| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸಙ್ಘಾದಿಸೇಸಕಥಾವಣ್ಣನಾ
Saṅghādisesakathāvaṇṇanā
೨೦೧೧. ಏವಂ ಭಿಕ್ಖುನಿವಿಭಙ್ಗೇ ಆಗತಂ ಪಾರಾಜಿಕವಿನಿಚ್ಛಯಂ ವತ್ವಾ ಇದಾನಿ ತದನನ್ತರುದ್ದಿಟ್ಠಂ ಸಙ್ಘಾದಿಸೇಸವಿನಿಚ್ಛಯಂ ದಸ್ಸೇತುಮಾಹ ‘‘ಯಾ ಪನ ಭಿಕ್ಖುನೀ’’ತಿಆದಿ। ಉಸ್ಸಯವಾದಾತಿ ಕೋಧುಸ್ಸಯಮಾನುಸ್ಸಯವಸೇನ ವಿವದಮಾನಾ। ತತೋಯೇವ ಅಟ್ಟಂ ಕರೋತಿ ಸೀಲೇನಾತಿ ಅಟ್ಟಕಾರೀ। ಏತ್ಥ ಚ ‘‘ಅಟ್ಟೋ’’ತಿ ವೋಹಾರಿಕವಿನಿಚ್ಛಯೋ ವುಚ್ಚತಿ, ಯಂ ಪಬ್ಬಜಿತಾ ‘‘ಅಧಿಕರಣ’’ನ್ತಿಪಿ ವದನ್ತಿ। ಸಬ್ಬತ್ಥ ವತ್ತಬ್ಬೇ ಮುಖಮಸ್ಸಾ ಅತ್ಥೀತಿ ಮುಖರೀ, ಬಹುಭಾಣೀತಿ ಅತ್ಥೋ। ಯೇನ ಕೇನಚಿ ನರೇನ ಸದ್ಧಿನ್ತಿ ‘‘ಗಹಪತಿನಾ ವಾ ಗಹಪತಿಪುತ್ತೇನ ವಾ’’ತಿಆದಿನಾ (ಪಾಚಿ॰ ೬೭೯) ದಸ್ಸಿತೇನ ಯೇನ ಕೇನಚಿ ಮನುಸ್ಸೇನ ಸದ್ಧಿಂ। ಇಧಾತಿ ಇಮಸ್ಮಿಂ ಸಾಸನೇ। ಕಿರಾತಿ ಪದಪೂರಣೇ, ಅನುಸ್ಸವನೇ ವಾ।
2011. Evaṃ bhikkhunivibhaṅge āgataṃ pārājikavinicchayaṃ vatvā idāni tadanantaruddiṭṭhaṃ saṅghādisesavinicchayaṃ dassetumāha ‘‘yā pana bhikkhunī’’tiādi. Ussayavādāti kodhussayamānussayavasena vivadamānā. Tatoyeva aṭṭaṃ karoti sīlenāti aṭṭakārī. Ettha ca ‘‘aṭṭo’’ti vohārikavinicchayo vuccati, yaṃ pabbajitā ‘‘adhikaraṇa’’ntipi vadanti. Sabbattha vattabbe mukhamassā atthīti mukharī, bahubhāṇīti attho. Yena kenaci narena saddhinti ‘‘gahapatinā vā gahapatiputtena vā’’tiādinā (pāci. 679) dassitena yena kenaci manussena saddhiṃ. Idhāti imasmiṃ sāsane. Kirāti padapūraṇe, anussavane vā.
೨೦೧೨. ಸಕ್ಖಿಂ ವಾತಿ ಪಚ್ಚಕ್ಖತೋ ಜಾನನಕಂ ವಾ। ಅಟ್ಟಂ ಕಾತುಂ ಗಚ್ಛನ್ತಿಯಾ ಪದೇ ಪದೇ ತಥಾ ದುಕ್ಕಟನ್ತಿ ಯೋಜನಾ।
2012.Sakkhiṃvāti paccakkhato jānanakaṃ vā. Aṭṭaṃ kātuṃ gacchantiyā pade pade tathā dukkaṭanti yojanā.
೨೦೧೩. ವೋಹಾರಿಕೇತಿ ವಿನಿಚ್ಛಯಾಮಚ್ಚೇ।
2013.Vohāriketi vinicchayāmacce.
೨೦೧೪. ಅನನ್ತರನ್ತಿ ತಸ್ಸ ವಚನಾನನ್ತರಂ।
2014.Anantaranti tassa vacanānantaraṃ.
೨೦೧೫. ಇತರೋತಿ ಅಟ್ಟಕಾರಕೋ। ಪುಬ್ಬಸದಿಸೋವ ವಿನಿಚ್ಛಯೋತಿ ಪಠಮಾರೋಚನೇ ದುಕ್ಕಟಂ, ದುತಿಯಾರೋಚನೇ ಥುಲ್ಲಚ್ಚಯನ್ತಿ ವುತ್ತಂ ಹೋತಿ।
2015.Itaroti aṭṭakārako. Pubbasadisova vinicchayoti paṭhamārocane dukkaṭaṃ, dutiyārocane thullaccayanti vuttaṃ hoti.
೨೦೧೬. ‘‘ತವ, ಮಮಾಪಿ ಚ ಕಥಂ ತುವಮೇವ ಆರೋಚೇಹೀ’’ತಿ ಇತರೇನ ವುತ್ತಾ ಭಿಕ್ಖುನೀತಿ ಯೋಜನಾ। ಯಥಾಕಾಮನ್ತಿ ತಸ್ಸಾ ಚ ಅತ್ತನೋ ಚ ವಚನೇ ಯಂ ಪಠಮಂ ವತ್ತುಮಿಚ್ಛತಿ, ತಂ ಇಚ್ಛಾನುರೂಪಂ ಆರೋಚೇತು।
2016. ‘‘Tava, mamāpi ca kathaṃ tuvameva ārocehī’’ti itarena vuttā bhikkhunīti yojanā. Yathākāmanti tassā ca attano ca vacane yaṃ paṭhamaṃ vattumicchati, taṃ icchānurūpaṃ ārocetu.
೨೦೧೮-೯. ಉಭಿನ್ನಮ್ಪಿ ಯಥಾ ತಥಾ ಆರೋಚಿತಕಥಂ ಸುತ್ವಾತಿ ಯೋಜನಾ। ಯಥಾ ತಥಾತಿ ಪುಬ್ಬೇ ವುತ್ತನಯೇನ ಕೇನಚಿ ಪಕಾರೇನ। ತೇಹೀತಿ ವೋಹಾರಿಕೇಹಿ। ಅಟ್ಟೇ ಪನ ಚ ನಿಟ್ಠಿತೇತಿ ಅಟ್ಟಕಾರಕೇಸು ಏಕಸ್ಮಿಂ ಪಕ್ಖೇ ಪರಾಜಿತೇ। ಯಥಾಹ ‘‘ಪರಾಜಿತೇ ಅಟ್ಟಕಾರಕೇ ಅಟ್ಟಪರಿಯೋಸಾನಂ ನಾಮ ಹೋತೀ’’ತಿ। ಅಟ್ಟಸ್ಸ ಪರಿಯೋಸಾನೇತಿ ಏತ್ಥ ‘‘ತಸ್ಸಾ’’ತಿ ಸೇಸೋ। ತಸ್ಸ ಅಟ್ಟಸ್ಸ ಪರಿಯೋಸಾನೇತಿ ಯೋಜನಾ।
2018-9. Ubhinnampi yathā tathā ārocitakathaṃ sutvāti yojanā. Yathā tathāti pubbe vuttanayena kenaci pakārena. Tehīti vohārikehi. Aṭṭe pana ca niṭṭhiteti aṭṭakārakesu ekasmiṃ pakkhe parājite. Yathāha ‘‘parājite aṭṭakārake aṭṭapariyosānaṃ nāma hotī’’ti. Aṭṭassa pariyosāneti ettha ‘‘tassā’’ti seso. Tassa aṭṭassa pariyosāneti yojanā.
೨೦೨೦-೨೩. ಅನಾಪತ್ತಿವಿಸಯಂ ದಸ್ಸೇತುಮಾಹ ‘‘ದೂತಂ ವಾಪೀ’’ತಿಆದಿ। ಪಚ್ಚತ್ಥಿಕಮನುಸ್ಸೇಹಿ ದೂತಂ ವಾಪಿ ಪಹಿಣಿತ್ವಾ ಸಯಮ್ಪಿ ವಾ ಆಗನ್ತ್ವಾ ಯಾ ಪನ ಆಕಡ್ಢೀಯತೀತಿ ಯೋಜನಾ। ಅಞ್ಞೇಹೀತಿ ಗಾಮದಾರಕಾದೀಹಿ ಅಞ್ಞೇಹಿ। ಕಿಞ್ಚಿ ಪರಂ ಅನೋದಿಸ್ಸಾತಿ ಯೋಜನಾ। ಇಮಿಸ್ಸಾ ಓದಿಸ್ಸ ವುತ್ತೇ ತೇಹಿ ಗಹಿತದಣ್ಡೇ ತಸ್ಸಾ ಚ ಗೀವಾತಿ ಸೂಚಿತಂ ಹೋತಿ। ಯಾ ರಕ್ಖಂ ಯಾಚತಿ , ತತ್ಥ ತಸ್ಮಿಂ ರಕ್ಖಾಯಾಚನೇ ತಸ್ಸಾ ಅನಾಪತ್ತಿ ಪಕಾಸಿತಾತಿ ಯೋಜನಾ। ಅಞ್ಞತೋ ಸುತ್ವಾತಿ ಯೋಜನಾ। ಉಮ್ಮತ್ತಿಕಾದೀನನ್ತಿ ಏತ್ಥ ಆದಿ-ಸದ್ದೇನ ಆದಿಕಮ್ಮಿಕಾ ಗಹಿತಾ।
2020-23. Anāpattivisayaṃ dassetumāha ‘‘dūtaṃ vāpī’’tiādi. Paccatthikamanussehi dūtaṃ vāpi pahiṇitvā sayampi vā āgantvā yā pana ākaḍḍhīyatīti yojanā. Aññehīti gāmadārakādīhi aññehi. Kiñci paraṃ anodissāti yojanā. Imissā odissa vutte tehi gahitadaṇḍe tassā ca gīvāti sūcitaṃ hoti. Yā rakkhaṃ yācati , tattha tasmiṃ rakkhāyācane tassā anāpatti pakāsitāti yojanā. Aññato sutvāti yojanā. Ummattikādīnanti ettha ādi-saddena ādikammikā gahitā.
ಸಮುಟ್ಠಾನಂ ಕಥಿನೇನ ತುಲ್ಯನ್ತಿ ಯೋಜನಾ। ಸೇಸಂ ದಸ್ಸೇತುಮಾಹ ‘‘ಸಕಿರಿಯಂ ಇದ’’ನ್ತಿ। ಇದಂ ಸಿಕ್ಖಾಪದಂ। ಕಿರಿಯಾಯ ಸಹ ವತ್ತತೀತಿ ಸಕಿರಿಯಂ ಅಟ್ಟಕರಣೇನ ಆಪಜ್ಜನತೋ। ‘‘ಸಮುಟ್ಠಾನ’’ನ್ತಿ ಇಮಿನಾ ಚ ಸಮುಟ್ಠಾನಾದಿವಿನಿಚ್ಛಯೋ ಉಪಲಕ್ಖಿತೋತಿ ದಟ್ಠಬ್ಬೋ।
Samuṭṭhānaṃ kathinena tulyanti yojanā. Sesaṃ dassetumāha ‘‘sakiriyaṃ ida’’nti. Idaṃ sikkhāpadaṃ. Kiriyāya saha vattatīti sakiriyaṃ aṭṭakaraṇena āpajjanato. ‘‘Samuṭṭhāna’’nti iminā ca samuṭṭhānādivinicchayo upalakkhitoti daṭṭhabbo.
