| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
সঙ্ঘিকচীৰরুপ্পাদকথা
Saṅghikacīvaruppādakathā
৩৬৩. তুয্হেৰ ভিক্খু তানি চীৰরানীতি অঞ্ঞত্থ গহেত্ৰা হটানিপি তুয্হেৰ; ন তেসং অঞ্ঞো কোচি ইস্সরোতি। এৰঞ্চ পন ৰত্ৰা অনাগতেপি নিক্কুক্কুচ্চা গণ্হিস্সন্তীতি দস্সেতুং ইধ পনাতিআদিমাহ। তস্সেৰ তানি চীৰরানি যাৰ কথিনস্স উব্ভারাতি সচে গণপূরকে ভিক্খূ লভিত্ৰা কথিনং অত্থতং হোতি, পঞ্চমাসে; নো চে অত্থতং হোতি, একং চীৰরমাসমেৰ। যং ‘‘সঙ্ঘস্স দেমা’’তি ৰা দেন্তি, ‘‘সঙ্ঘং উদ্দিস্স দেমা’’তি ৰা দেন্তি, ‘‘ৰস্সংৰুত্থসঙ্ঘস্স দেমা’’তি ৰা দেন্তি, ‘‘ৰস্সাৰাসিকং দেমা’’তি ৰা দেন্তি, সচেপি মতকচীৰরং অৰিভজিত্ৰা তং ৰিহারং পৰিসন্তি, তং সব্বং তস্সেৰ ভিক্খুনো হোতি। যম্পি সো ৰস্সাৰাসত্থায ৰড্ঢিং পযোজেত্ৰা ঠপিতউপনিক্খেপতো ৰা তত্রুপ্পাদতো ৰা ৰস্সাৰাসিকং গণ্হাতি, সব্বং সুগ্গহিতমেৰ হোতি। ইদমেত্থ লক্খণং, যেন তেনাকারেন সঙ্ঘস্স উপ্পন্নং ৰত্থং অত্থতকথিনস্স পঞ্চমাসে, অনত্থতকথিনস্স একং চীৰরমাসং পাপুণাতীতি। যং পন ‘‘ইদং ইধ ৰস্সংৰুত্থসঙ্ঘস্স দেমা’’তি ৰা ‘‘ৰস্সাৰাসিকং দেমা’’তি ৰা ৰত্ৰা দিন্নং, তং অনত্থতকথিনস্সাপি পঞ্চমাসে পাপুণাতি। ততো পরং পন উপ্পন্নং ৰস্সাৰাসিকং পুচ্ছিতব্বং – ‘‘কিং অতীতৰস্সে ইদং ৰস্সাৰাসিকং, উদাহু অনাগতৰস্সে’’তি! কস্মা? পিট্ঠিসমযে উপ্পন্নত্তা।
363.Tuyheva bhikkhu tāni cīvarānīti aññattha gahetvā haṭānipi tuyheva; na tesaṃ añño koci issaroti. Evañca pana vatvā anāgatepi nikkukkuccā gaṇhissantīti dassetuṃ idha panātiādimāha. Tasseva tāni cīvarāni yāva kathinassa ubbhārāti sace gaṇapūrake bhikkhū labhitvā kathinaṃ atthataṃ hoti, pañcamāse; no ce atthataṃ hoti, ekaṃ cīvaramāsameva. Yaṃ ‘‘saṅghassa demā’’ti vā denti, ‘‘saṅghaṃ uddissa demā’’ti vā denti, ‘‘vassaṃvutthasaṅghassa demā’’ti vā denti, ‘‘vassāvāsikaṃ demā’’ti vā denti, sacepi matakacīvaraṃ avibhajitvā taṃ vihāraṃ pavisanti, taṃ sabbaṃ tasseva bhikkhuno hoti. Yampi so vassāvāsatthāya vaḍḍhiṃ payojetvā ṭhapitaupanikkhepato vā tatruppādato vā vassāvāsikaṃ gaṇhāti, sabbaṃ suggahitameva hoti. Idamettha lakkhaṇaṃ, yena tenākārena saṅghassa uppannaṃ vatthaṃ atthatakathinassa pañcamāse, anatthatakathinassa ekaṃ cīvaramāsaṃ pāpuṇātīti. Yaṃ pana ‘‘idaṃ idha vassaṃvutthasaṅghassa demā’’ti vā ‘‘vassāvāsikaṃ demā’’ti vā vatvā dinnaṃ, taṃ anatthatakathinassāpi pañcamāse pāpuṇāti. Tato paraṃ pana uppannaṃ vassāvāsikaṃ pucchitabbaṃ – ‘‘kiṃ atītavasse idaṃ vassāvāsikaṃ, udāhu anāgatavasse’’ti! Kasmā? Piṭṭhisamaye uppannattā.
