্খণেনুপপন্নাযাতি ‘‘নদী নাম তিমণ্ডলং পটিচ্ছাদেত্ৰা যত্থ কত্থচি উত্তরন্তিযা ভিক্খুনিযা অন্তরৰাসকো তেমিযতী’’তি (পাচি॰ ৬৯২) ৰুত্তলক্খণেন সমন্নাগতায নদিযা। যা পারং তীরং গচ্ছতীতি যোজনা।
2043-4.Lakkhaṇenupapannāyāti ‘‘nadī nāma timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyatī’’ti (pāci. 692) vuttalakkhaṇena samannāgatāya nadiyā. Yā pāraṃ tīraṃ gacchatīti yojanā.
পঠমং পাদং উদ্ধরিত্ৰান তীরে ঠপেন্তিযাতি ‘‘ইদানি পদৰারেন অতিক্কমতী’’তি ৰত্তব্বকালে পঠমং পাদং উক্খিপিত্ৰা পরতীরে ঠপেন্তিযা। ‘‘দুতিযপাদুদ্ধারে সঙ্ঘাদিসেসো’’তি (পাচি॰ অট্ঠ॰ ৬৯২) অট্ঠকথাৰচনতো ‘‘অতিক্কমে’’তি ইমিনা উদ্ধারো গহিতো।
Paṭhamaṃ pādaṃ uddharitvāna tīre ṭhapentiyāti ‘‘idāni padavārena atikkamatī’’ti vattabbakāle paṭhamaṃ pādaṃ ukkhipitvā paratīre ṭhapentiyā. ‘‘Dutiyapāduddhāre saṅghādiseso’’ti (pāci. aṭṭha. 692) aṭṭhakathāvacanato ‘‘atikkame’’ti iminā uddhāro gahito.
২০৪৫. অন্তরনদিযন্তি নদিৰেমজ্ঝে। ভণ্ডিত্ৰাতি কলহং কত্ৰা। ওরিমং তীরন্তি আগতদিসায তীরং। তথা পঠমে থুল্লচ্চযং , দুতিযে গরু হোতীতি অত্থো। ইমিনা সকলেন ৰচনেন ‘‘ইতরিস্সা পন অযং পক্কন্তট্ঠানে ঠিতা হোতি, তস্মা পরতীরং গচ্ছন্তিযাপি অনাপত্তী’’তি অট্ঠকথাপি উল্লিঙ্গিতা।
2045.Antaranadiyanti nadivemajjhe. Bhaṇḍitvāti kalahaṃ katvā. Orimaṃ tīranti āgatadisāya tīraṃ. Tathā paṭhame thullaccayaṃ , dutiye garu hotīti attho. Iminā sakalena vacanena ‘‘itarissā pana ayaṃ pakkantaṭṭhāne ṭhitā hoti, tasmā paratīraṃ gacchantiyāpi anāpattī’’ti aṭṭhakathāpi ulliṅgitā.
২০৪৬. রজ্জুযাতি ৰল্লিআদিকায যায কাযচি রজ্জুযা।
2046.Rajjuyāti valliādikāya yāya kāyaci rajjuyā.
২০৪৭. পিৰিতুন্তি এত্থ ‘‘পানীয’’ন্তি পকরণতো লব্ভতি। অৰুত্তসমুচ্চযত্থেন অপি-সদ্দেন ভণ্ডধোৰনাদিং সঙ্গণ্হাতি। অথাতি ৰাক্যারম্ভে নিপাতো। ‘‘নহানাদিকিচ্চং সম্পাদেত্ৰা ওরিমমেৰ তীরং আগমিস্সামী’’তি আলযস্স ৰিজ্জমানত্তা আহ ‘‘ৰট্টতী’’তি।
2047.Pivitunti ettha ‘‘pānīya’’nti pakaraṇato labbhati. Avuttasamuccayatthena api-saddena bhaṇḍadhovanādiṃ saṅgaṇhāti. Athāti vākyārambhe nipāto. ‘‘Nahānādikiccaṃ sampādetvā orimameva tīraṃ āgamissāmī’’ti ālayassa vijjamānattā āha ‘‘vaṭṭatī’’ti.
২০৪৮. পদসানদিং ওতরিত্ৰানাতি যোজনা। সেতুং আরোহিত্ৰা তথা পদসা উত্তরন্তিযা অনাপত্তীতি যোজনা।
2048. Padasānadiṃ otaritvānāti yojanā. Setuṃ ārohitvā tathā padasā uttarantiyā anāpattīti yojanā.
২০৪৯. গন্ত্ৰানাতি এত্থ ‘‘নদি’’ন্তি সেসো। উত্তরণকালে পদসা যাতীতি যোজনা।
2049.Gantvānāti ettha ‘‘nadi’’nti seso. Uttaraṇakāle padasā yātīti yojanā.
২০৫০. ৰেগেনাতি একেনেৰ ৰেগেন, অন্তরা অনিৰত্তিত্ৰাতি অত্থো।
2050.Vegenāti ekeneva vegena, antarā anivattitvāti attho.
