| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. সনিদানসুত্তৰণ্ণনা
2. Sanidānasuttavaṇṇanā
৯৬. ভাৰনপুংসকমেতং ‘‘ৰিসমং চন্দিমসূরিযা পরিৰত্তন্তী’’তিআদীসু (অ॰ নি॰ ৪.৭০) ৰিয। সনিদানন্তি অত্তনো ফলং নিদদাতীতি নিদানং, কারণন্তি আহ ‘‘সনিদানো সপ্পচ্চযো’’তি। কামপটিসংযুত্তোতি কামরাগসঙ্খাতেন কামেন পটিসংযুত্তো ৰা কামপটিবদ্ধো ৰা। তক্কেতীতি তক্কো। অভূতকারং সমারোপেত্ৰা কপ্পেতীতি সঙ্কপ্পো। আরম্মণে চিত্তং অপ্পেতীতি অপ্পনা। ৰিসেসেন অপ্পেতীতি ব্যপ্পনা। আরম্মণে চিত্তং অভিনিরোপেন্তং ৰিয পৰত্ততীতি চেতসো অভিনিরোপনা। মিচ্ছা ৰিপরীতো পাপকো সঙ্কপ্পোতি মিচ্ছাসঙ্কপ্পো। অঞ্ঞেসু চ কামপটিসংযুত্তেসু ৰিজ্জমানেসু ৰিতক্কো এৰ কামধাতুসদ্দেন নিরুল়্হো দট্ঠব্বো ৰিতক্কস্স কামপসঙ্গপ্পত্তিসাতিসযত্তা। এস নযো ব্যাপাদধাতুআদীসুপি। সব্বেপি অকুসলা ধম্মা কামধাতু হীনজ্ঝাসযেহি কামেতব্বধাতুভাৰতো।
96.Bhāvanapuṃsakametaṃ ‘‘visamaṃ candimasūriyā parivattantī’’tiādīsu (a. ni. 4.70) viya. Sanidānanti attano phalaṃ nidadātīti nidānaṃ, kāraṇanti āha ‘‘sanidānosappaccayo’’ti. Kāmapaṭisaṃyuttoti kāmarāgasaṅkhātena kāmena paṭisaṃyutto vā kāmapaṭibaddho vā. Takketīti takko. Abhūtakāraṃ samāropetvā kappetīti saṅkappo. Ārammaṇe cittaṃ appetīti appanā. Visesena appetīti byappanā. Ārammaṇe cittaṃ abhiniropentaṃ viya pavattatīti cetaso abhiniropanā. Micchā viparīto pāpako saṅkappoti micchāsaṅkappo. Aññesu ca kāmapaṭisaṃyuttesu vijjamānesu vitakko eva kāmadhātusaddena niruḷho daṭṭhabbo vitakkassa kāmapasaṅgappattisātisayattā. Esa nayo byāpādadhātuādīsupi. Sabbepi akusalā dhammā kāmadhātu hīnajjhāsayehi kāmetabbadhātubhāvato.
কিলেসকামস্স আরম্মণভাৰত্তা সব্বাকুসলসংগাহিকায কামধাতুযা ইতরা দ্ৰে সঙ্গহেত্ৰা কথনং সব্বসঙ্গাহিকা। তিস্সন্নং ধাতূনং অঞ্ঞমঞ্ঞং অসঙ্করতো কথা অসম্ভিন্না। ইমং কামাৰচরসঞ্ঞিতং কামৰিতক্কসঞ্ঞিতঞ্চ কামধাতুং। পটিচ্চাতি পচ্চযভূতং লভিত্ৰা। তীহি কারণেহীতি তীহি সারভূতেহি কারণেহি।
Kilesakāmassa ārammaṇabhāvattā sabbākusalasaṃgāhikāya kāmadhātuyā itarā dve saṅgahetvā kathanaṃ sabbasaṅgāhikā. Tissannaṃ dhātūnaṃ aññamaññaṃ asaṅkarato kathā asambhinnā. Imaṃ kāmāvacarasaññitaṃ kāmavitakkasaññitañca kāmadhātuṃ. Paṭiccāti paccayabhūtaṃ labhitvā. Tīhi kāraṇehīti tīhi sārabhūtehi kāraṇehi.
