| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၁. သင္ကဝာသုတ္တံ
11. Saṅkavāsuttaṃ
၉၂. ဧကံ သမယံ ဘဂဝာ ကောသလေသု စာရိကံ စရမာနော မဟတာ ဘိက္ခုသင္ဃေန သဒ္ဓိံ ယေန သင္ကဝာ 1 နာမ ကောသလာနံ နိဂမော တဒဝသရိ။ တတ္ရ သုဒံ ဘဂဝာ သင္ကဝာယံ ဝိဟရတိ။ တေန ခော ပန သမယေန ကသ္သပဂောတ္တော နာမ ဘိက္ခု သင္ကဝာယံ အာဝာသိကော ဟောတိ။ တတ္ရ သုဒံ ဘဂဝာ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေတိ သမာဒပေတိ သမုတ္တေဇေတိ သမ္ပဟံသေတိ။ အထ ခော ကသ္သပဂောတ္တသ္သ ဘိက္ခုနော ဘဂဝတိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘‘အဓိသလ္လိခတေဝာယံ 2 သမဏော’’တိ။ အထ ခော ဘဂဝာ သင္ကဝာယံ ယထာဘိရန္တံ ဝိဟရိတ္ဝာ ယေန ရာဇဂဟံ တေန စာရိကံ ပက္ကာမိ။ အနုပုဗ္ဗေန စာရိကံ စရမာနော ယေန ရာဇဂဟံ တဒဝသရိ။ တတ္ရ သုဒံ ဘဂဝာ ရာဇဂဟေ ဝိဟရတိ။
92. Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena saṅkavā 3 nāma kosalānaṃ nigamo tadavasari. Tatra sudaṃ bhagavā saṅkavāyaṃ viharati. Tena kho pana samayena kassapagotto nāma bhikkhu saṅkavāyaṃ āvāsiko hoti. Tatra sudaṃ bhagavā sikkhāpadapaṭisaṃyuttāya dhammiyā kathāya bhikkhū sandasseti samādapeti samuttejeti sampahaṃseti. Atha kho kassapagottassa bhikkhuno bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘‘adhisallikhatevāyaṃ 4 samaṇo’’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. Anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati.
အထ ခော ကသ္သပဂောတ္တသ္သ ဘိက္ခုနော အစိရပက္ကန္တသ္သ ဘဂဝတော အဟုဒေဝ ကုက္ကုစ္စံ အဟု ဝိပ္ပဋိသာရော – ‘‘အလာဘာ ဝတ မေ, န ဝတ မေ လာဘာ ; ဒုလ္လဒ္ဓံ ဝတ မေ, န ဝတ မေ သုလဒ္ဓံ; ယသ္သ မေ ဘဂဝတိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘အဓိသလ္လိခတေဝာယံ သမဏော’တိ။ ယံနူနာဟံ ယေန ဘဂဝာ တေနုပသင္ကမေယ္ယံ; ဥပသင္ကမိတ္ဝာ ဘဂဝတော သန္တိကေ အစ္စယံ အစ္စယတော ဒေသေယ္ယ’’န္တိ။ အထ ခော ကသ္သပဂောတ္တော ဘိက္ခု သေနာသနံ သံသာမေတ္ဝာ ပတ္တစီဝရမာဒာယ ယေန ရာဇဂဟံ တေန ပက္ကာမိ။ အနုပုဗ္ဗေန ယေန ရာဇဂဟံ ယေန ဂိဇ္ဈကူဋော ပဗ္ဗတော ယေန ဘဂဝာ တေနုပသင္ကမိ ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော ကသ္သပဂောတ္တော ဘိက္ခု ဘဂဝန္တံ ဧတဒဝောစ –
Atha kho kassapagottassa bhikkhuno acirapakkantassa bhagavato ahudeva kukkuccaṃ ahu vippaṭisāro – ‘‘alābhā vata me, na vata me lābhā ; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena rājagahaṃ tena pakkāmi. Anupubbena yena rājagahaṃ yena gijjhakūṭo pabbato yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho kassapagotto bhikkhu bhagavantaṃ etadavoca –