ಅಟ್ಟಕಾರಿಕಾಕಥಾವಣ್ಣನಾ।
Aṭṭakārikākathāvaṇṇanā.
೨೦೨೪-೫. ಜಾನನ್ತೀತಿ ‘‘ಸಾಮಂ ವಾ ಜಾನಾತಿ, ಅಞ್ಞೇ ವಾ ತಸ್ಸಾ ಆರೋಚೇನ್ತೀ’’ತಿ (ಪಾಚಿ॰ ೬೮೪) ವುತ್ತನಯೇನ ಜಾನನ್ತೀ। ಚೋರಿನ್ತಿ ಯಾಯ ಪಞ್ಚಮಾಸಗ್ಘನಕತೋ ಪಟ್ಠಾಯ ಯಂ ಕಿಞ್ಚಿ ಪರಸನ್ತಕಂ ಅವಹರಿತಂ, ಅಯಂ ಚೋರೀ ನಾಮ। ವಜ್ಝಂ ವಿದಿತನ್ತಿ ‘‘ತೇನ ಕಮ್ಮೇನ ವಧಾರಹಾ ಅಯ’’ನ್ತಿ ಏವಂ ವಿದಿತಂ। ಸಙ್ಘನ್ತಿ ಭಿಕ್ಖುನಿಸಙ್ಘಂ। ಅನಪಲೋಕೇತ್ವಾತಿ ಅನಾಪುಚ್ಛಾ। ರಾಜಾನಂ ವಾತಿ ರಞ್ಞಾ ಅನುಸಾಸಿತಬ್ಬಟ್ಠಾನೇ ತಂ ರಾಜಾನಂ ವಾ। ಯಥಾಹ ‘‘ರಾಜಾ ನಾಮ ಯತ್ಥ ರಾಜಾ ಅನುಸಾಸತಿ, ರಾಜಾ ಅಪಲೋಕೇತಬ್ಬೋ’’ತಿ। ಗಣಮೇವ ವಾತಿ ‘‘ತುಮ್ಹೇವ ತತ್ಥ ಅನುಸಾಸಥಾ’’ತಿ ರಾಜೂಹಿ ದಿನ್ನಂ ಗಾಮನಿಗಮಮಲ್ಲಗಣಾದಿಕಂ ಗಣಂ ವಾ। ಮಲ್ಲಗಣಂ ನಾಮ ಪಾನೀಯಟ್ಠಪನಪೋಕ್ಖರಣಿಖಣನಾದಿಪುಞ್ಞಕಮ್ಮನಿಯುತ್ತೋ ಜನಸಮೂಹೋ। ಏತೇನೇವ ಏವಮೇವ ದಿನ್ನಗಾಮವರಾ ಪೂಗಾ ಚ ಸೇನಿಯೋ ಚ ಸಙ್ಗಹಿತಾ। ವುಟ್ಠಾಪೇಯ್ಯಾತಿ ಉಪಸಮ್ಪಾದೇಯ್ಯ। ಕಪ್ಪನ್ತಿ ಚ ವಕ್ಖಮಾನಲಕ್ಖಣಂ ಕಪ್ಪಂ। ಸಾ ಚೋರಿವುಟ್ಠಾಪನನ್ತಿ ಸಮ್ಬನ್ಧೋ। ಉಪಜ್ಝಾಯಾ ಹುತ್ವಾ ಯಾ ಚೋರಿಂ ಉಪಸಮ್ಪಾದೇತಿ, ಸಾ ಭಿಕ್ಖುನೀತಿ ಅತ್ಥೋ। ಉಪಜ್ಝಾಯಸ್ಸ ಭಿಕ್ಖುಸ್ಸ ದುಕ್ಕಟಂ।
2024-5.Jānantīti ‘‘sāmaṃ vā jānāti, aññe vā tassā ārocentī’’ti (pāci. 684) vuttanayena jānantī. Corinti yāya pañcamāsagghanakato paṭṭhāya yaṃ kiñci parasantakaṃ avaharitaṃ, ayaṃ corī nāma. Vajjhaṃ viditanti ‘‘tena kammena vadhārahā aya’’nti evaṃ viditaṃ. Saṅghanti bhikkhunisaṅghaṃ. Anapaloketvāti anāpucchā. Rājānaṃ vāti raññā anusāsitabbaṭṭhāne taṃ rājānaṃ vā. Yathāha ‘‘rājā nāma yattha rājā anusāsati, rājā apaloketabbo’’ti. Gaṇameva vāti ‘‘tumheva tattha anusāsathā’’ti rājūhi dinnaṃ gāmanigamamallagaṇādikaṃ gaṇaṃ vā. Mallagaṇaṃ nāma pānīyaṭṭhapanapokkharaṇikhaṇanādipuññakammaniyutto janasamūho. Eteneva evameva dinnagāmavarā pūgā ca seniyo ca saṅgahitā. Vuṭṭhāpeyyāti upasampādeyya. Kappanti ca vakkhamānalakkhaṇaṃ kappaṃ. Sā corivuṭṭhāpananti sambandho. Upajjhāyā hutvā yā coriṃ upasampādeti, sā bhikkhunīti attho. Upajjhāyassa bhikkhussa dukkaṭaṃ.
೨೦೨೬. ಪಞ್ಚಮಾಸಗ್ಘನನ್ತಿ ಏತ್ಥ ಪಞ್ಚಮಾಸಞ್ಚ ಪಞ್ಚಮಾಸಗ್ಘನಕಞ್ಚ ಪಞ್ಚಮಾಸಗ್ಘನನ್ತಿ ಏಕದೇಸಸರೂಪೇಕಸೇಸನಯೇನ ಪಞ್ಚಮಾಸಸ್ಸಾಪಿ ಗಹಣಂ। ಅತಿರೇಕಗ್ಘನಂ ವಾಪೀತಿ ಏತ್ಥಾಪಿ ಏಸೇವ ನಯೋ।
2026.Pañcamāsagghananti ettha pañcamāsañca pañcamāsagghanakañca pañcamāsagghananti ekadesasarūpekasesanayena pañcamāsassāpi gahaṇaṃ. Atirekagghanaṃ vāpīti etthāpi eseva nayo.
೨೦೨೭. ಪಬ್ಬಜಿತಂ ಪುಬ್ಬಂ ಯಾಯ ಸಾ ಪಬ್ಬಜಿತಪುಬ್ಬಾ। ವುತ್ತಪ್ಪಕಾರಂ ಚೋರಕಮ್ಮಂ ಕತ್ವಾಪಿ ತಿತ್ಥಾಯತನಾದೀಸು ಯಾ ಪಠಮಂ ಪಬ್ಬಜಿತಾತಿ ಅತ್ಥೋ।
2027. Pabbajitaṃ pubbaṃ yāya sā pabbajitapubbā. Vuttappakāraṃ corakammaṃ katvāpi titthāyatanādīsu yā paṭhamaṃ pabbajitāti attho.
೨೦೨೮-೩೦. ಇದಾನಿ ಪುಬ್ಬಪಯೋಗದುಕ್ಕಟಾದಿಆಪತ್ತಿವಿಭಾಗಂ ದಸ್ಸೇತುಮಾಹ ‘‘ವುಟ್ಠಾಪೇತಿ ಚ ಯಾ ಚೋರಿ’’ನ್ತಿಆದಿ। ಇಧ ‘‘ಉಪಜ್ಝಾಯಾ ಹುತ್ವಾ’’ತಿ ಸೇಸೋ। ಇದಂ ಕಪ್ಪಂ ಠಪೇತ್ವಾತಿ ಯೋಜನಾ। ಸೀಮಂ ಸಮ್ಮನ್ನತಿ ಚಾತಿ ಅಭಿನವಂ ಸೀಮಂ ಸಮ್ಮನ್ನತಿ, ಬನ್ಧತೀತಿ ವುತ್ತಂ ಹೋತಿ। ಅಸ್ಸಾತಿ ಭವೇಯ್ಯ। ‘‘ದುಕ್ಕಟ’’ನ್ತಿ ಇಮಿನಾ ಚ ‘‘ಥುಲ್ಲಚ್ಚಯಂ ದ್ವಯ’’ನ್ತಿ ಇಮಿನಾ ಚ ಯೋಜೇತಬ್ಬಂ।
2028-30. Idāni pubbapayogadukkaṭādiāpattivibhāgaṃ dassetumāha ‘‘vuṭṭhāpeti ca yā cori’’ntiādi. Idha ‘‘upajjhāyā hutvā’’ti seso. Idaṃ kappaṃ ṭhapetvāti yojanā. Sīmaṃ sammannati cāti abhinavaṃ sīmaṃ sammannati, bandhatīti vuttaṃ hoti. Assāti bhaveyya. ‘‘Dukkaṭa’’nti iminā ca ‘‘thullaccayaṃ dvaya’’nti iminā ca yojetabbaṃ.
ಕಮ್ಮನ್ತೇತಿ ಉಪಸಮ್ಪದಕಮ್ಮಸ್ಸ ಪರಿಯೋಸಾನೇ, ತತಿಯಾಯ ಕಮ್ಮವಾಚಾಯ ಯ್ಯಕಾರಪ್ಪತ್ತಾಯಾತಿ ವುತ್ತಂ ಹೋತಿ।
Kammanteti upasampadakammassa pariyosāne, tatiyāya kammavācāya yyakārappattāyāti vuttaṃ hoti.
೨೦೩೧. ಅಜಾನನ್ತೀತಿ ಚೋರಿಂ ಅಜಾನನ್ತೀ। (ಇದಂ ಸಿಕ್ಖಾಪದಂ।)
2031.Ajānantīti coriṃ ajānantī. (Idaṃ sikkhāpadaṃ.)
೨೦೩೨. ಚೋರಿವುಟ್ಠಾಪನಂ ನಾಮಾತಿ ಇದಂ ಸಿಕ್ಖಾಪದಂ ಚೋರಿವುಟ್ಠಾಪನಸಮುಟ್ಠಾನಂ ನಾಮ। ವಾಚಚಿತ್ತತೋತಿ ಖಣ್ಡಸೀಮಂ ಅಗನ್ತ್ವಾ ಕರೋನ್ತಿಯಾ ವಾಚಾಚಿತ್ತೇಹಿ। ಕಾಯವಾಚಾದಿತೋ ಚೇವಾತಿ ಗನ್ತ್ವಾ ಕರೋನ್ತಿಯಾ ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ। ಯಥಾಹ ‘‘ಕೇನಚಿದೇವ ಕರಣೀಯೇನ ಪಕ್ಕನ್ತಾಸು ಭಿಕ್ಖುನೀಸು ಅಗನ್ತ್ವಾ ಖಣ್ಡಸೀಮಂ ವಾ ನದಿಂ ವಾ ಯಥಾನಿಸಿನ್ನಟ್ಠಾನೇಯೇವ ಅತ್ತನೋ ನಿಸ್ಸಿತಕಪರಿಸಾಯ ಸದ್ಧಿಂ ವುಟ್ಠಾಪೇನ್ತಿಯಾ ವಾಚಾಚಿತ್ತತೋ ಸಮುಟ್ಠಾತಿ, ಖಣ್ಡಸೀಮಂ ವಾ ನದಿಂ ವಾ ಗನ್ತ್ವಾ ವುಟ್ಠಾಪೇನ್ತಿಯಾ ಕಾಯವಾಚಾಚಿತ್ತತೋ ಸಮುಟ್ಠಾತೀ’’ತಿ (ಪಾಚಿ॰ ಅಟ್ಠ॰ ೬೮೩)। ಕ್ರಿಯಾಕ್ರಿಯನ್ತಿ ಅನಾಪುಚ್ಛಾವುಟ್ಠಾಪನವಸೇನ ಕಿರಿಯಾಕಿರಿಯಂ।
2032.Corivuṭṭhāpanaṃ nāmāti idaṃ sikkhāpadaṃ corivuṭṭhāpanasamuṭṭhānaṃ nāma. Vācacittatoti khaṇḍasīmaṃ agantvā karontiyā vācācittehi. Kāyavācādito cevāti gantvā karontiyā kāyavācācittato ca samuṭṭhāti. Yathāha ‘‘kenacideva karaṇīyena pakkantāsu bhikkhunīsu agantvā khaṇḍasīmaṃ vā nadiṃ vā yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti, khaṇḍasīmaṃ vā nadiṃ vā gantvā vuṭṭhāpentiyā kāyavācācittato samuṭṭhātī’’ti (pāci. aṭṭha. 683). Kriyākriyanti anāpucchāvuṭṭhāpanavasena kiriyākiriyaṃ.
