| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
2. ஸங்கா⁴தி³ஸேஸனித்³தே³ஸவண்ணனா
2. Saṅghādisesaniddesavaṇṇanā
19. வுட்டா²னஸ்ஸ க³ருகத்தா க³ருகாதி ஸங்கா⁴தி³ஸேஸா வுச்சந்தி. நவாதி தேஸங் க³ணனபரிச்சே²தோ³. நனு ‘‘நவா’’தி கஸ்மா வுத்தங், ‘‘தேரஸா’’தி வத்தப்³ப³ந்தி? நாயங் தோ³ஸோ, சிரேனாபஜ்ஜிதப்³பே³ சத்தாரோ யாவததியகே ட²பெத்வா வீதிக்கமக்க²ணேயேவ ஆபஜ்ஜிதப்³பா³ பட²மாபத்திகா வுச்சந்தீதி. இதா³னி தே த³ஸ்ஸேதுங் ‘‘மோசேதுகாமதா’’திஆதி³ ஆரத்³த⁴ங். தத்த² ஸுக்கஸ்ஸாதி ஆஸயதா⁴துனானத்ததோ நீலாதி³வஸேன த³ஸவிதே⁴ ஸுக்கே யஸ்ஸ கஸ்ஸசி ஸுக்கஸ்ஸ. மோசேதுகாமதாதி மோசேதுகாமதாய, ய-காரோ லுத்தனித்³தி³ட்டோ². இமினா பன வசனேன மோசனஸ்ஸாத³ முச்சனஸ்ஸாத³ முத்தஸ்ஸாத³மேது²னஸ்ஸாத³ ப²ஸ்ஸஸ்ஸாத³ கண்டு³வனஸ்ஸாத³ த³ஸ்ஸனஸ்ஸாத³ நிஸஜ்ஜனஸ்ஸாத³ வாசஸ்ஸாத³ கே³ஹஸிதபேம வனப⁴ங்கி³ய ஸங்கா²தேஸு ஏகாத³ஸஸ்ஸாதே³ஸு ஏகங்யேவ மோசனஸ்ஸாத³ங் த³ஸ்ஸேதி.
19. Vuṭṭhānassa garukattā garukāti saṅghādisesā vuccanti. Navāti tesaṃ gaṇanaparicchedo. Nanu ‘‘navā’’ti kasmā vuttaṃ, ‘‘terasā’’ti vattabbanti? Nāyaṃ doso, cirenāpajjitabbe cattāro yāvatatiyake ṭhapetvā vītikkamakkhaṇeyeva āpajjitabbā paṭhamāpattikā vuccantīti. Idāni te dassetuṃ ‘‘mocetukāmatā’’tiādi āraddhaṃ. Tattha sukkassāti āsayadhātunānattato nīlādivasena dasavidhe sukke yassa kassaci sukkassa. Mocetukāmatāti mocetukāmatāya, ya-kāro luttaniddiṭṭho. Iminā pana vacanena mocanassāda muccanassāda muttassādamethunassāda phassassāda kaṇḍuvanassāda dassanassāda nisajjanassāda vācassāda gehasitapema vanabhaṅgiya saṅkhātesu ekādasassādesu ekaṃyeva mocanassādaṃ dasseti.
தத்த² மோசனாய அஸ்ஸாதோ³ ஸுக²வேத³னா மோசனஸ்ஸாதோ³. முச்சனே அத்தனோ த⁴ம்மதாய முச்சனே அஸ்ஸாதோ³ முச்சனஸ்ஸாதோ³. ஏவங் ஸப்³ப³த்த² ஸத்தமீதப்புரிஸேன அத்தோ² த³ட்ட²ப்³போ³. இமேஹி பன நவஹி பதே³ஹி ஸம்பயுத்தஅஸ்ஸாத³ஸீஸேன ராகோ³ வுத்தோ. கே³ஹனிஸ்ஸிதேஸு மாதாதீ³ஸு பேமங் கே³ஹே ஸிதங் பேமந்தி கே³ஹஸிதபேமங், இமினா ஸரூபேனேவ ராகோ³ வுத்தோ. ஸந்த²வகரணத்தா²ய இத்தி²யா பேஸிதபுப்பா²தி³ வனப⁴ங்கி³யங், இமினா ச வத்து²வஸேன ராகோ³ வுத்தோ. மேது²னஸ்ஸாதோ³பி இத்தி²யா க³ஹணப்பயோகே³ன வேதி³தப்³போ³. ஸப்³ப³த்தே²வ ச பன சேதனானிமித்துபக்கமமோசனே ஸதி விஸங்கேதாபா⁴வோ வேதி³தப்³போ³. உபக்கம்ம ஹத்தா²தி³னா நிமித்தே உபக்கமித்வா. அஞ்ஞத்ர ஸுபினந்தேனாதி ஸுபினோயேவ ஸுபினந்தோ ‘‘கம்மமேவ கம்மந்தோ’’திஆதீ³ஸு விய அந்த-ஸத்³த³ஸ்ஸ தப்³பா⁴வவுத்தித்தா. தங் ஸுபினந்தங் வினா விமோசயங் ஸுக்கங் விமோசெந்தோ ஸமணோ யோ கோசி பி⁴க்கு² க³ருகங் க³ருகாபத்திஸங்கா²தங் ஸங்கா⁴தி³ஸேஸங் பு²ஸே பு²ஸெய்ய, ஆபஜ்ஜெய்யாதி வுத்தங் ஹோதி. எத்த² ச அஜ்ஜ²த்தரூபப³ஹித்³தா⁴ரூபஉப⁴யரூபஆகாஸேகடிகம்பனஸங்கா²தேஸு சதூஸு உபாயேஸு ஸதி ராகூ³பத்த²ம்பா⁴தீ³ஸு ச காலேஸு யேன கேனசி அங்க³ஜாதே கம்மஞ்ஞதங் பத்தே ‘‘ஆரொக்³யத்தா²யா’’திஆதீ³ஸு யேன கேனசி அதி⁴ப்பாயேன அதி⁴ப்பாயவத்து²பூ⁴தங் யங் கிஞ்சி ஸுக்கங் மோசனஸ்ஸாத³சேதனாய ஏவ நிமித்தே உபக்கம்ம மோசெந்தோ ஸங்கா⁴தி³ஸேஸங் ஆபஜ்ஜதீதி ஸப்³ப³தா² அதி⁴ப்பாயோ த³ட்ட²ப்³போ³.
Tattha mocanāya assādo sukhavedanā mocanassādo. Muccane attano dhammatāya muccane assādo muccanassādo. Evaṃ sabbattha sattamītappurisena attho daṭṭhabbo. Imehi pana navahi padehi sampayuttaassādasīsena rāgo vutto. Gehanissitesu mātādīsu pemaṃ gehe sitaṃ pemanti gehasitapemaṃ, iminā sarūpeneva rāgo vutto. Santhavakaraṇatthāya itthiyā pesitapupphādi vanabhaṅgiyaṃ, iminā ca vatthuvasena rāgo vutto. Methunassādopi itthiyā gahaṇappayogena veditabbo. Sabbattheva ca pana cetanānimittupakkamamocane sati visaṅketābhāvo veditabbo. Upakkamma hatthādinā nimitte upakkamitvā. Aññatra supinantenāti supinoyeva supinanto ‘‘kammameva kammanto’’tiādīsu viya anta-saddassa tabbhāvavuttittā. Taṃ supinantaṃ vinā vimocayaṃ sukkaṃ vimocento samaṇo yo koci bhikkhu garukaṃ garukāpattisaṅkhātaṃ saṅghādisesaṃ phuse phuseyya, āpajjeyyāti vuttaṃ hoti. Ettha ca ajjhattarūpabahiddhārūpaubhayarūpaākāsekaṭikampanasaṅkhātesu catūsu upāyesu sati rāgūpatthambhādīsu ca kālesu yena kenaci aṅgajāte kammaññataṃ patte ‘‘ārogyatthāyā’’tiādīsu yena kenaci adhippāyena adhippāyavatthubhūtaṃ yaṃ kiñci sukkaṃ mocanassādacetanāya eva nimitte upakkamma mocento saṅghādisesaṃ āpajjatīti sabbathā adhippāyo daṭṭhabbo.
பட²மோ.
Paṭhamo.
20. காயஸங்ஸக்³க³ராக³வாதி காயே ஸங்ஸக்³கோ³, தஸ்மிங் ராகோ³, ஸோ அஸ்ஸ அத்தீ²தி வந்து, காயஸங்ஸக்³க³ராக³ஸமங்கீ³தி அத்தோ². ஸமணோ இத்தி²ஸஞ்ஞீதி ஸம்ப³ந்தோ⁴. உபக்கம்மாதி காயேன வாயமித்வா. மனுஸ்ஸித்தி²ங் ஸம்பு²ஸந்தோதி அந்தமஸோ லோமேனபி பராமஸந்தோ க³ருகங் பு²ஸேதி யோஜனா. மனுஸ்ஸபூ⁴தா அமதா இத்தீ² மனுஸ்ஸித்தீ². தத்த² ‘‘காயஸங்ஸக்³க³ராக³வா’’தி இமினா மாதுபேமாதி³ங் , இத்தி²யா க³ஹிதமொக்கா²தி⁴ப்பாயஞ்ச படிக்கி²பதி. இத்தி²யா வேமதிகஸ்ஸ, பண்ட³கபுரிஸதிரச்சா²னக³தஸஞ்ஞிஸ்ஸ ச து²ல்லச்சயங். இத்தி²யா பன காயேன காயப்படிப³த்³தா⁴மஸனே, காயப்படிப³த்³தே⁴ன காயாமஸனே ச யக்கீ²பேதீபண்ட³கானங் காயேன காயாமஸனே ச புரிஸதிரச்சா²னக³தித்தீ²னங் காயேன காயாமஸனேபி து³க்கடங், ததா²யக்கீ²ஆதீ³னங் காயேன காயப்படிப³த்³தா⁴தீ³ஸு ச. மதித்தி²யா பன து²ல்லச்சயங். இத்தி²யா பன பு²ஸியமானோ ஸேவனாதி⁴ப்பாயோபி ஸசே காயேன ந வாயமதி, அனாபத்தி.
