| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
2. ஸங்கா⁴தி³ஸேஸனித்³தே³ஸவண்ணனா
2. Saṅghādisesaniddesavaṇṇanā
19. இதா³னி ஸங்கா⁴தி³ஸேஸங் பகாஸேதுங் ‘‘க³ருகா நவா’’திஆதி³ ஆரத்³த⁴ங். க³ருகாதி ஸங்கா⁴தி³ஸேஸா இத⁴ அதி⁴ப்பேதா, அஞ்ஞத்த² பன பாராஜிகாபி ஸங்க³ய்ஹந்தி. கஸ்மா ‘‘தேரஸா’’தி அவத்வா ‘‘நவா’’தி வுத்தந்தி சே? வீதிக்கமக்க²ணேயேவ ஆபஜ்ஜிதப்³ப³த்தா பட²மாபத்திகா வுத்தா, யாவததியகா பன சத்தாரோ ஸங்கா⁴தி³ஸேஸா ஸங்கா⁴யத்தத்தா சிரேன ஆபஜ்ஜந்தீதி ந வுத்தா. தத்த² மோசேதுகாமதாதி மோசேதுகாமதாயாதி அத்தோ² ‘‘அலஜ்ஜிதா’’திஆதீ³ஸு விய. இமினா பன நயேன மோசனஸ்ஸாதோ³ முச்சனஸ்ஸாதோ³ முத்தஸ்ஸாதோ³ மேது²னஸ்ஸாதோ³ ப²ஸ்ஸஸ்ஸாதோ³ கண்டூ³வனஸ்ஸாதோ³ த³ஸ்ஸனஸ்ஸாதோ³ நிஸஜ்ஜனஸ்ஸாதோ³ வாசஸ்ஸாதோ³ கே³ஹஸிதபேமங் வனப⁴ங்கி³யந்தி ஏகாத³ஸ அஸ்ஸாதா³ வுத்தா, தேஸு ஏகங்யேவ மோசனஸ்ஸாத³ங் க³ஹெத்வா ஸேஸா படிக்கி²த்தா ஹொந்தி.
19. Idāni saṅghādisesaṃ pakāsetuṃ ‘‘garukā navā’’tiādi āraddhaṃ. Garukāti saṅghādisesā idha adhippetā, aññattha pana pārājikāpi saṅgayhanti. Kasmā ‘‘terasā’’ti avatvā ‘‘navā’’ti vuttanti ce? Vītikkamakkhaṇeyeva āpajjitabbattā paṭhamāpattikā vuttā, yāvatatiyakā pana cattāro saṅghādisesā saṅghāyattattā cirena āpajjantīti na vuttā. Tattha mocetukāmatāti mocetukāmatāyāti attho ‘‘alajjitā’’tiādīsu viya. Iminā pana nayena mocanassādo muccanassādo muttassādo methunassādo phassassādo kaṇḍūvanassādo dassanassādo nisajjanassādo vācassādo gehasitapemaṃ vanabhaṅgiyanti ekādasa assādā vuttā, tesu ekaṃyeva mocanassādaṃ gahetvā sesā paṭikkhittā honti.
தேஸங் அஸ்ஸாதா³னங் வஸேன ஏவங் வினிச்ச²யோ வேதி³தப்³போ³ – மோசேதுங் அஸ்ஸாதோ³ மோசனஸ்ஸாதோ³. மோசனஸ்ஸாத³சேதனாய நிமித்தே உபக்கமதி, முச்சதி, ஸங்கா⁴தி³ஸேஸோ. ந முச்சதி சே, து²ல்லச்சயங். முச்சனஸ்ஸாதே³ ஸசே அத்தனோ த⁴ம்மதாய முச்சமானங் அஸ்ஸாதே³தி, ந உபக்கமதி, அனாபத்தி. ஸசே முச்சமானங் அஸ்ஸாதெ³ந்தோ உபக்கமித்வா மோசேதி, ஸங்கா⁴தி³ஸேஸோவ. அத்தனோ த⁴ம்மதாய முத்தே அஸ்ஸாதோ³ முத்தஸ்ஸாதோ³. எத்தா²பி உபக்கமஸ்ஸ நத்தி²தாய அனாபத்தி. ஏவங் ஸப்³ப³த்த². மேது²னஸ்ஸாதே³ன இத்தி²ங் க³ண்ஹந்தஸ்ஸ முத்தேபி அனாபத்தி, அயங் மேது²னஸ்ஸாதோ³. ப²ஸ்ஸஸ்ஸாதோ³ து³விதோ⁴ அஜ்ஜ²த்திகோ பா³ஹிரோ சாதி. தத்த² அஜ்ஜ²த்திகே தாவ அத்தனோ நிமித்தங் ‘‘த²த்³த⁴ங் முது³கந்தி ஜானிஸ்ஸாமீ’’தி வா லோலபா⁴வேன வா கீளாபயதோ ஸசே முச்சதி, அனாபத்தி. பா³ஹிரப²ஸ்ஸஸ்ஸாதே³ காயஸங்ஸக்³க³ராகே³ன மாதுகா³மங் பு²ஸதோ ஆலிங்க³தோ ச முத்தே அனாபத்தி. கண்டூ³வனஸ்ஸாதே³ த³த்³து³கச்சா²தீ³னங் வஸேன க²ஜ்ஜமானங் நிமித்தங் கண்டூ³வனஸ்ஸாதே³ன கண்டூ³வதோ முத்தேபி அனாபத்தி. த³ஸ்ஸனஸ்ஸாதே³ மாதுகா³மஸ்ஸ அனோகாஸங் உபனிஜ்ஜா²யதோ முத்தேபி அனாபத்தி. நிஸஜ்ஜனஸ்ஸாதே³ மாதுகா³மேன ஸத்³தி⁴ங் ரஹோ நிஸின்னஸ்ஸ முத்தேபி அனாபத்தி. வாசாய அஸ்ஸாதோ³ வாசஸ்ஸாதோ³. தேன அஸ்ஸாதே³ன மாதுகா³மங் மேது²னப்படிஸங்யுத்தாஹி வாசாஹி ஓபா⁴ஸந்தஸ்ஸ முத்தேபி அனாபத்தி. கே³ஹஸிதபேமே மாதாதீ³னங் மாதாதி³பேமேன ஆலிங்க³னாதி³ங் கரொந்தஸ்ஸ முத்தேபி அனாபத்தி. வனப⁴ங்கே³ ச ஸந்த²வகரணத்தா²ய இத்தி²யா பேஸிதங் புப்பா²தி³வனப⁴ங்க³ஸஞ்ஞிதங் பண்ணாகாரங் ‘‘இத்த²ன்னாமாய நாம இத³ங் மே பேஸித’’ந்தி அஸ்ஸாதே³ன ஆமஸந்தஸ்ஸ முத்தேபி அனாபத்தி. ஏதேஸு பன மோசனஸ்ஸாத³வஸேனேவ உபக்கமந்தஸ்ஸ ஆபத்தி, ஸேஸானங் வஸேன அனாபத்தீதி வேதி³தப்³ப³ங்.
Tesaṃ assādānaṃ vasena evaṃ vinicchayo veditabbo – mocetuṃ assādo mocanassādo. Mocanassādacetanāya nimitte upakkamati, muccati, saṅghādiseso. Na muccati ce, thullaccayaṃ. Muccanassāde sace attano dhammatāya muccamānaṃ assādeti, na upakkamati, anāpatti. Sace muccamānaṃ assādento upakkamitvā moceti, saṅghādisesova. Attano dhammatāya mutte assādo muttassādo. Etthāpi upakkamassa natthitāya anāpatti. Evaṃ sabbattha. Methunassādena itthiṃ gaṇhantassa muttepi anāpatti, ayaṃ methunassādo. Phassassādo duvidho ajjhattiko bāhiro cāti. Tattha ajjhattike tāva attano nimittaṃ ‘‘thaddhaṃ mudukanti jānissāmī’’ti vā lolabhāvena vā kīḷāpayato sace muccati, anāpatti. Bāhiraphassassāde kāyasaṃsaggarāgena mātugāmaṃ phusato āliṅgato ca mutte anāpatti. Kaṇḍūvanassāde daddukacchādīnaṃ vasena khajjamānaṃ nimittaṃ kaṇḍūvanassādena kaṇḍūvato muttepi anāpatti. Dassanassāde mātugāmassa anokāsaṃ upanijjhāyato muttepi anāpatti. Nisajjanassāde mātugāmena saddhiṃ raho nisinnassa muttepi anāpatti. Vācāya assādo vācassādo. Tena assādena mātugāmaṃ methunappaṭisaṃyuttāhi vācāhi obhāsantassa muttepi anāpatti. Gehasitapeme mātādīnaṃ mātādipemena āliṅganādiṃ karontassa muttepi anāpatti. Vanabhaṅge ca santhavakaraṇatthāya itthiyā pesitaṃ pupphādivanabhaṅgasaññitaṃ paṇṇākāraṃ ‘‘itthannāmāya nāma idaṃ me pesita’’nti assādena āmasantassa muttepi anāpatti. Etesu pana mocanassādavaseneva upakkamantassa āpatti, sesānaṃ vasena anāpattīti veditabbaṃ.
