| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
278. සඞ්‌ඝසාමග්‌ගීකථා
278. Saṅghasāmaggīkathā
475. අථ ඛො තෙ උක්‌ඛිත්‌තානුවත්‌තකා භික්‌ඛූ තං උක්‌ඛිත්‌තකං භික්‌ඛුං ඔසාරෙත්‌වා යෙන උක්‌ඛෙපකා භික්‌ඛූ තෙනුපසඞ්‌කමිංසු, උපසඞ්‌කමිත්‌වා උක්‌ඛෙපකෙ භික්‌ඛූ එතදවොචුං – ‘‘යස්‌මිං, ආවුසො, වත්‌ථුස්‌මිං අහොසි සඞ්‌ඝස්‌ස භණ්‌ඩනං කලහො විග්‌ගහො විවාදො සඞ්‌ඝභෙදො සඞ්‌ඝරාජි සඞ්‌ඝවවත්‌ථානං සඞ්‌ඝනානාකරණං , සො එසො භික්‌ඛු ආපන්‌නො ච උක්‌ඛිත්‌තො ච පස්‌සි 1 ච ඔසාරිතො ච. හන්‌ද මයං, ආවුසො, තස්‌ස වත්‌ථුස්‌ස වූපසමාය සඞ්‌ඝසාමග්‌ගිං කරොමා’’ති.
475. Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ , so eso bhikkhu āpanno ca ukkhitto ca passi 2 ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’’ti.
අථ ඛො තෙ උක්‌ඛෙපකා භික්‌ඛූ යෙන භගවා තෙනුපසඞ්‌කමිංසු, උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නා ඛො තෙ භික්‌ඛූ භගවන්‌තං එතදවොචුං – ‘‘තෙ, භන්‌තෙ, උක්‌ඛිත්‌තානුවත්‌තකා භික්‌ඛූ එවමාහංසු – ‘යස්‌මිං, ආවුසො, වත්‌ථුස්‌මිං අහොසි සඞ්‌ඝස්‌ස භණ්‌ඩනං කලහො විග්‌ගහො විවාදො සඞ්‌ඝභෙදො සඞ්‌ඝරාජි සඞ්‌ඝවවත්‌ථානං සඞ්‌ඝනානාකරණං, සො එසො භික්‌ඛු ආපන්‌නො ච උක්‌ඛිත්‌තො ච පස්‌සි ච ඔසාරිතො ච. හන්‌ද මයං, ආවුසො, තස්‌ස වත්‌ථුස්‌ස වූපසමාය සඞ්‌ඝසාමග්‌ගිං කරොමා’ති. කථං නු ඛො, භන්‌තෙ, පටිපජ්‌ජිතබ්‌බ’’න්‌ති? යතො ච ඛො සො, භික්‌ඛවෙ, භික්‌ඛු ආපන්‌නො ච උක්‌ඛිත්‌තො ච පස්‌සි ච ඔසාරිතො ච, තෙන හි, භික්‌ඛවෙ, සඞ්‌ඝො තස්‌ස වත්‌ථුස්‌ස වූපසමාය සඞ්‌ඝසාමග්‌ගිං කරොතු. එවඤ්‌ච පන, භික්‌ඛවෙ, කාතබ්‌බා. සබ්‌බෙහෙව එකජ්‌ඣං සන්‌නිපතිතබ්‌බං ගිලානෙහි ච අගිලානෙහි ච. න කෙහිචි ඡන්‌දො දාතබ්‌බො. සන්‌නිපතිත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Atha kho te ukkhepakā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘te, bhante, ukkhittānuvattakā bhikkhū evamāhaṃsu – ‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’ti. Kathaṃ nu kho, bhante, paṭipajjitabba’’nti? Yato ca kho so, bhikkhave, bhikkhu āpanno ca ukkhitto ca passi ca osārito ca, tena hi, bhikkhave, saṅgho tassa vatthussa vūpasamāya saṅghasāmaggiṃ karotu. Evañca pana, bhikkhave, kātabbā. Sabbeheva ekajjhaṃ sannipatitabbaṃ gilānehi ca agilānehi ca. Na kehici chando dātabbo. Sannipatitvā byattena bhikkhunā paṭibalena saṅgho ñāpetabbo –
‘‘සුණාතු මෙ, භන්‌තෙ, සඞ්‌ඝො. යස්‌මිං වත්‌ථුස්‌මිං අහොසි සඞ්‌ඝස්‌ස භණ්‌ඩනං කලහො විග්‌ගහො විවාදො සඞ්‌ඝභෙදො සඞ්‌ඝරාජි සඞ්‌ඝවවත්‌ථානං සඞ්‌ඝනානාකරණං, සො එසො භික්‌ඛු ආපන්‌නො ච උක්‌ඛිත්‌තො ච පස්‌සි ච ඔසාරිතො ච. යදි සඞ්‌ඝස්‌ස පත්‌තකල්‌ලං, සඞ්‌ඝො තස්‌ස වත්‌ථුස්‌ස වූපසමාය සඞ්‌ඝසාමග්‌ගිං කරෙය්‍ය. එසා ඤත්‌ති.