২০৫১. ‘‘নিসীদিত্ৰা’’তি ইদং ‘‘খন্ধে ৰা’’তিআদীহিপি যোজেতব্বং। খন্ধাদযো চেত্থ সভাগানমেৰ গহেতব্বা। হত্থসঙ্ঘাতনে ৰাতি উভোহি বদ্ধহত্থৰলযে ৰা।
2051.‘‘Nisīditvā’’ti idaṃ ‘‘khandhe vā’’tiādīhipi yojetabbaṃ. Khandhādayo cettha sabhāgānameva gahetabbā. Hatthasaṅghātane vāti ubhohi baddhahatthavalaye vā.
২০৫২-৩. পাসন্তি হত্থপাসং। ‘‘আভোগং ৰিনা’’তি ইমিনা ‘‘গমিস্সামী’’তি আভোগে কতে অজানন্তিযা অরুণে উট্ঠিতেপি অনাপত্তীতি দীপিতং হোতি। যথাহ ‘‘সচে সজ্ঝাযং ৰা সৰনং ৰা অঞ্ঞং ৰা কিঞ্চি কম্মং কুরুমানা ‘পুরেঅরুণেযেৰ দুতিযিকায সন্তিকং গমিস্সামী’তি আভোগং করোতি, অজানন্তিযা এৰ চস্সা অরুণো উগ্গচ্ছতি, অনাপত্তী’’তি (পাচি॰ অট্ঠ॰ ৬৯২)। নানাগব্ভে ৰত্তব্বমেৰ নত্থীতি দস্সেতুমাহ ‘‘একগব্ভেপি ৰা’’তি। একগব্ভেপি ৰা দুতিযিকায হত্থপাসং অতিক্কম্ম অরুণং উট্ঠপেন্তিযা ভিক্খুনিযা আপত্তি সিযাতি যোজনা।
2052-3.Pāsanti hatthapāsaṃ. ‘‘Ābhogaṃ vinā’’ti iminā ‘‘gamissāmī’’ti ābhoge kate ajānantiyā aruṇe uṭṭhitepi anāpattīti dīpitaṃ hoti. Yathāha ‘‘sace sajjhāyaṃ vā savanaṃ vā aññaṃ vā kiñci kammaṃ kurumānā ‘purearuṇeyeva dutiyikāya santikaṃ gamissāmī’ti ābhogaṃ karoti, ajānantiyā eva cassā aruṇo uggacchati, anāpattī’’ti (pāci. aṭṭha. 692). Nānāgabbhe vattabbameva natthīti dassetumāha ‘‘ekagabbhepi vā’’ti. Ekagabbhepi vā dutiyikāya hatthapāsaṃ atikkamma aruṇaṃ uṭṭhapentiyā bhikkhuniyā āpatti siyāti yojanā.
২০৫৪. দুতিযাপাসন্তি দুতিযিকায হত্থপাসং। ‘‘গমিস্সামী’’তি আভোগং কত্ৰা গচ্ছন্তিযা সচে অরুণং উট্ঠেতি, ন দোসোতি যোজনা।
2054.Dutiyāpāsanti dutiyikāya hatthapāsaṃ. ‘‘Gamissāmī’’ti ābhogaṃ katvā gacchantiyā sace aruṇaṃ uṭṭheti, na dosoti yojanā.
২০৫৫-৬. অঞ্ঞত্থ পঞ্চধনুসতিকস্স (পারা॰ ৬৫৪) পচ্ছিমস্স আরঞ্ঞকসেনাসনস্স ৰুত্তত্তা ততো নিৰত্তেতুমাহ ‘‘ইন্দখীলমতিক্কম্মা’’তিআদি। এত্থাতি ইমস্মিং সিক্খাপদে। দীপিতন্তি অট্ঠকথায ‘‘অরঞ্ঞেতি এত্থ নিক্খমিত্ৰা বহি ইন্দখীলা সব্বমেতং অরঞ্ঞ’’ন্তি (পাচি॰ অট্ঠ॰ ৬৯২) এৰং ৰুত্তলক্খণমেৰ অরঞ্ঞং দস্সিতন্তি অত্থো।
2055-6. Aññattha pañcadhanusatikassa (pārā. 654) pacchimassa āraññakasenāsanassa vuttattā tato nivattetumāha ‘‘indakhīlamatikkammā’’tiādi. Etthāti imasmiṃ sikkhāpade. Dīpitanti aṭṭhakathāya ‘‘araññeti ettha nikkhamitvā bahi indakhīlā sabbametaṃ arañña’’nti (pāci. aṭṭha. 692) evaṃ vuttalakkhaṇameva araññaṃ dassitanti attho.
দুতিযিকায দস্সনূপচারং ৰিজহন্তিযা তস্সাতি যোজনা। ‘‘জহিতে’’তি ইদং অপেক্খিত্ৰা ‘‘উপচারে’’তি ৰিভত্তিৰিপরিণামো কাতব্বো।
Dutiyikāya dassanūpacāraṃ vijahantiyā tassāti yojanā. ‘‘Jahite’’ti idaṃ apekkhitvā ‘‘upacāre’’ti vibhattivipariṇāmo kātabbo.
