| Library / Tipiṭaka / തിപിടക • Tipiṭaka / അങ്ഗുത്തരനികായ (ടീകാ) • Aṅguttaranikāya (ṭīkā) |
(൮) ൩. സനിമിത്തവഗ്ഗവണ്ണനാ
(8) 3. Sanimittavaggavaṇṇanā
൭൮-൭൯. തതിയസ്സ പഠമേ നിമീയതി ഏത്ഥ ഫലം അവസേസപച്ചയേഹി പക്ഖിപീയതി വിയാതി നിമിത്തം, കാരണന്തി ആഹ ‘‘സനിമിത്താതി സകാരണാ’’തി. ദുതിയാദീസൂതി ദുതിയസുത്താദീസു. ഏസേവ നയോതി ഇമിനാ നിദാനാദിപദാനമ്പി കാരണപരിയായമേവ ദീപേതി. നിദദാതി ഫലന്തി നിദാനം, ഹിനോതി ഫലം പതിട്ഠാതി ഏതേനാതി ഹേതു, സങ്ഖരോതി ഫലന്തി സങ്ഖാരോ, പടിച്ച ഏതസ്മാ ഫലം ഏതീതി പച്ചയോ, രുപ്പതി നിരുപ്പതി ഫലം ഏത്ഥാതി രൂപന്തി ഏവം നിദാനാദിപദാനമ്പി ഹേതുപരിയായതാ വേദിതബ്ബാ.
78-79. Tatiyassa paṭhame nimīyati ettha phalaṃ avasesapaccayehi pakkhipīyati viyāti nimittaṃ, kāraṇanti āha ‘‘sanimittāti sakāraṇā’’ti. Dutiyādīsūti dutiyasuttādīsu. Eseva nayoti iminā nidānādipadānampi kāraṇapariyāyameva dīpeti. Nidadāti phalanti nidānaṃ, hinoti phalaṃ patiṭṭhāti etenāti hetu, saṅkharoti phalanti saṅkhāro, paṭicca etasmā phalaṃ etīti paccayo, ruppati niruppati phalaṃ etthāti rūpanti evaṃ nidānādipadānampi hetupariyāyatā veditabbā.
൮൪. സത്തമേ പച്ചയഭൂതായാതി സഹജാതാദിപച്ചയഭൂതായ.
84. Sattame paccayabhūtāyāti sahajātādipaccayabhūtāya.
൮൭. ദസമേ സമേച്ച സമ്ഭുയ്യ പച്ചയേഹി കതോതി സങ്ഖതോ, സങ്ഖതോ ധമ്മോ ആരമ്മണം ഏതേസന്തി സങ്ഖതാരമ്മണാ. മഗ്ഗക്ഖണേ ന ഹോന്തി നാമ പഹീയന്തീതി കത്വാ. നാഹേസുന്തി ഏത്ഥ ‘‘വുച്ചന്തീ’’തി അജ്ഝാഹരിതബ്ബം. യാവ അരഹത്താ ദേസനാ ദേസിതാ തംതംസുത്തപരിയോസാനേ ‘‘ന ഹോന്തീ’’തി വുത്തത്താ.
87. Dasame samecca sambhuyya paccayehi katoti saṅkhato, saṅkhato dhammo ārammaṇaṃ etesanti saṅkhatārammaṇā. Maggakkhaṇe na honti nāma pahīyantīti katvā. Nāhesunti ettha ‘‘vuccantī’’ti ajjhāharitabbaṃ. Yāva arahattā desanā desitā taṃtaṃsuttapariyosāne ‘‘na hontī’’ti vuttattā.
സനിമിത്തവഗ്ഗവണ്ണനാ നിട്ഠിതാ.
Sanimittavaggavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / (൮) ൩. സനിമിത്തവഗ്ഗോ • (8) 3. Sanimittavaggo
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / (൮) ൩. സനിമിത്തവഗ്ഗവണ്ണനാ • (8) 3. Sanimittavaggavaṇṇanā