ಚೋರಿವುಟ್ಠಾಪನಕಥಾವಣ್ಣನಾ।
Corivuṭṭhāpanakathāvaṇṇanā.
೨೦೩೩-೪. ಗಾಮನ್ತರನ್ತಿ ಅಞ್ಞಂ ಗಾಮಂ। ಯಾ ಏಕಾ ಸಚೇ ಗಚ್ಛೇಯ್ಯಾತಿ ಸಮ್ಬನ್ಧೋ। ನದೀಪಾರನ್ತಿ ಏತ್ಥಾಪಿ ಏಸೇವ ನಯೋ। ನದಿಯಾ ಪಾರಂ ನದೀಪಾರಂ। ‘‘ಏಕಾ ವಾ’’ತಿ ಉಪರಿಪಿ ಯೋಜೇತಬ್ಬಂ। ಓಹೀಯೇಯ್ಯಾತಿ ವಿನಾ ಭವೇಯ್ಯ। ಇಧ ‘‘ಅರಞ್ಞೇ’’ತಿ ಸೇಸೋ। ಅರಞ್ಞಲಕ್ಖಣಂ ‘‘ಇನ್ದಖೀಲ’’ಇಚ್ಚಾದಿನಾ ವಕ್ಖತಿ। ‘‘ಏಕಾ ವಾ ರತ್ತಿಂ ವಿಪ್ಪವಸೇಯ್ಯ, ಏಕಾ ವಾ ಗಣಮ್ಹಾ ಓಹೀಯೇಯ್ಯಾ’’ತಿ ಸಿಕ್ಖಾಪದಕ್ಕಮೋ, ಏವಂ ಸನ್ತೇಪಿ ಗಾಥಾಬನ್ಧವಸೇನ ‘‘ರತ್ತಿಂ ವಿಪ್ಪವಸೇಯ್ಯಾ’’ತಿ ಅನ್ತೇ ವುತ್ತಂ । ತೇನೇವ ವಿಭಾಗವಿನಿಚ್ಛಯೇ ದೇಸನಾರುಳ್ಹಕ್ಕಮೇನೇವ ‘‘ಪುರೇರುಣೋದಯಾಯೇವಾ’’ತಿಆದಿಂ ವಕ್ಖತಿ। ಸಾ ಪಠಮಾಪತ್ತಿಕಂ ಗರುಕಂ ಧಮ್ಮಂ ಆಪನ್ನಾ ಸಿಯಾತಿ ಯೋಜನಾ। ಪಠಮಂ ಆಪತ್ತಿ ಏತಸ್ಸಾತಿ ಪಠಮಾಪತ್ತಿಕೋ, ವೀತಿಕ್ಕಮಕ್ಖಣೇಯೇವ ಆಪಜ್ಜಿತಬ್ಬೋತಿ ಅತ್ಥೋ। ‘‘ಗರುಕಂ ಧಮ್ಮ’’ನ್ತಿ ಇಮಿನಾ ಸಮ್ಬನ್ಧೋ। ಸಕಗಾಮಾ ನಿಕ್ಖಮನ್ತಿಯಾತಿ ಭಿಕ್ಖುನಿಯಾ ಅತ್ತನೋ ವಸನಗಾಮತೋ ನಿಕ್ಖಮನ್ತಿಯಾ।
2033-4.Gāmantaranti aññaṃ gāmaṃ. Yā ekā sace gaccheyyāti sambandho. Nadīpāranti etthāpi eseva nayo. Nadiyā pāraṃ nadīpāraṃ. ‘‘Ekā vā’’ti uparipi yojetabbaṃ. Ohīyeyyāti vinā bhaveyya. Idha ‘‘araññe’’ti seso. Araññalakkhaṇaṃ ‘‘indakhīla’’iccādinā vakkhati. ‘‘Ekā vā rattiṃ vippavaseyya, ekā vā gaṇamhā ohīyeyyā’’ti sikkhāpadakkamo, evaṃ santepi gāthābandhavasena ‘‘rattiṃ vippavaseyyā’’ti ante vuttaṃ . Teneva vibhāgavinicchaye desanāruḷhakkameneva ‘‘pureruṇodayāyevā’’tiādiṃ vakkhati. Sā paṭhamāpattikaṃ garukaṃ dhammaṃ āpannā siyāti yojanā. Paṭhamaṃ āpatti etassāti paṭhamāpattiko, vītikkamakkhaṇeyeva āpajjitabboti attho. ‘‘Garukaṃ dhamma’’nti iminā sambandho. Sakagāmā nikkhamantiyāti bhikkhuniyā attano vasanagāmato nikkhamantiyā.
೨೦೩೫. ತತೋ ಸಕಗಾಮತೋ।
2035.Tato sakagāmato.
೨೦೩೬-೭. ಏಕೇನ ಪದವಾರೇನ ಇತರಸ್ಸ ಗಾಮಸ್ಸ ಪರಿಕ್ಖೇಪೇ ಅತಿಕ್ಕನ್ತೇ, ಉಪಚಾರೋಕ್ಕಮೇ ವಾ ಥುಲ್ಲಚ್ಚಯನ್ತಿ ಯೋಜನಾ। ಅತಿಕ್ಕನ್ತೇ ಓಕ್ಕನ್ತೇತಿ ಏತ್ಥ ‘‘ಪರಿಕ್ಖೇಪೇ ಉಪಚಾರೇ’’ತಿ ಅಧಿಕಾರತೋ ಲಬ್ಭತಿ।
2036-7. Ekena padavārena itarassa gāmassa parikkhepe atikkante, upacārokkame vā thullaccayanti yojanā. Atikkante okkanteti ettha ‘‘parikkhepe upacāre’’ti adhikārato labbhati.
೨೦೩೮-೯. ನಿಕ್ಖಮಿತ್ವಾತಿ ಅತ್ತನೋ ಪವಿಟ್ಠಗಾಮತೋ ನಿಕ್ಖಮಿತ್ವಾ। ಅಯಮೇವ ನಯೋತಿ ‘‘ಏಕೇನ ಪದವಾರೇನ ಥುಲ್ಲಚ್ಚಯಂ, ದುತಿಯೇನ ಗರುಕಾಪತ್ತೀ’’ತಿ ಅಯಂ ನಯೋ।
2038-9.Nikkhamitvāti attano paviṭṭhagāmato nikkhamitvā. Ayameva nayoti ‘‘ekena padavārena thullaccayaṃ, dutiyena garukāpattī’’ti ayaṃ nayo.
ವತಿಚ್ಛಿದ್ದೇನ ವಾ ಖಣ್ಡಪಾಕಾರೇನ ವಾತಿ ಯೋಜನಾ। ‘‘ತಥಾ’’ತಿ ಇಮಿನಾ ‘‘ಪಾಕಾರೇನಾ’’ತಿ ಏತ್ಥಾಪಿ ವಾ-ಸದ್ದಸ್ಸ ಸಮ್ಬನ್ಧನೀಯತಂ ದಸ್ಸೇತಿ। ‘‘ಭಿಕ್ಖುವಿಹಾರಸ್ಸ ಭೂಮಿ ತಾಸಮಕಪ್ಪಿಯಾ’’ತಿ ವಕ್ಖಮಾನತ್ತಾ ವಿಹಾರಸ್ಸ ಭೂಮಿನ್ತಿ ಭಿಕ್ಖುನಿವಿಹಾರಭೂಮಿ ಗಹಿತಾ। ‘‘ಕಪ್ಪಿಯನ್ತಿ ಪವಿಟ್ಠತ್ತಾ’’ತಿ ಇಮಿನಾ ವಕ್ಖಮಾನಸ್ಸ ಕಾರಣಂ ದಸ್ಸೇತಿ। ಕೋಚಿ ದೋಸೋತಿ ಥುಲ್ಲಚ್ಚಯಸಙ್ಘಾದಿಸೇಸೋ ವುಚ್ಚಮಾನೋ ಯೋ ಕೋಚಿ ದೋಸೋ।
Vaticchiddena vā khaṇḍapākārena vāti yojanā. ‘‘Tathā’’ti iminā ‘‘pākārenā’’ti etthāpi vā-saddassa sambandhanīyataṃ dasseti. ‘‘Bhikkhuvihārassa bhūmi tāsamakappiyā’’ti vakkhamānattā vihārassa bhūminti bhikkhunivihārabhūmi gahitā. ‘‘Kappiyanti paviṭṭhattā’’ti iminā vakkhamānassa kāraṇaṃ dasseti. Koci dosoti thullaccayasaṅghādiseso vuccamāno yo koci doso.
೨೦೪೦. ತಾಸನ್ತಿ ಭಿಕ್ಖುನೀನಂ। ‘‘ಅಕಪ್ಪಿಯಾ’’ತಿ ಇಮಿನಾ ತತ್ಥಾಪಿ ಪವಿಟ್ಠಾಯ ಗಾಮನ್ತರಪಚ್ಚಯಾ ಆಪತ್ತಿಸಮ್ಭವಮಾಹ।
2040.Tāsanti bhikkhunīnaṃ. ‘‘Akappiyā’’ti iminā tatthāpi paviṭṭhāya gāmantarapaccayā āpattisambhavamāha.
೨೦೪೧. ‘‘ಪಠಮಂ ಪಾದಂ ಅತಿಕ್ಕಾಮೇನ್ತಿಯಾ’’ತಿ (ಪಾಚಿ॰ ೬೯೨) ವುತ್ತತ್ತಾ ‘‘ಹತ್ಥಿ…ಪೇ॰… ಅನಾಪತ್ತಿ ಸಿಯಾಪತ್ತಿ, ಪದಸಾ ಗಮನೇ ಪನಾ’’ತಿ ವುತ್ತಂ।
2041. ‘‘Paṭhamaṃ pādaṃ atikkāmentiyā’’ti (pāci. 692) vuttattā ‘‘hatthi…pe… anāpatti siyāpatti, padasā gamane panā’’ti vuttaṃ.
೨೦೪೨. ‘‘ಯಂ ಕಿಞ್ಚಿ…ಪೇ॰… ಆಪತ್ತಿ ಪವಿಸನ್ತಿಯಾ’’ತಿ ವುತ್ತಸ್ಸೇವತ್ಥಸ್ಸ ಉಪಸಂಹಾರತ್ತಾ ನ ಪುನರುತ್ತಿದೋಸೋ।
2042.‘‘Yaṃ kiñci…pe… āpatti pavisantiyā’’ti vuttassevatthassa upasaṃhārattā na punaruttidoso.
