| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১২৪. সঙ্ঘপৰারণাদিপ্পভেদা
124. Saṅghapavāraṇādippabhedā
২১৫. তেন খো পন সমযেন অঞ্ঞতরস্মিং আৰাসে তদহু পৰারণায পঞ্চ ভিক্খূ ৰিহরন্তি। অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘সঙ্ঘেন পৰারেতব্ব’ন্তি। মযঞ্চম্হা পঞ্চ জনা। কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, পঞ্চন্নং সঙ্ঘে পৰারেতুন্তি।
215. Tena kho pana samayena aññatarasmiṃ āvāse tadahu pavāraṇāya pañca bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā paññattaṃ ‘saṅghena pavāretabba’nti. Mayañcamhā pañca janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, pañcannaṃ saṅghe pavāretunti.
২১৬. তেন খো পন সমযেন অঞ্ঞতরস্মিং আৰাসে তদহু পৰারণায চত্তারো ভিক্খূ ৰিহরন্তি। অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুন্তি। মযঞ্চম্হা চত্তারো জনা। কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, চতুন্নং অঞ্ঞমঞ্ঞং পৰারেতুং। এৰঞ্চ পন, ভিক্খৰে, পৰারেতব্বং। ব্যত্তেন ভিক্খুনা পটিবলেন তে ভিক্খূ ঞাপেতব্বা –
216. Tena kho pana samayena aññatarasmiṃ āvāse tadahu pavāraṇāya cattāro bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretunti. Mayañcamhā cattāro janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, catunnaṃ aññamaññaṃ pavāretuṃ. Evañca pana, bhikkhave, pavāretabbaṃ. Byattena bhikkhunā paṭibalena te bhikkhū ñāpetabbā –
‘‘সুণন্তু মে আযস্মন্তো। অজ্জ পৰারণা। যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি।
‘‘Suṇantu me āyasmanto. Ajja pavāraṇā. Yadāyasmantānaṃ pattakallaṃ, mayaṃ aññamaññaṃ pavāreyyāmā’’ti.
থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তো অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তো অনুকম্পং উপাদায। পস্সন্তো পটিকরিস্সামী’’তি।
Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তো অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তো অনুকম্পং উপাদায। পস্সন্তো পটিকরিস্সামী’’তি।
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmanto anukampaṃ upādāya. Passanto paṭikarissāmī’’ti.
তেন খো পন সমযেন অঞ্ঞতরস্মিং আৰাসে তদহু পৰারণায তযো ভিক্খূ ৰিহরন্তি। অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং। মযঞ্চম্হা তযো জনা। কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, তিণ্ণং অঞ্ঞমঞ্ঞং পৰারেতুং। এৰঞ্চ পন, ভিক্খৰে, পৰারেতব্বং। ব্যত্তেন ভিক্খুনা পটিবলেন তে ভিক্খূ ঞাপেতব্বা –
Tena kho pana samayena aññatarasmiṃ āvāse tadahu pavāraṇāya tayo bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ. Mayañcamhā tayo janā. Kathaṃ nu kho amhehi pavāretabba’’nti? Bhagavato etamatthaṃ ārocesuṃ. Anujānāmi, bhikkhave, tiṇṇaṃ aññamaññaṃ pavāretuṃ. Evañca pana, bhikkhave, pavāretabbaṃ. Byattena bhikkhunā paṭibalena te bhikkhū ñāpetabbā –
‘‘সুণন্তু মে আযস্মন্তা। অজ্জ পৰারণা। যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি।
‘‘Suṇantu me āyasmantā. Ajja pavāraṇā. Yadāyasmantānaṃ pattakallaṃ, mayaṃ aññamaññaṃ pavāreyyāmā’’ti.
থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তা অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তা অনুকম্পং উপাদায। পস্সন্তো পটিকরিস্সামী’’তি।
Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmī’’ti.
নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তা অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা। ৰদন্তু মং আযস্মন্তা অনুকম্পং উপাদায। পস্সন্তো পটিকরিস্সামী’’তি ।
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā te bhikkhū evamassu vacanīyā – ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā. Vadantu maṃ āyasmantā anukampaṃ upādāya. Passanto paṭikarissāmī’’ti .
২১৭. তেন খো পন সমযেন অঞ্ঞতরস্মিং আৰাসে তদহু পৰারণায দ্ৰে ভিক্খূ ৰিহরন্তি। অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং, তিণ্ণং অঞ্ঞমঞ্ঞং পৰারেতুং। মযঞ্চম্হা দ্ৰে জনা। কথং নু খো অম্হেহি পৰারেতব্ব’’ন্তি। ভগৰতো এতমত্থং আরোচেসুং। অনুজানামি, ভিক্খৰে, দ্ৰিন্নং অঞ্ঞমঞ্ঞং পৰারেতুং। এৰঞ্চ পন, ভিক্খৰে, পৰারেতব্বং। থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা নৰো ভিক্খু এৰমস্স ৰচনীযো – ‘‘অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা। ৰদতু মং আযস্মা অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা। ৰদতু মং আযস্মা অনুকম্পং উপাদায। পস্সন্তো পটিকরিস্সামী’’তি।
217. Tena kho pana samayena aññatarasmiṃ āvāse tadahu pavāraṇāya dve bhikkhū viharanti. Atha kho tesaṃ bhikkhūnaṃ etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ, tiṇṇaṃ aññamaññaṃ pavāretuṃ. Mayañcamhā dve janā. Kathaṃ nu kho amhehi pavāretabba’’nti. Bhagavato etamatthaṃ ārocesuṃ. Anujānāmi, bhikkhave, dvinnaṃ aññamaññaṃ pavāretuṃ. Evañca pana, bhikkhave, pavāretabbaṃ. Therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā navo bhikkhu evamassa vacanīyo – ‘‘ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmī’’ti.
নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা থেরো ভিক্খু এৰমস্স ৰচনীযো – ‘‘অহং, ভন্তে, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা। ৰদতু মং আযস্মা অনুকম্পং উপাদায। পস্সন্তো পটিকরিস্সামি। দুতিযম্পি…পে॰… ততিযম্পি অহং, ভন্তে, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা। ৰদতু মং আযস্মা অনুকম্পং উপাদায। পস্সন্তো পটিকরিস্সামী’’তি।
Navakena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā thero bhikkhu evamassa vacanīyo – ‘‘ahaṃ, bhante, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmi. Dutiyampi…pe… tatiyampi ahaṃ, bhante, āyasmantaṃ pavāremi diṭṭhena vā sutena vā parisaṅkāya vā. Vadatu maṃ āyasmā anukampaṃ upādāya. Passanto paṭikarissāmī’’ti.
২১৮. তেন খো পন সমযেন অঞ্ঞতরস্মিং আৰাসে তদহু পৰারণায একো ভিক্খু ৰিহরতি। অথ খো তস্স ভিক্খুনো এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং, তিণ্ণং অঞ্ঞমঞ্ঞং পৰারেতুং, দ্ৰিন্নং অঞ্ঞমঞ্ঞং পৰারেতুং। অহঞ্চম্হি এককো। কথং নু খো মযা পৰারেতব্ব’’ন্তি? ভগৰতো এতমত্থং আরোচেসুং।
218. Tena kho pana samayena aññatarasmiṃ āvāse tadahu pavāraṇāya eko bhikkhu viharati. Atha kho tassa bhikkhuno etadahosi – ‘‘bhagavatā anuññātaṃ pañcannaṃ saṅghe pavāretuṃ, catunnaṃ aññamaññaṃ pavāretuṃ, tiṇṇaṃ aññamaññaṃ pavāretuṃ, dvinnaṃ aññamaññaṃ pavāretuṃ. Ahañcamhi ekako. Kathaṃ nu kho mayā pavāretabba’’nti? Bhagavato etamatthaṃ ārocesuṃ.
