| Library / Tipiṭaka / तिपिटक • Tipiṭaka / इतिवुत्तक-अट्ठकथा • Itivuttaka-aṭṭhakathā |
३. सङ्घाटिकण्णसुत्तवण्णना
3. Saṅghāṭikaṇṇasuttavaṇṇanā
९२. ततिये सङ्घाटिकण्णेति चीवरकोटियं। गहेत्वाति परामसित्वा। अनुबन्धो अस्साति अनुगतो भवेय्य। इदं वुत्तं होति – ‘‘भिक्खवे, इधेकच्चो भिक्खु अत्तनो हत्थेन मया पारुतस्स सुगतमहाचीवरस्स कण्णे परामसन्तो विय मं अनुगच्छेय्य, एवं मय्हं आसन्नतरो हुत्वा विहरेय्या’’ति। पादे पादं निक्खिपन्तोति गच्छन्तस्स मम पादे पादं निक्खित्तट्ठाने पादुद्धारणानन्तरं अत्तनो पादं निक्खिपन्तो। उभयेनापि ‘‘ठानगमनादीसु अविजहन्तो सब्बकालं मय्हं समीपे एव विहरेय्य चेपी’’ति दस्सेति। सो आरकाव मय्हं, अहञ्च तस्साति सो भिक्खु मया वुत्तं पटिपदं अपूरेन्तो मम दूरेयेव, अहञ्च तस्स दूरेयेव। एतेन मंसचक्खुना तथागतदस्सनं रूपकायसमोधानञ्च अकारणं, ञाणचक्खुनाव दस्सनं धम्मकायसमोधानमेव च पमाणन्ति दस्सेति। तेनेवाह ‘‘धम्मञ्हि सो, भिक्खवे, भिक्खु न पस्सति, धम्मं अपस्सन्तो न मं पस्सती’’ति। तत्थ धम्मो नाम नवविधो लोकुत्तरधम्मो। सो च अभिज्झादीहि दूसितचित्तेन न सक्का पस्सितुं, तस्मा धम्मस्स अदस्सनतो धम्मकायञ्च न पस्सतीति। तथा हि वुत्तं –
92. Tatiye saṅghāṭikaṇṇeti cīvarakoṭiyaṃ. Gahetvāti parāmasitvā. Anubandho assāti anugato bhaveyya. Idaṃ vuttaṃ hoti – ‘‘bhikkhave, idhekacco bhikkhu attano hatthena mayā pārutassa sugatamahācīvarassa kaṇṇe parāmasanto viya maṃ anugaccheyya, evaṃ mayhaṃ āsannataro hutvā vihareyyā’’ti. Pāde pādaṃ nikkhipantoti gacchantassa mama pāde pādaṃ nikkhittaṭṭhāne pāduddhāraṇānantaraṃ attano pādaṃ nikkhipanto. Ubhayenāpi ‘‘ṭhānagamanādīsu avijahanto sabbakālaṃ mayhaṃ samīpe eva vihareyya cepī’’ti dasseti. So ārakāva mayhaṃ, ahañca tassāti so bhikkhu mayā vuttaṃ paṭipadaṃ apūrento mama dūreyeva, ahañca tassa dūreyeva. Etena maṃsacakkhunā tathāgatadassanaṃ rūpakāyasamodhānañca akāraṇaṃ, ñāṇacakkhunāva dassanaṃ dhammakāyasamodhānameva ca pamāṇanti dasseti. Tenevāha ‘‘dhammañhi so, bhikkhave, bhikkhu na passati, dhammaṃ apassanto na maṃ passatī’’ti. Tattha dhammo nāma navavidho lokuttaradhammo. So ca abhijjhādīhi dūsitacittena na sakkā passituṃ, tasmā dhammassa adassanato dhammakāyañca na passatīti. Tathā hi vuttaṃ –
‘‘किं ते, वक्कलि, इमिना पूतिकायेन दिट्ठेन? यो खो, वक्कलि, धम्मं पस्सति सो मं पस्सति; यो मं पस्सति, सो धम्मं पस्सती’’ति (सं॰ नि॰ ३.८७)।
‘‘Kiṃ te, vakkali, iminā pūtikāyena diṭṭhena? Yo kho, vakkali, dhammaṃ passati so maṃ passati; yo maṃ passati, so dhammaṃ passatī’’ti (saṃ. ni. 3.87).
‘‘धम्मभूतो ब्रह्मभूतो’’ति (म॰ नि॰ १.२०३; पटि॰ म॰ ३.५) च।
‘‘Dhammabhūto brahmabhūto’’ti (ma. ni. 1.203; paṭi. ma. 3.5) ca.
‘‘धम्मकायो इतिपि, ब्रह्मकायो इतिपी’’ति (दी॰ नि॰ ३.११८) च आदि।
‘‘Dhammakāyo itipi, brahmakāyo itipī’’ti (dī. ni. 3.118) ca ādi.