೨೦೪೩-೪. ಲಕ್ಖಣೇನುಪಪನ್ನಾಯಾತಿ ‘‘ನದೀ ನಾಮ ತಿಮಣ್ಡಲಂ ಪಟಿಚ್ಛಾದೇತ್ವಾ ಯತ್ಥ ಕತ್ಥಚಿ ಉತ್ತರನ್ತಿಯಾ ಭಿಕ್ಖುನಿಯಾ ಅನ್ತರವಾಸಕೋ ತೇಮಿಯತೀ’’ತಿ (ಪಾಚಿ॰ ೬೯೨) ವುತ್ತಲಕ್ಖಣೇನ ಸಮನ್ನಾಗತಾಯ ನದಿಯಾ। ಯಾ ಪಾರಂ ತೀರಂ ಗಚ್ಛತೀತಿ ಯೋಜನಾ।
2043-4.Lakkhaṇenupapannāyāti ‘‘nadī nāma timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyatī’’ti (pāci. 692) vuttalakkhaṇena samannāgatāya nadiyā. Yā pāraṃ tīraṃ gacchatīti yojanā.
ಪಠಮಂ ಪಾದಂ ಉದ್ಧರಿತ್ವಾನ ತೀರೇ ಠಪೇನ್ತಿಯಾತಿ ‘‘ಇದಾನಿ ಪದವಾರೇನ ಅತಿಕ್ಕಮತೀ’’ತಿ ವತ್ತಬ್ಬಕಾಲೇ ಪಠಮಂ ಪಾದಂ ಉಕ್ಖಿಪಿತ್ವಾ ಪರತೀರೇ ಠಪೇನ್ತಿಯಾ। ‘‘ದುತಿಯಪಾದುದ್ಧಾರೇ ಸಙ್ಘಾದಿಸೇಸೋ’’ತಿ (ಪಾಚಿ॰ ಅಟ್ಠ॰ ೬೯೨) ಅಟ್ಠಕಥಾವಚನತೋ ‘‘ಅತಿಕ್ಕಮೇ’’ತಿ ಇಮಿನಾ ಉದ್ಧಾರೋ ಗಹಿತೋ।
Paṭhamaṃ pādaṃ uddharitvāna tīre ṭhapentiyāti ‘‘idāni padavārena atikkamatī’’ti vattabbakāle paṭhamaṃ pādaṃ ukkhipitvā paratīre ṭhapentiyā. ‘‘Dutiyapāduddhāre saṅghādiseso’’ti (pāci. aṭṭha. 692) aṭṭhakathāvacanato ‘‘atikkame’’ti iminā uddhāro gahito.
೨೦೪೫. ಅನ್ತರನದಿಯನ್ತಿ ನದಿವೇಮಜ್ಝೇ। ಭಣ್ಡಿತ್ವಾತಿ ಕಲಹಂ ಕತ್ವಾ। ಓರಿಮಂ ತೀರನ್ತಿ ಆಗತದಿಸಾಯ ತೀರಂ। ತಥಾ ಪಠಮೇ ಥುಲ್ಲಚ್ಚಯಂ , ದುತಿಯೇ ಗರು ಹೋತೀತಿ ಅತ್ಥೋ। ಇಮಿನಾ ಸಕಲೇನ ವಚನೇನ ‘‘ಇತರಿಸ್ಸಾ ಪನ ಅಯಂ ಪಕ್ಕನ್ತಟ್ಠಾನೇ ಠಿತಾ ಹೋತಿ, ತಸ್ಮಾ ಪರತೀರಂ ಗಚ್ಛನ್ತಿಯಾಪಿ ಅನಾಪತ್ತೀ’’ತಿ ಅಟ್ಠಕಥಾಪಿ ಉಲ್ಲಿಙ್ಗಿತಾ।
2045.Antaranadiyanti nadivemajjhe. Bhaṇḍitvāti kalahaṃ katvā. Orimaṃ tīranti āgatadisāya tīraṃ. Tathā paṭhame thullaccayaṃ , dutiye garu hotīti attho. Iminā sakalena vacanena ‘‘itarissā pana ayaṃ pakkantaṭṭhāne ṭhitā hoti, tasmā paratīraṃ gacchantiyāpi anāpattī’’ti aṭṭhakathāpi ulliṅgitā.
೨೦೪೬. ರಜ್ಜುಯಾತಿ ವಲ್ಲಿಆದಿಕಾಯ ಯಾಯ ಕಾಯಚಿ ರಜ್ಜುಯಾ।
2046.Rajjuyāti valliādikāya yāya kāyaci rajjuyā.
೨೦೪೭. ಪಿವಿತುನ್ತಿ ಏತ್ಥ ‘‘ಪಾನೀಯ’’ನ್ತಿ ಪಕರಣತೋ ಲಬ್ಭತಿ। ಅವುತ್ತಸಮುಚ್ಚಯತ್ಥೇನ ಅಪಿ-ಸದ್ದೇನ ಭಣ್ಡಧೋವನಾದಿಂ ಸಙ್ಗಣ್ಹಾತಿ। ಅಥಾತಿ ವಾಕ್ಯಾರಮ್ಭೇ ನಿಪಾತೋ। ‘‘ನಹಾನಾದಿಕಿಚ್ಚಂ ಸಮ್ಪಾದೇತ್ವಾ ಓರಿಮಮೇವ ತೀರಂ ಆಗಮಿಸ್ಸಾಮೀ’’ತಿ ಆಲಯಸ್ಸ ವಿಜ್ಜಮಾನತ್ತಾ ಆಹ ‘‘ವಟ್ಟತೀ’’ತಿ।
2047.Pivitunti ettha ‘‘pānīya’’nti pakaraṇato labbhati. Avuttasamuccayatthena api-saddena bhaṇḍadhovanādiṃ saṅgaṇhāti. Athāti vākyārambhe nipāto. ‘‘Nahānādikiccaṃ sampādetvā orimameva tīraṃ āgamissāmī’’ti ālayassa vijjamānattā āha ‘‘vaṭṭatī’’ti.
೨೦೪೮. ಪದಸಾನದಿಂ ಓತರಿತ್ವಾನಾತಿ ಯೋಜನಾ। ಸೇತುಂ ಆರೋಹಿತ್ವಾ ತಥಾ ಪದಸಾ ಉತ್ತರನ್ತಿಯಾ ಅನಾಪತ್ತೀತಿ ಯೋಜನಾ।
2048. Padasānadiṃ otaritvānāti yojanā. Setuṃ ārohitvā tathā padasā uttarantiyā anāpattīti yojanā.
೨೦೪೯. ಗನ್ತ್ವಾನಾತಿ ಏತ್ಥ ‘‘ನದಿ’’ನ್ತಿ ಸೇಸೋ। ಉತ್ತರಣಕಾಲೇ ಪದಸಾ ಯಾತೀತಿ ಯೋಜನಾ।
2049.Gantvānāti ettha ‘‘nadi’’nti seso. Uttaraṇakāle padasā yātīti yojanā.
೨೦೫೦. ವೇಗೇನಾತಿ ಏಕೇನೇವ ವೇಗೇನ, ಅನ್ತರಾ ಅನಿವತ್ತಿತ್ವಾತಿ ಅತ್ಥೋ।
2050.Vegenāti ekeneva vegena, antarā anivattitvāti attho.
೨೦೫೧. ‘‘ನಿಸೀದಿತ್ವಾ’’ತಿ ಇದಂ ‘‘ಖನ್ಧೇ ವಾ’’ತಿಆದೀಹಿಪಿ ಯೋಜೇತಬ್ಬಂ। ಖನ್ಧಾದಯೋ ಚೇತ್ಥ ಸಭಾಗಾನಮೇವ ಗಹೇತಬ್ಬಾ। ಹತ್ಥಸಙ್ಘಾತನೇ ವಾತಿ ಉಭೋಹಿ ಬದ್ಧಹತ್ಥವಲಯೇ ವಾ।
2051.‘‘Nisīditvā’’ti idaṃ ‘‘khandhe vā’’tiādīhipi yojetabbaṃ. Khandhādayo cettha sabhāgānameva gahetabbā. Hatthasaṅghātane vāti ubhohi baddhahatthavalaye vā.
೨೦೫೨-೩. ಪಾಸನ್ತಿ ಹತ್ಥಪಾಸಂ। ‘‘ಆಭೋಗಂ ವಿನಾ’’ತಿ ಇಮಿನಾ ‘‘ಗಮಿಸ್ಸಾಮೀ’’ತಿ ಆಭೋಗೇ ಕತೇ ಅಜಾನನ್ತಿಯಾ ಅರುಣೇ ಉಟ್ಠಿತೇಪಿ ಅನಾಪತ್ತೀತಿ ದೀಪಿತಂ ಹೋತಿ। ಯಥಾಹ ‘‘ಸಚೇ ಸಜ್ಝಾಯಂ ವಾ ಸವನಂ ವಾ ಅಞ್ಞಂ ವಾ ಕಿಞ್ಚಿ ಕಮ್ಮಂ ಕುರುಮಾನಾ ‘ಪುರೇಅರುಣೇಯೇವ ದುತಿಯಿಕಾಯ ಸನ್ತಿಕಂ ಗಮಿಸ್ಸಾಮೀ’ತಿ ಆಭೋಗಂ ಕರೋತಿ, ಅಜಾನನ್ತಿಯಾ ಏವ ಚಸ್ಸಾ ಅರುಣೋ ಉಗ್ಗಚ್ಛತಿ, ಅನಾಪತ್ತೀ’’ತಿ (ಪಾಚಿ॰ ಅಟ್ಠ॰ ೬೯೨)। ನಾನಾಗಬ್ಭೇ ವತ್ತಬ್ಬಮೇವ ನತ್ಥೀತಿ ದಸ್ಸೇತುಮಾಹ ‘‘ಏಕಗಬ್ಭೇಪಿ ವಾ’’ತಿ। ಏಕಗಬ್ಭೇಪಿ ವಾ ದುತಿಯಿಕಾಯ ಹತ್ಥಪಾಸಂ ಅತಿಕ್ಕಮ್ಮ ಅರುಣಂ ಉಟ್ಠಪೇನ್ತಿಯಾ ಭಿಕ್ಖುನಿಯಾ ಆಪತ್ತಿ ಸಿಯಾತಿ ಯೋಜನಾ।
2052-3.Pāsanti hatthapāsaṃ. ‘‘Ābhogaṃ vinā’’ti iminā ‘‘gamissāmī’’ti ābhoge kate ajānantiyā aruṇe uṭṭhitepi anāpattīti dīpitaṃ hoti. Yathāha ‘‘sace sajjhāyaṃ vā savanaṃ vā aññaṃ vā kiñci kammaṃ kurumānā ‘purearuṇeyeva dutiyikāya santikaṃ gamissāmī’ti ābhogaṃ karoti, ajānantiyā eva cassā aruṇo uggacchati, anāpattī’’ti (pāci. aṭṭha. 692). Nānāgabbhe vattabbameva natthīti dassetumāha ‘‘ekagabbhepi vā’’ti. Ekagabbhepi vā dutiyikāya hatthapāsaṃ atikkamma aruṇaṃ uṭṭhapentiyā bhikkhuniyā āpatti siyāti yojanā.