ஸுக்கஸ்ஸாதி ‘‘நீலங் பீதகங் லோஹிதகங் ஓதா³தங் தக்கவண்ணங் த³கவண்ணங் தேலவண்ணங் கீ²ரவண்ணங் த³தி⁴வண்ணங் ஸப்பிவண்ண’’ந்தி (பாரா॰ 237) ஏவங் ஆக³தேஸு த³ஸஸு வண்ணேஸு யஸ்ஸ கஸ்ஸசி ஸுக்கஸ்ஸாதி அதி⁴ப்பாயோ . உபக்கம்மாதி ‘‘அஜ்ஜ²த்தரூபே மோசேதி, ப³ஹித்³தா⁴ரூபே மோசேதி, அஜ்ஜ²த்தப³ஹித்³தா⁴ரூபே மோசேதி, ஆகாஸே கடிங் கம்பெந்தோ மோசேதீ’’தி (பாரா॰ 237) ஏவங் வுத்தேஸு சதூஸு உபாயேஸு அஞ்ஞதரேன உபாயேன ‘‘ராகூ³பத்த²ம்பே⁴ மோசேதி, வச்சூபத்த²ம்பே⁴ மோசேதி, பஸ்ஸாவூபத்த²ம்பே⁴ மோசேதி, வாதூபத்த²ம்பே⁴ மோசேதி, உச்சாலிங்க³பாணகத³ட்டூ²பத்த²ம்பே⁴ மோசேதீ’’தி ஏவங் வுத்தேஸு பஞ்சஸு காலேஸு கிஸ்மிஞ்சி காலே அங்க³ஜாதே கம்மனியங் பத்தே ‘‘ஆரொக்³யத்தா²ய மோசேதி, ஸுக²த்தா²ய மோசேதி, பே⁴ஸஜ்ஜத்தா²ய, தா³னத்தா²ய, புஞ்ஞத்தா²ய, யஞ்ஞத்தா²ய, ஸக்³க³த்தா²ய, பீ³ஜத்தா²ய, வீமங்ஸத்தா²ய, த³வத்தா²ய மோசேதீ’’தி (பாரா॰ 237) ஏவங் வுத்தேஸு த³ஸஸு அதி⁴ப்பாயேஸு யேன கேனசி அதி⁴ப்பாயேன ஹத்தா²தீ³ஸு யேன கேனசி உபக்கமித்வாதி அத்தோ². விமோசயந்தி அந்தமஸோ யங் ஏகா கு²த்³த³கமக்கி²கா பிவெய்ய, தத்தகம்பி மோசெந்தோதி அத்தோ². அஞ்ஞத்ர ஸுபினந்தேனாதி யா ஸுபினந்தே ஸுக்கவிஸ்ஸட்டி² ஹோதி, தங் ட²பெத்வாதி அத்தோ². ஸமணோதி யோ கோசி உபஸம்பன்னோ. க³ருகந்தி ஸங்கா⁴தி³ஸேஸங். பு²ஸேதி ஆபஜ்ஜெய்யாதி அத்தோ².
Sukkassāti ‘‘nīlaṃ pītakaṃ lohitakaṃ odātaṃ takkavaṇṇaṃ dakavaṇṇaṃ telavaṇṇaṃ khīravaṇṇaṃ dadhivaṇṇaṃ sappivaṇṇa’’nti (pārā. 237) evaṃ āgatesu dasasu vaṇṇesu yassa kassaci sukkassāti adhippāyo . Upakkammāti ‘‘ajjhattarūpe moceti, bahiddhārūpe moceti, ajjhattabahiddhārūpe moceti, ākāse kaṭiṃ kampento mocetī’’ti (pārā. 237) evaṃ vuttesu catūsu upāyesu aññatarena upāyena ‘‘rāgūpatthambhe moceti, vaccūpatthambhe moceti, passāvūpatthambhe moceti, vātūpatthambhe moceti, uccāliṅgapāṇakadaṭṭhūpatthambhe mocetī’’ti evaṃ vuttesu pañcasu kālesu kismiñci kāle aṅgajāte kammaniyaṃ patte ‘‘ārogyatthāya moceti, sukhatthāya moceti, bhesajjatthāya, dānatthāya, puññatthāya, yaññatthāya, saggatthāya, bījatthāya, vīmaṃsatthāya, davatthāya mocetī’’ti (pārā. 237) evaṃ vuttesu dasasu adhippāyesu yena kenaci adhippāyena hatthādīsu yena kenaci upakkamitvāti attho. Vimocayanti antamaso yaṃ ekā khuddakamakkhikā piveyya, tattakampi mocentoti attho. Aññatra supinantenāti yā supinante sukkavissaṭṭhi hoti, taṃ ṭhapetvāti attho. Samaṇoti yo koci upasampanno. Garukanti saṅghādisesaṃ. Phuseti āpajjeyyāti attho.
ஸுக்கவிஸ்ஸட்டி²ஸிக்கா²பத³ங் பட²மங்.
Sukkavissaṭṭhisikkhāpadaṃ paṭhamaṃ.
20. இதா³னி காயஸங்ஸக்³க³ங் தீ³பேதுங் ‘‘இத்தி²ஸஞ்ஞீ’’திஆதி³ ஆரத்³த⁴ங். தத்த² இத்தி²ஸஞ்ஞீதி தத³ஹுஜாதாயபி மனுஸ்ஸித்தி²யா இத்தி²ஸஞ்ஞீயேவ ஹுத்வாதி அத்தோ². ஸசே தத்த² வேமதிகோ வா பண்ட³கபுரிஸதிரச்சா²னக³தஸஞ்ஞீ வா ஹோதி, து²ல்லச்சயங், ததா² இத்தி²யா காயேன காயப்படிப³த்³தா⁴மஸனே ச காயப்படிப³த்³தே⁴ன காயாமஸனே ச யக்கீ²பேதீபண்ட³கானங் காயேன காயாமஸனே ச. புரிஸதிரச்சா²னக³தித்தீ²னங் பன காயேன காயாமஸனேபி து³க்கடங், ததா² யக்கீ²ஆதீ³னங் காயேன காயப்படிப³த்³தா⁴தீ³ஸு ச. மதித்தி²யா பன து²ல்லச்சயங். காயஸங்ஸக்³க³ராக³வாதி இமினா மாதுபேமாதி³ங் மொக்கா²தி⁴ப்பாயஞ்ச படிக்கி²பதி. ஸம்பு²ஸந்தோதி காயஸங்ஸக்³க³ராகே³ன உபக்கம்ம அந்தமஸோ லோமேனபி மனுஸ்ஸித்தி²ங் ஸம்பு²ஸந்தோதி அத்த²ஸம்ப³ந்தோ⁴. இமினா யோ இத்தி²யா ஆலிங்க³தோபி காயேன ந வாயமதி, கேவலங் ப²ஸ்ஸங்யேவ அனுப⁴வதி, தஸ்ஸ அனாபத்தீதி தீ³பிதங் ஹோதி.
20. Idāni kāyasaṃsaggaṃ dīpetuṃ ‘‘itthisaññī’’tiādi āraddhaṃ. Tattha itthisaññīti tadahujātāyapi manussitthiyā itthisaññīyeva hutvāti attho. Sace tattha vematiko vā paṇḍakapurisatiracchānagatasaññī vā hoti, thullaccayaṃ, tathā itthiyā kāyena kāyappaṭibaddhāmasane ca kāyappaṭibaddhena kāyāmasane ca yakkhīpetīpaṇḍakānaṃ kāyena kāyāmasane ca. Purisatiracchānagatitthīnaṃ pana kāyena kāyāmasanepi dukkaṭaṃ, tathā yakkhīādīnaṃ kāyena kāyappaṭibaddhādīsu ca. Matitthiyā pana thullaccayaṃ. Kāyasaṃsaggarāgavāti iminā mātupemādiṃ mokkhādhippāyañca paṭikkhipati. Samphusantoti kāyasaṃsaggarāgena upakkamma antamaso lomenapi manussitthiṃ samphusantoti atthasambandho. Iminā yo itthiyā āliṅgatopi kāyena na vāyamati, kevalaṃ phassaṃyeva anubhavati, tassa anāpattīti dīpitaṃ hoti.
காயஸங்ஸக்³க³ஸிக்கா²பத³ங் து³தியங்.
Kāyasaṃsaggasikkhāpadaṃ dutiyaṃ.
21. இதா³னி து³ட்டு²ல்லவாசங் பகாஸேதுங் ‘‘ததா² ஸுணந்தி’’ந்திஆதி³ ஆரத்³த⁴ங். தத்த² ததா²தி இத்தி²ஸஞ்ஞீ. மனுஸ்ஸித்தி²ங் ஸுணந்திந்தி ஸம்ப³ந்தோ⁴. ஸுணந்திந்தி இமினா படிப³லாயபி இத்தி²யா அவிஞ்ஞத்திபதே² டி²தாய தூ³தேன வா பண்ணேன வா ஆரோசெந்தஸ்ஸ து³ட்டு²ல்லவாசாபத்தின ஹோதீதி தீ³பிதங் ஹோதி. விஞ்ஞுஞ்சாதி இமினா யா மஹல்லிகாபி பா³லாபி ஏளமூகா³பி அஸத்³த⁴ம்மப்படிஸங்யுத்தங் கத²ங் ந ஜானாதி, ஸா இத⁴ நாதி⁴ப்பேதாதி த³ஸ்ஸேதி. வச்சமக்³க³பஸ்ஸாவமக்³கா³னங் வஸேன மக்³க³ங் வா மேது²னங் வா ஆரப்³பா⁴தி ஸம்ப³ந்தோ⁴. து³ட்டு²ல்லவாசாய ராகோ³ து³ட்டு²ல்லவாசாராகோ³, தேன து³ட்டு²ல்லவாசாராகே³ன. தங் அஸ்ஸாதெ³ந்தோ ஓபா⁴ஸெத்வா து³ருத்தவசனங் வத்வா க³ருகங் பு²ஸேதி அத்தோ².
