| Library / Tipiṭaka / திபிடக • Tipiṭaka / இதிவுத்தகபாளி • Itivuttakapāḷi |
3. ஸங்கா⁴டிகண்ணஸுத்தங்
3. Saṅghāṭikaṇṇasuttaṃ
92. வுத்தஞ்ஹேதங் ப⁴க³வதா, வுத்தமரஹதாதி மே ஸுதங் –
92. Vuttañhetaṃ bhagavatā, vuttamarahatāti me sutaṃ –
‘‘ஸங்கா⁴டிகண்ணே சேபி, பி⁴க்க²வே , பி⁴க்கு² க³ஹெத்வா பிட்டி²தோ பிட்டி²தோ அனுப³ந்தோ⁴ அஸ்ஸ பாதே³ பாத³ங் நிக்கி²பந்தோ, ஸோ ச ஹோதி அபி⁴ஜ்ஜா²லு காமேஸு திப்³ப³ஸாராகோ³ ப்³யாபன்னசித்தோ பது³ட்ட²மனஸங்கப்போ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ; அத² கோ² ஸோ ஆரகாவ மய்ஹங், அஹஞ்ச தஸ்ஸ. தங் கிஸ்ஸ ஹேது? த⁴ம்மஞ்ஹி ஸோ, பி⁴க்க²வே, பி⁴க்கு² ந பஸ்ஸதி. த⁴ம்மங் அபஸ்ஸந்தோ ந மங் பஸ்ஸதி 1.
‘‘Saṅghāṭikaṇṇe cepi, bhikkhave , bhikkhu gahetvā piṭṭhito piṭṭhito anubandho assa pāde pādaṃ nikkhipanto, so ca hoti abhijjhālu kāmesu tibbasārāgo byāpannacitto paduṭṭhamanasaṅkappo muṭṭhassati asampajāno asamāhito vibbhantacitto pākatindriyo; atha kho so ārakāva mayhaṃ, ahañca tassa. Taṃ kissa hetu? Dhammañhi so, bhikkhave, bhikkhu na passati. Dhammaṃ apassanto na maṃ passati 2.
‘‘யோஜனஸதே சேபி ஸோ, பி⁴க்க²வே, பி⁴க்கு² விஹரெய்ய. ஸோ ச ஹோதி அனபி⁴ஜ்ஜா²லு காமேஸு ந திப்³ப³ஸாராகோ³ அப்³யாபன்னசித்தோ அபது³ட்ட²மனஸங்கப்போ உபட்டி²தஸ்ஸதி ஸம்பஜானோ ஸமாஹிதோ ஏகக்³க³சித்தோ ஸங்வுதிந்த்³ரியோ; அத² கோ² ஸோ ஸந்திகேவ மய்ஹங், அஹஞ்ச தஸ்ஸ. தங் கிஸ்ஸ ஹேது? த⁴ம்மங் ஹி ஸோ, பி⁴க்க²வே, பி⁴க்கு² பஸ்ஸதி; த⁴ம்மங் பஸ்ஸந்தோ மங் பஸ்ஸதீ’’தி. ஏதமத்த²ங் ப⁴க³வா அவோச. தத்தே²தங் இதி வுச்சதி –
‘‘Yojanasate cepi so, bhikkhave, bhikkhu vihareyya. So ca hoti anabhijjhālu kāmesu na tibbasārāgo abyāpannacitto apaduṭṭhamanasaṅkappo upaṭṭhitassati sampajāno samāhito ekaggacitto saṃvutindriyo; atha kho so santikeva mayhaṃ, ahañca tassa. Taṃ kissa hetu? Dhammaṃ hi so, bhikkhave, bhikkhu passati; dhammaṃ passanto maṃ passatī’’ti. Etamatthaṃ bhagavā avoca. Tatthetaṃ iti vuccati –
‘‘அனுப³ந்தோ⁴பி சே அஸ்ஸ, மஹிச்சோ² ச விகா⁴தவா;
‘‘Anubandhopi ce assa, mahiccho ca vighātavā;
ஏஜானுகோ³ அனேஜஸ்ஸ, நிப்³பு³தஸ்ஸ அனிப்³பு³தோ;
Ejānugo anejassa, nibbutassa anibbuto;
கி³த்³தோ⁴ ஸோ வீதகே³த⁴ஸ்ஸ, பஸ்ஸ யாவஞ்ச ஆரகா.
Giddho so vītagedhassa, passa yāvañca ārakā.
‘‘யோ ச த⁴ம்மமபி⁴ஞ்ஞாய, த⁴ம்மமஞ்ஞாய பண்டி³தோ;
‘‘Yo ca dhammamabhiññāya, dhammamaññāya paṇḍito;
ரஹதோ³வ நிவாதே ச, அனேஜோ வூபஸம்மதி.
Rahadova nivāte ca, anejo vūpasammati.
‘‘அனேஜோ ஸோ அனேஜஸ்ஸ, நிப்³பு³தஸ்ஸ ச நிப்³பு³தோ;
‘‘Anejo so anejassa, nibbutassa ca nibbuto;
அகி³த்³தோ⁴ வீதகே³த⁴ஸ்ஸ, பஸ்ஸ யாவஞ்ச ஸந்திகே’’தி.
Agiddho vītagedhassa, passa yāvañca santike’’ti.
அயம்பி அத்தோ² வுத்தோ ப⁴க³வதா, இதி மே ஸுதந்தி. ததியங்.
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / இதிவுத்தக-அட்ட²கதா² • Itivuttaka-aṭṭhakathā / 3. ஸங்கா⁴டிகண்ணஸுத்தவண்ணனா • 3. Saṅghāṭikaṇṇasuttavaṇṇanā