২০৫৭. সাণিপাকারপাকারতরুঅন্তরিতে ঠানে অসতি দস্সনূপচারে সতিপি সৰনূপচারে আপত্তি হোতীতি যোজনা।
2057.Sāṇipākārapākārataruantarite ṭhāne asati dassanūpacāre satipi savanūpacāre āpatti hotīti yojanā.
২০৫৮-৬০. এত্থ কথন্তি যত্থ দূরেপি দস্সনং হোতি, এৰরূপে অজ্ঝোকাসে আপত্তিনিযমো কথং কাতব্বোতি অত্থো। অনেকেসু ঠানেসু ‘‘সৰনূপচারাতিক্কমে’’তি ৰুচ্চমানত্তা তত্থ লক্খণং ঠপেতুমাহ ‘‘মগ্গ…পে॰… এৰরূপকে’’তি। এত্থ ‘‘ঠানে’’তি সেসো। কূজন্তিযাতি যথাৰণ্ণৰৰত্থানং ন হোতি, এৰং অব্যত্তসদ্দং করোন্তিযা।
2058-60.Ettha kathanti yattha dūrepi dassanaṃ hoti, evarūpe ajjhokāse āpattiniyamo kathaṃ kātabboti attho. Anekesu ṭhānesu ‘‘savanūpacārātikkame’’ti vuccamānattā tattha lakkhaṇaṃ ṭhapetumāha ‘‘magga…pe… evarūpake’’ti. Ettha ‘‘ṭhāne’’ti seso. Kūjantiyāti yathāvaṇṇavavatthānaṃ na hoti, evaṃ abyattasaddaṃ karontiyā.
এৰরূপকে ঠানে ধম্মস্সৰনারোচনে ৰিয চ মগ্গমূল়্হস্স সদ্দেন ৰিয চ ‘‘অয্যে’’তি কূজন্তিযা তস্সা সদ্দস্স সৰনাতিক্কমে ভিক্খুনিযা গরুকা আপত্তি হোতীতি যোজনা। ‘‘ভিক্খুনিযা গরুকা হোতী’’তি ইদং ‘‘দুতিযিকং ন পাপুণিস্সামী’’তি নিরুস্সাহৰসেন ৰেদিতব্বং। তেনেৰ ৰক্খতি ‘‘ওহীযিত্ৰাথ গচ্ছন্তী’’তিআদি। এত্থাতি ‘‘গণম্হা ওহীযেয্যা’’তি ইমস্মিং।
Evarūpake ṭhāne dhammassavanārocane viya ca maggamūḷhassa saddena viya ca ‘‘ayye’’ti kūjantiyā tassā saddassa savanātikkame bhikkhuniyā garukā āpatti hotīti yojanā. ‘‘Bhikkhuniyā garukā hotī’’ti idaṃ ‘‘dutiyikaṃ na pāpuṇissāmī’’ti nirussāhavasena veditabbaṃ. Teneva vakkhati ‘‘ohīyitvātha gacchantī’’tiādi. Etthāti ‘‘gaṇamhā ohīyeyyā’’ti imasmiṃ.
২০৬১. অথ গচ্ছন্তী ওহীযিত্ৰাতি যোজনা। ‘‘ইদানি অহং পাপুণিস্সামি’’ ইতি এৰং সউস্সাহা অনুবন্ধতি, ৰট্টতি, দুতিযোপচারাতিক্কমেপি অনাপত্তীতি ৰুত্তং হোতি।
2061. Atha gacchantī ohīyitvāti yojanā. ‘‘Idāni ahaṃ pāpuṇissāmi’’ iti evaṃ saussāhā anubandhati, vaṭṭati, dutiyopacārātikkamepi anāpattīti vuttaṃ hoti.
২০৬২. ‘‘গচ্ছতু অযং’’ ইতি উস্সাহস্সচ্ছেদং কত্ৰা ওহীনা চে, তস্সা আপত্তীতি অজ্ঝাহারযোজনা।
2062. ‘‘Gacchatu ayaṃ’’ iti ussāhassacchedaṃ katvā ohīnā ce, tassā āpattīti ajjhāhārayojanā.
২০৬৩. ইতরাপীতি গন্তুং সমত্থাপি। ওহীযতু অযন্তি চাতি নিরুস্সাহপ্পকারো সন্দস্সিতো। ৰুত্তত্থমেৰ সমত্থযিতুমাহ ‘‘সউস্সাহা ন হোতি চে’’তি।
2063.Itarāpīti gantuṃ samatthāpi. Ohīyatu ayanti cāti nirussāhappakāro sandassito. Vuttatthameva samatthayitumāha ‘‘saussāhā na hoti ce’’ti.
২০৬৪-৫. পুরিমা এককং মগ্গং যাতীতি যোজনা। একমেৰ এককং। তস্মাতি যস্মা একিস্সা ইতরা পক্কন্তট্ঠানে তিট্ঠতি, তস্মা। তত্থাতি তস্মিং গণম্হাওহীযনে। পি-সদ্দো এৰকারত্থো। অনাপত্তি এৰ পকাসিতাতি যোজনা।
2064-5. Purimā ekakaṃ maggaṃ yātīti yojanā. Ekameva ekakaṃ. Tasmāti yasmā ekissā itarā pakkantaṭṭhāne tiṭṭhati, tasmā. Tatthāti tasmiṃ gaṇamhāohīyane. Pi-saddo evakārattho. Anāpatti eva pakāsitāti yojanā.
