| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၇၈. သင္ဃသာမဂ္ဂီကထာ
278. Saṅghasāmaggīkathā
၄၇၅. အထ ခော တေ ဥက္ခိတ္တာနုဝတ္တကာ ဘိက္ခူ တံ ဥက္ခိတ္တကံ ဘိက္ခုံ ဩသာရေတ္ဝာ ယေန ဥက္ခေပကာ ဘိက္ခူ တေနုပသင္ကမိံသု, ဥပသင္ကမိတ္ဝာ ဥက္ခေပကေ ဘိက္ခူ ဧတဒဝောစုံ – ‘‘ယသ္မိံ, အာဝုသော, ဝတ္ထုသ္မိံ အဟောသိ သင္ဃသ္သ ဘဏ္ဍနံ ကလဟော ဝိဂ္ဂဟော ဝိဝာဒော သင္ဃဘေဒော သင္ဃရာဇိ သင္ဃဝဝတ္ထာနံ သင္ဃနာနာကရဏံ , သော ဧသော ဘိက္ခု အာပန္နော စ ဥက္ခိတ္တော စ ပသ္သိ 1 စ ဩသာရိတော စ။ ဟန္ဒ မယံ, အာဝုသော, တသ္သ ဝတ္ထုသ္သ ဝူပသမာယ သင္ဃသာမဂ္ဂိံ ကရောမာ’’တိ။
475. Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ , so eso bhikkhu āpanno ca ukkhitto ca passi 2 ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’’ti.
အထ ခော တေ ဥက္ခေပကာ ဘိက္ခူ ယေန ဘဂဝာ တေနုပသင္ကမိံသု, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိံသု။ ဧကမန္တံ နိသိန္နာ ခော တေ ဘိက္ခူ ဘဂဝန္တံ ဧတဒဝောစုံ – ‘‘တေ, ဘန္တေ, ဥက္ခိတ္တာနုဝတ္တကာ ဘိက္ခူ ဧဝမာဟံသု – ‘ယသ္မိံ, အာဝုသော, ဝတ္ထုသ္မိံ အဟောသိ သင္ဃသ္သ ဘဏ္ဍနံ ကလဟော ဝိဂ္ဂဟော ဝိဝာဒော သင္ဃဘေဒော သင္ဃရာဇိ သင္ဃဝဝတ္ထာနံ သင္ဃနာနာကရဏံ, သော ဧသော ဘိက္ခု အာပန္နော စ ဥက္ခိတ္တော စ ပသ္သိ စ ဩသာရိတော စ။ ဟန္ဒ မယံ, အာဝုသော, တသ္သ ဝတ္ထုသ္သ ဝူပသမာယ သင္ဃသာမဂ္ဂိံ ကရောမာ’တိ။ ကထံ နု ခော, ဘန္တေ, ပဋိပဇ္ဇိတဗ္ဗ’’န္တိ? ယတော စ ခော သော, ဘိက္ခဝေ, ဘိက္ခု အာပန္နော စ ဥက္ခိတ္တော စ ပသ္သိ စ ဩသာရိတော စ, တေန ဟိ, ဘိက္ခဝေ, သင္ဃော တသ္သ ဝတ္ထုသ္သ ဝူပသမာယ သင္ဃသာမဂ္ဂိံ ကရောတု။ ဧဝဉ္စ ပန, ဘိက္ခဝေ, ကာတဗ္ဗာ။ သဗ္ဗေဟေဝ ဧကဇ္ဈံ သန္နိပတိတဗ္ဗံ ဂိလာနေဟိ စ အဂိလာနေဟိ စ။ န ကေဟိစိ ဆန္ဒော ဒာတဗ္ဗော။ သန္နိပတိတ္ဝာ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Atha kho te ukkhepakā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘te, bhante, ukkhittānuvattakā bhikkhū evamāhaṃsu – ‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’ti. Kathaṃ nu kho, bhante, paṭipajjitabba’’nti? Yato ca kho so, bhikkhave, bhikkhu āpanno ca ukkhitto ca passi ca osārito ca, tena hi, bhikkhave, saṅgho tassa vatthussa vūpasamāya saṅghasāmaggiṃ karotu. Evañca pana, bhikkhave, kātabbā. Sabbeheva ekajjhaṃ sannipatitabbaṃ gilānehi ca agilānehi ca. Na kehici chando dātabbo. Sannipatitvā byattena bhikkhunā paṭibalena saṅgho ñāpetabbo –
‘‘သုဏာတု မေ, ဘန္တေ, သင္ဃော။ ယသ္မိံ ဝတ္ထုသ္မိံ အဟောသိ သင္ဃသ္သ ဘဏ္ဍနံ ကလဟော ဝိဂ္ဂဟော ဝိဝာဒော သင္ဃဘေဒော သင္ဃရာဇိ သင္ဃဝဝတ္ထာနံ သင္ဃနာနာကရဏံ, သော ဧသော ဘိက္ခု အာပန္နော စ ဥက္ခိတ္တော စ ပသ္သိ စ ဩသာရိတော စ။ ယဒိ သင္ဃသ္သ ပတ္တကလ္လံ, သင္ဃော တသ္သ ဝတ္ထုသ္သ ဝူပသမာယ သင္ဃသာမဂ္ဂိံ ကရေယ္ယ။ ဧသာ ဉတ္တိ။
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Yadi saṅghassa pattakallaṃ, saṅgho tassa vatthussa vūpasamāya saṅghasāmaggiṃ kareyya. Esā ñatti.
