| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
9. සඞ්‌ඝසාමග්‌ගීසුත්‌තං
9. Saṅghasāmaggīsuttaṃ
19. වුත්‌තඤ්‌හෙතං භගවතා, වුත්‌තමරහතාති මෙ සුතං –
19. Vuttañhetaṃ bhagavatā, vuttamarahatāti me sutaṃ –
‘‘එකධම්‌මො, භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති බහුජනහිතාය බහුජනසුඛාය බහුනො ජනස්‌ස අත්‌ථාය හිතාය සුඛාය දෙවමනුස්‌සානං. කතමො එකධම්‌මො ? සඞ්‌ඝසාමග්‌ගී. සඞ්‌ඝෙ ඛො පන, භික්‌ඛවෙ, සමග්‌ගෙ න චෙව අඤ්‌ඤමඤ්‌ඤං භණ්‌ඩනානි හොන්‌ති, න ච අඤ්‌ඤමඤ්‌ඤං පරිභාසා හොන්‌ති, න ච අඤ්‌ඤමඤ්‌ඤං පරික්‌ඛෙපා හොන්‌ති, න ච අඤ්‌ඤමඤ්‌ඤං පරිච්‌චජනා හොන්‌ති. තත්‌ථ අප්‌පසන්‌නා චෙව පසීදන්‌ති, පසන්‌නානඤ්‌ච භිය්‍යොභාවො හොතී’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Ekadhammo, bhikkhave, loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṃ. Katamo ekadhammo ? Saṅghasāmaggī. Saṅghe kho pana, bhikkhave, samagge na ceva aññamaññaṃ bhaṇḍanāni honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajanā honti. Tattha appasannā ceva pasīdanti, pasannānañca bhiyyobhāvo hotī’’ti. Etamatthaṃ bhagavā avoca. Tatthetaṃ iti vuccati –
‘‘සුඛා සඞ්‌ඝස්‌ස සාමග්‌ගී, සමග්‌ගානඤ්‌චනුග්‌ගහො;
‘‘Sukhā saṅghassa sāmaggī, samaggānañcanuggaho;
සමග්‌ගරතො ධම්‌මට්‌ඨො, යොගක්‌ඛෙමා න ධංසති;
Samaggarato dhammaṭṭho, yogakkhemā na dhaṃsati;
සඞ්‌ඝං සමග්‌ගං කත්‌වාන, කප්‌පං සග්‌ගම්‌හි මොදතී’’ති.
Saṅghaṃ samaggaṃ katvāna, kappaṃ saggamhi modatī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. නවමං.
Ayampi attho vutto bhagavatā, iti me sutanti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 9. සඞ්‌ඝසාමග්‌ගීසුත්‌තවණ්‌ණනා • 9. Saṅghasāmaggīsuttavaṇṇanā