২০৬৬-৭. গামন্তরগতাযাতি গামসীমগতায। ‘‘নদিযা’’তি ইমিনা সম্বন্ধো। আপত্তিযোচতস্সোপীতি রত্তিৰিপ্পৰাস গামন্তরগমন নদিপারগমন গণম্হাওহীযন সঙ্খাতা চতস্সো সঙ্ঘাদিসেসাপত্তিযো। গণম্হাওহীযনমূলকাপত্তিযা গামতো বহি আপজ্জিতব্বত্তেপি গামন্তরোক্কমনমূলকাপত্তিযা অন্তোগামে আপজ্জিতব্বত্তেপি একক্খণেতি গামূপচারং সন্ধাযাহ।
2066-7.Gāmantaragatāyāti gāmasīmagatāya. ‘‘Nadiyā’’ti iminā sambandho. Āpattiyocatassopīti rattivippavāsa gāmantaragamana nadipāragamana gaṇamhāohīyana saṅkhātā catasso saṅghādisesāpattiyo. Gaṇamhāohīyanamūlakāpattiyā gāmato bahi āpajjitabbattepi gāmantarokkamanamūlakāpattiyā antogāme āpajjitabbattepi ekakkhaṇeti gāmūpacāraṃ sandhāyāha.
২০৬৮-৯. যা সদ্ধিং যাতা দুতিযিকা, সা চ পক্কন্তা ৰা সচে হোতি, ৰিব্ভন্তা ৰা হোতি, পেতানং লোকং যাতা ৰা হোতি, কালকতা ৰা হোতীতি অধিপ্পাযো, পক্খসঙ্কন্তা ৰা হোতি, তিত্থাযতনসঙ্কন্তা ৰা হোতীতি অধিপ্পাযো, নট্ঠা ৰা হোতি, পারাজিকাপন্না ৰা হোতীতি অধিপ্পাযো। এৰরূপে কালে গামন্তরোক্কমনাদীনি…পে॰… অনাপত্তীতি ঞাতব্বন্তি যোজনা। উম্মত্তিকাযপি এৰং চত্তারিপি করোন্তিযা অনাপত্তীতি যোজনা।
2068-9. Yā saddhiṃ yātā dutiyikā, sā ca pakkantā vā sace hoti, vibbhantā vā hoti, petānaṃ lokaṃ yātā vā hoti, kālakatā vā hotīti adhippāyo, pakkhasaṅkantā vā hoti, titthāyatanasaṅkantā vā hotīti adhippāyo, naṭṭhā vā hoti, pārājikāpannā vā hotīti adhippāyo. Evarūpe kāle gāmantarokkamanādīni…pe… anāpattīti ñātabbanti yojanā. Ummattikāyapi evaṃ cattāripi karontiyā anāpattīti yojanā.
২০৭০. ‘‘অগামকে অরঞ্ঞে’’তি ইদং গামাভাৰেন ৰুত্তং, ন ৰিঞ্ঝাটৰিসদিসতায।
2070.‘‘Agāmake araññe’’ti idaṃ gāmābhāvena vuttaṃ, na viñjhāṭavisadisatāya.
২০৭১. গামভাৰতো নদিপারগমনগণম্হাওহীযনাপত্তি ন সম্ভৰতি, তস্সাপি সকগামত্তা গামন্তরগমনমূলিকাপত্তি চ দিৰসভাগত্তা রত্তিৰিপ্পৰাসমূলিকাপত্তি চ ন সম্ভৰতীতি আহ ‘‘সকগামে…পে॰… ন ৰিজ্জরে’’তি। যথাকামন্তি যথিচ্ছিতং, দুতিযিকায অসন্তিযাপীতি অত্থো।
2071. Gāmabhāvato nadipāragamanagaṇamhāohīyanāpatti na sambhavati, tassāpi sakagāmattā gāmantaragamanamūlikāpatti ca divasabhāgattā rattivippavāsamūlikāpatti ca na sambhavatīti āha ‘‘sakagāme…pe… na vijjare’’ti. Yathākāmanti yathicchitaṃ, dutiyikāya asantiyāpīti attho.
২০৭২. সমুট্ঠানাদযো পঠমন্তিমৰত্থুনা তুল্যাতি যোজনা।
2072. Samuṭṭhānādayo paṭhamantimavatthunā tulyāti yojanā.
গামন্তরগমনকথাৰণ্ণনা।
Gāmantaragamanakathāvaṇṇanā.
২০৭৩. সীমাসম্মুতিযা চেৰাতি ‘‘সমগ্গেন সঙ্ঘেন ধম্মেন ৰিনযেন উক্খিত্তং ভিক্খুনিং কারকসঙ্ঘং অনাপুচ্ছা তস্সেৰ কারকসঙ্ঘস্স ছন্দং অজানিত্ৰা ওসারেস্সামী’’তি নৰসীমাসম্মন্ননে চ। দ্ৰীহি কম্মৰাচাহি দুৰে থুল্লচ্চযা হোন্তীতি যোজনা।
2073.Sīmāsammutiyā cevāti ‘‘samaggena saṅghena dhammena vinayena ukkhittaṃ bhikkhuniṃ kārakasaṅghaṃ anāpucchā tasseva kārakasaṅghassa chandaṃ ajānitvā osāressāmī’’ti navasīmāsammannane ca. Dvīhi kammavācāhi duve thullaccayā hontīti yojanā.
