| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. သင္ဃုပဋ္ဌာကတ္ထေရအပဒာနဝဏ္ဏနာ
10. Saṅghupaṭṭhākattheraapadānavaṇṇanā
ဝေသ္သဘုမ္ဟိ ဘဂဝတီတိအာဒိကံ အာယသ္မတော သင္ဃုပဋ္ဌာကတ္ထေရသ္သ အပဒာနံ။ အယမ္ပိ ထေရော ပုရိမဗုဒ္ဓေသု ကတကုသလသမ္ဘာရော အနေကေသု ဘဝေသု ဝိဝဋ္ဋူပနိသ္သယာနိ ပုညာနိ ဥပစိနန္တော ဝေသ္သဘုသ္သ ဘဂဝတော ကာလေ တသ္သာရာမိကသ္သ ပုတ္တော ဟုတ္ဝာ နိဗ္ဗတ္တော ဝိညုတံ ပတ္ဝာ သဒ္ဓော ပသန္နော ဝိဟာရေသု အာရာမိကကမ္မံ ကရောန္တော သက္ကစ္စံ သင္ဃံ ဥပဋ္ဌာသိ။ သော တေနေဝ ကုသလကမ္မေန ဒေဝမနုသ္သေသု သံသရန္တော ဥဘယသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ သာဝတ္ထိယံ ဂဟပတိကုလေ နိဗ္ဗတ္တော ဝုဒ္ဓိပ္ပတ္တော ဝိဘဝသမ္ပန္နော သုခပ္ပတ္တော ပာကဋော သတ္ထု ဓမ္မဒေသနံ သုတ္ဝာ သာသနေ ပသန္နော ပဗ္ဗဇိတ္ဝာ ဝတ္တသမ္ပန္နော သာသနံ သောဘယမာနော ဝိပသ္သနံ ဝဍ္ဎေန္တော နစိရသ္သေဝ သဟ ပဋိသမ္ဘိဒာဟိ အရဟတ္တံ ပတ္တော ဆဠဘိညော ပုဗ္ဗေ ကတကုသလကမ္မဝသေန သင္ဃုပဋ္ဌာကတ္ထေရောတိ ပာကဋော အဟောသိ။
Vessabhumhi bhagavatītiādikaṃ āyasmato saṅghupaṭṭhākattherassa apadānaṃ. Ayampi thero purimabuddhesu katakusalasambhāro anekesu bhavesu vivaṭṭūpanissayāni puññāni upacinanto vessabhussa bhagavato kāle tassārāmikassa putto hutvā nibbatto viññutaṃ patvā saddho pasanno vihāresu ārāmikakammaṃ karonto sakkaccaṃ saṅghaṃ upaṭṭhāsi. So teneva kusalakammena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ gahapatikule nibbatto vuddhippatto vibhavasampanno sukhappatto pākaṭo satthu dhammadesanaṃ sutvā sāsane pasanno pabbajitvā vattasampanno sāsanaṃ sobhayamāno vipassanaṃ vaḍḍhento nacirasseva saha paṭisambhidāhi arahattaṃ patto chaḷabhiñño pubbe katakusalakammavasena saṅghupaṭṭhākattheroti pākaṭo ahosi.
၄၅. သော ဧကဒိဝသံ ‘‘ပုဗ္ဗေ မယာ ကိံ နာမ ကမ္မံ ကတ္ဝာ အယံ လောကုတ္တရသမ္ပတ္တိ လဒ္ဓာ’’တိ အတ္တနော ပုဗ္ဗကမ္မံ သရိတ္ဝာ ပစ္စက္ခတော ဇာနိတ္ဝာ သောမနသ္သဇာတော ပုဗ္ဗစရိတာပဒာနံ ပာကဋံ ကရောန္တော ဝေသ္သဘုမ္ဟိ ဘဂဝတီတိအာဒိမာဟ။ တတ္ထ အဟောသာရာမိကော အဟန္တိ အဟံ ဝေသ္သဘုသ္သ ဘဂဝတော သာသနေ အာရာမိကော အဟောသိန္တိ အတ္ထော။ သေသံ ဟေဋ္ဌာ ဝုတ္တနယတ္တာ ဥတ္တာနတ္ထတ္တာ စ သုဝိညေယ္ယမေဝာတိ။
45. So ekadivasaṃ ‘‘pubbe mayā kiṃ nāma kammaṃ katvā ayaṃ lokuttarasampatti laddhā’’ti attano pubbakammaṃ saritvā paccakkhato jānitvā somanassajāto pubbacaritāpadānaṃ pākaṭaṃ karonto vessabhumhi bhagavatītiādimāha. Tattha ahosārāmiko ahanti ahaṃ vessabhussa bhagavato sāsane ārāmiko ahosinti attho. Sesaṃ heṭṭhā vuttanayattā uttānatthattā ca suviññeyyamevāti.
သင္ဃုပဋ္ဌာကတ္ထေရအပဒာနဝဏ္ဏနာ သမတ္တာ။
Saṅghupaṭṭhākattheraapadānavaṇṇanā samattā.
အဋ္ဌာရသမဝဂ္ဂဝဏ္ဏနာ သမတ္တာ။
Aṭṭhārasamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁၀. သင္ဃုပဋ္ဌာကတ္ထေရအပဒာနံ • 10. Saṅghupaṭṭhākattheraapadānaṃ
