| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
3. сан̇гхаадиган̣н̣асуд̇д̇аван̣н̣анаа
3. Saṅghāṭikaṇṇasuttavaṇṇanā
92. д̇ад̇ияз сан̇гхаадиган̣н̣зд̇и жийварагодияам̣. г̇ахзд̇ваад̇и бараамасид̇ваа. ануб̣анд̇хо ассаад̇и ануг̇ад̇о бхавзяяа. ид̣̇ам̣ вуд̇д̇ам̣ ход̇и – ‘‘бхигкавз, ид̇хзгажжо бхигку ад̇д̇ано хад̇т̇зна маяаа бааруд̇асса суг̇ад̇амахаажийварасса ган̣н̣з бараамасанд̇о вияа мам̣ ануг̇ажчзяяа, звам̣ маяхам̣ аасаннад̇аро худ̇ваа вихарзяяаа’’д̇и. баад̣̇з баад̣̇ам̣ нигкибанд̇од̇и г̇ажчанд̇асса мама баад̣̇з баад̣̇ам̣ нигкид̇д̇адтаанз баад̣̇уд̣̇д̇хааран̣аананд̇арам̣ ад̇д̇ано баад̣̇ам̣ нигкибанд̇о. убхаязнааби ‘‘таанаг̇аманаад̣̇ийсу авиж̇аханд̇о саб̣б̣агаалам̣ маяхам̣ самийбз зва вихарзяяа жзбий’’д̇и д̣̇ассзд̇и. со аарагаава маяхам̣, ахан̃жа д̇ассаад̇и со бхигку маяаа вуд̇д̇ам̣ бадибад̣̇ам̣ абуурзнд̇о мама д̣̇уурзязва, ахан̃жа д̇асса д̣̇уурзязва. зд̇зна мам̣сажагкунаа д̇ат̇ааг̇ад̇ад̣̇ассанам̣ руубагааяасамод̇хаанан̃жа агааран̣ам̣, н̃аан̣ажагкунаава д̣̇ассанам̣ д̇хаммагааяасамод̇хаанамзва жа бамаан̣анд̇и д̣̇ассзд̇и. д̇знзвааха ‘‘д̇хамман̃хи со, бхигкавз, бхигку на бассад̇и, д̇хаммам̣ абассанд̇о на мам̣ бассад̇ий’’д̇и. д̇ад̇т̇а д̇хаммо наама нававид̇хо логуд̇д̇арад̇хаммо. со жа абхиж̇жхаад̣̇ийхи д̣̇уусид̇ажид̇д̇зна на саггаа бассид̇ум̣, д̇асмаа д̇хаммасса ад̣̇ассанад̇о д̇хаммагааяан̃жа на бассад̇ийд̇и. д̇ат̇аа хи вуд̇д̇ам̣ –
92. Tatiye saṅghāṭikaṇṇeti cīvarakoṭiyaṃ. Gahetvāti parāmasitvā. Anubandho assāti anugato bhaveyya. Idaṃ vuttaṃ hoti – ‘‘bhikkhave, idhekacco bhikkhu attano hatthena mayā pārutassa sugatamahācīvarassa kaṇṇe parāmasanto viya maṃ anugaccheyya, evaṃ mayhaṃ āsannataro hutvā vihareyyā’’ti. Pāde pādaṃ nikkhipantoti gacchantassa mama pāde pādaṃ nikkhittaṭṭhāne pāduddhāraṇānantaraṃ attano pādaṃ nikkhipanto. Ubhayenāpi ‘‘ṭhānagamanādīsu avijahanto sabbakālaṃ mayhaṃ samīpe eva vihareyya cepī’’ti dasseti. So ārakāva mayhaṃ, ahañca tassāti so bhikkhu mayā vuttaṃ paṭipadaṃ apūrento mama dūreyeva, ahañca tassa dūreyeva. Etena maṃsacakkhunā tathāgatadassanaṃ rūpakāyasamodhānañca akāraṇaṃ, ñāṇacakkhunāva dassanaṃ dhammakāyasamodhānameva ca pamāṇanti dasseti. Tenevāha ‘‘dhammañhi so, bhikkhave, bhikkhu na passati, dhammaṃ apassanto na maṃ passatī’’ti. Tattha dhammo nāma navavidho lokuttaradhammo. So ca abhijjhādīhi dūsitacittena na sakkā passituṃ, tasmā dhammassa adassanato dhammakāyañca na passatīti. Tathā hi vuttaṃ –
‘‘гим̣ д̇з, ваггали, иминаа бууд̇игааязна д̣̇идтзна? яо ко, ваггали, д̇хаммам̣ бассад̇и со мам̣ бассад̇и; яо мам̣ бассад̇и, со д̇хаммам̣ бассад̇ий’’д̇и (сам̣. ни. 3.87).
