| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
১১. পঞ্চসতিকক্খন্ধকং
11. Pañcasatikakkhandhakaṃ
সঙ্গীতিনিদানকথাৰণ্ণনা
Saṅgītinidānakathāvaṇṇanā
৪৩৭. পঞ্চসতিকক্খন্ধকে পাৰায কুসিনারন্তি (দী॰ নি॰ অট্ঠ॰ ২.২৩১) পাৰানগরে পিণ্ডায চরিত্ৰা কুসিনারং গমিস্সামীতি অদ্ধানমগ্গপ্পটিপন্নো। মন্দারৰপুপ্ফং গহেত্ৰাতি মহাচাটিপ্পমাণং পুপ্ফং আগন্তুকদণ্ডকে ঠপেত্ৰা ছত্তং ৰিয গহেত্ৰা। অদ্দসং খোতি আগচ্ছন্তং দূরতোৰ অদ্দসং। দিস্ৰা চ পন ‘‘পুচ্ছিস্সামি নং ভগৰতো পৰত্তি’’ন্তি চিত্তং উপ্পাদেত্ৰা ‘‘সচে খো পন নিসিন্নকোৰ পুচ্ছিস্সামি, সত্থরি অগারৰো কতো ভৰিস্সতী’’তি উট্ঠহিত্ৰা ঠিতট্ঠানতো অপক্কম্ম ছদ্দন্তো নাগরাজা মণিচম্মং ৰিয দসবলদত্তিযং মেঘৰণ্ণপংসুকূলচীৰরং পারুপিত্ৰা দসনখসমোধানসমুজ্জলং অঞ্জলিং সিরস্মিং পতিট্ঠাপেত্ৰা সত্থরি কতেন গারৰেন আজীৰকস্স অভিমুখো হুত্ৰা ‘‘অপাৰুসো অম্হাকং সত্থারং জানাসী’’তি আহ। কিং পন সত্থু পরিনিব্বানং জানন্তো পুচ্ছি অজানন্তোতি? আৰজ্জনপ্পটিবদ্ধং খীণাসৰানং জাননং। অনাৰজ্জিতত্তা পনেস অজানন্তো পুচ্ছীতি একে। থেরো সমাপত্তিবহুলো রত্তিট্ঠানদিৰাট্ঠানলেণমণ্ডপাদীসু নিচ্চং সমাপত্তিফলেনেৰ যাপেতি। কুলসন্তকম্পি গামং পৰিসিত্ৰা দ্ৰারে সমাপজ্জিত্ৰা সমাপত্তিতো ৰুট্ঠিতোৰ ভিক্খং গণ্হাতি। থেরো কির ‘‘ইমিনা মে পচ্ছিমেন অত্তভাৰেন মহাজনানুগ্গহং করিস্সামি, যে ময্হং ভিক্খং ৰা দেন্তি, গন্ধমালাদীহি ৰা সক্কারং করোন্তি, তেসং তং মহপ্ফলং হোতূ’’তি এৰং করোতি। তস্মা সমাপত্তিবহুলতায ন জানি। ইতি অজানন্তোৰ পুচ্ছীতি ৰদন্তি, তং ন গহেতব্বং। ন হেত্থ অজাননকারণং অত্থি। অভিলক্খিতং সত্থু পরিনিব্বানং অহোসি দসসহস্সিলোকধাতুকম্পনাদীহি নিমিত্তেহি। থেরস্স পন পরিসায কেহিচি ভিক্খূহি ভগৰা দিট্ঠপুব্বো, কেহিচি ন দিট্ঠপুব্বো। তত্থ যেহি দিট্ঠপুব্বো, তেপি পস্সিতুকামাৰ। যেহিপি অদিট্ঠপুব্বো, তেপি পস্সিতুকামাৰ। তত্থ যেহি ন দিট্ঠপুব্বো, তে অভিদস্সনকামতায গন্ত্ৰা ‘‘কুহিং ভগৰা’’তি পুচ্ছন্তা ‘‘পরিনিব্বুতো’’তি সুত্ৰা সন্ধারেতুং ন সক্খিস্সন্তি। চীৰরং ছড্ডেত্ৰা একৰত্থা ৰা দুন্নিৰত্থা ৰা উরানি পটিপিসন্তা পরোদিস্সন্তি। তত্থ মনুস্সা ‘‘মহাকস্সপেন সদ্ধিং আগতপংসুকূলিকা সযম্পি ইত্থিযো ৰিয পরোদন্তি, তে কিং অম্হে সমস্সাসেন্তী’’তি ময্হং দোসং দস্সন্তি। ইদং পন সুঞ্ঞং মহারঞ্ঞং, ইধ যথা তথা রোদন্তেসু দোসো নত্থি। পুরিমতরং সুত্ৰা নাম সোকোপি তনুকো হোতীতি ভিক্খূনং সতুপ্পাদলাভত্থং জানন্তোৰ পুচ্ছি।
