| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༡. སངྐཝཱསུཏྟཾ
11. Saṅkavāsuttaṃ
༩༢. ཨེཀཾ སམཡཾ བྷགཝཱ ཀོསལེསུ ཙཱརིཀཾ ཙརམཱནོ མཧཏཱ བྷིཀྑུསངྒྷེན སདྡྷིཾ ཡེན སངྐཝཱ 1 ནཱམ ཀོསལཱནཾ ནིགམོ ཏདཝསརི། ཏཏྲ སུདཾ བྷགཝཱ སངྐཝཱཡཾ ཝིཧརཏི། ཏེན ཁོ པན སམཡེན ཀསྶཔགོཏྟོ ནཱམ བྷིཀྑུ སངྐཝཱཡཾ ཨཱཝཱསིཀོ ཧོཏི། ཏཏྲ སུདཾ བྷགཝཱ སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེཏི སམཱདཔེཏི སམུཏྟེཛེཏི སམྤཧཾསེཏི། ཨཐ ཁོ ཀསྶཔགོཏྟསྶ བྷིཀྑུནོ བྷགཝཏི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘‘ཨདྷིསལླིཁཏེཝཱཡཾ 2 སམཎོ’’ཏི། ཨཐ ཁོ བྷགཝཱ སངྐཝཱཡཾ ཡཐཱབྷིརནྟཾ ཝིཧརིཏྭཱ ཡེན རཱཛགཧཾ ཏེན ཙཱརིཀཾ པཀྐཱམི། ཨནུཔུབྦེན ཙཱརིཀཾ ཙརམཱནོ ཡེན རཱཛགཧཾ ཏདཝསརི། ཏཏྲ སུདཾ བྷགཝཱ རཱཛགཧེ ཝིཧརཏི།
92. Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena saṅkavā 3 nāma kosalānaṃ nigamo tadavasari. Tatra sudaṃ bhagavā saṅkavāyaṃ viharati. Tena kho pana samayena kassapagotto nāma bhikkhu saṅkavāyaṃ āvāsiko hoti. Tatra sudaṃ bhagavā sikkhāpadapaṭisaṃyuttāya dhammiyā kathāya bhikkhū sandasseti samādapeti samuttejeti sampahaṃseti. Atha kho kassapagottassa bhikkhuno bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘‘adhisallikhatevāyaṃ 4 samaṇo’’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. Anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati.
ཨཐ ཁོ ཀསྶཔགོཏྟསྶ བྷིཀྑུནོ ཨཙིརཔཀྐནྟསྶ བྷགཝཏོ ཨཧུདེཝ ཀུཀྐུཙྩཾ ཨཧུ ཝིཔྤཊིསཱརོ – ‘‘ཨལཱབྷཱ ཝཏ མེ, ན ཝཏ མེ ལཱབྷཱ ; དུལླདྡྷཾ ཝཏ མེ, ན ཝཏ མེ སུལདྡྷཾ; ཡསྶ མེ བྷགཝཏི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘ཨདྷིསལླིཁཏེཝཱཡཾ སམཎོ’ཏི། ཡཾནཱུནཱཧཾ ཡེན བྷགཝཱ ཏེནུཔསངྐམེཡྻཾ; ཨུཔསངྐམིཏྭཱ བྷགཝཏོ སནྟིཀེ ཨཙྩཡཾ ཨཙྩཡཏོ དེསེཡྻ’’ནྟི། ཨཐ ཁོ ཀསྶཔགོཏྟོ བྷིཀྑུ སེནཱསནཾ སཾསཱམེཏྭཱ པཏྟཙཱིཝརམཱདཱཡ ཡེན རཱཛགཧཾ ཏེན པཀྐཱམི། ཨནུཔུབྦེན ཡེན རཱཛགཧཾ ཡེན གིཛ྄ཛྷཀཱུཊོ པབྦཏོ ཡེན བྷགཝཱ ཏེནུཔསངྐམི ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཀསྶཔགོཏྟོ བྷིཀྑུ བྷགཝནྟཾ ཨེཏདཝོཙ –
Atha kho kassapagottassa bhikkhuno acirapakkantassa bhagavato ahudeva kukkuccaṃ ahu vippaṭisāro – ‘‘alābhā vata me, na vata me lābhā ; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena rājagahaṃ tena pakkāmi. Anupubbena yena rājagahaṃ yena gijjhakūṭo pabbato yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho kassapagotto bhikkhu bhagavantaṃ etadavoca –