21. Idāni duṭṭhullavācaṃ pakāsetuṃ ‘‘tathā suṇanti’’ntiādi āraddhaṃ. Tattha tathāti itthisaññī. Manussitthiṃ suṇantinti sambandho. Suṇantinti iminā paṭibalāyapi itthiyā aviññattipathe ṭhitāya dūtena vā paṇṇena vā ārocentassa duṭṭhullavācāpattina hotīti dīpitaṃ hoti. Viññuñcāti iminā yā mahallikāpi bālāpi eḷamūgāpi asaddhammappaṭisaṃyuttaṃ kathaṃ na jānāti, sā idha nādhippetāti dasseti. Vaccamaggapassāvamaggānaṃ vasena maggaṃ vā methunaṃ vā ārabbhāti sambandho. Duṭṭhullavācāya rāgo duṭṭhullavācārāgo, tena duṭṭhullavācārāgena. Taṃ assādento obhāsetvā duruttavacanaṃ vatvā garukaṃ phuseti attho.
கத²ங் த்³வே மக்³கே³ ஆரப்³ப⁴ பஸங்ஸதி க³ரஹதி? தத்த² பஸங்ஸாயபி தாவ ‘‘இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ந தாவஸீஸங் ஏதி. ‘‘தவ வச்சமக்³கோ³ ச பஸ்ஸாவமக்³கோ³ ச ஸுபோ⁴ ஸுஸண்டா²னோ த³ஸ்ஸனீயோ, ஈதி³ஸேன நாம இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ஸீஸங் ஏதி, ஸங்கா⁴தி³ஸேஸோ ஹோதீதி அத்தோ². க³ரஹணே பன ‘‘ஸிக²ரணீஸி, ஸம்பி⁴ன்னாஸி, உப⁴தொப்³யஞ்ஜனாஸீ’’தி இமானி தீணி ஸுத்³தா⁴னியேவ ஸீஸங் எந்தி வச்சமக்³க³பஸ்ஸாவமக்³கா³னங் நியதவசனத்தா அச்சோளாரிகத்தா ச. அஞ்ஞானி பன ‘‘அனிமித்தாஸி, நிமித்தமத்தாஸீ’’திஆதீ³னி மக்³கா³னங் அனியதவசனத்தா மேது²னேன க⁴டெத்வா வுத்தானி ஏவ ஸீஸங் எந்தி. மேது²னப்படிஸங்யுத்தே ‘‘தே³ஹி மே, அரஹஸி மே தா³து’’ந்திஆதீ³ஹி பன ஸீஸங் ந ஏதி, ‘‘மேது²னத⁴ம்மங் தே³ஹீ’’திஆதி³னா மேது²னத⁴ம்மே க⁴டிதேயேவ ஸங்கா⁴தி³ஸேஸோ. இத்தி²யா வச்சமக்³க³பஸ்ஸாவமக்³கே³ ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணாதி³ப⁴ணனே து²ல்லச்சயங், ததா² யக்கீ²பேதீபண்ட³கேஸு வச்சமக்³க³பஸ்ஸாவமக்³கே³ மேது²னேபி. இமேஸங் பன யக்கீ²ஆதீ³னங் அத⁴க்க²காதி³கே வுத்தப்பகாரே பதே³ஸே து³ங்க்கடங், ததா² இத்தி²யாதீ³னங் உப்³ப⁴க்க²கே அதோ⁴ஜாணுமண்ட³லே காயப்படிப³த்³தே⁴ சாதி.
Kathaṃ dve magge ārabbha pasaṃsati garahati? Tattha pasaṃsāyapi tāva ‘‘itthilakkhaṇena subhalakkhaṇena samannāgatāsī’’ti vadati, na tāvasīsaṃ eti. ‘‘Tava vaccamaggo ca passāvamaggo ca subho susaṇṭhāno dassanīyo, īdisena nāma itthilakkhaṇena subhalakkhaṇena samannāgatāsī’’ti vadati, sīsaṃ eti, saṅghādiseso hotīti attho. Garahaṇe pana ‘‘sikharaṇīsi, sambhinnāsi, ubhatobyañjanāsī’’ti imāni tīṇi suddhāniyeva sīsaṃ enti vaccamaggapassāvamaggānaṃ niyatavacanattā accoḷārikattā ca. Aññāni pana ‘‘animittāsi, nimittamattāsī’’tiādīni maggānaṃ aniyatavacanattā methunena ghaṭetvā vuttāni eva sīsaṃ enti. Methunappaṭisaṃyutte ‘‘dehi me, arahasi me dātu’’ntiādīhi pana sīsaṃ na eti, ‘‘methunadhammaṃ dehī’’tiādinā methunadhamme ghaṭiteyeva saṅghādiseso. Itthiyā vaccamaggapassāvamagge ṭhapetvā adhakkhakaṃ ubbhajāṇumaṇḍalaṃ ādissa vaṇṇādibhaṇane thullaccayaṃ, tathā yakkhīpetīpaṇḍakesu vaccamaggapassāvamagge methunepi. Imesaṃ pana yakkhīādīnaṃ adhakkhakādike vuttappakāre padese duṃkkaṭaṃ, tathā itthiyādīnaṃ ubbhakkhake adhojāṇumaṇḍale kāyappaṭibaddhe cāti.
து³ட்டு²ல்லவாசாஸிக்கா²பத³ங் ததியங்.
Duṭṭhullavācāsikkhāpadaṃ tatiyaṃ.
22. இதா³னி அத்தகாமபாரிசரியங் த³ஸ்ஸேதுங் ‘‘வத்வா’’திஆதி³ வுத்தங். தத்த² வத்வாதி து³ட்டு²ல்லோபா⁴ஸனே வுத்தப்பகாரங் இத்தி²ங் இத்தி²ஸஞ்ஞீயேவ ஹுத்வா வத்வாதி அத்தோ². அத்தகாமுபட்டா²னவண்ணந்தி எத்த² மேது²னத⁴ம்மஸங்கா²தேன காமேன உபட்டா²னங் காமுபட்டா²னங், அத்தனோ அத்தா²ய காமுபட்டா²னங் அத்தகாமுபட்டா²னங், அத்தனா வா காமிதங் இச்சி²தந்தி அத்தகாமங், ஸயங் மேது²னராக³வஸேன பத்தி²தந்தி அத்தோ², அத்தகாமஞ்ச தங் உபட்டா²னஞ்சாதி அத்தகாமுபட்டா²னங், தஸ்ஸ வண்ணோ அத்தகாமுபட்டா²னவண்ணோ, தங் அத்தகாமுபட்டா²னவண்ணங். ‘‘ஏதத³க்³க³ங், ப⁴கி³னி, பாரிசரியானங் யா மாதி³ஸங் ஸீலவந்தங் கல்யாணத⁴ம்மங் ப்³ரஹ்மசாரிங் ஏதேன த⁴ம்மேன பரிசரெய்யா’’தி ஏவங் வத்வாதி ஸம்ப³ந்தோ⁴. மேது²னராகி³னோதி இமினா கி³லானபச்சயாதீ³ஹி உபட்டா²னஸ்ஸ வண்ணங் ப⁴ணதோ அனாபத்தீதி தீ³பிதங் ஹோதி. வாசா மேது²னயுத்தேனாதி எத்த² மேது²னயுத்தேனேவ வாசாய மேது²னயாசனே க³ருகங் ஹோதி, ந அஞ்ஞதா²தி அதி⁴ப்பாயோ.
22. Idāni attakāmapāricariyaṃ dassetuṃ ‘‘vatvā’’tiādi vuttaṃ. Tattha vatvāti duṭṭhullobhāsane vuttappakāraṃ itthiṃ itthisaññīyeva hutvā vatvāti attho. Attakāmupaṭṭhānavaṇṇanti ettha methunadhammasaṅkhātena kāmena upaṭṭhānaṃ kāmupaṭṭhānaṃ, attano atthāya kāmupaṭṭhānaṃ attakāmupaṭṭhānaṃ, attanā vā kāmitaṃ icchitanti attakāmaṃ, sayaṃ methunarāgavasena patthitanti attho, attakāmañca taṃ upaṭṭhānañcāti attakāmupaṭṭhānaṃ, tassa vaṇṇo attakāmupaṭṭhānavaṇṇo, taṃ attakāmupaṭṭhānavaṇṇaṃ. ‘‘Etadaggaṃ, bhagini, pāricariyānaṃ yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyyā’’ti evaṃ vatvāti sambandho. Methunarāginoti iminā gilānapaccayādīhi upaṭṭhānassa vaṇṇaṃ bhaṇato anāpattīti dīpitaṃ hoti. Vācā methunayuttenāti ettha methunayutteneva vācāya methunayācane garukaṃ hoti, na aññathāti adhippāyo.
அத்தகாமபாரிசரியஸிக்கா²பத³ங் சதுத்த²ங்.
Attakāmapāricariyasikkhāpadaṃ catutthaṃ.