‘‘ဧကမိဒံ, ဘန္တေ, သမယံ ဘဂဝာ သင္ကဝာယံ ဝိဟရတိ, သင္ကဝာ နာမ ကောသလာနံ နိဂမော။ တတ္ရ, ဘန္တေ, ဘဂဝာ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေသိ သမာဒပေသိ သမုတ္တေဇေသိ သမ္ပဟံသေသိ။ တသ္သ မယ္ဟံ ဘဂဝတိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘အဓိသလ္လိခတေဝာယံ သမဏော’တိ။ အထ ခော ဘဂဝာ သင္ကဝာယံ ယထာဘိရန္တံ ဝိဟရိတ္ဝာ ယေန ရာဇဂဟံ တေန စာရိကံ ပက္ကာမိ။ ( ) 5 တသ္သ မယ္ဟံ, ဘန္တေ, အစိရပက္ကန္တသ္သ ဘဂဝတော အဟုဒေဝ ကုက္ကုစ္စံ အဟု ဝိပ္ပဋိသာရော – အလာဘာ ဝတ မေ, န ဝတ မေ လာဘာ; ဒုလ္လဒ္ဓံ ဝတ မေ, န ဝတ မေ သုလဒ္ဓံ; ယသ္သ မေ ဘဂဝတိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘အဓိသလ္လိခတေဝာယံ သမဏော’တိ။ ယံနူနာဟံ ယေန ဘဂဝာ တေနုပသင္ကမေယ္ယံ; ဥပသင္ကမိတ္ဝာ ဘဂဝတော သန္တိကေ အစ္စယံ အစ္စယတော ဒေသေယ္ယန္တိ။ အစ္စယော မံ, ဘန္တေ , အစ္စဂမာ ယထာဗာလံ ယထာမူဠ္ဟံ ယထာအကုသလံ ယသ္သ မေ ဘဂဝတိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘အဓိသလ္လိခတေဝာယံ သမဏော’တိ။ တသ္သ မေ, ဘန္တေ, ဘဂဝာ အစ္စယံ အစ္စယတော ပဋိဂ္ဂဏ္ဟာတု, အာယတိံ သံဝရာယာ’’တိ။
‘‘Ekamidaṃ, bhante, samayaṃ bhagavā saṅkavāyaṃ viharati, saṅkavā nāma kosalānaṃ nigamo. Tatra, bhante, bhagavā sikkhāpadapaṭisaṃyuttāya dhammiyā kathāya bhikkhū sandassesi samādapesi samuttejesi sampahaṃsesi. Tassa mayhaṃ bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. ( ) 6 Tassa mayhaṃ, bhante, acirapakkantassa bhagavato ahudeva kukkuccaṃ ahu vippaṭisāro – alābhā vata me, na vata me lābhā; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyyanti. Accayo maṃ, bhante , accagamā yathābālaṃ yathāmūḷhaṃ yathāakusalaṃ yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Tassa me, bhante, bhagavā accayaṃ accayato paṭiggaṇhātu, āyatiṃ saṃvarāyā’’ti.
‘‘တဂ္ဃ တံ 7, ကသ္သပ, အစ္စယော အစ္စဂမာ ယထာဗာလံ ယထာမူဠ္ဟံ ယထာအကုသလံ, ယသ္သ တေ မယိ သိက္ခာပဒပဋိသံယုတ္တာယ ဓမ္မိယာ ကထာယ ဘိက္ခူ သန္ဒသ္သေန္တေ သမာဒပေန္တေ သမုတ္တေဇေန္တေ သမ္ပဟံသေန္တေ အဟုဒေဝ အက္ခန္တိ အဟု အပ္ပစ္စယော – ‘အဓိသလ္လိခတေဝာယံ သမဏော’တိ။ ယတော စ ခော တ္ဝံ, ကသ္သပ, အစ္စယံ အစ္စယတော ဒိသ္ဝာ ယထာဓမ္မံ ပဋိကရောသိ, တံ တေ မယံ ပဋိဂ္ဂဏ္ဟာမ။ ဝုဒ္ဓိဟေသာ, ကသ္သပ, အရိယသ္သ ဝိနယေ ယော အစ္စယံ အစ္စယတော ဒိသ္ဝာ ယထာဓမ္မံ ပဋိကရောတိ, အာယတိံ သံဝရံ အာပဇ္ဇတိ။
‘‘Taggha taṃ 8, kassapa, accayo accagamā yathābālaṃ yathāmūḷhaṃ yathāakusalaṃ, yassa te mayi sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yato ca kho tvaṃ, kassapa, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhihesā, kassapa, ariyassa vinaye yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjati.
