| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೨. ಸನಿದಾನಸುತ್ತಂ
2. Sanidānasuttaṃ
೯೬. ಸಾವತ್ಥಿಯಂ ವಿಹರತಿ…ಪೇ॰… ‘‘ಸನಿದಾನಂ, ಭಿಕ್ಖವೇ, ಉಪ್ಪಜ್ಜತಿ ಕಾಮವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಬ್ಯಾಪಾದವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ವಿಹಿಂಸಾವಿತಕ್ಕೋ, ನೋ ಅನಿದಾನಂ’’।
96. Sāvatthiyaṃ viharati…pe… ‘‘sanidānaṃ, bhikkhave, uppajjati kāmavitakko, no anidānaṃ; sanidānaṃ uppajjati byāpādavitakko, no anidānaṃ; sanidānaṃ uppajjati vihiṃsāvitakko, no anidānaṃ’’.
‘‘ಕಥಞ್ಚ, ಭಿಕ್ಖವೇ, ಸನಿದಾನಂ ಉಪ್ಪಜ್ಜತಿ ಕಾಮವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಬ್ಯಾಪಾದವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ವಿಹಿಂಸಾವಿತಕ್ಕೋ, ನೋ ಅನಿದಾನಂ? ಕಾಮಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಕಾಮಸಞ್ಞಾ, ಕಾಮಸಞ್ಞಂ ಪಟಿಚ್ಚ ಉಪ್ಪಜ್ಜತಿ ಕಾಮಸಙ್ಕಪ್ಪೋ, ಕಾಮಸಙ್ಕಪ್ಪಂ ಪಟಿಚ್ಚ ಉಪ್ಪಜ್ಜತಿ ಕಾಮಚ್ಛನ್ದೋ, ಕಾಮಚ್ಛನ್ದಂ ಪಟಿಚ್ಚ ಉಪ್ಪಜ್ಜತಿ ಕಾಮಪರಿಳಾಹೋ, ಕಾಮಪರಿಳಾಹಂ ಪಟಿಚ್ಚ ಉಪ್ಪಜ್ಜತಿ ಕಾಮಪರಿಯೇಸನಾ। ಕಾಮಪರಿಯೇಸನಂ, ಭಿಕ್ಖವೇ, ಪರಿಯೇಸಮಾನೋ ಅಸ್ಸುತವಾ ಪುಥುಜ್ಜನೋ ತೀಹಿ ಠಾನೇಹಿ ಮಿಚ್ಛಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Kathañca, bhikkhave, sanidānaṃ uppajjati kāmavitakko, no anidānaṃ; sanidānaṃ uppajjati byāpādavitakko, no anidānaṃ; sanidānaṃ uppajjati vihiṃsāvitakko, no anidānaṃ? Kāmadhātuṃ, bhikkhave, paṭicca uppajjati kāmasaññā, kāmasaññaṃ paṭicca uppajjati kāmasaṅkappo, kāmasaṅkappaṃ paṭicca uppajjati kāmacchando, kāmacchandaṃ paṭicca uppajjati kāmapariḷāho, kāmapariḷāhaṃ paṭicca uppajjati kāmapariyesanā. Kāmapariyesanaṃ, bhikkhave, pariyesamāno assutavā puthujjano tīhi ṭhānehi micchā paṭipajjati – kāyena, vācāya, manasā.
