| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
11. ஸங்கவாஸுத்தவண்ணனா
11. Saṅkavāsuttavaṇṇanā
92. ஏகாத³ஸமே ஸங்கவா நாம கோஸலானங் நிக³மோதி ஸங்கவாதி ஏவங்னாமகோ கோஸலரட்டே² நிக³மோ. ஆவாஸிகோதி பா⁴ரஹாரோ நவே ஆவாஸே ஸமுட்டா²பேதி, புராணே படிஜக்³க³தி. ஸிக்கா²பத³படிஸங்யுத்தாயாதி ஸிக்கா²ஸங்கா²தேஹி பதே³ஹி படிஸங்யுத்தாய, தீஹி ஸிக்கா²ஹி ஸமன்னாக³தாயாதி அத்தோ². ஸந்த³ஸ்ஸேதீதி ஸம்முகே² விய கத்வா த³ஸ்ஸேதி. ஸமாத³பேதீதி க³ண்ஹாபேதி. ஸமுத்தேஜேதீதி ஸமுஸ்ஸாஹேதி. ஸம்பஹங்ஸேதீதி படிலத்³த⁴கு³ணேஹி வண்ணங் கதெ²ந்தோ வோதா³பேதி. அதி⁴ஸல்லிக²தேதி அதிவிய ஸல்லிக²தி, அதிவிய ஸல்லிகி²தங் கத்வா ஸண்ஹங் ஸண்ஹங் கதே²தீதி அத்தோ².
92. Ekādasame saṅkavā nāma kosalānaṃ nigamoti saṅkavāti evaṃnāmako kosalaraṭṭhe nigamo. Āvāsikoti bhārahāro nave āvāse samuṭṭhāpeti, purāṇe paṭijaggati. Sikkhāpadapaṭisaṃyuttāyāti sikkhāsaṅkhātehi padehi paṭisaṃyuttāya, tīhi sikkhāhi samannāgatāyāti attho. Sandassetīti sammukhe viya katvā dasseti. Samādapetīti gaṇhāpeti. Samuttejetīti samussāheti. Sampahaṃsetīti paṭiladdhaguṇehi vaṇṇaṃ kathento vodāpeti. Adhisallikhateti ativiya sallikhati, ativiya sallikhitaṃ katvā saṇhaṃ saṇhaṃ kathetīti attho.
அச்சயோதி அபராதோ⁴. மங் அச்சக³மாதி மங் அதிக்கம்ம அதி⁴ப⁴வித்வா பவத்தோ. அஹுதே³வ அக்க²ந்தீதி அஹோஸியேவ அனதி⁴வாஸனா. அஹு அப்பச்சயோதி அஹோஸி அதுட்டா²காரோ. படிக்³க³ண்ஹாதூதி க²மது. ஆயதிங் ஸங்வராயாதி அனாக³தே ஸங்வரத்தா²ய, புன ஏவரூபஸ்ஸ அபராத⁴ஸ்ஸ தோ³ஸஸ்ஸ க²லிதஸ்ஸ வா அகரணத்தா²யாதி அத்தோ². தக்³கா⁴தி ஏகங்ஸேன. யதா²த⁴ம்மங் படிகரோஸீதி யதா² த⁴ம்மோ டி²தோ, ததா² கரோஸி, க²மாபேஸீதி வுத்தங் ஹோதி. தங் தே மயங் படிக்³க³ண்ஹாமாதி தங் தவ அபராத⁴ங் மயங் க²மாம. வுத்³தி⁴ஹேஸா, கஸ்ஸப, அரியஸ்ஸ வினயேதி ஏஸா கஸ்ஸப பு³த்³த⁴ஸ்ஸ ப⁴க³வதோ ஸாஸனே வுத்³தி⁴ நாம. கதமா? யாயங் அச்சயங் அச்சயதோ தி³ஸ்வா யதா²த⁴ம்மங் படிகரித்வா ஆயதிங் ஸங்வராபஜ்ஜனா. தே³ஸனங் பன புக்³க³லாதி⁴ட்டா²னங் கரொந்தோ ‘‘யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி ஆஹ. ந ஸிக்கா²காமோதி திஸ்ஸோ ஸிக்கா² ந காமேதி ந பத்தே²தி ந பிஹேதி. ஸிக்கா²ஸமாதா³னஸ்ஸாதி ஸிக்கா²பரிபூரணஸ்ஸ. ந வண்ணவாதீ³தி கு³ணங் ந கதே²தி. காலேனாதி யுத்தப்பயுத்தகாலேன. ஸேஸமெத்த² உத்தானத்த²மேவாதி.
Accayoti aparādho. Maṃ accagamāti maṃ atikkamma adhibhavitvā pavatto. Ahudeva akkhantīti ahosiyeva anadhivāsanā. Ahu appaccayoti ahosi atuṭṭhākāro. Paṭiggaṇhātūti khamatu. Āyatiṃ saṃvarāyāti anāgate saṃvaratthāya, puna evarūpassa aparādhassa dosassa khalitassa vā akaraṇatthāyāti attho. Tagghāti ekaṃsena. Yathādhammaṃ paṭikarosīti yathā dhammo ṭhito, tathā karosi, khamāpesīti vuttaṃ hoti. Taṃ te mayaṃ paṭiggaṇhāmāti taṃ tava aparādhaṃ mayaṃ khamāma. Vuddhihesā, kassapa, ariyassa vinayeti esā kassapa buddhassa bhagavato sāsane vuddhi nāma. Katamā? Yāyaṃ accayaṃ accayato disvā yathādhammaṃ paṭikaritvā āyatiṃ saṃvarāpajjanā. Desanaṃ pana puggalādhiṭṭhānaṃ karonto ‘‘yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjatī’’ti āha. Na sikkhākāmoti tisso sikkhā na kāmeti na pattheti na piheti. Sikkhāsamādānassāti sikkhāparipūraṇassa. Na vaṇṇavādīti guṇaṃ na katheti. Kālenāti yuttappayuttakālena. Sesamettha uttānatthamevāti.
ஸமணவக்³கோ³ சதுத்தோ².
Samaṇavaggo catuttho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 11. ஸங்கவாஸுத்தங் • 11. Saṅkavāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 11. ஸங்கவாஸுத்தவண்ணனா • 11. Saṅkavāsuttavaṇṇanā