20.Kāyasaṃsaggarāgavāti kāye saṃsaggo, tasmiṃ rāgo, so assa atthīti vantu, kāyasaṃsaggarāgasamaṅgīti attho. Samaṇo itthisaññīti sambandho. Upakkammāti kāyena vāyamitvā. Manussitthiṃ samphusantoti antamaso lomenapi parāmasanto garukaṃ phuseti yojanā. Manussabhūtā amatā itthī manussitthī. Tattha ‘‘kāyasaṃsaggarāgavā’’ti iminā mātupemādiṃ , itthiyā gahitamokkhādhippāyañca paṭikkhipati. Itthiyā vematikassa, paṇḍakapurisatiracchānagatasaññissa ca thullaccayaṃ. Itthiyā pana kāyena kāyappaṭibaddhāmasane, kāyappaṭibaddhena kāyāmasane ca yakkhīpetīpaṇḍakānaṃ kāyena kāyāmasane ca purisatiracchānagatitthīnaṃ kāyena kāyāmasanepi dukkaṭaṃ, tathāyakkhīādīnaṃ kāyena kāyappaṭibaddhādīsu ca. Matitthiyā pana thullaccayaṃ. Itthiyā pana phusiyamāno sevanādhippāyopi sace kāyena na vāyamati, anāpatti.
து³தியோ.
Dutiyo.
21. ததா²தி இத்தி²ஸஞ்ஞீ. ஸுணந்திந்தி விஞ்ஞத்திபதே² ட²த்வா அத்தனோ வசனங் ஸுணந்திஞ்ச. விஞ்ஞுஞ்சாதி து³ட்டு²ல்லாது³ட்டு²ல்லஸல்லக்க²ணஸமத்த²ஞ்ச மனுஸ்ஸித்தி²ங். மக்³க³ங் வாதி வச்சமக்³க³பஸ்ஸாவமக்³கா³னங் வஸேன மக்³க³ங் வா மேது²னங் வா ஆரப்³பா⁴தி ஸம்ப³ந்தோ⁴. து³ட்டு²ல்லவாசாராகே³னாதி து³ட்டா² ச ஸா அஸத்³த⁴ம்மப்படிஸங்யுத்ததாய தூ²லா ச லாமகஜனஸாதா⁴ரணதாயாதி து³ட்டு²ல்லா. ஸாவ புன வாசா து³ட்டு²ல்லவாசா. தஸ்ஸங் அஸ்ஸாத³ஸம்பயுத்தோ ராகோ³தி ஸமாஸோ, தேன. ஓபா⁴ஸித்வாதி வண்ணாவண்ணயாசனாதி³வஸேன அஸத்³த⁴ம்மவசனங் வத்வா. அஸுணந்தியா பன தூ³தேன வா பண்ணேன வா ஆரோசிதே அனாபத்தி. தத்த² த்³வின்னங் மக்³கா³னங் வஸேன வண்ணாவண்ணேஹி, மேது²னயாசனாதீ³ஹி வா ‘‘ஸிக²ரணீஸி, ஸம்பி⁴ன்னாஸி, உப⁴தொப்³யஞ்ஜனகாஸீ’’தி இமேஸு தீஸு அஞ்ஞதரேன அக்கோஸவசனேன வா ஓபா⁴ஸந்தஸ்ஸ ஸங்கா⁴தி³ஸேஸோ, அத⁴க்க²கஉப்³ப⁴ஜாணுமண்ட³லங் ஆதி³ஸ்ஸ வண்ணாதி³ப⁴ணனே து²ல்லச்சயங், ததா² யக்கீ²பேதீபண்ட³கானங் வச்சமக்³க³பஸ்ஸாவமக்³கே³ ஆதி³ஸ்ஸ வண்ணாதி³ப⁴ணனே மேது²னயாசனாதீ³ஸுபி. தேஸங் பன அத⁴க்க²காதி³கே து³க்கடங், ததா² மனுஸ்ஸித்தீ²னங் உப்³ப⁴க்க²கே அதோ⁴ஜாணுமண்ட³லே காயப்படிப³த்³தே⁴ ச.
21.Tathāti itthisaññī. Suṇantinti viññattipathe ṭhatvā attano vacanaṃ suṇantiñca. Viññuñcāti duṭṭhullāduṭṭhullasallakkhaṇasamatthañca manussitthiṃ. Maggaṃ vāti vaccamaggapassāvamaggānaṃ vasena maggaṃ vā methunaṃ vā ārabbhāti sambandho. Duṭṭhullavācārāgenāti duṭṭhā ca sā asaddhammappaṭisaṃyuttatāya thūlā ca lāmakajanasādhāraṇatāyāti duṭṭhullā. Sāva puna vācā duṭṭhullavācā. Tassaṃ assādasampayutto rāgoti samāso, tena. Obhāsitvāti vaṇṇāvaṇṇayācanādivasena asaddhammavacanaṃ vatvā. Asuṇantiyā pana dūtena vā paṇṇena vā ārocite anāpatti. Tattha dvinnaṃ maggānaṃ vasena vaṇṇāvaṇṇehi, methunayācanādīhi vā ‘‘sikharaṇīsi, sambhinnāsi, ubhatobyañjanakāsī’’ti imesu tīsu aññatarena akkosavacanena vā obhāsantassa saṅghādiseso, adhakkhakaubbhajāṇumaṇḍalaṃ ādissa vaṇṇādibhaṇane thullaccayaṃ, tathā yakkhīpetīpaṇḍakānaṃ vaccamaggapassāvamagge ādissa vaṇṇādibhaṇane methunayācanādīsupi. Tesaṃ pana adhakkhakādike dukkaṭaṃ, tathā manussitthīnaṃ ubbhakkhake adhojāṇumaṇḍale kāyappaṭibaddhe ca.
ததியோ.
Tatiyo.
22. அத்தகாமுபட்டா²னந்தி மேது²னத⁴ம்மஸங்கா²தேன காமேன உபட்டா²னங் காமுபட்டா²னங். அத்தனோ அத்தா²ய காமுபட்டா²னங் அத்தகாமுபட்டா²னங். அத² வா காமீயதீதி காமங், அத்தனோ காமங் அத்தகாமங், ஸயங் மேது²னராக³வஸேன பத்தி²தந்தி அத்தோ². அத்தகாமஞ்ச தங் உபட்டா²னஞ்சாதி அத்தகாமுபட்டா²னங். தஸ்ஸ வண்ணோ கு³ணோ, தங். வத்வாதி ‘‘யதி³த³ங் காமுபட்டா²னங் நாம, ஏதத³க்³க³ங் உபட்டா²னான’’ந்தி காமுபட்டா²னே வண்ணங் அந்தமஸோ ஹத்த²முத்³தா³யபி இத்தீ²தி ஸஞ்ஞீ பகாஸெத்வாதி அத்தோ². வாசாதி வாசாய யகாரலோபவஸேன. மேது²னயுத்தேனாதி மேது²னயுத்தாய, லிங்க³விபல்லாஸவஸேன தாய ‘‘அரஹஸி த்வங் மய்ஹங் மேது²னங் த⁴ம்மங் தா³து’’ந்திஆதி³காய மேது²னத⁴ம்மப்படிஸங்யுத்தாய வாசாய மேது²னயாசனே மேது²னராகி³னோதி ஸம்ப³ந்தோ⁴. மேது²னேராகோ³, ஸோ அஸ்ஸ அத்தீ²தி மேது²னராகீ³, தஸ்ஸ. க³ரு ஹோதீதி க³ருகாபத்தி ஹோதீதி அத்தோ². ம-காரோ பத³ஸந்தி⁴கரோ. எத்த² பன பண்ட³கே பண்ட³கஸஞ்ஞினோ து²ல்லச்சயங், தஸ்மிங்யேவ இத்தி²ஸஞ்ஞினோ து³க்கடங்.