‘‘ထေရော စေပိ , ကသ္သပ, ဘိက္ခု ဟောတိ န သိက္ခာကာမော န သိက္ခာသမာဒာနသ္သ ဝဏ္ဏဝာဒီ, ယေ စညေ ဘိက္ခူ န သိက္ခာကာမာ တေ စ န သိက္ခာယ သမာဒပေတိ, ယေ စညေ ဘိက္ခူ သိက္ခာကာမာ တေသဉ္စ န ဝဏ္ဏံ ဘဏတိ ဘူတံ တစ္ဆံ ကာလေန, ဧဝရူပသ္သာဟံ, ကသ္သပ, ထေရသ္သ ဘိက္ခုနော န ဝဏ္ဏံ ဘဏာမိ။ တံ ကိသ္သ ဟေတု? သတ္ထာ ဟိသ္သ ဝဏ္ဏံ ဘဏတီတိ အညေ နံ 9 ဘိက္ခူ ဘဇေယ္ယုံ, ယေ နံ ဘဇေယ္ယုံ တ္ယာသ္သ ဒိဋ္ဌာနုဂတိံ အာပဇ္ဇေယ္ယုံ, ယ္ယာသ္သ ဒိဋ္ဌာနုဂတိံ အာပဇ္ဇေယ္ယုံ တေသံ တံ အသ္သ ဒီဃရတ္တံ အဟိတာယ ဒုက္ခာယာတိ။ တသ္မာဟံ, ကသ္သပ, ဧဝရူပသ္သ ထေရသ္သ ဘိက္ခုနော န ဝဏ္ဏံ ဘဏာမိ။
‘‘Thero cepi , kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ 10 bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa therassa bhikkhuno na vaṇṇaṃ bhaṇāmi.
‘‘မဇ္ဈိမော စေပိ, ကသ္သပ, ဘိက္ခု ဟောတိ။ပေ.။ နဝော စေပိ, ကသ္သပ, ဘိက္ခု ဟောတိ န သိက္ခာကာမော န သိက္ခာသမာဒာနသ္သ ဝဏ္ဏဝာဒီ, ယေ စညေ ဘိက္ခူ န သိက္ခာကာမာ တေ စ န သိက္ခာယ သမာဒပေတိ, ယေ စညေ ဘိက္ခူ သိက္ခာကာမာ တေသဉ္စ န ဝဏ္ဏံ ဘဏတိ ဘူတံ တစ္ဆံ ကာလေန, ဧဝရူပသ္သာဟံ, ကသ္သပ, နဝသ္သ ဘိက္ခုနော န ဝဏ္ဏံ ဘဏာမိ။ တံ ကိသ္သ ဟေတု? သတ္ထာ ဟိသ္သ ဝဏ္ဏံ ဘဏတီတိ အညေ နံ ဘိက္ခူ ဘဇေယ္ယုံ, ယေ နံ ဘဇေယ္ယုံ တ္ယာသ္သ ဒိဋ္ဌာနုဂတိံ အာပဇ္ဇေယ္ယုံ, ယ္ယာသ္သ ဒိဋ္ဌာနုဂတိံ အာပဇ္ဇေယ္ယုံ တေသံ တံ အသ္သ ဒီဃရတ္တံ အဟိတာယ ဒုက္ခာယာတိ။ တသ္မာဟံ, ကသ္သပ, ဧဝရူပသ္သ နဝသ္သ ဘိက္ခုနော န ဝဏ္ဏံ ဘဏာမိ။
‘‘Majjhimo cepi, kassapa, bhikkhu hoti…pe… navo cepi, kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa navassa bhikkhuno na vaṇṇaṃ bhaṇāmi.