23. இதா³னி ஸஞ்சரித்தங் த³ஸ்ஸேதுங் ‘‘படிக்³க³ஹெத்வா’’திஆதி³ ஆரத்³த⁴ங். தத்த² படிக்³க³ஹெத்வாதி இத்தி²யா வா புரிஸேன வா உபி⁴ன்னங் மாதாதீ³ஹி வா ‘‘ப⁴ந்தே, இத்த²ன்னாமங் இத்தி²ங் வா புரிஸங் வா ஏவங் ப⁴ணாஹீ’’தி வுத்தோ தேஸங் வசனங் ‘‘ஸாதூ⁴’’தி வா ‘‘ஹோதூ’’தி வா ‘‘ப⁴ணாமீ’’தி வா யேன கேனசி ஆகாரேன வசீபே⁴த³ங் கத்வா, ஸீஸகம்பனாதீ³ஹி வா ஸம்படிச்சி²த்வாதி அத்தோ². ஸந்தே³ஸந்தி எத்த² பன இத்தீ² த³ஸவிதா⁴ மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா கொ³த்தரக்கி²தா த⁴ம்மரக்கி²தா ஸாரக்கா² ஸபரித³ண்டா³தி. த³ஸ ப⁴ரியாயோ த⁴னக்கீதா ச²ந்த³வாஸினீ போ⁴க³வாஸினீ படவாஸினீ ஓத³பத்தகினீ ஓப⁴டசும்ப³டகா தா³ஸீ ச ப⁴ரியா ச கம்மகாரீ ச ப⁴ரியா ச த⁴ஜாஹடா முஹுத்திகா சாதி.
23. Idāni sañcarittaṃ dassetuṃ ‘‘paṭiggahetvā’’tiādi āraddhaṃ. Tattha paṭiggahetvāti itthiyā vā purisena vā ubhinnaṃ mātādīhi vā ‘‘bhante, itthannāmaṃ itthiṃ vā purisaṃ vā evaṃ bhaṇāhī’’ti vutto tesaṃ vacanaṃ ‘‘sādhū’’ti vā ‘‘hotū’’ti vā ‘‘bhaṇāmī’’ti vā yena kenaci ākārena vacībhedaṃ katvā, sīsakampanādīhi vā sampaṭicchitvāti attho. Sandesanti ettha pana itthī dasavidhā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sārakkhā saparidaṇḍāti. Dasa bhariyāyo dhanakkītā chandavāsinī bhogavāsinī paṭavāsinī odapattakinī obhaṭacumbaṭakā dāsī ca bhariyā ca kammakārī ca bhariyā ca dhajāhaṭā muhuttikā cāti.
தாஸு மாதுரக்கி²தா பி⁴க்கு²ங் பஹிணதி ‘‘க³ச்ச², ப⁴ந்தே, இத்த²ன்னாமங் ப்³ரூஹி ‘ஹோமி இத்த²ன்னாமஸ்ஸ ப⁴ரியா த⁴னக்கீதா…பே॰… முஹுத்திகா சா’’தி, அயங் இத்தி²யா ஸந்தே³ஸோ நாம. ஸசே மாதுரக்கி²தாய மாதாபிதாபா⁴தாப⁴கி³னிஆத³யோ பி⁴க்கு²ங் பஹிணந்தி ‘‘க³ச்ச², ப⁴ந்தே, இத்த²ன்னாமங் ப்³ரூஹி ‘ஹோது இத்த²ன்னாமஸ்ஸ ப⁴ரியா த⁴னக்கீதா…பே॰… முஹுத்திகா சா’’தி, அயம்பி இத்தி²யா ஸந்தே³ஸோயேவ நாம. ஏவங் பிதுரக்கி²தாதீ³ஸுபி நயோ நேதப்³போ³. புரிஸோ பி⁴க்கு²ங் பஹிணதி ‘‘க³ச்ச², ப⁴ந்தே, இத்த²ன்னாமங் மாதுரக்கி²தங் ப்³ரூஹி…பே॰… ஸபரித³ண்ட³ங் ப்³ரூஹி ‘ஹோது கிர இத்த²ன்னாமஸ்ஸ ப⁴ரியா த⁴னக்கீதா…பே॰… முஹுத்திகா சா’’தி, அயங் புரிஸஸ்ஸ ஸந்தே³ஸோ நாம. ஸசே புரிஸஸ்ஸ மாதாபிதாபா⁴தாப⁴கி³னிஆத³யோ பி⁴க்கு²ங் பஹிணந்தி ‘‘க³ச்ச², ப⁴ந்தே, இத்த²ன்னாமங் மாதுரக்கி²தங் ப்³ரூஹி…பே॰… ஸபரித³ண்ட³ங் ப்³ரூஹி ‘ஹோது இத்த²ன்னாமஸ்ஸ ப⁴ரியா த⁴னக்கீதா…பே॰… முஹுத்திகா சா’’தி, அயம்பி புரிஸஸ்ஸ ஸந்தே³ஸோயேவ நாம, ஆணாபனந்தி அத்தோ².
Tāsu māturakkhitā bhikkhuṃ pahiṇati ‘‘gaccha, bhante, itthannāmaṃ brūhi ‘homi itthannāmassa bhariyā dhanakkītā…pe… muhuttikā cā’’ti, ayaṃ itthiyā sandeso nāma. Sace māturakkhitāya mātāpitābhātābhaginiādayo bhikkhuṃ pahiṇanti ‘‘gaccha, bhante, itthannāmaṃ brūhi ‘hotu itthannāmassa bhariyā dhanakkītā…pe… muhuttikā cā’’ti, ayampi itthiyā sandesoyeva nāma. Evaṃ piturakkhitādīsupi nayo netabbo. Puriso bhikkhuṃ pahiṇati ‘‘gaccha, bhante, itthannāmaṃ māturakkhitaṃ brūhi…pe… saparidaṇḍaṃ brūhi ‘hotu kira itthannāmassa bhariyā dhanakkītā…pe… muhuttikā cā’’ti, ayaṃ purisassa sandeso nāma. Sace purisassa mātāpitābhātābhaginiādayo bhikkhuṃ pahiṇanti ‘‘gaccha, bhante, itthannāmaṃ māturakkhitaṃ brūhi…pe… saparidaṇḍaṃ brūhi ‘hotu itthannāmassa bhariyā dhanakkītā…pe… muhuttikā cā’’ti, ayampi purisassa sandesoyeva nāma, āṇāpananti attho.
வீமங்ஸித்வாதி எத்த² வுத்தப்பகாரேன ஸாஸனங் க³ஹெத்வா தஸ்ஸா இத்தி²யா வா புரிஸஸ்ஸ வா தேஸங் அவஸ்ஸாரோசனகானங் மாதாபிதாபா⁴தாப⁴கி³னிஆதீ³னங் வா ஆரோசெத்வாதி அத்தோ². ஹரந்தி யத்த² பஹிதோ, தத்த² க³ந்த்வா தஸ்ஸா இத்தி²யா வா புரிஸஸ்ஸ வா ஆரோசேதி, ஸா இத்தீ² வா புரிஸோ வா ‘‘ஸாதூ⁴’’தி ஸம்படிச்ச²து வா, மா வா, லஜ்ஜாய வா துண்ஹீ ஹோது, புன ஆக³ந்த்வா தஸ்ஸா இத்தி²யா வா புரிஸஸ்ஸ வா ஹரந்தோ க³ருகங் பு²ஸேதி ஸம்ப³ந்தோ⁴. எத்தாவதா ‘‘படிக்³க³ண்ஹதி வீமங்ஸதி பச்சாஹரதீ’’தி வுத்தங் அங்க³த்தயங் ஸம்பாதி³தங் ஹோதி. இமாய திவங்க³ஸம்பத்தியா ஸங்கா⁴தி³ஸேஸோ, இதோ யேஹி கேஹிசி த்³வீஹி அங்கே³ஹி து²ல்லச்சயங், ஏகேன து³க்கடங். யக்கீ²பேதீபண்ட³கேஸு அங்க³த்தயேனபி து²ல்லச்சயமேவ, ஏகேன வா த்³வீஹி வா து³க்கடந்தி.
Vīmaṃsitvāti ettha vuttappakārena sāsanaṃ gahetvā tassā itthiyā vā purisassa vā tesaṃ avassārocanakānaṃ mātāpitābhātābhaginiādīnaṃ vā ārocetvāti attho. Haranti yattha pahito, tattha gantvā tassā itthiyā vā purisassa vā āroceti, sā itthī vā puriso vā ‘‘sādhū’’ti sampaṭicchatu vā, mā vā, lajjāya vā tuṇhī hotu, puna āgantvā tassā itthiyā vā purisassa vā haranto garukaṃ phuseti sambandho. Ettāvatā ‘‘paṭiggaṇhati vīmaṃsati paccāharatī’’ti vuttaṃ aṅgattayaṃ sampāditaṃ hoti. Imāya tivaṅgasampattiyā saṅghādiseso, ito yehi kehici dvīhi aṅgehi thullaccayaṃ, ekena dukkaṭaṃ. Yakkhīpetīpaṇḍakesu aṅgattayenapi thullaccayameva, ekena vā dvīhi vā dukkaṭanti.
ஸஞ்சரித்தஸிக்கா²பத³ங் பஞ்சமங்.
Sañcarittasikkhāpadaṃ pañcamaṃ.
