| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
сан̇гхигажийваруббаад̣̇агат̇аа
Saṅghikacīvaruppādakathā
363. д̇уяхзва бхигку д̇аани жийвараанийд̇и ан̃н̃ад̇т̇а г̇ахзд̇ваа хадааниби д̇уяхзва; на д̇зсам̣ ан̃н̃о гожи иссарод̇и. зван̃жа бана вад̇ваа анааг̇ад̇зби ниггуггужжаа г̇ан̣хиссанд̇ийд̇и д̣̇ассзд̇ум̣ ид̇ха банаад̇иаад̣̇имааха. д̇ассзва д̇аани жийвараани яаава гат̇инасса уб̣бхаараад̇и сажз г̇ан̣абуурагз бхигкуу лабхид̇ваа гат̇инам̣ ад̇т̇ад̇ам̣ ход̇и, бан̃жамаасз; но жз ад̇т̇ад̇ам̣ ход̇и, згам̣ жийварамаасамзва. яам̣ ‘‘сан̇гхасса д̣̇змаа’’д̇и ваа д̣̇знд̇и, ‘‘сан̇гхам̣ уд̣̇д̣̇исса д̣̇змаа’’д̇и ваа д̣̇знд̇и, ‘‘вассам̣вуд̇т̇асан̇гхасса д̣̇змаа’’д̇и ваа д̣̇знд̇и, ‘‘вассааваасигам̣ д̣̇змаа’’д̇и ваа д̣̇знд̇и, сажзби мад̇агажийварам̣ авибхаж̇ид̇ваа д̇ам̣ вихаарам̣ бависанд̇и, д̇ам̣ саб̣б̣ам̣ д̇ассзва бхигкуно ход̇и. яамби со вассааваасад̇т̇ааяа вад̣дхим̣ баяож̇зд̇ваа табид̇аубанигкзбад̇о ваа д̇ад̇руббаад̣̇ад̇о ваа вассааваасигам̣ г̇ан̣хаад̇и, саб̣б̣ам̣ суг̇г̇ахид̇амзва ход̇и. ид̣̇амзд̇т̇а лагкан̣ам̣, язна д̇знаагаарзна сан̇гхасса уббаннам̣ вад̇т̇ам̣ ад̇т̇ад̇агат̇инасса бан̃жамаасз, анад̇т̇ад̇агат̇инасса згам̣ жийварамаасам̣ баабун̣аад̇ийд̇и. яам̣ бана ‘‘ид̣̇ам̣ ид̇ха вассам̣вуд̇т̇асан̇гхасса д̣̇змаа’’д̇и ваа ‘‘вассааваасигам̣ д̣̇змаа’’д̇и ваа вад̇ваа д̣̇иннам̣, д̇ам̣ анад̇т̇ад̇агат̇инассааби бан̃жамаасз баабун̣аад̇и. д̇ад̇о барам̣ бана уббаннам̣ вассааваасигам̣ бужчид̇аб̣б̣ам̣ – ‘‘гим̣ ад̇ийд̇авассз ид̣̇ам̣ вассааваасигам̣, уд̣̇ааху анааг̇ад̇авассз’’д̇и! гасмаа? бидтисамаяз уббаннад̇д̇аа.
363.Tuyheva bhikkhu tāni cīvarānīti aññattha gahetvā haṭānipi tuyheva; na tesaṃ añño koci issaroti. Evañca pana vatvā anāgatepi nikkukkuccā gaṇhissantīti dassetuṃ idha panātiādimāha. Tasseva tāni cīvarāni yāva kathinassa ubbhārāti sace gaṇapūrake bhikkhū labhitvā kathinaṃ atthataṃ hoti, pañcamāse; no ce atthataṃ hoti, ekaṃ cīvaramāsameva. Yaṃ ‘‘saṅghassa demā’’ti vā denti, ‘‘saṅghaṃ uddissa demā’’ti vā denti, ‘‘vassaṃvutthasaṅghassa demā’’ti vā denti, ‘‘vassāvāsikaṃ demā’’ti vā denti, sacepi matakacīvaraṃ avibhajitvā taṃ vihāraṃ pavisanti, taṃ sabbaṃ tasseva bhikkhuno hoti. Yampi so vassāvāsatthāya vaḍḍhiṃ payojetvā ṭhapitaupanikkhepato vā tatruppādato vā vassāvāsikaṃ gaṇhāti, sabbaṃ suggahitameva hoti. Idamettha lakkhaṇaṃ, yena tenākārena saṅghassa uppannaṃ vatthaṃ atthatakathinassa pañcamāse, anatthatakathinassa ekaṃ cīvaramāsaṃ pāpuṇātīti. Yaṃ pana ‘‘idaṃ idha vassaṃvutthasaṅghassa demā’’ti vā ‘‘vassāvāsikaṃ demā’’ti vā vatvā dinnaṃ, taṃ anatthatakathinassāpi pañcamāse pāpuṇāti. Tato paraṃ pana uppannaṃ vassāvāsikaṃ pucchitabbaṃ – ‘‘kiṃ atītavasse idaṃ vassāvāsikaṃ, udāhu anāgatavasse’’ti! Kasmā? Piṭṭhisamaye uppannattā.