২০৭৪. কম্মস্স পরিযোসানেতি ওসারণকম্মস্স অৰসানে। তিকসঙ্ঘাদিসেসন্তি ‘‘ধম্মকম্মে ধম্মকম্মসঞ্ঞা ওসারেতি, আপত্তি সঙ্ঘাদিসেসস্স। ধম্মকম্মে ৰেমতিকা, ধম্মকম্মে অধম্মকম্মসঞ্ঞা ওসারেতি, আপত্তি সঙ্ঘাদিসেসস্সা’’তি (পাচি॰ ৬৯৭) তিকসঙ্ঘাদিসেসং ৰুত্তং। কম্মন্তি চ উক্খেপনীযকম্মং। অধম্মে তিকদুক্কটন্তি ‘‘অধম্মকম্মে ধম্মকম্মসঞ্ঞা ওসারেতি, আপত্তি দুক্কটস্স। অধম্মকম্মে ৰেমতিকা, অধম্মকম্মসঞ্ঞা ওসারেতি, আপত্তি দুক্কটস্সা’’তি তিকদুক্কটং ৰুত্তং।
2074.Kammassapariyosāneti osāraṇakammassa avasāne. Tikasaṅghādisesanti ‘‘dhammakamme dhammakammasaññā osāreti, āpatti saṅghādisesassa. Dhammakamme vematikā, dhammakamme adhammakammasaññā osāreti, āpatti saṅghādisesassā’’ti (pāci. 697) tikasaṅghādisesaṃ vuttaṃ. Kammanti ca ukkhepanīyakammaṃ. Adhamme tikadukkaṭanti ‘‘adhammakamme dhammakammasaññā osāreti, āpatti dukkaṭassa. Adhammakamme vematikā, adhammakammasaññā osāreti, āpatti dukkaṭassā’’ti tikadukkaṭaṃ vuttaṃ.
২০৭৫. গণস্সাতি তস্সেৰ কারকগণস্স। ৰত্তে ৰা পন ৰত্তন্তিন্তি তেচত্তালীসপ্পভেদে নেত্তারৰত্তে ৰত্তমানং। তেচত্তালীসপ্পভেদং পন ৰত্তক্খন্ধকে (চূল়ৰ॰ ৩৭৬) আৰি ভৰিস্সতি। নেত্তারৰত্তেতি কম্মতো নিত্থরণস্স হেতুভূতে ৰত্তে।
2075.Gaṇassāti tasseva kārakagaṇassa. Vatte vā pana vattantinti tecattālīsappabhede nettāravatte vattamānaṃ. Tecattālīsappabhedaṃ pana vattakkhandhake (cūḷava. 376) āvi bhavissati. Nettāravatteti kammato nittharaṇassa hetubhūte vatte.
২০৭৭. ওসারণং ক্রিযং। অনাপুচ্ছনং অক্রিযং।
2077. Osāraṇaṃ kriyaṃ. Anāpucchanaṃ akriyaṃ.
চতুত্থং।
Catutthaṃ.
২০৭৮-৯. অৰস্সুতাতি মেথুনরাগেন তিন্তা। এৰমুপরিপি। ‘‘মনুস্সপুগ্গলস্সা’’তি ইমিনা যক্খাদীনং পটিক্খেপো। ‘‘উদকে…পে॰… দুক্কট’’ন্তি ৰক্খমানত্তা আমিসন্তি অঞ্ঞত্র দন্তপোনা অজ্ঝোহরণীযস্স গহণং। পযোগতোতি পযোগগণনায।
2078-9.Avassutāti methunarāgena tintā. Evamuparipi. ‘‘Manussapuggalassā’’ti iminā yakkhādīnaṃ paṭikkhepo. ‘‘Udake…pe… dukkaṭa’’nti vakkhamānattā āmisanti aññatra dantaponā ajjhoharaṇīyassa gahaṇaṃ. Payogatoti payogagaṇanāya.
