| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১১. সঙ্কৰাসুত্তং
11. Saṅkavāsuttaṃ
৯২. একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং যেন সঙ্কৰা 1 নাম কোসলানং নিগমো তদৰসরি। তত্র সুদং ভগৰা সঙ্কৰাযং ৰিহরতি। তেন খো পন সমযেন কস্সপগোত্তো নাম ভিক্খু সঙ্কৰাযং আৰাসিকো হোতি। তত্র সুদং ভগৰা সিক্খাপদপটিসংযুত্তায ধম্মিযা কথায ভিক্খূ সন্দস্সেতি সমাদপেতি সমুত্তেজেতি সম্পহংসেতি। অথ খো কস্সপগোত্তস্স ভিক্খুনো ভগৰতি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘‘অধিসল্লিখতেৰাযং 2 সমণো’’তি। অথ খো ভগৰা সঙ্কৰাযং যথাভিরন্তং ৰিহরিত্ৰা যেন রাজগহং তেন চারিকং পক্কামি। অনুপুব্বেন চারিকং চরমানো যেন রাজগহং তদৰসরি। তত্র সুদং ভগৰা রাজগহে ৰিহরতি।
92. Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena saṅkavā 3 nāma kosalānaṃ nigamo tadavasari. Tatra sudaṃ bhagavā saṅkavāyaṃ viharati. Tena kho pana samayena kassapagotto nāma bhikkhu saṅkavāyaṃ āvāsiko hoti. Tatra sudaṃ bhagavā sikkhāpadapaṭisaṃyuttāya dhammiyā kathāya bhikkhū sandasseti samādapeti samuttejeti sampahaṃseti. Atha kho kassapagottassa bhikkhuno bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘‘adhisallikhatevāyaṃ 4 samaṇo’’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. Anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati.
অথ খো কস্সপগোত্তস্স ভিক্খুনো অচিরপক্কন্তস্স ভগৰতো অহুদেৰ কুক্কুচ্চং অহু ৰিপ্পটিসারো – ‘‘অলাভা ৰত মে, ন ৰত মে লাভা ; দুল্লদ্ধং ৰত মে, ন ৰত মে সুলদ্ধং; যস্স মে ভগৰতি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘অধিসল্লিখতেৰাযং সমণো’তি। যংনূনাহং যেন ভগৰা তেনুপসঙ্কমেয্যং; উপসঙ্কমিত্ৰা ভগৰতো সন্তিকে অচ্চযং অচ্চযতো দেসেয্য’’ন্তি। অথ খো কস্সপগোত্তো ভিক্খু সেনাসনং সংসামেত্ৰা পত্তচীৰরমাদায যেন রাজগহং তেন পক্কামি। অনুপুব্বেন যেন রাজগহং যেন গিজ্ঝকূটো পব্বতো যেন ভগৰা তেনুপসঙ্কমি ; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো কস্সপগোত্তো ভিক্খু ভগৰন্তং এতদৰোচ –
Atha kho kassapagottassa bhikkhuno acirapakkantassa bhagavato ahudeva kukkuccaṃ ahu vippaṭisāro – ‘‘alābhā vata me, na vata me lābhā ; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena rājagahaṃ tena pakkāmi. Anupubbena yena rājagahaṃ yena gijjhakūṭo pabbato yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho kassapagotto bhikkhu bhagavantaṃ etadavoca –
‘‘একমিদং, ভন্তে, সমযং ভগৰা সঙ্কৰাযং ৰিহরতি, সঙ্কৰা নাম কোসলানং নিগমো। তত্র, ভন্তে, ভগৰা সিক্খাপদপটিসংযুত্তায ধম্মিযা কথায ভিক্খূ সন্দস্সেসি সমাদপেসি সমুত্তেজেসি সম্পহংসেসি। তস্স ময্হং ভগৰতি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘অধিসল্লিখতেৰাযং সমণো’তি। অথ খো ভগৰা সঙ্কৰাযং যথাভিরন্তং ৰিহরিত্ৰা যেন রাজগহং তেন চারিকং পক্কামি। ( ) 5 তস্স ময্হং, ভন্তে, অচিরপক্কন্তস্স ভগৰতো