ব্যাপাদৰিতক্কো ব্যাপাদো উত্তরপদলোপেন, সো এৰ নিজ্জীৰট্ঠেন সভাৰধারণট্ঠেন ধাতূতি ব্যাপাদধাতু। ব্যাপজ্জতি চিত্তং এতেনাতি ব্যাপাদো, দোসো। ব্যাপাদোপি ধাতূতি যোজনা। সহজাতপচ্চযাদিৰসেনাতি সহজাতঅঞ্ঞমঞ্ঞনিস্সযসম্পযুত্তঅত্থিঅৰিগতপচ্চযৰসেন। ৰিসেসেন হি পরস্স অত্তনো চ দুক্খাপনং ৰিহিংসা, সা এৰ ধাতু, অত্থতো রোসনা পরূপঘাতো, তথা পৰত্তো ৰা দোসসহগতচিত্তুপ্পাদো।
Byāpādavitakko byāpādo uttarapadalopena, so eva nijjīvaṭṭhena sabhāvadhāraṇaṭṭhena dhātūti byāpādadhātu. Byāpajjati cittaṃ etenāti byāpādo, doso. Byāpādopi dhātūti yojanā. Sahajātapaccayādivasenāti sahajātaaññamaññanissayasampayuttaatthiavigatapaccayavasena. Visesena hi parassa attano ca dukkhāpanaṃ vihiṃsā, sā eva dhātu, atthato rosanā parūpaghāto, tathā pavatto vā dosasahagatacittuppādo.
তিণগহনে অরঞ্ঞেতি তিণেহি গহনভূতে অরঞ্ঞে। অনযব্যসনন্তি অপাযব্যসনং, পরিহরণূপাযরহিতং ৰিপত্তিন্তি ৰা অত্থো। অৰড্ঢিং ৰিনাসন্তি অৰড্ঢিঞ্চেৰ ৰিনাসঞ্চাতি ৰদন্তি সব্বসো ৰড্ঢিরহিতং। সুক্খতিণদাযো ৰিয আরম্মণং কিলেসগ্গিসংৰদ্ধনট্ঠেন। তিণুক্কা ৰিয অকুসলসঞ্ঞা অনুদহনট্ঠেন। তিণকট্ঠ…পে॰… সত্তা অনযব্যসনাপত্তিতো। ‘‘ইমে সত্তা’’তি হি অযোনিসো পটিপজ্জমানা অধিপ্পেতা। তেনাহ ‘‘যথা সুক্খতিণদাযে’’তিআদি।
Tiṇagahane araññeti tiṇehi gahanabhūte araññe. Anayabyasananti apāyabyasanaṃ, pariharaṇūpāyarahitaṃ vipattinti vā attho. Avaḍḍhiṃ vināsanti avaḍḍhiñceva vināsañcāti vadanti sabbaso vaḍḍhirahitaṃ. Sukkhatiṇadāyo viya ārammaṇaṃ kilesaggisaṃvaddhanaṭṭhena. Tiṇukkā viyaakusalasaññā anudahanaṭṭhena. Tiṇakaṭṭha…pe… sattā anayabyasanāpattito. ‘‘Ime sattā’’ti hi ayoniso paṭipajjamānā adhippetā. Tenāha ‘‘yathā sukkhatiṇadāye’’tiādi.
সমতাভাৰতো সমতাৰিরোধতো ৰিসমতাহেতুতো চ ৰিসমা রাগাদযোতি আহ ‘‘রাগৰিসমাদীনি অনুগত’’ন্তি। ইচ্ছিতব্বা অৰস্সংভাৰিনিভাৰেন।
Samatābhāvato samatāvirodhato visamatāhetuto ca visamā rāgādayoti āha ‘‘rāgavisamādīni anugata’’nti. Icchitabbā avassaṃbhāvinibhāvena.