উতুকালন্তি ৰস্সানতো অঞ্ঞং কালং। তানি চীৰরানি আদায সাৰত্থিং গন্ত্ৰাতি এত্থ তানি চীৰরানি গতগতট্ঠানে সঙ্ঘিকানেৰ হোন্তি, ভিক্খূহি দিট্ঠমত্তমেৰেত্থ পমাণং। তস্মা সচে কেচি পটিপথং আগচ্ছন্তা ‘‘কুহিং আৰুসো গচ্ছসী’’তি পুচ্ছিত্ৰা তমত্থং সুত্ৰা ‘‘কিং আৰুসো মযং সঙ্ঘো ন হোমা’’তি তত্থেৰ ভাজেত্ৰা গণ্হন্তি, সুগ্গহিতানি। সচেপি এস মগ্গা ওক্কমিত্ৰা কঞ্চি ৰিহারং ৰা আসনসালং ৰা পিণ্ডায চরন্তো একং গেহমেৰ ৰা পৰিসতি, তত্র চ নং ভিক্খূ দিস্ৰা তমত্থং পুচ্ছিত্ৰা ভাজেত্ৰা গণ্হন্তি, সুগ্গহিতানেৰ।
Utukālanti vassānato aññaṃ kālaṃ. Tāni cīvarāni ādāya sāvatthiṃ gantvāti ettha tāni cīvarāni gatagataṭṭhāne saṅghikāneva honti, bhikkhūhi diṭṭhamattamevettha pamāṇaṃ. Tasmā sace keci paṭipathaṃ āgacchantā ‘‘kuhiṃ āvuso gacchasī’’ti pucchitvā tamatthaṃ sutvā ‘‘kiṃ āvuso mayaṃ saṅgho na homā’’ti tattheva bhājetvā gaṇhanti, suggahitāni. Sacepi esa maggā okkamitvā kañci vihāraṃ vā āsanasālaṃ vā piṇḍāya caranto ekaṃ gehameva vā pavisati, tatra ca naṃ bhikkhū disvā tamatthaṃ pucchitvā bhājetvā gaṇhanti, suggahitāneva.
অধিট্ঠাতুন্তি এত্থ অধিট্ঠহন্তেন ৰত্তং জানিতব্বং । তেন হি ভিক্খুনা ঘণ্টিং পহরিত্ৰা কালং ঘোসেত্ৰা থোকং আগমেত্ৰা সচে ঘণ্টিসঞ্ঞায ৰা কালসঞ্ঞায ৰা ভিক্খূ আগচ্ছন্তি, তেহি সদ্ধিং ভাজেতব্বানি। নো চে আগচ্ছন্তি, ‘‘ময্হিমানি চীৰরানি পাপুণন্তী’’তি অধিট্ঠাতব্বানি। এৰং অধিট্ঠিতে সব্বানি তস্সেৰ হোন্তি, ঠিতিকা পন ন তিট্ঠতি।
Adhiṭṭhātunti ettha adhiṭṭhahantena vattaṃ jānitabbaṃ . Tena hi bhikkhunā ghaṇṭiṃ paharitvā kālaṃ ghosetvā thokaṃ āgametvā sace ghaṇṭisaññāya vā kālasaññāya vā bhikkhū āgacchanti, tehi saddhiṃ bhājetabbāni. No ce āgacchanti, ‘‘mayhimāni cīvarāni pāpuṇantī’’ti adhiṭṭhātabbāni. Evaṃ adhiṭṭhite sabbāni tasseva honti, ṭhitikā pana na tiṭṭhati.