22.Attakāmupaṭṭhānanti methunadhammasaṅkhātena kāmena upaṭṭhānaṃ kāmupaṭṭhānaṃ. Attano atthāya kāmupaṭṭhānaṃ attakāmupaṭṭhānaṃ. Atha vā kāmīyatīti kāmaṃ, attano kāmaṃ attakāmaṃ, sayaṃ methunarāgavasena patthitanti attho. Attakāmañca taṃ upaṭṭhānañcāti attakāmupaṭṭhānaṃ. Tassa vaṇṇo guṇo, taṃ. Vatvāti ‘‘yadidaṃ kāmupaṭṭhānaṃ nāma, etadaggaṃ upaṭṭhānāna’’nti kāmupaṭṭhāne vaṇṇaṃ antamaso hatthamuddāyapi itthīti saññī pakāsetvāti attho. Vācāti vācāya yakāralopavasena. Methunayuttenāti methunayuttāya, liṅgavipallāsavasena tāya ‘‘arahasi tvaṃ mayhaṃ methunaṃ dhammaṃ dātu’’ntiādikāya methunadhammappaṭisaṃyuttāya vācāya methunayācane methunarāginoti sambandho. Methunerāgo, so assa atthīti methunarāgī, tassa. Garu hotīti garukāpatti hotīti attho. Ma-kāro padasandhikaro. Ettha pana paṇḍake paṇḍakasaññino thullaccayaṃ, tasmiṃyeva itthisaññino dukkaṭaṃ.
சதுத்தோ².
Catuttho.
23. இத்தி²யா வா புரிஸஸ்ஸ வா ஸந்தே³ஸங் படிக்³க³ஹெத்வாதி ஸம்ப³ந்தோ⁴. இத்தி²யா வாதி ‘‘த³ஸ இத்தி²யோ மாதுரக்கி²தா பிதுரக்கி²தா’’திஆதி³னா (பாரா॰ 303) ச ‘‘த³ஸ ப⁴ரியாயோ த⁴னக்கீதா ச²ந்த³வாஸினீ’’திஆதி³னா (பாரா॰ 303) ச வுத்தாய வீஸதிவிதா⁴ய இத்தி²யா வா புரிஸஸ்ஸ வா தங்ஸம்ப³ந்த⁴வஸேன தேஸங் மாதாதீ³னங் வா. ஸந்தே³ஸந்தி இத்தி²யா வா புரிஸேன வா உபி⁴ன்னங் மாதாதீ³ஹி வா ‘‘ஏஹி, ப⁴ந்தே, இத்த²ன்னாமங் இத்தி²ங் வா புரிஸங் வா ஏவங் ப⁴ணாஹீ’’தி வுத்தங் ஜாயம்பதிபா⁴வஸன்னிஸ்ஸிதங் ஸந்தே³ஸவசனங். படிக்³க³ஹெத்வாதி ‘‘ஸாதூ⁴’’தி காயேன வா வாசாய வா ஸம்படிச்சி²த்வா. வீமங்ஸித்வாதி யத்த² பேஸிதோ, தேஸங் அதி⁴ப்பாயங் உபபரிக்கி²த்வா வா உபபரிக்கா²பெத்வா வா. ஹரங் பச்சாதி இத்தீ² வா புரிஸோ வா ‘‘ஸாதூ⁴’’தி ஸம்படிச்ச²து வா, மா வா, யேஹி பேஸிதோ, தேஸங் பச்சாஹரந்தோ வா ஹராபெந்தோ வா, ஜாயம்பதிபா⁴வோ ஹோது வா, மா வா, அகாரணமேதங். இமாய திவங்க³ஸம்பத்தியா ஸங்கா⁴தி³ஸேஸோ ச, த்³வீஹி அங்கே³ஹி பண்ட³கே ச அங்க³த்தயேனாபி து²ல்லச்சயங், ஏகேன து³க்கடங். கேசி பன ‘‘ஹரங் பச்சா²’’தி விபாட²ங் பரிகப்பெத்வா ‘‘பச்சா² ஹர’’ந்தி யோஜெந்தி, தங் ந ஸுந்த³ரங் பச்சாதி உபஸக்³க³த்தா. பத³ஸ்ஸ உபரி அத்தே² ஸஜ்ஜெந்தோ பகாஸெந்தோ க³ச்ச²தீதி ஹி உபஸக்³கோ³ நாம, தஸ்மா ‘‘பதி ஆ’’தி உபஸக்³கா³னங் ‘‘ஹர’’ந்திமஸ்ஸ பத³ஸ்ஸ உபரி ப⁴விதப்³ப³ந்தி.
23. Itthiyā vā purisassa vā sandesaṃ paṭiggahetvāti sambandho. Itthiyā vāti ‘‘dasa itthiyo māturakkhitā piturakkhitā’’tiādinā (pārā. 303) ca ‘‘dasa bhariyāyo dhanakkītā chandavāsinī’’tiādinā (pārā. 303) ca vuttāya vīsatividhāya itthiyā vā purisassa vā taṃsambandhavasena tesaṃ mātādīnaṃ vā. Sandesanti itthiyā vā purisena vā ubhinnaṃ mātādīhi vā ‘‘ehi, bhante, itthannāmaṃ itthiṃ vā purisaṃ vā evaṃ bhaṇāhī’’ti vuttaṃ jāyampatibhāvasannissitaṃ sandesavacanaṃ. Paṭiggahetvāti ‘‘sādhū’’ti kāyena vā vācāya vā sampaṭicchitvā. Vīmaṃsitvāti yattha pesito, tesaṃ adhippāyaṃ upaparikkhitvā vā upaparikkhāpetvā vā. Haraṃ paccāti itthī vā puriso vā ‘‘sādhū’’ti sampaṭicchatu vā, mā vā, yehi pesito, tesaṃ paccāharanto vā harāpento vā, jāyampatibhāvo hotu vā, mā vā, akāraṇametaṃ. Imāya tivaṅgasampattiyā saṅghādiseso ca, dvīhi aṅgehi paṇḍake ca aṅgattayenāpi thullaccayaṃ, ekena dukkaṭaṃ. Keci pana ‘‘haraṃ pacchā’’ti vipāṭhaṃ parikappetvā ‘‘pacchā hara’’nti yojenti, taṃ na sundaraṃ paccāti upasaggattā. Padassa upari atthe sajjento pakāsento gacchatīti hi upasaggo nāma, tasmā ‘‘pati ā’’ti upasaggānaṃ ‘‘hara’’ntimassa padassa upari bhavitabbanti.
பஞ்சமோ.
Pañcamo.
24. ஸங்யாசிதபரிக்கா²ரந்தி ஸங் அத்தனா யாசிதோ வாஸிஆதி³கோ பரிக்கா²ரோ யஸ்ஸா, தங். அதே³ஸிதவத்து²கந்தி உத்திது³தியகம்மேன அதே³ஸிதங் வத்து² குடிகரணப்பதே³ஸோ யஸ்ஸாதி விக்³க³ஹோ, தங். பமாணாதிக்கந்தந்தி இதா³னி மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ ஸுக³தவித³த்தி² நாம, தாய ‘‘தீ³க⁴ஸோ த்³வாத³ஸ வித³த்தி²யோ ஸுக³தஸ்ஸ வித³த்தி²யா திரியங் ஸத்தந்தரா’’தி (பாரா॰ 348) ஏவங் வுத்தப்பமாணங் ஏகதோபா⁴கே³னாபி அதிக்கந்தா பமாணாதிக்கந்தாதி தங் திரியங் சதுஹத்த²ஸங்கா²தஹெட்டி²மப்பமாணே ஸதி தீ³க⁴தோ வுத்தப்பமாணதோ கேஸக்³க³மத்தம்பி வட்³டே⁴துங் ந வட்டதி. ததோ ஊனகே, தீ³க⁴தோ ச வட்³டி⁴தே அயங் குடிஸங்க²ங் ந க³ச்ச²தீதி. ‘‘மய்ஹங் வாஸாகா³ரங் ஏத’’ந்தி ஏவங் அத்தா உத்³தே³ஸோ ஏதிஸ்ஸாதி அத்துத்³தே³ஸா. குடிந்தி உல்லித்தாதி³கங் குடிங் கத்வாதி ஸம்ப³ந்தோ⁴. தத்த² உல்லித்தா நாம அந்தோ உத்³த⁴ங்முக²ங் லித்தா. அவலித்தா நாம ப³ஹி அதோ⁴முக²ங் லித்தா. உப⁴யதா² உல்லித்தாவலித்தா. கத்வாதி அந்தோபூ⁴தகாரிதத்த²வஸேன காராபெத்வா வா.
24.Saṃyācitaparikkhāranti saṃ attanā yācito vāsiādiko parikkhāro yassā, taṃ. Adesitavatthukanti uttidutiyakammena adesitaṃ vatthu kuṭikaraṇappadeso yassāti viggaho, taṃ. Pamāṇātikkantanti idāni majjhimassa purisassa tisso vidatthiyo sugatavidatthi nāma, tāya ‘‘dīghaso dvādasa vidatthiyo sugatassa vidatthiyā tiriyaṃ sattantarā’’ti (pārā. 348) evaṃ vuttappamāṇaṃ ekatobhāgenāpi atikkantā pamāṇātikkantāti taṃ tiriyaṃ catuhatthasaṅkhātaheṭṭhimappamāṇe sati dīghato vuttappamāṇato kesaggamattampi vaḍḍhetuṃ na vaṭṭati. Tato ūnake, dīghato ca vaḍḍhite ayaṃ kuṭisaṅkhaṃ na gacchatīti. ‘‘Mayhaṃ vāsāgāraṃ eta’’nti evaṃ attā uddeso etissāti attuddesā. Kuṭinti ullittādikaṃ kuṭiṃ katvāti sambandho. Tattha ullittā nāma anto uddhaṃmukhaṃ littā. Avalittā nāma bahi adhomukhaṃ littā. Ubhayathā ullittāvalittā. Katvāti antobhūtakāritatthavasena kārāpetvā vā.
