| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༩༡. སངྒྷུཔོསཐཱདིཀཐཱ
91. Saṅghuposathādikathā
༡༦༨. ‘‘སམྨཛྫིཏྭཱ’’ཏི པདམཔེཀྑིཏྭཱ སོ དེསོཏི ཨེཏྠ ‘‘ཨུཔཡོགཏྠེ པཙྩཏྟཝཙན’’ནྟི ཝུཏྟཾ། ཨེཏནྟི ‘‘སོ དེསོ སམྨཛྫིཏབྦོ’’ཏིཨཱདིཝཙནཾ། ཏེནཱཏི ཏེན ཧེཏུནཱ། ཨཊྛཀཐཱཙརིཡཱ ‘‘སམྨཛྫནཱི…པེ॰… ཝུཙྩཏི’’ ཨིཏི ཨཱཧཱུཏི ཡོཛནཱ།
168. ‘‘Sammajjitvā’’ti padamapekkhitvā so desoti ettha ‘‘upayogatthe paccattavacana’’nti vuttaṃ. Etanti ‘‘so deso sammajjitabbo’’tiādivacanaṃ. Tenāti tena hetunā. Aṭṭhakathācariyā ‘‘sammajjanī…pe… vuccati’’ iti āhūti yojanā.
སམྨཛྫནཱིཏི སམྨཛྫནཀརཎཾ། པདཱིཔོཏི པདཱིཔུཛྫལནཾ། ཨུདཀནྟི ཨུདཀཊྛཔནཾ། ཨཱསནེནཱཏི ཨཱསནཔཉྙཱཔནེན། ‘‘ཨིཏཱི’’ཏི ཨཛ྄ཛྷཱཧརིཏབྦཾ། ཨུཔོསཐསྶཱཏི ནཝཝིདྷསྶ ཨུཔོསཐསྶ པུབྦཀརཎནྟི སམྦནྡྷོ། ཨེཏཱནཱིཏི ཙཏྟཱརི ཀམྨཱནི། ཝུཙྩཏཱིཏི ཀཐིཡཏི། ཨིདཾ ‘‘ཨེཏཱནཱི’’ཏི ཀམྨསྶ ཙ ‘‘པུབྦཀརཎ’’ནྟི ཨཱཀཱརསྶ ཙ ཨབྷེདཏྟཱ ཨཱསནྣཾ ཨཱཀཱརམཔེཀྑིཏྭཱ ཨེཀཝཙནཝསེན ཝུཏྟཾ། ‘‘ཨཀྑཱཏཱནཱི’’ཏི ཨིདཾ པན ‘‘ཨིམཱནི ཙཏྟཱརཱི’’ཏི ཀམྨམཔེཀྑིཏྭཱ བཧུཝཙནཝསེན ཝུཏྟནྟི དཊྛབྦཾ།
Sammajjanīti sammajjanakaraṇaṃ. Padīpoti padīpujjalanaṃ. Udakanti udakaṭṭhapanaṃ. Āsanenāti āsanapaññāpanena. ‘‘Itī’’ti ajjhāharitabbaṃ. Uposathassāti navavidhassa uposathassa pubbakaraṇanti sambandho. Etānīti cattāri kammāni. Vuccatīti kathiyati. Idaṃ ‘‘etānī’’ti kammassa ca ‘‘pubbakaraṇa’’nti ākārassa ca abhedattā āsannaṃ ākāramapekkhitvā ekavacanavasena vuttaṃ. ‘‘Akkhātānī’’ti idaṃ pana ‘‘imāni cattārī’’ti kammamapekkhitvā bahuvacanavasena vuttanti daṭṭhabbaṃ.