‘‘ཨེཀམིདཾ, བྷནྟེ, སམཡཾ བྷགཝཱ སངྐཝཱཡཾ ཝིཧརཏི, སངྐཝཱ ནཱམ ཀོསལཱནཾ ནིགམོ། ཏཏྲ, བྷནྟེ, བྷགཝཱ སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེསི སམཱདཔེསི སམུཏྟེཛེསི སམྤཧཾསེསི། ཏསྶ མཡ྄ཧཾ བྷགཝཏི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘ཨདྷིསལླིཁཏེཝཱཡཾ སམཎོ’ཏི། ཨཐ ཁོ བྷགཝཱ སངྐཝཱཡཾ ཡཐཱབྷིརནྟཾ ཝིཧརིཏྭཱ ཡེན རཱཛགཧཾ ཏེན ཙཱརིཀཾ པཀྐཱམི། ( ) 5 ཏསྶ མཡ྄ཧཾ, བྷནྟེ, ཨཙིརཔཀྐནྟསྶ བྷགཝཏོ ཨཧུདེཝ ཀུཀྐུཙྩཾ ཨཧུ ཝིཔྤཊིསཱརོ – ཨལཱབྷཱ ཝཏ མེ, ན ཝཏ མེ ལཱབྷཱ; དུལླདྡྷཾ ཝཏ མེ, ན ཝཏ མེ སུལདྡྷཾ; ཡསྶ མེ བྷགཝཏི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘ཨདྷིསལླིཁཏེཝཱཡཾ སམཎོ’ཏི། ཡཾནཱུནཱཧཾ ཡེན བྷགཝཱ ཏེནུཔསངྐམེཡྻཾ; ཨུཔསངྐམིཏྭཱ བྷགཝཏོ སནྟིཀེ ཨཙྩཡཾ ཨཙྩཡཏོ དེསེཡྻནྟི། ཨཙྩཡོ མཾ, བྷནྟེ , ཨཙྩགམཱ ཡཐཱབཱལཾ ཡཐཱམཱུལ༹ྷཾ ཡཐཱཨཀུསལཾ ཡསྶ མེ བྷགཝཏི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘ཨདྷིསལླིཁཏེཝཱཡཾ སམཎོ’ཏི། ཏསྶ མེ, བྷནྟེ, བྷགཝཱ ཨཙྩཡཾ ཨཙྩཡཏོ པཊིགྒཎྷཱཏུ, ཨཱཡཏིཾ སཾཝརཱཡཱ’’ཏི།
‘‘Ekamidaṃ, bhante, samayaṃ bhagavā saṅkavāyaṃ viharati, saṅkavā nāma kosalānaṃ nigamo. Tatra, bhante, bhagavā sikkhāpadapaṭisaṃyuttāya dhammiyā kathāya bhikkhū sandassesi samādapesi samuttejesi sampahaṃsesi. Tassa mayhaṃ bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Atha kho bhagavā saṅkavāyaṃ yathābhirantaṃ viharitvā yena rājagahaṃ tena cārikaṃ pakkāmi. ( ) 6 Tassa mayhaṃ, bhante, acirapakkantassa bhagavato ahudeva kukkuccaṃ ahu vippaṭisāro – alābhā vata me, na vata me lābhā; dulladdhaṃ vata me, na vata me suladdhaṃ; yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yaṃnūnāhaṃ yena bhagavā tenupasaṅkameyyaṃ; upasaṅkamitvā bhagavato santike accayaṃ accayato deseyyanti. Accayo maṃ, bhante , accagamā yathābālaṃ yathāmūḷhaṃ yathāakusalaṃ yassa me bhagavati sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Tassa me, bhante, bhagavā accayaṃ accayato paṭiggaṇhātu, āyatiṃ saṃvarāyā’’ti.