অহুদেৰ কুক্কুচ্চং অহু ৰিপ্পটিসারো – অলাভা ৰত মে, ন ৰত মে লাভা; দুল্লদ্ধং ৰত মে, ন ৰত মে সুলদ্ধং; যস্স মে ভগৰতি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘অধিসল্লিখতেৰাযং সমণো’তি। যংনূনাহং যেন ভগৰা তেনুপসঙ্কমেয্যং; উপসঙ্কমিত্ৰা ভগৰতো সন্তিকে অচ্চযং অচ্চযতো দেসেয্যন্তি। অচ্চযো মং, ভন্তে , অচ্চগমা যথাবালং যথামূল়্হং যথাঅকুসলং যস্স মে ভগৰতি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘অধিসল্লিখতেৰাযং সমণো’তি। তস্স মে, ভন্তে, ভগৰা অচ্চযং অচ্চযতো পটিগ্গণ্হাতু, আযতিং সংৰরাযা’’তি।
‘‘Ekamidaṃ, bhante, samayaṃ bhagavā saṅkavāyaṃ viharati, saṅkavā nāma kosalānaṃ nigamo. Tatra, bhante, bhagavā sikkhāpadapaṭisaṃyuttāya dhammiyā kathāya bhikkhū sandassesi samādapesi samuttejesi sampahaṃsesi. Tassa mayhaṃ bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. ( ) 6 Tassa mayhaṃ, bhante, acirapakkantassa bhagavato ahudeva kukkuccaṃ ahu vippaṭisāro – alābhā vata me, na vata me lābhā; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyyanti. Accayo maṃ, bhante , accagamā yathābālaṃ yathāmūḷhaṃ yathāakusalaṃ yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Tassa me, bhante, bhagavā accayaṃ accayato paṭiggaṇhātu, āyatiṃ saṃvarāyā’’ti.
‘‘তগ্ঘ তং 7, কস্সপ, অচ্চযো অচ্চগমা যথাবালং যথামূল়্হং যথাঅকুসলং, যস্স তে মযি সিক্খাপদপটিসংযুত্তায ধম্মিযা কথায ভিক্খূ সন্দস্সেন্তে সমাদপেন্তে সমুত্তেজেন্তে সম্পহংসেন্তে অহুদেৰ অক্খন্তি অহু অপ্পচ্চযো – ‘অধিসল্লিখতেৰাযং সমণো’তি। যতো চ খো ত্ৰং, কস্সপ, অচ্চযং অচ্চযতো দিস্ৰা যথাধম্মং পটিকরোসি, তং তে মযং পটিগ্গণ্হাম। ৰুদ্ধিহেসা, কস্সপ, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি, আযতিং সংৰরং আপজ্জতি।
‘‘Taggha taṃ 8, kassapa, accayo accagamā yathābālaṃ yathāmūḷhaṃ yathāakusalaṃ, yassa te mayi sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yato ca kho tvaṃ, kassapa, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhihesā, kassapa, ariyassa vinaye yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjati.
‘‘থেরো চেপি , কস্সপ, ভিক্খু হোতি ন সিক্খাকামো ন সিক্খাসমাদানস্স ৰণ্ণৰাদী, যে চঞ্ঞে ভিক্খূ ন সিক্খাকামা তে চ ন সিক্খায সমাদপেতি, যে চঞ্ঞে ভিক্খূ সিক্খাকামা তেসঞ্চ ন ৰণ্ণং ভণতি ভূতং তচ্ছং কালেন, এৰরূপস্সাহং, কস্সপ, থেরস্স ভিক্খুনো ন ৰণ্ণং ভণামি। তং কিস্স হেতু? সত্থা হিস্স ৰণ্ণং ভণতীতি অঞ্ঞে নং 9 ভিক্খূ ভজেয্যুং, যে নং ভজেয্যুং ত্যাস্স দিট্ঠানুগতিং আপজ্জেয্যুং, য্যাস্স দিট্ঠানুগতিং আপজ্জেয্যুং তেসং তং অস্স দীঘরত্তং অহিতায দুক্খাযাতি। তস্মাহং, কস্সপ, এৰরূপস্স থেরস্স ভিক্খুনো ন ৰণ্ণং ভণামি।
‘‘Thero cepi , kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ 10 bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa therassa bhikkhuno na vaṇṇaṃ bhaṇāmi.
