| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২২২. সঙ্ঘিকচীৰরুপ্পাদকথা
222. Saṅghikacīvaruppādakathā
৩৬৩. অঞ্ঞত্থাতি দিন্নট্ঠানতো অঞ্ঞত্থ। হটানিপি চীৰরানি তুয্হেৰ সন্তকানীতি যোজনা। তেসন্তি চীৰরানং। অঞ্ঞোতি এককৰস্সাৰাসিকতো অঞ্ঞো। পঞ্চমাসে তং সব্বং তস্সেৰ ভিক্খুনো হোতীতি সম্বন্ধো। যন্তি চীৰরং, তং সব্বং চীৰরন্তি সম্বন্ধো। যম্পীতি চীৰরম্পি। সোতি ভিক্খু, গণ্হাতীতি সম্বন্ধো। ৰস্সাৰাসত্থাযাতি ৰস্সং আৰাসস্স ভিক্খুনো অত্থায। ঠপিতউপনিক্খেপতোতি ৰেয্যাৰচ্চকরেহি ৰড্ঢিং পযোজেত্ৰা ঠপিতউপনিক্খেপতো। তত্রুপ্পাদতোতি তস্মিং ৰিহারে উপ্পাদতো নাল়িকেরআরামাদিতো। ইদন্তি ৰক্খমানং। এত্থাতি ‘‘তস্সেৰ তানি চীৰরানি যাৰ কথিনস্স উব্ভারাযা’’তি ৰচনে। যন্তি চীৰরং। পন সদ্দো ৰিসেসত্থজোতকো। ইদন্তি পদালঙ্কারমত্তং। ইধাতি ইমস্মিং ৰিহারে। অভিলাপমত্তন্তিপি ৰদন্তি। অনত্থতকথিনস্সাপীতি পিসদ্দো পগেৰ অত্থতকথিনস্সাতি দস্সেতি । পঞ্চমাসেতি অচ্চন্তসংযোগত্থে উপযোগৰচনং। ততোতি পঞ্চমাসতো। অতীতৰস্সে ৰস্সংৰুত্থসঙ্ঘস্স ইদং ৰস্সাৰাসিকং দেতি কিং? উদাহু অনাগতৰস্সেতি যোজনা। পিট্ঠিসমযেতি গিম্হানং পঠমদিৰসতো পট্ঠায যাৰ অস্সযুজপুণ্ণমী, তাৰ পিট্ঠিসমযে।
363.Aññatthāti dinnaṭṭhānato aññattha. Haṭānipi cīvarāni tuyheva santakānīti yojanā. Tesanti cīvarānaṃ. Aññoti ekakavassāvāsikato añño. Pañcamāse taṃ sabbaṃ tasseva bhikkhuno hotīti sambandho. Yanti cīvaraṃ, taṃ sabbaṃ cīvaranti sambandho. Yampīti cīvarampi. Soti bhikkhu, gaṇhātīti sambandho. Vassāvāsatthāyāti vassaṃ āvāsassa bhikkhuno atthāya. Ṭhapitaupanikkhepatoti veyyāvaccakarehi vaḍḍhiṃ payojetvā ṭhapitaupanikkhepato. Tatruppādatoti tasmiṃ vihāre uppādato nāḷikeraārāmādito. Idanti vakkhamānaṃ. Etthāti ‘‘tasseva tāni cīvarāni yāva kathinassa ubbhārāyā’’ti vacane. Yanti cīvaraṃ. Pana saddo visesatthajotako. Idanti padālaṅkāramattaṃ. Idhāti imasmiṃ vihāre. Abhilāpamattantipi vadanti. Anatthatakathinassāpīti pisaddo pageva atthatakathinassāti dasseti . Pañcamāseti accantasaṃyogatthe upayogavacanaṃ. Tatoti pañcamāsato. Atītavasse vassaṃvutthasaṅghassa idaṃ vassāvāsikaṃ deti kiṃ? Udāhu anāgatavasseti yojanā. Piṭṭhisamayeti gimhānaṃ paṭhamadivasato paṭṭhāya yāva assayujapuṇṇamī, tāva piṭṭhisamaye.
ৰস্সানতোতি ৰস্সানমাসতো। এত্থাতি এতেসু চীৰরেসু। কেচি ভিক্খূতি সম্বন্ধো। তমত্থন্তি তস্স সঙ্ঘিকচীৰরস্স কারণং। তত্থেৰাতি গতট্ঠানে এৰ। এসাতি সঙ্ঘিকচীৰরহারকো ভিক্খু। তত্রাতি ৰিহারাদীসু। নন্তি চীৰরহারকং ভিক্খুং।
Vassānatoti vassānamāsato. Etthāti etesu cīvaresu. Keci bhikkhūti sambandho. Tamatthanti tassa saṅghikacīvarassa kāraṇaṃ. Tatthevāti gataṭṭhāne eva. Esāti saṅghikacīvarahārako bhikkhu. Tatrāti vihārādīsu. Nanti cīvarahārakaṃ bhikkhuṃ.