ཚནྡཔཱརིསུདྡྷིཨུཏུཀྑཱནནྟི ཚནྡཀྑཱནཉྩ པཱརིསུདྡྷིཀྑཱནཉྩ ཨུཏུཀྑཱནཉྩ། བྷིཀྑུགཎནཱཏི བྷིཀྑཱུ གཎེཏྭཱ ཨཀྑཱནཾ། ཨོཝཱདོཏི བྷིཀྑུནཱིཧི ཡཱཙིཏསྶ ཨོཝཱདསྶ ཨཀྑཱནཾ། ཨེཏཱནཱིཏི ཨེཏཱནི པཉྩ། པུབྦཀརཎཏོ པཙྪཱཏི པུབྦཀརཎསྶ ཀརཎཏོ པཙྪཱ། ཨེཏྠ ཙ ‘‘པུབྦཀརཎཏོ པཙྪཱ ཀཏྟབྦཱནཱི’’ཏི ཨིདཾ ཀཏྟབྦཱཀཱརསྶེཝ ཝིསེསནཾ, ན ཨཏྠསྶ། ཨཡཾ པན ཝིསེསོ – སངྒྷསནྣིཔཱཏཏོ པུབྦབྷཱགེ ཀཏྟབྦཏྟཱ པུབྦཀརཎཾ ནཱམ, ཨུཔོསཐཀརཎཏོ པུབྦབྷཱགེ ཀཏྟབྦཏྟཱ པུབྦཀིཙྩཾ ནཱམཱཏི།
Chandapārisuddhiutukkhānanti chandakkhānañca pārisuddhikkhānañca utukkhānañca. Bhikkhugaṇanāti bhikkhū gaṇetvā akkhānaṃ. Ovādoti bhikkhunīhi yācitassa ovādassa akkhānaṃ. Etānīti etāni pañca. Pubbakaraṇato pacchāti pubbakaraṇassa karaṇato pacchā. Ettha ca ‘‘pubbakaraṇato pacchā kattabbānī’’ti idaṃ kattabbākārasseva visesanaṃ, na atthassa. Ayaṃ pana viseso – saṅghasannipātato pubbabhāge kattabbattā pubbakaraṇaṃ nāma, uposathakaraṇato pubbabhāge kattabbattā pubbakiccaṃ nāmāti.
ཨུཔོསཐོཏི ཨུཔོསཐདིཝསོ། ཡཱཝཏིཀཱ ཙ བྷིཀྑཱུཏི ཡཏྟཀཱ བྷིཀྑཱུ། ཀམྨཔཏྟཱཏི ཨུཔོསཐཀམྨསྶ པཏྟཱ ཡུཏྟཱ ཨནུརཱུཔཱ། ཏཱཝཏིཀཱ བྷིཀྑཱུ ཧཏྠཔཱསཾ ཨཝིཛཧིཏྭཱ ཨེཀསཱིམཱཡཾ ཋིཏཱ ཙ ཧོནྟཱིཏི ཡོཛནཱ། སབྷཱགཱཔཏྟིཡོཏི ཝཏྠུསབྷཱགཱ ཨཱཔཏྟིཡོ། ཝཛྫནཱིཡཱཏི ཝཛྫེཏབྦཱ། པུགྒལཱཏི གཧཊྛཱདིཔུགྒལཱ། ཏསྨིནྟི ཏསྨིཾ ཨུཔོསཐསཱིམམཱལ༹ཀེ། ཨེཏཱནི ཙཏྟཱརཱིཏི པཱཋསེསོ།
Uposathoti uposathadivaso. Yāvatikā ca bhikkhūti yattakā bhikkhū. Kammapattāti uposathakammassa pattā yuttā anurūpā. Tāvatikā bhikkhū hatthapāsaṃ avijahitvā ekasīmāyaṃ ṭhitā ca hontīti yojanā. Sabhāgāpattiyoti vatthusabhāgā āpattiyo. Vajjanīyāti vajjetabbā. Puggalāti gahaṭṭhādipuggalā. Tasminti tasmiṃ uposathasīmamāḷake. Etāni cattārīti pāṭhaseso.
ཨཱགཏེཧི ཏེཧི བྷིཀྑཱུཧཱིཏི ཡོཛནཱ། པནྣརསོཔཱིཏི པིསདྡེན ན ཀེཝལཾ པཱལི༹ཡཾ ཨཱགཏནཡེནེཝ ཨདྷིཊྛཱཏུཾ ཝཊྚཏི, ཨཐ ཁོ ‘‘ཨཛྫ མེ ཨུཔོསཐོ པནྣརསོ’’ཏིཔཱིཏི དསྶེཏི།
Āgatehi tehi bhikkhūhīti yojanā. Pannarasopīti pisaddena na kevalaṃ pāḷiyaṃ āgatanayeneva adhiṭṭhātuṃ vaṭṭati, atha kho ‘‘ajja me uposatho pannaraso’’tipīti dasseti.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༩༡. སངྒྷུཔོསཐཱདིཔྤབྷེདཾ • 91. Saṅghuposathādippabhedaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / སངྒྷུཔོསཐཱདིཀཐཱ • Saṅghuposathādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སངྒྷུཔོསཐཱདིཀཐཱཝཎྞནཱ • Saṅghuposathādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཚནྡདཱནཀཐཱདིཝཎྞནཱ • Chandadānakathādivaṇṇanā