২০৮০. একতোৰস্সুতেতি পুমিত্থিযা সামঞ্ঞেন পুল্লিঙ্গনিদ্দেসো। কথমেতং ৰিঞ্ঞাযতীতি? ‘‘একতোঅৰস্সুতেতি এত্থ ভিক্খুনিযা অৰস্সুতভাৰো দট্ঠব্বোতি মহাপচ্চরিযং ৰুত্তং। মহাঅট্ঠকথাযং পনেতং ন ৰুত্তং, তং পাল়িযা সমেতী’’তি (পাচি॰ অট্ঠ॰ ৭০১) ৰুত্তত্তা ৰিঞ্ঞাযতি। এত্থ চ এতং ন ৰুত্তন্তি ‘‘ভিক্খুনিযা অৰস্সুতভাৰো দট্ঠব্বো’’তি এতং নিযমনং ন ৰুত্তং। তন্তি তং নিযমেত্ৰা অৰচনং। পাল়িযা সমেতীতি ‘‘একতোঅৰস্সুতে’’তি (পাচি॰ ৭০১-৭০২) অৰিসেসেত্ৰা ৰুত্তপাল়িযা, ‘‘অনৰস্সুতোতি জানন্তী পটিগ্গণ্হাতী’’তি (পাচি॰ ৭০৩) ইমায চ পাল়িযা সমেতি। যদি হি পুগ্গলস্স অৰস্সুতভাৰো নপ্পমাণং, কিং ‘‘অনৰস্সুতোতি জানন্তী’’তি ইমিনা ৰচনেন। ‘‘অনাপত্তি উভো অনৰস্সুতা হোন্তি, অনৰস্সুতা পটিগ্গণ্হাতী’’তি এত্তকমেৰ ৰত্তব্বং সিযা। অজ্ঝোহারপযোগেসু বহূসু থুল্লচ্চযচযো থুল্লচ্চযানং সমূহো সিযা, পযোগগণনায বহূনি থুল্লচ্চযানি হোন্তীতি অধিপ্পাযো।
2080.Ekatovassuteti pumitthiyā sāmaññena pulliṅganiddeso. Kathametaṃ viññāyatīti? ‘‘Ekatoavassuteti ettha bhikkhuniyā avassutabhāvo daṭṭhabboti mahāpaccariyaṃ vuttaṃ. Mahāaṭṭhakathāyaṃ panetaṃ na vuttaṃ, taṃ pāḷiyā sametī’’ti (pāci. aṭṭha. 701) vuttattā viññāyati. Ettha ca etaṃ na vuttanti ‘‘bhikkhuniyā avassutabhāvo daṭṭhabbo’’ti etaṃ niyamanaṃ na vuttaṃ. Tanti taṃ niyametvā avacanaṃ. Pāḷiyā sametīti ‘‘ekatoavassute’’ti (pāci. 701-702) avisesetvā vuttapāḷiyā, ‘‘anavassutoti jānantī paṭiggaṇhātī’’ti (pāci. 703) imāya ca pāḷiyā sameti. Yadi hi puggalassa avassutabhāvo nappamāṇaṃ, kiṃ ‘‘anavassutoti jānantī’’ti iminā vacanena. ‘‘Anāpatti ubho anavassutā honti, anavassutā paṭiggaṇhātī’’ti ettakameva vattabbaṃ siyā. Ajjhohārapayogesu bahūsu thullaccayacayo thullaccayānaṃ samūho siyā, payogagaṇanāya bahūni thullaccayāni hontīti adhippāyo.
২০৮১. সম্ভৰে, ব্যভিচারে চ ৰিসেসনং সাত্থকং ভৰতীতি ‘‘মনুস্সৰিগ্গহান’’ন্তি ইদং ৰিসেসনং যক্খপেততিরচ্ছানপদেহি যোজেতব্বং। উভতোঅৰস্সুতে সতি মনুস্সৰিগ্গহানং যক্খপেততিরচ্ছানানং হত্থতো চ পণ্ডকানং হত্থতো চ তথাতি যোজনা। তথা-সদ্দেনেত্থ ‘‘যং কিঞ্চি আমিসং পটিগ্গণ্হাতি, দুক্কটং। অজ্ঝোহারপযোগেসু থুল্লচ্চযচযো সিযা’’তি যথাৰুত্তমতিদিসতি।
2081. Sambhave, byabhicāre ca visesanaṃ sātthakaṃ bhavatīti ‘‘manussaviggahāna’’nti idaṃ visesanaṃ yakkhapetatiracchānapadehi yojetabbaṃ. Ubhatoavassute sati manussaviggahānaṃ yakkhapetatiracchānānaṃ hatthato ca paṇḍakānaṃ hatthato ca tathāti yojanā. Tathā-saddenettha ‘‘yaṃ kiñci āmisaṃ paṭiggaṇhāti, dukkaṭaṃ. Ajjhohārapayogesu thullaccayacayo siyā’’ti yathāvuttamatidisati.
২০৮২. এত্থাতি ইমেসু যক্খাদীসু। একতোঅৰস্সুতে সতি আমিসং পটিগ্গণ্হন্তিযা দুক্কটং। সব্বত্থাতি সব্বেসু মনুস্সামনুস্সেসু একতো, উভতো ৰা অনৰস্সুতেসু। উদকে দন্তকট্ঠকেতি উদকস্স, দন্তকট্ঠস্স চ গহণে। পরিভোগে চাতি পটিগ্গহণে চেৰ পরিভোগে চ।
2082.Etthāti imesu yakkhādīsu. Ekatoavassute sati āmisaṃ paṭiggaṇhantiyā dukkaṭaṃ. Sabbatthāti sabbesu manussāmanussesu ekato, ubhato vā anavassutesu. Udake dantakaṭṭhaketi udakassa, dantakaṭṭhassa ca gahaṇe. Paribhoge cāti paṭiggahaṇe ceva paribhoge ca.
