| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
(८) ३. सनिमित्तवग्गवण्णना
(8) 3. Sanimittavaggavaṇṇanā
७८-७९. ततियस्स पठमे निमीयति एत्थ फलं अवसेसपच्चयेहि पक्खिपीयति वियाति निमित्तं, कारणन्ति आह ‘‘सनिमित्ताति सकारणा’’ति। दुतियादीसूति दुतियसुत्तादीसु। एसेव नयोति इमिना निदानादिपदानम्पि कारणपरियायमेव दीपेति। निददाति फलन्ति निदानं, हिनोति फलं पतिट्ठाति एतेनाति हेतु, सङ्खरोति फलन्ति सङ्खारो, पटिच्च एतस्मा फलं एतीति पच्चयो, रुप्पति निरुप्पति फलं एत्थाति रूपन्ति एवं निदानादिपदानम्पि हेतुपरियायता वेदितब्बा।
78-79. Tatiyassa paṭhame nimīyati ettha phalaṃ avasesapaccayehi pakkhipīyati viyāti nimittaṃ, kāraṇanti āha ‘‘sanimittāti sakāraṇā’’ti. Dutiyādīsūti dutiyasuttādīsu. Eseva nayoti iminā nidānādipadānampi kāraṇapariyāyameva dīpeti. Nidadāti phalanti nidānaṃ, hinoti phalaṃ patiṭṭhāti etenāti hetu, saṅkharoti phalanti saṅkhāro, paṭicca etasmā phalaṃ etīti paccayo, ruppati niruppati phalaṃ etthāti rūpanti evaṃ nidānādipadānampi hetupariyāyatā veditabbā.
८४. सत्तमे पच्चयभूतायाति सहजातादिपच्चयभूताय।
84. Sattame paccayabhūtāyāti sahajātādipaccayabhūtāya.
८७. दसमे समेच्च सम्भुय्य पच्चयेहि कतोति सङ्खतो, सङ्खतो धम्मो आरम्मणं एतेसन्ति सङ्खतारम्मणा। मग्गक्खणे न होन्ति नाम पहीयन्तीति कत्वा। नाहेसुन्ति एत्थ ‘‘वुच्चन्ती’’ति अज्झाहरितब्बं। याव अरहत्ता देसना देसिता तंतंसुत्तपरियोसाने ‘‘न होन्ती’’ति वुत्तत्ता।
87. Dasame samecca sambhuyya paccayehi katoti saṅkhato, saṅkhato dhammo ārammaṇaṃ etesanti saṅkhatārammaṇā. Maggakkhaṇe na honti nāma pahīyantīti katvā. Nāhesunti ettha ‘‘vuccantī’’ti ajjhāharitabbaṃ. Yāva arahattā desanā desitā taṃtaṃsuttapariyosāne ‘‘na hontī’’ti vuttattā.
सनिमित्तवग्गवण्णना निट्ठिता।
Sanimittavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / (८) ३. सनिमित्तवग्गो • (8) 3. Sanimittavaggo
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / (८) ३. सनिमित्तवग्गवण्णना • (8) 3. Sanimittavaggavaṇṇanā
