91. ஸங்கு⁴போஸதா²தி³ப்பபே⁴த³ங்

168. தேன கோ² பன ஸமயேன அஞ்ஞதரஸ்மிங் ஆவாஸே தத³ஹுபோஸதே² சத்தாரோ பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா பஞ்ஞத்தங் ‘உபோஸதோ² காதப்³போ³’தி, மயஞ்சம்ஹா சத்தாரோ ஜனா, கத²ங் நு கோ² அம்ஹேஹி உபோஸதோ² காதப்³போ³’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சதுன்னங் பாதிமொக்க²ங் உத்³தி³ஸிதுந்தி.

தேன கோ² பன ஸமயேன அஞ்ஞதரஸ்மிங் ஆவாஸே தத³ஹுபோஸதே² தயோ பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா அனுஞ்ஞாதங் சதுன்னங் பாதிமொக்க²ங் உத்³தி³ஸிதுங், மயஞ்சம்ஹா தயோ ஜனா, கத²ங் நு கோ² அம்ஹேஹி உபோஸதோ² காதப்³போ³’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, திண்ணங் பாரிஸுத்³தி⁴உபோஸத²ங் காதுங். ஏவஞ்ச பன, பி⁴க்க²வே, காதப்³போ³. ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –

‘‘ஸுணந்து மே ஆயஸ்மந்தா. அஜ்ஜுபோஸதோ² பன்னரஸோ. யதா³யஸ்மந்தானங் பத்தகல்லங், மயங் அஞ்ஞமஞ்ஞங் பாரிஸுத்³தி⁴உபோஸத²ங் கரெய்யாமா’’தி.

தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேதா²’’தி.

நவகேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே பி⁴க்கூ² ஏவமஸ்ஸு வசனீயா – ‘‘பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேதா²’’தி.

தேன கோ² பன ஸமயேன அஞ்ஞதரஸ்மிங் ஆவாஸே தத³ஹுபோஸதே² த்³வே பி⁴க்கூ² விஹரந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா அனுஞ்ஞாதங் சதுன்னங் பாதிமொக்க²ங் உத்³தி³ஸிதுங், திண்ணன்னங் பாரிஸுத்³தி⁴உபோஸத²ங் காதுங். மயஞ்சம்ஹா த்³வே ஜனா. கத²ங் நு கோ² அம்ஹேஹி உபோஸதோ² காதப்³போ³’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வின்னங் பாரிஸுத்³தி⁴உபோஸத²ங் காதுங் . ஏவஞ்ச பன, பி⁴க்க²வே, காதப்³போ³. தே²ரேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா நவோ பி⁴க்கு² ஏவமஸ்ஸ வசனீயோ – ‘‘பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேஹி. பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேஹி. பரிஸுத்³தோ⁴ அஹங், ஆவுஸோ; பரிஸுத்³தோ⁴தி மங் தா⁴ரேஹீ’’தி.

நவகேன பி⁴க்கு²னா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா தே²ரோ பி⁴க்கு² ஏவமஸ்ஸ வசனீயோ – ‘‘பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேத². பரிஸுத்³தோ⁴ அஹங், ப⁴ந்தே; பரிஸுத்³தோ⁴தி மங் தா⁴ரேதா²’’தி.

தேன கோ² பன ஸமயேன அஞ்ஞதரஸ்மிங் ஆவாஸே தத³ஹுபோஸதே² ஏகோ பி⁴க்கு² விஹரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா அனுஞ்ஞாதங் சதுன்னங் பாதிமொக்க²ங் உத்³தி³ஸிதுங், திண்ணன்னங் பாரிஸுத்³தி⁴உபோஸத²ங் காதுங், த்³வின்னங் பாரிஸுத்³தி⁴உபோஸத²ங் காதுங். அஹஞ்சம்ஹி ஏககோ. கத²ங் நு கோ² மயா உபோஸதோ² காதப்³போ³’’தி? ப⁴க³வதோ ஏதமத்த²ங் ஆரோசேஸுங். இத⁴ பன, பி⁴க்க²வே, அஞ்ஞதரஸ்மிங் ஆவாஸே தத³ஹுபோஸதே² ஏகோ பி⁴க்கு² விஹரதி. தேன, பி⁴க்க²வே, பி⁴க்கு²னா யத்த² பி⁴க்கூ² படிக்கமந்தி உபட்டா²னஸாலாய வா, மண்ட³பே வா, ருக்க²மூலே வா, ஸோ தே³ஸோ ஸம்மஜ்ஜித்வா பானீயங் பரிபோ⁴ஜனீயங் உபட்டா²பெத்வா ஆஸனங் பஞ்ஞபெத்வா பதீ³பங் கத்வா நிஸீதி³தப்³ப³ங். ஸசே அஞ்ஞே பி⁴க்கூ² ஆக³ச்ச²ந்தி, தேஹி ஸத்³தி⁴ங் உபோஸதோ² காதப்³போ³. நோ சே ஆக³ச்ச²ந்தி, அஜ்ஜ மே உபோஸதோ²தி அதி⁴ட்டா²தப்³போ³. நோ சே அதி⁴ட்ட²ஹெய்ய, ஆபத்தி து³க்கடஸ்ஸ.

தத்ர, பி⁴க்க²வே, யத்த² சத்தாரோ பி⁴க்கூ² விஹரந்தி, ந ஏகஸ்ஸ பாரிஸுத்³தி⁴ங் ஆஹரித்வா தீஹி பாதிமொக்க²ங் உத்³தி³ஸிதப்³ப³ங். உத்³தி³ஸெய்யுங் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² தயோ பி⁴க்கூ² விஹரந்தி, ந ஏகஸ்ஸ பாரிஸுத்³தி⁴ங் ஆஹரித்வா த்³வீஹி பாரிஸுத்³தி⁴உபோஸதோ² காதப்³போ³. கரெய்யுங் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² த்³வே பி⁴க்கூ² விஹரந்தி, ந ஏகஸ்ஸ பாரிஸுத்³தி⁴ங் ஆஹரித்வா ஏகேன அதி⁴ட்டா²தப்³போ³. அதி⁴ட்ட²ஹெய்ய சே, ஆபத்தி து³க்கடஸ்ஸாதி.