| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৯. সঙ্ঘসামগ্গীসুত্তং
9. Saṅghasāmaggīsuttaṃ
১৯. ৰুত্তঞ্হেতং ভগৰতা, ৰুত্তমরহতাতি মে সুতং –
19. Vuttañhetaṃ bhagavatā, vuttamarahatāti me sutaṃ –
‘‘একধম্মো, ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায বহুনো জনস্স অত্থায হিতায সুখায দেৰমনুস্সানং। কতমো একধম্মো ? সঙ্ঘসামগ্গী। সঙ্ঘে খো পন, ভিক্খৰে, সমগ্গে ন চেৰ অঞ্ঞমঞ্ঞং ভণ্ডনানি হোন্তি, ন চ অঞ্ঞমঞ্ঞং পরিভাসা হোন্তি, ন চ অঞ্ঞমঞ্ঞং পরিক্খেপা হোন্তি, ন চ অঞ্ঞমঞ্ঞং পরিচ্চজনা হোন্তি। তত্থ অপ্পসন্না চেৰ পসীদন্তি, পসন্নানঞ্চ ভিয্যোভাৰো হোতী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Ekadhammo, bhikkhave, loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṃ. Katamo ekadhammo ? Saṅghasāmaggī. Saṅghe kho pana, bhikkhave, samagge na ceva aññamaññaṃ bhaṇḍanāni honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajanā honti. Tattha appasannā ceva pasīdanti, pasannānañca bhiyyobhāvo hotī’’ti. Etamatthaṃ bhagavā avoca. Tatthetaṃ iti vuccati –
‘‘সুখা সঙ্ঘস্স সামগ্গী, সমগ্গানঞ্চনুগ্গহো।
‘‘Sukhā saṅghassa sāmaggī, samaggānañcanuggaho;
সমগ্গরতো ধম্মট্ঠো, যোগক্খেমা ন ধংসতি।
Samaggarato dhammaṭṭho, yogakkhemā na dhaṃsati;
সঙ্ঘং সমগ্গং কত্ৰান, কপ্পং সগ্গম্হি মোদতী’’তি॥
Saṅghaṃ samaggaṃ katvāna, kappaṃ saggamhi modatī’’ti.
অযম্পি অত্থো ৰুত্তো ভগৰতা, ইতি মে সুতন্তি। নৰমং।
Ayampi attho vutto bhagavatā, iti me sutanti. Navamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৯. সঙ্ঘসামগ্গীসুত্তৰণ্ণনা • 9. Saṅghasāmaggīsuttavaṇṇanā
