| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. санид̣̇аанасуд̇д̇аван̣н̣анаа
2. Sanidānasuttavaṇṇanā
96. бхааванабум̣сагамзд̇ам̣ ‘‘висамам̣ жанд̣̇имасуурияаа баривад̇д̇анд̇ий’’д̇иаад̣̇ийсу (а. ни. 4.70) вияа. санид̣̇аананд̇и ад̇д̇ано палам̣ нид̣̇ад̣̇аад̇ийд̇и нид̣̇аанам̣, гааран̣анд̇и ааха ‘‘санид̣̇аано саббажжаяо’’д̇и. гаамабадисам̣яуд̇д̇од̇и гаамарааг̇асан̇каад̇зна гаамзна бадисам̣яуд̇д̇о ваа гаамабадиб̣ад̣̇д̇хо ваа. д̇аггзд̇ийд̇и д̇агго. абхууд̇агаарам̣ самааробзд̇ваа габбзд̇ийд̇и сан̇габбо. аарамман̣з жид̇д̇ам̣ аббзд̇ийд̇и аббанаа. висзсзна аббзд̇ийд̇и б̣яаббанаа. аарамман̣з жид̇д̇ам̣ абхиниробзнд̇ам̣ вияа бавад̇д̇ад̇ийд̇и жзд̇асо абхиниробанаа. мижчаа вибарийд̇о баабаго сан̇габбод̇и мижчаасан̇габбо. ан̃н̃зсу жа гаамабадисам̣яуд̇д̇зсу виж̇ж̇амаанзсу вид̇агго зва гаамад̇хаад̇усад̣̇д̣̇зна нирул̣хо д̣̇адтаб̣б̣о вид̇аггасса гаамабасан̇г̇аббад̇д̇исаад̇исаяад̇д̇аа. зса наяо б̣яаабаад̣̇ад̇хаад̇уаад̣̇ийсуби. саб̣б̣зби агусалаа д̇хаммаа гаамад̇хаад̇у хийнаж̇жхаасаязхи гаамзд̇аб̣б̣ад̇хаад̇убхаавад̇о.
96.Bhāvanapuṃsakametaṃ ‘‘visamaṃ candimasūriyā parivattantī’’tiādīsu (a. ni. 4.70) viya. Sanidānanti attano phalaṃ nidadātīti nidānaṃ, kāraṇanti āha ‘‘sanidānosappaccayo’’ti. Kāmapaṭisaṃyuttoti kāmarāgasaṅkhātena kāmena paṭisaṃyutto vā kāmapaṭibaddho vā. Takketīti takko. Abhūtakāraṃ samāropetvā kappetīti saṅkappo. Ārammaṇe cittaṃ appetīti appanā. Visesena appetīti byappanā. Ārammaṇe cittaṃ abhiniropentaṃ viya pavattatīti cetaso abhiniropanā. Micchā viparīto pāpako saṅkappoti micchāsaṅkappo. Aññesu ca kāmapaṭisaṃyuttesu vijjamānesu vitakko eva kāmadhātusaddena niruḷho daṭṭhabbo vitakkassa kāmapasaṅgappattisātisayattā. Esa nayo byāpādadhātuādīsupi. Sabbepi akusalā dhammā kāmadhātu hīnajjhāsayehi kāmetabbadhātubhāvato.
гилзсагаамасса аарамман̣абхаавад̇д̇аа саб̣б̣аагусаласам̣г̇аахигааяа гаамад̇хаад̇уяаа ид̇араа д̣̇вз сан̇г̇ахзд̇ваа гат̇анам̣ саб̣б̣асан̇г̇аахигаа. д̇иссаннам̣ д̇хаад̇уунам̣ ан̃н̃аман̃н̃ам̣ асан̇гарад̇о гат̇аа асамбхиннаа. имам̣ гаамааважарасан̃н̃ид̇ам̣ гаамавид̇аггасан̃н̃ид̇ан̃жа гаамад̇хаад̇ум̣. бадижжаад̇и бажжаяабхууд̇ам̣ лабхид̇ваа. д̇ийхи гааран̣зхийд̇и д̇ийхи саарабхууд̇зхи гааран̣зхи.
Kilesakāmassa ārammaṇabhāvattā sabbākusalasaṃgāhikāya kāmadhātuyā itarā dve saṅgahetvā kathanaṃ sabbasaṅgāhikā. Tissannaṃ dhātūnaṃ aññamaññaṃ asaṅkarato kathā asambhinnā. Imaṃ kāmāvacarasaññitaṃ kāmavitakkasaññitañca kāmadhātuṃ. Paṭiccāti paccayabhūtaṃ labhitvā. Tīhi kāraṇehīti tīhi sārabhūtehi kāraṇehi.