தத்தா²யங் வத்து²தே³ஸனக்கமோ – தேன குடிகாரகேன பி⁴க்கு²னா குடிவத்து²ங் ஸோதெ⁴த்வா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பணாமெத்வா பத³பா⁴ஜனே (பாரா॰ 349) வுத்தனயேன ஸங்க⁴ங் திக்க²த்துங் யாசித்வா ஸப்³பே³ வா ஸங்க⁴பரியாபன்னா, ஸங்கே⁴ன வா ஸம்மதா த்³வே தயோ பி⁴க்கூ² தத்த² நேதப்³பா³. தேஹி ச கிபில்லிகாதீ³ஹி ஸோளஸஹி உபத்³த³வேஹி விரஹிதத்தா அனாரம்ப⁴ங் அனுபத்³த³வங் த்³வீஹி சதூஹி வா ப³லிப³த்³தே³ஹி யுத்தேன ஸகடேன ஏகசக்கங் நிப்³போ³த³கபதனட்டா²னே ஏகங் ப³ஹி கத்வா ஆவிஞ்சி²துங் ஸக்குணெய்யதாய ‘‘ஸபரிக்கமன’’ந்தி ஸல்லக்கெ²த்வா ஸசேபி ஸங்க⁴ப்பஹோனகா ஹொந்தி, தத்தே²வ, நோ சே, ஸங்க⁴மஜ்ஜ²ங் க³ந்த்வா தேன பி⁴க்கு²னா யாசிதேஹி பத³பா⁴ஜனே (பாரா॰ 50, 51) வுத்தாய ஞத்திது³தியகம்மவாசாய வத்து² தே³ஸேதப்³ப³ந்தி. அதே³ஸிதவத்து²கங் பமாணாதிக்கந்தங் குடிங் கரிஸ்ஸாமீதி ஸப்³ப³ப்பயோகே³ து³க்கடங், இதா³னி த்³வீஹி பிண்டே³ஹி நிட்டா²னங் க³மிஸ்ஸதீதி பட²மபிண்ட³தா³னே து²ல்லச்சயங், து³தியதா³னேன லேபே ஸங்க⁴டிதே ஸசே அதே³ஸிதவத்து²கா ஏவ வா ஹோதி, பமாணாதிக்கந்தா ஏவ வா, ஏகோ ஸங்கா⁴தி³ஸேஸோ, ஸாரம்ப⁴அபரிக்கமனதாய த்³வே ச து³க்கடானீதி ஸசே உப⁴யவிபன்னா, த்³வே ச ஸங்கா⁴தி³ஸேஸா த்³வே ச து³க்கடானீதி ஸப்³ப³ங் ஞெய்யங்.
Tatthāyaṃ vatthudesanakkamo – tena kuṭikārakena bhikkhunā kuṭivatthuṃ sodhetvā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paṇāmetvā padabhājane (pārā. 349) vuttanayena saṅghaṃ tikkhattuṃ yācitvā sabbe vā saṅghapariyāpannā, saṅghena vā sammatā dve tayo bhikkhū tattha netabbā. Tehi ca kipillikādīhi soḷasahi upaddavehi virahitattā anārambhaṃ anupaddavaṃ dvīhi catūhi vā balibaddehi yuttena sakaṭena ekacakkaṃ nibbodakapatanaṭṭhāne ekaṃ bahi katvā āviñchituṃ sakkuṇeyyatāya ‘‘saparikkamana’’nti sallakkhetvā sacepi saṅghappahonakā honti, tattheva, no ce, saṅghamajjhaṃ gantvā tena bhikkhunā yācitehi padabhājane (pārā. 50, 51) vuttāya ñattidutiyakammavācāya vatthu desetabbanti. Adesitavatthukaṃ pamāṇātikkantaṃ kuṭiṃ karissāmīti sabbappayoge dukkaṭaṃ, idāni dvīhi piṇḍehi niṭṭhānaṃ gamissatīti paṭhamapiṇḍadāne thullaccayaṃ, dutiyadānena lepe saṅghaṭite sace adesitavatthukā eva vā hoti, pamāṇātikkantā eva vā, eko saṅghādiseso, sārambhaaparikkamanatāya dve ca dukkaṭānīti sace ubhayavipannā, dve ca saṅghādisesā dve ca dukkaṭānīti sabbaṃ ñeyyaṃ.
ச²ட்டோ².
Chaṭṭho.
25. மஹல்லகந்தி ஸஸ்ஸாமிகபா⁴வேன ஸங்யாசிதகுடிதோ மஹந்தபா⁴வேன, வத்து²ங் தே³ஸாபெத்வா பமாணாதிக்கமேனாபி காதப்³ப³பா⁴வேன ச மஹந்ததாய மஹத்தங் லாதி ஆத³தா³தீதி மஹல்லகோ. மஹத்தலக இதி டி²தே த்தஸ்ஸ லோபோ லஸ்ஸ ச த்³வித்தங், தங். வஸனங் அத்தோ² பயோஜனங் வஸனத்தோ², தாய . எத்த² பன அதே³ஸிதவத்து²பா⁴வே ஏகோ ஸங்கா⁴தி³ஸேஸோ. ஸேஸங் அனந்தரஸதி³ஸமேவ. இத⁴ ச தத்த² ச லேணகு³ஹாதிணகுடிபண்ணச்ச²த³னகே³ஹேஸு அஞ்ஞதரங் காரெந்தஸ்ஸ ச குடிம்பி அஞ்ஞஸ்ஸ வாஸத்தா²ய வாஸாகா³ரங் வா ட²பெத்வா உபோஸதா²கா³ராதீ³ஸு அஞ்ஞதரத்தா²ய கரொந்தஸ்ஸ ச அனாபத்தி.
25.Mahallakanti sassāmikabhāvena saṃyācitakuṭito mahantabhāvena, vatthuṃ desāpetvā pamāṇātikkamenāpi kātabbabhāvena ca mahantatāya mahattaṃ lāti ādadātīti mahallako. Mahattalaka iti ṭhite ttassa lopo lassa ca dvittaṃ, taṃ. Vasanaṃ attho payojanaṃ vasanattho, tāya . Ettha pana adesitavatthubhāve eko saṅghādiseso. Sesaṃ anantarasadisameva. Idha ca tattha ca leṇaguhātiṇakuṭipaṇṇacchadanagehesu aññataraṃ kārentassa ca kuṭimpi aññassa vāsatthāya vāsāgāraṃ vā ṭhapetvā uposathāgārādīsu aññataratthāya karontassa ca anāpatti.
ஸத்தமோ.
Sattamo.
26. அமூலகேன அந்திமேன வத்து²னாதி ஸம்ப³ந்தோ⁴. அமூலகேனாதி த³ஸ்ஸனஸங்கா²தஸ்ஸ, ஸவனஸங்கா²தஸ்ஸ, தி³ட்ட²ஸுதமுதவஸேன பவத்தபரிஸங்காஸங்கா²தஸ்ஸ ச மூலஸ்ஸ அபா⁴வேன நத்தி² மூலமேதஸ்ஸாதி அமூலகங், தேன. தங் பன ஸோ ஆபன்னோ வா ஹோது, நோ வா, ஏதங் இத⁴ அப்பமாணங். தத்த² பி⁴க்கு²ஞ்ச மாதுகா³மஞ்ச ததா²ரூபே டா²னே தி³ஸ்வா பரிஸங்கதி, அயங் தி³ட்ட²பரிஸங்கா. அந்த⁴காரே வா படிச்ச²ன்னே வா பி⁴க்கு²ஸ்ஸ ச மாதுகா³மஸ்ஸ ச வசனங் ஸுத்வா அஞ்ஞஸ்ஸ அத்தி²பா⁴வங் அஜானந்தோ பரிஸங்கதி, அயங் ஸுதபரிஸங்கா. து⁴த்தானங் இத்தீ²ஹி ஸத்³தி⁴ங் பச்சந்தவிஹாரேஸு புப்ப²க³ந்த⁴ஸுராதீ³ஹி அனுப⁴வித்வா க³தட்டா²னங் தி³ஸ்வா ‘‘கேன நு கோ² இத³ங் கத’’ந்தி வீமங்ஸந்தோ தத்த² கேனசி பி⁴க்கு²னா க³ந்தா⁴தீ³ஹி பூஜா கதா ஹோதி, பே⁴ஸஜ்ஜத்தா²ய அரிட்ட²ங் வா பீதங், ஸோ தஸ்ஸ க³ந்த⁴ங் கா⁴யித்வா ‘‘அயங் ஸோ ப⁴விஸ்ஸதீ’’தி பரிஸங்கதி. அயங் முதபரிஸங்கா நாம. அந்திமேன சாதி ததோ பரங் வஜ்ஜாபா⁴வேன அந்தே ப⁴வத்தா அந்திமேனேவ. வத்து²னாதி பி⁴க்கு²னோ அனுரூபேஸு ஏகூனவீஸதியா பாராஜிகேஸு த⁴ம்மேஸு அஞ்ஞதரேன பாராஜிகேன த⁴ம்மேன. ச-காரோ பனெத்த² அவதா⁴ரணே, தேன ஸங்கா⁴தி³ஸேஸாதி³ங் நிவத்தேதி. அத² வா ச-காரோ அட்டா²னப்பயுத்தோ.
