| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. ஸங்கு⁴பட்டா²கத்தே²ரஅபதா³னவண்ணனா
10. Saṅghupaṭṭhākattheraapadānavaṇṇanā
வெஸ்ஸபு⁴ம்ஹி ப⁴க³வதீதிஆதி³கங் ஆயஸ்மதோ ஸங்கு⁴பட்டா²கத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதகுஸலஸம்பா⁴ரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ வெஸ்ஸபு⁴ஸ்ஸ ப⁴க³வதோ காலே தஸ்ஸாராமிகஸ்ஸ புத்தோ ஹுத்வா நிப்³ப³த்தோ விஞ்ஞுதங் பத்வா ஸத்³தோ⁴ பஸன்னோ விஹாரேஸு ஆராமிககம்மங் கரொந்தோ ஸக்கச்சங் ஸங்க⁴ங் உபட்டா²ஸி. ஸோ தேனேவ குஸலகம்மேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் க³ஹபதிகுலே நிப்³ப³த்தோ வுத்³தி⁴ப்பத்தோ விப⁴வஸம்பன்னோ ஸுக²ப்பத்தோ பாகடோ ஸத்து² த⁴ம்மதே³ஸனங் ஸுத்வா ஸாஸனே பஸன்னோ பப்³ப³ஜித்வா வத்தஸம்பன்னோ ஸாஸனங் ஸோப⁴யமானோ விபஸ்ஸனங் வட்³டெ⁴ந்தோ நசிரஸ்ஸேவ ஸஹ படிஸம்பி⁴தா³ஹி அரஹத்தங் பத்தோ ச²ளபி⁴ஞ்ஞோ புப்³பே³ கதகுஸலகம்மவஸேன ஸங்கு⁴பட்டா²கத்தே²ரோதி பாகடோ அஹோஸி.
Vessabhumhi bhagavatītiādikaṃ āyasmato saṅghupaṭṭhākattherassa apadānaṃ. Ayampi thero purimabuddhesu katakusalasambhāro anekesu bhavesu vivaṭṭūpanissayāni puññāni upacinanto vessabhussa bhagavato kāle tassārāmikassa putto hutvā nibbatto viññutaṃ patvā saddho pasanno vihāresu ārāmikakammaṃ karonto sakkaccaṃ saṅghaṃ upaṭṭhāsi. So teneva kusalakammena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ gahapatikule nibbatto vuddhippatto vibhavasampanno sukhappatto pākaṭo satthu dhammadesanaṃ sutvā sāsane pasanno pabbajitvā vattasampanno sāsanaṃ sobhayamāno vipassanaṃ vaḍḍhento nacirasseva saha paṭisambhidāhi arahattaṃ patto chaḷabhiñño pubbe katakusalakammavasena saṅghupaṭṭhākattheroti pākaṭo ahosi.
45. ஸோ ஏகதி³வஸங் ‘‘புப்³பே³ மயா கிங் நாம கம்மங் கத்வா அயங் லோகுத்தரஸம்பத்தி லத்³தா⁴’’தி அத்தனோ புப்³ப³கம்மங் ஸரித்வா பச்சக்க²தோ ஜானித்வா ஸோமனஸ்ஸஜாதோ புப்³ப³சரிதாபதா³னங் பாகடங் கரொந்தோ வெஸ்ஸபு⁴ம்ஹி ப⁴க³வதீதிஆதி³மாஹ. தத்த² அஹோஸாராமிகோ அஹந்தி அஹங் வெஸ்ஸபு⁴ஸ்ஸ ப⁴க³வதோ ஸாஸனே ஆராமிகோ அஹோஸிந்தி அத்தோ². ஸேஸங் ஹெட்டா² வுத்தனயத்தா உத்தானத்த²த்தா ச ஸுவிஞ்ஞெய்யமேவாதி.
45. So ekadivasaṃ ‘‘pubbe mayā kiṃ nāma kammaṃ katvā ayaṃ lokuttarasampatti laddhā’’ti attano pubbakammaṃ saritvā paccakkhato jānitvā somanassajāto pubbacaritāpadānaṃ pākaṭaṃ karonto vessabhumhi bhagavatītiādimāha. Tattha ahosārāmiko ahanti ahaṃ vessabhussa bhagavato sāsane ārāmiko ahosinti attho. Sesaṃ heṭṭhā vuttanayattā uttānatthattā ca suviññeyyamevāti.
ஸங்கு⁴பட்டா²கத்தே²ரஅபதா³னவண்ணனா ஸமத்தா.
Saṅghupaṭṭhākattheraapadānavaṇṇanā samattā.
அட்டா²ரஸமவக்³க³வண்ணனா ஸமத்தா.
Aṭṭhārasamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. ஸங்கு⁴பட்டா²கத்தே²ரஅபதா³னங் • 10. Saṅghupaṭṭhākattheraapadānaṃ