б̣яаабаад̣̇авид̇агго б̣яаабаад̣̇о уд̇д̇арабад̣̇алобзна, со зва ниж̇ж̇ийвадтзна сабхаавад̇хааран̣адтзна д̇хаад̇ууд̇и б̣яаабаад̣̇ад̇хаад̇у. б̣яаабаж̇ж̇ад̇и жид̇д̇ам̣ зд̇знаад̇и б̣яаабаад̣̇о, д̣̇осо. б̣яаабаад̣̇оби д̇хаад̇ууд̇и яож̇анаа. сахаж̇аад̇абажжаяаад̣̇ивасзнаад̇и сахаж̇аад̇аан̃н̃аман̃н̃аниссаяасамбаяуд̇д̇аад̇т̇иавиг̇ад̇абажжаяавасзна. висзсзна хи барасса ад̇д̇ано жа д̣̇угкаабанам̣ вихим̣саа, саа зва д̇хаад̇у, ад̇т̇ад̇о росанаа баруубагхаад̇о, д̇ат̇аа бавад̇д̇о ваа д̣̇осасахаг̇ад̇ажид̇д̇уббаад̣̇о.
Byāpādavitakko byāpādo uttarapadalopena, so eva nijjīvaṭṭhena sabhāvadhāraṇaṭṭhena dhātūti byāpādadhātu. Byāpajjati cittaṃ etenāti byāpādo, doso. Byāpādopi dhātūti yojanā. Sahajātapaccayādivasenāti sahajātaaññamaññanissayasampayuttaatthiavigatapaccayavasena. Visesena hi parassa attano ca dukkhāpanaṃ vihiṃsā, sā eva dhātu, atthato rosanā parūpaghāto, tathā pavatto vā dosasahagatacittuppādo.
д̇ин̣аг̇аханз аран̃н̃зд̇и д̇ин̣зхи г̇аханабхууд̇з аран̃н̃з. анаяаб̣яасананд̇и абааяаб̣яасанам̣, барихаран̣уубааяарахид̇ам̣ вибад̇д̇инд̇и ваа ад̇т̇о. авад̣дхим̣ винаасанд̇и авад̣дхин̃жзва винаасан̃жаад̇и вад̣̇анд̇и саб̣б̣асо вад̣дхирахид̇ам̣. сугкад̇ин̣ад̣̇ааяо вияа аарамман̣ам̣ гилзсаг̇г̇исам̣вад̣̇д̇ханадтзна. д̇ин̣уггаа вияа агусаласан̃н̃аа ануд̣̇аханадтзна. д̇ин̣агадта…бз… сад̇д̇аа анаяаб̣яасанаабад̇д̇ид̇о. ‘‘имз сад̇д̇аа’’д̇и хи аяонисо бадибаж̇ж̇амаанаа ад̇хиббзд̇аа. д̇знааха ‘‘яат̇аа сугкад̇ин̣ад̣̇ааяз’’д̇иаад̣̇и.
Tiṇagahane araññeti tiṇehi gahanabhūte araññe. Anayabyasananti apāyabyasanaṃ, pariharaṇūpāyarahitaṃ vipattinti vā attho. Avaḍḍhiṃ vināsanti avaḍḍhiñceva vināsañcāti vadanti sabbaso vaḍḍhirahitaṃ. Sukkhatiṇadāyo viya ārammaṇaṃ kilesaggisaṃvaddhanaṭṭhena. Tiṇukkā viyaakusalasaññā anudahanaṭṭhena. Tiṇakaṭṭha…pe… sattā anayabyasanāpattito. ‘‘Ime sattā’’ti hi ayoniso paṭipajjamānā adhippetā. Tenāha ‘‘yathā sukkhatiṇadāye’’tiādi.
самад̇аабхаавад̇о самад̇аавирод̇хад̇о висамад̇аахзд̇уд̇о жа висамаа рааг̇аад̣̇аяод̇и ааха ‘‘рааг̇ависамаад̣̇ийни ануг̇ад̇а’’нд̇и. ижчид̇аб̣б̣аа авассам̣бхаавинибхаавзна.
Samatābhāvato samatāvirodhato visamatāhetuto ca visamā rāgādayoti āha ‘‘rāgavisamādīni anugata’’nti. Icchitabbā avassaṃbhāvinibhāvena.
