| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๐. สงฺฆวนฺทนาสุตฺตวณฺณนา
10. Saṅghavandanāsuttavaṇṇanā
๒๖๖. ปูติมฺหิ เทเห มาตุ สรีเร สยนโต, อตฺตโน เอว วา ปูติเทหํ สรีรํ ตสฺมิํ ฐิตตาย อวตฺถริตฺวา สยนโต ปูติเทหสยาติ โยชนาฯ กุณปเมฺหเตติ เอเต มนุสฺสา อสุจิทุคฺคนฺธเชคุจฺฉปฎิกฺกูเล มาตุกุจฺฉิสงฺขาเต กุณปสฺมิํ ทส มาเส นิมุคฺคาฯ เตสํ กินฺนาม ตฺวํ ปิหยสีติ โยชนาฯ เอเตสํ เอตํ วิหยามีติ เอเตสํ อิสีนํ เอตํ สมฺมาปฎิปตฺติํ วิหยามิฯ อิทานิ ตํ ปฎิปตฺติํ ทเสฺสตุํ ‘‘น เต สํ โกเฎฺฐ โอเปนฺตี’’ติ วุตฺตํฯ ธญฺญํ โกเฎฺฐ น ปกฺขิปนฺติ ปกฺขิปิตพฺพสฺส จ อภาวโตฯ เตนาห ‘‘น หิ เอเตสํ ธญฺญ’’นฺติฯ ปเรสํ นิฎฺฐิตนฺติ ปเรสํ คหิตํ สนฺตกํ เตสํ ปากาย นิฎฺฐิตํฯ ภิกฺขาจารวเตฺตนาติ ปิณฺฑาจริยายฯ เอสมานา ปริเยสนฺตาฯ เอวํ ปริยิเฎฺฐนฯ ยาเปนฺติ, น เอสนฺติ อเนสนํฯ สุสมาทินฺนสุนฺทรวตาติ สุฎฺฐุ สมาทินฺนโสภนวตาฯ
266.Pūtimhi dehe mātu sarīre sayanato, attano eva vā pūtidehaṃ sarīraṃ tasmiṃ ṭhitatāya avattharitvā sayanato pūtidehasayāti yojanā. Kuṇapamheteti ete manussā asuciduggandhajegucchapaṭikkūle mātukucchisaṅkhāte kuṇapasmiṃ dasa māse nimuggā. Tesaṃ kinnāma tvaṃ pihayasīti yojanā. Etesaṃ etaṃ vihayāmīti etesaṃ isīnaṃ etaṃ sammāpaṭipattiṃ vihayāmi. Idāni taṃ paṭipattiṃ dassetuṃ ‘‘na te saṃ koṭṭhe opentī’’ti vuttaṃ. Dhaññaṃ koṭṭhe na pakkhipanti pakkhipitabbassa ca abhāvato. Tenāha ‘‘na hi etesaṃ dhañña’’nti. Paresaṃ niṭṭhitanti paresaṃ gahitaṃ santakaṃ tesaṃ pākāya niṭṭhitaṃ. Bhikkhācāravattenāti piṇḍācariyāya. Esamānā pariyesantā. Evaṃ pariyiṭṭhena. Yāpenti, na esanti anesanaṃ. Susamādinnasundaravatāti suṭṭhu samādinnasobhanavatā.
เอวํ สุภาสิตภาสิโนติ คนฺถธุรวิปสฺสนาธุรานํ วเสน คุณปริมาณสุภาสิตเสฺสว ภาสนสีลา ฯ อริเยน ตุณฺหีภูเตน ตุณฺหีภูตาฯ ตโต เอว มนสฺส สาติสยํ สมญฺจราฯ คหิตทเณฺฑสุ ปรามาสาทิปยุเตฺตสุ ทณฺฑาทานาทิเหตุ อุปฺปชฺชนกกิเลสปริฬาหาภาวโต นิพฺพุตาฯ เตนาห ‘‘วิสฺสฎฺฐทณฺฑา’’ติฯ สาทาเนสูติ สภวาทาเนสุฯ อนาทานาติ ตพฺพิรหิตาฯ เตนาห ‘‘ภวโยนี’’ติอาทิฯ
Evaṃ subhāsitabhāsinoti ganthadhuravipassanādhurānaṃ vasena guṇaparimāṇasubhāsitasseva bhāsanasīlā . Ariyena tuṇhībhūtena tuṇhībhūtā. Tato eva manassa sātisayaṃ samañcarā. Gahitadaṇḍesu parāmāsādipayuttesu daṇḍādānādihetu uppajjanakakilesapariḷāhābhāvato nibbutā. Tenāha ‘‘vissaṭṭhadaṇḍā’’ti. Sādānesūti sabhavādānesu. Anādānāti tabbirahitā. Tenāha ‘‘bhavayonī’’tiādi.
สงฺฆวนฺทนาสุตฺตวณฺณนา นิฎฺฐิตาฯ
Saṅghavandanāsuttavaṇṇanā niṭṭhitā.
ทุติยวคฺควณฺณนา นิฎฺฐิตาฯ
Dutiyavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. สงฺฆวนฺทนาสุตฺตํ • 10. Saṅghavandanāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. สงฺฆวนฺทนาสุตฺตวณฺณนา • 10. Saṅghavandanāsuttavaṇṇanā