437. Pañcasatikakkhandhake pāvāya kusināranti (dī. ni. aṭṭha. 2.231) pāvānagare piṇḍāya caritvā kusināraṃ gamissāmīti addhānamaggappaṭipanno. Mandāravapupphaṃ gahetvāti mahācāṭippamāṇaṃ pupphaṃ āgantukadaṇḍake ṭhapetvā chattaṃ viya gahetvā. Addasaṃ khoti āgacchantaṃ dūratova addasaṃ. Disvā ca pana ‘‘pucchissāmi naṃ bhagavato pavatti’’nti cittaṃ uppādetvā ‘‘sace kho pana nisinnakova pucchissāmi, satthari agāravo kato bhavissatī’’ti uṭṭhahitvā ṭhitaṭṭhānato apakkamma chaddanto nāgarājā maṇicammaṃ viya dasabaladattiyaṃ meghavaṇṇapaṃsukūlacīvaraṃ pārupitvā dasanakhasamodhānasamujjalaṃ añjaliṃ sirasmiṃ patiṭṭhāpetvā satthari katena gāravena ājīvakassa abhimukho hutvā ‘‘apāvuso amhākaṃ satthāraṃ jānāsī’’ti āha. Kiṃ pana satthu parinibbānaṃ jānanto pucchi ajānantoti? Āvajjanappaṭibaddhaṃ khīṇāsavānaṃ jānanaṃ. Anāvajjitattā panesa ajānanto pucchīti eke. Thero samāpattibahulo rattiṭṭhānadivāṭṭhānaleṇamaṇḍapādīsu niccaṃ samāpattiphaleneva yāpeti. Kulasantakampi gāmaṃ pavisitvā dvāre samāpajjitvā samāpattito vuṭṭhitova bhikkhaṃ gaṇhāti. Thero kira ‘‘iminā me pacchimena attabhāvena mahājanānuggahaṃ karissāmi, ye mayhaṃ bhikkhaṃ vā denti, gandhamālādīhi vā sakkāraṃ karonti, tesaṃ taṃ mahapphalaṃ hotū’’ti evaṃ karoti. Tasmā samāpattibahulatāya na jāni. Iti ajānantova pucchīti vadanti, taṃ na gahetabbaṃ. Na hettha ajānanakāraṇaṃ atthi. Abhilakkhitaṃ satthu parinibbānaṃ ahosi dasasahassilokadhātukampanādīhi nimittehi. Therassa pana parisāya kehici bhikkhūhi bhagavā diṭṭhapubbo, kehici na diṭṭhapubbo. Tattha yehi diṭṭhapubbo, tepi passitukāmāva. Yehipi adiṭṭhapubbo, tepi passitukāmāva. Tattha yehi na diṭṭhapubbo, te abhidassanakāmatāya gantvā ‘‘kuhiṃ bhagavā’’ti pucchantā ‘‘parinibbuto’’ti sutvā sandhāretuṃ na sakkhissanti. Cīvaraṃ chaḍḍetvā ekavatthā vā dunnivatthā vā urāni paṭipisantā parodissanti. Tattha manussā ‘‘mahākassapena saddhiṃ āgatapaṃsukūlikā sayampi itthiyo viya parodanti, te kiṃ amhe samassāsentī’’ti mayhaṃ dosaṃ dassanti. Idaṃ pana suññaṃ mahāraññaṃ, idha yathā tathā rodantesu doso natthi. Purimataraṃ sutvā nāma sokopi tanuko hotīti bhikkhūnaṃ satuppādalābhatthaṃ jānantova pucchi.
