| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৯১. সঙ্ঘুপোসথাদিকথা
91. Saṅghuposathādikathā
১৬৮. ‘‘সম্মজ্জিত্ৰা’’তি পদমপেক্খিত্ৰা সো দেসোতি এত্থ ‘‘উপযোগত্থে পচ্চত্তৰচন’’ন্তি ৰুত্তং। এতন্তি ‘‘সো দেসো সম্মজ্জিতব্বো’’তিআদিৰচনং। তেনাতি তেন হেতুনা। অট্ঠকথাচরিযা ‘‘সম্মজ্জনী…পে॰… ৰুচ্চতি’’ ইতি আহূতি যোজনা।
168. ‘‘Sammajjitvā’’ti padamapekkhitvā so desoti ettha ‘‘upayogatthe paccattavacana’’nti vuttaṃ. Etanti ‘‘so deso sammajjitabbo’’tiādivacanaṃ. Tenāti tena hetunā. Aṭṭhakathācariyā ‘‘sammajjanī…pe… vuccati’’ iti āhūti yojanā.
সম্মজ্জনীতি সম্মজ্জনকরণং। পদীপোতি পদীপুজ্জলনং। উদকন্তি উদকট্ঠপনং। আসনেনাতি আসনপঞ্ঞাপনেন। ‘‘ইতী’’তি অজ্ঝাহরিতব্বং। উপোসথস্সাতি নৰৰিধস্স উপোসথস্স পুব্বকরণন্তি সম্বন্ধো। এতানীতি চত্তারি কম্মানি। ৰুচ্চতীতি কথিযতি। ইদং ‘‘এতানী’’তি কম্মস্স চ ‘‘পুব্বকরণ’’ন্তি আকারস্স চ অভেদত্তা আসন্নং আকারমপেক্খিত্ৰা একৰচনৰসেন ৰুত্তং। ‘‘অক্খাতানী’’তি ইদং পন ‘‘ইমানি চত্তারী’’তি কম্মমপেক্খিত্ৰা বহুৰচনৰসেন ৰুত্তন্তি দট্ঠব্বং।
Sammajjanīti sammajjanakaraṇaṃ. Padīpoti padīpujjalanaṃ. Udakanti udakaṭṭhapanaṃ. Āsanenāti āsanapaññāpanena. ‘‘Itī’’ti ajjhāharitabbaṃ. Uposathassāti navavidhassa uposathassa pubbakaraṇanti sambandho. Etānīti cattāri kammāni. Vuccatīti kathiyati. Idaṃ ‘‘etānī’’ti kammassa ca ‘‘pubbakaraṇa’’nti ākārassa ca abhedattā āsannaṃ ākāramapekkhitvā ekavacanavasena vuttaṃ. ‘‘Akkhātānī’’ti idaṃ pana ‘‘imāni cattārī’’ti kammamapekkhitvā bahuvacanavasena vuttanti daṭṭhabbaṃ.
ছন্দপারিসুদ্ধিউতুক্খানন্তি ছন্দক্খানঞ্চ পারিসুদ্ধিক্খানঞ্চ উতুক্খানঞ্চ। ভিক্খুগণনাতি ভিক্খূ গণেত্ৰা অক্খানং। ওৰাদোতি ভিক্খুনীহি যাচিতস্স ওৰাদস্স অক্খানং। এতানীতি এতানি পঞ্চ। পুব্বকরণতো পচ্ছাতি পুব্বকরণস্স করণতো পচ্ছা। এত্থ চ ‘‘পুব্বকরণতো পচ্ছা কত্তব্বানী’’তি ইদং কত্তব্বাকারস্সেৰ ৰিসেসনং, ন অত্থস্স। অযং পন ৰিসেসো – সঙ্ঘসন্নিপাততো পুব্বভাগে কত্তব্বত্তা পুব্বকরণং নাম, উপোসথকরণতো পুব্বভাগে কত্তব্বত্তা পুব্বকিচ্চং নামাতি।
Chandapārisuddhiutukkhānanti chandakkhānañca pārisuddhikkhānañca utukkhānañca. Bhikkhugaṇanāti bhikkhū gaṇetvā akkhānaṃ. Ovādoti bhikkhunīhi yācitassa ovādassa akkhānaṃ. Etānīti etāni pañca. Pubbakaraṇato pacchāti pubbakaraṇassa karaṇato pacchā. Ettha ca ‘‘pubbakaraṇato pacchā kattabbānī’’ti idaṃ kattabbākārasseva visesanaṃ, na atthassa. Ayaṃ pana viseso – saṅghasannipātato pubbabhāge kattabbattā pubbakaraṇaṃ nāma, uposathakaraṇato pubbabhāge kattabbattā pubbakiccaṃ nāmāti.
উপোসথোতি উপোসথদিৰসো। যাৰতিকা চ ভিক্খূতি যত্তকা ভিক্খূ। কম্মপত্তাতি উপোসথকম্মস্স পত্তা যুত্তা অনুরূপা। তাৰতিকা ভিক্খূ হত্থপাসং অৰিজহিত্ৰা একসীমাযং ঠিতা চ হোন্তীতি যোজনা। সভাগাপত্তিযোতি ৰত্থুসভাগা আপত্তিযো। ৰজ্জনীযাতি ৰজ্জেতব্বা। পুগ্গলাতি গহট্ঠাদিপুগ্গলা। তস্মিন্তি তস্মিং উপোসথসীমমাল়কে। এতানি চত্তারীতি পাঠসেসো।
Uposathoti uposathadivaso. Yāvatikā ca bhikkhūti yattakā bhikkhū. Kammapattāti uposathakammassa pattā yuttā anurūpā. Tāvatikā bhikkhū hatthapāsaṃ avijahitvā ekasīmāyaṃ ṭhitā ca hontīti yojanā. Sabhāgāpattiyoti vatthusabhāgā āpattiyo. Vajjanīyāti vajjetabbā. Puggalāti gahaṭṭhādipuggalā. Tasminti tasmiṃ uposathasīmamāḷake. Etāni cattārīti pāṭhaseso.
আগতেহি তেহি ভিক্খূহীতি যোজনা। পন্নরসোপীতি পিসদ্দেন ন কেৰলং পাল়িযং আগতনযেনেৰ অধিট্ঠাতুং ৰট্টতি, অথ খো ‘‘অজ্জ মে উপোসথো পন্নরসো’’তিপীতি দস্সেতি।
Āgatehi tehi bhikkhūhīti yojanā. Pannarasopīti pisaddena na kevalaṃ pāḷiyaṃ āgatanayeneva adhiṭṭhātuṃ vaṭṭati, atha kho ‘‘ajja me uposatho pannaraso’’tipīti dasseti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৯১. সঙ্ঘুপোসথাদিপ্পভেদং • 91. Saṅghuposathādippabhedaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সঙ্ঘুপোসথাদিকথা • Saṅghuposathādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সঙ্ঘুপোসথাদিকথাৰণ্ণনা • Saṅghuposathādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছন্দদানকথাদিৰণ্ণনা • Chandadānakathādivaṇṇanā