26. Amūlakena antimena vatthunāti sambandho. Amūlakenāti dassanasaṅkhātassa, savanasaṅkhātassa, diṭṭhasutamutavasena pavattaparisaṅkāsaṅkhātassa ca mūlassa abhāvena natthi mūlametassāti amūlakaṃ, tena. Taṃ pana so āpanno vā hotu, no vā, etaṃ idha appamāṇaṃ. Tattha bhikkhuñca mātugāmañca tathārūpe ṭhāne disvā parisaṅkati, ayaṃ diṭṭhaparisaṅkā. Andhakāre vā paṭicchanne vā bhikkhussa ca mātugāmassa ca vacanaṃ sutvā aññassa atthibhāvaṃ ajānanto parisaṅkati, ayaṃ sutaparisaṅkā. Dhuttānaṃ itthīhi saddhiṃ paccantavihāresu pupphagandhasurādīhi anubhavitvā gataṭṭhānaṃ disvā ‘‘kena nu kho idaṃ kata’’nti vīmaṃsanto tattha kenaci bhikkhunā gandhādīhi pūjā katā hoti, bhesajjatthāya ariṭṭhaṃ vā pītaṃ, so tassa gandhaṃ ghāyitvā ‘‘ayaṃ so bhavissatī’’ti parisaṅkati. Ayaṃ mutaparisaṅkā nāma. Antimena cāti tato paraṃ vajjābhāvena ante bhavattā antimeneva. Vatthunāti bhikkhuno anurūpesu ekūnavīsatiyā pārājikesu dhammesu aññatarena pārājikena dhammena. Ca-kāro panettha avadhāraṇe, tena saṅghādisesādiṃ nivatteti. Atha vā ca-kāro aṭṭhānappayutto.
சோதெ³ந்தோ வா சோதா³பெந்தோவாசாதி யோஜேதப்³போ³. சாவேதுந்தி ப்³ரஹ்மசரியா சாவனத்தா²ய. ஏதேன ஏகங் சாவனாதி⁴ப்பாயங் க³ஹெத்வா அவஸேஸே அக்கோஸாதி⁴ப்பாயவுட்டா²பனாதி⁴ப்பாயாதி³கே ஸத்தாதி⁴ப்பாயே படிக்கி²பதி. ஸுணமானந்தி இத³ங் ‘‘சோதெ³ந்தோ’’திஆதீ³னங் கம்மபத³ங், இமினா பரம்முகா² சோத³னங் படிக்கி²பதி. பரம்முகா² பன ஸத்தஹி ஆபத்திக்க²ந்தே⁴ஹி வத³ந்தஸ்ஸ து³க்கடங். சோதெ³ந்தோதி ‘‘வத்து²ஸந்த³ஸ்ஸனா ஆபத்திஸந்த³ஸ்ஸனா ஸங்வாஸப்படிக்கே²போ ஸாமீசிப்படிக்கே²போ’’தி (பாரா॰ அட்ட²॰ 2.385-386) ஸங்கே²பதோ வுத்தானங் சதுன்னங் சோத³னானங் வஸேன ஸயங் சோதெ³ந்தோ வா. சோதா³பெந்தோ வாதி பரேன யேன கேனசி சோதா³பெந்தோ வா. தஸ்மா யோ பி⁴க்கு²ஸ்ஸ ஸமீபே ட²த்வா ‘‘த்வங் மேது²னங் த⁴ம்மங் ஸேவி, அஸ்ஸமணோஸீ’’திஆதி³னா வத்து²ஸந்த³ஸ்ஸனவஸேன வா ‘‘த்வங் மேது²னத⁴ம்மாபத்திங் ஆபன்னோஸீ’’திஆதி³னா ஆபத்திஸந்த³ஸ்ஸனவஸேன வா ‘‘அஸ்ஸமணோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா, அஸ்ஸமணோஸீ’’திஆதி³னா ஸங்வாஸப்படிக்கே²பவஸேன வா அபி⁴வாத³னாதி³ஸங்வாஸே படிக்கி²த்தே அஸ்ஸமணோதி கஸ்மாதி புட்ட²ஸ்ஸ ‘‘அஸ்ஸமணோஸீ’’திஆதி³வசனேஹி ஸாமீசிப்படிக்கே²பவஸேன வா அந்தமஸோ ஹத்த²முத்³தா³ய ஏவ வாபி ஏதமத்த²ங் தீ³பயதோ ‘‘கரோது மே ஆயஸ்மா ஓகாஸங், அஹங் தங் வத்துகாமோ’’தி ஏவங் ஓகாஸே அகாரிதே வாசாய ஸங்கா⁴தி³ஸேஸோ சேவ து³க்கடஞ்ச, ஓகாஸங் காரெத்வா சோதெ³ந்தஸ்ஸ பன ஸங்கா⁴தி³ஸேஸோவ த³ட்ட²ப்³போ³.
Codento vā codāpentovācāti yojetabbo. Cāvetunti brahmacariyā cāvanatthāya. Etena ekaṃ cāvanādhippāyaṃ gahetvā avasese akkosādhippāyavuṭṭhāpanādhippāyādike sattādhippāye paṭikkhipati. Suṇamānanti idaṃ ‘‘codento’’tiādīnaṃ kammapadaṃ, iminā parammukhā codanaṃ paṭikkhipati. Parammukhā pana sattahi āpattikkhandhehi vadantassa dukkaṭaṃ. Codentoti ‘‘vatthusandassanā āpattisandassanā saṃvāsappaṭikkhepo sāmīcippaṭikkhepo’’ti (pārā. aṭṭha. 2.385-386) saṅkhepato vuttānaṃ catunnaṃ codanānaṃ vasena sayaṃ codento vā. Codāpento vāti parena yena kenaci codāpento vā. Tasmā yo bhikkhussa samīpe ṭhatvā ‘‘tvaṃ methunaṃ dhammaṃ sevi, assamaṇosī’’tiādinā vatthusandassanavasena vā ‘‘tvaṃ methunadhammāpattiṃ āpannosī’’tiādinā āpattisandassanavasena vā ‘‘assamaṇosi, natthi tayā saddhiṃ uposatho vā pavāraṇā vā saṅghakammaṃ vā, assamaṇosī’’tiādinā saṃvāsappaṭikkhepavasena vā abhivādanādisaṃvāse paṭikkhitte assamaṇoti kasmāti puṭṭhassa ‘‘assamaṇosī’’tiādivacanehi sāmīcippaṭikkhepavasena vā antamaso hatthamuddāya eva vāpi etamatthaṃ dīpayato ‘‘karotu me āyasmā okāsaṃ, ahaṃ taṃ vattukāmo’’ti evaṃ okāse akārite vācāya saṅghādiseso ceva dukkaṭañca, okāsaṃ kāretvā codentassa pana saṅghādisesova daṭṭhabbo.
அட்ட²மோ.
Aṭṭhamo.
27. அஞ்ஞஸ்ஸாதி க²த்தியாதி³ஜாதிகஸ்ஸ பரஸ்ஸ. கிரியந்தி மேது²னவீதிக்கமஸங்கா²தங் கிரியங். தேனாதி அஞ்ஞஸ்ஸ வீதிக்கமஸங்கா²தஸ்ஸ மேது²னவீதிக்கமஸந்த³ஸ்ஸனேன கரணபூ⁴தேன. லேஸேனாதி யஸ்ஸ ஜாதிஆத³யோ ததோ அஞ்ஞம்பி வத்து²ங் லிஸ்ஸதி உத்³தி³ட்டே² வித்தா²ரங் ஸிலிஸ்ஸதி வோஹாரமத்தேனேவாதி ஜாதிஆத³யோவ ‘‘லேஸா’’தி வுச்சந்தி, தேன ஜாதிலேஸனாமலேஸாதி³னா லேஸேன. அஞ்ஞந்தி யோ வீதிக்கமந்தோ தி³ட்டோ², ததோ அபரம்பி பி⁴க்கு²ங் சாவேதுங் அந்திமேன வத்து²னா சோத³யந்தி ஸம்ப³ந்தோ⁴. கத²ங்? கோசி க²த்தியஜாதியோ வீதிக்கமந்தோ தி³ட்டோ², ததோ அஞ்ஞங் அத்தனோ வேரிங் க²த்தியஜாதிகங் பி⁴க்கு²ங் பஸ்ஸித்வா தங் க²த்தியங் ஜாதிலேஸங் க³ஹெத்வா ‘‘க²த்தியோ மயா தி³ட்டோ² வீதிக்கமந்தோ, த்வங் க²த்தியோ பாராஜிகங் த⁴ம்மங் ஆபன்னோஸீ’’தி சோதே³தி சோதா³பேதி வா. ஏவங் நாமலேஸாத³யோபி வேதி³தப்³பா³. ஸேஸா வினிச்ச²யகதா² அட்ட²மே வுத்தஸதி³ஸாயேவ.