অজ্জ সত্তাহপরিনিব্বুতোতি অজ্জ দিৰসতো পটিলোমতো সত্তমে অহনি পরিনিব্বুতো। ততো মে ইদন্তি ততো সমণস্স গোতমস্স পরিনিব্বুতট্ঠানতো। অৰীতরাগাতি পুথুজ্জনা চেৰ সোতাপন্নসকদাগামিনো চ। তেসঞ্হি দোমনস্সং অপ্পহীনং, তস্মা তেপি বাহা পগ্গয্হ কন্দন্তি, উভো হত্থে সীসে ঠপেত্ৰা রোদন্তি। ছিন্নপাতং পপতন্তীতি ছিন্নানং পাতো ৰিয ছিন্নপাতো, তং ছিন্নপাতং, ভাৰনপুংসকনিদ্দেসোযং, মজ্ঝে ছিন্না ৰিয হুত্ৰা যতো ৰা ততো ৰা পতন্তীতি অত্থো। আৰট্টন্তীতি অভিমুখভাৰেন ৰট্টন্তি। যত্থ পতিতা, ততো কতিপযরতনট্ঠানং ৰট্টনৰসেনেৰ গন্ত্ৰা পুন যথাপতিতমেৰ ঠানং ৰট্টনৰসেন আগচ্ছন্তি। ৰিৰট্টন্তীতি যত্থ পতিতা, ততো নিৰট্টন্তি, পতিতট্ঠানতো পরভাগং ৰট্টমানা গচ্ছন্তীতি অত্থো। অপিচ পুরতো ৰট্টনং আৰট্টনং, পস্সতো পচ্ছতো চ ৰট্টনং ৰিৰট্টনং। তস্মা দ্ৰে পাদে পসারেত্ৰা সকিং পুরতো সকিং পচ্ছতো সকিং ৰামতো সকিং দক্খিণতো সম্পরিৰট্টমানাপি আৰট্টন্তি ৰিৰট্টন্তীতি ৰুচ্চন্তি। ৰীতরাগাতি পহীনদোমনস্সা ইট্ঠানিট্ঠেসু নিব্বিকারতায সিলাথম্ভসদিসা অনাগামিখীণাসৰা। কামঞ্হি দোমনস্সে অসতিপি একচ্চো রাগো হোতিযেৰ, রাগে পন অসতি দোমনস্সস্স অসম্ভৰোযেৰ। তদেকট্ঠভাৰতো হি রাগপ্পহানেন পহীনদোমনস্সা ৰুত্তা, ন খীণাসৰা এৰ।
Ajja sattāhaparinibbutoti ajja divasato paṭilomato sattame ahani parinibbuto. Tato me idanti tato samaṇassa gotamassa parinibbutaṭṭhānato. Avītarāgāti puthujjanā ceva sotāpannasakadāgāmino ca. Tesañhi domanassaṃ appahīnaṃ, tasmā tepi bāhā paggayha kandanti, ubho hatthe sīse ṭhapetvā rodanti. Chinnapātaṃ papatantīti chinnānaṃ pāto viya chinnapāto, taṃ chinnapātaṃ, bhāvanapuṃsakaniddesoyaṃ, majjhe chinnā viya hutvā yato vā tato vā patantīti attho. Āvaṭṭantīti abhimukhabhāvena vaṭṭanti. Yattha patitā, tato katipayaratanaṭṭhānaṃ vaṭṭanavaseneva gantvā puna yathāpatitameva ṭhānaṃ vaṭṭanavasena āgacchanti. Vivaṭṭantīti yattha patitā, tato nivaṭṭanti, patitaṭṭhānato parabhāgaṃ vaṭṭamānā gacchantīti attho. Apica purato vaṭṭanaṃ āvaṭṭanaṃ, passato pacchato ca vaṭṭanaṃ vivaṭṭanaṃ. Tasmā dve pāde pasāretvā sakiṃ purato sakiṃ pacchato sakiṃ vāmato sakiṃ dakkhiṇato samparivaṭṭamānāpi āvaṭṭanti vivaṭṭantīti vuccanti. Vītarāgāti pahīnadomanassā iṭṭhāniṭṭhesu nibbikāratāya silāthambhasadisā anāgāmikhīṇāsavā. Kāmañhi domanasse asatipi ekacco rāgo hotiyeva, rāge pana asati domanassassa asambhavoyeva. Tadekaṭṭhabhāvato hi rāgappahānena pahīnadomanassā vuttā, na khīṇāsavā eva.
