| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๒๒๒. สงฺฆิกจีวรุปฺปาทกถา
222. Saṅghikacīvaruppādakathā
๓๖๓. อญฺญตฺถาติ ทินฺนฎฺฐานโต อญฺญตฺถฯ หฎานิปิ จีวรานิ ตุเยฺหว สนฺตกานีติ โยชนาฯ เตสนฺติ จีวรานํฯ อโญฺญติ เอกกวสฺสาวาสิกโต อโญฺญฯ ปญฺจมาเส ตํ สพฺพํ ตเสฺสว ภิกฺขุโน โหตีติ สมฺพโนฺธฯ ยนฺติ จีวรํ, ตํ สพฺพํ จีวรนฺติ สมฺพโนฺธฯ ยมฺปีติ จีวรมฺปิฯ โสติ ภิกฺขุ, คณฺหาตีติ สมฺพโนฺธฯ วสฺสาวาสตฺถายาติ วสฺสํ อาวาสสฺส ภิกฺขุโน อตฺถายฯ ฐปิตอุปนิเกฺขปโตติ เวยฺยาวจฺจกเรหิ วฑฺฒิํ ปโยเชตฺวา ฐปิตอุปนิเกฺขปโตฯ ตตฺรุปฺปาทโตติ ตสฺมิํ วิหาเร อุปฺปาทโต นาฬิเกรอารามาทิโตฯ อิทนฺติ วกฺขมานํฯ เอตฺถาติ ‘‘ตเสฺสว ตานิ จีวรานิ ยาว กถินสฺส อุพฺภารายา’’ติ วจเนฯ ยนฺติ จีวรํฯ ปน สโทฺท วิเสสตฺถโชตโกฯ อิทนฺติ ปทาลงฺการมตฺตํฯ อิธาติ อิมสฺมิํ วิหาเรฯ อภิลาปมตฺตนฺติปิ วทนฺติฯ อนตฺถตกถินสฺสาปีติ ปิสโทฺท ปเคว อตฺถตกถินสฺสาติ ทเสฺสติ ฯ ปญฺจมาเสติ อจฺจนฺตสํโยคเตฺถ อุปโยควจนํฯ ตโตติ ปญฺจมาสโตฯ อตีตวเสฺส วสฺสํวุตฺถสงฺฆสฺส อิทํ วสฺสาวาสิกํ เทติ กิํ? อุทาหุ อนาคตวเสฺสติ โยชนาฯ ปิฎฺฐิสมเยติ คิมฺหานํ ปฐมทิวสโต ปฎฺฐาย ยาว อสฺสยุชปุณฺณมี, ตาว ปิฎฺฐิสมเยฯ
363.Aññatthāti dinnaṭṭhānato aññattha. Haṭānipi cīvarāni tuyheva santakānīti yojanā. Tesanti cīvarānaṃ. Aññoti ekakavassāvāsikato añño. Pañcamāse taṃ sabbaṃ tasseva bhikkhuno hotīti sambandho. Yanti cīvaraṃ, taṃ sabbaṃ cīvaranti sambandho. Yampīti cīvarampi. Soti bhikkhu, gaṇhātīti sambandho. Vassāvāsatthāyāti vassaṃ āvāsassa bhikkhuno atthāya. Ṭhapitaupanikkhepatoti veyyāvaccakarehi vaḍḍhiṃ payojetvā ṭhapitaupanikkhepato. Tatruppādatoti tasmiṃ vihāre uppādato nāḷikeraārāmādito. Idanti vakkhamānaṃ. Etthāti ‘‘tasseva tāni cīvarāni yāva kathinassa ubbhārāyā’’ti vacane. Yanti cīvaraṃ. Pana saddo visesatthajotako. Idanti padālaṅkāramattaṃ. Idhāti imasmiṃ vihāre. Abhilāpamattantipi vadanti. Anatthatakathinassāpīti pisaddo pageva atthatakathinassāti dasseti . Pañcamāseti accantasaṃyogatthe upayogavacanaṃ. Tatoti pañcamāsato. Atītavasse vassaṃvutthasaṅghassa idaṃ vassāvāsikaṃ deti kiṃ? Udāhu anāgatavasseti yojanā. Piṭṭhisamayeti gimhānaṃ paṭhamadivasato paṭṭhāya yāva assayujapuṇṇamī, tāva piṭṭhisamaye.
วสฺสานโตติ วสฺสานมาสโตฯ เอตฺถาติ เอเตสุ จีวเรสุฯ เกจิ ภิกฺขูติ สมฺพโนฺธฯ ตมตฺถนฺติ ตสฺส สงฺฆิกจีวรสฺส การณํฯ ตเตฺถวาติ คตฎฺฐาเน เอวฯ เอสาติ สงฺฆิกจีวรหารโก ภิกฺขุฯ ตตฺราติ วิหาราทีสุฯ นนฺติ จีวรหารกํ ภิกฺขุํฯ
Vassānatoti vassānamāsato. Etthāti etesu cīvaresu. Keci bhikkhūti sambandho. Tamatthanti tassa saṅghikacīvarassa kāraṇaṃ. Tatthevāti gataṭṭhāne eva. Esāti saṅghikacīvarahārako bhikkhu. Tatrāti vihārādīsu. Nanti cīvarahārakaṃ bhikkhuṃ.