‘‘ཏགྒྷ ཏཾ 7, ཀསྶཔ, ཨཙྩཡོ ཨཙྩགམཱ ཡཐཱབཱལཾ ཡཐཱམཱུལ༹ྷཾ ཡཐཱཨཀུསལཾ, ཡསྶ ཏེ མཡི སིཀྑཱཔདཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུ སནྡསྶེནྟེ སམཱདཔེནྟེ སམུཏྟེཛེནྟེ སམྤཧཾསེནྟེ ཨཧུདེཝ ཨཀྑནྟི ཨཧུ ཨཔྤཙྩཡོ – ‘ཨདྷིསལླིཁཏེཝཱཡཾ སམཎོ’ཏི། ཡཏོ ཙ ཁོ ཏྭཾ, ཀསྶཔ, ཨཙྩཡཾ ཨཙྩཡཏོ དིསྭཱ ཡཐཱདྷམྨཾ པཊིཀརོསི, ཏཾ ཏེ མཡཾ པཊིགྒཎྷཱམ། ཝུདྡྷིཧེསཱ, ཀསྶཔ, ཨརིཡསྶ ཝིནཡེ ཡོ ཨཙྩཡཾ ཨཙྩཡཏོ དིསྭཱ ཡཐཱདྷམྨཾ པཊིཀརོཏི, ཨཱཡཏིཾ སཾཝརཾ ཨཱཔཛྫཏི།
‘‘Taggha taṃ 8, kassapa, accayo accagamā yathābālaṃ yathāmūḷhaṃ yathāakusalaṃ, yassa te mayi sikkhāpadapaṭisaṃyuttāya dhammiyā kathāya bhikkhū sandassente samādapente samuttejente sampahaṃsente ahudeva akkhanti ahu appaccayo – ‘adhisallikhatevāyaṃ samaṇo’ti. Yato ca kho tvaṃ, kassapa, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhihesā, kassapa, ariyassa vinaye yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjati.
‘‘ཐེརོ ཙེཔི , ཀསྶཔ, བྷིཀྑུ ཧོཏི ན སིཀྑཱཀཱམོ ན སིཀྑཱསམཱདཱནསྶ ཝཎྞཝཱདཱི, ཡེ ཙཉྙེ བྷིཀྑཱུ ན སིཀྑཱཀཱམཱ ཏེ ཙ ན སིཀྑཱཡ སམཱདཔེཏི, ཡེ ཙཉྙེ བྷིཀྑཱུ སིཀྑཱཀཱམཱ ཏེསཉྩ ན ཝཎྞཾ བྷཎཏི བྷཱུཏཾ ཏཙྪཾ ཀཱལེན, ཨེཝརཱུཔསྶཱཧཾ, ཀསྶཔ, ཐེརསྶ བྷིཀྑུནོ ན ཝཎྞཾ བྷཎཱམི། ཏཾ ཀིསྶ ཧེཏུ? སཏྠཱ ཧིསྶ ཝཎྞཾ བྷཎཏཱིཏི ཨཉྙེ ནཾ 9 བྷིཀྑཱུ བྷཛེཡྻུཾ, ཡེ ནཾ བྷཛེཡྻུཾ ཏྱཱསྶ དིཊྛཱནུགཏིཾ ཨཱཔཛྫེཡྻུཾ, ཡྻཱསྶ དིཊྛཱནུགཏིཾ ཨཱཔཛྫེཡྻུཾ ཏེསཾ ཏཾ ཨསྶ དཱིགྷརཏྟཾ ཨཧིཏཱཡ དུཀྑཱཡཱཏི། ཏསྨཱཧཾ, ཀསྶཔ, ཨེཝརཱུཔསྶ ཐེརསྶ བྷིཀྑུནོ ན ཝཎྞཾ བྷཎཱམི།
‘‘Thero cepi , kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ 10 bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa therassa bhikkhuno na vaṇṇaṃ bhaṇāmi.