২০৮৩-৪. উভযাৰস্সুতাভাৰেতি ভিক্খুনিযা, পুগ্গলস্স চ উভিন্নং অৰস্সুতত্তে অসতি যদি আমিসং পটিগ্গণ্হাতি , ন দোসোতি যোজনা। অযং পুরিসপুগ্গলো। ন চ অৰস্সুতোতি নেৰ অৰস্সুতোতি ঞত্ৰা। যা পন আমিসং পটিগ্গণ্হাতি, তস্সা চ উম্মত্তিকাদীনঞ্চ অনাপত্তি পকাসিতাতি যোজনা। ‘‘যা গণ্হাতি, তস্সা অনাপত্তী’’তি ৰুত্তেপি পরিভুঞ্জন্তিযাৰ অনাপত্তিভাৰো দট্ঠব্বো।
2083-4.Ubhayāvassutābhāveti bhikkhuniyā, puggalassa ca ubhinnaṃ avassutatte asati yadi āmisaṃ paṭiggaṇhāti , na dosoti yojanā. Ayaṃ purisapuggalo. Na ca avassutoti neva avassutoti ñatvā. Yā pana āmisaṃ paṭiggaṇhāti, tassā ca ummattikādīnañca anāpatti pakāsitāti yojanā. ‘‘Yā gaṇhāti, tassā anāpattī’’ti vuttepi paribhuñjantiyāva anāpattibhāvo daṭṭhabbo.
পঞ্চমং।
Pañcamaṃ.
২০৮৫. উয্যোজনেতি ‘‘কিং তে অয্যে এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা, ইঙ্ঘ অয্যে যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি (পাচি॰ ৭০৫) ৰুত্তনযেন নিযোজনে। একিস্সাতি উয্যোজিকায। ইতরিস্সাতি উয্যোজিতায। পটিগ্গহেতি অৰস্সুতস্স হত্থতো আমিসপটিগ্গহণে। দুক্কটানি চাতি উয্যোজিকায দুক্কটানি। ভোগেসূতি উয্যোজিতায তথা পটিগ্গহিতস্স আমিসস্স পরিভোগেসু। থুল্লচ্চযগণো সিযাতি উয্যোজিকায থুল্লচ্চযসমূহো সিযাতি অত্থো।
2085.Uyyojaneti ‘‘kiṃ te ayye eso purisapuggalo karissati avassuto vā anavassuto vā, yato tvaṃ anavassutā, iṅgha ayye yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti (pāci. 705) vuttanayena niyojane. Ekissāti uyyojikāya. Itarissāti uyyojitāya. Paṭiggaheti avassutassa hatthato āmisapaṭiggahaṇe. Dukkaṭāni cāti uyyojikāya dukkaṭāni. Bhogesūti uyyojitāya tathā paṭiggahitassa āmisassa paribhogesu. Thullaccayagaṇo siyāti uyyojikāya thullaccayasamūho siyāti attho.
২০৮৬-৭. ভোজনস্সাৰসানস্মিন্তি উয্যোজিতায ভোজনপরিযন্তে। সঙ্ঘাদিসেসতাতি উয্যোজিকায সঙ্ঘাদিসেসাপত্তি হোতি।
2086-7.Bhojanassāvasānasminti uyyojitāya bhojanapariyante. Saṅghādisesatāti uyyojikāya saṅghādisesāpatti hoti.
যক্খাদীনন্তি এত্থ আদি-সদ্দেন পেতপণ্ডকতিরচ্ছানগতা গহিতা। তথেৰ পুরিসস্স চাতি অৰস্সুতস্স মনুস্সপুরিসস্স। ‘‘গহণে উয্যোজনে’’তি পদচ্ছেদো। গহণেতি উয্যোজিতায গহণে। উয্যোজনেতি উয্যোজিকায অত্তনো উয্যোজনে। তেসন্তি উদকদন্তপোনানং। পরিভোগেতি উয্যোজিতায পরিভুঞ্জনে। দুক্কটং পরিকিত্তিতন্তি উয্যোজিকায দুক্কটং ৰুত্তং।
Yakkhādīnanti ettha ādi-saddena petapaṇḍakatiracchānagatā gahitā. Tatheva purisassa cāti avassutassa manussapurisassa. ‘‘Gahaṇe uyyojane’’ti padacchedo. Gahaṇeti uyyojitāya gahaṇe. Uyyojaneti uyyojikāya attano uyyojane. Tesanti udakadantaponānaṃ. Paribhogeti uyyojitāya paribhuñjane. Dukkaṭaṃ parikittitanti uyyojikāya dukkaṭaṃ vuttaṃ.
২০৮৮. সেসস্সাতি উদকদন্তপোনতো অঞ্ঞস্স পরিভুঞ্জিতব্বামিসস্স। ‘‘গহণুয্যোজনে’’তিআদি ৰুত্তনযমেৰ।
2088.Sesassāti udakadantaponato aññassa paribhuñjitabbāmisassa. ‘‘Gahaṇuyyojane’’tiādi vuttanayameva.