ইধ পন, ভিক্খৰে, অঞ্ঞতরস্মিং আৰাসে তদহু পৰারণায একো ভিক্খু ৰিহরতি। তেন, ভিক্খৰে, ভিক্খুনা যত্থ ভিক্খূ পটিক্কমন্তি উপট্ঠানসালায ৰা মণ্ডপে ৰা রুক্খমূলে ৰা, সো দেসো সম্মজ্জিত্ৰা পানীযং পরিভোজনীযং উপট্ঠাপেত্ৰা আসনং পঞ্ঞপেত্ৰা পদীপং কত্ৰা নিসীদিতব্বং। সচে অঞ্ঞে ভিক্খূ আগচ্ছন্তি, তেহি সদ্ধিং পৰারেতব্বং; নো চে আগচ্ছন্তি, ‘অজ্জ মে পৰারণা’তি অধিট্ঠাতব্বং। নো চে অধিট্ঠেয্য, আপত্তি দুক্কটস্স।
Idha pana, bhikkhave, aññatarasmiṃ āvāse tadahu pavāraṇāya eko bhikkhu viharati. Tena, bhikkhave, bhikkhunā yattha bhikkhū paṭikkamanti upaṭṭhānasālāya vā maṇḍape vā rukkhamūle vā, so deso sammajjitvā pānīyaṃ paribhojanīyaṃ upaṭṭhāpetvā āsanaṃ paññapetvā padīpaṃ katvā nisīditabbaṃ. Sace aññe bhikkhū āgacchanti, tehi saddhiṃ pavāretabbaṃ; no ce āgacchanti, ‘ajja me pavāraṇā’ti adhiṭṭhātabbaṃ. No ce adhiṭṭheyya, āpatti dukkaṭassa.
তত্র , ভিক্খৰে, যত্থ পঞ্চ ভিক্খূ ৰিহরন্তি, ন একস্স পৰারণং আহরিত্ৰা
Tatra , bhikkhave, yattha pañca bhikkhū viharanti, na ekassa pavāraṇaṃ āharitvā
চতূহি সঙ্ঘে পৰারেতব্বং। পৰারেয্যুং চে, আপত্তি দুক্কটস্স। তত্র, ভিক্খৰে, যত্থ চত্তারো ভিক্খূ ৰিহরন্তি, ন একস্স পৰারণং আহরিত্ৰা তীহি অঞ্ঞমঞ্ঞং পৰারেতব্বং। পৰারেয্যুং চে, আপত্তি দুক্কটস্স। তত্র, ভিক্খৰে, যত্থ তযো ভিক্খূ ৰিহরন্তি, ন একস্স পৰারণং আহরিত্ৰা দ্ৰীহি অঞ্ঞমঞ্ঞং পৰারেতব্বং। পৰারেয্যুং চে, আপত্তি দুক্কটস্স। তত্র, ভিক্খৰে, যত্থ দ্ৰে ভিক্খূ ৰিহরন্তি, ন একস্স পৰারণং আহরিত্ৰা একেন অধিট্ঠাতব্বং। অধিট্ঠেয্য চে, আপত্তি দুক্কটস্সাতি।
Catūhi saṅghe pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha cattāro bhikkhū viharanti, na ekassa pavāraṇaṃ āharitvā tīhi aññamaññaṃ pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha tayo bhikkhū viharanti, na ekassa pavāraṇaṃ āharitvā dvīhi aññamaññaṃ pavāretabbaṃ. Pavāreyyuṃ ce, āpatti dukkaṭassa. Tatra, bhikkhave, yattha dve bhikkhū viharanti, na ekassa pavāraṇaṃ āharitvā ekena adhiṭṭhātabbaṃ. Adhiṭṭheyya ce, āpatti dukkaṭassāti.
সঙ্ঘপৰারণাদিপ্পভেদা নিট্ঠিতা।
Saṅghapavāraṇādippabhedā niṭṭhitā.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পৰারণাদানানুজাননকথা • Pavāraṇādānānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২১. পৰারণাভেদকথা • 121. Pavāraṇābhedakathā
