| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༧༨. སངྒྷསཱམགྒཱིཀཐཱ
278. Saṅghasāmaggīkathā
༤༧༥. ཨཐ ཁོ ཏེ ཨུཀྑིཏྟཱནུཝཏྟཀཱ བྷིཀྑཱུ ཏཾ ཨུཀྑིཏྟཀཾ བྷིཀྑུཾ ཨོསཱརེཏྭཱ ཡེན ཨུཀྑེཔཀཱ བྷིཀྑཱུ ཏེནུཔསངྐམིཾསུ, ཨུཔསངྐམིཏྭཱ ཨུཀྑེཔཀེ བྷིཀྑཱུ ཨེཏདཝོཙུཾ – ‘‘ཡསྨིཾ, ཨཱཝུསོ, ཝཏྠུསྨིཾ ཨཧོསི སངྒྷསྶ བྷཎྜནཾ ཀལཧོ ཝིགྒཧོ ཝིཝཱདོ སངྒྷབྷེདོ སངྒྷརཱཛི སངྒྷཝཝཏྠཱནཾ སངྒྷནཱནཱཀརཎཾ , སོ ཨེསོ བྷིཀྑུ ཨཱཔནྣོ ཙ ཨུཀྑིཏྟོ ཙ པསྶི 1 ཙ ཨོསཱརིཏོ ཙ། ཧནྡ མཡཾ, ཨཱཝུསོ, ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརོམཱ’’ཏི།
475. Atha kho te ukkhittānuvattakā bhikkhū taṃ ukkhittakaṃ bhikkhuṃ osāretvā yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ , so eso bhikkhu āpanno ca ukkhitto ca passi 2 ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’’ti.
ཨཐ ཁོ ཏེ ཨུཀྑེཔཀཱ བྷིཀྑཱུ ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཏེ, བྷནྟེ, ཨུཀྑིཏྟཱནུཝཏྟཀཱ བྷིཀྑཱུ ཨེཝམཱཧཾསུ – ‘ཡསྨིཾ, ཨཱཝུསོ, ཝཏྠུསྨིཾ ཨཧོསི སངྒྷསྶ བྷཎྜནཾ ཀལཧོ ཝིགྒཧོ ཝིཝཱདོ སངྒྷབྷེདོ སངྒྷརཱཛི སངྒྷཝཝཏྠཱནཾ སངྒྷནཱནཱཀརཎཾ, སོ ཨེསོ བྷིཀྑུ ཨཱཔནྣོ ཙ ཨུཀྑིཏྟོ ཙ པསྶི ཙ ཨོསཱརིཏོ ཙ། ཧནྡ མཡཾ, ཨཱཝུསོ, ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརོམཱ’ཏི། ཀཐཾ ནུ ཁོ, བྷནྟེ, པཊིཔཛྫིཏབྦ’’ནྟི? ཡཏོ ཙ ཁོ སོ, བྷིཀྑཝེ, བྷིཀྑུ ཨཱཔནྣོ ཙ ཨུཀྑིཏྟོ ཙ པསྶི ཙ ཨོསཱརིཏོ ཙ, ཏེན ཧི, བྷིཀྑཝེ, སངྒྷོ ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརོཏུ། ཨེཝཉྩ པན, བྷིཀྑཝེ, ཀཱཏབྦཱ། སབྦེཧེཝ ཨེཀཛ྄ཛྷཾ སནྣིཔཏིཏབྦཾ གིལཱནེཧི ཙ ཨགིལཱནེཧི ཙ། ན ཀེཧིཙི ཚནྡོ དཱཏབྦོ། སནྣིཔཏིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Atha kho te ukkhepakā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘te, bhante, ukkhittānuvattakā bhikkhū evamāhaṃsu – ‘yasmiṃ, āvuso, vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Handa mayaṃ, āvuso, tassa vatthussa vūpasamāya saṅghasāmaggiṃ karomā’ti. Kathaṃ nu kho, bhante, paṭipajjitabba’’nti? Yato ca kho so, bhikkhave, bhikkhu āpanno ca ukkhitto ca passi ca osārito ca, tena hi, bhikkhave, saṅgho tassa vatthussa vūpasamāya saṅghasāmaggiṃ karotu. Evañca pana, bhikkhave, kātabbā. Sabbeheva ekajjhaṃ sannipatitabbaṃ gilānehi ca agilānehi ca. Na kehici chando dātabbo. Sannipatitvā byattena bhikkhunā paṭibalena saṅgho ñāpetabbo –