೨೦೫೪. ದುತಿಯಾಪಾಸನ್ತಿ ದುತಿಯಿಕಾಯ ಹತ್ಥಪಾಸಂ। ‘‘ಗಮಿಸ್ಸಾಮೀ’’ತಿ ಆಭೋಗಂ ಕತ್ವಾ ಗಚ್ಛನ್ತಿಯಾ ಸಚೇ ಅರುಣಂ ಉಟ್ಠೇತಿ, ನ ದೋಸೋತಿ ಯೋಜನಾ।
2054.Dutiyāpāsanti dutiyikāya hatthapāsaṃ. ‘‘Gamissāmī’’ti ābhogaṃ katvā gacchantiyā sace aruṇaṃ uṭṭheti, na dosoti yojanā.
೨೦೫೫-೬. ಅಞ್ಞತ್ಥ ಪಞ್ಚಧನುಸತಿಕಸ್ಸ (ಪಾರಾ॰ ೬೫೪) ಪಚ್ಛಿಮಸ್ಸ ಆರಞ್ಞಕಸೇನಾಸನಸ್ಸ ವುತ್ತತ್ತಾ ತತೋ ನಿವತ್ತೇತುಮಾಹ ‘‘ಇನ್ದಖೀಲಮತಿಕ್ಕಮ್ಮಾ’’ತಿಆದಿ। ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ। ದೀಪಿತನ್ತಿ ಅಟ್ಠಕಥಾಯ ‘‘ಅರಞ್ಞೇತಿ ಏತ್ಥ ನಿಕ್ಖಮಿತ್ವಾ ಬಹಿ ಇನ್ದಖೀಲಾ ಸಬ್ಬಮೇತಂ ಅರಞ್ಞ’’ನ್ತಿ (ಪಾಚಿ॰ ಅಟ್ಠ॰ ೬೯೨) ಏವಂ ವುತ್ತಲಕ್ಖಣಮೇವ ಅರಞ್ಞಂ ದಸ್ಸಿತನ್ತಿ ಅತ್ಥೋ।
2055-6. Aññattha pañcadhanusatikassa (pārā. 654) pacchimassa āraññakasenāsanassa vuttattā tato nivattetumāha ‘‘indakhīlamatikkammā’’tiādi. Etthāti imasmiṃ sikkhāpade. Dīpitanti aṭṭhakathāya ‘‘araññeti ettha nikkhamitvā bahi indakhīlā sabbametaṃ arañña’’nti (pāci. aṭṭha. 692) evaṃ vuttalakkhaṇameva araññaṃ dassitanti attho.
ದುತಿಯಿಕಾಯ ದಸ್ಸನೂಪಚಾರಂ ವಿಜಹನ್ತಿಯಾ ತಸ್ಸಾತಿ ಯೋಜನಾ। ‘‘ಜಹಿತೇ’’ತಿ ಇದಂ ಅಪೇಕ್ಖಿತ್ವಾ ‘‘ಉಪಚಾರೇ’’ತಿ ವಿಭತ್ತಿವಿಪರಿಣಾಮೋ ಕಾತಬ್ಬೋ।
Dutiyikāya dassanūpacāraṃ vijahantiyā tassāti yojanā. ‘‘Jahite’’ti idaṃ apekkhitvā ‘‘upacāre’’ti vibhattivipariṇāmo kātabbo.
೨೦೫೭. ಸಾಣಿಪಾಕಾರಪಾಕಾರತರುಅನ್ತರಿತೇ ಠಾನೇ ಅಸತಿ ದಸ್ಸನೂಪಚಾರೇ ಸತಿಪಿ ಸವನೂಪಚಾರೇ ಆಪತ್ತಿ ಹೋತೀತಿ ಯೋಜನಾ।
2057.Sāṇipākārapākārataruantarite ṭhāne asati dassanūpacāre satipi savanūpacāre āpatti hotīti yojanā.
೨೦೫೮-೬೦. ಏತ್ಥ ಕಥನ್ತಿ ಯತ್ಥ ದೂರೇಪಿ ದಸ್ಸನಂ ಹೋತಿ, ಏವರೂಪೇ ಅಜ್ಝೋಕಾಸೇ ಆಪತ್ತಿನಿಯಮೋ ಕಥಂ ಕಾತಬ್ಬೋತಿ ಅತ್ಥೋ। ಅನೇಕೇಸು ಠಾನೇಸು ‘‘ಸವನೂಪಚಾರಾತಿಕ್ಕಮೇ’’ತಿ ವುಚ್ಚಮಾನತ್ತಾ ತತ್ಥ ಲಕ್ಖಣಂ ಠಪೇತುಮಾಹ ‘‘ಮಗ್ಗ…ಪೇ॰… ಏವರೂಪಕೇ’’ತಿ। ಏತ್ಥ ‘‘ಠಾನೇ’’ತಿ ಸೇಸೋ। ಕೂಜನ್ತಿಯಾತಿ ಯಥಾವಣ್ಣವವತ್ಥಾನಂ ನ ಹೋತಿ, ಏವಂ ಅಬ್ಯತ್ತಸದ್ದಂ ಕರೋನ್ತಿಯಾ।
2058-60.Ettha kathanti yattha dūrepi dassanaṃ hoti, evarūpe ajjhokāse āpattiniyamo kathaṃ kātabboti attho. Anekesu ṭhānesu ‘‘savanūpacārātikkame’’ti vuccamānattā tattha lakkhaṇaṃ ṭhapetumāha ‘‘magga…pe… evarūpake’’ti. Ettha ‘‘ṭhāne’’ti seso. Kūjantiyāti yathāvaṇṇavavatthānaṃ na hoti, evaṃ abyattasaddaṃ karontiyā.
ಏವರೂಪಕೇ ಠಾನೇ ಧಮ್ಮಸ್ಸವನಾರೋಚನೇ ವಿಯ ಚ ಮಗ್ಗಮೂಳ್ಹಸ್ಸ ಸದ್ದೇನ ವಿಯ ಚ ‘‘ಅಯ್ಯೇ’’ತಿ ಕೂಜನ್ತಿಯಾ ತಸ್ಸಾ ಸದ್ದಸ್ಸ ಸವನಾತಿಕ್ಕಮೇ ಭಿಕ್ಖುನಿಯಾ ಗರುಕಾ ಆಪತ್ತಿ ಹೋತೀತಿ ಯೋಜನಾ। ‘‘ಭಿಕ್ಖುನಿಯಾ ಗರುಕಾ ಹೋತೀ’’ತಿ ಇದಂ ‘‘ದುತಿಯಿಕಂ ನ ಪಾಪುಣಿಸ್ಸಾಮೀ’’ತಿ ನಿರುಸ್ಸಾಹವಸೇನ ವೇದಿತಬ್ಬಂ। ತೇನೇವ ವಕ್ಖತಿ ‘‘ಓಹೀಯಿತ್ವಾಥ ಗಚ್ಛನ್ತೀ’’ತಿಆದಿ। ಏತ್ಥಾತಿ ‘‘ಗಣಮ್ಹಾ ಓಹೀಯೇಯ್ಯಾ’’ತಿ ಇಮಸ್ಮಿಂ।
Evarūpake ṭhāne dhammassavanārocane viya ca maggamūḷhassa saddena viya ca ‘‘ayye’’ti kūjantiyā tassā saddassa savanātikkame bhikkhuniyā garukā āpatti hotīti yojanā. ‘‘Bhikkhuniyā garukā hotī’’ti idaṃ ‘‘dutiyikaṃ na pāpuṇissāmī’’ti nirussāhavasena veditabbaṃ. Teneva vakkhati ‘‘ohīyitvātha gacchantī’’tiādi. Etthāti ‘‘gaṇamhā ohīyeyyā’’ti imasmiṃ.
೨೦೬೧. ಅಥ ಗಚ್ಛನ್ತೀ ಓಹೀಯಿತ್ವಾತಿ ಯೋಜನಾ। ‘‘ಇದಾನಿ ಅಹಂ ಪಾಪುಣಿಸ್ಸಾಮಿ’’ ಇತಿ ಏವಂ ಸಉಸ್ಸಾಹಾ ಅನುಬನ್ಧತಿ, ವಟ್ಟತಿ, ದುತಿಯೋಪಚಾರಾತಿಕ್ಕಮೇಪಿ ಅನಾಪತ್ತೀತಿ ವುತ್ತಂ ಹೋತಿ।
2061. Atha gacchantī ohīyitvāti yojanā. ‘‘Idāni ahaṃ pāpuṇissāmi’’ iti evaṃ saussāhā anubandhati, vaṭṭati, dutiyopacārātikkamepi anāpattīti vuttaṃ hoti.
೨೦೬೨. ‘‘ಗಚ್ಛತು ಅಯಂ’’ ಇತಿ ಉಸ್ಸಾಹಸ್ಸಚ್ಛೇದಂ ಕತ್ವಾ ಓಹೀನಾ ಚೇ, ತಸ್ಸಾ ಆಪತ್ತೀತಿ ಅಜ್ಝಾಹಾರಯೋಜನಾ।
2062. ‘‘Gacchatu ayaṃ’’ iti ussāhassacchedaṃ katvā ohīnā ce, tassā āpattīti ajjhāhārayojanā.
೨೦೬೩. ಇತರಾಪೀತಿ ಗನ್ತುಂ ಸಮತ್ಥಾಪಿ। ಓಹೀಯತು ಅಯನ್ತಿ ಚಾತಿ ನಿರುಸ್ಸಾಹಪ್ಪಕಾರೋ ಸನ್ದಸ್ಸಿತೋ। ವುತ್ತತ್ಥಮೇವ ಸಮತ್ಥಯಿತುಮಾಹ ‘‘ಸಉಸ್ಸಾಹಾ ನ ಹೋತಿ ಚೇ’’ತಿ।
2063.Itarāpīti gantuṃ samatthāpi. Ohīyatu ayanti cāti nirussāhappakāro sandassito. Vuttatthameva samatthayitumāha ‘‘saussāhā na hoti ce’’ti.
೨೦೬೪-೫. ಪುರಿಮಾ ಏಕಕಂ ಮಗ್ಗಂ ಯಾತೀತಿ ಯೋಜನಾ। ಏಕಮೇವ ಏಕಕಂ। ತಸ್ಮಾತಿ ಯಸ್ಮಾ ಏಕಿಸ್ಸಾ ಇತರಾ ಪಕ್ಕನ್ತಟ್ಠಾನೇ ತಿಟ್ಠತಿ, ತಸ್ಮಾ। ತತ್ಥಾತಿ ತಸ್ಮಿಂ ಗಣಮ್ಹಾಓಹೀಯನೇ। ಪಿ-ಸದ್ದೋ ಏವಕಾರತ್ಥೋ। ಅನಾಪತ್ತಿ ಏವ ಪಕಾಸಿತಾತಿ ಯೋಜನಾ।
2064-5. Purimā ekakaṃ maggaṃ yātīti yojanā. Ekameva ekakaṃ. Tasmāti yasmā ekissā itarā pakkantaṭṭhāne tiṭṭhati, tasmā. Tatthāti tasmiṃ gaṇamhāohīyane. Pi-saddo evakārattho. Anāpatti eva pakāsitāti yojanā.