24. இதா³னி குடிகாரஸிக்கா²பத³ங் ஆவி காதுங் ‘‘ஸங்யாசிதபரிக்கா²ர’’ந்திஆதி³ ஆரத்³த⁴ங். தத்ராயங் ஸங்கே²பத்தோ² – ‘‘வாஸிங் தே³த², ப²ரஸுங் தே³தா²’’திஆதி³னா ஸயங் பவத்திதயாசனாய க³ஹிதபரிக்கா²ரங் ஸங்யாசிதபரிக்கா²ரங் பத³பா⁴ஜனே வுத்தனயேன ஸங்க⁴ங் திக்க²த்துங் யாசித்வா லத்³த⁴பி⁴க்கூ²ஹி வா ஸங்கே⁴னேவ வா தத்த² க³ந்த்வா ஸாரம்பா⁴னாரம்ப⁴ஸபரிக்கமனாபரிக்கமனபா⁴வங் ஞத்வா அதே³ஸிதவத்து²கங் ‘‘குடி நாம உல்லித்தா வா ஹோதி அவலித்தா வா உல்லித்தாவலித்தா வா’’தி (பாரா॰ 349) ஏவங் வுத்தலக்க²ணங் குடிங். ‘‘தத்ரித³ங் பமாணங், தீ³க⁴ஸோ த்³வாத³ஸ வித³த்தி²யோ ஸுக³தவித³த்தி²யா, திரியங் ஸத்தந்தரா’’தி (பாரா॰ 348) ஏவங் வுத்தபமாணாதிக்கந்தங், ‘‘மய்ஹங் வாஸாகா³ரங் ஏஸா’’தி ஏவங் அத்தா உத்³தே³ஸோ ஏதிஸ்ஸாதி அத்துத்³தே³ஸா, தங் அத்துத்³தே³ஸங் கத்வா க³ருங் ஸங்கா⁴தி³ஸேஸங் பு²ஸேதி ஸம்ப³ந்தோ⁴. அயங் பனெத்த² வினிச்ச²யோ – அதே³ஸிதவத்து²கங் பமாணாதிக்கந்தங் குந்த²கிபில்லிகாதீ³னங் ஆஸயே கதத்தா ஸாரம்ப⁴ங் த்³வீஹி ப³லீப³த்³தே³ஹி யுத்தேன ஸகடேன க³ந்துங் அஸக்குணெய்யதாய அபரிக்கமனங் உல்லித்தாதி³பே⁴த³ங் குடிங் அத்தனோ வஸனத்தா²ய கரொந்தோ வா காராபெந்தோ வா ‘‘இதா³னி நிட்டா²னங் க³மிஸ்ஸதீ’’தி பட²மபிண்ட³தா³னே து²ல்லச்சயங், து³தியபிண்ட³தா³னேன லேபே க⁴டிதே த்³வே ச ஸங்கா⁴தி³ஸேஸே த்³வே ச து³க்கடானி, ஸசே தே³ஸிதவத்து²காயேவ வா பமாணாதிக்கந்தாயேவ வா ஹோதி, ஏகங் ஸங்கா⁴தி³ஸேஸங் த்³வே ச து³க்கடானி ஆபஜ்ஜதீதி.
24. Idāni kuṭikārasikkhāpadaṃ āvi kātuṃ ‘‘saṃyācitaparikkhāra’’ntiādi āraddhaṃ. Tatrāyaṃ saṅkhepattho – ‘‘vāsiṃ detha, pharasuṃ dethā’’tiādinā sayaṃ pavattitayācanāya gahitaparikkhāraṃ saṃyācitaparikkhāraṃ padabhājane vuttanayena saṅghaṃ tikkhattuṃ yācitvā laddhabhikkhūhi vā saṅgheneva vā tattha gantvā sārambhānārambhasaparikkamanāparikkamanabhāvaṃ ñatvā adesitavatthukaṃ ‘‘kuṭi nāma ullittā vā hoti avalittā vā ullittāvalittā vā’’ti (pārā. 349) evaṃ vuttalakkhaṇaṃ kuṭiṃ. ‘‘Tatridaṃ pamāṇaṃ, dīghaso dvādasa vidatthiyo sugatavidatthiyā, tiriyaṃ sattantarā’’ti (pārā. 348) evaṃ vuttapamāṇātikkantaṃ, ‘‘mayhaṃ vāsāgāraṃ esā’’ti evaṃ attā uddeso etissāti attuddesā, taṃ attuddesaṃ katvā garuṃ saṅghādisesaṃ phuseti sambandho. Ayaṃ panettha vinicchayo – adesitavatthukaṃ pamāṇātikkantaṃ kunthakipillikādīnaṃ āsaye katattā sārambhaṃ dvīhi balībaddehi yuttena sakaṭena gantuṃ asakkuṇeyyatāya aparikkamanaṃ ullittādibhedaṃ kuṭiṃ attano vasanatthāya karonto vā kārāpento vā ‘‘idāni niṭṭhānaṃ gamissatī’’ti paṭhamapiṇḍadāne thullaccayaṃ, dutiyapiṇḍadānena lepe ghaṭite dve ca saṅghādisese dve ca dukkaṭāni, sace desitavatthukāyeva vā pamāṇātikkantāyeva vā hoti, ekaṃ saṅghādisesaṃ dve ca dukkaṭāni āpajjatīti.
குடிகாரஸிக்கா²பத³ங் ச²ட்ட²ங்.
Kuṭikārasikkhāpadaṃ chaṭṭhaṃ.
25. இதா³னி விஹாரகாரஸிக்கா²பத³ங் த³ஸ்ஸேதுங் ‘‘மஹல்லக’’ந்திஆதி³ ஆரத்³த⁴ங். தத்த² மஹல்லகந்தி ஸஸ்ஸாமிகபா⁴வேன ஸங்யாசிதகுடிதோ மஹந்தபா⁴வோ ஏதஸ்ஸ அத்தி², யஸ்மா வா வத்து²ங் தே³ஸாபெத்வா பமாணாதிக்கமேனாபி காதுங் வட்டதி, தஸ்மா பமாணமஹந்ததாயபி மஹல்லகோ, தங் மஹல்லகங் விஹாரங் வா கத்வாதி அத்தோ². எத்த² பன அதே³ஸிதவத்து²கபா⁴வேன ஏகோ ஸங்கா⁴தி³ஸேஸோ, ஸேஸங் அனந்தரஸதி³ஸமேவ. இத⁴ ச தத்த² ச வாஸாகா³ரங் ட²பெத்வா உபோஸதா²கா³ரங் வா ஜந்தாக⁴ரங் வா அக்³கி³ஸாலங் வா ப⁴விஸ்ஸதீதி ஏவமாதி³னா நயேன கரொந்தஸ்ஸ அனாபத்தி.
25. Idāni vihārakārasikkhāpadaṃ dassetuṃ ‘‘mahallaka’’ntiādi āraddhaṃ. Tattha mahallakanti sassāmikabhāvena saṃyācitakuṭito mahantabhāvo etassa atthi, yasmā vā vatthuṃ desāpetvā pamāṇātikkamenāpi kātuṃ vaṭṭati, tasmā pamāṇamahantatāyapi mahallako, taṃ mahallakaṃ vihāraṃ vā katvāti attho. Ettha pana adesitavatthukabhāvena eko saṅghādiseso, sesaṃ anantarasadisameva. Idha ca tattha ca vāsāgāraṃ ṭhapetvā uposathāgāraṃ vā jantāgharaṃ vā aggisālaṃ vā bhavissatīti evamādinā nayena karontassa anāpatti.
விஹாரகாரஸிக்கா²பத³ங் ஸத்தமங்.
Vihārakārasikkhāpadaṃ sattamaṃ.
26. இதா³னி அமூலகஸிக்கா²பத³ங் பகாஸேதுங் ‘‘அமூலகேனா’’திஆதி³ ஆரத்³த⁴ங். தத்த² அமூலகேனாதி யங் சோத³கேன சுதி³தகம்ஹி புக்³க³லே அதி³ட்ட²ங் அஸுதங் அபரிஸங்கிதங், இத³ங் ஏதேஸங் த³ஸ்ஸனஸவனபரிஸங்காஸங்கா²தானங் மூலானங் அபா⁴வதோ அமூலகங், தேன அமூலகேன வத்து²னாதி ஸம்ப³ந்தோ⁴. தத்த² அதி³ட்ட²ங் நாம அத்தனோ பஸாத³சக்கு²னா வா தி³ப்³ப³சக்கு²னா வா அதி³ட்ட²ங். அஸுதங் நாம ததே²வ கேனசி வுச்சமானங் ந ஸுதங். அபரிஸங்கிதங் நாம சித்தேன அபரிஸங்கிதங், தங் பன தி³ட்ட²ஸுதமுதவஸேன திவித⁴ங். தத்த² பி⁴க்கு²ஞ்ச மாதுகா³மஞ்ச ததா²ரூபே டா²னே தி³ஸ்வா ‘‘அத்³தா⁴ இமேஹி கத’’ந்தி வா ‘‘கரிஸ்ஸந்தீ’’தி வா பரிஸங்கதி, இத³ங் தி³ட்ட²பரிஸங்கிதங் நாம. அந்த⁴காரே படிச்ச²ன்னோகாஸே வா பி⁴க்கு²ஸ்ஸ ச மாதுகா³மஸ்ஸ ச வசனங் ஸுத்வா து³தியஸ்ஸ அத்தி²பா⁴வங் அஜானந்தோ புப்³பே³ வுத்தனயேன பரிஸங்கதி, இத³ங் ஸுதபரிஸங்கிதங் நாம. து⁴த்தேஹி இத்தீ²ஹி ஸத்³தி⁴ங் பச்சந்தவிஹாரேஸு புப்ப²க³ந்த⁴ஸுராதீ³ஹி அனுப⁴வித்வா க³தட்டா²னங் தி³ஸ்வா ‘‘கேன நு கோ² இத³ங் கத’’ந்தி வீமங்ஸந்தோ தத்ர கேனசி பி⁴க்கு²னா க³ந்தா⁴தீ³ஹி பூஜா கதா ஹோதி, பே⁴ஸஜ்ஜத்தா²ய அரிட்ட²ங் வா பீதங், ஸோ தஸ்ஸ க³ந்த⁴ங் கா⁴யித்வா ‘‘அயங் ஸோ ப⁴விஸ்ஸதீ’’தி பரிஸங்கதி, இத³ங் முதபரிஸங்கிதங் நாம. ஏவங் திவிதா⁴ய பரிஸங்காய அபா⁴வேன அபரிஸங்கிதந்தி அத்தோ².