‘‘མཛ྄ཛྷིམོ ཙེཔི, ཀསྶཔ, བྷིཀྑུ ཧོཏི…པེ॰… ནཝོ ཙེཔི, ཀསྶཔ, བྷིཀྑུ ཧོཏི ན སིཀྑཱཀཱམོ ན སིཀྑཱསམཱདཱནསྶ ཝཎྞཝཱདཱི, ཡེ ཙཉྙེ བྷིཀྑཱུ ན སིཀྑཱཀཱམཱ ཏེ ཙ ན སིཀྑཱཡ སམཱདཔེཏི, ཡེ ཙཉྙེ བྷིཀྑཱུ སིཀྑཱཀཱམཱ ཏེསཉྩ ན ཝཎྞཾ བྷཎཏི བྷཱུཏཾ ཏཙྪཾ ཀཱལེན, ཨེཝརཱུཔསྶཱཧཾ, ཀསྶཔ, ནཝསྶ བྷིཀྑུནོ ན ཝཎྞཾ བྷཎཱམི། ཏཾ ཀིསྶ ཧེཏུ? སཏྠཱ ཧིསྶ ཝཎྞཾ བྷཎཏཱིཏི ཨཉྙེ ནཾ བྷིཀྑཱུ བྷཛེཡྻུཾ, ཡེ ནཾ བྷཛེཡྻུཾ ཏྱཱསྶ དིཊྛཱནུགཏིཾ ཨཱཔཛྫེཡྻུཾ, ཡྻཱསྶ དིཊྛཱནུགཏིཾ ཨཱཔཛྫེཡྻུཾ ཏེསཾ ཏཾ ཨསྶ དཱིགྷརཏྟཾ ཨཧིཏཱཡ དུཀྑཱཡཱཏི། ཏསྨཱཧཾ, ཀསྶཔ, ཨེཝརཱུཔསྶ ནཝསྶ བྷིཀྑུནོ ན ཝཎྞཾ བྷཎཱམི།
‘‘Majjhimo cepi, kassapa, bhikkhu hoti…pe… navo cepi, kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno na vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ ahitāya dukkhāyāti. Tasmāhaṃ, kassapa, evarūpassa navassa bhikkhuno na vaṇṇaṃ bhaṇāmi.
‘‘ཐེརོ ཙེཔི, ཀསྶཔ, བྷིཀྑུ ཧོཏི སིཀྑཱཀཱམོ སིཀྑཱསམཱདཱནསྶ ཝཎྞཝཱདཱི, ཡེ ཙཉྙེ བྷིཀྑཱུ ན སིཀྑཱཀཱམཱ ཏེ ཙ སིཀྑཱཡ སམཱདཔེཏི, ཡེ ཙཉྙེ བྷིཀྑཱུ སིཀྑཱཀཱམཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེན, ཨེཝརཱུཔསྶཱཧཾ, ཀསྶཔ, ཐེརསྶ བྷིཀྑུནོ ཝཎྞཾ བྷཎཱམི། ཏཾ ཀིསྶ ཧེཏུ? སཏྠཱ ཧིསྶ ཝཎྞཾ བྷཎཏཱིཏི ཨཉྙེ ནཾ བྷིཀྑཱུ བྷཛེཡྻུཾ, ཡེ ནཾ བྷཛེཡྻུཾ ཏྱཱསྶ དིཊྛཱནུགཏིཾ ཨཱཔཛྫེཡྻུཾ, ཡྻཱསྶ དིཊྛཱནུགཏིཾ ཨཱཔཛྫེཡྻུཾ ཏེསཾ ཏཾ ཨསྶ དཱིགྷརཏྟཾ ཧིཏཱཡ སུཁཱཡཱཏི། ཏསྨཱཧཾ, ཀསྶཔ, ཨེཝརཱུཔསྶ ཐེརསྶ བྷིཀྑུནོ ཝཎྞཾ བྷཎཱམི།
‘‘Thero cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, therassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa therassa bhikkhuno vaṇṇaṃ bhaṇāmi.