уд̇угааланд̇и вассаанад̇о ан̃н̃ам̣ гаалам̣. д̇аани жийвараани аад̣̇ааяа саавад̇т̇им̣ г̇анд̇ваад̇и зд̇т̇а д̇аани жийвараани г̇ад̇аг̇ад̇адтаанз сан̇гхигаанзва хонд̇и, бхигкуухи д̣̇идтамад̇д̇амзвзд̇т̇а бамаан̣ам̣. д̇асмаа сажз гзжи бадибат̇ам̣ ааг̇ажчанд̇аа ‘‘гухим̣ аавусо г̇ажчасий’’д̇и бужчид̇ваа д̇амад̇т̇ам̣ суд̇ваа ‘‘гим̣ аавусо маяам̣ сан̇гхо на хомаа’’д̇и д̇ад̇т̇зва бхааж̇зд̇ваа г̇ан̣ханд̇и, суг̇г̇ахид̇аани. сажзби зса маг̇г̇аа оггамид̇ваа ган̃жи вихаарам̣ ваа аасанасаалам̣ ваа бин̣д̣ааяа жаранд̇о згам̣ г̇зхамзва ваа бависад̇и, д̇ад̇ра жа нам̣ бхигкуу д̣̇исваа д̇амад̇т̇ам̣ бужчид̇ваа бхааж̇зд̇ваа г̇ан̣ханд̇и, суг̇г̇ахид̇аанзва.
Utukālanti vassānato aññaṃ kālaṃ. Tāni cīvarāni ādāya sāvatthiṃ gantvāti ettha tāni cīvarāni gatagataṭṭhāne saṅghikāneva honti, bhikkhūhi diṭṭhamattamevettha pamāṇaṃ. Tasmā sace keci paṭipathaṃ āgacchantā ‘‘kuhiṃ āvuso gacchasī’’ti pucchitvā tamatthaṃ sutvā ‘‘kiṃ āvuso mayaṃ saṅgho na homā’’ti tattheva bhājetvā gaṇhanti, suggahitāni. Sacepi esa maggā okkamitvā kañci vihāraṃ vā āsanasālaṃ vā piṇḍāya caranto ekaṃ gehameva vā pavisati, tatra ca naṃ bhikkhū disvā tamatthaṃ pucchitvā bhājetvā gaṇhanti, suggahitāneva.
ад̇хидтаад̇унд̇и зд̇т̇а ад̇хидтаханд̇зна вад̇д̇ам̣ ж̇аанид̇аб̣б̣ам̣ . д̇зна хи бхигкунаа гхан̣дим̣ бахарид̇ваа гаалам̣ гхосзд̇ваа т̇огам̣ ааг̇амзд̇ваа сажз гхан̣дисан̃н̃ааяа ваа гааласан̃н̃ааяа ваа бхигкуу ааг̇ажчанд̇и, д̇зхи сад̣̇д̇хим̣ бхааж̇зд̇аб̣б̣аани. но жз ааг̇ажчанд̇и, ‘‘маяхимаани жийвараани баабун̣анд̇ий’’д̇и ад̇хидтаад̇аб̣б̣аани. звам̣ ад̇хидтид̇з саб̣б̣аани д̇ассзва хонд̇и, тид̇игаа бана на д̇идтад̇и.
Adhiṭṭhātunti ettha adhiṭṭhahantena vattaṃ jānitabbaṃ . Tena hi bhikkhunā ghaṇṭiṃ paharitvā kālaṃ ghosetvā thokaṃ āgametvā sace ghaṇṭisaññāya vā kālasaññāya vā bhikkhū āgacchanti, tehi saddhiṃ bhājetabbāni. No ce āgacchanti, ‘‘mayhimāni cīvarāni pāpuṇantī’’ti adhiṭṭhātabbāni. Evaṃ adhiṭṭhite sabbāni tasseva honti, ṭhitikā pana na tiṭṭhati.
сажз згзгам̣ уд̣̇д̇харид̇ваа ‘‘аяам̣ батамабхааг̇о маяхам̣ баабун̣аад̇и, аяам̣ д̣̇уд̇ияабхааг̇о’’д̇и звам̣ г̇ан̣хаад̇и, г̇ахид̇аани жа суг̇г̇ахид̇аани хонд̇и, тид̇игаа жа д̇идтад̇и. звам̣ баабзд̇ваа г̇ан̣ханд̇знааби ад̇хидтид̇амзва ход̇и. сажз бана гхан̣дим̣ бахарид̇ваа ваа аббахарид̇ваа ваа гааламби гхосзд̇ваа ваа агхосзд̇ваа ваа ‘‘ахамзвзд̇т̇а маяхамзва имаани жийварааний’’д̇и г̇ан̣хаад̇и, д̣̇уг̇г̇ахид̇аани хонд̇и. ат̇а ‘‘ан̃н̃о гожи ид̇ха над̇т̇и, маяхам̣ зд̇аани баабун̣анд̇ий’’д̇и г̇ан̣хаад̇и, суг̇г̇ахид̇аани.