сам̣гилзсад̇о нигкаманадтзна нзгкаммо, со зва ниж̇ж̇ийвадтзна д̇хаад̇ууд̇и нзгкаммад̇хаад̇у. свааяам̣ нзгкаммасад̣̇д̣̇о баб̣б̣аж̇ж̇аад̣̇ийсу гусалавид̇аггз жа нирул̣ход̇и ааха ‘‘нзгкаммавид̇аггоби нзгкаммад̇хаад̇уу’’д̇и. ид̇арааби д̣̇вз д̇хаад̇уяод̇и аб̣яаабаад̣̇аавихим̣саад̇хаад̇уяо вад̣̇ад̇и. висум̣ д̣̇ийбзд̇аб̣б̣аа саруубзна ааг̇ад̇ад̇д̇аа. вид̇аггаад̣̇аяод̇и нзгкаммасан̇габбажчанд̣̇абарил̣аахабариязсанаа. яат̇аануруубам̣ ад̇д̇ано ад̇д̇ано бажжаяаануруубам̣. гат̇ам̣ банзд̇т̇а гусалад̇хаммзсу барил̣аахо вуд̇д̇од̇и? сан̇каарабарил̣аахамад̇д̇ам̣ санд̇хааязд̇ам̣ вуд̇д̇ам̣, сол̣асасу аагаарзсу д̣̇угкасажжз санд̇аабадто вияа вуд̇д̇о, яасса виг̇амзна арахад̇о сийд̇ибхааваббад̇д̇и вужжад̇и.
Saṃkilesato nikkhamanaṭṭhena nekkhammo, so eva nijjīvaṭṭhena dhātūti nekkhammadhātu. Svāyaṃ nekkhammasaddo pabbajjādīsu kusalavitakke ca niruḷhoti āha ‘‘nekkhammavitakkopi nekkhammadhātū’’ti. Itarāpi dve dhātuyoti abyāpādaavihiṃsādhātuyo vadati. Visuṃ dīpetabbā sarūpena āgatattā. Vitakkādayoti nekkhammasaṅkappacchandapariḷāhapariyesanā. Yathānurūpaṃ attano attano paccayānurūpaṃ. Kathaṃ panettha kusaladhammesu pariḷāho vuttoti? Saṅkhārapariḷāhamattaṃ sandhāyetaṃ vuttaṃ, soḷasasu ākāresu dukkhasacce santāpaṭṭho viya vutto, yassa vigamena arahato sītibhāvappatti vuccati.
саяам̣ на б̣яаабаж̇ж̇ад̇и, д̇зна ваа д̇ам̣саман̇г̇ийбуг̇г̇ало на гин̃жи б̣яаабаад̣̇зд̇ийд̇и аб̣яаабаад̣̇о, вихим̣сааяа вуд̇д̇авибарияааязхи саа взд̣̇ид̇аб̣б̣аа. хид̇зсибхаавзна миж̇ж̇ад̇и синияхад̇ийд̇и мид̇д̇о, мид̇д̇асса зсаад̇и мзд̇д̇и, аб̣яаабаад̣̇о. мзд̇д̇ааяанаад̇и мзд̇д̇аагааран̣ам̣, мзд̇д̇ааяа ваа аяанаа бавад̇д̇анаа. мзд̇д̇ааяид̇ад̇д̇анд̇и мзд̇д̇ааяид̇асса мзд̇д̇ааяа бавад̇д̇асса бхааво. мзд̇д̇аажзд̇овимуд̇д̇ийд̇и мзд̇д̇ааяанавасзна бавад̇д̇о жид̇д̇асамаад̇хи. сзсам̣ вуд̇д̇анаяамзва.
Sayaṃ na byāpajjati, tena vā taṃsamaṅgīpuggalo na kiñci byāpādetīti abyāpādo, vihiṃsāya vuttavipariyāyehi sā veditabbā. Hitesibhāvena mijjati siniyhatīti mitto, mittassa esāti metti, abyāpādo. Mettāyanāti mettākāraṇaṃ, mettāya vā ayanā pavattanā. Mettāyitattanti mettāyitassa mettāya pavattassa bhāvo. Mettācetovimuttīti mettāyanavasena pavatto cittasamādhi. Sesaṃ vuttanayameva.
санид̣̇аанасуд̇д̇аван̣н̣анаа нидтид̇аа.
Sanidānasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. санид̣̇аанасуд̇д̇ам̣ • 2. Sanidānasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. санид̣̇аанасуд̇д̇аван̣н̣анаа • 2. Sanidānasuttavaṇṇanā