26. Idāni amūlakasikkhāpadaṃ pakāsetuṃ ‘‘amūlakenā’’tiādi āraddhaṃ. Tattha amūlakenāti yaṃ codakena cuditakamhi puggale adiṭṭhaṃ asutaṃ aparisaṅkitaṃ, idaṃ etesaṃ dassanasavanaparisaṅkāsaṅkhātānaṃ mūlānaṃ abhāvato amūlakaṃ, tena amūlakena vatthunāti sambandho. Tattha adiṭṭhaṃ nāma attano pasādacakkhunā vā dibbacakkhunā vā adiṭṭhaṃ. Asutaṃ nāma tatheva kenaci vuccamānaṃ na sutaṃ. Aparisaṅkitaṃ nāma cittena aparisaṅkitaṃ, taṃ pana diṭṭhasutamutavasena tividhaṃ. Tattha bhikkhuñca mātugāmañca tathārūpe ṭhāne disvā ‘‘addhā imehi kata’’nti vā ‘‘karissantī’’ti vā parisaṅkati, idaṃ diṭṭhaparisaṅkitaṃ nāma. Andhakāre paṭicchannokāse vā bhikkhussa ca mātugāmassa ca vacanaṃ sutvā dutiyassa atthibhāvaṃ ajānanto pubbe vuttanayena parisaṅkati, idaṃ sutaparisaṅkitaṃ nāma. Dhuttehi itthīhi saddhiṃ paccantavihāresu pupphagandhasurādīhi anubhavitvā gataṭṭhānaṃ disvā ‘‘kena nu kho idaṃ kata’’nti vīmaṃsanto tatra kenaci bhikkhunā gandhādīhi pūjā katā hoti, bhesajjatthāya ariṭṭhaṃ vā pītaṃ, so tassa gandhaṃ ghāyitvā ‘‘ayaṃ so bhavissatī’’ti parisaṅkati, idaṃ mutaparisaṅkitaṃ nāma. Evaṃ tividhāya parisaṅkāya abhāvena aparisaṅkitanti attho.
சோதெ³ந்தோதி ‘‘பாராஜிகங் த⁴ம்மங் ஆபன்னோஸி, அஸ்ஸமணோஸி, அஸக்யபுத்தியோஸீ’’திஆதீ³ஹி வசனேஹி ஸயங் சோதெ³ந்தோதி அத்தோ². ஏவங் சோதெ³ந்தஸ்ஸ வாசாய வாசாய ஸங்கா⁴தி³ஸேஸோ. சோதா³பெந்தோ வாதி அத்தனா தஸ்ஸ ஸமீபே ட²த்வா அஞ்ஞங் பி⁴க்கு²ங் ஆணாபெத்வா சோதா³பெந்தோ தஸ்ஸ ஆணத்தஸ்ஸ வாசாய வாசாய க³ருங் பு²ஸேதி அத்தோ². அத² ஸோபி சாவனாதி⁴ப்பாயேன ‘‘மயாபி தி³ட்ட²ங் அத்தீ²’’திஆதி³னா நயேன சோதே³தி, த்³வின்னம்பி வாசாய ஆபத்தி. வத்து²னா அந்திமேன சாதி பி⁴க்கு²னோ அனுரூபேஸு ஏகூனவீஸதியா பாராஜிகேஸு அஞ்ஞதரேனாதி அத்தோ². சாவேதுந்தி ப்³ரஹ்மசரியா சாவேதுங், யோ ஸுத்³த⁴ங் வா அஸுத்³த⁴ங் வா கதூபஸம்பத³ங் புக்³க³லங் ஸுத்³த⁴தி³ட்டி²கோ ஸமானோ சாவனாதி⁴ப்பாயேன சோதே³தி வா சோதா³பேதி வா, தஸ்ஸ ஸங்கா⁴தி³ஸேஸோதி அதி⁴ப்பாயோ. ஸுணமானந்தி இமினா பரம்முகா² தூ³தேன வா பண்ணேன வா சோதே³தி. சோதெ³ந்தஸ்ஸ ந ருஹதீதி தீ³பிதங் ஹோதி. பரம்முகா² பன ஸத்தஹி ஆபத்திக்க²ந்தே⁴ஹி வத³ந்தஸ்ஸ து³க்கடங்.
Codentoti ‘‘pārājikaṃ dhammaṃ āpannosi, assamaṇosi, asakyaputtiyosī’’tiādīhi vacanehi sayaṃ codentoti attho. Evaṃ codentassa vācāya vācāya saṅghādiseso. Codāpento vāti attanā tassa samīpe ṭhatvā aññaṃ bhikkhuṃ āṇāpetvā codāpento tassa āṇattassa vācāya vācāya garuṃ phuseti attho. Atha sopi cāvanādhippāyena ‘‘mayāpi diṭṭhaṃ atthī’’tiādinā nayena codeti, dvinnampi vācāya āpatti. Vatthunā antimena cāti bhikkhuno anurūpesu ekūnavīsatiyā pārājikesu aññatarenāti attho. Cāvetunti brahmacariyā cāvetuṃ, yo suddhaṃ vā asuddhaṃ vā katūpasampadaṃ puggalaṃ suddhadiṭṭhiko samāno cāvanādhippāyena codeti vā codāpeti vā, tassa saṅghādisesoti adhippāyo. Suṇamānanti iminā parammukhā dūtena vā paṇṇena vā codeti. Codentassa na ruhatīti dīpitaṃ hoti. Parammukhā pana sattahi āpattikkhandhehi vadantassa dukkaṭaṃ.
அமூலகஸிக்கா²பத³ங் அட்ட²மங்.
Amūlakasikkhāpadaṃ aṭṭhamaṃ.
27. இதா³னி அஞ்ஞபா⁴கி³யஸிக்கா²பத³ங் த³ஸ்ஸேதுங் ‘‘அஞ்ஞஸ்ஸ கிரிய’’ந்திஆதி³மாஹ. தத்த² அஞ்ஞஸ்ஸ கிரியந்தி அஞ்ஞஸ்ஸ க²த்தியாதி³ஜாதிகஸ்ஸ பாராஜிகஸ்ஸ வீதிக்கமஸங்கா²தங் கிரியங் தி³ஸ்வாதி ஸம்ப³ந்தோ⁴. தேன லேஸேனாதி ‘‘த³ஸ லேஸா ஜாதிலேஸோ நாமலேஸோ கொ³த்தலேஸோ லிங்க³லேஸோ ஆபத்திலேஸோ பத்தலேஸோ சீவரலேஸோ உபஜ்ஜா²யலேஸோ ஆசரியலேஸோ ஸேனாஸனலேஸோ’’தி (பாரா॰ 394) ஏவங் வுத்தேஸு த³ஸஸு லேஸேஸு யோ தஸ்மிங் புக்³க³லே தி³ஸ்ஸதி, தேன லேஸேன தத³ஞ்ஞங் புக்³க³லங் ப்³ரஹ்மசரியா சாவேதுங் அந்திமவத்து²னா சோதெ³ந்தோ க³ருகங் பு²ஸேதி அத்தோ². தத்த² அஞ்ஞம்பி வத்து²ங் லிஸ்ஸதி ஸிலிஸ்ஸதி வோஹாரமத்தேனேவ ஈஸகங் அல்லீயதீதி லேஸோ, ஜாதியேவ லேஸோ ஜாதிலேஸோ. ஏஸ நயோ ஸேஸபதே³ஸுபி. லேஸேன சோதெ³ந்தோ கத²ங் சோதே³தி? அஞ்ஞோ க²த்தியஜாதிகோ இமினா சோத³கேன பாராஜிகங் த⁴ம்மங் அஜ்ஜா²பஜ்ஜந்தோ தி³ட்டோ² ஹோதி, ஸோ அஞ்ஞங் அத்தனோ வேரிங் க²த்தியஜாதிகங் பி⁴க்கு²ங் பஸ்ஸித்வா தங் க²த்தியஜாதிலேஸங் க³ஹெத்வா ஏவங் சோதே³தி ‘‘க²த்தியோ மயா தி³ட்டோ² பாராஜிகங் த⁴ம்மங் அஜ்ஜா²பஜ்ஜந்தோ, த்வம்பி க²த்தியோ பாராஜிகங் த⁴ம்மங் ஆபன்னோஸீ’’தி வா ‘‘ஸோ த்வங் க²த்தியோ, நாஞ்ஞோ, பாராஜிகங் த⁴ம்மங் அஜ்ஜா²பன்னோஸீ’’தி வா சோதே³தி. ஏவங் நாமலேஸாத³யோபி வேதி³தப்³பா³.
27. Idāni aññabhāgiyasikkhāpadaṃ dassetuṃ ‘‘aññassa kiriya’’ntiādimāha. Tattha aññassa kiriyanti aññassa khattiyādijātikassa pārājikassa vītikkamasaṅkhātaṃ kiriyaṃ disvāti sambandho. Tena lesenāti ‘‘dasa lesā jātileso nāmaleso gottaleso liṅgaleso āpattileso pattaleso cīvaraleso upajjhāyaleso ācariyaleso senāsanaleso’’ti (pārā. 394) evaṃ vuttesu dasasu lesesu yo tasmiṃ puggale dissati, tena lesena tadaññaṃ puggalaṃ brahmacariyā cāvetuṃ antimavatthunā codento garukaṃ phuseti attho. Tattha aññampi vatthuṃ lissati silissati vohāramatteneva īsakaṃ allīyatīti leso, jātiyeva leso jātileso. Esa nayo sesapadesupi. Lesena codento kathaṃ codeti? Añño khattiyajātiko iminā codakena pārājikaṃ dhammaṃ ajjhāpajjanto diṭṭho hoti, so aññaṃ attano veriṃ khattiyajātikaṃ bhikkhuṃ passitvā taṃ khattiyajātilesaṃ gahetvā evaṃ codeti ‘‘khattiyo mayā diṭṭho pārājikaṃ dhammaṃ ajjhāpajjanto, tvampi khattiyo pārājikaṃ dhammaṃ āpannosī’’ti vā ‘‘so tvaṃ khattiyo, nāñño, pārājikaṃ dhammaṃ ajjhāpannosī’’ti vā codeti. Evaṃ nāmalesādayopi veditabbā.