সব্বেহেৰ পিযেহীতিআদীসু পিযাযিতব্বতো পিযেহি মনৰড্ঢনতো মনাপেহি মাতাপিতাভাতাভগিনীআদিকেহি। নানাভাৰোতি জাতিযা নানাভাৰো, জাতিঅনুরূপগমনেন ৰিসুং ভাৰো, অসম্বদ্ধভাৰোতি অত্থো। ৰিনাভাৰোতি মরণেন ৰিনাভাৰো, চুতিযা তেনত্তভাৰেন অপুনপৰত্তনতো ৰিপ্পযোগোতি অত্থো। অঞ্ঞথাভাৰোতি ভৰেন অঞ্ঞথাভাৰো, ভৰন্তরগ্গহণেন ‘‘কামাৰচরসত্তো রূপাৰচরো হোতী’’তিআদিনা তত্থাপি ‘‘মনুস্সো দেৰো হোতী’’তিআদিনা চ পুরিমাকারতো অঞ্ঞাকারতাতি অত্থো। তন্তি তস্মা। কুতেত্থ লব্ভাতি কুতো কুহিং কস্মিং নাম ঠানে এত্থ এতস্মিং খন্ধপ্পৰত্তে যং তং জাতং…পে॰… মা পলুজ্জীতি লদ্ধুং সক্কা, ন সক্কা এৰ তাদিসস্স কারণস্স অভাৰতো। ইদং ৰুত্তং হোতি – যস্মা সব্বেহেৰ পিযেহি মনাপেহি নানাভাৰো, তস্মা দস পারমিযো পূরেত্ৰাপি সম্বোধিং পত্ৰাপি ধম্মচক্কং পৰত্তেত্ৰাপি যমকপাটিহারিযং দস্সেত্ৰাপি দেৰোরোহণং কত্ৰাপি যং তং জাতং ভূতং সঙ্খতং পলোকধম্মং, তঞ্চ তথাগতস্সপি সরীরং মা পলুজ্জীতি নেতং ঠানং ৰিজ্জতি, রোদন্তেনপি কন্দন্তেনপি ন সক্কা তং কারণং লদ্ধুন্তি।
Sabbeheva piyehītiādīsu piyāyitabbato piyehi manavaḍḍhanato manāpehi mātāpitābhātābhaginīādikehi. Nānābhāvoti jātiyā nānābhāvo, jātianurūpagamanena visuṃ bhāvo, asambaddhabhāvoti attho. Vinābhāvoti maraṇena vinābhāvo, cutiyā tenattabhāvena apunapavattanato vippayogoti attho. Aññathābhāvoti bhavena aññathābhāvo, bhavantaraggahaṇena ‘‘kāmāvacarasatto rūpāvacaro hotī’’tiādinā tatthāpi ‘‘manusso devo hotī’’tiādinā ca purimākārato aññākāratāti attho. Tanti tasmā. Kutettha labbhāti kuto kuhiṃ kasmiṃ nāma ṭhāne ettha etasmiṃ khandhappavatte yaṃ taṃ jātaṃ…pe… mā palujjīti laddhuṃ sakkā, na sakkā eva tādisassa kāraṇassa abhāvato. Idaṃ vuttaṃ hoti – yasmā sabbeheva piyehi manāpehi nānābhāvo, tasmā dasa pāramiyo pūretvāpi sambodhiṃ patvāpi dhammacakkaṃ pavattetvāpi yamakapāṭihāriyaṃ dassetvāpi devorohaṇaṃ katvāpi yaṃ taṃ jātaṃ bhūtaṃ saṅkhataṃ palokadhammaṃ, tañca tathāgatassapi sarīraṃ mā palujjīti netaṃ ṭhānaṃ vijjati, rodantenapi kandantenapi na sakkā taṃ kāraṇaṃ laddhunti.
তেন খো পনাৰুসো, সমযেন সুভদ্দো নাম ৰুড্ঢপব্বজিতোতিআদীসু যং ৰত্তব্বং, তং নিদানৰণ্ণনাযং (সারত্থ॰ টী॰ ১.পঠমমহাসঙ্গীতিকথা) ৰুত্তনযমেৰ।
Tena kho panāvuso, samayena subhaddo nāma vuḍḍhapabbajitotiādīsu yaṃ vattabbaṃ, taṃ nidānavaṇṇanāyaṃ (sārattha. ṭī. 1.paṭhamamahāsaṅgītikathā) vuttanayameva.
সঙ্গীতিনিদানকথাৰণ্ণনা নিট্ঠিতা।
Saṅgītinidānakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১. সঙ্গীতিনিদানং • 1. Saṅgītinidānaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সঙ্গীতিনিদানকথাৰণ্ণনা • Saṅgītinidānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / খুদ্দানুখুদ্দকসিক্খাপদকথাৰণ্ণনা • Khuddānukhuddakasikkhāpadakathāvaṇṇanā