‘‘Kiṃ te, vakkali, iminā pūtikāyena diṭṭhena? Yo kho, vakkali, dhammaṃ passati so maṃ passati; yo maṃ passati, so dhammaṃ passatī’’ti (saṃ. ni. 3.87).
‘‘д̇хаммабхууд̇о б̣рахмабхууд̇о’’д̇и (ма. ни. 1.203; бади. ма. 3.5) жа.
‘‘Dhammabhūto brahmabhūto’’ti (ma. ni. 1.203; paṭi. ma. 3.5) ca.
‘‘д̇хаммагааяо ид̇иби, б̣рахмагааяо ид̇ибий’’д̇и (д̣̇ий. ни. 3.118) жа аад̣̇и.
‘‘Dhammakāyo itipi, brahmakāyo itipī’’ti (dī. ni. 3.118) ca ādi.
яож̇анасад̇зд̇и яож̇анасад̇з бад̣̇зсз, яож̇анасад̇амад̇т̇агзд̇и ад̇т̇о. сзсам̣ вуд̇д̇авибарияааязна взд̣̇ид̇аб̣б̣ам̣. арияамаг̇г̇аад̇хиг̇амавасзна жасса анабхиж̇жхаалуаад̣̇ибхааво д̣̇адтаб̣б̣о.
Yojanasateti yojanasate padese, yojanasatamatthaketi attho. Sesaṃ vuttavipariyāyena veditabbaṃ. Ariyamaggādhigamavasena cassa anabhijjhāluādibhāvo daṭṭhabbo.
г̇аат̇аасу махижчод̇и гаамзсу д̇иб̣б̣асаарааг̇ад̇ааяа махааижчо. вигхаад̇аваад̇и бад̣̇удтаманасан̇габбад̇ааяа сад̇д̇зсу аагхаад̇авасзна махижчад̇ааяа ижчид̇аалаабхзна жа вигхаад̇аваа. зж̇аануг̇од̇и зж̇аасан̇каад̇ааяа д̇ан̣хааяа д̣̇аасо вияа худ̇ваа д̇ам̣ ануг̇ажчанд̇о. рааг̇аад̣̇игилзсабарил̣аахаабхибхавзна аниб̣б̣уд̇о. руубаад̣̇ивисаяаанам̣ абхиган̇канзна г̇ид̣̇д̇хо. басса яааван̃жа аарагаад̇и анзж̇асса ниб̣б̣уд̇асса вийд̇аг̇зд̇хасса саммаасамб̣уд̣̇д̇хасса огаасавасзна самийбзби самаано махижчо вигхаад̇аваа зж̇аануг̇о аниб̣б̣уд̇о г̇ид̣̇д̇хо б̣аалабут̇уж̇ж̇ано д̇хаммасабхаавад̇о яад̇д̇агам̣ д̣̇уурз, д̇асса со д̣̇уурабхааво басса, вад̇д̇умби на сугаранд̇и ад̇т̇о. вуд̇д̇ан̃хзд̇ам̣ –
Gāthāsu mahicchoti kāmesu tibbasārāgatāya mahāiccho. Vighātavāti paduṭṭhamanasaṅkappatāya sattesu āghātavasena mahicchatāya icchitālābhena ca vighātavā. Ejānugoti ejāsaṅkhātāya taṇhāya dāso viya hutvā taṃ anugacchanto. Rāgādikilesapariḷāhābhibhavena anibbuto. Rūpādivisayānaṃ abhikaṅkhanena giddho. Passa yāvañca ārakāti anejassa nibbutassa vītagedhassa sammāsambuddhassa okāsavasena samīpepi samāno mahiccho vighātavā ejānugo anibbuto giddho bālaputhujjano dhammasabhāvato yattakaṃ dūre, tassa so dūrabhāvo passa, vattumpi na sukaranti attho. Vuttañhetaṃ –