‘‘သုဏာတု မေ, ဘန္တေ, သင္ဃော။ ယသ္မိံ ဝတ္ထုသ္မိံ အဟောသိ သင္ဃသ္သ ဘဏ္ဍနံ ကလဟော ဝိဂ္ဂဟော ဝိဝာဒော သင္ဃဘေဒော သင္ဃရာဇိ သင္ဃဝဝတ္ထာနံ သင္ဃနာနာကရဏံ, သော ဧသော ဘိက္ခု အာပန္နော စ ဥက္ခိတ္တော စ ပသ္သိ စ ဩသာရိတော စ။ သင္ဃော တသ္သ ဝတ္ထုသ္သ ဝူပသမာယ သင္ဃသာမဂ္ဂိံ ကရောတိ။ ယသ္သာယသ္မတော ခမတိ တသ္သ ဝတ္ထုသ္သ ဝူပသမာယ သင္ဃသာမဂ္ဂိယာ ကရဏံ, သော တုဏ္ဟသ္သ, ယသ္သ နက္ခမတိ သော ဘာသေယ္ယ။
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Saṅgho tassa vatthussa vūpasamāya saṅghasāmaggiṃ karoti. Yassāyasmato khamati tassa vatthussa vūpasamāya saṅghasāmaggiyā karaṇaṃ, so tuṇhassa, yassa nakkhamati so bhāseyya.
‘‘ကတာ သင္ဃေန တသ္သ ဝတ္ထုသ္သ ဝူပသမာယ သင္ဃသာမဂ္ဂီ။ နိဟတော သင္ဃဘေဒော, နိဟတာ သင္ဃရာဇိ, နိဟတံ သင္ဃဝဝတ္ထာနံ, နိဟတံ သင္ဃနာနာကရဏံ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Katā saṅghena tassa vatthussa vūpasamāya saṅghasāmaggī. Nihato saṅghabhedo, nihatā saṅgharāji, nihataṃ saṅghavavatthānaṃ, nihataṃ saṅghanānākaraṇaṃ. Khamati saṅghassa, tasmā tuṇhī, evametaṃ dhārayāmī’’ti.
တာဝဒေဝ ဥပောသထော ကာတဗ္ဗော, ပာတိမောက္ခံ ဥဒ္ဒိသိတဗ္ဗန္တိ။
Tāvadeva uposatho kātabbo, pātimokkhaṃ uddisitabbanti.
သင္ဃသာမဂ္ဂီကထာ နိဋ္ဌိတာ။
Saṅghasāmaggīkathā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အဋ္ဌာရသဝတ္ထုကထာ • Aṭṭhārasavatthukathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သင္ဃသာမဂ္ဂီကထာဝဏ္ဏနာ • Saṅghasāmaggīkathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဋ္ဌာရသဝတ္ထုကထာဝဏ္ဏနာ • Aṭṭhārasavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၇၆. အဋ္ဌာရသဝတ္ထုကထာ • 276. Aṭṭhārasavatthukathā