Sace ekekaṃ uddharitvā ‘‘ayaṃ paṭhamabhāgo mayhaṃ pāpuṇāti, ayaṃ dutiyabhāgo’’ti evaṃ gaṇhāti, gahitāni ca suggahitāni honti, ṭhitikā ca tiṭṭhati. Evaṃ pāpetvā gaṇhantenāpi adhiṭṭhitameva hoti. Sace pana ghaṇṭiṃ paharitvā vā appaharitvā vā kālampi ghosetvā vā aghosetvā vā ‘‘ahamevettha mayhameva imāni cīvarānī’’ti gaṇhāti, duggahitāni honti. Atha ‘‘añño koci idha natthi, mayhaṃ etāni pāpuṇantī’’ti gaṇhāti, suggahitāni.
баад̇ид̇з гусзд̇и згагодтаасз гусад̣̇ан̣д̣агз баад̇ид̇амад̇д̇з сажзби бхигкусахассам̣ ход̇и, г̇ахид̇амзва наама жийварам̣. наагаамаа бхааг̇о д̣̇аад̇аб̣б̣о. сажз бана ад̇д̇ано ружияаа д̣̇аад̇угаамаа хонд̇и, д̣̇знд̇у. анубхааг̇зби зсзва наяо.
Pātite kuseti ekakoṭṭhāse kusadaṇḍake pātitamatte sacepi bhikkhusahassaṃ hoti, gahitameva nāma cīvaraṃ. Nākāmā bhāgo dātabbo. Sace pana attano ruciyā dātukāmā honti, dentu. Anubhāgepi eseva nayo.
сажийвараанийд̇и ‘‘гаалажийварамби сан̇гхасса ид̇ова д̣̇ассаама, висум̣ саж̇ж̇ияамаанз ад̇ижирам̣ ход̇ий’’д̇и киббам̣язва сажийвараани бхад̇д̇аани агам̣су. т̇зрз ааг̇амма уббаннаанийд̇и д̇умхзсу басаад̣̇зна киббам̣ уббаннаани.
Sacīvarānīti ‘‘kālacīvarampi saṅghassa itova dassāma, visuṃ sajjiyamāne aticiraṃ hotī’’ti khippaṃyeva sacīvarāni bhattāni akaṃsu. There āgamma uppannānīti tumhesu pasādena khippaṃ uppannāni.
сан̇гхасса д̣̇змаад̇и жийвараани д̣̇знд̇ийд̇и сагаламби жийварагаалам̣ сан̣игам̣ сан̣игам̣ д̣̇знд̇иязва. буримзсу бана д̣̇вийсу вад̇т̇уусу бажчиннад̣̇аанад̇д̇аа ад̣̇ам̣сууд̇и вуд̇д̇ам̣. самб̣ахулаа т̇зраад̇и винаяад̇харабаамогкат̇зраа. ид̣̇ам̣ бана вад̇т̇ум̣ сад̣̇д̇хим̣ буримзна д̣̇взбхаад̇игавад̇т̇унаа бариниб̣б̣уд̇з бхаг̇авад̇и уббаннам̣, имз жа т̇зраа д̣̇идтабуб̣б̣аа д̇ат̇ааг̇ад̇ам̣, д̇асмаа буримзсу вад̇т̇уусу д̇ат̇ааг̇ад̇зна бан̃н̃ад̇д̇анаязнзва гат̇зсум̣.
Saṅghassa demāti cīvarāni dentīti sakalampi cīvarakālaṃ saṇikaṃ saṇikaṃ dentiyeva. Purimesu pana dvīsu vatthūsu pacchinnadānattā adaṃsūti vuttaṃ. Sambahulā therāti vinayadharapāmokkhatherā. Idaṃ pana vatthuṃ saddhiṃ purimena dvebhātikavatthunā parinibbute bhagavati uppannaṃ, ime ca therā diṭṭhapubbā tathāgataṃ, tasmā purimesu vatthūsu tathāgatena paññattanayeneva kathesuṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 222. сан̇гхигажийваруббаад̣̇агат̇аа • 222. Saṅghikacīvaruppādakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / сан̇гхигажийваруббаад̣̇агат̇ааван̣н̣анаа • Saṅghikacīvaruppādakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / сан̇гхигажийваруббаад̣̇агат̇ааван̣н̣анаа • Saṅghikacīvaruppādakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / сан̇гхигажийваруббаад̣̇агат̇ааван̣н̣анаа • Saṅghikacīvaruppādakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 222. сан̇гхигажийваруббаад̣̇агат̇аа • 222. Saṅghikacīvaruppādakathā