योजनसतेति योजनसते पदेसे, योजनसतमत्थकेति अत्थो। सेसं वुत्तविपरियायेन वेदितब्बं। अरियमग्गाधिगमवसेन चस्स अनभिज्झालुआदिभावो दट्ठब्बो।
Yojanasateti yojanasate padese, yojanasatamatthaketi attho. Sesaṃ vuttavipariyāyena veditabbaṃ. Ariyamaggādhigamavasena cassa anabhijjhāluādibhāvo daṭṭhabbo.
गाथासु महिच्छोति कामेसु तिब्बसारागताय महाइच्छो। विघातवाति पदुट्ठमनसङ्कप्पताय सत्तेसु आघातवसेन महिच्छताय इच्छितालाभेन च विघातवा। एजानुगोति एजासङ्खाताय तण्हाय दासो विय हुत्वा तं अनुगच्छन्तो। रागादिकिलेसपरिळाहाभिभवेन अनिब्बुतो। रूपादिविसयानं अभिकङ्खनेन गिद्धो। पस्स यावञ्च आरकाति अनेजस्स निब्बुतस्स वीतगेधस्स सम्मासम्बुद्धस्स ओकासवसेन समीपेपि समानो महिच्छो विघातवा एजानुगो अनिब्बुतो गिद्धो बालपुथुज्जनो धम्मसभावतो यत्तकं दूरे, तस्स सो दूरभावो पस्स, वत्तुम्पि न सुकरन्ति अत्थो। वुत्तञ्हेतं –
Gāthāsu mahicchoti kāmesu tibbasārāgatāya mahāiccho. Vighātavāti paduṭṭhamanasaṅkappatāya sattesu āghātavasena mahicchatāya icchitālābhena ca vighātavā. Ejānugoti ejāsaṅkhātāya taṇhāya dāso viya hutvā taṃ anugacchanto. Rāgādikilesapariḷāhābhibhavena anibbuto. Rūpādivisayānaṃ abhikaṅkhanena giddho. Passa yāvañca ārakāti anejassa nibbutassa vītagedhassa sammāsambuddhassa okāsavasena samīpepi samāno mahiccho vighātavā ejānugo anibbuto giddho bālaputhujjano dhammasabhāvato yattakaṃ dūre, tassa so dūrabhāvo passa, vattumpi na sukaranti attho. Vuttañhetaṃ –
‘‘नभञ्च दूरे पथवी च दूरे,
‘‘Nabhañca dūre pathavī ca dūre,
पारं समुद्दस्स तथाहु दूरे।
Pāraṃ samuddassa tathāhu dūre;
ततो हवे दूरतरं वदन्ति,
Tato have dūrataraṃ vadanti,
सतञ्च धम्मो असतञ्च राजा’’ति॥ (अ॰ नि॰ ४.४७; जा॰ २.२१.४१४)।
Satañca dhammo asatañca rājā’’ti. (a. ni. 4.47; jā. 2.21.414);
धम्ममभिञ्ञायाति चतुसच्चधम्मं अभिञ्ञाय अञ्ञाय ञाततीरणपरिञ्ञाहि यथारहं पुब्बभागे जानित्वा। धम्ममञ्ञायाति तमेव धम्मं अपरभागे मग्गञाणेन परिञ्ञादिवसेन यथामरियादं जानित्वा। पण्डितोति पटिवेधबाहुसच्चेन पण्डितो। रहदोव निवाते चाति निवातट्ठाने रहदो विय अनेजो किलेसचलनरहितो उपसम्मति, यथा सो रहदो निवातट्ठाने वातेन अनब्भाहतो सन्निसिन्नोव होति, एवं अयम्पि सब्बथापि पटिप्पस्सद्धकिलेसो किलेसचलनरहितो अरहत्तफलसमाधिना वूपसम्मति, सब्बकालं उपसन्तसभावोव होति। अनेजोति सो एवं अनेजादिसभावो अरहा अनेजादिसभावस्स सम्मासम्बुद्धस्स ओकासतो दूरेपि समानो धम्मसभावतो अदूरे सन्तिके एवाति।
Dhammamabhiññāyāti catusaccadhammaṃ abhiññāya aññāya ñātatīraṇapariññāhi yathārahaṃ pubbabhāge jānitvā. Dhammamaññāyāti tameva dhammaṃ aparabhāge maggañāṇena pariññādivasena yathāmariyādaṃ jānitvā. Paṇḍitoti paṭivedhabāhusaccena paṇḍito. Rahadova nivāte cāti nivātaṭṭhāne rahado viya anejo kilesacalanarahito upasammati, yathā so rahado nivātaṭṭhāne vātena anabbhāhato sannisinnova hoti, evaṃ ayampi sabbathāpi paṭippassaddhakileso kilesacalanarahito arahattaphalasamādhinā vūpasammati, sabbakālaṃ upasantasabhāvova hoti. Anejoti so evaṃ anejādisabhāvo arahā anejādisabhāvassa sammāsambuddhassa okāsato dūrepi samāno dhammasabhāvato adūre santike evāti.
ततियसुत्तवण्णना निट्ठिता।
Tatiyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / इतिवुत्तकपाळि • Itivuttakapāḷi / ३. सङ्घाटिकण्णसुत्तं • 3. Saṅghāṭikaṇṇasuttaṃ