‘‘ಬ್ಯಾಪಾದಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಬ್ಯಾಪಾದಸಞ್ಞಾ, ಬ್ಯಾಪಾದಸಞ್ಞಂ ಪಟಿಚ್ಚ ಉಪ್ಪಜ್ಜತಿ ಬ್ಯಾಪಾದಸಙ್ಕಪ್ಪೋ…ಪೇ॰… ಬ್ಯಾಪಾದಚ್ಛನ್ದೋ… ಬ್ಯಾಪಾದಪರಿಳಾಹೋ… ಬ್ಯಾಪಾದಪರಿಯೇಸನಾ… ಬ್ಯಾಪಾದಪರಿಯೇಸನಂ, ಭಿಕ್ಖವೇ, ಪರಿಯೇಸಮಾನೋ ಅಸ್ಸುತವಾ ಪುಥುಜ್ಜನೋ ತೀಹಿ ಠಾನೇಹಿ ಮಿಚ್ಛಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Byāpādadhātuṃ, bhikkhave, paṭicca uppajjati byāpādasaññā, byāpādasaññaṃ paṭicca uppajjati byāpādasaṅkappo…pe… byāpādacchando… byāpādapariḷāho… byāpādapariyesanā… byāpādapariyesanaṃ, bhikkhave, pariyesamāno assutavā puthujjano tīhi ṭhānehi micchā paṭipajjati – kāyena, vācāya, manasā.
‘‘ವಿಹಿಂಸಾಧಾತುಂ , ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ವಿಹಿಂಸಾಸಞ್ಞಾ; ವಿಹಿಂಸಾಸಞ್ಞಂ ಪಟಿಚ್ಚ ಉಪ್ಪಜ್ಜತಿ ವಿಹಿಂಸಾಸಙ್ಕಪ್ಪೋ…ಪೇ॰… ವಿಹಿಂಸಾಛನ್ದೋ… ವಿಹಿಂಸಾಪರಿಳಾಹೋ… ವಿಹಿಂಸಾಪರಿಯೇಸನಾ… ವಿಹಿಂಸಾಪರಿಯೇಸನಂ, ಭಿಕ್ಖವೇ , ಪರಿಯೇಸಮಾನೋ ಅಸ್ಸುತವಾ ಪುಥುಜ್ಜನೋ ತೀಹಿ ಠಾನೇಹಿ ಮಿಚ್ಛಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Vihiṃsādhātuṃ , bhikkhave, paṭicca uppajjati vihiṃsāsaññā; vihiṃsāsaññaṃ paṭicca uppajjati vihiṃsāsaṅkappo…pe… vihiṃsāchando… vihiṃsāpariḷāho… vihiṃsāpariyesanā… vihiṃsāpariyesanaṃ, bhikkhave , pariyesamāno assutavā puthujjano tīhi ṭhānehi micchā paṭipajjati – kāyena, vācāya, manasā.
‘‘ಸೇಯ್ಯಥಾಪಿ, ಭಿಕ್ಖವೇ, ಪುರಿಸೋ ಆದಿತ್ತಂ ತಿಣುಕ್ಕಂ ಸುಕ್ಖೇ ತಿಣದಾಯೇ ನಿಕ್ಖಿಪೇಯ್ಯ; ನೋ ಚೇ ಹತ್ಥೇಹಿ ಚ ಪಾದೇಹಿ ಚ ಖಿಪ್ಪಮೇವ ನಿಬ್ಬಾಪೇಯ್ಯ। ಏವಞ್ಹಿ, ಭಿಕ್ಖವೇ, ಯೇ ತಿಣಕಟ್ಠನಿಸ್ಸಿತಾ ಪಾಣಾ ತೇ ಅನಯಬ್ಯಸನಂ ಆಪಜ್ಜೇಯ್ಯುಂ। ಏವಮೇವ ಖೋ, ಭಿಕ್ಖವೇ, ಯೋ ಹಿ ಕೋಚಿ ಸಮಣೋ ವಾ ಬ್ರಾಹ್ಮಣೋ ವಾ ಉಪ್ಪನ್ನಂ ವಿಸಮಗತಂ ಸಞ್ಞಂ ನ ಖಿಪ್ಪಮೇವ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತಿ, ಸೋ ದಿಟ್ಠೇ ಚೇವ ಧಮ್ಮೇ ದುಕ್ಖಂ ವಿಹರತಿ ಸವಿಘಾತಂ ಸಉಪಾಯಾಸಂ ಸಪರಿಳಾಹಂ; ಕಾಯಸ್ಸ ಚ ಭೇದಾ ಪರಂ ಮರಣಾ ದುಗ್ಗತಿ ಪಾಟಿಕಙ್ಖಾ।
‘‘Seyyathāpi, bhikkhave, puriso ādittaṃ tiṇukkaṃ sukkhe tiṇadāye nikkhipeyya; no ce hatthehi ca pādehi ca khippameva nibbāpeyya. Evañhi, bhikkhave, ye tiṇakaṭṭhanissitā pāṇā te anayabyasanaṃ āpajjeyyuṃ. Evameva kho, bhikkhave, yo hi koci samaṇo vā brāhmaṇo vā uppannaṃ visamagataṃ saññaṃ na khippameva pajahati vinodeti byantīkaroti anabhāvaṃ gameti, so diṭṭhe ceva dhamme dukkhaṃ viharati savighātaṃ saupāyāsaṃ sapariḷāhaṃ; kāyassa ca bhedā paraṃ maraṇā duggati pāṭikaṅkhā.