27.Aññassāti khattiyādijātikassa parassa. Kiriyanti methunavītikkamasaṅkhātaṃ kiriyaṃ. Tenāti aññassa vītikkamasaṅkhātassa methunavītikkamasandassanena karaṇabhūtena. Lesenāti yassa jātiādayo tato aññampi vatthuṃ lissati uddiṭṭhe vitthāraṃ silissati vohāramattenevāti jātiādayova ‘‘lesā’’ti vuccanti, tena jātilesanāmalesādinā lesena. Aññanti yo vītikkamanto diṭṭho, tato aparampi bhikkhuṃ cāvetuṃ antimena vatthunā codayanti sambandho. Kathaṃ? Koci khattiyajātiyo vītikkamanto diṭṭho, tato aññaṃ attano veriṃ khattiyajātikaṃ bhikkhuṃ passitvā taṃ khattiyaṃ jātilesaṃ gahetvā ‘‘khattiyo mayā diṭṭho vītikkamanto, tvaṃ khattiyo pārājikaṃ dhammaṃ āpannosī’’ti codeti codāpeti vā. Evaṃ nāmalesādayopi veditabbā. Sesā vinicchayakathā aṭṭhame vuttasadisāyeva.
நவமோ.
Navamo.
28. எத்தாவதா ‘‘க³ருகா நவா’’தி உத்³தி³ட்டே² வித்தா²ரதோ த³ஸ்ஸெத்வா இதா³னி தேஸு ஆபன்னேஸு படிபஜ்ஜிதப்³பா³காரங் த³ஸ்ஸேதுங் ‘‘சா²தே³தி ஜானமாபன்ன’’ந்திஆதி³ வுத்தங். தத்த² யோ பி⁴க்கு² அத்தனா ஆபன்னங் ஸங்கா⁴தி³ஸேஸாபத்திங் ஆபத்திவஸேன வா வத்து²வஸேன வா ஜானங் ஜானந்தோ யாவதா யத்தகானி அஹானி சா²தே³தி படிச்சா²தே³தி, தாவதா தத்தகானி அஹானி தஸ்ஸ பரிவாஸோ ஹோதீதி ஏவங் பத³ஸந்தி⁴வஸேன அத்தோ² வேதி³தப்³போ³. தத்த² படிச்ச²ன்னபரிவாஸோ ஸுத்³த⁴ந்தபரிவாஸோ ஸமோதா⁴னபரிவாஸோதி திவிதோ⁴ பரிவாஸோ. தேஸங் பன அதிஸங்கே²பனயேன முக²மத்தேபி த³ஸ்ஸிதே வித்தா²ரவினிச்ச²யபவேஸோபாயஸம்ப⁴வோ ஸியாதி முக²மத்தங் த³ஸ்ஸயிஸ்ஸாம.
28. Ettāvatā ‘‘garukā navā’’ti uddiṭṭhe vitthārato dassetvā idāni tesu āpannesu paṭipajjitabbākāraṃ dassetuṃ ‘‘chādeti jānamāpanna’’ntiādi vuttaṃ. Tattha yo bhikkhu attanā āpannaṃ saṅghādisesāpattiṃ āpattivasena vā vatthuvasena vā jānaṃ jānanto yāvatā yattakāni ahāni chādeti paṭicchādeti, tāvatā tattakāni ahāni tassa parivāso hotīti evaṃ padasandhivasena attho veditabbo. Tattha paṭicchannaparivāso suddhantaparivāso samodhānaparivāsoti tividho parivāso. Tesaṃ pana atisaṅkhepanayena mukhamattepi dassite vitthāravinicchayapavesopāyasambhavo siyāti mukhamattaṃ dassayissāma.
தத்த² படிச்ச²ன்னபரிவாஸோ நாம யதா²படிச்ச²ன்னாய ஆபத்தியா தா³தப்³போ³, தஸ்மா படிச்ச²ன்னதி³வஸே ச ஆபத்தியோ ச ஸல்லக்கெ²த்வா ஸசே ஏகாஹப்படிச்ச²ன்னா ஹோதி, ‘‘அஹங், ப⁴ந்தே, ஸம்ப³ஹுலா ஆபத்தியோ ஆபஜ்ஜிங் ஏகாஹப்படிச்ச²ன்னாயோ’’திஆதி³னா க²ந்த⁴கே (சூளவ॰ 98-99) ஆக³தனயேன யாசாபெத்வா ‘‘ஸுணாது மே ப⁴ந்தே ஸங்கோ⁴, அயங் இத்த²ன்னாமோ பி⁴க்கு² ஸம்ப³ஹுலா ஆபத்தியோ ஆபஜ்ஜி ஏகாஹப்படிச்ச²ன்னாயோ’’திஆதி³னா க²ந்த⁴கே ஆக³தனயேனேவ கம்மவாசங் வத்வா பரிவாஸோ தா³தப்³போ³. ஏகங் ஆபஜ்ஜித்வா ‘‘ஸம்ப³ஹுலா’’தி வினயகம்மங் கரொந்தஸ்ஸாபி வுட்டா²தீதி ‘‘ஸம்ப³ஹுலா’’தி வுத்தங். நானாவத்து²காஸுபி ஏஸேவ நயோ. அத² த்³வீஹாதி³ப்படிச்ச²ன்னா ஹொந்தி, பக்க²அதிரேகபக்க²மாஸஅதிரேகமாஸஸங்வச்ச²ரஅதிரேகஸங்வச்ச²ரப்படிச்ச²ன்னா வா, ‘‘த்³வீஹப்படிச்ச²ன்னாயோ வா’’திஆதி³னா வத்வா யோ யோ ஆபன்னோ ஹோதி, தஸ்ஸ தஸ்ஸ நாமஞ்ச க³ஹெத்வா யோஜனா காதப்³பா³.
Tattha paṭicchannaparivāso nāma yathāpaṭicchannāya āpattiyā dātabbo, tasmā paṭicchannadivase ca āpattiyo ca sallakkhetvā sace ekāhappaṭicchannā hoti, ‘‘ahaṃ, bhante, sambahulā āpattiyo āpajjiṃ ekāhappaṭicchannāyo’’tiādinā khandhake (cūḷava. 98-99) āgatanayena yācāpetvā ‘‘suṇātu me bhante saṅgho, ayaṃ itthannāmo bhikkhu sambahulā āpattiyo āpajji ekāhappaṭicchannāyo’’tiādinā khandhake āgatanayeneva kammavācaṃ vatvā parivāso dātabbo. Ekaṃ āpajjitvā ‘‘sambahulā’’ti vinayakammaṃ karontassāpi vuṭṭhātīti ‘‘sambahulā’’ti vuttaṃ. Nānāvatthukāsupi eseva nayo. Atha dvīhādippaṭicchannā honti, pakkhaatirekapakkhamāsaatirekamāsasaṃvaccharaatirekasaṃvaccharappaṭicchannā vā, ‘‘dvīhappaṭicchannāyo vā’’tiādinā vatvā yo yo āpanno hoti, tassa tassa nāmañca gahetvā yojanā kātabbā.
கம்மவாசாபரியோஸானே ச ஸசே அப்பபி⁴க்கு²கோ ஆவாஸோ ஹோதி, ஸக்கா ரத்திச்சே²த³ங் அனாபஜ்ஜந்தேன வஸிதுங், தத்தே²வ ‘‘பரிவாஸங் ஸமாதி³யாமி, வத்தங் ஸமாதி³யாமீ’தி வத்தங் ஸமாதா³ய தத்தே²வ ஸங்க⁴ஸ்ஸ ‘‘அஹங், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிங் ஏகாஹப்படிச்ச²ன்னாயோ’’திஆதி³னா ஆரோசெத்வா புன ஆக³தாக³தானங் பி⁴க்கூ²னங் ஆரோசெந்தேன பகதத்தேன பி⁴க்கு²னா ஸத்³தி⁴ங் ஏகச்ச²ன்னே ஸஹவாஸோ, தேன ச வினாவாஸோ, ஆக³ந்துகாதீ³னங் உபசாரக³தானங் அனாரோசனாதி ஏதேஸு ஏகேனாபி ரத்திச்சே²த³ஞ்ச வத்தபே⁴த³ஞ்ச அகத்வா பரிவத்த²ப்³ப³ங்.
Kammavācāpariyosāne ca sace appabhikkhuko āvāso hoti, sakkā ratticchedaṃ anāpajjantena vasituṃ, tattheva ‘‘parivāsaṃ samādiyāmi, vattaṃ samādiyāmī’ti vattaṃ samādāya tattheva saṅghassa ‘‘ahaṃ, bhante, sambahulā saṅghādisesā āpattiyo āpajjiṃ ekāhappaṭicchannāyo’’tiādinā ārocetvā puna āgatāgatānaṃ bhikkhūnaṃ ārocentena pakatattena bhikkhunā saddhiṃ ekacchanne sahavāso, tena ca vināvāso, āgantukādīnaṃ upacāragatānaṃ anārocanāti etesu ekenāpi ratticchedañca vattabhedañca akatvā parivatthabbaṃ.