‘‘মজ্ঝিমো চেপি, কস্সপ, ভিক্খু হোতি…পে॰… নৰো চেপি, কস্সপ, ভিক্খু হোতি ন সিক্খাকামো ন সিক্খাসমাদানস্স ৰণ্ণৰাদী, যে চঞ্ঞে ভিক্খূ ন সিক্খাকামা তে চ ন সিক্খায সমাদপেতি, যে চঞ্ঞে ভিক্খূ সিক্খাকামা তেসঞ্চ ন ৰণ্ণং ভণতি ভূতং তচ্ছং কালেন, এৰরূপস্সাহং, কস্সপ, নৰস্স ভিক্খুনো ন ৰণ্ণং ভণামি। তং কিস্স হেতু? সত্থা হিস্স ৰণ্ণং ভণতীতি অঞ্ঞে নং ভিক্খূ ভজেয্যুং, যে নং ভজেয্যুং ত্যাস্স দিট্ঠানুগতিং আপজ্জেয্যুং, য্যাস্স দিট্ঠানুগতিং আপজ্জেয্যুং তেসং তং অস্স দীঘরত্তং অহিতায দুক্খাযাতি। তস্মাহং, কস্সপ, এৰরূপস্স নৰস্স ভিক্খুনো ন ৰণ্ণং ভণামি।
‘‘Majjhimo cepi, kassapa, bhikkhu hoti…pe… navo cepi, kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa navassa bhikkhuno na vaṇṇaṃ bhaṇāmi.
‘‘থেরো চেপি, কস্সপ, ভিক্খু হোতি সিক্খাকামো সিক্খাসমাদানস্স ৰণ্ণৰাদী, যে চঞ্ঞে ভিক্খূ ন সিক্খাকামা তে চ সিক্খায সমাদপেতি, যে চঞ্ঞে ভিক্খূ সিক্খাকামা তেসঞ্চ ৰণ্ণং ভণতি ভূতং তচ্ছং কালেন, এৰরূপস্সাহং, কস্সপ, থেরস্স ভিক্খুনো ৰণ্ণং ভণামি। তং কিস্স হেতু? সত্থা হিস্স ৰণ্ণং ভণতীতি অঞ্ঞে নং ভিক্খূ ভজেয্যুং, যে নং ভজেয্যুং ত্যাস্স দিট্ঠানুগতিং আপজ্জেয্যুং, য্যাস্স দিট্ঠানুগতিং আপজ্জেয্যুং তেসং তং অস্স দীঘরত্তং হিতায সুখাযাতি। তস্মাহং, কস্সপ, এৰরূপস্স থেরস্স ভিক্খুনো ৰণ্ণং ভণামি।
‘‘Thero cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa therassa bhikkhuno vaṇṇaṃ bhaṇāmi.
‘‘মজ্ঝিমো চেপি, কস্সপ, ভিক্খু হোতি সিক্খাকামো…পে॰… নৰো চেপি, কস্সপ, ভিক্খু হোতি সিক্খাকামো সিক্খাসমাদানস্স ৰণ্ণৰাদী, যে চঞ্ঞে ভিক্খূ ন সিক্খাকামা তে চ সিক্খায সমাদপেতি, যে চঞ্ঞে ভিক্খূ সিক্খাকামা তেসঞ্চ ৰণ্ণং ভণতি ভূতং তচ্ছং কালেন, এৰরূপস্সাহং, কস্সপ, নৰস্স ভিক্খুনো ৰণ্ণং ভণামি। তং কিস্স হেতু? সত্থা হিস্স ৰণ্ণং ভণতীতি অঞ্ঞে নং ভিক্খূ ভজেয্যুং, যে নং ভজেয্যুং ত্যাস্স দিট্ঠানুগতিং আপজ্জেয্যুং, য্যাস্স দিট্ঠানুগতিং আপজ্জেয্যুং তেসং তং অস্স দীঘরত্তং হিতায সুখাযাতি। তস্মাহং, কস্সপ, এৰরূপস্স নৰস্স ভিক্খুনো ৰণ্ণং ভণামী’’তি। একাদসমং।
‘‘Majjhimo cepi, kassapa, bhikkhu hoti sikkhākāmo…pe… navo cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa navassa bhikkhuno vaṇṇaṃ bhaṇāmī’’ti. Ekādasamaṃ.
সমণৰগ্গো নৰমো।
Samaṇavaggo navamo.
তস্সুদ্দানং –
Tassuddānaṃ –
সমণো গদ্রভো খেত্তং, ৰজ্জিপুত্তো চ সেক্খকং।
Samaṇo gadrabho khettaṃ, vajjiputto ca sekkhakaṃ;
তযো চ সিক্খনা ৰুত্তা, দ্ৰে সিক্খা সঙ্কৰায চাতি॥
Tayo ca sikkhanā vuttā, dve sikkhā saṅkavāya cāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১১. সঙ্কৰাসুত্তৰণ্ণনা • 11. Saṅkavāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১১. সঙ্কৰাসুত্তৰণ্ণনা • 11. Saṅkavāsuttavaṇṇanā