วตฺตํ วิตฺถาเรตฺวา ทเสฺสโนฺต อาห ‘‘เตน หี’’ติอาทิฯ เตน ภิกฺขุนา ภาเชตพฺพานีติ สมฺพโนฺธฯ ตเสฺสวาติ อธิฎฺฐหนฺตเสฺสวฯ
Vattaṃ vitthāretvā dassento āha ‘‘tena hī’’tiādi. Tena bhikkhunā bhājetabbānīti sambandho. Tassevāti adhiṭṭhahantasseva.
เอเกกํ ภาคนฺติ สมฺพโนฺธฯ เอตฺถ ฐาเน อหเมว อสฺมีติ โยชนาฯ ทุคฺคหิตานิ โหนฺตีติ สงฺฆิกาเนว โหนฺตีติ อธิปฺปาโยฯ มยฺหเมวิมานิ จีวรานีติ อิสฺสรวเสน คหเณ ทุคฺคหิตานิฯ มเยฺหตานิ ปาปุณนฺตีติ อนิสฺสรวเสน คหเณ สุคฺคหิตานีติ วิเสโสฯ
Ekekaṃ bhāganti sambandho. Ettha ṭhāne ahameva asmīti yojanā. Duggahitāni hontīti saṅghikāneva hontīti adhippāyo. Mayhamevimāni cīvarānīti issaravasena gahaṇe duggahitāni. Mayhetāni pāpuṇantīti anissaravasena gahaṇe suggahitānīti viseso.
ปาติเต กุเสติ เอตฺถ ตปจฺจยสฺส ปจฺจุปฺปนฺนกาลิกภาวํ ทเสฺสโนฺต อาห ‘‘เอกโกฎฺฐาเส’’ติอาทิฯ คหิตเมวาติ เอกโกฎฺฐาเส ปาติตสฺส กุสทณฺฑสฺส วเสน ‘‘อิมสฺสิท’’นฺติ เอกโกฎฺฐาเส วิทิเต สเพฺพสํ วิทิตตฺตา คหิตเมวาติ อธิปฺปาโยฯ
Pātite kuseti ettha tapaccayassa paccuppannakālikabhāvaṃ dassento āha ‘‘ekakoṭṭhāse’’tiādi. Gahitamevāti ekakoṭṭhāse pātitassa kusadaṇḍassa vasena ‘‘imassida’’nti ekakoṭṭhāse vidite sabbesaṃ viditattā gahitamevāti adhippāyo.
อิโตวาติ สจีวรภตฺตโตวฯ วิสุํ สชฺชิยมาเนติ จีวเร จ ภเตฺต จ วิสุํ สชฺชิยมาเนฯ
Itovāti sacīvarabhattatova. Visuṃ sajjiyamāneti cīvare ca bhatte ca visuṃ sajjiyamāne.
ยถา ปุริเมสุ ทฺวีสุ วตฺถูสุ ‘‘อทํสู’’ติ วุตฺตํ, ตถา อวตฺวา กสฺมา อิธ ‘‘เทนฺตี’’ติ วุตฺตนฺติ อาห ‘‘สณิกํ สณิกํ เทนฺติเยวา’’ติฯ สณิกํ สณิกํ เทเนฺต ทานกิริยาย อนุปจฺฉินฺนตฺตา ‘‘เทนฺตี’’ติ ปจฺจุปฺปนฺนวเสน วุตฺตนฺติ อธิปฺปาโยฯ ปจฺฉินฺนทานตฺตาติ ปจฺฉินฺนทานกิริยภาวโตฯ อิทํ ปน วตฺถุ อุปฺปนฺนนฺติ สมฺพโนฺธฯ อิเม จ เถราติ นิลวาสิอาทโย วินยธรปาโมกฺขา อิเม จ เถราฯ
Yathā purimesu dvīsu vatthūsu ‘‘adaṃsū’’ti vuttaṃ, tathā avatvā kasmā idha ‘‘dentī’’ti vuttanti āha ‘‘saṇikaṃ saṇikaṃ dentiyevā’’ti. Saṇikaṃ saṇikaṃ dente dānakiriyāya anupacchinnattā ‘‘dentī’’ti paccuppannavasena vuttanti adhippāyo. Pacchinnadānattāti pacchinnadānakiriyabhāvato. Idaṃ pana vatthu uppannanti sambandho. Ime ca therāti nilavāsiādayo vinayadharapāmokkhā ime ca therā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๒๒๒. สงฺฆิกจีวรุปฺปาทกถา • 222. Saṅghikacīvaruppādakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / สงฺฆิกจีวรุปฺปาทกถา • Saṅghikacīvaruppādakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / สงฺฆิกจีวรุปฺปาทกถาวณฺณนา • Saṅghikacīvaruppādakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / สงฺฆิกจีวรุปฺปาทกถาวณฺณนา • Saṅghikacīvaruppādakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / สงฺฆิกจีวรุปฺปาทกถาวณฺณนา • Saṅghikacīvaruppādakathāvaṇṇanā