সচে একেকং উদ্ধরিত্ৰা ‘‘অযং পঠমভাগো ময্হং পাপুণাতি, অযং দুতিযভাগো’’তি এৰং গণ্হাতি, গহিতানি চ সুগ্গহিতানি হোন্তি, ঠিতিকা চ তিট্ঠতি। এৰং পাপেত্ৰা গণ্হন্তেনাপি অধিট্ঠিতমেৰ হোতি। সচে পন ঘণ্টিং পহরিত্ৰা ৰা অপ্পহরিত্ৰা ৰা কালম্পি ঘোসেত্ৰা ৰা অঘোসেত্ৰা ৰা ‘‘অহমেৰেত্থ ময্হমেৰ ইমানি চীৰরানী’’তি গণ্হাতি, দুগ্গহিতানি হোন্তি। অথ ‘‘অঞ্ঞো কোচি ইধ নত্থি, ময্হং এতানি পাপুণন্তী’’তি গণ্হাতি, সুগ্গহিতানি।
Sace ekekaṃ uddharitvā ‘‘ayaṃ paṭhamabhāgo mayhaṃ pāpuṇāti, ayaṃ dutiyabhāgo’’ti evaṃ gaṇhāti, gahitāni ca suggahitāni honti, ṭhitikā ca tiṭṭhati. Evaṃ pāpetvā gaṇhantenāpi adhiṭṭhitameva hoti. Sace pana ghaṇṭiṃ paharitvā vā appaharitvā vā kālampi ghosetvā vā aghosetvā vā ‘‘ahamevettha mayhameva imāni cīvarānī’’ti gaṇhāti, duggahitāni honti. Atha ‘‘añño koci idha natthi, mayhaṃ etāni pāpuṇantī’’ti gaṇhāti, suggahitāni.
পাতিতে কুসেতি এককোট্ঠাসে কুসদণ্ডকে পাতিতমত্তে সচেপি ভিক্খুসহস্সং হোতি, গহিতমেৰ নাম চীৰরং। নাকামা ভাগো দাতব্বো। সচে পন অত্তনো রুচিযা দাতুকামা হোন্তি, দেন্তু। অনুভাগেপি এসেৰ নযো।
Pātite kuseti ekakoṭṭhāse kusadaṇḍake pātitamatte sacepi bhikkhusahassaṃ hoti, gahitameva nāma cīvaraṃ. Nākāmā bhāgo dātabbo. Sace pana attano ruciyā dātukāmā honti, dentu. Anubhāgepi eseva nayo.
সচীৰরানীতি ‘‘কালচীৰরম্পি সঙ্ঘস্স ইতোৰ দস্সাম, ৰিসুং সজ্জিযমানে অতিচিরং হোতী’’তি খিপ্পংযেৰ সচীৰরানি ভত্তানি অকংসু। থেরে আগম্ম উপ্পন্নানীতি তুম্হেসু পসাদেন খিপ্পং উপ্পন্নানি।
Sacīvarānīti ‘‘kālacīvarampi saṅghassa itova dassāma, visuṃ sajjiyamāne aticiraṃ hotī’’ti khippaṃyeva sacīvarāni bhattāni akaṃsu. There āgamma uppannānīti tumhesu pasādena khippaṃ uppannāni.
সঙ্ঘস্স দেমাতি চীৰরানি দেন্তীতি সকলম্পি চীৰরকালং সণিকং সণিকং দেন্তিযেৰ। পুরিমেসু পন দ্ৰীসু ৰত্থূসু পচ্ছিন্নদানত্তা অদংসূতি ৰুত্তং। সম্বহুলা থেরাতি ৰিনযধরপামোক্খথেরা। ইদং পন ৰত্থুং সদ্ধিং পুরিমেন দ্ৰেভাতিকৰত্থুনা পরিনিব্বুতে ভগৰতি উপ্পন্নং, ইমে চ থেরা দিট্ঠপুব্বা তথাগতং, তস্মা পুরিমেসু ৰত্থূসু তথাগতেন পঞ্ঞত্তনযেনেৰ কথেসুং।
Saṅghassa demāti cīvarāni dentīti sakalampi cīvarakālaṃ saṇikaṃ saṇikaṃ dentiyeva. Purimesu pana dvīsu vatthūsu pacchinnadānattā adaṃsūti vuttaṃ. Sambahulā therāti vinayadharapāmokkhatherā. Idaṃ pana vatthuṃ saddhiṃ purimena dvebhātikavatthunā parinibbute bhagavati uppannaṃ, ime ca therā diṭṭhapubbā tathāgataṃ, tasmā purimesu vatthūsu tathāgatena paññattanayeneva kathesuṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২২২. সঙ্ঘিকচীৰরুপ্পাদকথা • 222. Saṅghikacīvaruppādakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২২২. সঙ্ঘিকচীৰরুপ্পাদকথা • 222. Saṅghikacīvaruppādakathā
