| Library / Tipiṭaka / तिपिटक • Tipiṭaka / महावग्ग-अट्ठकथा • Mahāvagga-aṭṭhakathā |
सङ्घेभिन्नेचीवरुप्पादकथा
Saṅghebhinnecīvaruppādakathā
३७६. सङ्घो भिज्जतीति भिज्जित्वा कोसम्बकभिक्खू विय द्वे कोट्ठासा होन्ति। एकस्मिं पक्खेति एकस्मिं कोट्ठासे दक्खिणोदकञ्च गन्धादीनि च देन्ति, एकस्मिं चीवरानि। सङ्घस्सेवेतन्ति सकलस्स सङ्घस्स द्विन्नम्पि कोट्ठासानं एतं होति, घण्टिं पहरित्वा द्वीहिपि पक्खेहि एकतो भाजेतब्बं। पक्खस्सेवेतन्ति एवं दिन्ने यस्स कोट्ठासस्स उदकं दिन्नं, तस्स उदकमेव होति; यस्स चीवरं दिन्नं, तस्सेव चीवरं। यत्थ पन दक्खिणोदकं पमाणं होति, तत्थ एको पक्खो दक्खिणोदकस्स लद्धत्ता चीवरानि लभति, एको चीवरानमेव लद्धत्ताति उभोहिपि एकतो हुत्वा यथावुड्ढं भाजेतब्बं। इदं किर परसमुद्दे लक्खणन्ति महाअट्ठकथायं वुत्तं। तस्मिंयेव पक्खेति एत्थ पन इतरो पक्खो अनिस्सरोयेव। चीवरपेसनवत्थूनि पाकटानेव।
376.Saṅgho bhijjatīti bhijjitvā kosambakabhikkhū viya dve koṭṭhāsā honti. Ekasmiṃ pakkheti ekasmiṃ koṭṭhāse dakkhiṇodakañca gandhādīni ca denti, ekasmiṃ cīvarāni. Saṅghassevetanti sakalassa saṅghassa dvinnampi koṭṭhāsānaṃ etaṃ hoti, ghaṇṭiṃ paharitvā dvīhipi pakkhehi ekato bhājetabbaṃ. Pakkhassevetanti evaṃ dinne yassa koṭṭhāsassa udakaṃ dinnaṃ, tassa udakameva hoti; yassa cīvaraṃ dinnaṃ, tasseva cīvaraṃ. Yattha pana dakkhiṇodakaṃ pamāṇaṃ hoti, tattha eko pakkho dakkhiṇodakassa laddhattā cīvarāni labhati, eko cīvarānameva laddhattāti ubhohipi ekato hutvā yathāvuḍḍhaṃ bhājetabbaṃ. Idaṃ kira parasamudde lakkhaṇanti mahāaṭṭhakathāyaṃ vuttaṃ. Tasmiṃyeva pakkheti ettha pana itaro pakkho anissaroyeva. Cīvarapesanavatthūni pākaṭāneva.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / २३०. सङ्घे भिन्ने चीवरुप्पादकथा • 230. Saṅghe bhinne cīvaruppādakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / सङ्घे भिन्ने चीवरुप्पादकथावण्णना • Saṅghe bhinne cīvaruppādakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / सङ्घेभिन्नेचीवरुप्पादकथावण्णना • Saṅghebhinnecīvaruppādakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / मतसन्तककथादिवण्णना • Matasantakakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / २३०. सङ्घे भिन्ने चीवरुप्पादकथा • 230. Saṅghe bhinne cīvaruppādakathā