அஞ்ஞபா⁴கி³யஸிக்கா²பத³ங் நவமங்.
Aññabhāgiyasikkhāpadaṃ navamaṃ.
28. எத்தாவதா ‘‘க³ருகா நவா’’தி உத்³தி³ட்டே² வித்தா²ரதோ த³ஸ்ஸெத்வா இதா³னி தேஸு ஆபன்னேஸு படிபஜ்ஜனாகாரங் த³ஸ்ஸேதுங் ‘‘சா²தே³தி ஜானமாபன்ன’’ந்திஆதி³ வுத்தங். தஸ்ஸாயங் பிண்ட³த்தோ² – யோ பி⁴க்கு² ‘‘அயங் இத்த²ன்னாமா ஆபத்தீ’’தி ஆபத்திவஸேன வா ‘‘இத³ங் பி⁴க்கூ²னங் ந வட்டதீ’’தி ஏவங் வத்து²வஸேன வா ஜானமாபன்னங் ஆபத்திங் யாவ சா²தே³தி, தாவ தேன பி⁴க்கு²னா அகாமா பரிவாஸோ வஸிதப்³போ³தி. சரெய்யாதி மானத்தங் ஸமாதா³ய வஸெய்ய. கித்தகங் தி³வஸந்தி சே? ச² ரத்தியோ. மானத்தவாஸோ பன ஸங்கே⁴யேவ, ந க³ணே, ந புக்³க³லே, தேன வுத்தங் ‘‘ஸங்கே⁴’’தி. பரிவுத்தோ²தி ‘‘தயோ கோ² உபாலி பாரிவாஸிகஸ்ஸ பி⁴க்கு²னோ ரத்திச்சே²தா³ ஸஹவாஸோ விப்பவாஸோ அனாரோசனா’’தி (சூளவ॰ 83) ஏவங் வுத்தங் ரத்திச்சே²த³ங் அகத்வா பரிவுத்தோ²தி அத்தோ². தத்த² ஸஹவாஸோதி பகதத்தேன பி⁴க்கு²னா ஸத்³தி⁴ங் ஏகச்ச²ன்னே உத³கபாதட்டா²னப்³ப⁴ந்தரே வாஸோ. விப்பவாஸோ நாம அஞ்ஞங் பகதத்தங் பி⁴க்கு²ங் வினா வாஸோ. அனாரோசனாதி ஆக³ந்துகாதீ³னங் அனாரோசனா. ஏதேஸு தீஸு ஏகேனாபி ரத்திச்சே²தோ³ ஹோதி ஏவ. எத்த² பன உபசாரஸீமக³தானங் ஆரோசேதப்³ப³ங், ந ப³ஹி டி²தானங், ப³ஹி டி²தானம்பி ஸசே ஸத்³த³ங் ஸுணாதி, பஸ்ஸதி, தூ³ரங் வா க³ந்த்வா ஆரோசேதப்³ப³மேவ, அனாரோசெந்தஸ்ஸ ரத்திச்சே²தோ³ சேவ வத்தபே⁴தே³ து³க்கடஞ்ச ஹோதி. அஜானந்தஸ்ஸேவ உபசாரஸீமங் பவிஸித்வா க³ச்ச²ந்தி சே, ரத்திச்சே²தோ³வ ஹோதி, ந வத்தபே⁴தோ³.
28. Ettāvatā ‘‘garukā navā’’ti uddiṭṭhe vitthārato dassetvā idāni tesu āpannesu paṭipajjanākāraṃ dassetuṃ ‘‘chādeti jānamāpanna’’ntiādi vuttaṃ. Tassāyaṃ piṇḍattho – yo bhikkhu ‘‘ayaṃ itthannāmā āpattī’’ti āpattivasena vā ‘‘idaṃ bhikkhūnaṃ na vaṭṭatī’’ti evaṃ vatthuvasena vā jānamāpannaṃ āpattiṃ yāva chādeti, tāva tena bhikkhunā akāmā parivāso vasitabboti. Careyyāti mānattaṃ samādāya vaseyya. Kittakaṃ divasanti ce? Cha rattiyo. Mānattavāso pana saṅgheyeva, na gaṇe, na puggale, tena vuttaṃ ‘‘saṅghe’’ti. Parivutthoti ‘‘tayo kho upāli pārivāsikassa bhikkhuno ratticchedā sahavāso vippavāso anārocanā’’ti (cūḷava. 83) evaṃ vuttaṃ ratticchedaṃ akatvā parivutthoti attho. Tattha sahavāsoti pakatattena bhikkhunā saddhiṃ ekacchanne udakapātaṭṭhānabbhantare vāso. Vippavāso nāma aññaṃ pakatattaṃ bhikkhuṃ vinā vāso. Anārocanāti āgantukādīnaṃ anārocanā. Etesu tīsu ekenāpi ratticchedo hoti eva. Ettha pana upacārasīmagatānaṃ ārocetabbaṃ, na bahi ṭhitānaṃ, bahi ṭhitānampi sace saddaṃ suṇāti, passati, dūraṃ vā gantvā ārocetabbameva, anārocentassa ratticchedo ceva vattabhede dukkaṭañca hoti. Ajānantasseva upacārasīmaṃ pavisitvā gacchanti ce, ratticchedova hoti, na vattabhedo.
சிண்ணமானத்தந்தி ‘‘சத்தாரோ கோ², உபாலி, மானத்தசாரிகஸ்ஸ பி⁴க்கு²னோ ரத்திச்சே²தா³ ஸஹவாஸோ விப்பவாஸோ அனாரோசனா ஊனே க³ணே சரண’’ந்தி (சூளவ॰ 92) ஏவங் வுத்தங் ரத்திச்சே²த³ங் அகத்வா சிண்ணமானத்தங் பரினிட்டி²தமானத்தந்தி அத்தோ². எத்த² பன ஸஹவாஸாத³யோ பரிவாஸே வுத்தப்பகாரா ஏவ. ‘‘ஊனே க³ணே சரண’’ந்தி எத்த² க³ணோ சத்தாரோ வா அதிரேகா வா பி⁴க்கூ², தஸ்மா ஸசேபி தீஹி பி⁴க்கூ²ஹி ஸத்³தி⁴ங் வஸதி, ரத்திச்சே²தோ³ ஹோதியேவ, ‘‘ஸசே பன தேன தேஸங் அத்தி²பா⁴வங் தி³ஸ்வா ஆரோசிதே பக்கமந்தி, ஊனே க³ணே சரணதோ³ஸோ ந ஹோதீ’’தி (சூளவ॰ அட்ட²॰ 97) அட்ட²கதா²ஸு வுத்தங் கிர. அப்³பெ⁴ய்யாதி தங் பி⁴க்கு²ங் வீஸதிக³ணோ ஸங்கோ⁴ அப்³பெ⁴ய்ய ஸம்படிச்செ²ய்ய, அப்³பா⁴னகம்மவஸேன ஓஸாரெய்யாதி அத்தோ². ஸசே ஏகேனபி ஊனோ வீஸதிக³ணோ பி⁴க்கு²ஸங்கோ⁴ தங் பி⁴க்கு²ங் அப்³பெ⁴ய்ய, ஸோ ச பி⁴க்கு² ந அப்³பி⁴தோ, தே ச பி⁴க்கூ² கா³ரய்ஹா, து³க்கடங் ஆபஜ்ஜந்தீதி அத்தோ².
Ciṇṇamānattanti ‘‘cattāro kho, upāli, mānattacārikassa bhikkhuno ratticchedā sahavāso vippavāso anārocanā ūne gaṇe caraṇa’’nti (cūḷava. 92) evaṃ vuttaṃ ratticchedaṃ akatvā ciṇṇamānattaṃ pariniṭṭhitamānattanti attho. Ettha pana sahavāsādayo parivāse vuttappakārā eva. ‘‘Ūne gaṇe caraṇa’’nti ettha gaṇo cattāro vā atirekā vā bhikkhū, tasmā sacepi tīhi bhikkhūhi saddhiṃ vasati, ratticchedo hotiyeva, ‘‘sace pana tena tesaṃ atthibhāvaṃ disvā ārocite pakkamanti, ūne gaṇe caraṇadoso na hotī’’ti (cūḷava. aṭṭha. 97) aṭṭhakathāsu vuttaṃ kira. Abbheyyāti taṃ bhikkhuṃ vīsatigaṇo saṅgho abbheyya sampaṭiccheyya, abbhānakammavasena osāreyyāti attho. Sace ekenapi ūno vīsatigaṇo bhikkhusaṅgho taṃ bhikkhuṃ abbheyya, so ca bhikkhu na abbhito, te ca bhikkhū gārayhā, dukkaṭaṃ āpajjantīti attho.