‘‘ထေရော စေပိ, ကသ္သပ, ဘိက္ခု ဟောတိ သိက္ခာကာမော သိက္ခာသမာဒာနသ္သ ဝဏ္ဏဝာဒီ, ယေ စညေ ဘိက္ခူ န သိက္ခာကာမာ တေ စ သိက္ခာယ သမာဒပေတိ, ယေ စညေ ဘိက္ခူ သိက္ခာကာမာ တေသဉ္စ ဝဏ္ဏံ ဘဏတိ ဘူတံ တစ္ဆံ ကာလေန, ဧဝရူပသ္သာဟံ, ကသ္သပ, ထေရသ္သ ဘိက္ခုနော ဝဏ္ဏံ ဘဏာမိ။ တံ ကိသ္သ ဟေတု? သတ္ထာ ဟိသ္သ ဝဏ္ဏံ ဘဏတီတိ အညေ နံ ဘိက္ခူ ဘဇေယ္ယုံ, ယေ နံ ဘဇေယ္ယုံ တ္ယာသ္သ ဒိဋ္ဌာနုဂတိံ အာပဇ္ဇေယ္ယုံ, ယ္ယာသ္သ ဒိဋ္ဌာနုဂတိံ အာပဇ္ဇေယ္ယုံ တေသံ တံ အသ္သ ဒီဃရတ္တံ ဟိတာယ သုခာယာတိ။ တသ္မာဟံ, ကသ္သပ, ဧဝရူပသ္သ ထေရသ္သ ဘိက္ခုနော ဝဏ္ဏံ ဘဏာမိ။
‘‘Thero cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa therassa bhikkhuno vaṇṇaṃ bhaṇāmi.
‘‘မဇ္ဈိမော စေပိ, ကသ္သပ, ဘိက္ခု ဟောတိ သိက္ခာကာမော။ပေ.။ နဝော စေပိ, ကသ္သပ, ဘိက္ခု ဟောတိ သိက္ခာကာမော သိက္ခာသမာဒာနသ္သ ဝဏ္ဏဝာဒီ, ယေ စညေ ဘိက္ခူ န သိက္ခာကာမာ တေ စ သိက္ခာယ သမာဒပေတိ, ယေ စညေ ဘိက္ခူ သိက္ခာကာမာ တေသဉ္စ ဝဏ္ဏံ ဘဏတိ ဘူတံ တစ္ဆံ ကာလေန, ဧဝရူပသ္သာဟံ, ကသ္သပ, နဝသ္သ ဘိက္ခုနော ဝဏ္ဏံ ဘဏာမိ။ တံ ကိသ္သ ဟေတု? သတ္ထာ ဟိသ္သ ဝဏ္ဏံ ဘဏတီတိ အညေ နံ ဘိက္ခူ ဘဇေယ္ယုံ, ယေ နံ ဘဇေယ္ယုံ တ္ယာသ္သ ဒိဋ္ဌာနုဂတိံ အာပဇ္ဇေယ္ယုံ, ယ္ယာသ္သ ဒိဋ္ဌာနုဂတိံ အာပဇ္ဇေယ္ယုံ တေသံ တံ အသ္သ ဒီဃရတ္တံ ဟိတာယ သုခာယာတိ။ တသ္မာဟံ, ကသ္သပ, ဧဝရူပသ္သ နဝသ္သ ဘိက္ခုနော ဝဏ္ဏံ ဘဏာမီ’’တိ။ ဧကာဒသမံ။
‘‘Majjhimo cepi, kassapa, bhikkhu hoti sikkhākāmo…pe… navo cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa navassa bhikkhuno vaṇṇaṃ bhaṇāmī’’ti. Ekādasamaṃ.
သမဏဝဂ္ဂော နဝမော။
Samaṇavaggo navamo.
တသ္သုဒ္ဒာနံ –
Tassuddānaṃ –
သမဏော ဂဒ္ရဘော ခေတ္တံ၊ ဝဇ္ဇိပုတ္တော စ သေက္ခကံ။
Samaṇo gadrabho khettaṃ, vajjiputto ca sekkhakaṃ;
တယော စ သိက္ခနာ ဝုတ္တာ၊ ဒ္ဝေ သိက္ခာ သင္ကဝာယ စာတိ။
Tayo ca sikkhanā vuttā, dve sikkhā saṅkavāya cāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၁. သင္ကဝာသုတ္တဝဏ္ဏနာ • 11. Saṅkavāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၁. သင္ကဝာသုတ္တဝဏ္ဏနာ • 11. Saṅkavāsuttavaṇṇanā