২০৮৯-৯০. যা পন ভিক্খুনী ‘‘অনৰস্সুতো’’তি ঞত্ৰা উয্যোজেতি, ‘‘কুপিতা ৰা ন পটিগ্গণ্হতী’’তি উয্যোজেতি, ‘‘কুলানুদ্দযতা ৰাপি ন পটিগ্গণ্হতী’’তি উয্যোজেতি, তস্সা চ উম্মত্তিকাদীনঞ্চ অনাপত্তি পকাসিতাতি যোজনা। যথাহ ‘‘অনাপত্তি ‘অনৰস্সুতো’তি জানন্তী উয্যোজেতি, ‘কুপিতা ন পটিগ্গণ্হতী’তি উয্যোজেতি, ‘কুলানুদ্দযতায ন পটিগ্গণ্হতী’তি উয্যোজেতী’’তিআদি (পাচি॰ ৭০৮)।
2089-90.Yā pana bhikkhunī ‘‘anavassuto’’ti ñatvā uyyojeti, ‘‘kupitā vā na paṭiggaṇhatī’’ti uyyojeti, ‘‘kulānuddayatā vāpi na paṭiggaṇhatī’’ti uyyojeti, tassā ca ummattikādīnañca anāpatti pakāsitāti yojanā. Yathāha ‘‘anāpatti ‘anavassuto’ti jānantī uyyojeti, ‘kupitā na paṭiggaṇhatī’ti uyyojeti, ‘kulānuddayatāya na paṭiggaṇhatī’ti uyyojetī’’tiādi (pāci. 708).
ছট্ঠং।
Chaṭṭhaṃ.
২০৯১. সত্তমন্তি ‘‘যা পন ভিক্খুনী কুপিতা অনত্তমনা এৰং ৰদেয্য বুদ্ধং পচ্চক্খামী’’তিআদিনযপ্পৰত্তং (পাচি॰ ৭১০) সত্তমসিক্খাপদঞ্চ। অট্ঠমন্তি ‘‘যা পন ভিক্খুনী কিস্মিঞ্চিদেৰ অধিকরণে পচ্চাকতা’’তিআদিনযপ্পৰত্তং (পাচি॰ ৭১৬) অট্ঠমসিক্খাপদঞ্চ।
2091.Sattamanti ‘‘yā pana bhikkhunī kupitā anattamanā evaṃ vadeyya buddhaṃ paccakkhāmī’’tiādinayappavattaṃ (pāci. 710) sattamasikkhāpadañca. Aṭṭhamanti ‘‘yā pana bhikkhunī kismiñcideva adhikaraṇe paccākatā’’tiādinayappavattaṃ (pāci. 716) aṭṭhamasikkhāpadañca.
সত্তমট্ঠমানি।
Sattamaṭṭhamāni.
২০৯২. নৰমেতি ‘‘ভিক্খুনিযো পনেৰ সংসট্ঠা ৰিহরন্তী’’তিআদিসিক্খাপদে (পাচি॰ ৭২২) চ। দসমেতি ‘‘যা পন ভিক্খুনী এৰং ৰদেয্য সংসট্ঠাৰ অয্যে তুম্হে ৰিহরথ, মা তুম্হে নানা ৰিহরিত্থা’’তিআদিসিক্খাপদে (পাচি॰ ৭২৮) চ।
2092.Navameti ‘‘bhikkhuniyo paneva saṃsaṭṭhā viharantī’’tiādisikkhāpade (pāci. 722) ca. Dasameti ‘‘yā pana bhikkhunī evaṃ vadeyya saṃsaṭṭhāva ayye tumhe viharatha, mā tumhe nānā viharitthā’’tiādisikkhāpade (pāci. 728) ca.
নৰমদসমানি।
Navamadasamāni.
২০৯৩. তেন মহাৰিভঙ্গাগতেন দুট্ঠদোসদ্ৰযেন চ তত্থেৰ আগতেন তেন সঞ্চরিত্তসিক্খাপদেন চাতি ইমেহি তীহি সদ্ধিং ইধাগতানি ছ সিক্খাপদানীতি এৰং নৰ পঠমাপত্তিকা । ইতো ভিক্খুনিৰিভঙ্গতো চত্তারি যাৰততিযকানি ততো মহাৰিভঙ্গতো চত্তারি যাৰততিযকানীতি এৰং অট্ঠ যাৰততিযকানি, পুরিমানি নৰ চাতি সত্তরস সঙ্ঘাদিসেসসিক্খাপদানি মযা চেত্থ দস্সিতানীতি অধিপ্পাযো।
2093. Tena mahāvibhaṅgāgatena duṭṭhadosadvayena ca tattheva āgatena tena sañcarittasikkhāpadena cāti imehi tīhi saddhiṃ idhāgatāni cha sikkhāpadānīti evaṃ nava paṭhamāpattikā . Ito bhikkhunivibhaṅgato cattāri yāvatatiyakāni tato mahāvibhaṅgato cattāri yāvatatiyakānīti evaṃ aṭṭha yāvatatiyakāni, purimāni nava cāti sattarasa saṅghādisesasikkhāpadāni mayā cettha dassitānīti adhippāyo.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
সঙ্ঘাদিসেসকথাৰণ্ণনা নিট্ঠিতা।
Saṅghādisesakathāvaṇṇanā niṭṭhitā.