29. இதா³னி யதா² சா²தி³தா ஆபத்தி ச²ன்னா ஹோதி, தங் பகாரங் த³ஸ்ஸேதுங் ‘‘ஆபத்தீ’’திஆதி³ வுத்தங். தத்தா²யங் பத³யோஜனா – ஆபத்திதா ச அனுக்கி²த்ததா ச அனந்தராயதா ச பஹுத்ததா ச ஆபத்தினுக்கி²த்தஅனந்தராயபஹுத்ததாயோ, ஏதாஸு சதூஸு ததா²ஸஞ்ஞிதா ச சா²தே³துகாமோ ஹுத்வா சா²த³னா சாதி ஏவங் த³ஸஹங்கே³ஹி அருணுக்³க³மம்ஹி ச²ன்னா ஹோதீதி. எத்த² பன ஆபத்திஆதீ³ஸு சதூஸு ஆபத்திஸஞ்ஞிதா ச அனுக்கி²த்தஸஞ்ஞிதா ச அனந்தராயஸஞ்ஞிதா ச பஹுத்தஸஞ்ஞிதா சாதி ஏவங் ஸஞ்ஞாவஸேன யோஜெத்வா அட்ட²ங்கா³னி க³ஹேதப்³பா³னி, சா²தே³துகாமோதி இத³மேகங், சா²த³னாதி இத³மேகந்தி ஏவங் த³ஸ.
29. Idāni yathā chāditā āpatti channā hoti, taṃ pakāraṃ dassetuṃ ‘‘āpattī’’tiādi vuttaṃ. Tatthāyaṃ padayojanā – āpattitā ca anukkhittatā ca anantarāyatā ca pahuttatā ca āpattinukkhittaanantarāyapahuttatāyo, etāsu catūsu tathāsaññitā ca chādetukāmo hutvā chādanā cāti evaṃ dasahaṅgehi aruṇuggamamhi channā hotīti. Ettha pana āpattiādīsu catūsu āpattisaññitā ca anukkhittasaññitā ca anantarāyasaññitā ca pahuttasaññitā cāti evaṃ saññāvasena yojetvā aṭṭhaṅgāni gahetabbāni, chādetukāmoti idamekaṃ, chādanāti idamekanti evaṃ dasa.
ஏதேஸு பன ஆதி³தோ பட்டா²ய அயங் வினிச்ச²யோ – ‘‘ஆபத்தி ச ஹோதி ஆபத்திஸஞ்ஞீ சா’’தி எத்த² யங் ஆபன்னோ, ஸா தேரஸன்னங் அஞ்ஞதரா ஹோதி, ஸோபி ச தத்த² க³ருகாபத்திஸஞ்ஞீயேவ ஹுத்வா ஜானந்தோ சா²தே³தி, ச²ன்னா ஹோதி. ஸசே தத்த² அனாபத்திஸஞ்ஞீ வா அஞ்ஞாபத்திஸஞ்ஞீ வா வேமதிகோ வா ஹோதி, அச்ச²ன்னாவ ஹோதி. திவித⁴ங் பன உக்கே²பனீயகம்மங், தேன அகதோ அனுக்கி²த்தோ. ஸோ சே பகதத்தஸஞ்ஞீ ஹுத்வா சா²தே³தி, ச²ன்னா ஹோதி. ஸசே அபகதத்தஸஞ்ஞீ சா²தே³தி, அச்ச²ன்னா ஹோதி. அபகதத்தேன பன பகதத்தஸஞ்ஞினாபி அபகதத்தஸஞ்ஞினாபி சா²தி³தங் அச்சா²தி³தமேவ ஹோதீதி. அனந்தராயிகோதி யஸ்ஸ த³ஸஸு ராஜசோரஅக்³கி³உத³கமனுஸ்ஸாமனுஸ்ஸவாளஸரீஸபஜீவிதப்³ரஹ்மசரியந்தராயேஸுபி ஏகோபி நத்தி², ஸோ சே அனந்தராயிகஸஞ்ஞீ ஹுத்வா சா²தே³தி, ச²ன்னா ஹோதி. ஸசே ஸோ அந்த⁴காரபீ⁴ருகோ அனந்தராயே ஏவ வாளாதி³அந்தராயஸஞ்ஞீ ஹுத்வா சா²தே³தி, அச்ச²ன்னாவ ஹோதி. பஹூதி யோ ஸக்கோதி ஸபா⁴க³பி⁴க்கு²னோ ஸமீபங் க³ந்துஞ்சேவ ஆரோசிதுஞ்ச , ஸோ சே பஹுஸஞ்ஞீ ஹுத்வா சா²தே³தி, ச²ன்னா ஹோதி. யோ பன அபஹு ஹுத்வா பஹுஸஞ்ஞீ, பஹு வா அபஹுஸஞ்ஞீ ஹுத்வா சா²தே³தி, அச்ச²ன்னாவ ஹோதீதி.
Etesu pana ādito paṭṭhāya ayaṃ vinicchayo – ‘‘āpatti ca hoti āpattisaññī cā’’ti ettha yaṃ āpanno, sā terasannaṃ aññatarā hoti, sopi ca tattha garukāpattisaññīyeva hutvā jānanto chādeti, channā hoti. Sace tattha anāpattisaññī vā aññāpattisaññī vā vematiko vā hoti, acchannāva hoti. Tividhaṃ pana ukkhepanīyakammaṃ, tena akato anukkhitto. So ce pakatattasaññī hutvā chādeti, channā hoti. Sace apakatattasaññī chādeti, acchannā hoti. Apakatattena pana pakatattasaññināpi apakatattasaññināpi chāditaṃ acchāditameva hotīti. Anantarāyikoti yassa dasasu rājacoraaggiudakamanussāmanussavāḷasarīsapajīvitabrahmacariyantarāyesupi ekopi natthi, so ce anantarāyikasaññī hutvā chādeti, channā hoti. Sace so andhakārabhīruko anantarāye eva vāḷādiantarāyasaññī hutvā chādeti, acchannāva hoti. Pahūti yo sakkoti sabhāgabhikkhuno samīpaṃ gantuñceva ārocituñca , so ce pahusaññī hutvā chādeti, channā hoti. Yo pana apahu hutvā pahusaññī, pahu vā apahusaññī hutvā chādeti, acchannāva hotīti.
அருணுக்³க³மம்ஹீதி எத்த² புரேப⁴த்தங் வா ஆபத்திங் ஆபன்னோ ஹோதி பச்சா²ப⁴த்தங் வா, யாவ அருணங் ந உக்³க³ச்ச²தி, தாவ ஆரோசேதப்³பா³. ஸசே பன அருணப்³ப⁴ந்தரே ஸதக்க²த்தும்பி சா²தே³துகாமதா உப்பஜ்ஜதி, அச்ச²ன்னாவ ஹோதி. ஆரோசெந்தோ பன ஸபா⁴க³ஸங்கா⁴தி³ஸேஸங் ஆபன்னஸ்ஸ ஆரோசேதுங் ந வட்டதி. ஸசே ஆரோசேதி, ஆபத்தி பன ஆவிகதா ஹோதி, ஆரோசனபச்சயா பன அஞ்ஞங் து³க்கடங் ஆபத்திங் ஆபஜ்ஜதி. இமினா அஞ்ஞம்பி வத்து²ஸபா⁴கா³பத்திங் ஆரோசேதுங் ந வட்டதீதி தீ³பிதோ ஹோதி. ஆரோசெந்தேன பன ‘‘அஹங் தவ ஸந்திகே ஏகங் ஆபத்திங் ஆவி கரோமீ’’தி வா ‘‘ஆசிக்கா²மீ’’தி வா ‘‘ஆரோசேமீ’’தி வா ‘‘ஏகங் ஆபத்திங் ஆபன்னபா⁴வங் ஜானாஹீ’’தி வா ‘‘ஏகங் க³ருகாபத்திங் ஆவி கரோமீ’’தி வா ஆதி³னா நயேன வத்தப்³ப³ங், எத்தாவதா அச்ச²ன்னாவ ஹோதி. ஸசே ‘‘லஹுகாபத்திங் ஆரோசேமீ’’தி வத³தி, ச²ன்னாவ ஹோதீதி. ஸங்கா⁴தி³ஸேஸவினிச்ச²யோ.
Aruṇuggamamhīti ettha purebhattaṃ vā āpattiṃ āpanno hoti pacchābhattaṃ vā, yāva aruṇaṃ na uggacchati, tāva ārocetabbā. Sace pana aruṇabbhantare satakkhattumpi chādetukāmatā uppajjati, acchannāva hoti. Ārocento pana sabhāgasaṅghādisesaṃ āpannassa ārocetuṃ na vaṭṭati. Sace āroceti, āpatti pana āvikatā hoti, ārocanapaccayā pana aññaṃ dukkaṭaṃ āpattiṃ āpajjati. Iminā aññampi vatthusabhāgāpattiṃ ārocetuṃ na vaṭṭatīti dīpito hoti. Ārocentena pana ‘‘ahaṃ tava santike ekaṃ āpattiṃ āvi karomī’’ti vā ‘‘ācikkhāmī’’ti vā ‘‘ārocemī’’ti vā ‘‘ekaṃ āpattiṃ āpannabhāvaṃ jānāhī’’ti vā ‘‘ekaṃ garukāpattiṃ āvi karomī’’ti vā ādinā nayena vattabbaṃ, ettāvatā acchannāva hoti. Sace ‘‘lahukāpattiṃ ārocemī’’ti vadati, channāva hotīti. Saṅghādisesavinicchayo.
ஸங்கா⁴தி³ஸேஸனித்³தே³ஸவண்ணனா நிட்டி²தா.
Saṅghādisesaniddesavaṇṇanā niṭṭhitā.