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Yadi saṅghassa pattakallaṃ, saṅgho tassa vatthussa vūpasamāya saṅghasāmaggiṃ kareyya. Esā ñatti.
‘‘සුණාතු මෙ, භන්‌තෙ, සඞ්‌ඝො. යස්‌මිං වත්‌ථුස්‌මිං අහොසි සඞ්‌ඝස්‌ස භණ්‌ඩනං කලහො විග්‌ගහො විවාදො සඞ්‌ඝභෙදො සඞ්‌ඝරාජි සඞ්‌ඝවවත්‌ථානං සඞ්‌ඝනානාකරණං, සො එසො භික්‌ඛු ආපන්‌නො ච උක්‌ඛිත්‌තො ච පස්‌සි ච ඔසාරිතො ච. සඞ්‌ඝො තස්‌ස වත්‌ථුස්‌ස වූපසමාය සඞ්‌ඝසාමග්‌ගිං කරොති. යස්‌සායස්‌මතො ඛමති තස්‌ස වත්‌ථුස්‌ස වූපසමාය සඞ්‌ඝසාමග්‌ගියා කරණං, සො තුණ්‌හස්‌ස, යස්‌ස නක්‌ඛමති සො භාසෙය්‍ය.
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Saṅgho tassa vatthussa vūpasamāya saṅghasāmaggiṃ karoti. Yassāyasmato khamati tassa vatthussa vūpasamāya saṅghasāmaggiyā karaṇaṃ, so tuṇhassa, yassa nakkhamati so bhāseyya.
‘‘කතා සඞ්‌ඝෙන තස්‌ස වත්‌ථුස්‌ස වූපසමාය සඞ්‌ඝසාමග්‌ගී. නිහතො සඞ්‌ඝභෙදො, නිහතා සඞ්‌ඝරාජි, නිහතං සඞ්‌ඝවවත්‌ථානං, නිහතං සඞ්‌ඝනානාකරණං. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Katā saṅghena tassa vatthussa vūpasamāya saṅghasāmaggī. Nihato saṅghabhedo, nihatā saṅgharāji, nihataṃ saṅghavavatthānaṃ, nihataṃ saṅghanānākaraṇaṃ. Khamati saṅghassa, tasmā tuṇhī, evametaṃ dhārayāmī’’ti.
තාවදෙව උපොසථො කාතබ්‌බො, පාතිමොක්‌ඛං උද්‌දිසිතබ්‌බන්‌ති.
Tāvadeva uposatho kātabbo, pātimokkhaṃ uddisitabbanti.
සඞ්‌ඝසාමග්‌ගීකථා නිට්‌ඨිතා.
Saṅghasāmaggīkathā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / අට්‌ඨාරසවත්‌ථුකථා • Aṭṭhārasavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සඞ්‌ඝසාමග්‌ගීකථාවණ්‌ණනා • Saṅghasāmaggīkathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අට්‌ඨාරසවත්‌ථුකථාවණ්‌ණනා • Aṭṭhārasavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 276. අට්‌ඨාරසවත්‌ථුකථා • 276. Aṭṭhārasavatthukathā