೨೦೬೬-೭. ಗಾಮನ್ತರಗತಾಯಾತಿ ಗಾಮಸೀಮಗತಾಯ। ‘‘ನದಿಯಾ’’ತಿ ಇಮಿನಾ ಸಮ್ಬನ್ಧೋ। ಆಪತ್ತಿಯೋಚತಸ್ಸೋಪೀತಿ ರತ್ತಿವಿಪ್ಪವಾಸ ಗಾಮನ್ತರಗಮನ ನದಿಪಾರಗಮನ ಗಣಮ್ಹಾಓಹೀಯನ ಸಙ್ಖಾತಾ ಚತಸ್ಸೋ ಸಙ್ಘಾದಿಸೇಸಾಪತ್ತಿಯೋ। ಗಣಮ್ಹಾಓಹೀಯನಮೂಲಕಾಪತ್ತಿಯಾ ಗಾಮತೋ ಬಹಿ ಆಪಜ್ಜಿತಬ್ಬತ್ತೇಪಿ ಗಾಮನ್ತರೋಕ್ಕಮನಮೂಲಕಾಪತ್ತಿಯಾ ಅನ್ತೋಗಾಮೇ ಆಪಜ್ಜಿತಬ್ಬತ್ತೇಪಿ ಏಕಕ್ಖಣೇತಿ ಗಾಮೂಪಚಾರಂ ಸನ್ಧಾಯಾಹ।
2066-7.Gāmantaragatāyāti gāmasīmagatāya. ‘‘Nadiyā’’ti iminā sambandho. Āpattiyocatassopīti rattivippavāsa gāmantaragamana nadipāragamana gaṇamhāohīyana saṅkhātā catasso saṅghādisesāpattiyo. Gaṇamhāohīyanamūlakāpattiyā gāmato bahi āpajjitabbattepi gāmantarokkamanamūlakāpattiyā antogāme āpajjitabbattepi ekakkhaṇeti gāmūpacāraṃ sandhāyāha.
೨೦೬೮-೯. ಯಾ ಸದ್ಧಿಂ ಯಾತಾ ದುತಿಯಿಕಾ, ಸಾ ಚ ಪಕ್ಕನ್ತಾ ವಾ ಸಚೇ ಹೋತಿ, ವಿಬ್ಭನ್ತಾ ವಾ ಹೋತಿ, ಪೇತಾನಂ ಲೋಕಂ ಯಾತಾ ವಾ ಹೋತಿ, ಕಾಲಕತಾ ವಾ ಹೋತೀತಿ ಅಧಿಪ್ಪಾಯೋ, ಪಕ್ಖಸಙ್ಕನ್ತಾ ವಾ ಹೋತಿ, ತಿತ್ಥಾಯತನಸಙ್ಕನ್ತಾ ವಾ ಹೋತೀತಿ ಅಧಿಪ್ಪಾಯೋ, ನಟ್ಠಾ ವಾ ಹೋತಿ, ಪಾರಾಜಿಕಾಪನ್ನಾ ವಾ ಹೋತೀತಿ ಅಧಿಪ್ಪಾಯೋ। ಏವರೂಪೇ ಕಾಲೇ ಗಾಮನ್ತರೋಕ್ಕಮನಾದೀನಿ…ಪೇ॰… ಅನಾಪತ್ತೀತಿ ಞಾತಬ್ಬನ್ತಿ ಯೋಜನಾ। ಉಮ್ಮತ್ತಿಕಾಯಪಿ ಏವಂ ಚತ್ತಾರಿಪಿ ಕರೋನ್ತಿಯಾ ಅನಾಪತ್ತೀತಿ ಯೋಜನಾ।
2068-9. Yā saddhiṃ yātā dutiyikā, sā ca pakkantā vā sace hoti, vibbhantā vā hoti, petānaṃ lokaṃ yātā vā hoti, kālakatā vā hotīti adhippāyo, pakkhasaṅkantā vā hoti, titthāyatanasaṅkantā vā hotīti adhippāyo, naṭṭhā vā hoti, pārājikāpannā vā hotīti adhippāyo. Evarūpe kāle gāmantarokkamanādīni…pe… anāpattīti ñātabbanti yojanā. Ummattikāyapi evaṃ cattāripi karontiyā anāpattīti yojanā.
೨೦೭೦. ‘‘ಅಗಾಮಕೇ ಅರಞ್ಞೇ’’ತಿ ಇದಂ ಗಾಮಾಭಾವೇನ ವುತ್ತಂ, ನ ವಿಞ್ಝಾಟವಿಸದಿಸತಾಯ।
2070.‘‘Agāmake araññe’’ti idaṃ gāmābhāvena vuttaṃ, na viñjhāṭavisadisatāya.
೨೦೭೧. ಗಾಮಭಾವತೋ ನದಿಪಾರಗಮನಗಣಮ್ಹಾಓಹೀಯನಾಪತ್ತಿ ನ ಸಮ್ಭವತಿ, ತಸ್ಸಾಪಿ ಸಕಗಾಮತ್ತಾ ಗಾಮನ್ತರಗಮನಮೂಲಿಕಾಪತ್ತಿ ಚ ದಿವಸಭಾಗತ್ತಾ ರತ್ತಿವಿಪ್ಪವಾಸಮೂಲಿಕಾಪತ್ತಿ ಚ ನ ಸಮ್ಭವತೀತಿ ಆಹ ‘‘ಸಕಗಾಮೇ…ಪೇ॰… ನ ವಿಜ್ಜರೇ’’ತಿ। ಯಥಾಕಾಮನ್ತಿ ಯಥಿಚ್ಛಿತಂ, ದುತಿಯಿಕಾಯ ಅಸನ್ತಿಯಾಪೀತಿ ಅತ್ಥೋ।
2071. Gāmabhāvato nadipāragamanagaṇamhāohīyanāpatti na sambhavati, tassāpi sakagāmattā gāmantaragamanamūlikāpatti ca divasabhāgattā rattivippavāsamūlikāpatti ca na sambhavatīti āha ‘‘sakagāme…pe… na vijjare’’ti. Yathākāmanti yathicchitaṃ, dutiyikāya asantiyāpīti attho.
೨೦೭೨. ಸಮುಟ್ಠಾನಾದಯೋ ಪಠಮನ್ತಿಮವತ್ಥುನಾ ತುಲ್ಯಾತಿ ಯೋಜನಾ।
2072. Samuṭṭhānādayo paṭhamantimavatthunā tulyāti yojanā.
ಗಾಮನ್ತರಗಮನಕಥಾವಣ್ಣನಾ।
Gāmantaragamanakathāvaṇṇanā.
೨೦೭೩. ಸೀಮಾಸಮ್ಮುತಿಯಾ ಚೇವಾತಿ ‘‘ಸಮಗ್ಗೇನ ಸಙ್ಘೇನ ಧಮ್ಮೇನ ವಿನಯೇನ ಉಕ್ಖಿತ್ತಂ ಭಿಕ್ಖುನಿಂ ಕಾರಕಸಙ್ಘಂ ಅನಾಪುಚ್ಛಾ ತಸ್ಸೇವ ಕಾರಕಸಙ್ಘಸ್ಸ ಛನ್ದಂ ಅಜಾನಿತ್ವಾ ಓಸಾರೇಸ್ಸಾಮೀ’’ತಿ ನವಸೀಮಾಸಮ್ಮನ್ನನೇ ಚ। ದ್ವೀಹಿ ಕಮ್ಮವಾಚಾಹಿ ದುವೇ ಥುಲ್ಲಚ್ಚಯಾ ಹೋನ್ತೀತಿ ಯೋಜನಾ।
2073.Sīmāsammutiyā cevāti ‘‘samaggena saṅghena dhammena vinayena ukkhittaṃ bhikkhuniṃ kārakasaṅghaṃ anāpucchā tasseva kārakasaṅghassa chandaṃ ajānitvā osāressāmī’’ti navasīmāsammannane ca. Dvīhi kammavācāhi duve thullaccayā hontīti yojanā.
೨೦೭೪. ಕಮ್ಮಸ್ಸ ಪರಿಯೋಸಾನೇತಿ ಓಸಾರಣಕಮ್ಮಸ್ಸ ಅವಸಾನೇ। ತಿಕಸಙ್ಘಾದಿಸೇಸನ್ತಿ ‘‘ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸ। ಧಮ್ಮಕಮ್ಮೇ ವೇಮತಿಕಾ, ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸಾ’’ತಿ (ಪಾಚಿ॰ ೬೯೭) ತಿಕಸಙ್ಘಾದಿಸೇಸಂ ವುತ್ತಂ। ಕಮ್ಮನ್ತಿ ಚ ಉಕ್ಖೇಪನೀಯಕಮ್ಮಂ। ಅಧಮ್ಮೇ ತಿಕದುಕ್ಕಟನ್ತಿ ‘‘ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ವೇಮತಿಕಾ, ಅಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ದುಕ್ಕಟಸ್ಸಾ’’ತಿ ತಿಕದುಕ್ಕಟಂ ವುತ್ತಂ।
2074.Kammassapariyosāneti osāraṇakammassa avasāne. Tikasaṅghādisesanti ‘‘dhammakamme dhammakammasaññā osāreti, āpatti saṅghādisesassa. Dhammakamme vematikā, dhammakamme adhammakammasaññā osāreti, āpatti saṅghādisesassā’’ti (pāci. 697) tikasaṅghādisesaṃ vuttaṃ. Kammanti ca ukkhepanīyakammaṃ. Adhamme tikadukkaṭanti ‘‘adhammakamme dhammakammasaññā osāreti, āpatti dukkaṭassa. Adhammakamme vematikā, adhammakammasaññā osāreti, āpatti dukkaṭassā’’ti tikadukkaṭaṃ vuttaṃ.
೨೦೭೫. ಗಣಸ್ಸಾತಿ ತಸ್ಸೇವ ಕಾರಕಗಣಸ್ಸ। ವತ್ತೇ ವಾ ಪನ ವತ್ತನ್ತಿನ್ತಿ ತೇಚತ್ತಾಲೀಸಪ್ಪಭೇದೇ ನೇತ್ತಾರವತ್ತೇ ವತ್ತಮಾನಂ। ತೇಚತ್ತಾಲೀಸಪ್ಪಭೇದಂ ಪನ ವತ್ತಕ್ಖನ್ಧಕೇ (ಚೂಳವ॰ ೩೭೬) ಆವಿ ಭವಿಸ್ಸತಿ। ನೇತ್ತಾರವತ್ತೇತಿ ಕಮ್ಮತೋ ನಿತ್ಥರಣಸ್ಸ ಹೇತುಭೂತೇ ವತ್ತೇ।
2075.Gaṇassāti tasseva kārakagaṇassa. Vatte vā pana vattantinti tecattālīsappabhede nettāravatte vattamānaṃ. Tecattālīsappabhedaṃ pana vattakkhandhake (cūḷava. 376) āvi bhavissati. Nettāravatteti kammato nittharaṇassa hetubhūte vatte.
೨೦೭೭. ಓಸಾರಣಂ ಕ್ರಿಯಂ। ಅನಾಪುಚ್ಛನಂ ಅಕ್ರಿಯಂ।
2077. Osāraṇaṃ kriyaṃ. Anāpucchanaṃ akriyaṃ.
ಚತುತ್ಥಂ।
Catutthaṃ.
೨೦೭೮-೯. ಅವಸ್ಸುತಾತಿ ಮೇಥುನರಾಗೇನ ತಿನ್ತಾ। ಏವಮುಪರಿಪಿ। ‘‘ಮನುಸ್ಸಪುಗ್ಗಲಸ್ಸಾ’’ತಿ ಇಮಿನಾ ಯಕ್ಖಾದೀನಂ ಪಟಿಕ್ಖೇಪೋ। ‘‘ಉದಕೇ…ಪೇ॰… ದುಕ್ಕಟ’’ನ್ತಿ ವಕ್ಖಮಾನತ್ತಾ ಆಮಿಸನ್ತಿ ಅಞ್ಞತ್ರ ದನ್ತಪೋನಾ ಅಜ್ಝೋಹರಣೀಯಸ್ಸ ಗಹಣಂ। ಪಯೋಗತೋತಿ ಪಯೋಗಗಣನಾಯ।
2078-9.Avassutāti methunarāgena tintā. Evamuparipi. ‘‘Manussapuggalassā’’ti iminā yakkhādīnaṃ paṭikkhepo. ‘‘Udake…pe… dukkaṭa’’nti vakkhamānattā āmisanti aññatra dantaponā ajjhoharaṇīyassa gahaṇaṃ. Payogatoti payogagaṇanāya.