সংকিলেসতো নিক্খমনট্ঠেন নেক্খম্মো, সো এৰ নিজ্জীৰট্ঠেন ধাতূতি নেক্খম্মধাতু। স্ৰাযং নেক্খম্মসদ্দো পব্বজ্জাদীসু কুসলৰিতক্কে চ নিরুল়্হোতি আহ ‘‘নেক্খম্মৰিতক্কোপি নেক্খম্মধাতূ’’তি। ইতরাপি দ্ৰে ধাতুযোতি অব্যাপাদঅৰিহিংসাধাতুযো ৰদতি। ৰিসুং দীপেতব্বা সরূপেন আগতত্তা। ৰিতক্কাদযোতি নেক্খম্মসঙ্কপ্পচ্ছন্দপরিল়াহপরিযেসনা। যথানুরূপং অত্তনো অত্তনো পচ্চযানুরূপং। কথং পনেত্থ কুসলধম্মেসু পরিল়াহো ৰুত্তোতি? সঙ্খারপরিল়াহমত্তং সন্ধাযেতং ৰুত্তং, সোল়সসু আকারেসু দুক্খসচ্চে সন্তাপট্ঠো ৰিয ৰুত্তো, যস্স ৰিগমেন অরহতো সীতিভাৰপ্পত্তি ৰুচ্চতি।
Saṃkilesato nikkhamanaṭṭhena nekkhammo, so eva nijjīvaṭṭhena dhātūti nekkhammadhātu. Svāyaṃ nekkhammasaddo pabbajjādīsu kusalavitakke ca niruḷhoti āha ‘‘nekkhammavitakkopi nekkhammadhātū’’ti. Itarāpi dve dhātuyoti abyāpādaavihiṃsādhātuyo vadati. Visuṃ dīpetabbā sarūpena āgatattā. Vitakkādayoti nekkhammasaṅkappacchandapariḷāhapariyesanā. Yathānurūpaṃ attano attano paccayānurūpaṃ. Kathaṃ panettha kusaladhammesu pariḷāho vuttoti? Saṅkhārapariḷāhamattaṃ sandhāyetaṃ vuttaṃ, soḷasasu ākāresu dukkhasacce santāpaṭṭho viya vutto, yassa vigamena arahato sītibhāvappatti vuccati.
সযং ন ব্যাপজ্জতি, তেন ৰা তংসমঙ্গীপুগ্গলো ন কিঞ্চি ব্যাপাদেতীতি অব্যাপাদো, ৰিহিংসায ৰুত্তৰিপরিযাযেহি সা ৰেদিতব্বা। হিতেসিভাৰেন মিজ্জতি সিনিয্হতীতি মিত্তো, মিত্তস্স এসাতি মেত্তি, অব্যাপাদো। মেত্তাযনাতি মেত্তাকারণং, মেত্তায ৰা অযনা পৰত্তনা। মেত্তাযিতত্তন্তি মেত্তাযিতস্স মেত্তায পৰত্তস্স ভাৰো। মেত্তাচেতোৰিমুত্তীতি মেত্তাযনৰসেন পৰত্তো চিত্তসমাধি। সেসং ৰুত্তনযমেৰ।
Sayaṃ na byāpajjati, tena vā taṃsamaṅgīpuggalo na kiñci byāpādetīti abyāpādo, vihiṃsāya vuttavipariyāyehi sā veditabbā. Hitesibhāvena mijjati siniyhatīti mitto, mittassa esāti metti, abyāpādo. Mettāyanāti mettākāraṇaṃ, mettāya vā ayanā pavattanā. Mettāyitattanti mettāyitassa mettāya pavattassa bhāvo. Mettācetovimuttīti mettāyanavasena pavatto cittasamādhi. Sesaṃ vuttanayameva.
সনিদানসুত্তৰণ্ণনা নিট্ঠিতা।
Sanidānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. সনিদানসুত্তং • 2. Sanidānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. সনিদানসুত্তৰণ্ণনা • 2. Sanidānasuttavaṇṇanā