‘‘ಸನಿದಾನಂ, ಭಿಕ್ಖವೇ, ಉಪ್ಪಜ್ಜತಿ ನೇಕ್ಖಮ್ಮವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಅಬ್ಯಾಪಾದವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಅವಿಹಿಂಸಾವಿತಕ್ಕೋ, ನೋ ಅನಿದಾನಂ।
‘‘Sanidānaṃ, bhikkhave, uppajjati nekkhammavitakko, no anidānaṃ; sanidānaṃ uppajjati abyāpādavitakko, no anidānaṃ; sanidānaṃ uppajjati avihiṃsāvitakko, no anidānaṃ.
‘‘ಕಥಞ್ಚ, ಭಿಕ್ಖವೇ, ಸನಿದಾನಂ ಉಪ್ಪಜ್ಜತಿ ನೇಕ್ಖಮ್ಮವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಅಬ್ಯಾಪಾದವಿತಕ್ಕೋ, ನೋ ಅನಿದಾನಂ; ಸನಿದಾನಂ ಉಪ್ಪಜ್ಜತಿ ಅವಿಹಿಂಸಾವಿತಕ್ಕೋ, ನೋ ಅನಿದಾನಂ? ನೇಕ್ಖಮ್ಮಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ನೇಕ್ಖಮ್ಮಸಞ್ಞಾ, ನೇಕ್ಖಮ್ಮಸಞ್ಞಂ ಪಟಿಚ್ಚ ಉಪ್ಪಜ್ಜತಿ ನೇಕ್ಖಮ್ಮಸಙ್ಕಪ್ಪೋ, ನೇಕ್ಖಮ್ಮಸಙ್ಕಪ್ಪಂ ಪಟಿಚ್ಚ ಉಪ್ಪಜ್ಜತಿ ನೇಕ್ಖಮ್ಮಚ್ಛನ್ದೋ, ನೇಕ್ಖಮ್ಮಚ್ಛನ್ದಂ ಪಟಿಚ್ಚ ಉಪ್ಪಜ್ಜತಿ ನೇಕ್ಖಮ್ಮಪರಿಳಾಹೋ, ನೇಕ್ಖಮ್ಮಪರಿಳಾಹಂ ಪಟಿಚ್ಚ ಉಪ್ಪಜ್ಜತಿ ನೇಕ್ಖಮ್ಮಪರಿಯೇಸನಾ; ನೇಕ್ಖಮ್ಮಪರಿಯೇಸನಂ, ಭಿಕ್ಖವೇ, ಪರಿಯೇಸಮಾನೋ ಸುತವಾ ಅರಿಯಸಾವಕೋ ತೀಹಿ ಠಾನೇಹಿ ಸಮ್ಮಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Kathañca, bhikkhave, sanidānaṃ uppajjati nekkhammavitakko, no anidānaṃ; sanidānaṃ uppajjati abyāpādavitakko, no anidānaṃ; sanidānaṃ uppajjati avihiṃsāvitakko, no anidānaṃ? Nekkhammadhātuṃ, bhikkhave, paṭicca uppajjati nekkhammasaññā, nekkhammasaññaṃ paṭicca uppajjati nekkhammasaṅkappo, nekkhammasaṅkappaṃ paṭicca uppajjati nekkhammacchando, nekkhammacchandaṃ paṭicca uppajjati nekkhammapariḷāho, nekkhammapariḷāhaṃ paṭicca uppajjati nekkhammapariyesanā; nekkhammapariyesanaṃ, bhikkhave, pariyesamāno sutavā ariyasāvako tīhi ṭhānehi sammā paṭipajjati – kāyena, vācāya, manasā.
