| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၂၃၀. သင္ဃေ ဘိန္နေ စီဝရုပ္ပာဒကထာ
230. Saṅghe bhinne cīvaruppādakathā
၃၇၆. သင္ဃော ဘိဇ္ဇတီတိ ဧတ္ထ ဒ္ဝိကောဋ္ဌာသဝသေန ဘိဇ္ဇနမေဝာဓိပ္ပေတံ, န အညန္တိ အာဟ ‘‘ဒ္ဝေ ကောဋ္ဌာသာ’’တိ။ ဧကသ္မိံ ပက္ခေ စီဝရာနိ ဒေန္တီတိ ယောဇနာ။ ဒ္ဝိပက္ခံ သန္ဓာယ ‘‘သကလသ္သ သင္ဃသ္သာ’’တိ ဝုတ္တံ။ ဧတန္တိ စီဝရံ။ တသ္သေဝ စီဝရန္တိ တသ္သ ကောဋ္ဌာသသ္သ စီဝရမေဝ။ ယတ္ထာတိ ယသ္မိံ ဒေသေ။ ဒက္ခိဏောဒကံ ပမာဏန္တိ ဒက္ခိဏောဒကမေဝ ပမာဏံ, န ဒေယ္ယဓမ္မော။ တသ္မာ ဒက္ခိဏောဒကံ ပဋိဂ္ဂဏ္ဟန္တာ, ဒေယ္ယဓမ္မသ္သ သာမိနော ဟောန္တီတိ အဓိပ္ပာယော။ ဥဘောဟိပိ ပက္ခေဟီတိ ယောဇနာ။ ပရသမုဒ္ဒေတိ ဇမ္ဗုဒီပေ။ သော ဟိ သီဟဠဒီပတော သမုဒ္ဒသ္သ ပာရတ္တာ ပရသမုဒ္ဒောတိ ဝုစ္စတိ။ ဣတရော ပက္ခောတိ ဒက္ခိဏောဒကသ္သ စ စီဝရသ္သ စ လဒ္ဓပက္ခတော ဣတရော အလဒ္ဓော ပက္ခော။
376.Saṅgho bhijjatīti ettha dvikoṭṭhāsavasena bhijjanamevādhippetaṃ, na aññanti āha ‘‘dve koṭṭhāsā’’ti. Ekasmiṃ pakkhe cīvarāni dentīti yojanā. Dvipakkhaṃ sandhāya ‘‘sakalassa saṅghassā’’ti vuttaṃ. Etanti cīvaraṃ. Tasseva cīvaranti tassa koṭṭhāsassa cīvarameva. Yatthāti yasmiṃ dese. Dakkhiṇodakaṃ pamāṇanti dakkhiṇodakameva pamāṇaṃ, na deyyadhammo. Tasmā dakkhiṇodakaṃ paṭiggaṇhantā, deyyadhammassa sāmino hontīti adhippāyo. Ubhohipi pakkhehīti yojanā. Parasamuddeti jambudīpe. So hi sīhaḷadīpato samuddassa pārattā parasamuddoti vuccati. Itaro pakkhoti dakkhiṇodakassa ca cīvarassa ca laddhapakkhato itaro aladdho pakkho.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၂၃၀. သင္ဃေ ဘိန္နေ စီဝရုပ္ပာဒကထာ • 230. Saṅghe bhinne cīvaruppādakathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သင္ဃေဘိန္နေစီဝရုပ္ပာဒကထာ • Saṅghebhinnecīvaruppādakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သင္ဃေ ဘိန္နေ စီဝရုပ္ပာဒကထာဝဏ္ဏနာ • Saṅghe bhinne cīvaruppādakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သင္ဃေဘိန္နေစီဝရုပ္ပာဒကထာဝဏ္ဏနာ • Saṅghebhinnecīvaruppādakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / မတသန္တကကထာဒိဝဏ္ဏနာ • Matasantakakathādivaṇṇanā
