| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৭৮. সঙ্ঘসামগ্গীকথা
278. Saṅghasāmaggīkathā
৪৭৫. অথ খো তে উক্খিত্তানুৰত্তকা ভিক্খূ তং উক্খিত্তকং ভিক্খুং ওসারেত্ৰা যেন উক্খেপকা ভিক্খূ তেনুপসঙ্কমিংসু, উপসঙ্কমিত্ৰা উক্খেপকে ভিক্খূ এতদৰোচুং – ‘‘যস্মিং, আৰুসো, ৰত্থুস্মিং অহোসি সঙ্ঘস্স ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং , সো এসো ভিক্খু আপন্নো চ উক্খিত্তো চ পস্সি 1 চ ওসারিতো চ। হন্দ মযং, আৰুসো, তস্স ৰত্থুস্স ৰূপসমায সঙ্ঘসামগ্গিং করোমা’’তি।
475. Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ , so eso bhikkhu āpanno ca ukkhitto ca passi 2 ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’’ti.
অথ খো তে উক্খেপকা ভিক্খূ যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘তে, ভন্তে, উক্খিত্তানুৰত্তকা ভিক্খূ এৰমাহংসু – ‘যস্মিং, আৰুসো, ৰত্থুস্মিং অহোসি সঙ্ঘস্স ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং, সো এসো ভিক্খু আপন্নো চ উক্খিত্তো চ পস্সি চ ওসারিতো চ। হন্দ মযং, আৰুসো, তস্স ৰত্থুস্স ৰূপসমায সঙ্ঘসামগ্গিং করোমা’তি। কথং নু খো, ভন্তে, পটিপজ্জিতব্ব’’ন্তি? যতো চ খো সো, ভিক্খৰে, ভিক্খু আপন্নো চ উক্খিত্তো চ পস্সি চ ওসারিতো চ, তেন হি, ভিক্খৰে, সঙ্ঘো তস্স ৰত্থুস্স ৰূপসমায সঙ্ঘসামগ্গিং করোতু। এৰঞ্চ পন, ভিক্খৰে, কাতব্বা। সব্বেহেৰ একজ্ঝং সন্নিপতিতব্বং গিলানেহি চ অগিলানেহি চ। ন কেহিচি ছন্দো দাতব্বো। সন্নিপতিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –
Atha kho te ukkhepakā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘te, bhante, ukkhittānuvattakā bhikkhū evamāhaṃsu – ‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’ti. Kathaṃ nu kho, bhante, paṭipajjitabba’’nti? Yato ca kho so, bhikkhave, bhikkhu āpanno ca ukkhitto ca passi ca osārito ca, tena hi, bhikkhave, saṅgho tassa vatthussa vūpasamāya saṅghasāmaggiṃ karotu. Evañca pana, bhikkhave, kātabbā. Sabbeheva ekajjhaṃ sannipatitabbaṃ gilānehi ca agilānehi ca. Na kehici chando dātabbo. Sannipatitvā byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। যস্মিং ৰত্থুস্মিং অহোসি সঙ্ঘস্স ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং, সো এসো ভিক্খু আপন্নো চ উক্খিত্তো চ পস্সি চ ওসারিতো চ। যদি সঙ্ঘস্স পত্তকল্লং, সঙ্ঘো তস্স ৰত্থুস্স ৰূপসমায সঙ্ঘসামগ্গিং করেয্য। এসা ঞত্তি।
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Yadi saṅghassa pattakallaṃ, saṅgho tassa vatthussa vūpasamāya saṅghasāmaggiṃ kareyya. Esā ñatti.
‘‘সুণাতু মে, ভন্তে, সঙ্ঘো। যস্মিং ৰত্থুস্মিং অহোসি সঙ্ঘস্স ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং, সো এসো ভিক্খু আপন্নো চ উক্খিত্তো চ পস্সি চ ওসারিতো চ। সঙ্ঘো তস্স ৰত্থুস্স ৰূপসমায সঙ্ঘসামগ্গিং করোতি। যস্সাযস্মতো খমতি তস্স ৰত্থুস্স ৰূপসমায সঙ্ঘসামগ্গিযা করণং, সো তুণ্হস্স, যস্স নক্খমতি সো ভাসেয্য।
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Saṅgho tassa vatthussa vūpasamāya saṅghasāmaggiṃ karoti. Yassāyasmato khamati tassa vatthussa vūpasamāya saṅghasāmaggiyā karaṇaṃ, so tuṇhassa, yassa nakkhamati so bhāseyya.
‘‘কতা সঙ্ঘেন তস্স ৰত্থুস্স ৰূপসমায সঙ্ঘসামগ্গী। নিহতো সঙ্ঘভেদো, নিহতা সঙ্ঘরাজি, নিহতং সঙ্ঘৰৰত্থানং, নিহতং সঙ্ঘনানাকরণং। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Katā saṅghena tassa vatthussa vūpasamāya saṅghasāmaggī. Nihato saṅghabhedo, nihatā saṅgharāji, nihataṃ saṅghavavatthānaṃ, nihataṃ saṅghanānākaraṇaṃ. Khamati saṅghassa, tasmā tuṇhī, evametaṃ dhārayāmī’’ti.
তাৰদেৰ উপোসথো কাতব্বো, পাতিমোক্খং উদ্দিসিতব্বন্তি।
Tāvadeva uposatho kātabbo, pātimokkhaṃ uddisitabbanti.
সঙ্ঘসামগ্গীকথা নিট্ঠিতা।
Saṅghasāmaggīkathā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অট্ঠারসৰত্থুকথা • Aṭṭhārasavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সঙ্ঘসামগ্গীকথাৰণ্ণনা • Saṅghasāmaggīkathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অট্ঠারসৰত্থুকথাৰণ্ণনা • Aṭṭhārasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৭৬. অট্ঠারসৰত্থুকথা • 276. Aṭṭhārasavatthukathā