‘‘ಅಬ್ಯಾಪಾದಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಅಬ್ಯಾಪಾದಸಞ್ಞಾ, ಅಬ್ಯಾಪಾದಸಞ್ಞಂ ಪಟಿಚ್ಚ ಉಪ್ಪಜ್ಜತಿ ಅಬ್ಯಾಪಾದಸಙ್ಕಪ್ಪೋ…ಪೇ॰… ಅಬ್ಯಾಪಾದಚ್ಛನ್ದೋ… ಅಬ್ಯಾಪಾದಪರಿಳಾಹೋ… ಅಬ್ಯಾಪಾದಪರಿಯೇಸನಾ, ಅಬ್ಯಾಪಾದಪರಿಯೇಸನಂ, ಭಿಕ್ಖವೇ, ಪರಿಯೇಸಮಾನೋ ಸುತವಾ ಅರಿಯಸಾವಕೋ ತೀಹಿ ಠಾನೇಹಿ ಸಮ್ಮಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Abyāpādadhātuṃ, bhikkhave, paṭicca uppajjati abyāpādasaññā, abyāpādasaññaṃ paṭicca uppajjati abyāpādasaṅkappo…pe… abyāpādacchando… abyāpādapariḷāho… abyāpādapariyesanā, abyāpādapariyesanaṃ, bhikkhave, pariyesamāno sutavā ariyasāvako tīhi ṭhānehi sammā paṭipajjati – kāyena, vācāya, manasā.
‘‘ಅವಿಹಿಂಸಾಧಾತುಂ , ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಅವಿಹಿಂಸಾಸಞ್ಞಾ , ಅವಿಹಿಂಸಾಸಞ್ಞಂ ಪಟಿಚ್ಚ ಉಪ್ಪಜ್ಜತಿ ಅವಿಹಿಂಸಾಸಙ್ಕಪ್ಪೋ, ಅವಿಹಿಂಸಾಸಙ್ಕಪ್ಪಂ ಪಟಿಚ್ಚ ಉಪ್ಪಜ್ಜತಿ ಅವಿಹಿಂಸಾಛನ್ದೋ, ಅವಿಹಿಂಸಾಛನ್ದಂ ಪಟಿಚ್ಚ ಉಪ್ಪಜ್ಜತಿ ಅವಿಹಿಂಸಾಪರಿಳಾಹೋ, ಅವಿಹಿಂಸಾಪರಿಳಾಹಂ ಪಟಿಚ್ಚ ಉಪ್ಪಜ್ಜತಿ ಅವಿಹಿಂಸಾಪರಿಯೇಸನಾ; ಅವಿಹಿಂಸಾಪರಿಯೇಸನಂ, ಭಿಕ್ಖವೇ, ಪರಿಯೇಸಮಾನೋ ಸುತವಾ ಅರಿಯಸಾವಕೋ ತೀಹಿ ಠಾನೇಹಿ ಸಮ್ಮಾ ಪಟಿಪಜ್ಜತಿ – ಕಾಯೇನ, ವಾಚಾಯ, ಮನಸಾ।
‘‘Avihiṃsādhātuṃ , bhikkhave, paṭicca uppajjati avihiṃsāsaññā , avihiṃsāsaññaṃ paṭicca uppajjati avihiṃsāsaṅkappo, avihiṃsāsaṅkappaṃ paṭicca uppajjati avihiṃsāchando, avihiṃsāchandaṃ paṭicca uppajjati avihiṃsāpariḷāho, avihiṃsāpariḷāhaṃ paṭicca uppajjati avihiṃsāpariyesanā; avihiṃsāpariyesanaṃ, bhikkhave, pariyesamāno sutavā ariyasāvako tīhi ṭhānehi sammā paṭipajjati – kāyena, vācāya, manasā.
