| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
278. ஸங்க⁴ஸாமக்³கீ³கதா²
278. Saṅghasāmaggīkathā
475. அத² கோ² தே உக்கி²த்தானுவத்தகா பி⁴க்கூ² தங் உக்கி²த்தகங் பி⁴க்கு²ங் ஓஸாரெத்வா யேன உக்கே²பகா பி⁴க்கூ² தேனுபஸங்கமிங்ஸு, உபஸங்கமித்வா உக்கே²பகே பி⁴க்கூ² ஏதத³வோசுங் – ‘‘யஸ்மிங், ஆவுஸோ, வத்து²ஸ்மிங் அஹோஸி ஸங்க⁴ஸ்ஸ ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரணங் , ஸோ ஏஸோ பி⁴க்கு² ஆபன்னோ ச உக்கி²த்தோ ச பஸ்ஸி 1 ச ஓஸாரிதோ ச. ஹந்த³ மயங், ஆவுஸோ, தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரோமா’’தி.
475. Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ , so eso bhikkhu āpanno ca ukkhitto ca passi 2 ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’’ti.
அத² கோ² தே உக்கே²பகா பி⁴க்கூ² யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘தே, ப⁴ந்தே, உக்கி²த்தானுவத்தகா பி⁴க்கூ² ஏவமாஹங்ஸு – ‘யஸ்மிங், ஆவுஸோ, வத்து²ஸ்மிங் அஹோஸி ஸங்க⁴ஸ்ஸ ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரணங், ஸோ ஏஸோ பி⁴க்கு² ஆபன்னோ ச உக்கி²த்தோ ச பஸ்ஸி ச ஓஸாரிதோ ச. ஹந்த³ மயங், ஆவுஸோ, தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரோமா’தி. கத²ங் நு கோ², ப⁴ந்தே, படிபஜ்ஜிதப்³ப³’’ந்தி? யதோ ச கோ² ஸோ, பி⁴க்க²வே, பி⁴க்கு² ஆபன்னோ ச உக்கி²த்தோ ச பஸ்ஸி ச ஓஸாரிதோ ச, தேன ஹி, பி⁴க்க²வே, ஸங்கோ⁴ தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரோது. ஏவஞ்ச பன, பி⁴க்க²வே, காதப்³பா³. ஸப்³பே³ஹேவ ஏகஜ்ஜ²ங் ஸன்னிபதிதப்³ப³ங் கி³லானேஹி ச அகி³லானேஹி ச. ந கேஹிசி ச²ந்தோ³ தா³தப்³போ³. ஸன்னிபதித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Atha kho te ukkhepakā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘te, bhante, ukkhittānuvattakā bhikkhū evamāhaṃsu – ‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’ti. Kathaṃ nu kho, bhante, paṭipajjitabba’’nti? Yato ca kho so, bhikkhave, bhikkhu āpanno ca ukkhitto ca passi ca osārito ca, tena hi, bhikkhave, saṅgho tassa vatthussa vūpasamāya saṅghasāmaggiṃ karotu. Evañca pana, bhikkhave, kātabbā. Sabbeheva ekajjhaṃ sannipatitabbaṃ gilānehi ca agilānehi ca. Na kehici chando dātabbo. Sannipatitvā byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. யஸ்மிங் வத்து²ஸ்மிங் அஹோஸி ஸங்க⁴ஸ்ஸ ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரணங், ஸோ ஏஸோ பி⁴க்கு² ஆபன்னோ ச உக்கி²த்தோ ச பஸ்ஸி ச ஓஸாரிதோ ச. யதி³ ஸங்க⁴ஸ்ஸ பத்தகல்லங், ஸங்கோ⁴ தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரெய்ய. ஏஸா ஞத்தி.
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Yadi saṅghassa pattakallaṃ, saṅgho tassa vatthussa vūpasamāya saṅghasāmaggiṃ kareyya. Esā ñatti.
‘‘ஸுணாது மே, ப⁴ந்தே, ஸங்கோ⁴. யஸ்மிங் வத்து²ஸ்மிங் அஹோஸி ஸங்க⁴ஸ்ஸ ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரணங், ஸோ ஏஸோ பி⁴க்கு² ஆபன்னோ ச உக்கி²த்தோ ச பஸ்ஸி ச ஓஸாரிதோ ச. ஸங்கோ⁴ தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ங் கரோதி. யஸ்ஸாயஸ்மதோ க²மதி தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³யா கரணங், ஸோ துண்ஹஸ்ஸ, யஸ்ஸ நக்க²மதி ஸோ பா⁴ஸெய்ய.
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Saṅgho tassa vatthussa vūpasamāya saṅghasāmaggiṃ karoti. Yassāyasmato khamati tassa vatthussa vūpasamāya saṅghasāmaggiyā karaṇaṃ, so tuṇhassa, yassa nakkhamati so bhāseyya.
‘‘கதா ஸங்கே⁴ன தஸ்ஸ வத்து²ஸ்ஸ வூபஸமாய ஸங்க⁴ஸாமக்³கீ³. நிஹதோ ஸங்க⁴பே⁴தோ³, நிஹதா ஸங்க⁴ராஜி, நிஹதங் ஸங்க⁴வவத்தா²னங், நிஹதங் ஸங்க⁴னானாகரணங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Katā saṅghena tassa vatthussa vūpasamāya saṅghasāmaggī. Nihato saṅghabhedo, nihatā saṅgharāji, nihataṃ saṅghavavatthānaṃ, nihataṃ saṅghanānākaraṇaṃ. Khamati saṅghassa, tasmā tuṇhī, evametaṃ dhārayāmī’’ti.
தாவதே³வ உபோஸதோ² காதப்³போ³, பாதிமொக்க²ங் உத்³தி³ஸிதப்³ப³ந்தி.
Tāvadeva uposatho kātabbo, pātimokkhaṃ uddisitabbanti.
ஸங்க⁴ஸாமக்³கீ³கதா² நிட்டி²தா.
Saṅghasāmaggīkathā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அட்டா²ரஸவத்து²கதா² • Aṭṭhārasavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸங்க⁴ஸாமக்³கீ³கதா²வண்ணனா • Saṅghasāmaggīkathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அட்டா²ரஸவத்து²கதா²வண்ணனா • Aṭṭhārasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 276. அட்டா²ரஸவத்து²கதா² • 276. Aṭṭhārasavatthukathā