‘‘སུཎཱཏུ མེ, བྷནྟེ, སངྒྷོ། ཡསྨིཾ ཝཏྠུསྨིཾ ཨཧོསི སངྒྷསྶ བྷཎྜནཾ ཀལཧོ ཝིགྒཧོ ཝིཝཱདོ སངྒྷབྷེདོ སངྒྷརཱཛི སངྒྷཝཝཏྠཱནཾ སངྒྷནཱནཱཀརཎཾ, སོ ཨེསོ བྷིཀྑུ ཨཱཔནྣོ ཙ ཨུཀྑིཏྟོ ཙ པསྶི ཙ ཨོསཱརིཏོ ཙ། ཡདི སངྒྷསྶ པཏྟཀལླཾ, སངྒྷོ ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརེཡྻ། ཨེསཱ ཉཏྟི།
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Yadi saṅghassa pattakallaṃ, saṅgho tassa vatthussa vūpasamāya saṅghasāmaggiṃ kareyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཡསྨིཾ ཝཏྠུསྨིཾ ཨཧོསི སངྒྷསྶ བྷཎྜནཾ ཀལཧོ ཝིགྒཧོ ཝིཝཱདོ སངྒྷབྷེདོ སངྒྷརཱཛི སངྒྷཝཝཏྠཱནཾ སངྒྷནཱནཱཀརཎཾ, སོ ཨེསོ བྷིཀྑུ ཨཱཔནྣོ ཙ ཨུཀྑིཏྟོ ཙ པསྶི ཙ ཨོསཱརིཏོ ཙ། སངྒྷོ ཏསྶ ཝཏྠུསྶ ཝཱུཔསམཱཡ སངྒྷསཱམགྒིཾ ཀརོཏི། ཡསྶཱཡསྨཏོ ཁམཏི ཏསྶ ཝཏྠུསྶ ཝཱུཔསམཱཡ སངྒྷསཱམགྒིཡཱ ཀརཎཾ, སོ ཏུཎྷསྶ, ཡསྶ ནཀྑམཏི སོ བྷཱསེཡྻ།
‘‘Suṇātu me, bhante, saṅgho. Yasmiṃ vatthusmiṃ ahosi saṅghassa bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇaṃ, so eso bhikkhu āpanno ca ukkhitto ca passi ca osārito ca. Saṅgho tassa vatthussa vūpasamāya saṅghasāmaggiṃ karoti. Yassāyasmato khamati tassa vatthussa vūpasamāya saṅghasāmaggiyā karaṇaṃ, so tuṇhassa, yassa nakkhamati so bhāseyya.
‘‘ཀཏཱ སངྒྷེན ཏསྶ ཝཏྠུསྶ ཝཱུཔསམཱཡ སངྒྷསཱམགྒཱི། ནིཧཏོ སངྒྷབྷེདོ, ནིཧཏཱ སངྒྷརཱཛི, ནིཧཏཾ སངྒྷཝཝཏྠཱནཾ, ནིཧཏཾ སངྒྷནཱནཱཀརཎཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Katā saṅghena tassa vatthussa vūpasamāya saṅghasāmaggī. Nihato saṅghabhedo, nihatā saṅgharāji, nihataṃ saṅghavavatthānaṃ, nihataṃ saṅghanānākaraṇaṃ. Khamati saṅghassa, tasmā tuṇhī, evametaṃ dhārayāmī’’ti.
ཏཱཝདེཝ ཨུཔོསཐོ ཀཱཏབྦོ, པཱཏིམོཀྑཾ ཨུདྡིསིཏབྦནྟི།
Tāvadeva uposatho kātabbo, pātimokkhaṃ uddisitabbanti.
སངྒྷསཱམགྒཱིཀཐཱ ནིཊྛིཏཱ།
Saṅghasāmaggīkathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨཊྛཱརསཝཏྠུཀཐཱ • Aṭṭhārasavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སངྒྷསཱམགྒཱིཀཐཱཝཎྞནཱ • Saṅghasāmaggīkathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཊྛཱརསཝཏྠུཀཐཱཝཎྞནཱ • Aṭṭhārasavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༧༦. ཨཊྛཱརསཝཏྠུཀཐཱ • 276. Aṭṭhārasavatthukathā