‘‘ಸೇಯ್ಯಥಾಪಿ, ಭಿಕ್ಖವೇ, ಪುರಿಸೋ ಆದಿತ್ತಂ ತಿಣುಕ್ಕಂ ಸುಕ್ಖೇ ತಿಣದಾಯೇ ನಿಕ್ಖಿಪೇಯ್ಯ; ತಮೇನಂ ಹತ್ಥೇಹಿ ಚ ಪಾದೇಹಿ ಚ ಖಿಪ್ಪಮೇವ ನಿಬ್ಬಾಪೇಯ್ಯ। ಏವಞ್ಹಿ, ಭಿಕ್ಖವೇ, ಯೇ ತಿಣಕಟ್ಠನಿಸ್ಸಿತಾ ಪಾಣಾ ತೇ ನ ಅನಯಬ್ಯಸನಂ ಆಪಜ್ಜೇಯ್ಯುಂ। ಏವಮೇವ ಖೋ, ಭಿಕ್ಖವೇ, ಯೋ ಹಿ ಕೋಚಿ ಸಮಣೋ ವಾ ಬ್ರಾಹ್ಮಣೋ ವಾ ಉಪ್ಪನ್ನಂ ವಿಸಮಗತಂ ಸಞ್ಞಂ ಖಿಪ್ಪಮೇವ ಪಜಹತಿ ವಿನೋದೇತಿ ಬ್ಯನ್ತೀಕರೋತಿ ಅನಭಾವಂ ಗಮೇತಿ, ಸೋ ದಿಟ್ಠೇ ಚೇವ ಧಮ್ಮೇ ಸುಖಂ ವಿಹರತಿ ಅವಿಘಾತಂ ಅನುಪಾಯಾಸಂ ಅಪರಿಳಾಹಂ; ಕಾಯಸ್ಸ ಚ ಭೇದಾ ಪರಂ ಮರಣಾ ಸುಗತಿ ಪಾಟಿಕಙ್ಖಾ’’ತಿ। ದುತಿಯಂ।
‘‘Seyyathāpi, bhikkhave, puriso ādittaṃ tiṇukkaṃ sukkhe tiṇadāye nikkhipeyya; tamenaṃ hatthehi ca pādehi ca khippameva nibbāpeyya. Evañhi, bhikkhave, ye tiṇakaṭṭhanissitā pāṇā te na anayabyasanaṃ āpajjeyyuṃ. Evameva kho, bhikkhave, yo hi koci samaṇo vā brāhmaṇo vā uppannaṃ visamagataṃ saññaṃ khippameva pajahati vinodeti byantīkaroti anabhāvaṃ gameti, so diṭṭhe ceva dhamme sukhaṃ viharati avighātaṃ anupāyāsaṃ apariḷāhaṃ; kāyassa ca bhedā paraṃ maraṇā sugati pāṭikaṅkhā’’ti. Dutiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಸನಿದಾನಸುತ್ತವಣ್ಣನಾ • 2. Sanidānasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಸನಿದಾನಸುತ್ತವಣ್ಣನಾ • 2. Sanidānasuttavaṇṇanā