ஸசே ந ஸக்கா ஹோதி பரிவாஸங் ஸோதே⁴துங், நிக்கி²த்தவத்தேன வஸிதுகாமோ ஹோதி, தத்தே²வ ஸங்க⁴மஜ்ஜே² வா ஏகஸ்ஸ புக்³க³லஸ்ஸ வா ஸந்திகே ‘‘பரிவாஸங் நிக்கி²பாமி, வத்தங் நிக்கி²பாமீ’’தி பரிவாஸோ நிக்கி²பிதப்³போ³. நிக்கி²த்தகாலதோ பட்டா²ய பகதத்தட்டா²னே திட்ட²தி. அதா²னேன பச்சூஸஸமயே ஏகேன பி⁴க்கு²னா ஸத்³தி⁴ங் பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லெட்³டு³பாதே அதிக்கமித்வா மஹாமக்³க³தோ ஓக்கம்ம படிச்ச²ன்னட்டா²னே நிஸீதி³த்வா அந்தோஅருணேயேவ வத்தங் ஸமாதி³யித்வா ஆரோசேதப்³ப³ங். ஸசே ப³ஹி டி²தானம்பி ஸத்³த³ங் ஸுணாதி, பஸ்ஸதி வா, தூ³ரங் க³ந்த்வாபி ஆரோசேதப்³ப³ங், அனாரோசெந்தே ரத்திச்சே²தோ³ சேவ வத்தபே⁴த³து³க்கடஞ்ச. ஸசே அஜானந்தஸ்ஸேவ உபசாரஸீமங் பவிஸித்வா க³ச்ச²ந்தி, ரத்திச்சே²தோ³வ ஹோதி, ந வத்தபே⁴தோ³. அருணே உட்டி²தே தஸ்ஸ ஸந்திகே வத்தங் நிக்கி²பித்வா விஹாரங் க³ந்தப்³ப³ங். ஏவங் யாவ ரத்தியோ பூரெந்தி, தாவ பரிவத்த²ப்³ப³ங். அயங் தாவ படிச்ச²ன்னபரிவாஸோ.
Sace na sakkā hoti parivāsaṃ sodhetuṃ, nikkhittavattena vasitukāmo hoti, tattheva saṅghamajjhe vā ekassa puggalassa vā santike ‘‘parivāsaṃ nikkhipāmi, vattaṃ nikkhipāmī’’ti parivāso nikkhipitabbo. Nikkhittakālato paṭṭhāya pakatattaṭṭhāne tiṭṭhati. Athānena paccūsasamaye ekena bhikkhunā saddhiṃ parikkhittassa vihārassa parikkhepato, aparikkhittassa parikkhepārahaṭṭhānato dve leḍḍupāte atikkamitvā mahāmaggato okkamma paṭicchannaṭṭhāne nisīditvā antoaruṇeyeva vattaṃ samādiyitvā ārocetabbaṃ. Sace bahi ṭhitānampi saddaṃ suṇāti, passati vā, dūraṃ gantvāpi ārocetabbaṃ, anārocente ratticchedo ceva vattabhedadukkaṭañca. Sace ajānantasseva upacārasīmaṃ pavisitvā gacchanti, ratticchedova hoti, na vattabhedo. Aruṇe uṭṭhite tassa santike vattaṃ nikkhipitvā vihāraṃ gantabbaṃ. Evaṃ yāva rattiyo pūrenti, tāva parivatthabbaṃ. Ayaṃ tāva paṭicchannaparivāso.
ஸுத்³த⁴ந்தோ து³விதோ⁴ சூளஸுத்³த⁴ந்தோ மஹாஸுத்³த⁴ந்தோதி. தத்த² யோ ‘‘உபஸம்பத³தோ பட்டா²ய யத்தகங் நாம காலங் அஹங் ஸுத்³தோ⁴’’தி ஜானாதி, தத்தகங் அபனெத்வா ததோ அவஸேஸே ரத்திபரிச்சே²தே³ ஏகதோ கத்வா தா³தப்³ப³பரிவாஸோ சூளஸுத்³த⁴ந்தோ. யோ பன ஸப்³ப³ஸோ ரத்திபரியந்தங் ந ஜானாதி நஸ்ஸரதி, தத்த² ச வேமதிகோ, தஸ்ஸ தா³தப்³போ³ மஹாஸுத்³த⁴ந்தோ. ஆபத்திபரியந்தங் ஜானாது வா, மா வா, அகாரணமேதங்.
Suddhanto duvidho cūḷasuddhanto mahāsuddhantoti. Tattha yo ‘‘upasampadato paṭṭhāya yattakaṃ nāma kālaṃ ahaṃ suddho’’ti jānāti, tattakaṃ apanetvā tato avasese rattiparicchede ekato katvā dātabbaparivāso cūḷasuddhanto. Yo pana sabbaso rattipariyantaṃ na jānāti nassarati, tattha ca vematiko, tassa dātabbo mahāsuddhanto. Āpattipariyantaṃ jānātu vā, mā vā, akāraṇametaṃ.
ஸமோதா⁴னபரிவாஸோ நாம திவிதோ⁴ ஓதா⁴னஸமோதா⁴னோ அக்³க⁴ஸமோதா⁴னோ மிஸ்ஸகஸமோதா⁴னோதி. தத்த² யோ நிட்டி²தபரிவாஸோபி வா நிட்டி²தமானத்தோபி வா அனிக்கி²த்தவத்தோ அஞ்ஞங் ஆபத்திங் ஆபஜ்ஜித்வா புரிமாபத்தியா ஸமா வா ஊனதரா வா ரத்தியோ படிச்சா²தே³தி, தஸ்ஸ மூலாய படிகஸ்ஸனேன தே பரிவுத்த²தி³வஸே ச மானத்தசிண்ணதி³வஸே ச ஓது⁴னித்வா மக்கெ²த்வா புரிமாய ஆபத்தியா மூலதி³வஸபரிச்சே²தே³ பச்சா² ஆபன்னங் ஆபத்திங் ஸமோத³ஹித்வா புன ஆதி³தோ பட்டா²ய தா³தப்³ப³பரிவாஸோ ஓதா⁴னஸமோதா⁴னோ நாம. ஸசே கஸ்ஸசி ஏகாபத்தி ஏகாஹப்படிச்ச²ன்னா, த்³வீஹப்படிச்ச²ன்னா, ஏவங் யாவ த³ஸாஹப்படிச்ச²ன்னா, தாஸங் அக்³கே⁴ன ஸமோதா⁴ய தாஸங் த³ஸாஹப்படிச்ச²ன்னவஸேன அவஸேஸானங் ஏகாஹப்படிச்ச²ன்னாதீ³னம்பி தா³தப்³ப³பரிவாஸோ அக்³க⁴ஸமோதா⁴னோ நாம. யோ பன நானாவத்து²கா ஆபத்தியோ ஏகதோ கத்வா தா³தப்³ப³பரிவாஸோ மிஸ்ஸகஸமோதா⁴னோ நாம. தா³னவிதி⁴ பன ஸப்³ப³த்த² க²ந்த⁴கே (சூளவ॰ 134 ஆத³யோ) ஆக³தனயேனேவ வேதி³தப்³போ³.
Samodhānaparivāso nāma tividho odhānasamodhāno agghasamodhāno missakasamodhānoti. Tattha yo niṭṭhitaparivāsopi vā niṭṭhitamānattopi vā anikkhittavatto aññaṃ āpattiṃ āpajjitvā purimāpattiyā samā vā ūnatarā vā rattiyo paṭicchādeti, tassa mūlāya paṭikassanena te parivutthadivase ca mānattaciṇṇadivase ca odhunitvā makkhetvā purimāya āpattiyā mūladivasaparicchede pacchā āpannaṃ āpattiṃ samodahitvā puna ādito paṭṭhāya dātabbaparivāso odhānasamodhāno nāma. Sace kassaci ekāpatti ekāhappaṭicchannā, dvīhappaṭicchannā, evaṃ yāva dasāhappaṭicchannā, tāsaṃ agghena samodhāya tāsaṃ dasāhappaṭicchannavasena avasesānaṃ ekāhappaṭicchannādīnampi dātabbaparivāso agghasamodhāno nāma. Yo pana nānāvatthukā āpattiyo ekato katvā dātabbaparivāso missakasamodhāno nāma. Dānavidhi pana sabbattha khandhake (cūḷava. 134 ādayo) āgatanayeneva veditabbo.
ஏவங் பரிவுத்த²பரிவாஸோ பி⁴க்கு² மானத்தங் பி⁴க்கூ²னங் மானநபா⁴வங் ச² ரத்தியோ அக²ண்ட³ங் கத்வா சரெய்ய கரெய்ய, ஸம்பாதெ³ய்யாதி வுத்தங் ஹோதி. தத்த² ஸங்கே⁴ன க³ணேன புக்³க³லேன கதங் தேன பி⁴க்கு²னா ஸங்க⁴மஜ்ஜே² வத்தங் ஸமாதா³பெத்வா ‘‘அஹங், ப⁴ந்தே, ஸம்ப³ஹுலா ஆபத்தியோ ஆபஜ்ஜி’’ந்திஆதி³னா க²ந்த⁴கே வுத்தனயேன யாசாபெத்வா தத்தே²வ வுத்தனயேன மானத்ததா³னாத³யோபி வேதி³தப்³பா³. இமினாபி வத்தங் நிக்கி²பிதுகாமேன சே வத்தங் நிக்கி²பித்வா சதூஹி பஞ்சஹி ஸத்³தி⁴ங் பரிவாஸே வுத்தப்பகாரங் பதே³ஸங் க³ந்த்வா புரிமனயேனேவ ஹெட்டா² வுத்தங் ஸஹவாஸாதி³ங் அந்தமஸோ சதூஹி ஊனத்தா ஊனே க³ணே சரணதோ³ஸஞ்ச வஜ்ஜெத்வா படிபஜ்ஜிதப்³ப³ங். அப்படிச்ச²ன்னாபத்திகஸ்ஸ பன பரிவாஸங் அத³த்வா மானத்தமேவ தா³தப்³ப³ங். ஏவங் சிண்ணங் கதங் பரினிட்டா²பிதங் மானத்தங் யேன , தங் பி⁴க்கு²ங். வீஸதி ஸங்கோ⁴ க³ணோ அஸ்ஸாதி வீஸதீக³ணோ தீ³க⁴ங் கத்வா, ஸோ ஸங்கோ⁴ அப்³பெ⁴ய்ய ஸம்படிச்செ²ய்ய, அப்³பா⁴னகம்மவஸேன ஓஸாரெய்யாதி வுத்தங் ஹோதி, அவ்ஹெய்யாதி வா அத்தோ². எத்தா²பி ஸமாதா³னஆரோசனயாசனானி, கம்மவாசா ச க²ந்த⁴கே வுத்தனயேன வேதி³தப்³பா³.
