| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
(၈) ၃. သနိမိတ္တဝဂ္ဂဝဏ္ဏနာ
(8) 3. Sanimittavaggavaṇṇanā
၇၈-၇၉. တတိယသ္သ ပဌမေ နိမီယတိ ဧတ္ထ ဖလံ အဝသေသပစ္စယေဟိ ပက္ခိပီယတိ ဝိယာတိ နိမိတ္တံ, ကာရဏန္တိ အာဟ ‘‘သနိမိတ္တာတိ သကာရဏာ’’တိ။ ဒုတိယာဒီသူတိ ဒုတိယသုတ္တာဒီသု။ ဧသေဝ နယောတိ ဣမိနာ နိဒာနာဒိပဒာနမ္ပိ ကာရဏပရိယာယမေဝ ဒီပေတိ။ နိဒဒာတိ ဖလန္တိ နိဒာနံ, ဟိနောတိ ဖလံ ပတိဋ္ဌာတိ ဧတေနာတိ ဟေတု, သင္ခရောတိ ဖလန္တိ သင္ခာရော, ပဋိစ္စ ဧတသ္မာ ဖလံ ဧတီတိ ပစ္စယော, ရုပ္ပတိ နိရုပ္ပတိ ဖလံ ဧတ္ထာတိ ရူပန္တိ ဧဝံ နိဒာနာဒိပဒာနမ္ပိ ဟေတုပရိယာယတာ ဝေဒိတဗ္ဗာ။
78-79. Tatiyassa paṭhame nimīyati ettha phalaṃ avasesapaccayehi pakkhipīyati viyāti nimittaṃ, kāraṇanti āha ‘‘sanimittāti sakāraṇā’’ti. Dutiyādīsūti dutiyasuttādīsu. Eseva nayoti iminā nidānādipadānampi kāraṇapariyāyameva dīpeti. Nidadāti phalanti nidānaṃ, hinoti phalaṃ patiṭṭhāti etenāti hetu, saṅkharoti phalanti saṅkhāro, paṭicca etasmā phalaṃ etīti paccayo, ruppati niruppati phalaṃ etthāti rūpanti evaṃ nidānādipadānampi hetupariyāyatā veditabbā.
၈၄. သတ္တမေ ပစ္စယဘူတာယာတိ သဟဇာတာဒိပစ္စယဘူတာယ။
84. Sattame paccayabhūtāyāti sahajātādipaccayabhūtāya.
၈၇. ဒသမေ သမေစ္စ သမ္ဘုယ္ယ ပစ္စယေဟိ ကတောတိ သင္ခတော, သင္ခတော ဓမ္မော အာရမ္မဏံ ဧတေသန္တိ သင္ခတာရမ္မဏာ။ မဂ္ဂက္ခဏေ န ဟောန္တိ နာမ ပဟီယန္တီတိ ကတ္ဝာ။ နာဟေသုန္တိ ဧတ္ထ ‘‘ဝုစ္စန္တီ’’တိ အဇ္ဈာဟရိတဗ္ဗံ။ ယာဝ အရဟတ္တာ ဒေသနာ ဒေသိတာ တံတံသုတ္တပရိယောသာနေ ‘‘န ဟောန္တီ’’တိ ဝုတ္တတ္တာ။
87. Dasame samecca sambhuyya paccayehi katoti saṅkhato, saṅkhato dhammo ārammaṇaṃ etesanti saṅkhatārammaṇā. Maggakkhaṇe na honti nāma pahīyantīti katvā. Nāhesunti ettha ‘‘vuccantī’’ti ajjhāharitabbaṃ. Yāva arahattā desanā desitā taṃtaṃsuttapariyosāne ‘‘na hontī’’ti vuttattā.
သနိမိတ္တဝဂ္ဂဝဏ္ဏနာ နိဋ္ဌိတာ။
Sanimittavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / (၈) ၃. သနိမိတ္တဝဂ္ဂော • (8) 3. Sanimittavaggo
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / (၈) ၃. သနိမိတ္တဝဂ္ဂဝဏ္ဏနာ • (8) 3. Sanimittavaggavaṇṇanā