‘‘набхан̃жа д̣̇уурз бат̇авий жа д̣̇уурз,
‘‘Nabhañca dūre pathavī ca dūre,
баарам̣ самуд̣̇д̣̇асса д̇ат̇ааху д̣̇уурз;
Pāraṃ samuddassa tathāhu dūre;
д̇ад̇о хавз д̣̇уурад̇арам̣ вад̣̇анд̇и,
Tato have dūrataraṃ vadanti,
сад̇ан̃жа д̇хаммо асад̇ан̃жа рааж̇аа’’д̇и. (а. ни. 4.47; ж̇аа. 2.21.414);
Satañca dhammo asatañca rājā’’ti. (a. ni. 4.47; jā. 2.21.414);
д̇хаммамабхин̃н̃ааяаад̇и жад̇усажжад̇хаммам̣ абхин̃н̃ааяа ан̃н̃ааяа н̃аад̇ад̇ийран̣абарин̃н̃аахи яат̇аарахам̣ буб̣б̣абхааг̇з ж̇аанид̇ваа. д̇хаммаман̃н̃ааяаад̇и д̇амзва д̇хаммам̣ абарабхааг̇з маг̇г̇ан̃аан̣зна барин̃н̃аад̣̇ивасзна яат̇аамарияаад̣̇ам̣ ж̇аанид̇ваа. бан̣д̣ид̇од̇и бадивзд̇хаб̣аахусажжзна бан̣д̣ид̇о. рахад̣̇ова ниваад̇з жаад̇и ниваад̇адтаанз рахад̣̇о вияа анзж̇о гилзсажаланарахид̇о убасаммад̇и, яат̇аа со рахад̣̇о ниваад̇адтаанз ваад̇зна анаб̣бхаахад̇о саннисиннова ход̇и, звам̣ аяамби саб̣б̣ат̇ааби бадиббассад̣̇д̇хагилзсо гилзсажаланарахид̇о арахад̇д̇апаласамаад̇хинаа вуубасаммад̇и, саб̣б̣агаалам̣ убасанд̇асабхаавова ход̇и. анзж̇од̇и со звам̣ анзж̇аад̣̇исабхааво арахаа анзж̇аад̣̇исабхаавасса саммаасамб̣уд̣̇д̇хасса огаасад̇о д̣̇уурзби самаано д̇хаммасабхаавад̇о ад̣̇уурз санд̇игз зваад̇и.
Dhammamabhiññāyāti catusaccadhammaṃ abhiññāya aññāya ñātatīraṇapariññāhi yathārahaṃ pubbabhāge jānitvā. Dhammamaññāyāti tameva dhammaṃ aparabhāge maggañāṇena pariññādivasena yathāmariyādaṃ jānitvā. Paṇḍitoti paṭivedhabāhusaccena paṇḍito. Rahadova nivāte cāti nivātaṭṭhāne rahado viya anejo kilesacalanarahito upasammati, yathā so rahado nivātaṭṭhāne vātena anabbhāhato sannisinnova hoti, evaṃ ayampi sabbathāpi paṭippassaddhakileso kilesacalanarahito arahattaphalasamādhinā vūpasammati, sabbakālaṃ upasantasabhāvova hoti. Anejoti so evaṃ anejādisabhāvo arahā anejādisabhāvassa sammāsambuddhassa okāsato dūrepi samāno dhammasabhāvato adūre santike evāti.
д̇ад̇ияасуд̇д̇аван̣н̣анаа нидтид̇аа.
Tatiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 3. сан̇гхаадиган̣н̣асуд̇д̇ам̣ • 3. Saṅghāṭikaṇṇasuttaṃ