೨೦೮೦. ಏಕತೋವಸ್ಸುತೇತಿ ಪುಮಿತ್ಥಿಯಾ ಸಾಮಞ್ಞೇನ ಪುಲ್ಲಿಙ್ಗನಿದ್ದೇಸೋ। ಕಥಮೇತಂ ವಿಞ್ಞಾಯತೀತಿ? ‘‘ಏಕತೋಅವಸ್ಸುತೇತಿ ಏತ್ಥ ಭಿಕ್ಖುನಿಯಾ ಅವಸ್ಸುತಭಾವೋ ದಟ್ಠಬ್ಬೋತಿ ಮಹಾಪಚ್ಚರಿಯಂ ವುತ್ತಂ। ಮಹಾಅಟ್ಠಕಥಾಯಂ ಪನೇತಂ ನ ವುತ್ತಂ, ತಂ ಪಾಳಿಯಾ ಸಮೇತೀ’’ತಿ (ಪಾಚಿ॰ ಅಟ್ಠ॰ ೭೦೧) ವುತ್ತತ್ತಾ ವಿಞ್ಞಾಯತಿ। ಏತ್ಥ ಚ ಏತಂ ನ ವುತ್ತನ್ತಿ ‘‘ಭಿಕ್ಖುನಿಯಾ ಅವಸ್ಸುತಭಾವೋ ದಟ್ಠಬ್ಬೋ’’ತಿ ಏತಂ ನಿಯಮನಂ ನ ವುತ್ತಂ। ತನ್ತಿ ತಂ ನಿಯಮೇತ್ವಾ ಅವಚನಂ। ಪಾಳಿಯಾ ಸಮೇತೀತಿ ‘‘ಏಕತೋಅವಸ್ಸುತೇ’’ತಿ (ಪಾಚಿ॰ ೭೦೧-೭೦೨) ಅವಿಸೇಸೇತ್ವಾ ವುತ್ತಪಾಳಿಯಾ, ‘‘ಅನವಸ್ಸುತೋತಿ ಜಾನನ್ತೀ ಪಟಿಗ್ಗಣ್ಹಾತೀ’’ತಿ (ಪಾಚಿ॰ ೭೦೩) ಇಮಾಯ ಚ ಪಾಳಿಯಾ ಸಮೇತಿ। ಯದಿ ಹಿ ಪುಗ್ಗಲಸ್ಸ ಅವಸ್ಸುತಭಾವೋ ನಪ್ಪಮಾಣಂ, ಕಿಂ ‘‘ಅನವಸ್ಸುತೋತಿ ಜಾನನ್ತೀ’’ತಿ ಇಮಿನಾ ವಚನೇನ। ‘‘ಅನಾಪತ್ತಿ ಉಭೋ ಅನವಸ್ಸುತಾ ಹೋನ್ತಿ, ಅನವಸ್ಸುತಾ ಪಟಿಗ್ಗಣ್ಹಾತೀ’’ತಿ ಏತ್ತಕಮೇವ ವತ್ತಬ್ಬಂ ಸಿಯಾ। ಅಜ್ಝೋಹಾರಪಯೋಗೇಸು ಬಹೂಸು ಥುಲ್ಲಚ್ಚಯಚಯೋ ಥುಲ್ಲಚ್ಚಯಾನಂ ಸಮೂಹೋ ಸಿಯಾ, ಪಯೋಗಗಣನಾಯ ಬಹೂನಿ ಥುಲ್ಲಚ್ಚಯಾನಿ ಹೋನ್ತೀತಿ ಅಧಿಪ್ಪಾಯೋ।
2080.Ekatovassuteti pumitthiyā sāmaññena pulliṅganiddeso. Kathametaṃ viññāyatīti? ‘‘Ekatoavassuteti ettha bhikkhuniyā avassutabhāvo daṭṭhabboti mahāpaccariyaṃ vuttaṃ. Mahāaṭṭhakathāyaṃ panetaṃ na vuttaṃ, taṃ pāḷiyā sametī’’ti (pāci. aṭṭha. 701) vuttattā viññāyati. Ettha ca etaṃ na vuttanti ‘‘bhikkhuniyā avassutabhāvo daṭṭhabbo’’ti etaṃ niyamanaṃ na vuttaṃ. Tanti taṃ niyametvā avacanaṃ. Pāḷiyā sametīti ‘‘ekatoavassute’’ti (pāci. 701-702) avisesetvā vuttapāḷiyā, ‘‘anavassutoti jānantī paṭiggaṇhātī’’ti (pāci. 703) imāya ca pāḷiyā sameti. Yadi hi puggalassa avassutabhāvo nappamāṇaṃ, kiṃ ‘‘anavassutoti jānantī’’ti iminā vacanena. ‘‘Anāpatti ubho anavassutā honti, anavassutā paṭiggaṇhātī’’ti ettakameva vattabbaṃ siyā. Ajjhohārapayogesu bahūsu thullaccayacayo thullaccayānaṃ samūho siyā, payogagaṇanāya bahūni thullaccayāni hontīti adhippāyo.
೨೦೮೧. ಸಮ್ಭವೇ, ಬ್ಯಭಿಚಾರೇ ಚ ವಿಸೇಸನಂ ಸಾತ್ಥಕಂ ಭವತೀತಿ ‘‘ಮನುಸ್ಸವಿಗ್ಗಹಾನ’’ನ್ತಿ ಇದಂ ವಿಸೇಸನಂ ಯಕ್ಖಪೇತತಿರಚ್ಛಾನಪದೇಹಿ ಯೋಜೇತಬ್ಬಂ। ಉಭತೋಅವಸ್ಸುತೇ ಸತಿ ಮನುಸ್ಸವಿಗ್ಗಹಾನಂ ಯಕ್ಖಪೇತತಿರಚ್ಛಾನಾನಂ ಹತ್ಥತೋ ಚ ಪಣ್ಡಕಾನಂ ಹತ್ಥತೋ ಚ ತಥಾತಿ ಯೋಜನಾ। ತಥಾ-ಸದ್ದೇನೇತ್ಥ ‘‘ಯಂ ಕಿಞ್ಚಿ ಆಮಿಸಂ ಪಟಿಗ್ಗಣ್ಹಾತಿ, ದುಕ್ಕಟಂ। ಅಜ್ಝೋಹಾರಪಯೋಗೇಸು ಥುಲ್ಲಚ್ಚಯಚಯೋ ಸಿಯಾ’’ತಿ ಯಥಾವುತ್ತಮತಿದಿಸತಿ।
2081. Sambhave, byabhicāre ca visesanaṃ sātthakaṃ bhavatīti ‘‘manussaviggahāna’’nti idaṃ visesanaṃ yakkhapetatiracchānapadehi yojetabbaṃ. Ubhatoavassute sati manussaviggahānaṃ yakkhapetatiracchānānaṃ hatthato ca paṇḍakānaṃ hatthato ca tathāti yojanā. Tathā-saddenettha ‘‘yaṃ kiñci āmisaṃ paṭiggaṇhāti, dukkaṭaṃ. Ajjhohārapayogesu thullaccayacayo siyā’’ti yathāvuttamatidisati.
೨೦೮೨. ಏತ್ಥಾತಿ ಇಮೇಸು ಯಕ್ಖಾದೀಸು। ಏಕತೋಅವಸ್ಸುತೇ ಸತಿ ಆಮಿಸಂ ಪಟಿಗ್ಗಣ್ಹನ್ತಿಯಾ ದುಕ್ಕಟಂ। ಸಬ್ಬತ್ಥಾತಿ ಸಬ್ಬೇಸು ಮನುಸ್ಸಾಮನುಸ್ಸೇಸು ಏಕತೋ, ಉಭತೋ ವಾ ಅನವಸ್ಸುತೇಸು। ಉದಕೇ ದನ್ತಕಟ್ಠಕೇತಿ ಉದಕಸ್ಸ, ದನ್ತಕಟ್ಠಸ್ಸ ಚ ಗಹಣೇ। ಪರಿಭೋಗೇ ಚಾತಿ ಪಟಿಗ್ಗಹಣೇ ಚೇವ ಪರಿಭೋಗೇ ಚ।
2082.Etthāti imesu yakkhādīsu. Ekatoavassute sati āmisaṃ paṭiggaṇhantiyā dukkaṭaṃ. Sabbatthāti sabbesu manussāmanussesu ekato, ubhato vā anavassutesu. Udake dantakaṭṭhaketi udakassa, dantakaṭṭhassa ca gahaṇe. Paribhoge cāti paṭiggahaṇe ceva paribhoge ca.
೨೦೮೩-೪. ಉಭಯಾವಸ್ಸುತಾಭಾವೇತಿ ಭಿಕ್ಖುನಿಯಾ, ಪುಗ್ಗಲಸ್ಸ ಚ ಉಭಿನ್ನಂ ಅವಸ್ಸುತತ್ತೇ ಅಸತಿ ಯದಿ ಆಮಿಸಂ ಪಟಿಗ್ಗಣ್ಹಾತಿ , ನ ದೋಸೋತಿ ಯೋಜನಾ। ಅಯಂ ಪುರಿಸಪುಗ್ಗಲೋ। ನ ಚ ಅವಸ್ಸುತೋತಿ ನೇವ ಅವಸ್ಸುತೋತಿ ಞತ್ವಾ। ಯಾ ಪನ ಆಮಿಸಂ ಪಟಿಗ್ಗಣ್ಹಾತಿ, ತಸ್ಸಾ ಚ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ ಪಕಾಸಿತಾತಿ ಯೋಜನಾ। ‘‘ಯಾ ಗಣ್ಹಾತಿ, ತಸ್ಸಾ ಅನಾಪತ್ತೀ’’ತಿ ವುತ್ತೇಪಿ ಪರಿಭುಞ್ಜನ್ತಿಯಾವ ಅನಾಪತ್ತಿಭಾವೋ ದಟ್ಠಬ್ಬೋ।
2083-4.Ubhayāvassutābhāveti bhikkhuniyā, puggalassa ca ubhinnaṃ avassutatte asati yadi āmisaṃ paṭiggaṇhāti , na dosoti yojanā. Ayaṃ purisapuggalo. Na ca avassutoti neva avassutoti ñatvā. Yā pana āmisaṃ paṭiggaṇhāti, tassā ca ummattikādīnañca anāpatti pakāsitāti yojanā. ‘‘Yā gaṇhāti, tassā anāpattī’’ti vuttepi paribhuñjantiyāva anāpattibhāvo daṭṭhabbo.
ಪಞ್ಚಮಂ।
Pañcamaṃ.