Evaṃ parivutthaparivāso bhikkhu mānattaṃ bhikkhūnaṃ mānanabhāvaṃ cha rattiyo akhaṇḍaṃ katvā careyya kareyya, sampādeyyāti vuttaṃ hoti. Tattha saṅghena gaṇena puggalena kataṃ tena bhikkhunā saṅghamajjhe vattaṃ samādāpetvā ‘‘ahaṃ, bhante, sambahulā āpattiyo āpajji’’ntiādinā khandhake vuttanayena yācāpetvā tattheva vuttanayena mānattadānādayopi veditabbā. Imināpi vattaṃ nikkhipitukāmena ce vattaṃ nikkhipitvā catūhi pañcahi saddhiṃ parivāse vuttappakāraṃ padesaṃ gantvā purimanayeneva heṭṭhā vuttaṃ sahavāsādiṃ antamaso catūhi ūnattā ūne gaṇe caraṇadosañca vajjetvā paṭipajjitabbaṃ. Appaṭicchannāpattikassa pana parivāsaṃ adatvā mānattameva dātabbaṃ. Evaṃ ciṇṇaṃ kataṃ pariniṭṭhāpitaṃ mānattaṃ yena , taṃ bhikkhuṃ. Vīsati saṅgho gaṇo assāti vīsatīgaṇo dīghaṃ katvā, so saṅgho abbheyya sampaṭiccheyya, abbhānakammavasena osāreyyāti vuttaṃ hoti, avheyyāti vā attho. Etthāpi samādānaārocanayācanāni, kammavācā ca khandhake vuttanayena veditabbā.
29. ஏவங் தேஸு படிபஜ்ஜிதப்³பா³காரங் த³ஸ்ஸெத்வா இதா³னி சா²த³னஸ்ஸ அங்கா³னி த³ஸ்ஸேதுங் ‘‘ஆபத்தீ’’திஆதி³மாஹ. தத்த² ந உக்கி²த்தோ அனுக்கி²த்தோ, நத்தி² அந்தராயோ அஸ்ஸாதி அனந்தராயோ. ஸகத்தே² த்தபச்சயவஸேன வா, பஹுனோ பா⁴வோ பஹுத்தங், தங் அஸ்ஸத்தீ²தி ஸத்³தா⁴தி³வஸேன வா பஹுத்தோ. அனுக்கி²த்தோ ச அனந்தராயோ ச பஹுத்தோ சாதி த்³வந்தோ³, தேஸங் பா⁴வோ அனுக்கி²த்தாதி³கு³ணோ அனுக்கி²த்த…பே॰… பஹுத்ததா. ஆபத்தி ச அனுக்கி²த்த…பே॰… பஹுத்ததா ச ஆபத்தி…பே॰… பஹுத்ததாயோ. ம-காரோ பத³ஸந்தி⁴ஜோ. ததா² தேன பகாரேன ஆபத்திஆதீ³ஸு சதூஸு ஆபத்தாதி³பகாரேன ஸஞ்ஞீ தத²ஸஞ்ஞீ ரஸ்ஸவஸேன. தஸ்ஸ பா⁴வோ தத²ஸஞ்ஞிதா, யதா²வுத்தஆபத்தாதி³ஸஞ்ஞிதாதி வுத்தங் ஹோதி. ச-காரோ வுத்தஸமுச்சயத்தோ². கமனங் பத்த²னங் காமோ, சா²தே³துங் காமோ சா²தே³துகாமோ. இதி யதா²வுத்தா நவ, அத² சா²த³னா சாதி ஏவங் த³ஸ ச தானி அங்கா³னி சாதி, தேஹி. அருணுக்³க³மம்ஹி அருணஸங்கா²தஸ்ஸ பட²மபா³லஸூரியரங்ஸினோ உக்³க³மனே ஸதி ச²ன்னா ஹோதி, ஆபத்தீதி ஸேஸோ.
29. Evaṃ tesu paṭipajjitabbākāraṃ dassetvā idāni chādanassa aṅgāni dassetuṃ ‘‘āpattī’’tiādimāha. Tattha na ukkhitto anukkhitto, natthi antarāyo assāti anantarāyo. Sakatthe ttapaccayavasena vā, pahuno bhāvo pahuttaṃ, taṃ assatthīti saddhādivasena vā pahutto. Anukkhitto ca anantarāyo ca pahutto cāti dvando, tesaṃ bhāvo anukkhittādiguṇo anukkhitta…pe… pahuttatā. Āpatti ca anukkhitta…pe… pahuttatā ca āpatti…pe… pahuttatāyo. Ma-kāro padasandhijo. Tathā tena pakārena āpattiādīsu catūsu āpattādipakārena saññī tathasaññī rassavasena. Tassa bhāvo tathasaññitā, yathāvuttaāpattādisaññitāti vuttaṃ hoti. Ca-kāro vuttasamuccayattho. Kamanaṃ patthanaṃ kāmo, chādetuṃ kāmo chādetukāmo. Iti yathāvuttā nava, atha chādanā cāti evaṃ dasa ca tāni aṅgāni cāti, tehi. Aruṇuggamamhi aruṇasaṅkhātassa paṭhamabālasūriyaraṃsino uggamane sati channā hoti, āpattīti seso.
தத்தா²யமதி⁴ப்பாயோ – யோ பி⁴க்கு² ராஜசோரஅக்³கி³உத³கமனுஸ்ஸஅமனுஸ்ஸவாளஸரீஸபஜீவிதப்³ரஹ்மசரியந்தராயானங் த³ஸன்னமேகஸ்ஸாபி நத்தி²தாய அனந்தராயிகோ ஸமானோ அனந்தராயிகஸஞ்ஞீ ஹுத்வா பி⁴க்கு²னோ ஸந்திகங் க³ந்துஞ்சேவ ஆரோசேதுஞ்ச ஸக்குணெய்யதாய பஹு ஸமானோ பஹுஸஞ்ஞீ ஹுத்வா திவித⁴உக்கே²பனீயகம்மாகரணேன அனுக்கி²த்தோ ஸமானோ அனுக்கி²த்தஸஞ்ஞீ ஹுத்வா க³ருகாபத்தீதி ஸஞ்ஞீ க³ருகங்யேவ ஆபத்திங் சா²தே³துகாமோ ஹுத்வா சா²தே³தி, தஸ்ஸாயங் ஆபத்தி ச ச²ன்னா ஹோதீதி. ஸசே பனெத்த² அனாபத்திஸஞ்ஞீ வா ஹோதி அஞ்ஞாபத்திக்க²ந்த⁴ஸஞ்ஞீ வா வேமதிகோ வா, அச்ச²ன்னா ஹொந்தி. ஆரோசெந்தேன பன ‘‘மம ஏகாபத்திங் ஆபன்னபா⁴வங் ஜானாஹீ’’திஆதி³னா நயேன ஆரோசேதப்³ப³ங். ஸசே பன வத்து²ஸபா⁴கா³பத்திகஸ்ஸ ஆரோசேதி, தாவ தப்பச்சயா து³க்கடங் ஆபஜ்ஜதி.
Tatthāyamadhippāyo – yo bhikkhu rājacoraaggiudakamanussaamanussavāḷasarīsapajīvitabrahmacariyantarāyānaṃ dasannamekassāpi natthitāya anantarāyiko samāno anantarāyikasaññī hutvā bhikkhuno santikaṃ gantuñceva ārocetuñca sakkuṇeyyatāya pahu samāno pahusaññī hutvā tividhaukkhepanīyakammākaraṇena anukkhitto samāno anukkhittasaññī hutvā garukāpattīti saññī garukaṃyeva āpattiṃ chādetukāmo hutvā chādeti, tassāyaṃ āpatti ca channā hotīti. Sace panettha anāpattisaññī vā hoti aññāpattikkhandhasaññī vā vematiko vā, acchannā honti. Ārocentena pana ‘‘mama ekāpattiṃ āpannabhāvaṃ jānāhī’’tiādinā nayena ārocetabbaṃ. Sace pana vatthusabhāgāpattikassa āroceti, tāva tappaccayā dukkaṭaṃ āpajjati.
ஸங்கா⁴தி³ஸேஸனித்³தே³ஸவண்ணனா நிட்டி²தா.
Saṅghādisesaniddesavaṇṇanā niṭṭhitā.