ৰত্তং ৰিত্থারেত্ৰা দস্সেন্তো আহ ‘‘তেন হী’’তিআদি। তেন ভিক্খুনা ভাজেতব্বানীতি সম্বন্ধো। তস্সেৰাতি অধিট্ঠহন্তস্সেৰ।
Vattaṃ vitthāretvā dassento āha ‘‘tena hī’’tiādi. Tena bhikkhunā bhājetabbānīti sambandho. Tassevāti adhiṭṭhahantasseva.
একেকং ভাগন্তি সম্বন্ধো। এত্থ ঠানে অহমেৰ অস্মীতি যোজনা। দুগ্গহিতানি হোন্তীতি সঙ্ঘিকানেৰ হোন্তীতি অধিপ্পাযো। ময্হমেৰিমানি চীৰরানীতি ইস্সরৰসেন গহণে দুগ্গহিতানি। ময্হেতানি পাপুণন্তীতি অনিস্সরৰসেন গহণে সুগ্গহিতানীতি ৰিসেসো।
Ekekaṃ bhāganti sambandho. Ettha ṭhāne ahameva asmīti yojanā. Duggahitāni hontīti saṅghikāneva hontīti adhippāyo. Mayhamevimāni cīvarānīti issaravasena gahaṇe duggahitāni. Mayhetāni pāpuṇantīti anissaravasena gahaṇe suggahitānīti viseso.
পাতিতে কুসেতি এত্থ তপচ্চযস্স পচ্চুপ্পন্নকালিকভাৰং দস্সেন্তো আহ ‘‘এককোট্ঠাসে’’তিআদি। গহিতমেৰাতি এককোট্ঠাসে পাতিতস্স কুসদণ্ডস্স ৰসেন ‘‘ইমস্সিদ’’ন্তি এককোট্ঠাসে ৰিদিতে সব্বেসং ৰিদিতত্তা গহিতমেৰাতি অধিপ্পাযো।
Pātite kuseti ettha tapaccayassa paccuppannakālikabhāvaṃ dassento āha ‘‘ekakoṭṭhāse’’tiādi. Gahitamevāti ekakoṭṭhāse pātitassa kusadaṇḍassa vasena ‘‘imassida’’nti ekakoṭṭhāse vidite sabbesaṃ viditattā gahitamevāti adhippāyo.
ইতোৰাতি সচীৰরভত্ততোৰ। ৰিসুং সজ্জিযমানেতি চীৰরে চ ভত্তে চ ৰিসুং সজ্জিযমানে।
Itovāti sacīvarabhattatova. Visuṃ sajjiyamāneti cīvare ca bhatte ca visuṃ sajjiyamāne.
যথা পুরিমেসু দ্ৰীসু ৰত্থূসু ‘‘অদংসূ’’তি ৰুত্তং, তথা অৰত্ৰা কস্মা ইধ ‘‘দেন্তী’’তি ৰুত্তন্তি আহ ‘‘সণিকং সণিকং দেন্তিযেৰা’’তি। সণিকং সণিকং দেন্তে দানকিরিযায অনুপচ্ছিন্নত্তা ‘‘দেন্তী’’তি পচ্চুপ্পন্নৰসেন ৰুত্তন্তি অধিপ্পাযো। পচ্ছিন্নদানত্তাতি পচ্ছিন্নদানকিরিযভাৰতো। ইদং পন ৰত্থু উপ্পন্নন্তি সম্বন্ধো। ইমে চ থেরাতি নিলৰাসিআদযো ৰিনযধরপামোক্খা ইমে চ থেরা।
Yathā purimesu dvīsu vatthūsu ‘‘adaṃsū’’ti vuttaṃ, tathā avatvā kasmā idha ‘‘dentī’’ti vuttanti āha ‘‘saṇikaṃ saṇikaṃ dentiyevā’’ti. Saṇikaṃ saṇikaṃ dente dānakiriyāya anupacchinnattā ‘‘dentī’’ti paccuppannavasena vuttanti adhippāyo. Pacchinnadānattāti pacchinnadānakiriyabhāvato. Idaṃ pana vatthu uppannanti sambandho. Ime ca therāti nilavāsiādayo vinayadharapāmokkhā ime ca therā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২২২. সঙ্ঘিকচীৰরুপ্পাদকথা • 222. Saṅghikacīvaruppādakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সঙ্ঘিকচীৰরুপ্পাদকথা • Saṅghikacīvaruppādakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সঙ্ঘিকচীৰরুপ্পাদকথাৰণ্ণনা • Saṅghikacīvaruppādakathāvaṇṇanā
