| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
124. ஸங்க⁴பவாரணாதி³ப்பபே⁴தா³
124. Saṅghapavāraṇādippabhedā
215. தேன கோ² பன ஸமயேன அஞ்ஞதரஸ்மிங் ஆவாஸே தத³ஹு பவாரணாய பஞ்ச பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா பஞ்ஞத்தங் ‘ஸங்கே⁴ன பவாரேதப்³ப³’ந்தி. மயஞ்சம்ஹா பஞ்ச ஜனா. கத²ங் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பஞ்சன்னங் ஸங்கே⁴ பவாரேதுந்தி.
215. Tena kho pana samayena aññatarasmiṃ āvāse tadahu pavāraṇāya pañca bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā paññattaṃ ‘saṅghena pavāretabba’nti. Mayañcamhā pañca janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, pañcannaṃ saṅghe pavāretunti.
216. தேன கோ² பன ஸமயேன அஞ்ஞதரஸ்மிங் ஆவாஸே தத³ஹு பவாரணாய சத்தாரோ பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா அனுஞ்ஞாதங் பஞ்சன்னங் ஸங்கே⁴ பவாரேதுந்தி. மயஞ்சம்ஹா சத்தாரோ ஜனா. கத²ங் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சதுன்னங் அஞ்ஞமஞ்ஞங் பவாரேதுங். ஏவஞ்ச பன, பி⁴க்க²வே, பவாரேதப்³ப³ங். ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –
216. Tena kho pana samayena aññatarasmiṃ āvāse tadahu pavāraṇāya cattāro bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretunti. Mayañcamhā cattāro janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, catunnaṃ aññamaññaṃ pavāretuṃ. Evañca pana, bhikkhave, pavāretabbaṃ. Byattena bhikkhunā paṭibalena te bhikkhū ñāpetabbā –
‘‘ஸுணந்து மே ஆயஸ்மந்தோ. அஜ்ஜ பவாரணா. யதா³யஸ்மந்தானங் பத்தகல்லங், மயங் அஞ்ஞமஞ்ஞங் பவாரெய்யாமா’’தி.
‘‘Suṇantu me āyasmanto. Ajja pavāraṇā. Yadāyasmantānaṃ pattakallaṃ, mayaṃ aññamaññaṃ pavāreyyāmā’’ti.
தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தோ அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தோ அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி.
Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
நவகேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தோ அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தோ அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி.
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
தேன கோ² பன ஸமயேன அஞ்ஞதரஸ்மிங் ஆவாஸே தத³ஹு பவாரணாய தயோ பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா அனுஞ்ஞாதங் பஞ்சன்னங் ஸங்கே⁴ பவாரேதுங், சதுன்னங் அஞ்ஞமஞ்ஞங் பவாரேதுங். மயஞ்சம்ஹா தயோ ஜனா. கத²ங் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, திண்ணங் அஞ்ஞமஞ்ஞங் பவாரேதுங். ஏவஞ்ச பன, பி⁴க்க²வே, பவாரேதப்³ப³ங். ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –
Tena kho pana samayena aññatarasmiṃ āvāse tadahu pavāraṇāya tayo bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ. Mayañcamhā tayo janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, tiṇṇaṃ aññamaññaṃ pavāretuṃ. Evañca pana, bhikkhave, pavāretabbaṃ. Byattena bhikkhunā paṭibalena te bhikkhū ñāpetabbā –
‘‘ஸுணந்து மே ஆயஸ்மந்தா. அஜ்ஜ பவாரணா. யதா³யஸ்மந்தானங் பத்தகல்லங், மயங் அஞ்ஞமஞ்ஞங் பவாரெய்யாமா’’தி.
‘‘Suṇantu me āyasmantā. Ajja pavāraṇā. Yadāyasmantānaṃ pattakallaṃ, mayaṃ aññamaññaṃ pavāreyyāmā’’ti.
தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தா அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தா அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி.
Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmī’’ti.
நவகேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தா அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மங் ஆயஸ்மந்தா அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி .
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmī’’ti .
217. தேன கோ² பன ஸமயேன அஞ்ஞதரஸ்மிங் ஆவாஸே தத³ஹு பவாரணாய த்³வே பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா அனுஞ்ஞாதங் பஞ்சன்னங் ஸங்கே⁴ பவாரேதுங், சதுன்னங் அஞ்ஞமஞ்ஞங் பவாரேதுங், திண்ணங் அஞ்ஞமஞ்ஞங் பவாரேதுங். மயஞ்சம்ஹா த்³வே ஜனா. கத²ங் நு கோ² அம்ஹேஹி பவாரேதப்³ப³’’ந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வின்னங் அஞ்ஞமஞ்ஞங் பவாரேதுங். ஏவஞ்ச பன, பி⁴க்க²வே, பவாரேதப்³ப³ங். தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா நவோ பி⁴க்கு² ஏவமஸ்ஸ வசனீயோ – ‘‘அஹங், ஆவுஸோ, ஆயஸ்மந்தங் பவாரேமி தி³ட்டே²ன வா ஸுதேன வா பரிஸங்காய வா. வத³து மங் ஆயஸ்மா அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ஆவுஸோ, ஆயஸ்மந்தங் பவாரேமி தி³ட்டே²ன வா ஸுதேன வா பரிஸங்காய வா. வத³து மங் ஆயஸ்மா அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி.
217. Tena kho pana samayena aññatarasmiṃ āvāse tadahu pavāraṇāya dve bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ, tiṇṇaṃ aññamaññaṃ pavāretuṃ. Mayañcamhā dve janā. Kathaṃ nu kho amhehi pavāretabba’’nti. Bhagavato etamatthaṃ ārocesuṃ. Anujānāmi, bhikkhave, dvinnaṃ aññamaññaṃ pavāretuṃ. Evañca pana, bhikkhave, pavāretabbaṃ. Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā navo bhikkhu evamassa vacanīyo – ‘‘ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmī’’ti.
நவகேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே²ரோ பி⁴க்கு² ஏவமஸ்ஸ வசனீயோ – ‘‘அஹங், ப⁴ந்தே, ஆயஸ்மந்தங் பவாரேமி தி³ட்டே²ன வா ஸுதேன வா பரிஸங்காய வா. வத³து மங் ஆயஸ்மா அனுகம்பங் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே॰… ததியம்பி அஹங், ப⁴ந்தே, ஆயஸ்மந்தங் பவாரேமி தி³ட்டே²ன வா ஸுதேன வா பரிஸங்காய வா. வத³து மங் ஆயஸ்மா அனுகம்பங் உபாதா³ய. பஸ்ஸந்தோ படிகரிஸ்ஸாமீ’’தி.
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā thero bhikkhu evamassa vacanīyo – ‘‘ahaṃ, bhante, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmī’’ti.
218. தேன கோ² பன ஸமயேன அஞ்ஞதரஸ்மிங் ஆவாஸே தத³ஹு பவாரணாய ஏகோ பி⁴க்கு² விஹரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா அனுஞ்ஞாதங் பஞ்சன்னங் ஸங்கே⁴ பவாரேதுங், சதுன்னங் அஞ்ஞமஞ்ஞங் பவாரேதுங், திண்ணங் அஞ்ஞமஞ்ஞங் பவாரேதுங், த்³வின்னங் அஞ்ஞமஞ்ஞங் பவாரேதுங். அஹஞ்சம்ஹி ஏககோ. கத²ங் நு கோ² மயா பவாரேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங்.
218. Tena kho pana samayena aññatarasmiṃ āvāse tadahu pavāraṇāya eko bhikkhu viharati. Atha kho tassa bhikkhuno etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ, tiṇṇaṃ aññamaññaṃ pavāretuṃ, dvinnaṃ aññamaññaṃ pavāretuṃ. Ahañcamhi ekako. Kathaṃ nu kho mayā pavāretabba’’nti? Bhagavato etamatthaṃ ārocesuṃ.
இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹு பவாரணாய ஏகோ பி⁴க்கு² விஹரதி. தேன, பி⁴க்க²வே, பி⁴க்கு²னா யத்த² பி⁴க்கூ² படிக்கமந்தி உபட்டா²னஸாலாய வா மண்ட³பே வா ருக்க²மூலே வா, ஸோ தே³ஸோ ஸம்மஜ்ஜித்வா பானீயங் பரிபோ⁴ஜனீயங் உபட்டா²பெத்வா ஆஸனங் பஞ்ஞபெத்வா பதீ³பங் கத்வா நிஸீதி³தப்³ப³ங். ஸசே அஞ்ஞே பி⁴க்கூ² ஆக³ச்ச²ந்தி, தேஹி ஸத்³தி⁴ங் பவாரேதப்³ப³ங்; நோ சே ஆக³ச்ச²ந்தி, ‘அஜ்ஜ மே பவாரணா’தி அதி⁴ட்டா²தப்³ப³ங். நோ சே அதி⁴ட்டெ²ய்ய, ஆபத்தி து³க்கடஸ்ஸ.
Idha pana, bhikkhave, aññatarasmiṃ āvāse tadahu pavāraṇāya eko bhikkhu viharati. Tena, bhikkhave, bhikkhunā yattha bhikkhū paṭikkamanti upaṭṭhānasālāya vā maṇḍape vā rukkhamūle vā, so deso sammajjitvā pānīyaṃ paribhojanīyaṃ upaṭṭhāpetvā āsanaṃ paññapetvā padīpaṃ katvā nisīditabbaṃ. Sace aññe bhikkhū āgacchanti, tehi saddhiṃ pavāretabbaṃ; no ce āgacchanti, ‘ajja me pavāraṇā’ti adhiṭṭhātabbaṃ. No ce adhiṭṭheyya, āpatti dukkaṭassa.
தத்ர , பி⁴க்க²வே, யத்த² பஞ்ச பி⁴க்கூ² விஹரந்தி, ந ஏகஸ்ஸ பவாரணங் ஆஹரித்வா
Tatra , bhikkhave, yattha pañca bhikkhū viharanti, na ekassa pavāraṇaṃ āharitvā
சதூஹி ஸங்கே⁴ பவாரேதப்³ப³ங். பவாரெய்யுங் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² சத்தாரோ பி⁴க்கூ² விஹரந்தி, ந ஏகஸ்ஸ பவாரணங் ஆஹரித்வா தீஹி அஞ்ஞமஞ்ஞங் பவாரேதப்³ப³ங். பவாரெய்யுங் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² தயோ பி⁴க்கூ² விஹரந்தி, ந ஏகஸ்ஸ பவாரணங் ஆஹரித்வா த்³வீஹி அஞ்ஞமஞ்ஞங் பவாரேதப்³ப³ங். பவாரெய்யுங் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² த்³வே பி⁴க்கூ² விஹரந்தி, ந ஏகஸ்ஸ பவாரணங் ஆஹரித்வா ஏகேன அதி⁴ட்டா²தப்³ப³ங். அதி⁴ட்டெ²ய்ய சே, ஆபத்தி து³க்கடஸ்ஸாதி.
Catūhi saṅghe pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha cattāro bhikkhū viharanti, na ekassa pavāraṇaṃ āharitvā tīhi aññamaññaṃ pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha tayo bhikkhū viharanti, na ekassa pavāraṇaṃ āharitvā dvīhi aññamaññaṃ pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha dve bhikkhū viharanti, na ekassa pavāraṇaṃ āharitvā ekena adhiṭṭhātabbaṃ. Adhiṭṭheyya ce, āpatti dukkaṭassāti.
ஸங்க⁴பவாரணாதி³ப்பபே⁴தா³ நிட்டி²தா.
Saṅghapavāraṇādippabhedā niṭṭhitā.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பவாரணாதா³னானுஜானநகதா² • Pavāraṇādānānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 121. பவாரணாபே⁴த³கதா² • 121. Pavāraṇābhedakathā
