| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๑๐. สงฺฆวนฺทนาสุตฺตวณฺณนา
10. Saṅghavandanāsuttavaṇṇanā
๒๖๖. ทสเม อชฺฌภาสีติ กสฺมา เอส ปุนปฺปุนํ เอวํ ภาสตีติ? สกฺกสฺส กิร เทวรโญฺญ สโทฺท มธุโร, สุผสิตํ ทนฺตาวรณํ, กถนกาเล สุวณฺณกิงฺกิณิกสโทฺท วิย นิจฺฉรติฯ ตํ ปุนปฺปุนํ โสตุํ ลภิสฺสามีติ ภาสติฯ ปูติเทหสยาติ ปูติมฺหิ มาตุสรีเร วา, อตฺตโนเยว วา สรีรํ อวตฺถริตฺวา สยนโต ปูติเทหสยาฯ นิมุคฺคา กุณปเมฺหเตติ ทสมาเส มาตุกุจฺฉิสงฺขาเต กุณปสฺมิํ เอเต นิมุคฺคาฯ เอตํ เตสํ ปิหยามีติ เอเตสํ เอตํ ปิหยามิ ปตฺถยามิฯ น เต สํ โกเฎฺฐ โอเปนฺตีติ น เต สํ สนฺตกํ ธญฺญํ โกเฎฺฐ ปกฺขิปนฺติฯ น หิ เอเตสํ ธญฺญํ อตฺถิฯ น กุมฺภีติ น กุมฺภิยํฯ น กโฬปิยนฺติ น ปจฺฉิยํฯ ปรนิฎฺฐิตเมสานาติ ปเรสํ นิฎฺฐิตํ ปรฆเร ปกฺกํ ภิกฺขาจารวเตฺตน เอสมานา คเวสมานาฯ เตนาติ เอวํ ปริยิเฎฺฐนฯ สุพฺพตาติ ทสปิ…เป.… สฎฺฐิปิ วสฺสานิ สุสมาทินฺนสุนฺทรวตาฯ
266. Dasame ajjhabhāsīti kasmā esa punappunaṃ evaṃ bhāsatīti? Sakkassa kira devarañño saddo madhuro, suphasitaṃ dantāvaraṇaṃ, kathanakāle suvaṇṇakiṅkiṇikasaddo viya niccharati. Taṃ punappunaṃ sotuṃ labhissāmīti bhāsati. Pūtidehasayāti pūtimhi mātusarīre vā, attanoyeva vā sarīraṃ avattharitvā sayanato pūtidehasayā. Nimuggākuṇapamheteti dasamāse mātukucchisaṅkhāte kuṇapasmiṃ ete nimuggā. Etaṃ tesaṃ pihayāmīti etesaṃ etaṃ pihayāmi patthayāmi. Na te saṃ koṭṭhe opentīti na te saṃ santakaṃ dhaññaṃ koṭṭhe pakkhipanti. Na hi etesaṃ dhaññaṃ atthi. Na kumbhīti na kumbhiyaṃ. Na kaḷopiyanti na pacchiyaṃ. Paraniṭṭhitamesānāti paresaṃ niṭṭhitaṃ paraghare pakkaṃ bhikkhācāravattena esamānā gavesamānā. Tenāti evaṃ pariyiṭṭhena. Subbatāti dasapi…pe… saṭṭhipi vassāni susamādinnasundaravatā.
สุมนฺตมนฺติโนติ ธมฺมํ สชฺฌายิสฺสาม, ธุตงฺคํ สมาทิยิสฺสาม, อมตํ ปริภุญฺชิสฺสาม, สมณธมฺมํ กริสฺสามาติ เอวํ สุภาสิตภาสิโนฯ ตุณฺหีภูตา สมญฺจราติ ติยามรตฺติํ อสนิโฆเสน โฆสิตา วิย ธมฺมํ กเถนฺตาปิ ตุณฺหีภูตา สมํ จรนฺติเยว นามฯ กสฺมา? นิรตฺถกวจนสฺสาภาวาฯ ปุถุมจฺจา จาติ พหุสตฺตา จ อญฺญมญฺญํ วิรุทฺธาฯ อตฺตทเณฺฑสุ นิพฺพุตาติ ปรวิเหฐนตฺถํ คหิตทเณฺฑสุ สเตฺตสุ นิพฺพุตา วิสฺสฎฺฐทณฺฑาฯ สาทาเนสุ อนาทานาติ สคหเณสุ สเตฺตสุ จ ภวโยนิอาทีนํ เอกโกฎฺฐาสสฺสาปิ อคหิตตฺตา อคหณาฯ ทสมํฯ
Sumantamantinoti dhammaṃ sajjhāyissāma, dhutaṅgaṃ samādiyissāma, amataṃ paribhuñjissāma, samaṇadhammaṃ karissāmāti evaṃ subhāsitabhāsino. Tuṇhībhūtā samañcarāti tiyāmarattiṃ asanighosena ghositā viya dhammaṃ kathentāpi tuṇhībhūtā samaṃ carantiyeva nāma. Kasmā? Niratthakavacanassābhāvā. Puthumaccā cāti bahusattā ca aññamaññaṃ viruddhā. Attadaṇḍesu nibbutāti paraviheṭhanatthaṃ gahitadaṇḍesu sattesu nibbutā vissaṭṭhadaṇḍā. Sādānesu anādānāti sagahaṇesu sattesu ca bhavayoniādīnaṃ ekakoṭṭhāsassāpi agahitattā agahaṇā. Dasamaṃ.
ทุติโย วโคฺคฯ
Dutiyo vaggo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. สงฺฆวนฺทนาสุตฺตํ • 10. Saṅghavandanāsuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑๐. สงฺฆวนฺทนาสุตฺตวณฺณนา • 10. Saṅghavandanāsuttavaṇṇanā