‘‘མཛ྄ཛྷིམོ ཙེཔི, ཀསྶཔ, བྷིཀྑུ ཧོཏི སིཀྑཱཀཱམོ…པེ॰… ནཝོ ཙེཔི, ཀསྶཔ, བྷིཀྑུ ཧོཏི སིཀྑཱཀཱམོ སིཀྑཱསམཱདཱནསྶ ཝཎྞཝཱདཱི, ཡེ ཙཉྙེ བྷིཀྑཱུ ན སིཀྑཱཀཱམཱ ཏེ ཙ སིཀྑཱཡ སམཱདཔེཏི, ཡེ ཙཉྙེ བྷིཀྑཱུ སིཀྑཱཀཱམཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེན, ཨེཝརཱུཔསྶཱཧཾ, ཀསྶཔ, ནཝསྶ བྷིཀྑུནོ ཝཎྞཾ བྷཎཱམི། ཏཾ ཀིསྶ ཧེཏུ? སཏྠཱ ཧིསྶ ཝཎྞཾ བྷཎཏཱིཏི ཨཉྙེ ནཾ བྷིཀྑཱུ བྷཛེཡྻུཾ, ཡེ ནཾ བྷཛེཡྻུཾ ཏྱཱསྶ དིཊྛཱནུགཏིཾ ཨཱཔཛྫེཡྻུཾ, ཡྻཱསྶ དིཊྛཱནུགཏིཾ ཨཱཔཛྫེཡྻུཾ ཏེསཾ ཏཾ ཨསྶ དཱིགྷརཏྟཾ ཧིཏཱཡ སུཁཱཡཱཏི། ཏསྨཱཧཾ, ཀསྶཔ, ཨེཝརཱུཔསྶ ནཝསྶ བྷིཀྑུནོ ཝཎྞཾ བྷཎཱམཱི’’ཏི། ཨེཀཱདསམཾ།
‘‘Majjhimo cepi, kassapa, bhikkhu hoti sikkhākāmo…pe… navo cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṃ bhaṇati bhūtaṃ tacchaṃ kālena, evarūpassāhaṃ, kassapa, navassa bhikkhuno vaṇṇaṃ bhaṇāmi. Taṃ kissa hetu? Satthā hissa vaṇṇaṃ bhaṇatīti aññe naṃ bhikkhū bhajeyyuṃ, ye naṃ bhajeyyuṃ tyāssa diṭṭhānugatiṃ āpajjeyyuṃ, yyāssa diṭṭhānugatiṃ āpajjeyyuṃ tesaṃ taṃ assa dīgharattaṃ hitāya sukhāyāti. Tasmāhaṃ, kassapa, evarūpassa navassa bhikkhuno vaṇṇaṃ bhaṇāmī’’ti. Ekādasamaṃ.
སམཎཝགྒོ ནཝམོ།
Samaṇavaggo navamo.
ཏསྶུདྡཱནཾ –
Tassuddānaṃ –
སམཎོ གདྲབྷོ ཁེཏྟཾ, ཝཛྫིཔུཏྟོ ཙ སེཀྑཀཾ།
Samaṇo gadrabho khettaṃ, vajjiputto ca sekkhakaṃ;
ཏཡོ ཙ སིཀྑནཱ ཝུཏྟཱ, དྭེ སིཀྑཱ སངྐཝཱཡ ཙཱཏི༎
Tayo ca sikkhanā vuttā, dve sikkhā saṅkavāya cāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༡. སངྐཝཱསུཏྟཝཎྞནཱ • 11. Saṅkavāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༡. སངྐཝཱསུཏྟཝཎྞནཱ • 11. Saṅkavāsuttavaṇṇanā