೨೦೮೫. ಉಯ್ಯೋಜನೇತಿ ‘‘ಕಿಂ ತೇ ಅಯ್ಯೇ ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ, ಇಙ್ಘ ಅಯ್ಯೇ ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ, ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ (ಪಾಚಿ॰ ೭೦೫) ವುತ್ತನಯೇನ ನಿಯೋಜನೇ। ಏಕಿಸ್ಸಾತಿ ಉಯ್ಯೋಜಿಕಾಯ। ಇತರಿಸ್ಸಾತಿ ಉಯ್ಯೋಜಿತಾಯ। ಪಟಿಗ್ಗಹೇತಿ ಅವಸ್ಸುತಸ್ಸ ಹತ್ಥತೋ ಆಮಿಸಪಟಿಗ್ಗಹಣೇ। ದುಕ್ಕಟಾನಿ ಚಾತಿ ಉಯ್ಯೋಜಿಕಾಯ ದುಕ್ಕಟಾನಿ। ಭೋಗೇಸೂತಿ ಉಯ್ಯೋಜಿತಾಯ ತಥಾ ಪಟಿಗ್ಗಹಿತಸ್ಸ ಆಮಿಸಸ್ಸ ಪರಿಭೋಗೇಸು। ಥುಲ್ಲಚ್ಚಯಗಣೋ ಸಿಯಾತಿ ಉಯ್ಯೋಜಿಕಾಯ ಥುಲ್ಲಚ್ಚಯಸಮೂಹೋ ಸಿಯಾತಿ ಅತ್ಥೋ।
2085.Uyyojaneti ‘‘kiṃ te ayye eso purisapuggalo karissati avassuto vā anavassuto vā, yato tvaṃ anavassutā, iṅgha ayye yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti (pāci. 705) vuttanayena niyojane. Ekissāti uyyojikāya. Itarissāti uyyojitāya. Paṭiggaheti avassutassa hatthato āmisapaṭiggahaṇe. Dukkaṭāni cāti uyyojikāya dukkaṭāni. Bhogesūti uyyojitāya tathā paṭiggahitassa āmisassa paribhogesu. Thullaccayagaṇo siyāti uyyojikāya thullaccayasamūho siyāti attho.
೨೦೮೬-೭. ಭೋಜನಸ್ಸಾವಸಾನಸ್ಮಿನ್ತಿ ಉಯ್ಯೋಜಿತಾಯ ಭೋಜನಪರಿಯನ್ತೇ। ಸಙ್ಘಾದಿಸೇಸತಾತಿ ಉಯ್ಯೋಜಿಕಾಯ ಸಙ್ಘಾದಿಸೇಸಾಪತ್ತಿ ಹೋತಿ।
2086-7.Bhojanassāvasānasminti uyyojitāya bhojanapariyante. Saṅghādisesatāti uyyojikāya saṅghādisesāpatti hoti.
ಯಕ್ಖಾದೀನನ್ತಿ ಏತ್ಥ ಆದಿ-ಸದ್ದೇನ ಪೇತಪಣ್ಡಕತಿರಚ್ಛಾನಗತಾ ಗಹಿತಾ। ತಥೇವ ಪುರಿಸಸ್ಸ ಚಾತಿ ಅವಸ್ಸುತಸ್ಸ ಮನುಸ್ಸಪುರಿಸಸ್ಸ। ‘‘ಗಹಣೇ ಉಯ್ಯೋಜನೇ’’ತಿ ಪದಚ್ಛೇದೋ। ಗಹಣೇತಿ ಉಯ್ಯೋಜಿತಾಯ ಗಹಣೇ। ಉಯ್ಯೋಜನೇತಿ ಉಯ್ಯೋಜಿಕಾಯ ಅತ್ತನೋ ಉಯ್ಯೋಜನೇ। ತೇಸನ್ತಿ ಉದಕದನ್ತಪೋನಾನಂ। ಪರಿಭೋಗೇತಿ ಉಯ್ಯೋಜಿತಾಯ ಪರಿಭುಞ್ಜನೇ। ದುಕ್ಕಟಂ ಪರಿಕಿತ್ತಿತನ್ತಿ ಉಯ್ಯೋಜಿಕಾಯ ದುಕ್ಕಟಂ ವುತ್ತಂ।
Yakkhādīnanti ettha ādi-saddena petapaṇḍakatiracchānagatā gahitā. Tatheva purisassa cāti avassutassa manussapurisassa. ‘‘Gahaṇe uyyojane’’ti padacchedo. Gahaṇeti uyyojitāya gahaṇe. Uyyojaneti uyyojikāya attano uyyojane. Tesanti udakadantaponānaṃ. Paribhogeti uyyojitāya paribhuñjane. Dukkaṭaṃ parikittitanti uyyojikāya dukkaṭaṃ vuttaṃ.
೨೦೮೮. ಸೇಸಸ್ಸಾತಿ ಉದಕದನ್ತಪೋನತೋ ಅಞ್ಞಸ್ಸ ಪರಿಭುಞ್ಜಿತಬ್ಬಾಮಿಸಸ್ಸ। ‘‘ಗಹಣುಯ್ಯೋಜನೇ’’ತಿಆದಿ ವುತ್ತನಯಮೇವ।
2088.Sesassāti udakadantaponato aññassa paribhuñjitabbāmisassa. ‘‘Gahaṇuyyojane’’tiādi vuttanayameva.
೨೦೮೯-೯೦. ಯಾ ಪನ ಭಿಕ್ಖುನೀ ‘‘ಅನವಸ್ಸುತೋ’’ತಿ ಞತ್ವಾ ಉಯ್ಯೋಜೇತಿ, ‘‘ಕುಪಿತಾ ವಾ ನ ಪಟಿಗ್ಗಣ್ಹತೀ’’ತಿ ಉಯ್ಯೋಜೇತಿ, ‘‘ಕುಲಾನುದ್ದಯತಾ ವಾಪಿ ನ ಪಟಿಗ್ಗಣ್ಹತೀ’’ತಿ ಉಯ್ಯೋಜೇತಿ, ತಸ್ಸಾ ಚ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ ಪಕಾಸಿತಾತಿ ಯೋಜನಾ। ಯಥಾಹ ‘‘ಅನಾಪತ್ತಿ ‘ಅನವಸ್ಸುತೋ’ತಿ ಜಾನನ್ತೀ ಉಯ್ಯೋಜೇತಿ, ‘ಕುಪಿತಾ ನ ಪಟಿಗ್ಗಣ್ಹತೀ’ತಿ ಉಯ್ಯೋಜೇತಿ, ‘ಕುಲಾನುದ್ದಯತಾಯ ನ ಪಟಿಗ್ಗಣ್ಹತೀ’ತಿ ಉಯ್ಯೋಜೇತೀ’’ತಿಆದಿ (ಪಾಚಿ॰ ೭೦೮)।
2089-90.Yā pana bhikkhunī ‘‘anavassuto’’ti ñatvā uyyojeti, ‘‘kupitā vā na paṭiggaṇhatī’’ti uyyojeti, ‘‘kulānuddayatā vāpi na paṭiggaṇhatī’’ti uyyojeti, tassā ca ummattikādīnañca anāpatti pakāsitāti yojanā. Yathāha ‘‘anāpatti ‘anavassuto’ti jānantī uyyojeti, ‘kupitā na paṭiggaṇhatī’ti uyyojeti, ‘kulānuddayatāya na paṭiggaṇhatī’ti uyyojetī’’tiādi (pāci. 708).
ಛಟ್ಠಂ।
Chaṭṭhaṃ.
೨೦೯೧. ಸತ್ತಮನ್ತಿ ‘‘ಯಾ ಪನ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇಯ್ಯ ಬುದ್ಧಂ ಪಚ್ಚಕ್ಖಾಮೀ’’ತಿಆದಿನಯಪ್ಪವತ್ತಂ (ಪಾಚಿ॰ ೭೧೦) ಸತ್ತಮಸಿಕ್ಖಾಪದಞ್ಚ। ಅಟ್ಠಮನ್ತಿ ‘‘ಯಾ ಪನ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ’’ತಿಆದಿನಯಪ್ಪವತ್ತಂ (ಪಾಚಿ॰ ೭೧೬) ಅಟ್ಠಮಸಿಕ್ಖಾಪದಞ್ಚ।
2091.Sattamanti ‘‘yā pana bhikkhunī kupitā anattamanā evaṃ vadeyya buddhaṃ paccakkhāmī’’tiādinayappavattaṃ (pāci. 710) sattamasikkhāpadañca. Aṭṭhamanti ‘‘yā pana bhikkhunī kismiñcideva adhikaraṇe paccākatā’’tiādinayappavattaṃ (pāci. 716) aṭṭhamasikkhāpadañca.
ಸತ್ತಮಟ್ಠಮಾನಿ।
Sattamaṭṭhamāni.
೨೦೯೨. ನವಮೇತಿ ‘‘ಭಿಕ್ಖುನಿಯೋ ಪನೇವ ಸಂಸಟ್ಠಾ ವಿಹರನ್ತೀ’’ತಿಆದಿಸಿಕ್ಖಾಪದೇ (ಪಾಚಿ॰ ೭೨೨) ಚ। ದಸಮೇತಿ ‘‘ಯಾ ಪನ ಭಿಕ್ಖುನೀ ಏವಂ ವದೇಯ್ಯ ಸಂಸಟ್ಠಾವ ಅಯ್ಯೇ ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥಾ’’ತಿಆದಿಸಿಕ್ಖಾಪದೇ (ಪಾಚಿ॰ ೭೨೮) ಚ।
2092.Navameti ‘‘bhikkhuniyo paneva saṃsaṭṭhā viharantī’’tiādisikkhāpade (pāci. 722) ca. Dasameti ‘‘yā pana bhikkhunī evaṃ vadeyya saṃsaṭṭhāva ayye tumhe viharatha, mā tumhe nānā viharitthā’’tiādisikkhāpade (pāci. 728) ca.
ನವಮದಸಮಾನಿ।
Navamadasamāni.
೨೦೯೩. ತೇನ ಮಹಾವಿಭಙ್ಗಾಗತೇನ ದುಟ್ಠದೋಸದ್ವಯೇನ ಚ ತತ್ಥೇವ ಆಗತೇನ ತೇನ ಸಞ್ಚರಿತ್ತಸಿಕ್ಖಾಪದೇನ ಚಾತಿ ಇಮೇಹಿ ತೀಹಿ ಸದ್ಧಿಂ ಇಧಾಗತಾನಿ ಛ ಸಿಕ್ಖಾಪದಾನೀತಿ ಏವಂ ನವ ಪಠಮಾಪತ್ತಿಕಾ । ಇತೋ ಭಿಕ್ಖುನಿವಿಭಙ್ಗತೋ ಚತ್ತಾರಿ ಯಾವತತಿಯಕಾನಿ ತತೋ ಮಹಾವಿಭಙ್ಗತೋ ಚತ್ತಾರಿ ಯಾವತತಿಯಕಾನೀತಿ ಏವಂ ಅಟ್ಠ ಯಾವತತಿಯಕಾನಿ, ಪುರಿಮಾನಿ ನವ ಚಾತಿ ಸತ್ತರಸ ಸಙ್ಘಾದಿಸೇಸಸಿಕ್ಖಾಪದಾನಿ ಮಯಾ ಚೇತ್ಥ ದಸ್ಸಿತಾನೀತಿ ಅಧಿಪ್ಪಾಯೋ।
2093. Tena mahāvibhaṅgāgatena duṭṭhadosadvayena ca tattheva āgatena tena sañcarittasikkhāpadena cāti imehi tīhi saddhiṃ idhāgatāni cha sikkhāpadānīti evaṃ nava paṭhamāpattikā . Ito bhikkhunivibhaṅgato cattāri yāvatatiyakāni tato mahāvibhaṅgato cattāri yāvatatiyakānīti evaṃ aṭṭha yāvatatiyakāni, purimāni nava cāti sattarasa saṅghādisesasikkhāpadāni mayā cettha dassitānīti adhippāyo.
ಇತಿ ವಿನಯತ್ಥಸಾರಸನ್ದೀಪನಿಯಾ ವಿನಯವಿನಿಚ್ಛಯವಣ್ಣನಾಯ
Iti vinayatthasārasandīpaniyā vinayavinicchayavaṇṇanāya
ಸಙ್ಘಾದಿಸೇಸಕಥಾವಣ್ಣನಾ ನಿಟ್ಠಿತಾ।
Saṅghādisesakathāvaṇṇanā niṭṭhitā.
